Adam bala ịnam rụ bwu Estonia ka Germany lụka nya Ẹwụ nya Odehe Wuu II. Ụ-ụwa ị mam lẹ. Ụka ọwẹ, ị wẹẹ nwụlanọ nyọka rụ ka Canada lẹ. Ẹpwa ọhọhẹ ọlẹ kahị kụ ụ-ụwa ri ube ochiche ọhẹ ọlẹ kị kaa kpa anụ ụ-ụwa ịnyịnyị. Ẹga ọọwa ba Ottawa, Canada ba. Áhị la ang gbuu ka, ma ahị tị kaa yé ejunu ri lụtụrụ.

Ẹnẹhẹ, Alibeenu nya iJihova wa ụpwụ nya Ọwụrụụ-wụrụ 21:3, 4 je ịnam. Ẹla ọlẹ kọ jẹ́ bwu ụwa kpọọ ịpyọ gbee kọ dọmwụ nya ida ojeje. Ẹjẹ nya ẹlịlẹhị ọwẹ nwà kịlahị gbee ká adam bala ịnam hu enyi Ohe lụka okpii.

Adam bala ịnam á wo ọkịrara gbuu ka, ma ị tị kaa gbịgba ha iJihova la ila ọchịchị. Nanana nyori adam kaa họ ụkụrwọ lodu gbee ká ahị ka pyẹ ẹ-ẹga ọlẹ kịị hya oje ọlẹ kị wụrụ nya nickel e-epweji nya Sudbury, Ontario, ẹnụ nya iSatudee ọnyị myị́ ọnyị ọ kaa kpam am bala Sylvia ọnyịnam ọnyang ochiche kpehe nya ẹrụ ọnyịịla ọ-kpa pyẹ. Ahị kaa jẹ́ Ẹpwang ọ-Kụ Gbeji epwihi ọnyị myị́ ọnyị lala ugbiyegu. Adam bala ịnam mẹjẹ́m nyọka la ọháha ẹ-ẹga nya Ohe Oluhye. Ọọwa gum gbịla nyọka hu ịlọm ju iJihova ụ-ụbwọ la 1956 ụka kam gu ẹka iwo. Ọháha ọnyọọngịrị ọlẹ kị la ẹ-ẹga nya iJihova dam ụbwọ ẹ-ẹpwụ nya ọhịhị nyam wuu.

Ụka kam họ kpá bwu ube-ụpwụ, ịngịhyẹ bala ọkịla dọmwụ nyọka chịm ochuchuu. M̀ me nyori kori kam ye ịlahị nya ụgbẹyị lẹ aalẹ, ọ́ ka chịkpẹẹ m ka yé okpoko nwà ọ-ka ka anyị wụla odehe yẹ jaabwọ kọ ri irya nyam kaka. M̀ yé ụkụrwọ nya eje odudu ẹ-ẹga o-ya ẹla ọ-ọhụ bwu irediyo, ụkụrwọ ọọwa tị hám yẹẹyẹẹ. Nyọlẹ ká alobyi m kaa họ ụkụrwọ wẹẹ, m̀ kaa chị ọjịra-jịra da bala ọ-kaa yẹ jula angịlẹ kị la ọháha ẹ-ẹga nya Ohe ka. Ma ụka ohyẹẹkpẹ, ang ọlẹ kam jẹ́ bwu ịBayịbụụ dam ụbwọ nyọka yẹda.

M̀ mwụ ka Oshawa, Ontario. M̀ gbachị Ray Norman, Lesli ọnyịnamwụ ọnyang, bala angị ye ịlahị nya ụgbẹyị ịkịla ụ-ụwa. Ịwa wuu yem myị yẹẹyẹẹ. Abwọlẹ kam yẹ kị kaa chị ọkẹkẹnị kaka ba du kam dọmwụ nyọka kụ irya ju ang ọlẹ kam ka họ la ọhịhị nyam. Ị jum ọhụ nyọka ye ịlahị nya ụgbẹyị, ọọwa m dọmwụ la Ọya Ohikichu nya 1966 lẹlẹ. M̀ chị ọkẹkẹnị ụka ọwẹ, chajị ọhịhị kpịpyọ. Ma, ịngịhyẹ ọlẹ kọ ka yẹ ọhịhị nyam da ja ka họ lụka ọ-kpahị ju ka.

Ụka kam juwa uube-ụpwụ wẹẹ, m̀ ya ụbwọ ju ụpwụ ẹ-ẹpwụ nyọka ka ịBẹtẹlụ ịị Toronto, Canada.  Ụka kọ nọ chẹẹ kam kaa ye ịlahị nya ụgbẹyị, ị wụrụm nyọka họ ụkụrwọ ẹka ine ị-ịBẹtẹlụ. Ma Lesli hám yẹẹyẹẹ, lẹ m̀ chuko nyori kori kam myọnụ nyọka ka ịBẹtẹlụ lẹ aalẹ, ḿ ka yọọ ẹnẹnẹhẹ kaka. Nyọlẹ kam raabwọ yẹẹyẹẹ u-uhye nya ẹlẹwẹ lẹ m myọnụ nyọka ka ịBẹtẹlụ lẹlẹ, ma ọ tị jụ́m nyọka da Lesli ọ-kpahị.

M̀ họ ụkụrwọ ẹ-ẹga ọ-hụ́ ịwụrụ ọla ịBẹtẹlụ ene kam myịmyị-ị̀ họ ụkụrwọ nya akịraa. Ụka ọwẹ, Lesli ri ọngọ kpa ụka nyamwụ wuu ya ẹrụ ọnyịịla ịị Gatineau, Quebec lẹ. M̀ kaa kụ irya u-uhye nya ang ọlẹ kọ juwa họ bala o-ri kori ká eje nya ẹla ọlẹ kam chị wẹ á pwoku ịlẹhị. Ọọwa tị lẹ, ẹla ọkpịpyọ ọhẹ à họ lam ẹbyẹbyị lẹlẹ. Ị wụrụ Ray ọnyịnịna nya Lesli wẹ ịBẹtẹlụ, am bala ọwa ji ube ookpokpo! Ọọwa du kam jẹ́ chị igu oriri nyam bala Lesli ahị. Ahị ye awụlẹ la ahyẹẹnụ ohyẹẹkpẹ nya ẹka ine ọlẹ kị ya ham nyọka họ ụkụrwọ ị-ịBẹtẹlụ, kọ ri Ọya Oheeye 27, 1971.

Ị yam am bala Lesli du ka ọjịra-jịra ọlẹ kị kaa ya òja nya French ịị Quebec. Nyọlẹ ká ẹka ịmanyị-ịmanyị chịpwụrụ, ọ lam ẹbyẹbyị nyọlẹ kị wụrụm nyọka ri ọngọ kpẹhị rịrị isekut ụka kam gu ẹka 28. M̀ ri ịlọm onjwo bala o-ju uhi nyọka jụ ụkụrwọ ọwẹ họ, ma omyi ẹla nya iJeremaya 1:7, 8 jum ọhụ. Ma Lesli tị keji ụka imimiiye ẹ-ẹpwụ nya omoto du kọ jẹ́-ẹ nune lodu ka. Lẹ, ányị ahị tị́ ka bwu họ ụkụrwọ nya isekut ọ-kpẹhị rịrị myị́? Lesli ahụm tị yẹkẹẹ: “Kori ká iJihova á wụrụụhị nyọka họ ịngịhyẹ, áhị ka maga nyọka họ ang ọọwa ka?” Ahị ye ụkụrwọ ọwẹ myị kpụ ahị họọ ẹ-ẹpwụ nya ẹka 17.

Ụkụrwọ kaa lụmẹ ham, lẹ ḿ jẹ́-ẹ hi ụka ha Lesli ahụm nwà ụka myị́ ụka ka. Ẹla ọkịla ọhẹ tị ji kam wẹ ka jẹ́. Ẹnụ nya ịMọndị ọhẹ la ewu-ụtụrụ, ọngọhẹ ya ụbwọ kpa ụgbẹyị nyahị. Ahị ka wụrụ ụgbẹyị kpá wẹẹ, áhị tọ ọngọọwa kaka. Ang ịlẹ kahị yẹ ri egbe nya ekeji, apwụ ọ-da kụrụ itebwuru, ịkaa, ekpem nya ere, ekoku ị-kpa nwà ere bala ang ịkịla kị ju olo kẹm-kẹm hahị. Ụpwụ ọlẹ kị da nụwa yẹkẹẹ: “Kpa ahụ nyang kpehe ka ye ọhụ mẹ.” Ẹnụ chị há yẹẹyẹẹ ẹnụmwụ ọwẹ. Ma m̀ tị wụlẹ ya je ahụ nyam nyori m̀ baba nyọka nwụla ẹla oyaya nyam nọ lẹ ḿ ka jẹ́-ẹ ka ka. Ọ lọọ gbagbịla, ma ọ tị jwọọ pyịnyẹng. Olegu dọmwụ nyọka lam eje ụka kam hụhụ nyọka dọmwụ. M̀ kụ irya ju ụpwụ nya Ala Efesọsị 5:25, 28. M̀ yẹ nyori ẹla ọla ẹgẹwẹ ri ụgbẹyị ọlẹ ká iJihova wẹẹ bwu kpụm ịtịya nyọka họ ẹla ọlẹ kọ ka kpụ ahụ nyam ịpyọ. Nyọlẹ kam raabwọ u-uhye nya ẹlẹwẹ kpá kam byi ahụm nyori, “ahị rụ mẹ,” ọ kpọọ ịpyọ yẹẹyẹẹ. Ahị pá ang ọrụnyẹ ka ẹga ọhụ́hị-hụ́hị ọhẹ ọ-ọnụ nya enyi, ahị ya apwụ ọọwa da lẹ, ahị hụhụ ri ang ịlẹ kahị kpa lẹlẹ. Ahyẹẹnụ ọwẹ ri ọhẹ ẹ-ẹpwụ nya ịlẹ kị kpịpyọ gú wuu ọ-ọhịhị nyahị. M̀ tị jẹ́ nwụla ẹla oyaya nyam nọ ịnyịnyị myị́.

Ụkụrwọ nya isekut kpịpyọ ọ tị lụmẹ ịnyịnyị, bwu British Columbia ju ka Newfoundland. Lẹ, anyị ọlẹ kọ kaa maam-ma lụka kam ri onjwo, m wẹẹ ka lẹẹlẹẹ ẹẹ. M̀ kụ irya u-uhye nya ube-ụpwụ nya iGilead  ma ḿ tị tịtọ nyọka rụ ka ẹpwụma ọkịla ka kpa ẹrụ ọnyịịla pyẹ ka. Ọ lam lala o-ri am nyị́ nwà ọ-ka ri ọngọ kpa ẹrụ ọnyịịla pyẹ ẹ-ẹpwụma ọkịla ka. Datị hi ọọwa, m̀ ju uhi nyori ị ka yam du ka ẹpwụma nya Africa ẹgẹlẹ ká ẹdụrụ bala ẹwụ ji. Canada ẹga kam ji wẹ nwam lẹ.

La 1992 ká ụkụrwọ nyahị wẹẹ wụrụ dụmwọ-dụmwọ ẹ-ẹpwụma ịlẹ kị ji ẹpwụ nya Soviet Union ene-ene, alegbeju ẹpwa tọhị wo kori kahị ka myọnụ nyọka ka ẹpwụma nya Estonia nyọka kpa ẹrụ ọnyịịla pyẹ ụ-ụwa. Ọ lahị ẹbyẹbyị, ma ahị tị raabwọ u-uhye nya ẹlẹwẹ. Ẹla ọlẹ kọ wẹ irya nyahị myị́myị́ ri, ‘kori ká iJihova á byihi nyị họ ang, ọ́ ka há kahị ka mọọ yẹ ka?’ Ahị myọnụ nyọka ka ụwa, ọ tị hám nyọlẹ kọ ri Africa kahị wẹẹ kà ka.

Ahị dọmwụ nyọka jẹ́ òja nya ala Estonia i-ijata. Nyọlẹ kahị ha ọya imiiye ụ-ụwa lẹ, alegbeju ẹpwa à ya ahị nyị họ ụkụrwọ nya ọngọ kpẹhị rịrị isekut mẹ lẹlẹ. Ọjịra-jịra ịlẹ kahị ka ju ụga ẹ-ẹpwụma ịta ịla Baltics bala Kaliningrad, Russia la 46 bala ebwo ịkịla. Ọọwa mẹjẹ nyori ahị ka baba nyọka jẹ́ òja nya ala Latvia, ala Lithuania, bala ala Russia. Ẹlẹwẹ lujwo chẹẹ. Aanahị alẹng bala anyang kaa chị ọkẹkẹnị nyọlẹ kahị kaa maga pwụ ọlịịwẹ, lẹ ị kaa dahị ụbwọ. La 1999, ị ya egbeju ẹpwa nyahị yeji ẹ-ẹpwụma nya Estonia, ọọwa ị chụm bala Toomas Edur, Lembit Reile, bala Tommi Kauko nyọka kpẹhị rịrị egbeju ẹpwa ọọwa lẹlẹ.

Ahị wẹ ka jẹ́ iru nya Alibeenu nya iJihova ịlẹ kị ku rụ ka Siberia ene nya ụka ọwẹ. Nanana nyori ị kpaa la ụbwọ ọngịrị u-ube nya agba bala o-ri ị chaa ebwo hi ugbiyegu nyaa, ị́ kaa ju agbama ka. Ị kịnyaa la ọ-kpa ẹrụ ọnyịịla pyẹ la ọkẹkẹnị bala ila ọchịchị. Ọọwa dahị ụbwọ nyọka yẹ nyori ahị ịnyịnyị ka jẹ́-ẹ bọhụ bala ọ-chị ọkẹkẹnị ẹ-ẹpwụ nya iwe-ahụrụ olujwo.

Ahị họ ụkụrwọ ẹ-ẹpwụ nya ẹka lụmẹ-lụmẹ la ọ-kaa mwịịnyọ gbuu ka, ọọwa du ká ịnyịrọ dọmwụ nyọka chị Lesli ahụ nyam pyẹpyẹ kpoye-kpoye. Áhị jẹ́ i-ijata nyori ẹdụrụ ọlẹ kị wụrụ fibromyalgia, kọ kaa chị ọngịnyị ịnyịrọ pyẹpyẹ ọ la wẹ ka. Ahị dọmwụ nyọka kụ irya nyọka rụ ka Canada. Ụka kị wụrụụhị ka ube-ụpwụ nya angị kpẹhị rịrị egbeju ẹpwa ọla Patterson, New York, U.S.A., m̀ yọọ lala o-ri ahị nyị́ ka ka myị́ ka. Ma ụka kahị raabwọ nyịlẹhị-ịlẹhị u-uhye nyamwụ kpá, ahị ye myị́. IJihova wahị kụrụ eje ochịchị nyahị ọọwa. Ụka kahị juwa uube-ụpwụ, ị jẹ́ họ ahụ nyam utoji yẹẹyẹẹ lẹ. Ọọwa du kahị jẹ́ dọmwụ nya ụkụrwọ ọlam-ọlam tịrẹkpẹ.

Alobyi nya ẹnẹhẹ la ẹka nya 2008 kahị juwa ẹ-ẹpwụma nya Estonia wẹẹ, ị wụrụm la ifon bwu egbeju ẹpwa tọm wo kori kahị ka myọnụ nyọka ka Congo. Ọ lam ẹbyẹbyị, ọgụgụ nyọlẹ kam baba nyọka waa ẹla tịrẹkpẹ la ahị ọpyẹpyẹ nya ẹnụtụrụ ọ-ba ọwẹ ba. Ḿ myị́ ya je ahụm lụka nya ọgbanyẹ ka, chajị m̀ jẹ́ nyori ọ́ ka nune myị́ ẹnẹwẹ ka. Ọkọkọ nya ọọwa am à ri ọngọ nune ka ọọlajị nya ọlẹ kam wẹẹ raabwọ ha iJihova u-uhye nya ang odudu ká Africa lam uhi-uhi lẹlẹ.

Ahị ọpyẹpyẹ nya ẹnụtụrụ ọkịla kam ya je ahụm, ahị yọọ nyori “iJihova à wẹẹ wụrụ́ụhị ka Africa lẹ.  Ahị tị ka họ ányị kahị ka jẹ́ nyori ahị-ị́ ka họọ myị́ ka kori kahị mọọ yẹ ka?” Lẹ nyọlẹ kahị họ ẹka 16 ẹ-ẹpwụma nya Estonia kpá, ahị ju ụgbọ oluhye ka Kinshasa, Congo. Egbeju ẹpwa ọlụwa há ụhị bala o-ju okpunyi yẹẹyẹẹ. Ang ọhọhẹ ọlẹ ká Lesli ahụm ya nọ u-ube ri ịkadị ọlẹ kọ kpa ba ịlọmwụ bwu ụka-ụka kahị rụ bwu Canada. Ẹla ọlẹ kị da bọọ ri yẹkẹẹ: “Chị ọkẹkẹnị ẹ-ẹga myị́ ẹga kị kpang ka.” Ụka kahị jẹ́ aanahị ịlụwa, kahị mẹ ịBayịbụụ jẹ angịnyị, bala ọ-yẹ ịpyọ ọkpụkpụ nyọka họ ụkụrwọ nya iJihova ẹ-ẹpwụma ọkịla, ahị chị ọkẹkẹnị gụ́ olene. Nyọlẹ kọ nọ chẹẹ, ahị la iwe nyọka bwu egbeju ẹpwa kaka wụla aanahị ịkịla yẹ ẹ-ẹpwụma ịla Africa lala 13. Ọọwa ya iwe hahị nyọka jẹ́ ụhị bala ang ịdatị-datị ọla uhye nya alụwa. Uhi nya Africa ọlẹ kam ju myị lẹ, m̀ tị ji iJihova obe ọhọhọ nyọlẹ kọ yahị du wẹ ka họ ụkụrwọ Africa.

Ụka kahị juwa ịị Congo, ị kaa ya ang oriri lala ekpunjuju hahị. Ahị kaa me nyori áhị ka raa myị́ ka. Ma ụka kahị yẹ aanahị kị ja ri, ahị mọọ yẹ, ang oriri ọọwa tị háahị.

Ahị la iwe nyọka jẹ ka ọmwẹnụ-ụtụrụ nya ẹpwụma ọwẹ nyọka ju aanahị ọhụ bala ọ-kpa ang ịlẹ kị baba kịlaa ụka ká ebwo nya angịlẹ kị wụrụ guerrilla kaa gba mịla alepweji ịlụwa bala ọ-họ anyang bala anjwo ang. Ụmụmẹ nya aanahị ịlụwa á lang nwà ka. Kpọkpọọkpọ, ẹhị ọrịrịị-rịrị ọnyọngịrị ọlẹ kị la u-uhye nya owuleji bwula igu, ọháha ọlẹ kị la ẹ-ẹga nya iJihova, bala abwọlẹ kị kaa godayị giri-giri ha ogu nya iJihova guhi ọ-ọkịlẹtụ. Ọgụ-ẹpẹtẹ nyaa dahị ụbwọ nyọka wụla ang odudu kahị wẹẹ gbịgba ha iJihova yẹ bala ọ-ka ju ọmyịmyị nyahị ọngịrị ẹ-ẹga nyamwụ. Ẹpwa bala ang-ẹrụ nya angịhyẹ nyaa ta ayịreji. Ọọwa du kam yẹ jaabwọ ká ang-ụdụ ọlam kaa myị hi ọngịnyị bala abwọlẹ ká ụdụ nya olegu ju apyobwuna kaka ba. Nanana nyori aanahị ji ẹpwụ nya akama ọtụka, ị́ kaa mwala kpong-kpong ka. Abwẹla nyaa dahị ụbwọ nyọka ya ẹhị da akama bala ẹla nya ẹdụrụ nyahị la ugbodu ojuju.

Ẹla ọ-kpahị ju ka ọkịla tị wẹ myị́myị́ lẹ. Ị byihi nyị rụ ka egbeju ẹpwa ọla Hong Kong mẹ. Ọ́ wẹ ẹpwụ irya nyahị nyori ị ka kpahị ka Asia ẹnẹnẹhẹ lẹka! Ma nyọlẹ kahị yẹ ahị ọwawa nya iJihova ẹ-ẹpwụ  nya akụrwọ ịkịla ịlẹ kahị wẹẹ họ wuu, ahị myị nyọka ka ụwa. La 2013 lẹ, ahị da aanahị ịla Africa bala ụhị nya ụwa ọkpahị la egbejida ẹ-ẹhị, la ọ-jẹ́ ang ọlẹ kọ nụwa ị-ịlahị gbehi kaka lẹlẹ.

O ri ọyẹda ọtụka hahị chajị Hong Kong ri ẹga ọlẹ ká angịnyị ju iru kị tị bwu ẹpwụma ịdatị-datị ịnyịnyị. Òja nya Canton lujwo la ọjẹ́jẹ. Ma aanahị ịlụwa yehi myị, ang oriri nyaa háahị yẹẹyẹẹ ịnyịnyị. Ụkụrwọ ọla egbeju ẹpwa ọlụwa wẹẹ nwà ka ịlahị-ịlahị, ịnyịnyị ịnya nya ọpyị à tị wẹẹ rụ ka uhye la agaga lẹ. Lẹ, Angị Kpẹhị Rịrị Ogu chụ nyọka ya ọpyị ịhyẹ ịlẹ kị ri ịnya egbeju ẹpwa ra. Nyọlẹ kọ nọ pyịnyẹng ka ịlahị nya ọọwa la 2015, ahị mwụ ka South Korea. Ụ-ụwa ahị kịnyaa la ụkụrwọ nyahị lẹlẹ. Ahị la akama nyọka jẹ́ òja olujwo ọhẹ myị́myị́, ma ọ tị kpịpyọ nyori nanana nyọlẹ kahị wo òja ọọwa gbuu lẹka, aanahị kaa juhị ọhụ nyori ahị nyị wo òja nya Korea wuu lẹ.

Aligu inyeewe ọ-ka lala á chịkpẹẹ lụmẹ ụka wuu ka, ma ahị yẹ nyori bwula ọ-wụrụ angịkịla nyọka juhi ụga, ahị ka jẹ́-ẹ jẹ́ angịịwa i-ijata. Ahị yẹ nyori o-me awụlẹ me nya aanahị gụ́ ọdatị nyaa, bala o-ri iJihova họhị ụ-ụgbẹyị ọ-la ẹbyẹbyị ọlẹ kahị ka jẹ́-ẹ wụrụ ọkịlẹtụ da ha iru nya aanahị bala ọ-la ahyẹẹrwẹrwa ẹ-ẹga nyaa.—2 Kọr. 6:11.

Ahị yẹ ọbaba nyọka yẹ angịnyị jaabwọ ká iJihova kaa yaa bala ọ-ka yẹ ang-ẹjẹẹ nyori ahị há iJihova bala o-ri ọwa à wẹẹ kpahị ụgbẹyị lẹ. Ụka kahị ja ka da ịwẹẹ nyori ahị há aanahị ịkịla ka, ahị kaa myịmyị-ị̀ wa ileta ịlẹ ká aligu nyahị da wẹ ka juhi ọhụ. Ahị yẹ jaabwọ ká iJihova wẹ abwọ ọrịrị nyahị, họ kahị jẹ́ nyori ahị họ́ọ bala ọ-ya ọngịrị hahị nyọka họ ụkụrwọ nyamwụ kịnyaa.

Ẹ-ẹpwụ nya ẹka lụmẹ-lụmẹ, am bala Lesli ahụ nyam wẹ ka jẹ́ ọbaba nyọka ya ụka nyahị ha awụlẹ, jaabwọ myị́ abwọ ká ụkụrwọ nyahị á lụmẹ kaka ba. Ahị yẹ ọbaba nyọka hụlọ ẹhụ lawụlẹ ịnyịnyị, ọgụgụ ri ụka kahị ja maga nyọka jẹ́ òja onyeewe. Lobyi ọnyị myị́ ọnyị, ahị kaa kụ irya nya ang ọlẹ kahị ka jẹ́-ẹ ji iJihova obe ọhọhọ chajị nyamwụ.

Ẹlịlẹhị ri, ḿ kụ irya nyori m̀ ka jẹ́-ẹ rụ ka họ ụkụrwọ nya iJihova ẹ-ẹpwụma ọkịla lee ọ-dọmwụ mwụ ka ẹpwụma ịkịla ka. Ma m̀ wẹ ka yẹ la ịlọm jaabwọ ká ọngịnyị kaa yé ọkẹkẹnị ụka kọ jụ ang myị́ wuu họ bwula ụbwọ ọdada nya iJihova. M̀ kaa kpịtịya nya omyi ẹla nya ọlọmwụ iJeremaya ọlẹ kọ yẹkẹẹ: “[IJihova] ee, à pịrịm ju lẹ.” (Jer. 20:7) Ee, ọ ya ang ịkpịpyọ-kpịpyọ bala ahị ọwawa ịlẹ kahị ya ahị me ka hahị, tụ́ ụgbọ oluhye ọ-ka ju ka ẹpwụma ọkịla ọlẹ kọ kaa maam-ma. Ahị ju ụgbọ Oluhye ka ẹga lụmẹ-lụmẹ gụ ọlẹ kam dọmwụ kaa la ụlaa nyamwụ ụka kam ri onjwo, nyọlẹ kahị kaa wụla aanahị yẹ ka ọpyị nya ala onyoowuru bala ịnya ala onyobiri ịdatị-datị ịrụ. Ẹla nya Lesli ahụ nyam kaa myịm lẹhị nyọlẹ kọ myọnụ nyọka dam ụbwọ ẹ-ẹpwụ nya akụrwọ ịwẹ wuu.

Ahị kaa kịnyaa la ọ-kpụ awụlẹ ịtịya nya ọngọlẹ kahị wẹẹ họ ụkụrwọ ha bala ang odudu kahị wẹẹ họọ. Ahị ọwawa ịlẹ kahị la alẹ ri ọ-ma ọnụ ma nya ọhịhị o-gboyi myị́ oyi ọlẹ kahị ka la ụka ká iJihova ka “pyẹ ụbwọ nyamwụ maaa ya ang ha ang ịdịhụ wuu.”—Eje. 145:16.