1. Ịyẹ iJihova à tị́ ju angị kaa gbịgba họọ ọhụ nyọka họ? (Yẹ ifoto ịnyịnyị.)

 OWO ahị tị́ ka ka ẹga nyamwụ kọ ka kpụ́ụhị ẹjẹ bala ọ-ka kpahị ụgbẹyị? Ahị jẹ́ ọwẹwẹ nya ịtọ ẹla ọwẹ. IJihova à ri ọngọlẹ kahị ka jẹ́-ẹ raabwọ ha lẹ. Ọ dọmwụ juhi ọhụ nyọka họ ịnyị. Nyọlẹ ká ịBayịbụụ ya ahị nyị raabwọ “ụka myị́ ụka” wẹẹ, ahị jẹ́ nyori Ohe tịtọ kahị ka raabwọ ụka ọnyị myị́ ọnyị. (1 Tẹs. 5:17) Ahị ka jẹ́-ẹ tụ jwoo chwẹẹ ẹ-ẹpwụ nya abwọ ọrịrị ụka myị́ ụka bala ọ-ka bịlọọ kọ ka kpahị ụgbẹyị ẹ-ẹpwụ nya ụpa nya ọhịhị nyahị ọnyị myị́ ọnyị. (Etu 3:5, 6) Nyọlẹ ká iJihova ri Ohe ọlẹ kọ kaa hu ha pyẹ ụbwọ maa wẹẹ, o ya ahị nyị ka jẹ́-ẹ raabwọ họọ ugbabwọ ịmanyị tị́ ọlẹ kọ háahị myị́.

2. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Āhị nya abwọ ọrịrị myịhị lẹhị. Ma, chajị nya akụrwọ ịlẹ kahị la ka họ, ọ kaa lujwo ụka ọhẹ nyọka ye ụka raabwọ. Ọ ka myịmyị-ị̀ lahị lala o-ri ahị nyị baba nyọka họ ká abwọ ọrịrị nyahị ka há gụ ọọwa myị́. Ọ kpịpyọ nyori ahị ka jẹ́-ẹ yé ọhụ ojuju bala ụbwọ ọdada bwu ẹpwụ nya ịBayịbụụ. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ abwọlẹ kahị ka jẹ́-ẹ hu ụka nọ nya abwọ ọrịrị bwula ọ-dịrẹ ọgụ-ẹpẹtẹ nya iJisọsị. Ahị ka myịmyị-ị̀ ya ẹla u-uhye nya abwọlẹ kahị ka họ ká abwọ ọrịrị nyahị ka há gụ ọọwa bwula o-ya ẹla u-uhye nya egbeju nya ẹla ịrụ ịlẹ kị baba yẹẹyẹẹ.

3. Ẹlịyẹ iJisọsị à tị́ jẹ́ u-uhye nya abwọ ọrịrị bwu ẹga nya iJihova?

³ IJisọsị jẹ́ nyori abwọ ọrịrị nyahị nyị baba ha iJihova. Ene kọọ wẹ odehe, ọ yẹ jaabwọ ka iJihova kaa wẹ abwọ ọrịrị nya alẹng bala anyang ị-la ọmyịmyị. Ọ-chụ pwokwita,  iJisọsị juwa ẹ-ẹga nya Adamwụ ụka ọlẹ kọ wẹẹ wẹ abwọ ọrịrị o-bwu ọkịlẹtụ nya ịHana, iDevidi, Ịlayịja, bala angịkịla. (1 Sam. 1:10, 11, 20; 1 Ịdị. 19:4-6; Eje. 32:5) Ọọwa à dudu ká iJisọsị byi angịjụgbẹyị nyamwụ nyị raabwọ ụka wuu lahị ọdahile lẹ!—Mat. 7:7-11.

4. Ẹlịyẹ ahị tị́ jẹ́ bwu abwọ ọrịrị nya iJisọsị?

⁴ Nyọlẹ ká iJisọsị kaa raabwọ ha iJihova wẹẹ, ọ ya ọgụ-ẹpẹtẹ deeji ha angịjụgbẹyị nyamwụ nyọka dịrẹ. Ẹ-ẹpwụ nya ụka ọlẹ ká iJisọsị kaa kpa ẹrụ ọnyịịla pyẹ, ọ kaa raabwọ ụka wuu. Ọ kaa hu ụka nọ nya abwọ ọrịrị chajị ọ́ kaa hi ụbwọ nwà ka bala o-ri angịnyị lụmẹ-lụmẹ kaa dakoko jwoo. (Mak. 6:31, 45, 46) O wuleji la ewu-ụtụrụ chajị kọ ka ji ụbwọọmwụ nyọka raabwọ. (Mak. 1:35) Ụka ọhẹ dọmwụ juwa kọ raabwọ lodu nya ẹnẹhẹ wuu ene kọọ cheje nya ẹla ọkpọnchị ọhẹ. (Luk. 6:12, 13) IJisọsị tị raabwọ ugbabwọ ịmányị tị́ lodu kọ chịpwụrụ ene kịị nwọọ, jaabwọ kọ wẹẹ ka chị ụpa ọlẹ kọ lujwo gụ́gụ wuu eju ẹ-ẹpwụ nya ụkụrwọ ọlẹ kọ wẹ ka họ odehe ọlẹ.—Mat. 26:39, 42, 44.

5. Ányị ahị tị́ ka bwu gbịla iJisọsị ụka kahị ja raabwọ?

⁵ Ọ-chụ pwokwita nya iJisọsị mẹjẹ́ẹhị nyori, jaabwọ myị́ abwọ ká ụka á kaa nwahị ka kaka ba, ahị baba nyọka hu ụka nọ nya abwọ ọrịrị. Lala iJisọsị, ahị ka baba nyọka hu ụka nya abwọ ọrịrị nọ. Ọhẹka, ahị ka chahị hyaa la ewu-ụtụrụ lee ọ-ka hu-ehe chẹẹ ene kahị ka nune lobyi myị́. Ụka kahị họ ịnyị, ahị wẹẹ mẹjẹ iJihova nyori iwe ọnyịịla ọwẹ myịhị lẹhị. Ọọnahị ọnyang ọhẹ ká ẹnyị nyamwụ ri Lynne kpịtịya nya abwọlẹ kọ myọọ lẹhị kaka ba ụka ọhọhẹ ọlẹ kọ yẹ nyori iwe nya abwọ ọrịrị nyị ji. Ọ yẹkẹẹ, “Ụka kam jẹ́ nyori m̀ ka jẹ́-ẹ raabwọ ha iJihova ụka ọnyị myị́ ọnyị, ọọwa dam ụbwọ nyọka yọọ lala Oligu nyam bala ọ-kaa tịtọ nyọka họ ká abwọ ọrịrị nyam ka há gụ́ ọọwa.” Ịwẹẹ ọdada á juwa ka, ọ kaa la iru nyahị ịwịịwẹ. Lẹ, ahị kụ ẹhị yẹ ẹla ịrụ ịkpọnchị ịlẹ kahị ka jẹ́-ẹ gu ẹnyị ẹ-ẹpwụ nya abwọ ọrịrị nyahị wẹẹ.

6. Jaabwọ ká ụpwụ nya Ọwụrụụ-wụrụ 4:10, 11 ya, ịyẹ iJihova à tị́ chịla nyọka ye?

⁶ Gwogbo ha iJihova. Ẹ-ẹpwụ nya ọyị ọyẹyẹ ọkpịpyo-kpịpyọ ọhẹ, ọlẹrụ ịJọn yẹ ịgabwọ 24 kị ja gbịgba ha iJihova. Ị gwogbo ha Ohe, bwula o-ya nyori ọwa nya-à chịla nyọka “ye ogbo bala ihi bala ọngịrị wuu lẹlẹ.”  (Wa Ọwụrụụ-wụrụ 4:10, 11.) Alegu-ẹrụ ịlẹ kị godayị giri-giri la ang odudu ọlẹ kị ka gwogbo ha iJihova bala o-ju ihi nyamwụ ịnyịnyị. Ị juwa e-epwoohe balọọ kpụ ị wẹ ka jọ́ọ yẹẹyẹẹ lẹ. Ị wẹ ka yẹ abwẹla nyamwụ bwula ang ịlẹ kọ kaa họ. Jaabwọ kị wẹẹ yẹ abwọlẹ ká iJihova kaa họ ẹla, ọ kaa gwaa gbịla nyọka gwogbo họọ.—Job. 38:4-7.

7. Ahị tị́ ka jẹ́-ẹ gwogbo ha iJihova chajị nya ịyẹ?

⁷ Ahị ịnyịnyị tịtọ nyọka gwogbo ha iJihova ẹ-ẹpwụ nya abwọ ọrịrị nyahị, bwula o-gu ẹnyị nya ẹla nyamwụ ọlẹ kọ kaa háahị bala ọ-myịhị lẹhị. Jaabwọ ká wẹẹ wa ịBayịbụụ bala ọ-jẹ́ ang bwu ụwa, maga ká yẹ abwẹla nya iJihova ịlẹ kị háng gụ́gụ wuu. (Job. 37:23; Rom. 11:33) Ọọwa lẹ, a ya je iJihova jaabwọ ká abwẹla ịịwa myịng lẹhị kaka ba lẹlẹ. Ahị ka jẹ́-ẹ gwogbo ha iJihova chajị nya ang ọlẹ kọ họ hahị ahị la ịlọhị bala aanahị ịkịla ịla ọjịra-jịra wuu. Ọ kaa kpahị juhi bala ọ-chewu kehi ụka wuu.—1 Sam. 1:27; 2:1, 2.

8. Ang iyina à tị́ du kahị kaa ji iJihova obe ọhọhọ? (1 Ala ịTẹsalonika 5:18)

⁸ Ji iJihova obe ọhọhọ. Ahị la ang lụmẹ-lụmẹ ịlẹ kị dudu kahị ka ji iJihova obe ọhọhọ ẹ-ẹpwụ nya abwọ ọrịrị. (Wa 1 Ala ịTẹsalonika 5:18.) Ahị ka joo obe ọhọhọ chajị nya ang ịnyịịla ịlẹ wuu kahị la, chajị ẹga nyamwụ ang o-hu ha ọnyịịla ọnyị myị́ ọnyị wuu à bwu lẹ. (Jem. 1:17) Ọ-chụ pwokwita, ahị ka joo obe ọhọhọ chajị nya abwọlẹ kọ họ odehe ọlẹ hụhị-hụhị bala ang ịlẹbyẹbyị ịlẹ kọ họ myị́. Ahị ka jẹ́-ẹ myị́myị́ joo obe ọhọhọ chajị nya ọhịhị nyahị, ugbiyegu nyahị, aligu nyahị, bala ẹhị ọrịrịị-rịrị ọlẹ kahị la. Ahị ka ji iJihova obe ọhọhọ chajị nya iwe ọnyịịla ọlẹ kọ ya da hahị nyọka jẹ́-ẹ ri oligu nyamwụ.

9. Ịyẹ tị́ du ká ang ịlẹ ká iJihova họ hahị ka myịhị lẹhị?

⁹ Ahị ka baba nyọka maga yẹẹyẹẹ nyọka jẹ́-ẹ kụ irya ju ang odudu ọlẹ kahị la ịlọhị chịla nyọka ji iJihova obe ọhọhọ. Ahị jam odehe ọlẹ ká ẹla á kaa myị angịnyị lẹhị ka. Irya nya angịnyị kaa nọ uhye nya ang ịlẹ kị ka ye ọkọkọ nyọka ji obe ọhọhọ nya ịlẹ kị la. Kori kahị ja gbịla abwẹla ịlịịwe, abwọ ọrịrị nyahị ka myị̀ la ang ọbịlẹ-bịlẹ kem. Ọ-ka họ ka abwẹla ọwẹ ka chị wuhi ka lẹ, ahị baba nyọka ri angịlẹ ká ang kaa myị lẹhị bala o-ji iJihova obe chajị nya ang ịlẹ wuu kọ kaa họ hahị.—Luk. 6:45.

10. Ányị ẹla ọ-myị ọngịnyị lẹhị à tị́ da ọọnahị ọnyang ọhẹ ụbwọ nyọka bọhụ? (Yẹ ifoto ịnyịnyị.)

¹⁰ Kori kahị la abwẹla nya ang ọ-myịhị lẹhị, ọ kaa dahị ụbwọ nyọka bọhụ ẹ-ẹpwụ nya akama. Kụ irya ju oja nya ọọnahị ọnyang ọlẹ kọ ri Kyung-sook, kị da kpehe ẹ-ẹpwụ nya Ẹpwang ọ-Kụ Gbeji nya Ọya Ọhọhẹ 15, 2015 wẹẹ. Ọ la ẹdụrụ nya ẹbẹ ọgọja ẹ-ẹpwụ nya odu ohuko-huko. Ọ yẹkẹẹ: “Ẹla nya ẹdụrụ ọwẹ kpụm ọkịlẹtụ enyi kaka kpoye. Ọ lam lala o-ri ang myị́ ang wuu nyị gụm byi lẹ, m̀ kaa juhi yẹẹyẹẹ ịnyịnyị.” Ịyẹ à tị́ dọọ ụbwọ nyọka bọhụ? Ọ ya nyori ene kọ ka kà ube ka nune lodu ọnyị myị́ ọnyị, ọ kaa ka achịnawụ nya ẹpwa nyamwụ kaka raabwọ gboo ha iJihova u-uhye nya ang ịrụ ịlẹ kọ họ myọọ lẹhị ẹnẹwẹ. Ọọwa du kọ kaa  chuko lụmẹ ka bala ọ-kaa gwoo gbịla nyọka mẹ ọháha nyamwụ jẹ ẹ-ẹga nya iJihova. Ọ yẹ jaabwọ ká iJihova kaa da anchẹ nyamwụ ị-la ọmyịmyị ụbwọ ụka kị la akama ọnyọọngịrị, ọ tị wẹ ka jẹ́ ịnyịnyị nyori ang ịnyịịla ịlẹ kahị la ẹ-ẹpwụ nya ọhịhị ju iru gụ́ akama ịlẹ kahị la. Lala Kyung-sook, ahị la ang lụmẹ-lụmẹ ịlẹ kị du kahị ka ji iJihova obe ọhọhọ, kori kahị dọmwụ ji ẹpwụ nya akama wẹwẹ. O-ya je iJihova ẹ-ẹpwụ nya abwọ ọrịrị jaabwọ ká ẹla nyamwụ myịhị lẹhị kaka ba ka dahị ụbwọ nyọka bọhụ bala ọ-ka jẹ́-ẹ kụ kpọọ.

11. Ịyẹ tị́ du ká angịjụgbẹyị nya iJisọsị baba nya ugbodu ojuju nyọlẹ ká iJisọsị rụ ka epwoohe kpá?

¹¹ Bịlẹ iJihova kọ́ ka ya ugbodu ojuju hang ẹ-ẹpwụ nya ẹrụ ọnyịịla ọ-kpa pyẹ. Ene ká iJisọsị ka rụ ka epwoohe, ọ kpụ angịjụgbẹyị nyamwụ ịtịya nya ụkụrwọ ọlẹ kị la nyọka ri ibeenu nyamwụ “ụ-ụwa e-epweji nya iJerusalẹm bala ụ-ụwa ị-ịpyị nya iJudiya wuu bala ị-ịpyị nya ala ịSameriya wuu lalala ju kele ka ọbaba nya odehe ọlẹ.” (Ụkụr. 1:8; Luk. 24:46-48) Lụka okpii ị-ịlahị nya ọọwa, alegbeju nya ala iJuu wu alẹrụ iPita bala ịJọn kpa ka ẹga nya alegbeju nya ịkọtụ ọgbahị, juwa ya nyori angịwẹ nyị ba la o-ya ẹla nya Ohe mẹ bala o-juwa chuhi jwaa. (Ụkụr. 4:18, 21) Ányị iPita bala ịJọn à tị́ họ?

12. Jaabwọ ká Ụkụrwọ nya Alẹrụ 4:29, 31 ya, ẹlịyẹ angịjụgbẹyị nya iJisọsị à tị́ họ?

¹² Nyọlẹ ká alegbeju nya ịgba ọgbagba nya ala iJuu chị uhi ju iPita bala ịJọn kpá, ị waa ẹla yẹkẹẹ: “Anụ wụla ẹla ọlẹ yẹ la ịlọnụ wẹẹ. Ihi nyanụ anụ ojuju bala ihi nya Ohe Oluhye ojuju lẹ, oyina, a tị́ chịla gụ ị-ịlahị nya Ohe Oluhye kanụ jẹ́? Chajị, ahị ayịdang lẹ, áhị́ ka jẹ́-ẹ tụ ọnụ nyahị pịrị myị́, hi ọ-ka juwa kpa ya ẹla dodehe rụ́ iJisọsị je angịnyị u-uhye nya ang ịlẹ kahị yẹ lẹhị nya ịlọhị bala ọ-kpa ụrụ nyahị wo pyii kaka.” (Ụkụr. 4:19, 20) Ụka ọlẹ kị gba iPita bala ịJọn kpehe, angịjụgbẹyị ịwẹ raabwọ ha iJihova u-uhye nyọka họ irya nyamwụ. Ị raabwọ yẹkẹẹ: “Ya ọngịrị ọ-kpa ya ẹla myị́ la uhi ojuju-ka, hahị ahị anchẹ nyang mẹ.” IJihova wẹ abwọ ọrịrị o-bwu ọkịlẹtụ nyaa ọwẹ.—Wa Ụkụrwọ nya Alẹrụ 4:29, 31.

13. Ẹlịyẹ ahị tị́ ka jẹ́ bwu oja nya Jin-hyuk?

¹³ Ahị ka jẹ́-ẹ gbịla angịjụgbẹyị ịwẹ bwula ọ-kịnyaa la o-ya ẹla nya Ohe tụ́ ụka ká alegbeju nya igomenti á dọmwụ ya nyori ahị nyị hwabwọ. Kụ ẹhị yẹ oja nya ọọnahị ọlẹng ọlẹ ká ẹnyị nyamwụ ri Jin-hyuk, kị wu ju agba ọọlajị nyọlẹ kọ myị chẹkpẹ ju ụpa ọhẹ datị ka wẹẹ. Ị ya ụkụrwọ họọ u-ube nya agba kọ ka kpẹhị rịrị ala agba ịhyẹ ịlẹ kị ji ube ụbwaa, ma ang ịlẹ kị ri ịbaba nya angịịwa kem ị ya iwe da họọ kọ ka ya ẹla u-uhye nyaa balaa lẹ. Ị́ ya ẹga da họọ nyọka ya ẹla u-uhye nya ịBayịbụụ ka. Ọ raabwọ nya ugbodu ojuju bala ọdụmwọ nyọka ya ẹlịlẹhị la iwe ọnyị myị́ ọnyị kọ la. (Ụkụr. 5:29) Ọ yẹkẹẹ: “IJihova wẹ abwọ ọrịrị nyam bwula ọ-ya ugbodu ojuju bala ẹla ọjẹ́jẹ ham nyọka dọmwụ nya ịBayịbụụ ọjẹ́jẹ ọla iminiti ịrụ bala angịnyị lụmẹ-lụmẹ ọ-ọnang nya ube nya agba. Alodu lẹ, m kaa da ileta ịlẹ kam ka ya ha ala agba ịịwa ahyẹẹnụ ọkịla lẹlẹ.” Ahị ịnyịnyị ka jẹ́-ẹ la ahị ọdahile nyori iJihova ka dahị ụbwọ nyọka kpa ẹrụ ọnyịịla pyẹ myị́. Lala Jin-hyuk, ahị ka jẹ́-ẹ raabwọ nya ugbodu ojuju bala ẹla ọjẹ́jẹ ịnyịnyị.

14. Ịyẹ à tị́ ka dahị ụbwọ ụka kahị ji ẹpwụ nya akama? (Eje Ọnyịịla 37:3, 5)

¹⁴ Bịlẹ iJihova kọ dang ụbwọ nyọka jẹ́-ẹ bọhụ ẹ-ẹpwụ nya akama nyang. Iru nya angịhyẹ nyahị wẹẹ yẹ akama ọọlajị nya ẹdụrụ lee olo nya ọkịlẹtụ, ọngịnyị ọ-háaha o-gbu hyaa, iwe-ahụrụ olujwo ọlẹpwụ nya ugbiyegu, ọtụpyịpyị, lee ụma nya akama ịkịla. Ang lala ẹdụrụ ọlẹ kọ kpehe ẹ-ẹga wuu bala ẹwụ  ọdada kaa du kọ dọmwụ kaa lujwo nyọka bọhụ ẹ-ẹpwụ nya akama ịwẹ gụ olene. Ya je iJihova jaabwọ kọ lang ọ-ọkịlẹtụ kpangga. Ya iwe-ahụrụ nyang joo jaabwọ ká ka ya je oligu ọlịkẹjẹ nyang. Jẹ́ myị̀myị̀ nyori iJihova “ka dang ụbwọ.”—Wa Eje Ọnyịịla 37:3, 5.

15. Ányị abwọ ọrịrị à tị́ ka dahị ụbwọ nyọka “la ugbodu ojuju ẹ-ẹpwụ nya akama”? Ya ọ-chụ pwokwita ọhẹ wẹẹ.

¹⁵ Abwọ ọrịrị ụka myị́ ụka ka dahị ụbwọ nyọka “la ugbodu ojuju ẹ-ẹpwụ nya akama.” (Rom. 12:12) IJihova jẹ́ akama ịlẹ ká anchẹ nyamwụ wẹẹ chịpwụrụ bwu—“ị chị eko wụrwọọ, ọ chaa da.” (Eje. 145:18, 19) Kristie, ọọnahị ọhẹ kọ gu ẹka 29 bala o-ri ọngọ ye ịlahị nya ụgbẹyị, yẹ nyori ẹlẹwẹ ri ẹlịlẹhị. Ọ dọmwụ nyọka jụ ẹdụrụ ọnyọọngịrị lụka ọlẹ kọ ya ahị me ka. Ọọwa dudu ká ọkịlẹtụ kpọọ enyi. Ụka ọkịla, ọ wẹ ka yẹ nyori ịnamwụ la ẹdụrụ ọhẹ ọlẹ kọ ka nwọọ myị́. Kristie yẹkẹẹ: “M̀ raabwọ ha iJihova nya ịlẹhị-ịlẹhị kọ ka ya ọngịrị ọlẹ kam baba ahyẹẹnụ ọnyị myị́ ọnyị ham. M̀ kaa maga nyọka gbịgba ha iJihova ụka myị́ ụka bwula ọ-ka ọjịra-jịra bala ọ-jẹ́ ang la ịlọm.” Ọ myị́myị́ yẹkẹẹ: “Abwọ ọrịrị kaa dam ụbwọ nyọka bọhụ ẹ-ẹpwụ nya ụka olujwo. M̀ jẹ́ nyori iJihova juwa ụka myị́ ụka, ọọwa tị dam ụbwọ nyọka yé ẹjẹ ọkpụ́kpụ ọtụka-ọtụka. Ịlẹhị lẹ akama nya ẹdụrụ nyam á myị́ i-ijata ka, ma iJihova wẹ abwọ ọrịrị nyam bwula ọ-ya okpunyi nya ọkịlẹtụ bala ọhụ ọdapịlẹ ham.” Ahị kpịtịya ụka wuu nyori iJihova jẹ́ jaabwọ kọ kaa “bwu gba angịlẹ kị ri angịnyị nya Ohe Oluhye kpehe bwu ẹpwụ nya ọmayẹ nyaa.”—2 Pit. 2:9.

16. Ịyẹ tị́ du kahị baba nya ụbwọ ọdada nya iJihova nyọka jẹ́-ẹ kụrụ ịmayẹ?

¹⁶ Bịlẹ iJihova kọ dang ụbwọ nyọka kụrụ ịmayẹ. Nyọlẹ kahị la kpẹẹkpẹẹ ka wẹẹ, ahị baba nyọka ma uya ta ịmayẹ chajị kahị ka họ ang ọtịpyọ ka. Olegu Onyobyi wẹẹ maga nya ịlẹhị-ịlẹhị ká uya ọwẹ ka lujwo hahị gụ́ ọọwa. Ụgbẹyị ọhẹ ọlẹ kọ kaa họ kahị ka kụ irya ọtịpyọ ri o-bwula ụya ọyaya ịchịrị. Ụya ọyaya ịlịnyị ka du ká irya ọtịpyọ ka myị ọkịlẹtụ  nyahị—irya ịlẹ kị kaa chị ọkịlẹtụ nya ọngịnyị ịrị du kọ ka kpọọ kaka họ ọhọbịrị ọtụka.—Mak. 7:21-23; Jem. 1:14, 15.

17. Ụka kahị raabwọ bịlẹ ụbwọ ọdada kpá, ịyẹ ahị tị́ ka họ pyii? (Yẹ ifoto ịnyịnyị.)

¹⁷ Ahị baba nya ụbwọ ọdada nya iJihova nyọka kụrụ ịmayẹ nyọka họ ang ọtịpyọ. IJisọsị bịlẹ ang ịlẹ ẹ-ẹpwụ nya abwọ ọrịrị ọlẹ kọ mẹjẹ angịjụgbẹyị nyamwụ: “A myị kahị kpa ụbwọ ka ẹpwụ nya ọmayẹ nya Ohe Onyobyi ọhẹ-lọhẹ ka. Ma, gbahị ụbwọ kpehe hi ẹpwụ nya ang onyobyi ọhọhọ.” (Mat. 6:13) IJihova tịtọ nyọka dahị ụbwọ, ma ahị baba pyii nyọka bịlọọ nya ụbwọ ọdada. Ụka kahị raabwọ bịlọọ nyọka dahị ụbwọ, ahị ịnyịnyị baba pyii nyọka cheji ba hi ang ịlẹ kị kaa kpa ịmayẹ wahị. Ahị baba nyọka hu ẹta-ẹdịyẹ ọnyịịla nyọka cheji ba hi ụma nya irya bala ọhọhọ ịlẹ ká angịnyị ye myị ẹ-ẹpwụ nya odehe nya Olegu Onyobyi ọlẹ. (Eje. 97:10) Ahị ka jẹ́-ẹ họ ká ọkịlẹtụ nyahị ka myị la irya ịnyịịla bwula ịBayịbụụ ọwawa bala ọ-jẹ́ ang bwu ụwa. Ọjịra-jịra ọkaka bala ẹrụ ọnyịịla ọ-kpa pyẹ ka chewu ke irya ọkụkụ nyahị. IJihova tị myị ọnụ hahị ịnyịnyị nyori, ọwa nyị́ ka ya ẹga da ọmayẹ ọ-kịlaahị kịla nyị ka wẹ chịhị ọgụ kpong-kpong ka.—1 Kọr. 10:12, 13.

18. Ẹlịyẹ ahị tị́ baba nyọka họ u-uhye nya abwọ ọrịrị?

¹⁸ Ọngọngọọng nyahị baba nyọka raabwọ gụ́ ọla ene-ene nyọka godayị giri-giri ha iJihova la ahyẹẹnụ ihyẹẹkpẹ ịlẹ. Hu ụka nọ ẹnụ myị́ ẹnụ nyọka raabwọ bwu ẹpwụ nya ọkịlẹtụ. IJihova tịtọ kahị ka ‘ya akama nyahị wuu joo.’ (Eje. 62:8) Gwogbo ha iJihova bala o-joo obe ọhọhọ nya ang ịlẹ wuu kọ kaa họ. Bịlọọ kọ dang ụbwọ nyọka la ugbodu ojuju ẹ-ẹpwụ nya ẹrụ ọnyịịla ọ-kpa pyẹ. Bịlọọ kọ dang ụbwọ nyọka jẹ́-ẹ bọhụ ẹ-ẹpwụ nya akama bala ọ-ka kụrụ ọmayẹ ọnyị myị́ ọnyị ká la. A myị ká ịngịngịhyẹ lee ọngọngọhẹ a wung kpa la ọ-ka raabwọ ha iJihova ụka myị́ ụka ka. Ma, ányị iJihova à tị́ kaa bwu wẹ abwọ ọrịrị nyahị? Ahị ka kụ ẹhị yẹ ịtọ ẹla ọkpọnchị ọwẹ ẹ-ẹpwụ nya ang ọjẹ́jẹ ọkịla.