1. Ẹlịlẹhị oyina Adịrahụ iSolomọn à tị́ ya ụ-ụpwụ nya Ọngọlirya 7:20?

 ADỊRAHỤ iSolomọn da ụpwụ yẹkẹẹ: “Ọlabwẹla ọnyịịla ọhẹ-lọhẹ-ẹ́ jam odehe kọọ họ ang ọnyịịla ụka wuu, la ọ-họ ọhọbịrị ụka ọhẹ-lọhẹ ka lẹ ka.” (Ọngọ. 7:20) Ẹlịlẹhị à wẹ lẹ! Ahị wuu ri alịhọbịrị. (1 Jọn. 1:8) Lẹ ahị wuu baba nya ọ-hịnyọhi bwu ẹga nya Ohe bala angịnyị aanahị.

2. Ányị ọ tị́ kaa la ọngịnyị kori ká oligu nyamwụ o-chii á hịnyọhi họọ?

² Ịwẹẹ ọdada á juwa ka, à ka kpịtịya nya ụka ọhẹ ọlẹ ká họ ẹla wụ oligu o-chii nyang ẹjẹ. À tị tịtọ nyọka ri oligu nyamwụ wẹẹ lẹ, à ya ụbwọ beji bwu ẹpwụ ọkịlẹtụ. Ányị ọ tị́ lang nyọlẹ ká oligu nyang ọọwa hịnyọhi hang? Ugbodu kpung nyii? Ee, à dọmwụ chị ọkẹkẹnị ịnyịnyị!

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ahị tịtọ ká iJihova ka ri Oligu nyahị ọlẹ kọ la chii gụ́ wuu, ma ụka ọhẹ bala ụka ọkịla, ahị kaa ya ẹla lee ọ-họ ẹla wọọ ẹjẹ. Ányị ahị tị́ ka họ kahị ka jẹ́ myị̀myị̀ nyori iJihova nwụlanọ nyọka hịnyọhi hahị? Ịyẹ à tị́ ri ọdatị nya iJihova ọ-ka hịnyọhi bala ahị ọ-ka hịnyọhi? Owo Ohe à tị́ kaa hịnyọhi ha?

4. Ahị tị́ họ anyị kahị jẹ́ myị̀myị̀ nyori iJihova nwụlanọ nyọka hịnyọhi?

⁴ Omyi Ẹla nya Ohe họ kahị jẹ́ myị̀myị̀ nyori iJihova nwụlanọ nyọka hịnyọhi. Ụka ká iJihova ya ịlọmwụ je iMosisi ọ-Ọgbọdọ nya ịSịnayị, ọ kpa olegu-ẹrụ byi iMosisi yẹkẹẹ: “Am kpakpakpa à ri [iJihova] lẹ. Am [iJihova] ri Ohe Oluhye  ọlahyẹẹrwẹrwa bala ọlọnahị ọlẹ koo ju agbama hyaa ka, kọ la ọháha o-gbu enyi-ka bala o-ju ọdahịhile. M̀ kaa họ ọnahị ẹ-ẹga nya ụnụnụụnọ nya angịnyị. M̀ kaa hịnyọhi ọhọbịrị bala ang inyibyi ịhọhọ nya angịnyị.” (Ehe. 34:​6, 7) IJihova ri Ohe ọlọnahị bala ọla ahyẹẹrwẹrwa ọlẹ kọ kaa nwụlanọ ụka wuu nyọka hịnyọhi ha alịhọbịrị ịlẹ kị yẹda.​—Neh. 9:17; Eje. 86:15.

5. Jaabwọ ká Eje Ọnyịịla 103:​13, 14 ya, ịyẹ iJihova à tị́ kaa họ nyọlẹ kọ jẹ́ jaabwọ ká angịnyị la?

⁵ Nyọlẹ ká iJihova à họhị wẹẹ, ọ jẹ́ ang myị́ ang oluhye nyahị wuu. Kụ irya wẹẹ! Ọ jẹ́ ẹla ọnyị myị́ ọnyị u-uhye nya ọngọngọọng wuu odehe ọlẹ. (Eje. 139:​15-17) Lẹ ọ kaa yẹ ọkpẹẹkpẹẹ ọlala-ka ọlẹ kahị ri ugu bwu ẹga nya adahị. Ọ dọmwụ jẹ́ ẹla ịlẹ kị họ tahị ẹ-ẹpwụ nya ọhịhị dudu kahị ri ụma nya ọngịnyị ọlẹ kahị ri wẹ lẹẹlẹẹ. Ịyẹ iJihova à tị́ kaa họ nyọlẹ kọ jẹ́ẹhị pwụ ọlịịwẹ? Ọọwa kaa gwoo gbịla nyọka yẹhị ahyẹẹrwẹrwa.​—Eje. 78:39; wa Eje Ọnyịịla 103:​13, 14.

6. Ányị iJihova à tị́ bwu mẹjẹ nyori ọ nwụlanọ nyọka hịnyọhi?

⁶ IJihova họ kahị jẹ́ nyori ọ kaa nwụlanọ nyọka hịnyọhi. Ọ jẹ́ nyori ẹla ọlẹ ká Adam ọngịnyị nya ọgbanyẹ-ọgbanyẹ họ, yahị ju ka ẹpwụ nya ọhọbịrị du kahị kaa gbu. (Rom. 5:12) Ịngịhyẹ-ẹ́ ji ahị ka jẹ́-ẹ họ nyọka gba ịlọhị lee ọngọkịla ọhẹ-lọhẹ kpehe hi ẹpwụ nya ọhọbịrị bala igu kaka. (Eje. 49:​7-9) Ma, Ohe tị yẹhị ahyẹẹrwẹrwa du kọ nwụla iwe nọ nyọka gbahị kpehe. Ịyẹ ọ tị́ họ? Jaabwọ ká ụpwụ nya ịJọn 3:16 họ kahị jẹ́, iJihova du Ọnyẹwẹ nyamwụ wẹ ka gbu chajị nyahị. (Mat. 20:28; Rom. 5:19) IJisọsị gbu wọnụ nyahị ju chajị ká ọngọngọhẹ ọlẹ kọ la ọmyịmyị ẹ-ẹga nyamwụ ka jẹ́-ẹ la ọ-gba kpehe. (Hib. 2:9) Ọ jụ́ iJihova yẹẹyẹẹ nyọlẹ kọ yẹ ká Ọnyị ọlịkẹjẹ nyamwụ gbu igu o-nyuujujwo ọlẹ kọ la oyoyi! Ẹlịlẹhị ri, iJihova á ka myị-ị̀ ya iwe da Ọnyị nyamwụ ka gbu, kori Kọ tịtọ nyọka hịnyọhi hahị ka lẹ ka.

7. Owo anyị à tị́ ri angịhyẹ ịlẹ ká iJihova hịnyọhi ha?

⁷ ỊBayịbụụ myị̀ la iru nya angịnyị ịlẹ ká iJihova hịnyọhi ha. (Efe. 4:32) Owo à tị́ wẹ irya nyang? Ọhẹka à wẹẹ kụ irya nya Adịrahụ ịManasẹ. Ọlọkwọ ọwẹ họ ọhọbịrị ba iJihova a-agbẹyị ịlẹ kị tịpyọ kaka kpoye.  Ọ kpa ịlahị ẹ-ẹpwụ nya ịgba ọgbagba nya ọnọọkịla. Ọ nwụ anyị nya ịlọmwụ, yaa kiliya ha ihye nya ịnịịkịla. Ọ dọmwụ ya ukpeku nya ihye ịnịịkịla yeji u-ube ọ-la ịgọgọ nya iJihova. ỊBayịbụụ ya ẹla rwọọ yẹkẹẹ: “Ọ họ ang inyibyi lụmẹ ka kpoye ị-ịlahị nya [iJihova], du agbama ju [iJihova].” (2 Ego. 33:​2-7) Ma, ụka ká ịManasẹ yẹ irya da nya ịlẹhị, iJihova hịnyọhi họọ. Ohe dọmwụ ya iwe da họọ nyọka ri adịrahụ myịmyị. (2 Ego. 33:​12, 13) Ọhẹka à ka kụ irya nya Adịrahụ iDevidi ịnyịnyị, kọ họ ịhọbịrị ịtụka-ịtụka ba iJihova, lala ụya bala ọngịnyị ọnwụnwụ. Ma, nyọlẹ ká iDevidi jẹ́ abyị nya ịlọmwụ kọ yẹ irya da ọlam-ọlam, iJihova hịnyọhi họọ ịnyịnyị. (2 Sam. 12:​9, 10, 13, 14) Ee, ahị ka jẹ́ myị̀myị̀ nyori iJihova kaa nwụlanọ nyọka hịnyọhi. Jaabwọ kahị tị wẹẹ ka yẹ, ụka ká iJihova á hịnyọhi, ịnyamwụ kaa datị hi ịnya angịnyị ehe.

8. Ányị iwe-ahụrụ nya Ọngọ cheje ọlẹ ká iJihova ri à tị́ gu abwọlẹ kọ jẹ́-ẹ hịnyọhi?

⁸ IJihova à ri “Agaba ọ-cheje ọtụka-ọtụka nya alodehe wuu” lẹ. (Ọmwụ. 18:25) Ọngọ cheje kaa baba nyọka jẹ́ ehile yẹẹyẹẹ. Ịnyị ọ tị la ẹ-ẹga nya iJihova lẹ, chajị ọ ri Ọngọleje nyahị ene kọọ ri Ọngọ ya ehile hahị ịnyịnyị. (Ayị. 33:22) Ọngọhẹ-ẹ́ ji kọ jẹ́ ẹla u-uhye nya ang ọnyịịla bala ang ọtịpyọ lala iJihova ka. Ang ọkịla oyina ọngọ cheje à tị́ baba nyọka jẹ́? Ọ baba nyọka jẹ́-ẹ kụ ẹhị yẹ iwe-ahụrụ ịlẹ kị dagaga ju ẹla wuu ene kọ ka cheje. Lẹ iJihova à ri Ọngọ cheje ọlẹ kọ há gụ́ wuu lẹ, chajị ọ jẹ́-ẹ yẹ ang myị́ ang wuu.

9. Ẹlịyẹ iJihova à tị́ị̀ jẹ́ ụka kọ ja ka cheje kori kọ ka hịnyọhi?

⁹ IJihova datị hi angịnyị ehe chajị ọwa jẹ́-ẹ yẹ iwe-ahụrụ ịlẹ kị dagaga ju ẹla ọnyị myị́ ọnyị. (Ọmwụ. 18:​20, 21; Eje. 90:8) Ọwa jẹ́-ẹ yọyị bala o-wo ẹla kpoye nya ịnya angịnyị ehe. Ọ jẹ́ jaabwọ ká abwẹla ịlẹ ká ọngịnyị ri ugu bwu ẹga nya ịnamwụ bala adamwụ, abwọlẹ kị kpọọ nwà, ẹga ọlẹ kọ kụ, bala ẹla ọjẹ́jẹ nya ọngọọwa kaa gu abwẹla nyamwụ. IJihova jẹ́-ẹ yọyị ka ọkịlẹtụ nya ọngịnyị ịnyịnyị. Irya ọlẹ ká ọngịnyị la bala ang ọlẹ kọ kaa gwoo gbịla kaka họ ẹla kaa la Ohe gbagbịla. Ịngịngịhyẹ á ka jẹ́-ẹ kpịbaa hi iJihova kaka. (Hib. 4:13) Lẹ, ụka ká iJihova á hịnyọhi ha ọngịnyị aalẹ, ọ họ ịnyị chajị nyori ọ jẹ́ ẹla oluhye nya ọngọọwa wuu.

10. Ịyẹ tị́ du kahị ka jẹ́-ẹ ya nyori eje ọchịchị nya iJihova kaa la kpakpa ụka wuu? (Ehile Ọmada 32:4)

¹⁰ Eje ọlala nya iJihova kaa la kpakpa bala ọ-la kpẹẹkpẹẹ ụka wuu. Ọ́ kaa yẹ oye-oye kpong-kpong ka. IJihova á kaa hịnyọhi ha ọngịnyị chajị nyori ọngọọwa há ụhị, ọ kpụdụ, ọ rụ́ ohi, lee ọ-jẹ́ ang lụmẹ ka. (1 Sam. 16:7; Jem. 2:​1-4) Ọngọngọhẹ-ẹ́ ka jẹ́-ẹ tụ́ iJihova tutu kaka họ ẹla lee ọ-ya ang chọọ ikiri ju kaka. (2 Ego. 19:7) Eje ọchịchị nyamwụ á kaa kpụnịrọ ẹjẹ ọwụwụ lee ịmẹnyẹ ka. (Ehe. 34:7) Ịwẹẹ ọdada á juwa ka, ẹla ọjẹ́jẹ nya iJihova bala abwọlẹ kọ jẹ́-ẹ yọyị nya ẹla pyịị kaka ba du kọ ri Ọngọ cheje ọlẹ kọ há gụ́ wuu.​—Wa Ehile Ọmada 32:4.

11. Ụgbẹyị oyina ọ-hịnyọhi nya iJihova à tị́ bwu datị?

¹¹ Angịlẹ kị da ụpa nya ịBayịbụụ ọlẹ kị da la òja nya iHiburu jẹ́ nyori iJihova kaa hịnyọhi ụ-ụgbẹyị ọ-datị. Omyi ẹla nya ala iHiburu ọlẹ kị kaa kpa ya ẹla ụka ọhẹ ri ụma ọlẹ ká ụpwụ ọhẹ ya nyori nyị “kaa kpa chabwọ nya ụgbẹyị ọlẹ ká Ohe kaa hịnyọhi ha alọhọbịrị kem ịnyị. Omyi ẹla ọọwa á chabwọ nya ụgbẹyị ọpyịnyẹng ọlẹ ká angịnyị ehe  kaa hịnyọhi ha awụlẹ ka.” IJihova kem à la ọngịrị nyọka hịnyọhi gbang-gbang ha ọlọhọbịrị ọlẹ kọ yẹ irya da lẹ. Ịyẹ à tị́ kaa họ ụka ká iJihova á hịnyọhi ha ọngịnyị?

12-13. (a) Apyobwuna oyina ọngịnyị à tị́ kaa yé ụka ká iJihova á hịnyọhi họọ? (b) Ányị apyobwuna nya ọ-hịnyọhi nya iJihova à tị́ kaa tata ka ba?

¹² Ụka kahị myị nyori iJihova hịnyọhi hahị lẹ, ahị kaa “la ila ọchịchị,” lee ọ-chị ọkẹkẹnị tụ́ okpunyi nya ọkịlẹtụ bala irya oleje ocheri-cheri. “Ijata nya Ọngọlahị Ohe Oluhye” kem, ọ-hịnyọhi ọlịnyị à ka jẹ́-ẹ bwu myị́ lẹ. (Ụkụr. 3:19) Ụka ká iJihova á hịnyọhi hahị lẹ, ọ kaa ya iwe da hahị nyọka ri igu balọọ myị́myị́ lala o-ri ahị nyị́ dọmwụ họ ọhọbịrị ọhẹ lọhẹ ka.

¹³ Ọ́ kpụ ká iJihova á hịnyọhi hahị lẹ, ọ́ ka kpụhị ịtịya nya ẹla ọọwa lee ọ-yẹhị akama chajị nya ọhọbịrị ọọwa ẹnẹnẹhẹ kaka. (Ayị. 43:25; Jer. 31:34) “Jaabwọ ká ọmwẹnụ-ụtụrụ ji hwẹẹẹ hi ọmwẹnụ-obyi-ì wẹẹ, ịnyịnyị-ịnyịnyị [iJihova à] tụ ịhọbịrị nyahị rụ hwẹẹẹ hiihi lẹ.” * (Eje. 103:12) Ụka kahị kụ irya u-uhye nya abwọlẹ ká ọ-hịnyọhi nya iJihova lụmẹ kaka ba, ọ kaa myịhị lẹhị yẹẹyẹẹ. (Eje. 130:4) Ma owo iJihova à tị́ ka hịnyọhi ha?

14. Ẹlịyẹ ahị tị́ jẹ́ u-uhye nya ang odudu ká iJihova kaa hịnyọhi ha ọngịnyị lee ọ-ka họ ịnyị ka?

¹⁴ Jaabwọ kahị yẹ wẹ, a-abwọlẹ ká ọhọbịrị nya ọngịnyị á lụmẹ lee ọ-la pyịnyẹng kaka ba iJihova à kaa kpa hịnyọhi ka. Ịnyịnyị, ahị wẹ ka jẹ́ nyori ẹla ọjẹ́jẹ ọlẹ ká iJihova la lala Ọngọ họhị, Ọngọ ya Ehile Hahị, bala Ọngọ Cheje, ọ kaa kpa chụ kori kọ ka hịnyọhi ha ọngịnyị lẹ. Ịyẹ iJihova à tị́ kaa kụ irya ju ụka kọ ja ka hịnyọhi ha ọngịnyị?

15. Jaabwọ ká iLuku 12:​47, 48 ya, ẹlịyẹ iJihova à tị́ kaa kụ ẹhị yẹ ene kọ ka hịnyọhi?

¹⁵ Ịngịhyẹ ọlẹ ká iJihova kaa kụ ẹhị yẹ ri kori ká ọlọhọbịrị ọọwa á jẹ́ nyori ang ọlẹ kọ wẹẹ họ nyị tịpyọ lee ọ́ jẹ́ ịnyị ka. IJisọsị họ ẹlẹwẹ la gede-gede, jaabwọ kị da ju ụ-ụpwụ nya iLuku 12:​47, 48. (Wọọ.) Ó ri ká ọngịnyị á me irya nyọka họ ang ọlẹ kọ jẹ́ nyori nyị wụ́ iJihova ẹjẹ, kọ tị họọ ọọlajị nya ọkịlẹtụ otịpyọ nyamwụ aalẹ, ọhọbịrị ọtụka ọ họ wẹ lẹ. IJihova ka pwa la ọ-hịnyọhi  ha ọngọlịnyị myị́. (Mak. 3:29; Jọn. 9:41) Ẹlịlẹhị tị ri, ụka ọhẹ ji kahị kaa jẹ́ nyori ang ọlẹ kahị họ nyị tịpyọ. Ahị ọdahile nya ọhịnyọhi ka ji hahị ụka ọlịnyị myị́? Ee! Ọwẹ kpahị ju ka ang ọkịla ọlẹ ká iJihova kaa kụ ẹhị yẹ ụka kọ ja ka hịnyọhi.

16. Ịyẹ à tị́ ri irya ọ-yẹda? Ịyẹ tị́ du kahị baba nyọka yẹ irya da ene ká iJihova ka hịnyọhi hahị?

¹⁶ Ang ọkịla ọlẹ ká iJihova kaa kụ ẹhị yẹ ri kori ká ọlọhọbịrị ọọwa á yẹ irya da. Ịyẹ à tị́ ri etu nya irya ọ-yẹda? Irya ọ-yẹda ri ọ-ka “nwụ irya, abwẹla, lee ang ọlẹ ká ọngịnyị wẹẹ ku rịrị.” Ọngịnyị ọ-ka mẹjẹ nyori ẹla ọtịpyọ ọlẹ kọ họ lee ang ọnyịịla ọlẹ kọ jẹ́ họ ka nyị jwọọ bala ọ-tọọ olujwo, ji ẹpwụ nyamwụ. Ang ọtịpyọ ọlẹ ká ọngịnyị ọlẹ kọ la ọkịlẹtụ nya irya ọ-yẹda họ kaa jwọọ, ọlẹ kọ tị ya iwe da kpụ ká igu oriri nyamwụ bala iJihova la dẹwụ-dẹwụ du kọ họ ang ịtịpyọ ịịwa kaa jwọọ ịnyịnyị. Kpịtịya nyori Adịrahụ ịManasẹ bala Adịrahụ iDevidi angị imimiiye họ ịhọbịrị ịtụka-ịtụka; ma, iJihova tị hịnyọhi haa chajị ị yẹ irya da ọlam-ọlam. (1 Ịdị. 14:8) Ee, iJihova kaa yẹ ang ẹjẹẹ nyori ahị yẹ irya da ene kọ ka hịnyọhi hahị. Ma ọ-ka mẹjẹ nyori ọhọbịrị ọlẹ kahị họ tọhị olujwo á nwà kem ka. Ahị ka nwụlanọ nyọka nwụhọ pyii. * Ọwẹ myịmyị kpahị ju ka ẹpwụ nya ang ọkịla ọlẹ ká iJihova kaa kụ ẹhị yẹ.

17. Ịyẹ à tị́ ri etu nyọka jahị kpata? Ányị ọ tị́ ka bwu dahị ụbwọ nyọka ma ọhọbịrị ọlẹ kahị họ ene họ kaka? (Ayịsaya 55:7)

¹⁷ Ọngịnyị ọ-ka “jahị kpata” ri ẹla ọkpọnchị ọkịla ọlẹ ká iJihova kaa kụ ẹhị yẹ. Ọọwa ri, ọngịnyị ka ji kpata hi ụgbẹyị nya ang ọtịpyọ ọhọhọ bala ọ-ka hịhị ụ-ụgbẹyị nya iJihova. (Wa Ayịsaya 55:7.) Ọngọọwa ka nwụ irya nyamwụ họ chajị ká ịnya iJihova à ka kpọọ ụgbẹyị. (Rom. 12:2; Efe. 4:23) Ọ ka cheje nyọka tụụbwọ hi irya bala abwẹla ịtịpyọ nyamwụ. (Kol. 3:​7-10) Ẹlịlẹhị tị ri, ọmyịmyị ọlala ẹ-ẹga nya iya ọkịlaakịla nya ịKịrayịsị à kaa du ká iJihova ka hịnyọhi hahị bala ọ-hụ́ụhị cheri-cheri bwu ẹpwụ nya ọhọbịrị lẹ. IJihova ka hịnyọhi hahị chajị nya iya ọkịlaakịla ọwẹ, kori kọ yẹ nyori ahị wẹẹ  maga nyịlẹhị-ịlẹhị nyọka yẹ abwẹla nyahị da.​—1 Jọn. 1:7.

18. Ẹlịyẹ ahị tị́ kụ ẹhị yẹ u-uhye nya ọ-hịnyọhi nya iJihova?

¹⁸ Ahị kpụ ịlọhị ịtịya nya ẹla ịkpọnchị ịlẹ kahị ya ẹla u-uhye nyaa wẹ wẹẹ. IJihova à ri Ọngọ kaa hịnyọhi gụ́ wu ịlẹhị lẹ. Ịyẹ tị́ du kahị ka jẹ́-ẹ ya ịnyị? Ọhọhẹ, ọ kaa nwụlanọ nyọka hịnyọhi ụka wuu. Oheeye, ọ jẹ́ẹhị weji-weji. Ọ jẹ́ jaabwọ kahị la yẹẹyẹẹ, lẹ ọwa à ka jẹ́-ẹ ya kori kahị yẹ irya da ịnyịlẹhị lẹ. Ọhata, ụka ká iJihova á hịnyọhi hahị lẹ, ọ kaa hịlẹ ọhọbịrị ọọwa lala o-ri ahị nyị́ dọmwụ họ ọhọbịrị ọwẹ ka. Ọwẹ du ká olegu á kaa ya eje wuhi kaka, Ohe tị kaa yehi myị ịnyịnyị.

19. Nanana nyori ahị kaa kịnyaa la ọ-họ ọhọbịrị chajị nya ọkpẹẹkpẹẹ ọlala-ka nyahị, ịyẹ tị́ du kahị ka jẹ́-ẹ chị ọkẹkẹnị?

¹⁹ Ẹlịlẹhị tị ri, nyọlẹ kahị la kpẹẹkpẹẹ lẹka wẹẹ, ọhọbịrị kaa gụụhị họ kịnyaa wẹẹ. Ma, ahị ka yé ẹjẹ ọkpụkpụ bwu omyi ẹla ọla ụpwụ nya Insight on the Scriptures, Volume 2, ẹbẹ 771: “Nyọlẹ ká iJihova kaa kpa ugbẹhị nya ahyẹẹrwẹrwa yẹ ọdẹwụ-dẹwụ nya anchẹ nyamwụ wẹẹ, ị́ baba nyọka nwụ ịlaa la imahị ọọlajị nya ọhọbịrị ọlẹ ká ọkpẹẹkpẹẹ ọlala-ka kaa kpaa kaka họ ka. (Eje 103:​8-14; 130:3) Kori kị kaa maga da ịlaa nyọka jẹdịyẹ a-agbẹyị nya Ohe lẹ aalẹ, ị ka jẹ́-ẹ chị ọkẹkẹnị myị́ lẹ. (Filip 4:​4-6; 1Jọn. 3:​19-22).” Ẹlẹwẹ juhi ọhụ yẹẹyẹẹ!

20. Ịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

²⁰ Ọ myịhị lẹhị nyọlẹ ká iJihova nwụlanọ nyọka hịnyọhi hahị ụka ká ọhọbịrị ọlẹ kahị họ á tọhị olujwo nyịlẹhị-ịlẹhị. Ma, ányị ahị tị́ ka bwu gbịla iJihova ẹ-ẹpwụ nya ọ-hịnyọhi? Agbẹyị iyina ọ-hịnyọhi nyahị à tị́ lala ịnya iJihova? Agbẹyị iyina ọ tị́ bwu datị? Ịyẹ tị́ du kọ baba nyahị ọ-ka jẹ́ ọdatị nyaa? Ang ọjẹ́jẹ ọkịla ka wẹ ịtọ ẹla ịwẹ.