1. Ịyẹ tị́ du ká iJisọsị bịlẹ iJihova nyị chewu ke angịjụgbẹyị nyamwụ?

LODU ohyẹẹkpẹ nya ọhịhị nya iJisọsị ám̀ odehe ọlẹ, ọ wẹẹ kụ irya u-uhye nya akama ịlẹ wuu ka angịjụgbẹyị nyamwụ ka la. Ọháha ọlẹ ká iJisọsị la ẹ-ẹga nya angịjụgbẹyị nyamwụ gwoo gbịla nyọka bịlẹ Adamwụ kọ ka “juwa ke angịịwa wuu yẹẹyẹẹ, chajị ká Ohe Onyobyi á ka jwaa họ ịngịngịhyẹ myị́ kpong-kpong” ka. (Jọn. 17:14, 15) IJisọsị jẹ́ nyori ụka ká ọwa nyị rụ ka epwoohe kpá, Olegu Onyobyi nyị ka kịnyaa là ọ-ka ma uya ta ọng myị́ ọng ọlẹ kọ tịtọ nyọka gbịgba ha iJihova. Lẹ, anchẹ nya iJihova ka baba nya ewu ọ-chị ke.

2. Ịyẹ tị́ du kahị kà jẹ́ myị̀myị̀ nyori iJihova ka wẹ abwọ ọrịrị nyahị?

² IJihova wẹ abwọ ọrịrị nya iJisọsị chajị Ọnyị nyamwụ họ́ọ. Kori kahị kaa maga yẹẹyẹẹ nyọka họ ẹla kpụ iJihova ịpyọ, ahị ka họ́ọ ịnyịnyị, ọ tị ka ke ụrụ wo lahị ụka kahị raabwọ họọ nyọka dahị ụbwọ bala ọ-chewu keehi. IJihova ri Adịda ọ-la ọháha. Lẹ, ọ ka kịnyaa la ọ-kpẹhị rịrị anyị nyamwụ. Kori kọ họ ịnyị ka, ọ ka ri oyoyi ẹ-ẹga nya ẹnyị nyamwụ, ị ka kpa ẹhị ọtịpyọ yọọ!

3. Ịyẹ tị́ du kahị baba nya ewu ọ-chị ke nya iJihova?

³ Ahị baba nya iJihova ọ-ka chewu keehi lẹẹlẹẹ gụ́ olene. Ị ku Olegu Onyobyi rụ bwu epwoohe “la agbama nyamwụ ọtụka-ọtụka lẹ.” (Ọwụ. 12:12) Ọ jẹ́ họ kpụ angịhyẹ ịlẹ kị kaa tụụhị pyịpyị me nyori “ẹrụ, ịwa nyaa wẹẹ myị ha Ohe Oluhye” lẹ. (Jọn. 16:2) Angịkịla ịlẹ kị myị la Ohe Oluhye ka, kaa tụụhị pyịpyị chajị nyori ahị datị hi alodehe. Ịngịngịhyẹ ọlẹ ko du ká angịnyị kaa tụụhị pyịpyị, áhị juhi ka. Ịyẹ tị́ du? Chajị Omyi Ẹla nya Ohe yẹkẹẹ: “Ọngọlahị la ayịdang ri Ọngọ chịla o-hu ọkịlẹtụ ha lụmẹ lẹ, ọ ka wunu kpa gogo ẹ-ẹpwụ nya ẹla nyamwụ bala ọ-ka juwa gbanụ kpehe hi ẹpwụtụbwọ nya Olegu Onyobyi.” (2 Tẹs. 3:3) Ányị iJihova à tịị chewu keehi? Ahị ya ẹla u-uhye nya agbẹyị imiiye wẹẹ.

4. Jaabwọ ká ụpwụ nya Ala Efesọsị 6:13-17 ya, ịyẹ iJihova à tị́ ya hahị nyọka chewu keehi?

⁴ IJihova ya ang-abwọ ị-kpa dẹwụ ịlẹ kị ka chewu keehi hi ịnmọ nya Olegu Onyobyi hahị. (Wa Ala Efesọsị 6:13-17.) Ang-abwọ nya ẹwụ nya olegu ịịwa la ọngịrị, ị tịị họ ụkụrwọ yẹẹyẹẹ! Ma kori kahị tịtọ ká ang-abwọ nya ẹwụ ịịwa ka chewu keehi aalẹ, ahị ka kpa ọnyọnyọọnyị nyaa họ ụkụrwọ ụka myị́ ụka. Ịyẹ ọnyọnyọọnyị lẹpwụ nyaa à tị́ ku ọmwakpa? Ahị ya ẹla u-uhye nyaa hi tọ awụlẹ wẹẹ.

5. Ịyẹ à tị́ ri ugba ọchọhị nya ẹlịlẹhị? Ịyẹ tị́ du kahị kà ya chị pyii?

⁵ Ugba ọchọhị nya ẹlịlẹhị ku ọmwakpa nya ẹlịlẹhị ọlẹpwụ nya Omyi Ẹla nya Ohe ko ri ịBayịbụụ. Ịyẹ tị́ du kahị ka ya chị pyii? Chajị Olegu Onyobyi à ri “adịda nya ọnọọkịla” lẹ. (Jọn. 8:44) Ọ kịnyaa la ọ-me ọnọọkịla ẹ-ẹpwụ nya ẹka ụnọ ịmanyị tị lẹ, kpụ ọ jẹ́ “pịrị alodehe ọlẹ wuu ju”! (Ọwụ. 12:9) Ma, ẹlịlẹhị ọlẹpwụ nya ịBayịbụụ kaa chewu keehi bwu ọpịrị ju. Ányị ahị tịị ya ugba ọchọhị nya ẹlịlẹhị ọwẹ chị? Ahị kaa họ ịnyị bwula ọ-jẹ́ ẹlịlẹhị u-uhye nya iJihova, ọ-gbịgba họọ “bwula ọngịrị nya olegu ịgọgọ ẹ-ẹpwụ nya ẹla nya ịlẹhị” bala ọ-họ ịngịngịhyẹ ọlẹ ká ọkịlẹtụ ka ya eje wuhi ka.​—Jọn. 4:24; Efe. 4:25; Hib. 13:18.

6. Ịyẹ à tị́ ri akụmada ọkụrụ ọkịlẹtụ? Ịyẹ tị́ du kahị kà ya kụrụ pyii?

⁶ Akụmada ọkụrụ ọkịlẹtụ ku ọmwakpa nya agbẹyị nya abwẹla ọnyịịla ịlẹ ká iJihova kaa mẹjẹ́ẹhị. Ịyẹ tị́ du kahị ka ya akụmada ọọwa kụrụ pyii? Jaabwọ ká akụmada kaa chewu ke ọkịlẹtụ nya isoja du ká ịcha jẹ́-ẹ wu ọkịlẹtụ nyamwụ ọyị ka, akụmada nya olegu ịnyịnyị kaa chewu keehị chajị ká ang ịtịpyọ nya odehe ọlẹ á ka chị ọkịlẹtụ nyahị ịrị ka. (Etu 4:23) IJihova ya ẹhị nọ kahị ka la ọháha ẹ-ẹga nyamwụ bala ọ-ka gbịgba họọ la ọkịlẹtụ nyahị wuu. (Mat. 22:36, 37) Lẹ, Olegu Onyobyi kaa maga nyọka huhi abwọ la ọ-kpa ọkịlẹtụ nyahị wuu gbịgba ha iJihova bwula ọ-họ kahị ka la ọháha ẹ-ẹga nya ang ilodehe ọlẹ kị ri ang ịlẹ kị wụ iJihova ẹjẹ. (Jem. 4:4; 1 Jọn. 2:15, 16) Ụka ká ijẹẹhị ọwẹ á tị họ ụkụrwọ ka, ọ kaa gba mịlahị la agbụrụ nyọka họ kahị ka họ ẹla ọlẹ kọ ka wụ́ iJihova ẹjẹ.

7. Ányị ahị tịị ya akụmada ọ-kụrụ ọkịlẹtụ kụrụ?

⁷ Ahị kaa ya akụmada ọkụrụ ọkịlẹtụ ọwẹ kụrụ bwula o-ju ihi nya ẹla ọlẹ ká iJihova ya u-uhye nya ang ọlẹ ko ri ọnyịịla bala ọtịpyọ bala o-juwa hịhị baa jẹ. (Eje. 97:10) Ọ ka la angịhyẹ lala o-ri ehile nya iJihova nyị kaa wu ọngịnyị kpa lụmẹ myị́. Ma, kori kahị hwabwọ la ọ-ka kpa itiwe nya ehile ịlẹpwụ nya ịBayịbụụ họ ụkụrwọ, ahị ka lala isoja ọlẹ kọ tụụbwọ hi akụmada nyamwụ deeji ọ-ọgbẹwụ chajị o me nyori nyị la ilo lụmẹ. Ọọwa ka ri ẹmwa ohideeji! Kori kahị la ọháha ẹ-ẹga nya iJihova, ehile nyamwụ á ka “la ọngịrị kịlaahị kịla” ka, ma ahị ka yọọ nya ang ọ-chị ọhịhị da.​—1 Jọn. 5:3.

8. Ịyẹ à tị́ ri etu nyọka ya ugbẹtẹ ju ụka myị́ ụka?

⁸ ỊPọlụ myịmyị byihi nyori ẹrụ ọnyịịla nya okpunyi ọ-kpa pyẹ nyị ku ọmwakpa nya ugbẹtẹ o-ju ẹta. Ọọwa ri, ahị ka nwụlanọ ụka myị́ ụka nyọka kpa ẹrụ ọnyịịla nya Ịpyị-Adịrahụ pyẹ. Ụka kahị ya ẹla ọlẹ ká ịBayịbụụ mẹjẹ je angịkịla, ahị kaa ju ọmyịmyị nyahị ọngịrị. O ri ọhụ ojuju nyịlẹhị nyọka yẹ abwọlẹ ká angịnyị nya iJihova chị odehe ọnụ wuu wẹẹ kpa iwe ọnyị myị́ ọnyị ọlẹ kị la ya ẹrụ ọnyịịla​—ụka kị juwa ọ-ọlụkụrwọ, uube-ụpwụ, ẹ-ẹpwụ nya ihi bala ụka kị ja kpa ẹrụ ọnyịịla pyẹ bwu ẹpwa ka ẹpwa, ụka kị ja ra ang, ụka kị ju aanaa ịlẹ kị ri Alibeenu nya iJihova ka ụga, bala ụka kị ja ya ẹla bala angịkịla ịlẹ kị jẹ́. Kori kahị juhi gbee kahị hwabwọ la ọ-ka ya ẹla nya Ohe, ahị ka lala isoja ọlẹ kọ pwọ egbatẹ ọ-ọgbẹwụ; ang ka gwoo ẹ-ẹta i-ijata. Ọọwa tị ka du kọ ka lujwo họọ nyọka chewu ke ịlọmwụ ụka ká aluji á wẹ lọọ, ọ́ tị ka jẹ́-ẹ họ ẹla ọlẹ ká olegbeju nyaa ya ka ịnyịnyị.

9. Ịyẹ tị́ du kahị ka pẹ hi akụmada nya ọmyịmyị nyahị ka?

 ⁹ Akụmada nya ọmyịmyị ku ọmwakpa nya ọmyịmyị ọlẹ kahị la ẹ-ẹga nya iJihova. Ahị dahịhile nyori ọ ka họ ọnụ ọmyịmyị nyamwụ ọnyị myị́ ọnyị jịra. Ọmyịmyị ọọwa ka dahị ụbwọ nyọka “tụ ịnmọ ilila-lila nya ịmayẹ inyibyi nya Ohe Onyobyi kịnyaa.” Ịyẹ tị́ du kahị ka hu akụmada ọwẹ kpa ụ-ụbwọ? Chajị ọ kaa chẹwụ keehi chajị ká ang ọmẹjẹ nya angịlẹ kị ji ẹkpẹ da ogu ka hụhị ahị ka bala ọ-ka la ọkịlẹtụ okpenyi ụka ká angịnyị á ja kpọnụ ta ọmyịmyị nyahị ka ịnyịnyị. Kori kahị la ọmyịmyị ka, áhị ka la ọngịrị nyọka ju ihi nya iJihova ụka ká angịnyị á yẹ rịrịịhị nyọka bịrị ehile nyamwụ ka. Ma, ụka myị́ ụka kahị pwa la ọ-ka họ ang ọlẹ kọ wụ iJihova ẹjẹ ọ-ọlụkụrwọ lee uube-ụpwụ, aalẹ ọmyịmyị nyahị à wẹẹ chewu keehi lẹlẹ. (1 Pit. 3:15) Ụka myị́ ụka kahị pwa la ọ-ka ye ụkụrwọ ọlẹ kị ka nwụhị uri gụ olene chajị nyori ọ ka chịhị ochuchuu la ọ-ka gbịgba ha iJihova jaabwọ kahị kaa họ ene-ene, aalẹ ọmyịmyị nyahị à wẹẹ chewu keehi lẹlẹ. (Hib. 13:5, 6) Ụka myị́ ụka kahị tị ja gbịgba ha iJihova nanana nyori ị wẹẹ tụụhi pyịpyị, aalẹ ọmyịmyị nyahị à wẹẹ chewu keehi ịnyịnyị lẹlẹ.​—1 Tẹs. 2:2.

10. Ịyẹ à tị́ ri okpo o-ke egbeju nya ẹwụ? Ịyẹ tị́ du kahị kà ya kụrụ pyii?

¹⁰ Okpo o-ke egbeju nya ẹwụ ri ẹhị ọrịrịị-rịrị  ọlẹ ká iJihova ya hahị​—ẹhị ọrịrịị-rịrị nyori ọ ka chịhị da bwu ẹpwụ nya igu bala ọ-ka nwụ angịlẹ wuu kị họ irya nyamwụ uri. (1 Tẹs. 5:8; 1 Tim. 4:10; Tay. 1:1, 2) Jaabwọ ká okpo o-ke egbeju nya ẹwụ ọlam kaa chewu ke egbeju nya isoja, ẹhị ọrịrịị-rịrị nya ọchịda kaa chewu ke irya ọlẹ kahị kaa kụ. Ụ-ụgbẹyị oyina tị́? Ẹhị ọrịrịị-rịrị ọwẹ kaa dahị ụbwọ nyọka ya irya nyahị nọ u-uhye nya ọnụ ọmyịmyị nya Ohe Oluhye bala ọ-dahị ụbwọ nyọka myị ká akama nyahị ka yehi mile ka. Ányị ahị tịị bwu ya okpo ọwẹ kụrụ? Ahị kaa họ ịnyị bwula ọ-kụ irya u-uhye nya ẹla ụ-ụgbẹyị ọlẹ ká Ohe Oluhye kaa họ. Ọ-chụ pwokwita, áhị kaa ya ẹhị ọrịrịị-rịrị nyahị nịrọ ang-ụdụ nya odehe ọlẹ kọ kaa ju ọ-dahịhile ka lẹ ka, ma ahị kaa ya nịrọ Ohe Oluhye.​—Eje. 26:2; 104:34; 1 Tim. 6:17.

11. Ịyẹ à tị́ ri oge ọ-kpa dẹwụ? Ịyẹ tị́ du kahị ka kpa họ ụkụrwọ?

¹¹ Oge ọ-kpa dẹwụ ri Omyi Ẹla nya Ohe Oluhye, ko ri ịBayịbụụ. Oge ọwẹ la ọngịrị nyọka yẹ ọnọọkịla ọnyị myị́ ọnyị ọmwụ dodehe du ká angịnyị jẹ́-ẹ la ịlaa bwu ẹpwụ nya ịmẹjẹ nya ịnịịkịla bala abwẹla ịtịpyọ. (2 Kọr. 10:4, 5; 2 Tim. 3:16, 17; Hib. 4:12) Ahị kaa jẹ́ abwọlẹ kahị ka kpa oge ọwẹ họ ụkụrwọ bwula ịBayịbụụ ọjẹ́jẹ nyịlọhị bala ẹla ọlẹ ká ogu nya Ohe Oluhye wẹẹ mẹjẹ́ẹhị. (2 Tim. 2:15) Datị hi ang-abwọ nya ẹwụ ịwẹ, iJihova kaa ya ụma nya ewu ọ-chị ke ọkịla ọhẹ hahị. Ịyẹ ọ tị́ ri?

12. Ang ọkịla oyina ahị tị́ baba? Ịyẹ à tị́ du?

¹² Isoja ọlẹ kọ jẹ́ ẹwụ yẹẹyẹẹ kaa jẹ́ nyori ọ́ ka jẹ́-ẹ dẹwụ tọ iru nya aluji ụbwọọmwụ kpụ ọ ka kụrụ myị́ ka; ọ baba nya ụbwọ ọdada nya alisoja ịkịla. Ụ-ụgbẹyị ọlịnyị-ịnyị, áhị ka jẹ́-ẹ ma uya ụbwọọhị tọ Olegu Onyobyi bala angị chẹkpẹ jwoo ahị ka kụrụ myị́ ka; ahị baba nya ụbwọ ọdada nya aanahị alẹng bala anyang. IJihova yahị wuu ri “anyadịda ẹ-ẹpwụ nya ịKịrayịsị” chị odehe ọnụ. Aanahị ịwẹ tị nwụlanọ nyọka dahị ụbwọ.​—1 Pit. 2:17.

13. Jaabwọ ká ụpwụ nya Ala iHiburu 10:24, 25 mẹjẹ, ányị ọjịra-jịra ọkaka à tịị dahị ụbwọ?

¹³ Ụgbẹyị ọhẹ ọlẹ kahị kaa ye ụbwọ ọdada ri ọjịra-jịra nyahị ọkaka. (Wa Ala iHiburu 10:24, 25.) Ọkịlẹtụ kaa kpụhị ahị wuu enyi ụka ọhẹ. Ụka kọ lịnyị, ọjịra-jịra ka dahị ụbwọ. Ẹla ọwẹwẹ o-bwu ọkịlẹtụ nya aanahị kaa juhi ọhụ. Ẹla ọmẹjẹ bwu ẹpwụ nya ịBayịbụụ bala ọ-họ mẹjẹ ịlẹ kahị kaa yẹ kaa guhi gbịla nyọka kịnyaa là ọ-gbịgba ha iJihova. Oja ọlẹ kahị kaa ja bala aanahị ene ká ọjịra-jịra ka dọmwụ bala ụka kọ cheju kpá kaa juhi ọhụ ịnyịnyị. (1 Tẹs. 5:14) Ọ-da ọọwa u-uhye, ọjịra-jịra nyahị kaa ya iwe hahị nyọka da angịkịla ụbwọ, ọọwa tị du kahị kaa ye ọkẹkẹnị. (Ụkụr. 20:35; Rom. 1:11, 12) Ọjịra-jịra nyahị kaa dahị ụbwọ a-agbẹyị ịkịla ịnyịnyị. Ị kaa dahị ụbwọ nyọka jẹ́-ẹ jẹ́ ijẹẹhị ọ-kpa dẹwụ gụ olene, ọọwa ri, ị kaa dahị ụbwọ nyọka jẹ́-ẹ ya ẹla nya Ohe bala ọ-mẹ ang jẹ gụ olene. Ọ-chụ pwokwita, ahị jẹ́-ẹ kpa apwụ ịlẹpwụ nya Ang-abwọ ị-Kpa Mẹ Ang Jẹ nyahị họ ụkụrwọ yẹẹyẹẹ. Lẹ, nwụlanọ gbe ọjịra-jịra yẹẹyẹẹ. Ke ụrụ yẹẹyẹẹ ụka ká juwa ọọjịra-jịra. Ụka kọ tị myị́ kpá, kpa ẹla ọlẹ ká jẹ́ họ ụkụrwọ. Bwula ọ-họ ang ịlịịwẹ, a ka wẹ ka ri “ọngọ dẹwụ ọ-chịla o-hu ọkịlẹtụ ha nya ịKịrayịsị iJisọsị.”​—2 Tim. 2:3.

14. Ụbwọ ọdada ọkịla oyina à tị́ ji hahị?

¹⁴ Ụnọ ịmányị tị nya alegu-ẹrụ ịlẹ kị la ọngịrị yẹẹyẹẹ kaa dahị ụbwọ ịnyịnyị. Kụ irya nya ang ọlẹ ká olegu-ẹrụ ookpokpo ka jụ họ myị́ wẹẹ! (Ayị. 37:36) Ká kụ irya nya ang ọlẹ ká iru nya alẹwụ nya alegu-ẹrụ ịtụka ịwẹ ka họ myị́ ugbẹnyị wẹẹ. Ọngịnyị ehe lee alegu inyibyi ọhẹ-lọhẹ á nwa ẹla nya alẹwụ nya iJihova ịnyịịngịrị ịwẹ ka. IJihova à la ọngịrị gụ wuu lẹ. Kori ko ji oye nyahị lẹ aalẹ, jaabwọ myị́ abwọ ká angị tụụhị pyịpyị á ju iru kaka ba, ahị ka jẹ́-ẹ la ọngịrị gwaa pyii lẹ. (Angị. 6:16) Ahị ka jẹ́ myị̀myị̀  nyori ẹlịlẹhị à wẹ lẹ! Kụ irya u-uhye nya angịlẹ kị ka jẹ́-ẹ dang ụbwọ ụka ká ọkịlẹtụ á kpụng enyi ọọlajị nya ẹla ọhẹ ọlẹ ká alụkụrwọ, alube-ụpwụ, lee alugbiyegu nyang ịlẹ kị ri Alibeenu nya iJihova ka ya lee ọ-họ ẹ-ẹga nyang wẹẹ. Kpịtịya nyori á la ụbwọọng ẹ-ẹpwụ nya uya ọwẹ ka. Ẹla ọmẹjẹ nya iJihova a wẹẹ ba jẹ lẹ.

15. Jaabwọ ká ụpwụ nya Ayịsaya 54:15, 17 mẹjẹ, ịyẹ tị́ du kị kà jẹ́-ẹ tụ anchẹ nya Ohe ọnụ ku ẹnẹnẹhẹ myị́ ka?

¹⁵ Odehe ọlẹ ko ji ẹpwụtụbwọ nya Olegu Onyobyi la ang lụmẹ-lụmẹ ko dudu kọ kaa baahị ẹtẹ. Áhị kaa ya ụbwọ ju ẹla nya upe ọhẹ-lọhẹ ka, áhị tị kaa ya ụbwọ ju ẹla nya ẹwụ ọdada ka ịnyịnyị. Ahị kaa ya ẹnyị nya Ohe Oluhye dodehe, ahị kaa ya je angịnyị nyori Ịpyị-Adịrahụ nyamwụ kẹnẹ-kẹnẹ à ka jẹ́-ẹ chị akama nya angịnyị ehe eju myị́ lẹ, ahị tị kaa ju ihi nya ehile nyamwụ ịnyịnyị. Ahị kaa họ ká angịnyị ka jẹ́ nyori ọngọ kpa odehe ọlẹ ụ-ụbwọ ri ọlọnọọkịla onyobyi bala ọngọ nwụ angịnyị. (Jọn. 8:44) Ahị tị kaa ya dodehe nyori ayịreji nya odehe nya Olegu Onyobyi ọlẹ ji ọnaabwọ lẹ. Olegu Onyobyi bala angị chẹkpẹ jwoo á ka jẹ́-ẹ huhi abwọ hi ụkụrwọ nya ẹrụ ọnyịịla ọ-kpa pyẹ kaka. Ọkọkọ nyọọwa, ahị ka kịnyaa la ọ-ka ya ogbo ha iJihova ụ-ụgbẹyị ọnyị myị́ ọnyị ọlẹ kahị ka jẹ́-ẹ họ myị́! Olegu Onyobyi ịnọ á la ọngịrị kwẹwụ ka, ma ọ tị jẹ́ wu ẹrụ ọnyịịla nya Ịpyị-Adịrahụ kpa la ọ-ka wu angịnyị ọyị chị odehe wuu ọnụ ka. Ewu ọ-chị ke nya iJihova à du ká ẹlẹwẹ jẹ́ chịkpẹẹ myị́ lẹ.​—Wa Ayịsaya 54:15, 17.

16. Ányị iJihova à tị́ ka chị angịnyị nyamwụ da lụka nya akama ọtụka okpelego?

¹⁶ Ịyẹ à tị́ ka họ ị-ịlahị? Lụka nya akama ọtụka okpelego, iJihova ka chịhị da a-agbẹyị imiiye ị-la ẹbyẹbyị ịhyẹ. Họhẹ, ọ ka chị anchẹ nyamwụ ịlẹ kị godayị giri-giri họọ da lụka ọlẹ kọ wẹẹ ka kpa ịdịrịhụ nya odehe ọlẹ ta ịBabịlọn ọtụka, ko ri ọ-tụ chawụlẹ nya ịgba ọgbagba nya ịnịịkịla wuu ayịreji. (Ọwụ. 17:16-18; 18:2, 4) Ọọwa lẹ, ọ ka chị angịnyị nyamwụ da ụka kọ ka ta apa ihihi nya odehe nya Olegu Onyobyi ayịreji lụka nya Amagẹdọn lẹlẹ.​—Ọwụ. 7:9, 10; 16:14, 16.

17. Ányị ahị tị́ kaa ye apyobwuna kori kahị rụ hi ẹga nya iJihova ka?

¹⁷ Kori kahị rụ hi iJihova ka, Olegu Onyobyi á ka jẹ́-ẹ họhị ang ọtịpyọ ọhẹ-lọhẹ ọlẹ kọ ka jụụhị gboyi myị́ oyi myị́ ka. Ọwa ị dọmwụ wẹẹ ka ta ayịreji gboyi myị́ oyi lẹ. (Rom. 16:20) Lẹ, ahị go ang abwọ nya ẹwụ nya olegu ịwẹ kụrụ​—kahị kịnyaa la ọ-kpa họ ụkụrwọ mẹ! A maga nyọka dẹwụ ọwẹ ụbwọọng ka. Da aanang ịlẹpwụ nya ọjịra-jịra ụbwọ. Ká ba ẹla ọmẹjẹ nya iJihova jẹ. Kori ká họ ịnyị, à ka jẹ́ myị̀myị̀ nyori Adang olepwoohe ọlẹ kọ la ọháha ka jung ọngịrị bala ọ-chewu keng.​—Ayị. 41:10.