Anchẹ nya iJihova ịhyẹ kaa kpa ang-abwọ nya ichene ya ẹla bala alugbiyegu nyaa bala Alibeenu nya iJihova ịkịla. Ma, ọngịnyị nya ịKịrayịsị ọlẹ kọ nwànwà ẹ-ẹpwụ nya ang nya olegu kaa kpa ẹla ọmẹjẹ ọlẹ i-irya: “Ọngọ jẹ ẹla-á yẹ akama kọ juwa wẹ, ọọ myẹbee hyọọ, oluchi tị ka yahị dọọ pwururu kele, ọ tịị chị ijẹma ụka ohyẹẹkpẹ.”​—Etu 27:12.

Ahị jẹ́ nyori iJihova tịtọ nyọka chewu keehi. Lẹ, áhị kaa yẹjula angịlẹ kị kaa ju ọmwụ nya ẹbwọ ọchịchị, angị kpa ọmẹjẹ nya ọnọọkịla kpehe lee angịlẹ kị ku kpehe hi ogu nya iJihova kpong-kpong ka. (Rom. 16:17; 1 Kọr. 5:11; 2 Jọn. 10, 11) Angịhyẹ ẹ-ẹpwụ nya ọjịra-jịra á tị ka ju ihi nya ehile ịla ịBayịbụụ ka myị́. (2 Tim. 2:​20, 21) Ahị kaa kpa ẹla ọwẹ i-irya ụka kahị ka chụ aligu nyahị. Ma, ọ kaa lujwo nyọka kpẹhị chịng chụ aligu ịnyịịla kori kahị kaa ya ẹla balaa la ang-abwọ ị-kpa da ụpwụ du kịla awụlẹ.

Ọ baba nyịlẹhị-ịlẹhị kahị ka dụmwọ-dụmwọ ẹ-ẹga nya aligu ịlẹ kahị kaa chụ ụka kahị juwa kpa ang-abwọ ịwẹ da ụpwụ du tawụlẹ e-ebwo ọlẹ ká angịnyị lụmẹ-lụmẹ ji. Angịnyị nya ịKịrayịsị ịhyẹ yẹjula ebwo ịlịnyị, ị tị chị ijẹma ụka ohyẹẹkpẹ. Lẹ, ányị ahị tị́ ka bwu dụmwọ-dụmwọ kori ká angịnyị-ị́ ju iru pwụ́ ohu lee ụnọ e-ebwo ọhẹ? Ọ́ chịkpẹẹ nyọka jẹ́ angị ịlụwa wuu yẹẹyẹẹ lee ọ-jẹ́ kori kị la ọmyịmyị ọnyọọngịrị ka. Ụpwụ nya Eje Ọnyịịla 26:4 yẹkẹẹ: Ḿm̀ ji ogu ta aluguru-ẹla ka. Ḿ bá ịngịhyẹ bá la ta alahị imiiye ka.” Ẹlẹwẹ-ẹ́ mẹjẹ nyori, ọ ka há gụ kori kahị da ụpwụ du ta angịlẹ kahị jẹ́ yẹẹyẹẹ ene lẹ ka?

Kori ká angịnyị ịla ebwo ọọwa á dọmwụ la pyịnyẹng wẹwẹ, ọngịnyị nya ịKịrayịsị baba nyọka dụmwọ-dụmwọ ẹ-ẹga nya ụka ọlẹ kọ kaa bịrị bala oja ọlẹ ká alebwo ọọwa kaa ja. Áhị ka kụ irya nyori ahị baba nyọka ya ọnụ ju ẹla ọnyị myị́ ọnyị ọlẹ kị ja ya lee o-juwa balaa tata ka. ỊPọlụ da iTimoti ọna u-uhye nya angịlẹ kị ri “angị kpa angịnyị kụ, juwa gba ju ka ẹpwụ nya ẹla nya angịkịla wurum.” (1 Tim. 5:13) Ọ chịkpẹẹ nyọka kpa iFon lee ịKọmputa họ ẹla ọlịnyị alẹ ịnyịnyị.

Ọngịnyị nya ịKịrayịsị ọlẹ kọ nwànwà ẹ-ẹpwụ nya Olegu á ka myị-ị̀ kpa ọnụ bịrị anchẹ nya iJihova ịkịla lee o-ya ẹla-ịbaa nyaa dodehe ka. Ọ́ tị ka myị-ị̀ ke ụrụ wo ẹla ịlịnyị ka ịnyịnyị. (Eje. 15:3; Etu 20:19) Ọ́ kaa kpa oja ọlẹ ko ri ọnọọkịla lee opwoku ụ-ụrụ ka pyẹ lee o-ke ụrụ wo oja ịlịnyị ka ịnyịnyị. (Efe. 4:25) Ahị la ẹla ịmẹjẹ ịnyịịla bwu ịBayịbụụ bala oja ịlẹ kahị ka jẹ́-ẹ dahịhile ị-ịWẹbsayịtị nyahị ọlẹ ko ri jw.org bala iprogram ịla JW Broadcasting^® ịlẹ kịị họ ọya-ọya.

Alibeenu nya iJihova ịhyẹ kaa kpa ang-abwọ ịwẹ ra ihyi, kpa dọhị bala ọ-mẹ ang ịlẹ kị la nyọka ya ra jẹ lee ọ-kpa ya iwe nya ụkụrwọ ọlẹ ko ji dodehe. Ang ịlịịwẹ ri ẹla nya ọhyị, ị́ la ịngịhyẹ ka họ bala ịgba ọgbagba nya iJihova ka. Angịnyị nya Ohe ịlẹ kị tịtọ nyọka ‘gba ụbwọ nyaa kpehe hi ẹpwụ nya ẹhị nyanya nya okpoko ọchịchị wuu’ á ka maga nyọka kpa ijẹẹhị ye okpoko bwu ẹga nya aanaa ẹnẹnẹhẹ ka.​—Hib. 13:5.

Ahị ka kpa ang-abwọ ị-kpa da ụpwụ du tawụlẹ ịwẹ bịlẹ okpoko ha aanahị ịlẹ kị ji ẹpwụ nya ọbaba lee angịlẹ ká ẹla o-bwu agaga họ o-oye nyaa? Aanahị háahị, ẹla nyaa tị kaa guhi o-olegu ịnyịnyị. Lẹ, ahị kaa da angịlẹ kị la ọbaba ụbwọ bala o-jwaa ọhụ. (Jem. 2:​15, 16) Ma, ọ-maga nyọka kpa ụgbẹyị ọlịịwẹ daa ụbwọ ka bịrị ụgbẹyị ọnyịịla ọlẹ ká egbeju-ẹpwa oloye ọwẹ lee ọjịra-jịra nwụlanọ nyọka da angị ịlịnyị ụbwọ myị́. (1 Tim. 5:​3, 4, 9, 10, 16) Nyịlẹhị-ịlẹhị, ọngọngọhẹ nyahị-ị́ ka tịtọ nyọka họ ká angịkịla ka kụ irya nyori nyị chwọọ ụ-ụgbẹyị ọdatị ọhẹ nyọka kpẹhị rịrị aanahị ịkịla ka.

O ri irya nyahị nyọka họ ang ọlẹ kọ ka kpa ogbo kịla Ohe Oluhye. (1 Kọr. 10:31) Lẹ, ụka ká juwa kụ irya kori á ka kpa ang-abwọ ị-kpa da ụpwụ du tawụlẹ ịwẹ lee ang-abwọ ịkịla họ ụkụrwọ, kụ ẹhị yẹ akama ịlẹ kị ka kpa wang myị́ ká dụmwọ-dụmwọ.