1. Jaabwọ ká ụpwụ nya 1 iPita 5:2 ya, ụkụrwọ ọkpọnchị oyina angịgbahị nya ọjịra-jịra à tị́ kaa họ?

 ANGỊGBAHỊ nya ọjịra-jịra la ụkụrwọ nyọka kpẹhị rịrị ịkpịlọ nya iJihova. Ọ kaa myị aanahị ịla ọmyịmyị ịwẹ lẹhị nyọlẹ ká iJihova dahịhilaa nyọka kpẹhị rịrị aanaa alẹng bala anyang, ị tị kaa maga nyọka ri ‘angịgbikpịlọ ịlẹ kị kaa kpẹhị rịrị’ ịlẹhị. (Jer. 23:4; wa 1 iPita 5:2.) Ọ myịhị lẹhị yẹẹyẹẹ nyọlẹ kahị la angị ịlịịwẹ ọọjịra-jịra nyahị!

2. Ịmayẹ ịlányị angịgbahị nya ọjịra-jịra à tị́ ka la myị́?

² Angịgbahị nya ọjịra-jịra kaa la akama lụmẹ-lụmẹ ẹ-ẹpwụ nya ụkụrwọ nyaa ọlẹ kịị họ. Ẹlịlẹhị ri, ọjịra-jịra ọ-kpẹhị rịrị ju ụkụrwọ ẹ-ẹpwụ yẹẹyẹẹ. Tony bwu United States kọ ri ọngọgbahị nya ọjịra-jịra yẹ ọbaba nyọka jẹ́ ẹga ká ọngịrị nyamwụ ba u-uhye nya ụkụrwọ ọlẹ kọ kaa ye myị. Ọ wụlẹ yẹkẹẹ: “Ụka ká ẹdụrụ nya COVID-19 dọmwụ, m̀ kaa maga nyọka họ ụkụrwọ gụ́ ọọwa nyọka nwụla ọjịra-jịra bala ẹrụ ọnyịịla ọ-kpa pyẹ nọ. Ma jaabwọ myị́ abwọ kam họ kaka ba, ụkụrwọ á kaa myị́ ka. Ụkụrwọ lụmẹ ham gbee du kam kaa yé ụka nwà nyọka wa ịBayịbụụ, jẹ́ ang nya ịlọm, bala ọ-raabwọ kaka.” Ilir kọ ri ọngọgbahị nya ọjịra-jịra ọhẹ bwu Kosovo la akama ụma ọdatị. Ọ kaa lọọ ujwo la ọ-ka kpa ẹla ọlẹ ká ogu nya iJihova mẹjẹ họ ụkụrwọ ụka kọ juwa ẹ-ẹga ká ẹwụ ji. Ọ yẹkẹẹ: “M̀ la ọmayẹ ẹ-ẹga nya ugbodu ojuju ụka ká egbeju ẹpwa tịtọ nyọka ya ụkụrwọ jum ụ-ụbwọ nyọka da aanahị ịlẹ kị  juwa ẹ-ẹga oluhi-uhi ụbwọ. M̀ chị uko, ẹla ọlẹ ká ogu mẹjẹ tị lam lala ẹla ọ-ka họ ụkụrwọ ka ịnyịnyị.” Tim, kọ ri ọngọ ya ẹrụ ọnyịịla ẹ-ẹpwụma ọkịla o-oye nya Asia yẹ nyori ọ kaa lujwo họọ nyọka họ ang ịlẹ wuu kọ baba nyọka họ ahyẹẹnụ ọnyị myị́ ọnyị. Ọ yẹkẹẹ: “Ụka ọhẹ, ịnyịrọ kaa chịm pyẹpyẹ nyọka kpẹhị rịrị aanahị alẹng bala anyang.” Ịyẹ à tị́ ka jẹ́-ẹ da angịgbahị nya ọjịra-jịra ịlẹ kị la akama ịlịịwẹ ụbwọ?

3. Ányị ahị wuu à tị́ ka jẹ́-ẹ yé apyobwuna bwula ọ-kụ ẹhị yẹ oja nya iGidiyọn Ọngọleje?

³ Angịgbahị nya ọjịra-jịra ka jẹ́-ẹ jẹ́ ang bwu oja nya iGidiyọn Ọngọleje. (Hib. 6:12; 11:32) Ọ họ ụkụrwọ lala ọngọ kpẹhị rịrị bala ọngọgbikpịlọ nya Ohe. (Angị. 2:16; 1 Ego. 17:6) Lala iGidiyọn, Ohe chụ angịgbahị nya ọjịra-jịra nyọka kpẹhị rịrị angịnyị nyamwụ lụka olujwo. (Ụkụr. 20:28; 2 Tim. 3:1) Ahị ka jẹ́-ẹ jẹ́ ang u-uhye nya ịlọhị ọ-yẹ melabwọ, ịlọhị ọ-kpa keji, bala ihi ojuju bwu ẹga nya iGidiyọn. Ọ lujwo họọ nyọka bọhụ ụka kọ wẹẹ họ ụkụrwọ nyamwụ. Kori kahị ri angịgbahị nya ọjịra-jịra lee áhị riri ka, ahị ka jẹ́-ẹ jẹ́ apyobwuna nya ụkụrwọ nyaa. Ahị ka jẹ́-ẹ da aanahị ị-jụ ụkụrwọ họ ịwẹ ụbwọ jaabwọ kị wẹẹ kpẹhị rịrịịhị ẹ-ẹpwụ nya ọjịra-jịra.—Hib. 13:17.

4. Ányị iGidiyọn à tị́ mẹjẹ nyori ọ yẹ ịlọmwụ melabwọ bala ọ-kpịlọmwụ keji?

⁴ IGidiyọn ri ọngọ kaa yẹ ịlọmwụ melabwọ bala ọ-kaa kpịlọmwụ keji. b Ụka ká olegu-ẹrụ nya iJihova byi iGidiyọn nyori Ohe nyị chwọọ nyọka gba ala Isirẹlụ kpehe bwu ụbwọ nya ala iMidiyan ịlẹ kị la ịngịrị yẹẹyẹẹ, ọlẹng ọ-kpịlọmwụ keji ọwẹ wẹ yẹkẹẹ: “Ogang nyam a la dẹwụ-dẹwụ gụ wuu i-imwawụ nya ịManasẹ lẹ. Am a tị jula ọhẹ-lọhẹ kaka nya alugbiyegu nyam wuu lẹlẹ.” (Angị. 6:15) Ọ lọọ lala o-ri ọwa nyị́ nwà nyọka họ ụkụrwọ ọwẹ myị́ ka, ma iJihova tị jẹ́ nyị ka họọ myị́. Bwula ụbwọ ọdada nya iJihova, iGidiyọn jụ ụkụrwọ ọọwa họ cheju myị́.

5. Ịyẹ tị́ du kọ ka lujwo ha ọngọgbahị nya ọjịra-jịra nyọka yẹ ịlọmwụ melabwọ bala ọ-kpịlọmwụ keji myị́?

⁵ Angịgbahị nya ọjịra-jịra kaa maga yẹẹyẹẹ nyọka yẹ ịlaa melabwọ bala ọ-kpịlaa keji ẹ-ẹpwụ nya ang myị́ ang. (May. 6:8; Ụkụr. 20:18, 19) Ị́ kaa chị ọgọm chajị nya ang ọlẹ kị ka jụ́  họ myị́ bala ọlẹ kị dọmwụ họ ene lẹ ka. Ị́ tị kaa yẹ ịlaa lala angị ju apyobwuna ka ọọlajị nya ọdẹwụ-dẹwụ nyaa ka ịnyịnyị. Ọ tị lịnyị odu lẹ, ọngọgbahị nya ọjịra-jịra ka la ọmayẹ ụka ọhẹ myị́. Ọ-chụ pwokwita, ọ ka myọnụ nya akụrwọ lụmẹ-lụmẹ gbee kọ ka lujwo họọ nyọka jwaa họ wuu myị́. Lee ọhẹka ị kpọọ abyị u-uhye nya abwọlẹ kọ bwu họ ụkụrwọ ọhẹ lee ọ-mịla oja họọ chajị nya ang ọlẹ kọ jẹ́ họ yẹẹyẹẹ. Ẹlịyẹ angịgbahị nya ọjịra-jịra à tị́ ka jẹ́-ẹ jẹ́ bwu ẹga nya iGidiyọn kọ ka daa ụbwọ ẹ-ẹpwụ nya iwe-ahụrụ ịlịịwẹ?

6. Ẹlịyẹ angịgbahị nya ọjịra-jịra à tị́ ka jẹ́ u-uhye nya ịlaa ọ-yẹ melabwọ bwu ẹga nya iGidiyọn? (Yẹ ifoto ịnyịnyị.)

⁶ Tịtọ nya ụbwọ ọdada. Ọngịnyị ọlẹ kọ kaa yẹ ịlọmwụ melabwọ kaa jẹ́ nyori ang ịhyẹ nyị ji kọ ka jẹ́-ẹ họ ka. IGidiyọn mẹjẹ nyori ọ kaa yẹ ịlọmwụ melabwọ chajị ọ kaa tịtọ nya ụbwọ odada ka ẹga nya angịkịla. (Angị. 6:27, 35; 7:24) Angịgbahị nya ọjịra-jịra ịlẹ kị jé ẹla kaa họ ịnyị ịnyịnyị. Tony, ọngọlẹ kahị ya ẹla nyamwụ kẹkpẹ lalẹ yẹkẹẹ: “Ụgbẹyị ọlẹ kị kpam nwà dudu kam kaa ye ụkụrwọ ju ụbwọ kpoye nya ọlẹ kam ka jụ họ myị́. Lẹ m̀ chụ nyọka ya ẹla u-uhye nya ịlọhị ọ-yẹ melabwọ ụka nya ang ọjẹ́jẹ nya ugbeyigu nyahị, m̀ tị ya iwe da ha ahụ nyam nyọka ya irya nyamwụ u-uhye nya ẹlẹwẹ. M̀ myịmyị yẹ ifim ọlẹ kọ ri Train, Trust, and Empower Others, as Jesus Does ịị jw.org.” Tony dọmwụ nyọka wụrụ angịkịla kị ka dọọ ụbwọ la ụkụrwọ nyamwụ. Ịyẹ à tị́ ri ocheju nya ọọwa? Tony yẹkẹẹ: “Ụkụrwọ ọla ọjịra-jịra á deeji ka, m̀ tị kaa yé ụka nyọka ju igu oriri nyam bala iJihova ọngịrị ịnyịnyị.”

7. Ányị angịgbahị nya ọjịra-jịra à tị́ ka bwu gbịla iGidiyọn ụka kị kpaa abyị? (IJemsi 3:13)

⁷ Ụka ká ọngịnyị á kpụng abyị, a wụ ẹjẹ ka. Ang ọkịla ọlẹ kọ kaa kpa ọmayẹ wẹ ẹga nya angịgbahị nya ọjịra-jịra ri ụka kị kpaa abyị. Oja nya iGidiyọn tị ka jẹ́-ẹ dụbwọ ịnyịnyị. Ọ jẹ́ nyori ọwa nyị́ la kpẹẹkpẹẹ ka, lẹ ọ wẹ ẹla kpẹnẹẹ ụka ká ala Ifurem kpọọ abyị. (Angị. 8:1-3) IGidiyọn á wẹ ẹla la agbama ka. Ọ yẹ ịlọmwụ melabwọ bwula o-ke ụrụ wo ẹla ọlẹ kọ ri akama nyaa, ọọwa tị du ká agbama nyaa kpụba. Angịgbahị nya ọjịra-jịra ịlẹ kị jẹ́ ẹla kaa gbịla iGidiyọn bwula ọ-ke ụrụ kpẹnẹẹ bala ọ-wẹ ẹla dụmwọ ụka kị kpaa abyị. (Wa iJemsi 3:13.) Ị kaa họ ká okpunyi ka ji ẹ-ẹpwụ nya ọjịra-jịra bwula ọọwa.

8. Ányị angịgbahị nya ọjịra-jịra à tị́ ka họ ụka kị mịla oja haa? Ọ-chụ pwokwita oyina à tị́ ji?

⁸ Ya ogbo wuu ha iJihova. Ụka ká angịnyị mịla oja ha iGidiyọn chajị nyọlẹ kọ kụrụ epweji nya iMidiyan, ọ ya ogbo ọọwa wuu ha iJihova. (Angị. 8:22, 23) Ányị angịgbahị nya ọjịra-jịra à tị́ ka bwu gbịla iGidiyọn? Ị ka jẹ́-ẹ ya ogbo nya ang ọlẹ kị jụ họ myị́ ha iJihova. (1 Kọr. 4:6, 7) Ọ-chụ pwokwita, kori ká aanahị á mịla oja ha ọngọgbahị nya ọjịra-jịra ọhẹ chajị nya ang ọ-jẹ́ mẹjẹ nyamwụ, ọ ka jẹ́-ẹ kpaa irya ka ẹga ọlẹ ká ang ọmẹjẹ ọọwa bwu kọ ri Omyi Ẹla nya Ohe, lee ang ọmẹjẹ ọlẹ ká ogu nya iJihova wẹẹ mẹjẹ́ẹhị. Angịgbahị nya ọjịra-jịra ka tọ ịlaa wo myị́ kori kị kaa kpa angịkịla irya wẹ ẹga nya ịlaa lụmẹ. Ahị wo oja nya ọngọgbahị nya ọjịra-jịra ọhẹ ká ẹnyị nyamwụ ri Timothy lẹẹ wẹẹ. Ụka kọ ri ọngọgbahị nya ọjịra-jịra bwaa, ọ kaa kpọọ ịpyọ nyọka họ ụpa nya ẹla ọ-ya dodehe bwu ịBayịbụụ ha alụma. Ọ yẹkẹẹ: “M kaa dọmwụ nya ẹla oyaya nyam la ẹla ị-chụ pwokwita i-gbururu ịlẹ kị baba lụmẹ ka. Ọọwa du ká angịnyị kaa dam ọlẹẹkwa. Ma, ọ tị du ká angịnyị kaa kpa irya wẹ ẹga nyam ọkọkọ nya ẹga nya ịBayịbụụ lee iJihova ịnyịnyị.” Nyọlẹ kọ nọ chẹẹ, Timothy yẹ nyori ọwa nyị baba nyọka nwụ ang ọmẹjẹ nyọwa họ chajị kọ ka ba la ọ-kpa angịnyị irya wẹ ẹga nyịlọmwụ. (Etu 27:21) Ịyẹ à tị́ ri ocheju nyọọwa? Ọ yẹkẹẹ: “Ọlẹẹlẹẹ aanahị alẹng bala anyang kaa byim nyori ẹla oyaya nyam nyị kaa da ịwa ụbwọ nyọka bọhụ ẹ-ẹpwụ nya akama, bala ọ-ka tụ ju iJihova chwẹẹ. Ẹla  ọọwa ọlẹ ká aanahị ya kaa kpụm ugbodu nyii gụ ụka ọlẹ kị kaa ya ogbo ham.”

9. Ịyẹ tị́ du kọ ka lujwo ha iGidiyọn nyọka ju ihi nya iJihova bala ọ-ka ju ugbodu myị́? (Yẹ ifoto ọla ẹbẹ nya ọgbanyẹ.)

⁹ Ụka ká Ohe ya ụkụrwọ ha iGidiyọn nyọka kpa ala Isirẹlụ ụgbẹyị, ọ baba nyọka ju ihi bala ọ-ka la ugbodu ojuju. Ohe ya ụkụrwọ olujwo họọ nyọka ta ogidi ọlẹ ká adamwụ kaa kpa gbịgba ha ịBaalụ ayịreji. (Angị. 6:25, 26) Ụka kọ nọ chẹẹ ká iGidiyọn tụ́ angịdẹwụ nyamwụ guru, iJihova byoo ụka imimiiye nyori nyị chụ angịdẹwụ nyamwụ hi. (Angị. 7:2-7) Ụka ohyẹẹkpẹ lẹ, iJihova à byoo nyị gba mịla aluji nyamwụ lodu arịrị mẹ lẹlẹ.—Angị. 7:9-11.

10. Ịyẹ tị́ du kọ ka lujwo ha ọngọgbahị nya ọjịra-jịra nyọka ju ihi myị́?

¹⁰ Angịgbahị nya ọjịra-jịra baba nyọka ‘me irya ju angịkịla’ lee ọ-nwụlanọ nyọka ju ihi. (Jem. 3:17) Ọngọgbahị nya ọjịra-jịra ọlẹ kọ kaa ju ihi, kaa kpa ẹla ọlẹ ká ịBayịbụụ ya bala ela ọlẹ ká ogu nya iJihova mẹjẹ họ ụkụrwọ. Ọ kaa ya ọgụ-ẹpẹtẹ ọnyịịla deeji ha angịkịla, ma ọ tị ka lujwo họọ nyọka ju ihi ụka ọhẹ myị́. Ọ-chụ pwokwita, ọhẹka ẹla ọlẹ ká ogu nya iJihova ka mẹjáa ka lụmẹ, lee ị ka yẹda hyaa-hyaa du kọ ka lọọ ujwo la ọ-kpa họ ụkụrwọ myị́. Ụka ọhẹ, ọ dọmwụ ka lọọ ujwo myị́ nyọka yẹ kori ká ẹla ọlẹ kị mẹjẹ á la kpakpa lee ọ-há nyọka ba jẹ. Lee ị ka ya ụkụrwọ ọlẹ kọ ka du kị́ ka woo ju agba họọ myị. Ányị angịgbahị nya ọjịra-jịra à tị́ ka jẹ́-ẹ gbịla iGidiyọn ẹ-ẹpwụ nya iwe-ahụrụ ịlịịwẹ?

11. Ịyẹ à tị́ ka da angịgbahị nya ọjịra-jịra ụbwọ nyọka ju ihi?

¹¹ Ke ụrụ kpẹnẹẹ wo la ẹla ọmẹjẹ ká kpa họ ụkụrwọ. Ohe ya ju iGidiyọn jaabwọ kọ ka bwu ta ogidi nya adamwụ ayịreji, ẹga ọlẹ kọ ka me ogidi nya iJihova, bala iyo ọlẹ kọ ka ya kiliya. IGidiyọn á da ịwẹẹ ju ẹla ọlẹ kị byoo nyị họ ka, ọ họ jaabwọ ká iJihova byoo nyị họ kpangga. Alẹ ịnyịnyị, ogu nya iJihova ka mẹ ẹla jẹ angịgbahị nya ọjịra-jịra bwula ileta ọdada, ẹla i-ya dodehe, bala ẹla ịmẹjẹ ịkịla ịlẹ kị ka da aanahị ụbwọ yé ewu ọ-chị ke bala ọ-tụ́ ju iJihova chwẹẹ. Angịgbahị nya ọjịra-jịra háahị chajị ị kaa ba ẹla ọmẹjẹ nya iJihova jẹ. Ọjịra-jịra lẹpwụ-lẹpwụ kaa yé apyobwuna.—Eje. 119:112.

12. Ányị angịgbahị nya ọjịra-jịra à tị́ ka jẹ́-ẹ kpa ẹla ọlụpwụ nya Ala iHiburu 13:17 họ ụkụrwọ kori ká ogu nya iJihova á yẹ ụgbẹyi ọlẹ kị kaa bwu họ ang da?

¹² Nwụlanọ nyọka nwụhọ. Kpịtịya nyori iJihova a byi iGidiyọn nyị chụ alẹwụ nyamwụ hi kaka hi angị ịmanyị-manyị. (Angị. 7:8) Ọ ka tọ ịlọmwụ wo myị́ nyori: ‘Ọnwụhọ ọwẹ baba ịlẹhị? Ọ ka họ ụkụrwọ myị́?’ Jaabwọ myị́ abwọ kọ tị la, iGidiyọn ju ihi nya ẹla ọọwa. Alẹ ịnyịnyị angịgbahị nya ọjịra-jịra ka gbịla iGidiyọn bwula ọ-ba ẹla ọlẹ ká ogu nya iJihova nwụhọ jẹ. (Wa Ala iHiburu 13:17.) Ọ-chụ pwokwita, la ẹka nya 2014 angị kpẹhị rịrị ogu nwụ ang họ u-uhyẹ nya ụgbẹyị ọlẹ kị ka yé okpoko kpa nwụ Ebe nya Ịpyị-Adịrahụ bala Ebe nya Ọjịra-jịra Ịtụka. (2 Kọr. 8:12-14) Lụka  ọkẹkpẹ ogu nya iJihova kaa ya okpoko kpịla alọjịra-jịra nyọka nwụ́ ube, ọọwa lẹ alọjịra-jịra ọọwa à kaa nwụ uri nya okpoko ọọwa tịrẹkpẹ lẹlẹ. Ma lẹẹlẹẹ, okpoko ọlẹ ká alọjịra-jịra chị odehe ọnụ wuu á gba kpehe, ị kaa kpa nwụ Ebe nya Ipyị-Adịrahụ bala Ebe nya Ọjịra-jịra Ịtụka ha aanahị lẹ, kori ká aanahị ịlụwa á gba ụbwọ kpehe gbuu ka wẹwẹ. Ụka ká José wo ẹla nya ọyẹda ọwẹ, ọ da ịwẹẹ nyori nyị́ ka jẹ́-ẹ họ ụkụrwọ ka. Ọ kụ irya yẹkẹẹ: ‘Ịwa nyị́ dọmwụ ja jụ Ube nya Ịpyị-Adịrahụ ookpokpo nwụ myị́ ka. Ịịwẹ ị kaa bwu họ ang ẹ-ẹga nyahị ahị ka.’ Ịyẹ à tị́ da José ụbwọ nyọka chẹkpẹ ju ẹla ọmẹjẹ ọwẹ? Ọ yẹkẹẹ: “Ẹla ọlụpwụ nya Etu 3:5, 6 kpụm ịtịya nyọka dahịhile iJihova. Ocheju nyamwụ tị kpịpyọ yẹẹyẹẹ! Ahị jẹ́ nwụ Ebe nya Ịpyị-Adịrahụ gụ olene, ahị tị jẹ́ ọbaba nyọka hu ha a-agbẹyị ịdatị-datị chajị ká ang ọla memeeme ka ji ẹga myị́ ẹga.”

13. (a) Ẹlịyẹ iGidiyọn à tị́ jẹ́ myị̀myị̀? (b) Ányị angịgbahị nya ọjịra-jịra à tị́ ka jẹ́-ẹ gbịla iGidiyọn? (Yẹ ifoto ịnyịnyị.)

¹³ Họ irya nya iJihova la ugbodu ojuju. IGidiyọn ju ihi nya iJihova nanana nyori ọ chuko bala o-ri ụkụrwọ ọọwa la uhihi. (Angị. 9:17) Ụka ká iJihova ya ahị ọdahile họọ kpá, iGidiyọn jẹ́ myị̀myị̀ nyori iJihova nyị ka da ọwa ụbwọ chewu ke angịnyị nyamwụ. Angịgbahị nya ọjịra-jịra ịlẹ kị ji ẹga ọlẹ kị ta ụkụrwọ nyahị ku ka gbịla iGidiyọn. Ị ka kpịlahị la ugbodu ojuju ẹ-ẹpwụ nya ọjịra-jịra bala ẹrụ ọnyịịla ọ-kpa pyẹ, nanana nyori ị ka waa ju agba, laa eje, ụkụrwọ ka gwaa myị́ lee ị ka haa ọkwọ myị́. c Lụka nya akama ọtụka okpelego, angịgbahị nya ọjịra-jịra ka baba nya ugbodu ojuju nyọka ju ihi nya ẹla ọlẹ kị ka mẹjáa nanana nyori ọ ka lujwo la ọ-ba jẹ myị́. Ẹla ọmẹjẹ ọọwa ka gu ẹla nya eje ọlala nya Ohe ọlẹ kahị ka ya ụka ọọwa, bala abwọlẹ kahị ka bwu chị da ụka ká ịGọọgụ ọla ịMagọọgụ ka gba mịlahị myị́.—Isi. 38:18; Ọwụ. 16:21.

14. Ịyẹ tị́ du kọ ka lujwo ha iGidiyọn nyọka bọhụ myị́?

¹⁴ IGidiyọn baba nyọka họ ụkụrwọ nyịlẹhị-ịlẹhị lala ọngọ la eje. Ụka ká ala iMidiyan wẹẹ rụnyẹ rụ bwu ẹwụ ọlẹ kị da lodu, iGidiyọn kwaa bwu ọkpọọ nya iJesiryẹlụ lalaa-la ka pwụ  Ihu ịJọdan, kọ ri ẹga ká ekeji bala amẹ ka ji yẹẹyẹẹ myị́. (Angị. 7:22) IGidiyọn chị godayị ị-ịJọdan? Ehe! Nanana nyori ụnyẹ jwáa, ọwa bala alẹwụ nyamwụ angị 300 kpoye ka oye ọkịla juwa kwaa kịnyaa. Ụka ohyẹẹkpẹ ị wu ala iMidiyan ọyị kpụ ị kụrwaa.—Angị. 8:4-12.

15. Ụka oyina ọ tị́ ka lujwo ha ọngọgbahị nya ọjịra-jịra nyọka bọhụ myị́?

¹⁵ Ụkụrwọ ọlọjịra-jịra bala ẹhị ọ-kpa rịrị ugbiyegu ka du ká ịnyịrọ ka chị ọngọgbahị nya ọjịra-jịra pyẹpyẹ nyịlẹhị-ịlẹhị myị́. Ányị angịgbahị nya ọjịra-jịra a tị́ ka jẹ́-ẹ gbịla iGidiyọn ẹ-ẹpwụ nya iwe-ahụrụ ịlịịwẹ?

16-17. Ịyẹ à tị́ da iGidiyọn ụbwọ nyọka bọhụ? Ẹlịyẹ angịgbahị nya ọjịra-jịra à tị́ ka jẹ́ myị̀myị̀ bwu ọọwa? (Ayịsaya 40:28-31) (Yẹ ifoto ịnyịnyị.)

¹⁶ Dahịhile nyori iJihova ka jung ọngịrị. IGidiyọn dahịhile nyori iJihova ka ya ọngịrị họọ, iJihova tị họ ịnyị ịlẹhị. (Angị. 6:14, 34) Ụka ọhẹ juwa ká iGidiyọn bala angịnyị nyamwụ wẹẹ ku ịdịrịhụ nya ala iMidiyan imiiye la ẹpẹtẹ, ma ọ tị lala o-ri ịdịrịhụ ịịwa nyị kpa anyịrẹ. (Angị. 8:12, 21) Ma Ohe da ala Isirẹlụ ụbwọ kpụ ị waa ọyị bala ọ-kụrwaa myị́. Angịgbahị nya ọjịra-jịra ịnyịnyị ka jẹ́-ẹ kpụnịrọ iJihova chajị ọ ri ọngọlẹ ká “ịnyịrọ-ọ́ọ̀ chọọ pyẹpyẹ ka, ọọ kpụ ịbwọ ka.” Ọ ka ya ọngịrị haa ụka kị baba nyamwụ.—Wa Ayịsaya 40:28-31.

¹⁷ Kụ ẹhị yẹ oja nya Matthew ọlẹ kọ ri ọngọhẹ ẹ-ẹpwụ nya ịKọmitii nya Angị Me Obyi Bala Angị Họ Utoji lẹẹ wẹẹ. Ịyẹ à tị́ dọọ ụbwọ nyọka bọhụ? Matthew yẹkẹẹ: “M̀ yẹ nyori iJihova kaa ya ọngịrị ha ọngịnyị ịlẹhị jaabwọ ká ụpwụ nya Ala iFilipayị 4:13 ya. Ụka lụmẹ-lụmẹ kori ká ịnyịrọ a jụ́m kọ lam lala o-ri am nyị́ ka kịnyaa myị́ kaka, m̀ kaa raabwọ nya ịlẹhị-lẹhị bịlẹ Ohe nyọka ya ọngịrị ọlẹ kam baba nyọka da aanahị ụbwọ ham. Ụka ọlịnyị m̀ kaa yẹ nyori olegu nya iJihova ya ọngịrị ham, dam ụbwọ nyọka bọhụ.” Lala iGidiyọn, angịgbahị nya ọjịra-jịra kaa họ ụkụrwọ yẹẹyẹẹ nyọka kpẹhị rịrị anchẹ nya iJihova, nanana nyori ọ́ kaa chịkpẹẹ lụmẹ ụka wuu ka. Ẹlịlẹhị tị ri, ị ka jẹ́ ẹga ọlẹ ká ọngịrị nyaa ba, bala o-ri ị́ ka jẹ́-ẹ họ ang myị́ ang ọlẹ kị la i-irya nyọka họ wuu ka. Ma, ị ka jẹ́-ẹ dahịhile iJihova nyori ọ ka jwaa ọngịrị nyọka bọhụ ụka kị raabwọ bịlọọ.—Eje. 116:1; Filip. 2:13.

18. Jaabwọ ká ang ọjẹ́jẹ ọlẹ mẹjẹ́ẹhị wẹ, ányị angịgbahị nya ọjịra-jịra à tị́ ka bwu gbịla iGidiyọn?

¹⁸ Ang lụmẹ-lụmẹ ji ká angịgbahị nya ọjịra-jịra ka jẹ́-ẹ jẹ́ bwu ẹga nya iGidiyọn, angịgbahị nya ọjịra-jịra baba nyọka yẹ ịlaa melabwọ bala ọ-kpịlaa keji ẹ-ẹga nya akụrwọ ịlẹ kị kaa ye myị bala abwọlẹ kị kaa họ ụka kị kpaa abyị lee ọ-mịla oja haa. Ị baba nyọka ju ihi bala ọ-la ugbodu ojuju, ọgụgụ nyọlẹ ká ocheju nya odehe ọlẹ wẹẹ ju chwẹẹ. Ị tị baba kị ka dahịhile ịnyịnyị nyori Ohe ka jwaa ọngịrị ẹ-ẹpwụ nya akama ọnyị myị́ ọnyị kị ka la myị́. Ẹla nya angịgbahị ịlẹ kị kaa jụ ụkụrwọ họ wẹ myịhị lẹhị yẹẹyẹẹ, ahị tị ka kịnyaa la o-jwaa “ihi yẹẹyẹẹ kịlahị-ịlahị.”—Filip. 2:29.