1-2. Akama oyina ahị tị́ la alẹ kọ lala iwe-ahụrụ nya ịLọtụ?

 ỤKA kahị yẹ abwẹla ọchịrị ọlẹ ká angịnyị kaa la alẹ, ọ kaa lahị jaabwọ kọ la ịLọtụ. ‘Ọhịhị nya uhila nya ang onyobyi ọhọhọ nya angị tịpyọ chọọ ẹpwụ lụmẹ,’ chajị ọ jẹ́ nyori abwẹla ịlịịwẹ nyị wụ Adahị olepwoohe ẹjẹ. (2 Pit. 2:7, 8) Uhi ojuju nya Ohe Oluhye bala ọháha ọlẹ kọ la ẹ-ẹga nyamwụ gu ịLọtụ gbịla nyọka pwa abwẹla nya ụya ọhọhọ ọlẹ ká angị dagaga jwoo la. Angịlẹ kị myị-ị̀ ju ihi nya ehile nya iJihova u-uhye nya abwẹla ocheri-cheri ka kụ dagaga juhi alẹ ịnyịnyị. Ọ tị lịnyị odu lẹ, ahị ka jẹ́-ẹ la abwẹla ocheri-cheri kịnyaa kori kahị la ọháha ẹ-ẹga nya Ohe Oluhye bala o-jwoo ihi kpori-kpori.—Etu 14:2.

² IJihova dahị ụbwọ nyọka jẹ́-ẹ họ ịnyị bwula ọhụ ojuju ọlẹ kọ ya hahị ẹ-ẹpwụ nya ụpwụ nya Etu. Angịnyị nya ịKịrayịsị wuu, alẹng bala anyang, tụ́ anjwo bala angịgbahị ka jẹ́-ẹ yé apyobwuna yẹẹyẹẹ bwula ọ-kụ ẹhị yẹ ẹla ọmẹjẹ ịnyịịla ịlụwa.

3. Jaabwọ ká ụpwụ nya Etu 17:3 ya, ịyẹ à tị́ ri ang odudu kahị ka chewu ke ọkịlẹtụ nyahị? (Yẹ ifoto ịnyịnyị.)

³ Ẹla ọkpọnchị ọhẹ ọlẹ kọ du kahị ka chewu ke ọkịlẹtụ nyahị ri, iJihova kaa wụlọọ yẹ. Ọọwa ri, ọ kaa yọyị kpoye nya abwọlẹ kahị la odehe ẹ-ẹhị nya angịkịla. Ọ jẹ́-ẹ yẹ ọngọlẹ kahị ri kpangga ẹ-ẹpwụ. (Wa Etu 17:3.) Ahị ka họ́ọ kori kahị kịnyaa la ọ-kụ irya u-uhye nya ẹla nyamwụ ọlẹ kọ kaa dahị ụbwọ nyọka jẹ́-ẹ hịhị pyịyọọ. (Jọn. 4:14) Ọọwa du ká abwẹla ịtịpyọ bala ịnịịkịla nya Olegu Onyobyi bala odehe nyamwụ ka chị wuhi ka. (1 Jọn. 5:18, 19) Jaabwọ kahị wẹẹ tụ ju iJihova chwẹẹ gụ́ ọọwa, ọháha ọlẹ kahị la ẹ-ẹga nyamwụ bala ihi ọlẹ kahị kaa jwoo kaa nwà kịlahị. Chajị nyọlẹ kahị tịtọ nyọka họ ẹla wụ Adahị ẹjẹ ka wẹẹ, irya nyọka họ ọhọbịrị dọmwụ kaa wụụhị ẹjẹ. Ụka kahị la ọmayẹ nyọka họ ang ọtịpyọ, ahị ka tọ ịlọhị wo yẹkẹẹ:  ‘Ịyẹ tị́ du kam ka tọchị-tọchị họ ẹla ọlẹ kọ ka wụ ọngọlẹ kọ la ọháha ẹ-ẹga nyam nyịlẹhị-ịlẹhị ẹjẹ?’—1 Jọn. 4:9, 10.

4. Ányị uhi ojuju nya iJihova à tị́ da ọọnahị ọnyang ọhẹ ụbwọ nyọka cheji ba hi ang ọtịpyọ ọhọhọ?

⁴ Ọọnahị Marta bwu Croatia kọ la ọmayẹ nyọka họ ụya, da ụpwụ yẹkẹẹ: “O lujwo ham nyọka kụ irya ụ-ụgbẹyị ọ-la kpakpa bala ọ-ka ma uya ta irya nyọka họ ang ọtịpyọ. Ma uhi ojuju nya iJihova chewu kem.” b Ányị uhi ojuju nya Ohe à tị́ kaa bwu họ ịnyị? Marta ya nyori ọwa nyị kụ irya u-uhye nya ang ọtịpyọ ọlẹ kọ ka họ myị́ kori kọ ju ka ẹpwụ nya ụya. Ahị ka jẹ́-ẹ họ ịnyị ịnyịnyị. Ang ọtịpyọ gụ́ wuu ọlẹ kọ ka họ tahị myị́ ri iJihova ka wụ ẹjẹ tahị, áhị tị́ ka jẹ́-ẹ gbịgba họọ gboyi myị́ oyi kaka ịnyịnyị.—Ọmwụ. 6:5, 6.

5. Ẹlịyẹ ahị tị́ ka jẹ́ bwu oja nya Leo?

⁵ Kori kahị kaa ju uhi nya iJihova, ahị kaa dụmwọ-dụmwọ ẹ-ẹga nya igu oriri bala angị kaa họ ang ọtịpyọ. Leo, kọ kụ Congo wẹ ka jẹ́ ẹlẹwẹ. Ẹka ine ẹ-ẹkpẹ nyọlẹ kọ hu enyi Ohe kpá, ọ dọmwụ nyọka ji ogu bala angị kaa họ ang ịtịpyọ. Ọ kaa kụ irya nyori kori ká ọwa la ịlọọwa nyị́ họ ang ọtịpyọ ọhẹ ka aalẹ, ọwa nyị́ họ ọhọbịrị ba iJihova ka. Ma lụka o-kpii, aligu nyamwụ ịtịpyọ ịịwa dọmwụ nyọka tọ́ọ ụbwọ ju ka ẹpwụ nya ere ọ-nwà kpoye bala ụya ọhọhọ. Ọọwa lẹ, ọ dọmwụ nyọka kụ irya u-uhye nya ẹla ọlẹ ká adamwụ bala ịnamwụ ịlẹ kị ri angịnyị nya ịKịrayịsị mẹjọ́ọ, bala ọkẹkẹnị ọlẹ kọ kaa yé ụka kọọ gbịgba ha iJihova lẹlẹ. Ịyẹ à tị́ ri ocheju nyamwụ mẹ? Ọ dọmwụ nyọka kụ irya ọkpakpa myịmyị. Bwula ụbwọ ọdada nya angịgbahị nya ọjịra-jịra, ọ tịrẹkpẹ wẹ ẹga nya iJihova myị́. Lẹẹlẹẹ, o ri ọngọgbahị nya ọjịra-jịra bala ọngọ kaa kpa ụka nyamwụ wuu ya ẹla nya Ohe lẹ.

6. Oja nya anyang imiiye iyina ahị tị́ wẹẹ ka kụ ẹhị yẹ ugbẹnyị?

⁶ Ahị kụ ẹhị yẹ ụpwụ nya Etu egbeju 9, ọlẹ  kọ ya ẹla rụ anyang imiiye ịhyẹ wẹẹ. Ọngọhẹ lẹpwụ nyaa ku ọmwakpa nya ẹla ọjẹ́jẹ, ọngọkịla ku ọmwakpa nya uchi. (Kụ ẹhị yẹ Ala iRom 5:14; Ala ịGaletiya 4:24.) Jaabwọ kahị wẹẹ ka họ ịnyị, ahị ka kpịtịya nyori odehe nya Olegu Onyobyi ọlẹ myị̀ la ẹla nya ụya bala arụrụ nya angị ji lọhị-lọhị ọyẹyẹ. (Efe. 4:19) Lẹ, ahị baba nyọka kịnyaa la uhi nya Ohe Oluhye ojuju bala ọ-ka ji ẹkpẹ da ang ọtịpyọ. (Etu 16:6) Ahị wuu, alẹng tụ́ anyang ka jẹ́-ẹ yé apyobwuna bwu ẹpwụ nya ẹla ọlẹ ká ụpwụ nya Etu ọwẹ ya. ỊBayịbụụ ya nyori anyang imimiiye ịwẹ nyị wụrụ “angị jẹ ẹla gbuu ka” ẹpwa. Ọ lala o-ri ọngọngọọng nyaa nyị wẹẹ yẹkẹẹ: ‘Anụ kẹwẹ wẹ ẹpwa kanụ ri ang mẹ.’ (Etu 9:1, 5, 6, 13, 16, 17) Ma, ang ọlẹ kọ họ ta angịlẹ kị ye ọwụrụ-wụrụ nya ọngọngọọng nyaa myị datị hi awụlẹ yẹẹyẹẹ.

7. Jaabwọ ká Etu 9:13-18 ya, ịyẹ à tị́ họ ta angịlẹ kị ye ọwụrụ-wụrụ nya ọnyang oluchi myị? (Yẹ ifoto ịnyịnyị.)

⁷ Kụ ẹhị yẹ ọwụrụ-wụrụ nya “ọnyang oluchi” wẹẹ. (Wa Etu 9:13-18.) Ọ wụrụ angị jẹ́ ẹla gbu ka wẹ ẹpwa nyamwụ nyọka ri ang balọọ la ọ-jẹ́ oyoyi ka. Ịyẹ à tị́ họ ta angịịwa mẹ? “Angị ka ẹpwa nya ọnyang ọwẹ kaa gbu tà ụwa.” Ọhẹka à ka kpịtịya nya ẹla ị-chụ pwokwita ụma ịlịịwẹ ịlẹ kị juwa ụ-ụpwụ nya Etu ene nya ẹgẹwẹ. ỊBayịbụụ dahị ọna u-uhye nya “ọnyang oluchi” bala ọnyang ọlẹ kọ kaa ‘pyịrị ọngịnyị ju lịnụ ịpyaka-pyaka.’ ỊBayịbụụ ya nyori kori ká “ba ọnyang ọlịnyị ka ẹpwa aalẹ, igu ā wẹẹ rụnyẹ ba lẹ.” (Etu 2:11-19) Ụpwụ nya Etu 5:3-10 da ọna-eji u-uhye nya “ọnyang oluchi” ọlẹ kọ ‘kaa kpa ọngịnyị kaka gbu.’

8. Eje nya ẹlịyẹ ahị tị́ la ka chị?

⁸ Angịlẹ kị wẹẹ wu ẹla oyaya nya “ọnyang oluchi” ọwẹ la eje kị ka chị: Ị ka ye ọwụrụ-wụrụ nyamwụ myị lee ị tị́ ka pwa? Ahị ịnyịnyị ka la eje ọchịchị ụma ọlịnyị myị́. Ẹlịyẹ ahị tị́ ka họ kori ká ọngọhẹ á maga nyọka tụ́ụhị tutu ju ka ẹpwụ nya ụya ọhọhọ, lee kori kahị gbachị arụrụ nya ụya la ọ-kpahị ju ka?

9-10. Ẹlịyẹ à tị́ du kahị ka cheji ba hi abwẹla nya ụya ọhọhọ?

⁹ Ang lụmẹ-lụmẹ du kahị ka cheji ba hi abwẹla nya ụya ọhọhọ. ỊBayịbụụ chabwọ nya “ọnyang oluchi” ọlẹ kọ juwa yẹkẹẹ: “Enyi ọlẹ kị chị yoyi chakpa la ịpyọ.” Ịyẹ à tị́ ri “enyi ọlẹ kị chị yoyi”? ỊBayịbụụ chụ ẹga nya awụlẹ ọkaka nya ahụ bala ọrụ kaka pwoku enyi ọlẹ kọ kaa kpụ ọngịnyị ịnyịrọ nyii. (Etu 5:15-18) Ahụ bala ọrụ ịlẹ kị ye awụlẹ ọlam-ọlam pwoku ehile, la iwe nyọka ka ẹga nya awụlẹ. Ma “enyi ọlẹ kị chị yoyi” á tị lịnyị ka. Ọọwa ri ẹga nya awụlẹ ọkaka ọlẹ kọ pwoku ka. Angịlẹ kị kaa họ ụya kaa họọ kpịbaa-kpịbaa jaabwọ ká oloyi kaa hu ang yoyi. “Enyi ọlẹ kị chị yoyi”  ka lala o-ri nyị lịpyọ myị́ kori ká angịlẹ kị wẹẹ họ ẹla ọọwa á me nyori ọngọhẹ nyị́ jẹ́ jwaa ka. Ọngịnyị ọ-da ịlọmwụ lụgbaa ọtụka-ọtụka o ri lẹ! IJihova kaa yẹ ang myị́ ang wuu. Ịngịngịhyẹ-ẹ́ tị ji kọ la ujujwo gụ́ iJihova ọ-ka nyẹẹkpẹ da ọngịnyị kaka. Lẹ, ịngịhyẹ á ji kọ “la ịpyọ” u-uhye nya ọọwa ka. (1 Kọr. 6:9, 10) Ọ́ tị ba ọ-ọwẹ kem ka.

¹⁰ Ụya ọhọhọ kaa ju ọmwụ nya oyoyi, ọngịnyị o-ju apyobwuna ka, ẹnyị ọ-kpa e-eji, bala ugbiyegu ọ-chebwo. Ọ la gede-gede nyori, ọ ka ri ẹla ọjẹ́jẹ ká ọngịnyị ka cheji ba hi “ẹpwa” nya ọnyang oluchi bala ang oriri nyamwụ ịlẹhị. Datị hi igu oriri nyaa bala iJihova ọ-ka bịrịị-bịrị, iru nya angịlẹ kịị họ ụya kaa yé ẹdụrụ ọlẹ kọ ka ju ọmwụ igu nyaa myị́. (Etu 7:23, 26) Egbeju 9 ọgba 18 chị ẹlẹwẹ eju yẹkẹẹ: “Angị jwọọ ụga wuu juwa e-ejegu lẹ.” Ịyẹ tị́ tịtị du ká iru nya angịnyị wẹẹ ye ọwụrụ-wụrụ nyamwụ myị nanana nyori ọ kaa kpa ocheju ọtịpyọ kịlaa?—Etu 9:13-18.

11. Ịyẹ tị́ du ká arụrụ nya ụya ọyẹyẹ tịpyọ kaka kpoye?

¹¹ Ụnya ọhẹ ọlẹ kọ ji ẹga myị́ ẹga lẹẹlẹẹ ri arụrụ nya ụya ọyẹyẹ. Angịhyẹ kaa me nyori arụrụ nya ụya ọyẹyẹ nyị́ kaa họ ọngịnyị abwọhẹ ka. Ma arụrụ nya ụya ọyẹyẹ kaa bịrị ọngịnyị, o du ká ihi ọlẹ ká ọngịnyị kaa la ẹ-ẹga nyịlọmwụ bala angịkịla kaa gwoo byi, ọ tịị lujwo la ọ-ka tụụbwọ hi abwẹla ọwẹ ịnyịnyị. Kori ká ọngịnyị á yẹ arụrụ nya ụya, ọ kaa lujwo nyọka gu irya daarụ hi ang ịlẹ kọ yẹ. Da ọọwa u-uhye, arụrụ nya ụya ọyẹyẹ á kaa hu irya ọtịpyọ kpa rụ hi ọngịnyị ka, ma ọ kaa du ká irya ọtịpyọ kaa wẹ ẹpwụ nya ọngịnyị gụ́ olene. (Kol. 3:5; Jem. 1:14, 15) Ee, iru nya angịlẹ kị kaa yẹ arụrụ nya ụya ọhọhọ kaa họ ụya ịnyịnyị.

12. Ányị ahị tị́ ka mẹjẹ nyori ahị wẹẹ chewu ke ịlọhị hi arụrụ ịlẹ kị ka kpa irya nya ụya wẹ ẹpwụ nyahị?

¹² Lala angịnyị nya ịKịrayịsị, ányị ahị tị́ ka họ kori ká arụrụ nya ụya á hu i-ifon nyahị lụka ọ-kphị ju ka? Ahị ka tụ ẹhị rụ hyoo i-ijata. Ọ ka chịhị kpẹẹ la ọ-ka họ ịnyị kori kahị kpịtịya nyori igu oriri nyahị bala iJihova à ri ang ọlala nyahị ọlẹ kọ ju apyobwuna gụgụ wuu lẹ. Arụrụ ịhyẹ ịlẹ kị dọmwụ ri ịnya ụya kpangga ka, ka kpahị irya ka ẹga nya ụya ọhọhọ myị́. Ịyẹ tị́ du kahị ka cheji ba hyaa? Chajị áhị tịtọ nya ọ-dọmwụ ka hu ẹta-ẹdịyẹ ọpyịnyẹng ọhẹ-lọhẹ jahị da ụya ọhọhọ ẹ-ẹpwụ ọkịlẹtụ nyahị kpong-kpong ka. (Mat. 5:28, 29) Ọngọgbahị nya ọjịra-jịra ọhẹ ịị Thailand ká ẹnyị nyamwụ ri David yẹkẹẹ: “M̀ kaa tọ ịlọm wo nyori: ‘Kori ká arụrụ ịịwa á dọmwụ ri ẹla nya ụya kpangga ka, iJihova ka chị ọkẹkẹnị kori kam kịnyaa ja mwụụrụ yaa?’ Irya ọ-kụ ụ-ụgbẹyị ọlịịwẹ dam ụbwọ nyọka họ ẹla la ẹla ọjẹ́jẹ.”

13. Ịyẹ à tị́ kaa dahị ụbwọ nyọka họ ang la ẹla ọjẹ́jẹ?

¹³ Uhi ojuju nyọka họ ịngịngịhyẹ ọlẹ kọ ka wụ iJihova ẹjẹ ka dahị ụbwọ nyọka họ ẹla la ẹla ọjẹ́jẹ. Uhi ojuju nya iJihova à ri “ọmwụ ọdada nya ẹla ọjẹ́jẹ lẹ.” (Etu 9:10) Ahị yẹ ẹlẹwẹ bwu ọmwụ ọdada nya Etu egbeju 9, ụ-ụwa ị chụ “ẹla ọjẹ́jẹ” ọlam-ọlam ka pwoku ọnyang ọkịla.

14. Ọwụrụ-wụrụ ọdatị oyina ahị tị́ wa ụ-ụpwụ nya Etu 9:1-6?

¹⁴ Wa Etu 9:1-6. Ẹ-ẹgẹwẹ, ahị yẹ ọwụrụ-wụrụ ọlẹ kọ bwu ẹga nya iJihova, kọ ri Ọngọ Họhị bala ọngọ la ẹla ọjẹ́jẹ gụgụ wuu. (Etu 2:6; Rom. 16:27) Ẹgẹwẹ ya ẹla rụ ẹpwa ọtụka ọhẹ ọlẹ kọ la ịtachị irwiye. Ẹla ọ-chụ pwokwita ọwẹ mẹjẹ nyori iJihova ri ọngọ kaa hu ha pyẹ ụbwọ maa, bala o-ri ọ da ọng myị́ ọng ọlẹ kọ tịtọ nyọka kpa ẹla ọjẹ́jẹ nyamwụ họ ụkụrwọ ẹ-ẹpwụ nya ọhịhị ọwụraba.

15. Ịyẹ Ohe à tị́ wụrụ́ụhị kahị ka họ?

¹⁵ Bwu ọ-chụ pwokwita nya ọnyang ọlẹ kọ ku  ọmwakpa nya ẹla ọjẹ́jẹ ọlam-ọlam kị chabwọ ụ-ụpwụ nya Etu egbeju 9, ahị yẹ nyori iJihova ri Ọngọ kaa hu ha pyẹ ụbwọ maa a-agbẹyị lụmẹ-lụmẹ. Ọgba ọwẹ họ kahị jẹ́ nyori ọnyang ọwẹ nyị kpụ́ iyo, chị ere, bala ọ-ya itebwuru da gbe angga ẹ-ẹpwa nyamwụ. (Etu 9:2) Da ọọwa u-uhye, jaabwọ ká ọgba 4 bala 5 ya, ọnyang ọlẹ kị wụrụ nya ẹla ọjẹ́jẹ byi ‘angị jẹ́ ẹla gbuu ka nyị kẹwẹ kaka ri ang oriri nya ọwa mẹ.’ Ịyẹ tị́ du kahị ka ka ẹpwa nya ẹla ọjẹ́jẹ kaka ri ang oriri ọlẹ kọ kpụ́? IJihova tịtọ ká anchẹ nyamwụ ka jẹ́ ẹla bala o-ye ewu ọ-chike. Ọ́ tịtọ kahị ka họ ẹla o-pwoku ka ọlẹ kọ ka kpa akama wahị ka. Ịnyị à du kọ kaa “tụ ụdụ nya ẹla ọjẹjẹ ha alabwẹla ọnyịịla” lẹ. (Etu 2:7) Ụka kahị ju uhi nya iJihova ụ-ụgbẹyị opwoku, ọ kaa háahị nyọka họ ẹla kpọọ ịpyọ. Ụka kahị wo ẹla ọmẹjẹ ọnyịịla nyamwụ, ahị kaa chị ọkẹkẹnị nyọka kpa họ ụkụrwọ.—Jem. 1:25.

16. Ányị uhi ojuju nya iJihova à tị́ da Alain ụbwọ nyọka cheje nya ẹla la ẹla ọjẹ́jẹ? Ịyẹ à tị́ ri ocheju nyọọwa?

¹⁶ Kụ ẹhị yẹ abwọlẹ ká uhi ojuju nya Ohe da Alain ụbwọ nyọka cheje nya ẹla la ẹla ọjẹ́jẹ wẹẹ. Alain ri ọngọgbahị nya ọjịra-jịra, ọ tị ri ọngọ mẹ ụpwụ jẹ ịnyịnyị. Ọ yẹkẹẹ: “Iru nya angịlẹ kahị kaa họ ụkụrwọ lawụlẹ kaa hu ifim nya ụya ọhọhọ lala ang ọlẹ kọ kaa mẹ ang jẹ u-uhye nya ẹga nya awụlẹ ọkaka.” Ma ọ jẹ́ nyori ẹlẹwẹ nyị́ ri ẹlịlẹhị ka. Ọ yẹkẹẹ: “Chajị nya uhi ojuju nya Ohe Oluhye, m̀ pwa gbanggbang nyọka yẹ ifim ụma ịlịnyị. M̀ tị wụlẹ ang odudu kam cheje ọwẹ ya jaa ịnyịnyị.” Ọọnahị ọwẹ kpa ẹla ọmẹjẹ nya ẹla ọjẹ́jẹ ọlam họ ụkụrwọ nyọka “dịrẹ ọgụ nya ang ọjẹ́jẹ.” (Etu 9:6) Ẹla ọlẹ ká Alain họ kpa angịhyẹ ịlẹ kị kaa mẹ ụpwụ jẹ lawụlẹ ịpyọ du kị dọmwụ nya ịBayịbụụ ọjẹ́jẹ bala ọ-kaa wẹ ọjịra-jịra lẹẹlẹẹ lẹ.

17-18. Ahị ọwawa iyina angịlẹ kị ye ọwụrụ-wụrụ nya ẹla ọjẹ́jẹ ọlam myị à tị́ ka yé? Ịyẹ ị tị́ ka jẹ́-ẹ ya ẹhị guru gbe? (Yẹ ifoto ịnyịnyị.)

¹⁷ IJihova kpa ọ-chụ pwokwita nya anyang imiiye ịwẹ mẹ ang jẹ́ẹhị u-uhye nya abwọlẹ kahị ka bwu la ijuju ọnyịịla. Angịlẹ kị ye ọwụrụ-wụrụ nya “ọnyang oluchi” myị kaa maga nyọka yé ịpyọ ọkpụkpụ bwu ụya ọhọhọ. Ma, ị kaa deeri nyori ang ọlẹ kị wẹẹ họ lẹẹlẹẹ ka gu abwọlẹ ká ijuju nyaa ka la. Abwẹla nyaa ọwẹ ka kpaa ju ka ‘ẹpwụ nya ejegu.’—Etu 9:13, 17, 18.

¹⁸ Ijuju nya angịlẹ kị ye ọwụrụ-wụrụ nya ọnyang ọlẹ kọ ku ọmwakpa nya “ẹla ọjẹ́jẹ” myị ka datị! Ị kaa chị ọkẹkẹnị ịnyịnyị chajị ị la ang myị́ ang ọlẹ kị baba nyọka jẹ́-ẹ tụ ju iJihova chwẹẹ. (Ayị. 65:13) Bwula ọlọmwụ Ayịsaya, iJihova yẹkẹẹ: “Anụ ke ụrụ lam wẹẹ kanụ ri ang ọnyịịla. Ọọwa, ānụ ka ye ang oriri ọlẹ kọ hagụ wuu lẹ.” (Ayị. 55:1, 2) Ahị wẹẹ jẹ́ ang  u-uhye nyọka la ọháha ẹ-ẹga nya ang ọlẹ kọ há iJihova bala ọ-ka ba ang ọlẹ kọ wọọ ẹjẹ ẹtẹ. (Eje. 97:10) Ọ tị kaa kpụhị ịpyọ nyọka wụrụ angịkịla wẹ ka yé apyobwuna bwu ẹga nya “ẹla ọjẹ́jẹ” ọlam-ọlam. Ahị lala anchẹ ịlẹ kị wẹẹ “wụrụ angịnyị ẹpwa, bwu ẹga ịlẹ kị la gede e-epweji” juwa byaa yẹkẹẹ: “Anụ angị jẹ ẹla gbuu ka, anụ kẹwẹ mẹ.” Apyobwuna ọlẹ kaahị bala angịlẹ kị ke ụrụ wo lahị kaa yé á ba ọ-ọlẹẹlẹẹ kem ka. Ị ka juwa pyịyọọ. Ị ka ya iwe da hahị nyọka hịhị gboyi myị́ oyi, jaabwọ kahị wẹẹ “dịrẹ ọgụ nya ang ọjẹ́jẹ.”—Etu 9:3, 4, 6.

19. Jaabwọ ká ụpwụ nya Ọngọlirya 12:13, 14 ya, ẹlịyẹ ahị tị́ ka cheje nyọka họ? (Yẹ akpa ọlẹ kọ ri, “ Uhi Ojuju nya Ohe Ju Apyobwuna Hahị.”)

¹⁹ Wa Ọngọlirya 12:13, 14. Uhi ojuju nya Ohe Oluhye a kịnyaa la o-gbe ọkịlẹtụ nyahị bala ọ-dahị ụbwọ nyọka la abwẹla ocheri-cheri bala ọ-tụ ju iJihova chwẹẹ ẹ-ẹpwụ nya ahyẹẹnụ ihyẹẹkpẹ ịlẹ mẹ. Uhi ojuju ọlam-ọlam ọwẹ ka guhi gbịla nyọka kịnyaa la ọ-wụrụ angịnyị lụmẹ-lụmẹ wẹ ka mwahị nya “ẹla ọjẹ́jẹ” nyịlẹhị chajị kị ka yé apyobwuna bwu ụwa ịnyịnyị.