1-2. Ẹlịyẹ à tị́ ka wẹ irya nyahị u-uhye nya abwọ ọrịrị myị́?

 À DA ịwẹẹ ẹnẹhẹ nyori iJihova á kaa wẹ abwọ ọrịrị nyang kaka lẹ? Kori kọ lịnyị aalẹ, á la ụbwọọng ka. Iru nya aanahị alẹng bala anyang ya nyori nyị kaa la ịwa ịnyị ụka ọhẹ ịnyịnyị, ọgụgụ ri ụka kị juwa ẹ-ẹpwụ nya iwe-ahụrụ olujwo. Kori kahị ja yẹ akama, ọ ka lahị ụjwo ịnyịnyị nyọka yẹ jaabwọ ká iJihova wẹẹ wẹ abwọ ọrịrị nyahị myị́.

² Ahị kụ ẹhị yẹ ang odudu kahị ka jẹ́ myị̀myị̀ nyori iJihova kaa wẹ abwọ ọrịrị nya anchẹ nyamwụ wẹẹ. (1 Jọn. 5:15) Ahị ka myịmyị-ị̀ kụ ẹhị yẹ ịtọ ẹla ịlẹ: Ịyẹ tị́ du kọ kaa lala o-ri iJihova nyị́ kaa wẹ abwọ ọrịrị nyahị ka ụka ọhẹ? Agbẹyị iyina iJihova à tị́ kaa bwu wẹ abwọ ọrịrị nyahị?

3. Ịyẹ tị́ du ká iJihova tịtọ kahị ka raabwọ họọ?

³ Ụpwụ Ịgọgọ họ kahị jẹ́ myị̀myị̀ nyori iJihova la ọháha okpori-kpori ẹ-ẹga nyahị bala o-ri ahị ju apyobwuna họọ. (Hag. 2:7; 1 Jọn. 4:10) Ịnyị à dudu kọ juhi ọhụ nyọka bịlẹ ụbwọ ọdada ẹ-ẹpwụ nya abwọ ọrịrị lẹ. (1 Pit. 5:6, 7) Ọ nwụlanọ nyọka dahị ụbwọ tụ jwoo chwẹẹ bala ọ-ka jẹ́-ẹ bọhụ ẹ-ẹpwụ nya akama nyahị.

4. Ahị tị́ họ ányị kahị jẹ́ nyori iJihova kaa wẹ abwọ ọrịrị nya anchẹ nyamwụ? (Yẹ ifoto ịnyịnyị.)

⁴ Ẹ-ẹpwụ nya ịBayịbụụ, ahị kaa wa ụka lụmẹ-lụmẹ nyori iJihova wẹ abwọ ọrịrị nya anchẹ nyamwụ. Ọngọhẹ lẹpwụ nyaa wẹ irya nyang? Adịrahụ iDevidi ịnyị? Ọ la aluji ịnyịịngịrị ẹ-ẹpwụ  nya ọhịhị nyamwụ, lẹ ọ kaa raabwọ ha iJihova ụka myị́ ụka kọ ka dọọ ụbwọ. Ọ bịlẹ iJihova ụka ọhẹ yẹkẹẹ: “[IJihova] ee, ke ụrụ wo abwọ ọrịri nyam, wo ọbịlẹ-bịlẹ nyam! Aa wẹm ẹ-ẹpwụ nya ọkpẹẹkpẹẹ ọlala nyang!” (Eje. 143:1) IJihova wẹ abwọ ọrịrị nya ụbwọ ọdada ọlẹ ká iDevidi rị. (1 Sam. 19:10, 18-20; 2 Sam. 5:17-25) IDevidi jẹ́ ya ẹla la ahị ọdahile yẹkẹẹ: “[IJihova] kaa ju angịlẹ kịị raabwọ họọ chwẹẹ.” Ahị ịnyịnyị ka jẹ́-ẹ la ọ-jẹ́ myị̀myị̀ ọwẹ.—Eje. 145:18.

5. Anchẹ nya iJihova ịlụka onyogo kaa yé ọwẹwẹ nya abwọ ọrịrị nyaa ụ-ụgbẹyị ọlẹ kị yahị me ụka wuu? Ọ-chụ pwokwita oyina à tị́ ji? (Yẹ ifoto ịnyịnyị.)

⁵ IJihova á ka wẹ abwọ ọrịrị nyahị ụ-ụgbẹyị ọlẹ kahị ya ahị guru gbe ka myị́. Ọ lịnyị ẹ-ẹga nya ọlẹrụ ịPọlụ. Ọ bịlẹ Ohe kọ ka gba ujwo ọlẹ kọ kaa ‘gu ugbinyịrọ nyamwụ chọọchọọ.’ ỊPọlụ raabwọ ụka ịta gbẹgbịlẹ u-uhye nya akama ọọwa. IJihova wẹ abwọ ọrịrị ịịwa? Ee, ma ọ́ wẹ ụ-ụgbẹyị ọlẹ ká ịPọlụ yahị me ka. Ọkọkọ ká iJihova ka tụ akama ọọwa kịnyaa, ọ ya ọngịrị ọlẹ kọ baba nyọka họ ụkụrwọ nya Ohe kpẹẹkpẹẹ myị́ ha ịPọlụ.—2 Kọr. 12:7-10.

6. Ịyẹ à tị́ du kọ ka lala o-ri iJihova nyị́ kaa wẹ abwọ ọrịrị nyahị ụka ọhẹ ka?

⁶ Ọwẹwẹ nya abwọ ọrịrị nyahị ahị ịnyịnyị ka datị hi abwọlẹ kahị yahị guru gbe ụka ọhẹ myị́. Ahị tị jẹ́ myị̀myị̀ nyori iJihova jẹ́ ụgbẹyị ọlẹ kọ há gụ́ wuu nyọka dahị ụbwọ. Ọ dọmwụ ka jẹ́-ẹ “họ ang hahị gụ jaabwọ kahị kaa bịlọọ myị́ kaka ba lee ọ-họ gụ jaabwọ kahị kaa me irya ẹ-ẹpwụ nyahị kaka ba.” (Efe. 3:20) Chajị nyọọwa, ọwẹwẹ nya abwọ ọrịrị nyahị ka wẹ lụka lee ụgbẹyị ọlẹ kahị ka yahị guru ka myị́.

7. Ịyẹ tị́ du kahị ka baba nyọka nwụhọ ẹ-ẹga nya ang ịlẹ kahị kaa raabwọ chajị nyaa ụka ọhẹ? Ọ-chụ pwokwita oyina à tị́ ji?

⁷ Jaabwọ kahị wẹẹ jẹ́ irya nya iJihova gụ́ olene, ahị ka baba nyọka nwụhọ ẹ-ẹga nya ang ịlẹ kahị kaa raabwọ chajị nyaa myị́. Kụ ẹhị yẹ oja nya Martin Poetzinger wẹẹ. Ahyaahị nyọlẹ ká ọọnahị ọwẹ ye ahụ kpá, i woo ju agba ẹ-ẹga ọ-kpa angịnyị yẹ ụhị ọla Nazi. Ụka nya ọgbanyẹ, ọ kaa bịlẹ iJihova kọ ka gbọọ kpehe bwu ube nya agba chajị kọ ka jẹ́-ẹ kpẹhị rịrị ahụ nyamwụ bala ọ-ka dọmwụ nya ẹrụ ọnyịịla ọ-kpa pyẹ myị́myị́. Ma nyọlẹ ká epwihi imiiye chịpwụrụ, ọ́ yẹ ang ẹjẹẹ nyori iJihova ja ka gbọọ kpehe ka. Ọọwa lẹ ọ dọmwụ nyọka raabwọ yẹkẹẹ: “IJihova, chuchuu mẹ ang ọlẹ ká tịtọ kam ka họ jẹ́m.” Ọọwa ọ dọmwụ nyọka kụ irya u-uhye nya ang ọlẹ ká aanahị ịkịla ịla ube nya agba ọọwa wẹẹ chịpwụrụ bwu lẹlẹ. Iru nyaa chuko nyịlẹhị-ịlẹhị u-uhye nya ịhụ bala  anjwo nyaa. Ọọwa Ọọnahị Poetzinger à raabwọ yẹkẹẹ: “IJihova, obe ọhọhọ nya ụkụrwọ onyeewe ọlẹ ká ya ham. Dam ụbwọ nyọka jẹ́-ẹ ju aanahị ọngịrị bala o-jwaa ọhụ.” Ọ bịrị ẹka ihikichu u-ube nya agba juwa họ ịnyị kpangga!

8. Ẹla ọkpọnchị oyina ahị tị́ ka kpa i-irya ụka kahị ja raabwọ?

⁸ Ahị ka kpịtịya pyii nyori iJihova la irya ọlẹ kọ hu nọ nyọka họ, ọ tị ka họọ lụka ọlẹ kọ chị nọ. Irya nyamwụ ọọwa ri ọ-ka tụ́ ang ịlẹ wuu kị kaa ju ọmwụ nya akama hahị alẹ kịnyaa hiihi gboyi myị́ oyi—ang lala ayịreji o-bwu agaga, ẹdụrụ, bala igu. IJihova ka họ irya nyamwụ ọwẹ jịra bwula Ịpyị-Adịrahụ nyamwụ. (Dan. 2:44; Ọwụ. 21:3, 4) Ma, gbee da ụka ọọwa, iJihova ya iwe da ha Olegu Onyobyi nyọka kpeji ám̀ odehe ọlẹ wẹẹ. b (Jọn. 12:31; Ọwụ. 12:9) Kori ká iJihova á chị akama nya angịnyị eju wuu lẹẹlẹẹ, ọ ka lala o-ri Olegu Onyobyi nyị jẹ́ kpeji. Ịlẹhị lẹ, ahị baba nyọka godayị gbe iJihova kọ ka họ ọnụ ọmyịmyị nyamwụ ịhyẹ jịra, ma ọọwa á ri, ọ tụụbwọ hiihi la ọ-dahị ụbwọ ka lẹ ka. Ahị kụ ẹhị yẹ agbẹyị ịhyẹ ịlẹ ká iJihova kaa bwu dahị ụbwọ wẹẹ.

9. Ányị iJihova à tị́ ka jẹ́-ẹ dahị ụbwọ ụka kahị baba nyọka cheje nya ẹla? Ọ-chụ pwokwita oyina à tị́ ji?

⁹ Ọ kaa ya ẹla ọjẹ́jẹ hahị. IJihova myọnụ nyọka ya ẹla ọjẹ́jẹ ọlẹ kahị baba nyọka jẹ́-ẹ cheje ọnyịịla hahị. Ahị baba nya ẹla ọjẹ́jẹ o-bwu ẹga nya Ohe gụgụụgụ ụka kahị ja ka cheje nya ẹla ọlẹ kọ gu ọhịhị nyahị, lala ọ-ka ye ahụ lee ọ-rwọrụ lee ọ-ka họ ịnyị ka. (Jem. 1:5) Kụ ẹhị yẹ oja nya ọọnahị Maria c ọlẹ kọ rwọrụ lẹka wẹẹ. Ọ kaa ye ịlahị nya ụgbẹyị ọkpụrụrụ la ọkẹkẹnị ene kọọ gbachị ọọnahị ọlẹng ọhẹ. Ọ yẹkẹẹ: “Jaabwọ ká igu nyahị wẹẹ wu gụ́ olene, ịnyịnyị irya nyahị à wẹẹ ka ẹga nya awụlẹ gụ́ olene lẹ. M̀ yẹ nyori m̀ la eje kam ka chị. M̀ raabwọ yẹẹyẹẹ u-uhye nya ẹla ọọwa. M̀ baba nya iJihova ọ-ka kpam ụgbẹyị, ma m̀ tị jẹ́ ịnyịnyị nyori i-iJihova à ka cheje nya ẹlẹwẹ ham ka.” Ọ yẹ nyori iJihova wẹ abwọ ọrịrị nyamwụ u-uhye nya ẹla ọjẹ́jẹ. Ányị ọ tị́ bwu lịnyị? Jaabwọ kọ wẹẹ mwahị nya ẹla ka ẹpwụ nya apwụ nyahị, ọ jẹ́ yẹ egbeju nya ẹla ịhyẹ kpangga ịlẹ kị dọọ ụbwọ wẹ ịtọ ẹla nyamwụ. Ọ ke ụrụ wo ẹla ọnyịịla ọlẹ ká ịnamwụ mẹjọ́ọ ịnyịnyị. Ẹla ọmẹjẹ ọọwa da Maria ụbwọ du kọ jẹ́ wụla irya nyamwụ yẹ. Ọ jẹ́ cheje ọnyịịla ụka ohyẹẹkpẹ.

10. Jaabwọ ká Ala iFilipayị 4:13 ya, ịyẹ iJihova à tị́ ka họ nyọka da anchẹ nyamwụ ụbwọ? Ya ọ-chụ pwokwita ọhẹ wẹẹ. (Yẹ ifoto ịnyịnyị.)

¹⁰ Ọ kaa ya ọngịrị hahị nyọka bọhụ. Jaabwọ ká iJihova họ ha ọlẹrụ ịPọlụ, ọ ka ya ọngịrị ọlẹ kahị baba nyọka bọhụ ẹ-ẹpwụ nya  ịmayẹ hahị ịnyịnyị. (Wa Ala iFilipayị 4:13.) Kụ ẹhị yẹ abwọlẹ ká iJihova da ọọnahị ọhẹ ká ẹnyị nyamwụ ri Benjamin ụbwọ nyọka bọhụ ẹ-ẹpwụ nya iwe-ahụrụ ilujwo wẹẹ. Lụka ọlẹ ká Benjamin ri okolobya, ọwa bala alugbiyegu nyamwụ kụ ẹga ọ-kpụ ịbaa hi ẹwụ ụ-ụwa Africa. Ọ yẹkẹẹ: “M̀ kaa raabwọ ụka myị́ ụka ha iJihova kọ ka ya ọngịrị ham nyọka họ ẹla kpọọ ịpyọ. IJihova wẹ abwọ ọrịrị nyam bwula ọ-ya okpunyi nya ọkịlẹtụ, ugbodu ojuju nyọka kịnyaa la o-ya ẹla nya Ohe, bala apwụ ịlẹ kị kaa dụbwọ nyọka nwà ẹ-ẹpwụ nya ang nya olegu ham.” Ọ myịmyị yẹkẹẹ: “Oja nya ọhịhị nya aanahị ọwawa bala ọ-yẹ jaabwọ ká iJihova daa ụbwọ nyọka bọhụ jum ọngịrị nyọka ya ụbwọ chị ọmyịmyị nyam gogo.”

11-12. Ányị iJihova à tị́ ka kpa aanahị ịlọjịra-jịra wẹ abwọ ọrịrị nyahị myị́? (Yẹ ifoto ịnyịnyị.)

¹¹ Ọ kaa kpa aanahị ịlọjịra-jịra dahị ụbwọ. Lobyi nya ẹnẹlẹ ká iJisọsị hu ọhịhị nyamwụ kiliya, ọ raabwọ nya ịlẹhị-ịlẹhị. Ọ bịlẹ iJihova kọ ka ya ẹga da kị ka chị ẹla bọ́ọ nya ọngọ bịrị ẹnyị nya Ohe bala ọ-ka nwọọ ọọlajị nyọọwa ka. Ma ọkọkọ nyọka họ ịnyị, iJihova da iJisọsị ụbwọ bwula o-du olegu-ẹrụ ọhẹ wẹ ka ju iJisọsị ọngịrị. (Luk. 22:42, 43) IJihova ka dahị ụbwọ ịnyịnyị myị́ bwula o-gu ọọnahị ọhẹ gbịla nyọka juhi ọhụ bwula ọ-wụrụụhị bwu ifon lee o-juhi ụga. Ahị wuu ka jẹ́-ẹ mwahị nya iwe nyọka họ ká angịkịla ka yé ‘ọhụ ojuju.’—Etu 12:25.

¹² Kụ ẹhị yẹ oja nya ọọnahị ọlẹ ká ẹnyị nyamwụ ri Miriam wẹẹ. Epwihi ịmanyị-ịmanyị nyọlẹ ká ọrụmwụ gbu kpá, Miriam juwa ẹ-ẹpwa ụbwọọmwụ, la ọjụjụ bala ọkịlẹtụ ọ-kpụ enyi. Ọ juwa jida nyịlẹhị-ịlẹhị bala ọ-tịtọ nya ọngọhẹ ọ-ka ya ẹla bala. Ọ yẹkẹẹ: “Ḿ la ọngịrị nyọka wụrụ ọngọngọhẹ myị́ ka, lẹ m̀ raabwọ ha iJihova. Nyọlẹ kam wẹẹ kpa abwọ rị la ida ojeje wẹẹ, ọngọhẹ à wụrụm bwu ifon ẹẹ. Ọngọọwa ri ọngọgbahị nya ọjịra-jịra, ọ tị ri oligu nyam yẹẹyẹẹ ịnyịnyị.” Miriam yé ẹjẹ ọkpụ́kpụ bwu ẹga nya ọngọgbahị nya ọjịra-jịra ọọwa bala ahụ nyamwụ. Ọ yẹ nyori iJihova nya-à gu ọọnahị ọwẹ gbịla du kọ wụrọọ ụka ọwẹ lẹ.

13. Ja oja nya ẹla ọlẹ kọ mẹjẹ nyori iJihova kaa kpa angịlẹ kị kaa gbịgba họọ ka wẹ abwọ ọrịrị nyahị wẹẹ.

¹³ Ọ ka kpa angịlẹ kị kaa gbịgba họọ ka dahị ụbwọ myị́. (Etu 21:1) Ụka ọhẹ, iJihova kaa  wẹ abwọ ọrịrị nya anchẹ nyamwụ bwula o-gu angịlẹ kị kaa gbịgba họọ ka gbịla nyọka daa ụbwọ. Ọ-chụ pwokwita, o gu Adịrahụ Atakịsẹkịsisi gbịla nyọka wo ọbịlẹ-bịlẹ nya iNehemaya du kọ jẹ́ tịrẹkpẹ ká iJerusalẹm kaka ma epweji ọlụwa nwụ́. (Neh. 2:3-6) Alẹ ịnyịnyị, iJihova ka gu angịlẹ kị dọmwụ kaa gbịgba họọ ka gbịla nyọka wẹ ka dahị ụbwọ ụka kahị baba nya ụbwọ ọdada myị́.

14. Ọhụ ojuju oyina a tị́ yé bwu oja nya Soo Hing? (Yẹ ifoto ịnyịnyị.)

¹⁴ Ọọnahị ọnyang ọhẹ ká ẹnyị nyamwụ ri Soo Hing ya nyori iJihova nyị da ọwa ụbwọ bwula ọngọlẹ kọ kaa họọ utoji. Ọnyị nyamwụ yẹ akama nya ẹdụrụ nya ịmachị ụma ịdatị-datị. Ụka ká ọnyị ọọwa keji a-ang ọrụnyẹ, ọwa bala ọrụmwụ pehi ụkụrwọ nyaa chajị kị ka jẹ́-ẹ kpẹhị rịrị ọnyị nyaa. Ọọwa du kị la akama nya okpoko. Soo Hing ya nyị lala o-ri ọwa nyị́ ka bọhụ kịlahị myị́ kaka. Ọ ya ẹla ọla ọkịlẹtụ nyamwụ je iJihova bala ọ-bịlọọ kọ ka dọọ ụbwọ. Lẹ, ọngọ họ utoji ọwẹ à maga nyọka mwahị nya ụgbẹyị ọlẹ kọ ka bwu daa ụbwọ lẹlẹ. Ọọwa du kị jẹ́ yé ụbwọ ọdada bwu ẹga nya igomenti bala ọ-yé ẹpwa ọlẹ kọ meme labwọ ịnyịnyị. Ụka ohyẹẹkpẹ, Soo Hing yẹkẹẹ: “Ahị yẹ ụbwọ nya iJihova ẹ-ẹpwụ nya ẹlẹwẹ. Ọ ri ọngọ kaa ‘wo abwọ ọrịrị’ ịlẹhị.”—Eje. 65:2.

15. Ịyẹ à tị́ da ọọnahị ọnyang ọhẹ ụbwọ nyọka yẹ nyori iJihova kaa wẹ abwọ ọrịrị nyamwụ?

¹⁵ Ụ-ụgbẹyị ookpokpo pyii iJihova à kaa kpa wẹ abwọ ọrịrị nyahị ka. Ma ọwẹwẹ ọlẹ kahị kaa ye kaa dahị ụbwọ nyọka jẹ́-ẹ godayị giri-giri ha Adahị olepwoohe. Lẹ, yẹhị reeji nyọka yẹ jaabwọ ká iJihova wẹẹ wẹ abwọ ọrịrị nyang. Ọ la ọọnahị ọnyang ọlẹ ká ẹnyị nyamwụ ri Yoko lala o-ri iJihova nyị́ kaa wẹ abwọ ọrịrị nyamwụ ka, ma ọ dọmwụ nyọka da ang ịlẹ kọ kaa bịlẹ iJihova ju ụ-ụpwụ. Nyọlẹ ká ụka chịpwụrụ chẹẹ, ọ kụ ẹhị yẹ ụpwụ ọlẹ kọ da, ọọwa ọ yẹ nyori iJihova nyị wẹ abwọ ọrịrị nyọwa lụmẹ-lụmẹ tụ́ ịhyẹ ịlẹ kọ dọmwụ deeri nyaa lẹ. Bwu ụka ka ụka, ahị baba nyọka kụ irya u-uhye nya abwọlẹ ká iJihova wẹẹ wẹ abwọ ọrịrị nyahị.—Eje. 66:19, 20.

16. Ányị ahị tị́ ka mẹjẹ nyori ahị la ọmyịmyị ụka kahị raabwọ? (Ala iHiburu 11:6)

¹⁶ Ahị ka mẹjẹ nyori ahị la ọmyịmyị bwula ọ-raabwọ ha iJihova bala ọ-ka ye ọwẹwẹ nyamwụ myị ịnyịnyị, jaabwọ myị́ abwọ kọ  la. (Wa Ala iHiburu 11:6.) Kụ ẹhị yẹ oja nya Mike bala Chrissy ahụ nyamwụ wẹẹ. Ị la irya nyọka họ ụkụrwọ ị-ịBẹtẹlụ. Mike yẹkẹẹ: “Ahị ya ụbwọ ju ụpwụ ẹ-ẹpwụ lawụlẹ lala ahụ bala ọrụ ẹ-ẹpwụ nya ẹka lụmẹ-lụmẹ bala ọ-raabwọ mwụba-mwụba u-uhye nyamwụ, ma ị́ tị wụrụụhị ka.” Mike bala Chrissy dahịhile nyori iJihova jẹ́ ụgbẹyị ọlẹ kọ há gụ́ nyọka kpaa họ ụkụrwọ nyamwụ. Ị kịnyaa la ọ-họ ụkụrwọ la ọngịrị nyaa wuu ẹ-ẹpwụ nya ịlahị nya ụgbẹyị o-ye kpụrụrụ ẹ-ẹga ká ọbaba ji gụ́, bala ọ-kaa da ụbwọ ụka kị ja nwụ́ ebe ị-kpa gbịgba. Ị kaa họ ụkụrwọ nya ọngọ kpẹhị rịrị isekut lẹẹlẹẹ lẹ. Mike yẹkẹẹ: “Ụ-ụka myị́ ụka iJihova à kaa wẹ abwọ ọrịrị nyahị ụ-ụgbẹyị ọlẹ kahị yahị guru gbe ka, ma ọ kaa waa wuu bala ọ-họ ịnyị a-agbẹyị ịlẹ kị dọmwụ há gụ́ abwọlẹ kahị kụ irya.”

17-18. Jaabwọ ká Eje Ọnyịịla 86:6, 7 ya, ẹlịyẹ ahị tị́ ka jẹ́ myị̀myị̀?

¹⁷ Wa Eje Ọnyịịla 86:6, 7. Ọngọ da eje ọnyịịla jẹ́ myị̀myị̀ nyori iJihova nyị wẹ abwọ ọrịrị nya ọwa. Ahụ ka jẹ́-ẹ la ọ-jẹ́ myị̀myị̀ ọlịnyị-ịnyị. Oja nya angịlẹ kahị kụ ẹhị yẹ ẹ-ẹpwụ nya ang ọjẹ́jẹ ọlẹ họ kahị jẹ́ myị̀myị̀ nyori iJihova ka ya ẹla ọjẹ́jẹ bala ọngịrị ọlẹ kahị baba hahị nyọka jẹ́-ẹ bọhụ. Ọ ka kpa aanahị ịlọjịra-jịra lee angịlẹ kị dọmwụ kaa gbịgba họọ lẹka dahị ụbwọ myị́.

¹⁸ IJihova á ka wẹ abwọ ọrịrị nyahị bwu ụgbẹyị ọlẹ kahị me irya ka myị́, ma ahị tị jẹ́ nyori ọ ka wẹẹhị. Ọ ka ya ang ọlẹ kahị baba hahị lụka ọlẹ kahị baba nyamwụ kpangga. Lẹ kịnyaa la ọ-ka raabwọ ẹ-ẹpwụ nya ọmyịmyị, la ọ-jẹ́ myị̀myị̀ nyori iJihova ka kpahị jung lẹẹlẹẹ bala o-ri ọ ka họ ‘wu ang ịdịhụ wuu ẹpwụ’ ụ-ụwa odehe onyeewe ọlẹ kahị wẹẹ yẹhị rịrị gbe.—Eje. 145:16.