1. Ịyẹ à tị́ ri irya nya iJihova alẹ?

 ALẸ, o ri irya nya Ohe kị ka kpa ẹrụ ọnyịịla nya Ịpyị-Adịrahụ pyẹ chị odehe ọlẹ ọnụ wuu. (Mak. 13:10; 1 Tim. 2:3, 4) IJihova à la ụkụrwọ ọwẹ lẹ, ọ tị baba lụmẹ. Ịnyị à du kọ chụ Ọnyị ọlịkẹjẹ nyamwụ nyọka kpịlahị ẹ-ẹpwụ nya ụkụrwọ ọwẹ lẹ. Ahị ka jẹ́-ẹ la ọ-jẹ́ myị̀myị̀ nyori chajị nyọlẹ ká iJisọsị wẹẹ kpahị ụgbẹyị lẹ, ụkụrwọ nya ẹrụ ọnyịịla ọ-kpa pyẹ ọwẹ ka pwụ́ ẹgẹlẹ ká iJihova tịtọ ene ká ocheju ka pweji.—Mat. 24:14.

2. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

² Ẹ-ẹpwụ nya ang ọjẹ́jẹ ọlẹ, ahị ka yẹ jaabwọ ká iJisọsị wẹẹ kpa “ọnchẹ ọ-chịla o-hu ọkịlẹtụ ha bala ọngọ jẹ́ ẹla” mẹ ang jẹ angịnyị nyamwụ bwu Omyi Ẹla nya Ohe bala ọ-kpaa ụgbẹyị nyọka kpa ẹrụ ọnyịịla ọlẹ kọ gụgụ wuu pyẹ jaabwọ kọ la ẹnẹnẹhẹ lẹka. (Mat. 24:45) Ahị ka myịmyị-ị̀ yẹ ang ọlẹ ká ọngọngọọng nyahị ka jẹ́-ẹ họ nyọka chẹkpẹ ju iJisọsị bala ọnchẹ ọ-chịla o-hu ọkịlẹtụ ha.

3. Ọngịrị oyina ị tị́ ya ju iJisọsị ụ-ụbwọ?

³ IJisọsị wẹẹ kpịlahị nya ụkụrwọ nya ẹrụ ọnyịịla ọ-kpa pyẹ. Ányị ahị tị́ ka họ kahị ka la ahị ọdahile ọọwa? Lụka o-kpii ene ká iJisọsị rụ ka epwoohe, ọ tụ́ angịjụgbẹyị nyamwụ ị-la ọmyịmyị ịhyẹ guru ọ-ọgbọdọ ọhẹ ị-ịGalili. Ọ byaa yẹkẹẹ: “Ị ya ọngịrị myị́ ọngịrị olepwoohe bala olodehe wuu jum ụ-ụbwọ lẹ.” Kụ ẹhị yẹ ẹla ọlẹ kọ ya ba ọọwa ba: “Chajị nya ọọwa lẹ, anụ kpa ẹrụ ọnyịịla nyam ọlẹ kele kaka ya je angịnyị ilepwoja myị́ epwoja nya odehe ọlẹ wuu mẹ.” (Mat. 28:18, 19) Lẹ, datị hi  ang ịkịla, ị ya ọngịrị ju iJisọsị ụ-ụbwọ nyọka kpịlahị nya ụkụrwọ nya ẹrụ ọnyịịla ọ-kpa pyẹ.

4. Ịyẹ tị́ du kahị ka jẹ́ myị̀myị̀ nyori iJisọsị juwa kpẹhị rịrị ẹrụ ọnyịịla ọ-kpa pyẹ wẹẹ?

⁴ IJisọsị ya nyori ụkụrwọ nya ẹrụ ọnyịịla ọ-kpa pyẹ bala ọ-họ ká angịnyị ka ri angịjụgbẹyị nyị ka pwụ́ “epwoja nya odehe ọlẹ wuu.” Ọ myịmyị ya nyori ọ ka juwa ta angịjụgbẹyị nyamwụ “ẹ-ẹga myị́ ẹga ụka wuu gbee pwụ́ ọbaba nya odehe ọlẹ.” (Mat. 28:20) Omyi ẹla ịwẹ mẹjẹ gede-gede nyori iJisọsị ka kịnyaa la ọ-kpẹhị rịrị ụkụrwọ nya ẹrụ ọnyịịla ọ-kpa pyẹ ọwẹ gbee ka pwụ́ ụka nyahị ọlẹ.

5. Ányị ahị tị́ bwu lụbwọ ẹ-ẹpwụ nya ọ-họ jịra nya Eje Ọnyịịla 110:3?

⁵ IJisọsị á la uko ọchịchị nyori alụkụrwọ nyị́ ka la gbuu ka lụka nya ocheju nya odehe ọlẹ ka. Ọ jẹ́ nyori ọmwụ ọyẹyẹ nya ọngọ da eje ọnyịịla ọlẹ ka họ jịra: “Angịnyị nyang ka myịng ẹrụ bwu ọkịlẹtụ nyaa.” (Eje. 110:3) Kori á kaa kpa ẹrụ ọnyịịla pyẹ aalẹ, à wẹẹ chẹkpẹ ju iJisọsị bala ọnchẹ ọ-chịla o-hu ọkịlẹtụ ha. À myịmyị lụbwọ ẹ-ẹpwụ nya ọ-họ jịra nya ọmwụ ọyẹyẹ ọwẹ. Ụkụrwọ ọwẹ wẹẹ nwà kịlahị, ma akama tị ji ịnyịnyị.

6. Akama oyina à tịị chị angị kpa ẹrụ ọnyịịla pyẹ ọgụ alẹ?

⁶ Akama ọhẹ ọlẹ kọ kaa chị angị kpa ẹrụ ọnyịịla nya Ịpyị-Adịrahụ pyẹ ọgụ ri ọtụpyịpyị. Angị jẹkpẹ da ogu, alegbeju nya ịchọọchị bala alupe me ịnịịkịla je iru nya angịnyị u-uhye nya ụkụrwọ nyahị. Kori ká ịnịịkịla ịwẹ á hụ alugbiyegu nyahị ahị́ lee angịlẹ kahị jẹ́ bala ala ọlụkụrwọ nyahị aalẹ, ị ka ya ẹla rịrịịhị myị́ nyọka ba la ọ-gbịgba ha iJihova bala ọ-hwabwọ la ọ-ya ẹla nya Ohe. Ẹ-ẹpwụma ịhyẹ, aluji nyahị kaa chuhi juhi, gba mịlahị lee o-wu aanahị alẹng tụ́ anyang bala ọ-dọmwụ yaa ju agba. Ọhọhọ nyaa ọwẹ á lahị ẹbyẹbyị ka. IJisọsị ya neeji nyori: “Anụ ka wụ alepwoja myị́ epwoja wuu ẹjẹ, chajị nyọlẹ kanụ myị la ẹnyị nyam.” (Mat. 24:9) Nyọlẹ kahị wẹẹ wụ́ angịnyị ẹjẹ ịịwẹ mẹjẹ nyori iJihova yehi myị. (Mat. 5:11, 12) Olegu Onyobyi à wẹẹ ju ọmwụ nya ọtụpyịpyị ọwẹ lẹ. Ọngịrị nyamwụ-ụ́ tị pwụ́ ẹgẹhẹ nya ịnya iJisọsị ka! Bwula ụbwọ ọdada nya iJisọsị, ẹrụ ọnyịịla ọwẹ wẹẹ wu alẹpwụma myị́ ẹpwụma wuu oyi. Kụ ẹhị yẹ ang ẹjẹẹ lẹẹ wẹẹ.

7. Ang ẹjẹẹ oyina a tị́ yẹ kọ mẹjẹ nyori ẹla ọlụpwụ nya Ọwụrụụ-wụrụ 14:6, 7 wẹẹ họ jịra?

⁷ Akama ọkịla ọhẹ ọlẹ kahị kaa la ụka kahị ja kpa ẹrụ ọnyịịla pyẹ ri, angịnyị kaa ya iru nya ìja ịdatị-datị. Ẹ-ẹpwụ nya ọyị ọyẹyẹ a-arụrụ ọlẹ ká iJisọsị mẹjẹ ịJọn, ọ ya neeji nyori ẹrụ ọnyịịla nyị ka kụrụ akama ọwẹ myị́ lụka nyahị ọlẹ. (Wa Ọwụrụụ-wụrụ 14:6, 7.) Ụ-ụgbẹyị oyina tị́? Ahị wẹẹ ya iwe da ha iru nya angịnyị jaabwọ kahị ka jụ́ họ myị́ kị ka wo ẹrụ ọnyịịla ọwẹ. Alẹ, angịnyị bwu ịkịka nya odehe wuu ka jẹ́-ẹ wa apwụ bwu ịwẹbsayịtị nya jw.org, chajị ang ọmẹjẹ juwa la ìja ịdatị-datị gụ 1,000! Angị Kpẹhị Rịrị Ogu ya ẹga da kị ka ya ụpwụ ọlẹ ko ri Chị Ọkẹkẹnị Gboyi Myị́ Oyi! da ka ìja ịdatị-datị gụ 700! Ụpwụ ọwẹ à ri ang-abwọ ọkpọnchị ọlẹ kahị wẹẹ kpa da angịnyị ụbwọ nyọka wẹ ka ri angịjụgbẹyị lẹ. Myịmyị, ị wẹẹ kpa ifim mẹ ang jẹ angị-kpịla bwu ịBayịbụụ bala ọ-họ apwụ nya alidu ịnyịnyị. Ahị wẹẹ yẹ ọ-họ jịra nya ọmwụ ọyẹyẹ ịla ịBayịbụụ. Angịnyị bwu “ẹpwụma bala epwoja” nya odehe wuu wẹẹ jẹ́ jaabwọ kị ka ya ‘òja ọcharị-charị’ nya ẹlịlẹhị ọla ịBayịbụụ. (Sẹk. 8:23; Sẹf. 3:9) Ẹla ịwẹ wuu wẹẹ họ jịra e-ekpeleji nya ẹhị ọ-kpa rịrị ọnyịịla nya ịKịrayịsị olegbeju nyahị.

8. Ang ọnyịịla oyina ụkụrwọ nya ẹrụ ọnyịịla ọ-kpa pyẹ nyahị à tị́ wẹẹ họ?

⁸ Alẹ, angịnyị gụ uku ineku (8,000,000) bwu ẹpwụma ohu imiiye da iwo ine (240) juwa ẹ-ẹpwụ nya ogu nya iJihova. Ụnọ ịmányị  tị́ nya angịnyị tị kaa hu enyi Ohe la ẹka ọnyị myị́ ọnyị! Ang ọlẹ kọ tị dọmwụ baba gụ iru ojuju ri “ọngịnyị onyeewe,” ko ri abwẹla nya ọngịnyị nya Ohe oriri ọlẹ ká angịjụgbẹyị inyeewe ịwẹ wẹẹ la. (Kol. 3:8-10) Iru nyaa hwabwọ la ụya ọhọhọ, imajẹ ọlala, ọ-yẹ oye-oye bala ọ-chẹkpẹ ju ẹpwụma. Ọmwụ ọyẹyẹ ọlụpwụ nya Ayịsaya 2:4 wẹẹ họ jịra; ị hwabwọ la ‘ẹwụ ọ-mẹjẹ awụlẹ gbanggbang.’ Nyọlẹ kahị wẹẹ maga nyịlẹhị-ịlẹhị nyọka hu abwụma onyeewe dakụrụ, ahị wẹẹ da angịnyị ụbwọ wẹ ka yẹ jula ogu nya iJihova bala ọ-mẹjẹ nyori ahị wẹẹ dịrẹ iJisọsị ịKịrayịsị olegbeju nyahị. (Jọn. 13:35; 1 Pit. 2:12) Ẹla ịwẹ wuu á wẹ ka họ ododu ka. IJisọsị à wẹẹ dahị ụbwọ ẹ-ẹga ọlẹ kọ baba lẹ.

9. Jaabwọ ká ụpwụ nya ịMatiyu 24:45-47 mẹjẹ, ẹlịyẹ iJisọsị à tị́ ya kọ ka họ lụka ocheju?

⁹ Wa ịMatiyu 24:45-47. IJisọsị ya neeji nyori lụka ocheju nya odehe, ọ ka chụ “ọnchẹ ọ-chịla o-hu ọkịlẹtụ ha bala ọngọ jẹ́ ẹla” ọlẹ kọ ka mẹ ang jẹ bwu Omyi Ẹla nya Ohe. Lẹ ahị ka yahị guru ká ọnchẹ ọọwa ka họ ụkụrwọ nyịlẹhị-ịlẹhị lụka nyahị ọlẹ. Ịnyị ọ tị la ịlẹhị lẹ. IJisọsị kpa ebwo ọ-pyịnyẹng bwu ẹpwụ nya angịlẹ ká Ohe ya ida wụ́ họ ụkụrwọ nyọka ya “ang oriri” nya olegu ha angịnyị nya Ohe bala angịlẹ kị wẹẹ yẹ julaa “lụka ọchịla-chịla.” Alẹng ịwẹ á tị kaa yẹ ịlaa lala ayịbaba nya ọmyịmyị ọlala nya angịkịla ka. (2 Kọr. 1:24) Ọkọkọ nyọọwa, ị jẹ́ nyori iJisọsị ịKịrayịsị à ri “olegbeju bala adịrahụ ọkpẹhị rịrị” angịnyị nyamwụ lẹ.—Ayị. 55:4.

10. Ụpwụ oyina lẹpwụ nya ịlẹ kị gba kpehe ụ-ụrụrụ wẹ à tị́ gung gbịla nyọka dọmwụ nya ọ-gbịgba ha iJihova?

¹⁰ Bwu ẹka nya 1919, ọnchẹ ọ-chịla o-hu ọkịlẹtụ ha kaa họ apwụ ịdatị-datị ịlẹ kị da angị inyeewe ịlẹ kị tịtọ nyọka jẹ́ ẹla nya Ohe ụbwọ jẹ́ ẹlịlẹhị bwu Omyi Ẹla nya Ohe ụka ọhọhẹ ẹ-ẹpwụ nya ọhịhị nyaa. La 1921, ị họ ụpwụ ọlẹ  ká ẹnyị nyamwụ ri The Harp of God nyọka da angịlẹ ká ẹla nya Ohe há ụbwọ jẹ́ ẹlịlẹhị ịkpọnchị ịla ịBayịbụụ. Jaabwọ ká iwe-ahụrụ wẹẹ yẹda, ị họ apwụ ịkịla ịnyịnyị. Ụpwụ oyina à tị́ dang ahụ ụbwọ wẹ ka jẹ́ Adahị olepwoohe bala ọ-la ọháha ẹ-ẹga nyamwụ? Ọlẹ ko ri “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, What Can the Bible Teach Us? ịnyị, lee onyeewe ọlẹ ko ri Chị Ọkẹkẹnị Gboyi Myị́ Oyi! tị? Ị họ apwụ ịwẹ nyọka dahị ụbwọ mẹ ang jẹ angịkịla kị ka ri angịjụgbẹyị. Ị tị ri ang ịlẹ kahị baba ịlẹhị ụka kị haa.

11. Ịyẹ tị́ du kọ baba kaahị wuu ka jẹ́ ang gụ ọọwa u-uhye nya iJihova bala ịBayịbụụ?

¹¹ A-angị inyeewe ịlẹ kị wẹẹ tịtọ nyọka jẹ́ ẹla nya Ohe kem à baba kị ka la ẹla ọjẹ́jẹ okpori-kpori u-uhye nya iJihova bala ịBayịbụụ ka. Ahị wuu baba nyamwụ. Ọlẹrụ ịPọlụ da ụpwụ yẹkẹẹ: “Ang oriri ọnyọọngịrị ẹ-ẹpwụ nya ẹla nya Ohe Oluhye ri ang nya angịlẹ kị ri angịgbahị ẹ-ẹpwụ nya ẹla nya Ohe Oluhye.” ỊPọlụ myịmyị ya nyori ẹla ọlẹ kahị jẹ́ bwu ịBayịbụụ ọ-kpa họ ụkụrwọ nyị ka dahị ụbwọ “gu ang ọnyịịla bala ang ọtịpyọ ene hi awụlẹ.” (Hib. 5:14) Ọ ka lujwo nyịlẹhị-ịlẹhị lẹẹlẹẹ nyọka ju ihi nya ehile nya iJihova chajị abwẹla ọtịpyọ ọhọhọ lala ang oriri ha iru nya angịnyị alẹ. Ma iJisọsị wẹẹ dahị ụbwọ jẹ́ ang ịlẹ kahị baba nyọka kịnyaa la o-ju ọmyịmyị nyahị ọngịrị. Ahị kaa yé ọmẹjẹ ọọwa bwu ịBayịbụụ ko ri Omyi Ẹla nya Ohe. IJisọsị à tị wẹẹ kpa ọnchẹ ọ-chịla o-hu ọkịlẹtụ ha ụgbẹyị nyọka nwụla ang ọmẹjẹ ọwẹ nọ bala ọ-họ kọ ka wuhi ọyị ịnyịnyị lẹ.

12. Ányị ahị tị́ chị ihi ju ẹnyị nya Ohe lala iJisọsị?

¹² Lala iJisọsị, ahị ya ihi ọlẹ ká ẹnyị nya Ohe chịla kọ ka la họọ lẹ. (Jọn. 17:6, 26) Ọ-chụ pwokwita, la 1931 ahị ju ịlọhị ẹnyị ọlẹ ko ri Alibeenu nya iJihova bwu Ụpwụ Ịgọgọ.  Bwula ọ-họ ịnyị, ahị mẹjẹ jaabwọ ká ẹnyị nya Ohe baba hahị kaka ba bala o-ri ahị tịtọ kị ka jẹ́ẹhị la ẹnyị nya Adahị olepwoohe. (Ayị. 43:10-12) Ịnyịnyị bwu Ọya Okiriwo nya ẹka ọwẹ, ị dọmwụ nyọka gba ẹnyị nya Ohe kpehe ẹ-ẹbẹ ọhọhẹ nya ụpwụ nya Ẹpwang ọ-Kụ Gbeji ọnyọnyọọnyị. ỊBayịbụụ ọlẹ ko ri New World Translation of the Holy Scriptures myịmyị tịrị ẹnyị nya Ohe ẹkpẹ ka ẹga ịlẹ kị chịla kị ka ji ẹ-ẹpwụ nya Omyi Ẹla nyamwụ. Ẹlẹwẹ datị gbanggbang hi ọlẹ ká ala ịchọọchị nya ịnịịkịla gba ẹnyị nya iJihova bwu iru nya ịBayịbụụ ịlẹ kị yẹda!

13. Ịyẹ à tị́ du ka jẹ́ myị̀myị̀ nyori iJisọsị wẹẹ kpa “ọnchẹ ọ-chịla o-hu ọkịlẹtụ ha bala ọngọ jẹ́ ẹla” họ ụkụrwọ alẹ? (ỊJọn 6:68)

¹³ IJisọsị ya ogu ọlẹ kọ datị hi ịkịla wuu yeji odehe ọlẹ nyọka kpa ịgba ọgbagba ocheri-cheri nwà kịlahị bwula “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” Ányị a tịị yẹ ogu ọwẹ? Ọhẹka, ọ ka lang jaabwọ kọ la ọlẹrụ iPita kọ byi iJisọsị yẹkẹẹ: “Ahị tị́ ka jẹ́-ẹ rụ hing ka ẹga nya owo wẹẹ? Kaahụ ayịdang kpakpakpa a la ẹla nya ọhịhị ọmyịmyị-ka ọọwa.” (Jọn. 6:68) Ale ọngọngọọng nyahị à tị́ ka ji alẹ ịnọ kori kahị wẹ ka jẹ́ ogu nya iJihova ka? Bwulọọ, ịKịrayịsị wẹẹ ya ang myị́ ang ịlẹ wuu kahị baba hahị nyọka godayị giri-giri ha Ohe. Ọ myịmyị mẹ ang jẹ́ẹhị nyọka jẹ́-ẹ kpa ẹrụ ọnyịịla pyẹ yẹẹyẹẹ. Da ọọwa u-uhye, ọ dahị ụbwọ nyọka hu “ọhịhị onyeewe” dakụrụ chajị ká ẹla nyahị ka kpụ iJihova ịpyọ.—Efe. 4:24.

14. Ányị a tị́ yé apyobwuna nyọlẹ ka ji ogu nya iJihova lụka nya ẹdụrụ nya COVID-19 ọlẹ kọ kpeji?

¹⁴ IJisọsị kaa mẹ ụgbẹyị ọnyịịla jẹ́ẹhị ụka nya ojigi-jigi. Apyobwuna nya ẹla ọmẹjẹ ọlịnyị la gede-gede lụka ká ẹdụrụ nya COVID-19 kpeji. Ụka ọlẹ ká iru nya angịnyị odehe á jẹ́  jaabwọ kị ka họ datị ka, iJisọsị họ chịkpẹẹ kpụ ahị yé ẹla ọmẹjẹ ọgbagbịla ọlẹ kọ ka chewu keehi. Ị juhi ọhụ nyọka ya ang kụrụ ọnụ bala okwinyi ụka kahị ja kpehe ka ẹga ká angịnyị lụmẹ bala ọ-chị hwẹẹ hi angịkịla. Ị kpụ angịgbahị nya ọjịra-jịra ịtịya nyọka wo ẹla bwu ẹga nya ọng myị́ ọng ọọjịra-jịra ụka myị́ ụka chajị nyọka jẹ́ ịbaba nyaa ẹ-ẹga nya ang nya ugbinyịrọ bala ịnya olegu. (Ayị. 32:1, 2) Ahị myịmyị kaa yé ọhụ ojuju bala ang ọmẹjẹ bwula oja ị-bwu ẹga nya Angị Kpẹhị Rịrị Ogu.

15. Ẹlịyẹ ị tị́ ya jehi u-uhye nya ọjịra-jịra ọkaka bala ẹrụ ọnyịịla ọ-kpa pyẹ lụka nya ẹdụrụ ọlẹ kọ kpehe? Ịyẹ à tị́ ri ocheju nyọọwa?

¹⁵ Lụka nya ẹdụrụ ọwẹ ịnyịnyị, ị mẹjẹ́ẹhị gbagbịla jaabwọ kahị ka bwu họ ọjịra-jịra bala ọ-kpa ẹrụ ọnyịịla pyẹ. Ahyaahị la ọ-bịrị ụka ka, ahị dọmwụ nyọka họ ọjịra-jịra nya epwihi, ịnya isekut bala ọjịra-jịra ọtụka bwu intanẹtị. Ileta ọdada bala iFon à ri ụgbẹyị ọkpọnchị ọlẹ kahị kaa kpa ya ẹrụ ọnyịịla ịnyịnyị lẹ. IJihova tị wahị kụrụ aga ọmama nyahị. Egbeju-ẹpwa lụmẹ-lụmẹ ya dodehe nyori angị kpa ẹrụ ọnyịịla pyẹ o-oye nyaa nyị nwà kịlahị yẹẹyẹẹ. Iru nya angịnyị dọmwụ la oja ịkpịpyọ-kpịpyọ ịlẹ kị ka juhi ọhụ lụka ọwẹ.—Yẹ akpa ọlẹ kọ ri, “ IJihova Wahị Kụrụ Ẹrụ Ọnyịịla ọ-Kpa Pyẹ Nyahị.”

16. Ahị ọdahile oyina ahị tị́ la?

¹⁶ Ọ ka la angịhyẹ lala o-ri ogu nya iJihova nyị ja họ kpoye u-uhye nya ẹdụrụ ọwẹ lẹ myị́. Ma ụka lụmẹ-lụmẹ, ọ la gbagbịla nyori ẹla ọlam-ọlam ị wẹẹ mẹjẹ́ẹhị lẹ. (Mat. 11:19) Jaabwọ kahị tị juwa kụ irya u-uhye nya ụgbẹyị ọnyịịla ọlẹ ká iJisọsị wẹẹ bwu kpa angịnyị nyamwụ ụgbẹyị, ahị kaa la ahị ọdahile nyori jaabwọ myị́ abwọ ká ijuju-ú ka la, iJihova bala Ọnyẹwẹ nyamwụ ka juwa balahị.—Wa Ala iHiburu 13:5, 6.

17. Ányị ọ tị́ lang nyọlẹ ká iJisọsị wẹẹ kpang ụgbẹyị?

¹⁷ Ahị chị ọkẹkẹnị yẹẹyẹẹ nyọlẹ ká iJisọsị à ri olegbeju nyahị! Ahị ji ẹpwụ nya ogu ọlẹ ká ịhọhọ nya ala ẹga, ẹpwụma nya ọngịnyị bala òja chịhị ebwo ka. Ị mẹ ang jẹ́ẹhị nyịlẹhị-ịlẹhị bwu Omyi Ẹla nya Ohe bala ọ-mẹjẹ́ẹhị jaabwọ kahị ka jẹ́-ẹ bwu kpa ẹrụ ọnyịịla pyẹ yẹẹyẹẹ. Ịnyịnyị, ị mẹ abwọlẹ kahị ka bwu hu abwụma onyeewe dakụrụ jẹ ọngọngọọng nyahị bala ọ-ka mẹ ọháha jẹ ẹ-ẹga nya awụlẹ. Ahị la ang myị́ ang ọlẹ kọ du kahị ka chị ogu chajị iJisọsị à ri olegbeju nyahị lẹ!