1-2. Owo à tị́ ka jẹ́-ẹ da angịnyị ụbwọ nwà ka hu enyi Ohe?

AMY kọ bwu Fiji yẹkẹẹ, “Ang ọlẹ kam wẹẹ jẹ́ bwu ịBayịbụụ hám. M̀ jẹ́ nyori ẹlịlẹhị à wẹ lẹ. Ma, m̀ dọmwụ nyọka yẹjula aanahị alẹng bala anyang ene kám jẹ́-ẹ yẹ ọhịhị nyam da bala ọ-nwà ka hu enyi Ohe.” Oja nya Amy ọwẹ mẹ ẹla ọkpọnchị ọhẹ jẹ́ẹhị: Ọ kaa chịkpẹẹ gụ ha angịlẹ kahị kaa jẹ́ ịBayịbụụ ta nyọka nwà kịlahị ka hu enyi Ohe kori ká angịkịla ịlọjịra-jịra á dụbwọ.

² Ọọnahị ọnyị myị́ ọnyị ka jẹ́-ẹ da angị inyeewe ụbwọ nyọka ri ụpa nya ọjịra-jịra. (Efe. 4:16) Ọngọ ye ịlahị nya ụgbẹyị ọhẹ ọlẹ ká ẹnyị nyamwụ ri Leilani kọ kụ Vanuatu yẹkẹẹ: “I ya nyori ehe oliku-liku nya-à kaa nwụ ọjị utu lẹ. M̀ me irya ịnyị ọ la ẹ-ẹga nya ọ-họ ká angịkịla ka ri angịjụgbẹyị ịnyịnyị lẹ; ọjịra-jịra lẹpwụ-lẹpwụ à kaa kpa ọngịnyị wẹ ẹlịlẹhị lẹ.” Alugbiyegu, aligu, bala angịmẹjẹ kaa da onjwo ụbwọ nyọka nwà ka ri ọngọgbahị. Ị kaa họ ịnyị bwula o-ju ọnyị ọọwa ọhụ bala ọ-mẹ ẹla ịlẹ kọ baba jọ́ọ. Ịnyịnyị-ịnyịnyị, aanahị ka jẹ́-ẹ ju angịlẹ kahị kaa mẹ ịBayịbụụ jẹ irya, jwaa ọhụ, bala ọ-ya ọgụ-ẹpẹtẹ ọnyịịla deeji haa du kị ka nwà ka hu enyi Ohe.​—Etu 15:22.

3. Ẹlịyẹ à tị́ jẹ́ bwu ẹla ọlẹ ká Ana, Dorin, bala Leilani ya?

³ Ịyẹ tị́ du kahị ka chị ọkẹkẹnị ụka ká angịkịla á da ọngọlẹ kahị kaa mẹ ịBayịbụụ jẹ ụbwọ? Wo ẹla ọlẹ ká Ana ko ri ọngọ kpa ụka nyamwụ wuu ya ẹrụ ọnyịịla ịị Moldova ya lẹẹ: “Jaabwọ ká ọngọlẹ kahị kaa jẹ́ ịBayịbụụ ta wẹẹ nwà, ọ kaa baba  nya ụbwọ ọdada lụmẹ-lụmẹ. O lujwo nya ọngọ ookpokpo kem ọ-ka jẹ́-ẹ họ ịbaba ịịwa wuu.” Dorin, ko ri ọngọ kpa ụka nyamwụ wuu ya ẹrụ ọnyịịla ẹ-ẹpwụma ọwọwẹ yẹkẹẹ: “Ụka lụmẹ-lụmẹ, aanahị ịkịla kaa ya ẹla ọlẹ kọ ka gu ọngọlẹ kam kaa mẹ ịBayịbụụ jẹ ọ-ọkịlẹtụ, ẹla ọlẹ kam dọmwụ ka me irya nya oyaya kpong-kpong ka.” Leilani ya ang odudu ọkịla: “Ọháha bala ẹhị ọ-kpa ju ọlẹ ká aanahị kaa mẹjọ́ọ ka jẹ́-ẹ dọọ ụbwọ nyọka jẹ́ nyori ahị à ri angịnyị nya iJihova ịnyịlẹhị lẹ.”​—Jọn. 13:35.

4. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

⁴ À tị ka me irya myị́, ‘Ányị m tị́ ka bwu da ọngịnyị ụbwọ nwà ka hu enyi Ohe káam à tị kaa mẹ ịBayịbụụ jọ́ọ ka?’ Ahị kụ ẹhị yẹ ang ọlẹ kahị ka jẹ́-ẹ họ kori kahị kpa ọọnahị ọhẹ chị kaka jẹ́ ịBayịbụụ ta ọngịnyị bala ang ọlẹ kahị ka jẹ́-ẹ họ kori ká ọngọọwa á dọmwụ nyọka ka ọjịra-jịra wẹẹ. Ahị ka yẹ ịnyịnyị jaabwọ ká angịgbahị nya ọjịra-jịra ka jẹ́-ẹ da ọngịnyị ụbwọ nwà ka hu enyi Ohe.

5. Ịyẹ à tị́ ri ụkụrwọ nyang kori ká ọọnahị ọhẹ á bying nyị kpọwa chị ka mẹ ang jẹ ọngịnyị?

⁵ Ụka nya ịBayịbụụ ọjẹ́jẹ, o ri ụkụrwọ nya ọngọmẹjẹ gụgụụgụ nyọka da ọngọlẹ kọ wẹẹ mẹ ịBayịbụụ jẹ ụbwọ nyọka wo etu nya Omyi Ẹla nya Ohe Oluhye. Kori ká ọngọmẹjẹ á bying ahụ nyị kpọwa chị kaka jẹ́ ang bala ọngịnyị, ụkụrwọ nyang ri ọ-ka dọọ ụbwọ ịnyị. (Ọngọ. 4:9, 10) Ịyẹ kpangga a tị́ ka họ nyọka dọọ ụbwọ ụka nya ịBayịbụụ ọjẹ́jẹ?

6. Ụka ká ja ka bajẹ bala ọngịnyị ka mẹ ịBayịbụụ jẹ, ányị a tị́ ka kpa ẹla ọlụpwụ nya Etu 20:18 họ ụkụrwọ?

⁶ Nwụlanọ gbe ịBayịbụụ ọjẹ́jẹ. Ọhọhẹ, byi ọngọmẹjẹ kọ ya ẹla u-uhye nya ọngọọwa jeng pyịnyẹng. (Wa Etu 20:18.) À ka jẹ́-ẹ too wo: “Ẹlịyẹ a tị́ jẹ́ u-uhye nya ọngọlẹ ká wẹẹ mẹ ịBayịbụụ jẹ? Egbeju nya ẹla oyina anụ tị́ wẹẹ ka jẹ́ kori kahị kele? Ịyẹ à tị́ tịtọ ká ọngọọwa ka jẹ́ kpa rụ alẹ? Ẹlẹhẹ ji kam ka ya lee o-yaya ka ụka nya ang ọjẹ́jẹ ọọwa? Ịyẹ à tị́ ka jẹ́-ẹ jwoo ọhụ nyọka nwà kịlahị?” Ọngọmẹjẹ á ka ya ẹla ịbaa nyamwụ jeng ka, ma ẹla ọlẹ kọ ka ya ka jẹ́-ẹ danụ ụbwọ myị́. Joy ko ri ọngọ kpa ẹrụ ọnyịịla pyẹ ẹ-ẹpwụma ọkịla kaa ya ẹla ọlịịwẹ bala angịlẹ kị bajẹ balọọ kaka mẹ ịBayịbụụ jẹ angịnyị. O yẹkẹẹ: “Ẹla ọlịịwẹ oyaya kaa du ká angịlẹ káam bala ịwa bajẹ kaa tịtọ nyọka da ọngọlẹ káam jẹ́ ịBayịbụụ ta ụbwọ bala ọ-jẹ́ ẹla ọlẹ kọ ka ya ụka nya ang ọjẹ́jẹ.”

7. Ịyẹ tị́ du ká baba nyọka nwụlanọ kori káahụ bala ọọnahị ọhẹ á bajẹ ka mẹ ịBayịbụụ jẹ ọngịnyị?

⁷ Kori ká bajẹ bala ọngịnyị ka mẹ ịBayịbụụ jẹ, ọ ka há kori ká nwụla ang ọlẹ kị wẹẹ ka jẹ́ nọ ịnyịnyị. (Ẹsịr. 7:10) Dorin, kahị ya ẹla rụ́ ene-ene yẹkẹẹ: “Ọ kaa myịm lẹhị ụka ká ọngọkịla nyam á nwụlanọ nya ang ọjẹ́jẹ. Ọọwa ka du kọ ka jẹ́-ẹ dọnụ wẹ ẹla ụ-ụgbẹyị o-pwokwu.” Datị hi ọọwa, ọ chịkpẹẹ  ká ọngọlẹ kanụ wẹẹ mẹ ang jẹ ka yẹ nyori anụ angị imimiiye nwụlanọ yẹẹyẹẹ, ọọwa tị ka ya ọgụ-ẹpẹtẹ ọnyịịla deeji họọ. Kori ká dọmwụ jẹ́ kụ ẹhị yẹ ang ọjẹ́jẹ ọọwa kpori-kpori ka wẹwẹ, maga ká kpa ẹhị nya ẹla ịkpọnchị ịlẹpwụ nya ang ọlẹ kanụ wẹẹ ka mẹjẹ ọ-ọkịlẹtụ.

8. Ányị a tị́ ka họ ká abwọ ọrịrị nyang lụka nya ang ọjẹ́jẹ ka la etu?

⁸ Abwọ ọrịrị ri ụpa ọkpọnchị nya ang ọjẹ́jẹ, lẹ kori kị bying nyị raabwọ, kụ irya nya ẹla ọlẹ ká ka ya nọ dẹẹ ene nya ụka. Kori ká họ ịnyị, abwọ ọrịrị nyang ka la etu gụ. (Eje. 141:2) Hanae kọ bwu Japan kpịtịya nya abwọ ọrịrị nya ọọnahị ọnyang ọhẹ ọlẹ kọ bajẹ bala ọngọ mẹ ịBayịbụụ jọ́ọ daalẹ wẹẹ. O yẹkẹẹ: “M̀ yẹ jaabwọ kọ ju iJihova chwẹẹ kaka ba, lẹ m̀ tịtọ nyọka lala ọwa ịnyịnyị. M̀ yẹ nyori m̀ họ́ọ yẹẹyẹẹ ịnyịnyị nyọlẹ kọ gu ẹnyị nyam ẹ-ẹpwụ nya abwọ ọrịrị ọọwa.”

9. Jaabwọ ká ụpwụ nya iJemsi 1:19 mẹjẹ, ịyẹ a tị́ ka jẹ́-ẹ họ nyọka dụbwọ ụka ká kpa ọngịnyị chị ka mẹ ịBayịbụụ jẹ?

⁹ Da ọngọmẹjẹ ụbwọ lụka nya ang ọjẹ́jẹ. Omamuyovbi kọ kaa kpa ụka nyamwụ wuu ya ẹrụ ọnyịịla ịị Nigeria yẹkẹẹ: “Ọọnahị ọlẹ kọ ka jẹ́-ẹ dang ụbwọ kaa ke ụrụ ụka nya ang ọjẹ́jẹ. Ọngọlịnyị kaa ya ẹla ọlẹ kọ ka dụbwọ, ma ọ́ kaa ya ẹla lụmẹ ka chajị ọ jẹ́ nyori o ri ụkụrwọ nya ọngọmẹjẹ nyọka kpịlahị.” Lẹ, ụka oyina a tị́ ka ya ẹla? Ịnyịnyị, ẹlịyẹ a tị́ ka ya? (Etu 25:11) Ke ụrụ kpẹnẹẹ jaabwọ ká ịwa angị imiiye wẹẹ ya ẹla. (Wa iJemsi 1:19.) Ụka ká họ ịnyị kẹnẹ-kẹnẹ a ka jẹ́-ẹ dụbwọ ụka ká ọbaba á ji lẹ. Á ka dụbwọ wẹwẹ, à baba nyọka kụ irya yẹẹyẹẹ ene á ka ya ẹla. Ọ-chụ pwokwita, á ka ya ẹla lụmẹ lee ọ-chị ọngọmẹjẹ ẹla, lee ọ-gba ẹla ọkịla kpehe ka. Ma à ka jẹ́-ẹ ya ẹla kpii, chụ ẹla pwokwita, lee ọ-tịtọ ẹla nyọka gba ẹhị nya ẹla ọlẹ kị wẹẹ mẹjọ́ọ kpehe. Ụka ọhẹ, à ka me irya nyori ọwa nyị́ la ẹla lụmẹ ka ya a-ang ọjẹ́jẹ ọọwa ka. Ma, kori ká da ọngọlẹ kanụ wẹẹ jẹ́ ang ta ọlẹẹkwaa bala ọ-mẹjẹ nyori à kpahị jwoo, ẹla ọtụka à wẹ ká họ nyọka dọọ ụbwọ nwà kịlahị lẹ.

10. Ányị oja nyang à tị́ ka jẹ́-ẹ da ọngọlẹ kọ wẹẹ jẹ́ ịBayịbụụ ụbwọ?

¹⁰ Joja nya ẹla ọlẹ kọ họ tang. Kori kọ ka dụbwọ, à ka jẹ́-ẹ ja ọngọlẹ kanụ wẹẹ mẹ ang jẹ oja nya abwọlẹ ká bwu jẹ́ ẹlịlẹhị, jaabwọ ká bwu kụrụ akama ọhẹ, lee abwọlẹ ká iJihova dang ụbwọ ọ-ọhịhị. (Eje. 78:4, 7) Ọhẹka oja nyang ọwẹ ka ri ang ọlẹ ká ọngọọwa baba. Ọ ka ju ọmyịmyị nyamwụ ọngịrị lee o-jwoo ọhụ nyọka kịnyaa la ọnwànwà gbee kọ ka hu enyi Ohe. Ọhẹka ọ ka mẹjọ́ọ jaabwọ kọ ka bwu kụrụ akama ọhẹ ọlẹ kọ la ụka ọwẹ. (1 Pit. 5:9) Gabriel bwu Brazil kọ kaa ye ịlahị nya ụgbẹyị lẹẹlẹẹ kpịtịya jaabwọ kọ ye apyobwuna ụka kọ wẹẹ jẹ́ ịBayịbụụ. O yẹkẹẹ: “Ụka kam wo oja nya aanahị, m̀ wẹ ka yẹ nyori iJihova jẹ́ akama ịlẹ kahị la. M̀ myịmyị yẹ nyori kori kị jẹ́  kụrụ akama ịwẹ aalẹ, am ịnyịnyị ka jẹ́-ẹ kụrụ ịnyam.”

11-12. Ịyẹ tị́ du kahị ka da ọngịnyị ọlẹ kọ wẹ ọjịra-jịra ọwụraba bwu ọkịlẹtụ?

¹¹ Kori ká ọngọ wẹẹ jẹ́ ịBayịbụụ á ka nwà kaka hu enyi Ohe aalẹ, ọ ka wẹ ọjịra-jịra ụka myị́ ụka bala o-ye apyobwuna bwu ẹpwụ nyaa. (Hib. 10:24, 25) Ọhẹka, ọngọmẹjẹ nyamwụ à ka wụrwọọ wẹ ọjịra-jịra ụka ọhọhẹ lẹ. Ụka kọ tị wẹ, ahị wuu ka jẹ́-ẹ jwoo ọhụ nyọka kịnyaa la ọwẹwẹ. Ányị ahị tị́ ka bwu họ ịnyị kpangga?

¹² Dọọ ọwụraba bwu ọkịlẹtụ. (Rom. 15:7) Kori ká ọngịnyị á yẹ nyori nyị dọwa ọwụraba wẹ ọjịra-jịra, ọhẹka ọ ka tịtọ nyọka wẹ kịlahị-ịlahị. La ọ-họ ká ịnyịrọ ka họọ wiri-wiri ka, dọnụ chọọ bwu ọkịlẹtụ bala ọ-kpọọ ka dọnụ chị angịkịla. A me irya nyori ọngọhẹ nyị dọọ ọwụraba lẹ ka; kele ka ya ẹla balọọ chajị ọhẹka ọngọ mẹ ịBayịbụụ jọ́ọ á ka pwụ eji lẹka lee ọhẹka o juwa họ ụkụrwọ ọhẹ u-Ube nya Ịpyị-Adịrahụ. Ke ụrụ kpẹnẹẹ ụka ko juwa ya ẹla, ká mẹjọ́ọ nyori à kpahị jwoo. Ányị ahụ ọ-dọọ ọwụraba à tị́ ka dọọ ụbwọ? Yẹ ẹla ọlẹ kọ họ ta Dmitrii kọ hu enyi Ohe ẹka ịmanyị-ịmanyị kẹkpẹ, kọ tị ri ọngọ myị ẹrụ ọọjịra-jịra lẹẹlẹẹ wẹẹ. Ọ kpịtịya nya ụka ọhọhẹ ọlẹ kọ ka ọjịra-jịra, o yẹkẹẹ: “Ọọnahị ọlẹng ọhẹ yẹm kam godayị rịrị odehe luko ọchịchị, ọọwa lẹ ọ warị kaka kpam ka ẹpwang ẹẹ. Angịnyị lụmẹ-lụmẹ warị kaka dọnụ chịm. Ọ lam ẹbyẹbyị lụmẹ. Ẹla ọọwa kpụm ịpyọ gbee du kam tịtọ ká ọjịra-jịra ka ji ẹnẹnẹẹnụ. Ḿ yẹ ịngịngịhyẹ ọlịịwẹ ẹ-ẹga ọkịla ẹnẹnẹhẹ lẹka.”

13. Ányị abwẹla nyang à tị́ ka jẹ́-ẹ gu ọngọlẹ kọ wẹẹ jẹ́ ịBayịbụụ?

¹³ Ya ọgụ-ẹpẹtẹ ọnyịịla deeji họọ. Abwẹla nyang ka jẹ́-ẹ da ọngọọwa ụbwọ nyọka jẹ́ myị̀myị̀ nyori ọ ye ẹlịlẹhị lẹ. (Mat. 5:16) Vitalii ko ri ọngọ ye ịlahị nya ụgbẹyị lẹẹlẹẹ ịị Moldova yẹkẹẹ: “M̀ yẹ abwẹla nya angịkịla ịla ọjịra-jịra bala abwọlẹ kị kaa hịhị bala ọ-kụ irya. Ọọwa mẹjẹ́m nyori Alibeenu nya iJihova kaa jẹdịyẹ bala Ohe Oluhye ịnyịlẹhị.”

14. Ányị ọgụ-ẹpẹtẹ nyang à tị́ ka jẹ́-ẹ da ọngịnyị ụbwọ nwà kịlahị nyọka hu enyi Ohe?

¹⁴ Kori ká ọngọlẹ kahị wẹẹ mẹ ịBayịbụụ jẹ á ka jẹ́-ẹ nwà ka hu enyi Ohe aalẹ, ọ baba nyọka kpa ẹla ọlẹ kọ wẹẹ jẹ́ họ ụkụrwọ. Ẹlẹwẹ-ẹ́ kaa chịkpẹẹ lụmẹ ka. Ma, ụka kọ yẹ jaabwọ ká ye apyobwuna bwula ọ-kpa ẹla ọlẹpwụ nya ịBayịbụụ họ ụkụrwọ, ọ ka tịtọ nyọka ba ọgụ-ẹpẹtẹ nyang jẹ. (1 Kọr. 11:1) Kụ ẹhị yẹ ẹla ọlẹ kọ họ ẹ-ẹga nya Hanae kahị ya ẹla nyamwụ ene lalẹ wẹẹ. O yẹkẹẹ: “Aanahị alẹng bala anyang kaa kpa ẹla ọlẹ kam wẹẹ jẹ́ họ ụkụrwọ ene-ene lẹ. M̀ yẹ jaabwọ kam ka jẹ́-ẹ ju angịkịla ọhụ bala ọ-hịnyọhi haa bala abwọlẹ kam ka bwu mẹ ọháha jẹ. Ị kaa ya ẹla ọnyịịla u-uhye nya angịkịla. M̀ tịtọ nyọka ba ọgụ-ẹpẹtẹ nyaa jẹ.”

15. Ányị ụpwụ nya Etu 27:17 à tị́ dahị ụbwọ nyọka jẹ́ ang odudu kahị baba nyọka wu ọngọlẹ kahị kaa mẹ ịBayịbụụ jẹ igu jaabwọ kọ wẹẹ wẹ ọjịra-jịra?

 ¹⁵ Woo igu. Jaabwọ ká ọngọọwa wẹẹ wẹ ọjịra-jịra, kịnyaa la ọ-mẹjọ́ọ nyori à kpahị jwoo. (Filip. 2:4) À ka jẹ́-ẹ maga nyọka jọ́ọ gụ ọọwa. À ka jẹ́-ẹ joo obe nya ang ịlẹ kọ yẹda ọ-ọhịhị nyamwụ. À ka jẹ́-ẹ tọọ ẹla wo ịnyịnyị u-uhye nya ịBayịbụụ ọjẹ́jẹ nyamwụ, ugbiyegu nyamwụ, bala ụkụrwọ nyamwụ. Tị dụmwọ-dụmwọ ká tọọ ịtọ ẹla ịlẹ kị ka hu oyoyi jwoo ka. Ẹla oyaya ọlịịwẹ ka jẹ́-ẹ tụ́ụnụ ju awụlẹ chwẹẹ. Ụka ká woo igu, à wẹẹ dọọ ụbwọ nyọka nwà ka hu enyi Ohe. (Wa Etu 27:17.) Hanae kaa ye ịlahị nya ụgbẹyị lẹẹlẹẹ lẹ. O ya ẹla ọlẹ u-uhye nya ụka ọlẹ kọ dọmwụ nyọka ka ọjịra-jịra: “Jaabwọ kam wẹẹ la aligu ẹ-ẹpwụ nya ọjịra-jịra, m̀ dọmwụ nyọka charịnya nya ọ-ka ọjịra-jịra. Ụka ká ịnyịrọ á chịm pyẹpyẹ wẹwẹ, m̀ kaa ka. Ọ kaa kpụm ịpyọ nyọka juwa bala aligu nyam inyeewe, ọọwa tị dam ụbwọ nyọka chị igu oriri nyam eju bala angịlẹ kị kaa gbịgba ha iJihova ka. M̀ tịtọ nyọka tụ́ ju iJihova bala aaanam chwẹe gụ ọwọwa. Lẹ, m̀ cheje nyọka hu enyi Ohe.”

16. Ang ọkịla oyina a tị́ ka jẹ́-ẹ họ chajị ká ọngọlẹ kọ wẹẹ jẹ́ ịBayịbụụ ka chị ọkẹkẹnị ọọjịra-jịra?

¹⁶ Jaabwọ ká ọngọlẹ kahị kaa mẹ ịBayịbụụ jẹ wẹẹ nwà bala o-juwa yẹ ọhịhị nyamwụ da, họ kọ yẹ ịlọmwụ lala ụpa nya ọjịra-jịra. À ka jẹ́-ẹ họ ịnyị bwula ọ-họọ ụga. (Hib. 13:2) Denis bwu Moldova kpịtịya nya ụka ọlẹ kọ wẹẹ kpa ịBayịbụụ jẹ́ wẹẹ, o yẹkẹẹ: “Ụka lụmẹ-lụmẹ aanahị wụrụm am bala ahụ nyam kaka bịrị ụka balaa. Ị ya jehi jaabwọ ká iJihova daa ụbwọ ọ-ọhịhị. Ọọwa juhi ọhụ. Ụka ịlịnyị dahị ụbwọ nyọka jẹ́ myị̀myị̀ nyori ahị tịtọ nyọka gbịgba ha iJihova bala o-ri ọhịhị nyahị ka kpịpyọ yẹẹyẹẹ kori kahị họ ịnyị.” Ụka ká ọngọhẹ ọlẹ kahị kaa mẹ ịBayịbụụ jẹ á ri ọngọ kpa ẹrụ ọnyịịla pyẹ, à ka jẹ́-ẹ wụrwọọ kanụ ka kpehe nya ẹrụ ọnyịịla lawụlẹ. Ọọnahị Diego bwu Brazil yẹkẹẹ: “Aanahị lụmẹ-lụmẹ kaa wụrụm kahị ka kpa ẹrụ ọnyịịla pyẹ lawụlẹ. Ụgbẹyị ọlẹ kam kaa bwu jáa gụ ọwọwa kọ tị há gụ wuu à wẹ lẹ. Jaabwọ kam wẹẹ họ ịnyị, m̀ jẹ́ ang yẹẹyẹẹ, m̀ tị tụ́ ju iJihova bala iJisọsị chwẹẹ gụ ọwọwa ịnyịnyị.”

17. Ányị angịgbahị nya ọjịra-jịra à tị́ ka jẹ́-ẹ da angịlẹ kị kaa jẹ́ ịBayibụụ ụbwọ?

¹⁷ Ya ụka họọ. Angịgbahị nya ọjịra-jịra, kori kanụ mẹjẹ ọngịnyị nyori ọ háanụ bala o-ri anụ kpahị jwoo, ọọwa ka jẹ́-ẹ dọọ ụbwọ nyọka nwà ka hu enyi Ohe. À ka jẹ́-ẹ ya ẹla balaa ọọjịra-jịra ụka myị́ ụka? Ị ka jẹ́ nyori à kpahị jwaa kori ká kpịtịya nya ẹnyị nyaa, ọgụgụụgụ ri ụka kị dọmwụ nyọka wẹ ẹla. À ka jẹ́-ẹ mwahị nya ụka nyọka bajẹ bala ọọnahị ọhẹ kaka mẹ ịBayịbụụ jẹ ọngịnyị? Ọhẹka à ka jẹ́-ẹ da ọngọlẹ  kọ wẹẹ mẹ ịBayịbụụ jẹ ụbwọ gụ abwọlẹ ká me irya. Jackie kọ ri ọngọ ye ịlahị nya ụgbẹyị bwu Nigeria yẹkẹẹ: “Ọ kaa la angịhyẹ ịlẹ kam kaa mẹ ang jẹ ẹbyẹbyị ụka kị jẹ́ nyori ọngọlẹ káam bala ọwa bajẹ nyị ri ọngọgbahị nya ọjịra-jịra. Ọngọhẹ nyaa yẹkẹẹ: ‘ỊPasịtọ nyahị-ị́ ka myị-ị̀ họ ịnyị ẹnẹnẹhẹ ka. Alụdụ kem ọ kaa ju ụga lẹ, ị tị kaa nwọọ uri ene!’ ” Ọngọọwa kaa wẹ ọjịra-jịra lẹẹlẹẹ lẹ.

18. Ányị angịgbahị nya ọjịra-jịra à tị́ ka kpa ẹla ọlụpwụ nya Ụkụrwọ nya Alẹrụ 20:28 họ ụkụrwọ?

¹⁸ Mẹ ang jẹ aanahị bala o-jwaa ọhụ. Angịgbahị nya ọjịra-jịra, anụ la ụkụrwọ ọtụka-ọtụka nyọka mẹjẹ aanahị jaabwọ kị ka bwu kpa ẹrụ ọnyịịla pyẹ bala ọ-mẹ ang jẹ yẹẹyẹẹ. (Wa Ụkụrwọ nya Alẹrụ 20:28.) Kori kọ la ọngịnyị oyoyi nyọka mẹ ang jẹ ị-ịlahị nyang, tọọ wo kori ká ka jẹ́-ẹ mẹ ang jẹ ku ọmwakpa nyamawụ ụka ọlịnyị. Jackie kahị wo ẹla nyamwụ ene-ene myịmyị yẹkẹẹ: “Angịgbahị kaa tọm wo nya angịlẹ kam kaa mẹ ịBayịbụụ jẹ pyịyọọ. Ụka kam la akama ọhẹ u-uhye nya ịBayịbụụ ọjẹ́jẹ, ị kaa jum irya ọlẹ kọ ka dam ụbwọ.” Angịgbahị ka jẹ́-ẹ họ ang lụmẹ-lụmẹ nyọka ju angịmẹjẹ ọhụ. (1 Tẹs. 5:11) Jackie myịmyị yẹkẹẹ: “Ọ kaa kpụm ịpyọ ụka ká angịgbahị á jum ọhụ bala o-byim nyori ụkụrwọ nyam nyị myẹhị. Omyi ẹla ịlịịwẹ kaa kpụm ọkịlẹtụ nyii lala enyi onyirii-nyiri ụka nya ụrwẹnụ. Omyi ẹla ọdụmwọ nyaa kaa dam ụbwọ nyọka yẹ nyori ụkụrwọ ọnyịịla m wẹẹ họ ị-ịBayịbụụ ọmẹjẹ nyam lẹ, ọọwa kaa du kam myịmyị kaa chị ọkẹkẹnị gụ ọwọwa.”​—Etu 25:25.

19. Ịyẹ à tị́ ka jẹ́-ẹ ya ọkẹkẹnị hahị wuu?

¹⁹ Kori kahị dọmwụ kaa mẹ ịBayịbụụ jẹ ọngịnyị lẹẹlẹẹ ka wẹwẹ, ahị ka jẹ́-ẹ da ọngịnyị ụbwọ nyọka nwà ka hu enyi Ohe. Ahị ka jẹ́-ẹ da ọngọmẹjẹ ụbwọ bwula ẹla oyaya nyahị lụka nya ang ọjẹ́jẹ, la o-noo ang ọjẹ́jẹ ọọwa ka. Ahị ka jẹ́-ẹ wu ọngọọwa igu ụka kọ wẹ ọjịra-jịra bala ọ-ya ọgụ-ẹpẹtẹ ọnyịịla deeji họọ. Angịgbahị nya ọjịra-jịra tị ka jẹ́-ẹ ju ọngọlẹ kọ wẹẹ jẹ́ ịBayịbụụ ọhụ bwula ọ-ya ụka họọ bala o-ju ọngọmẹjẹ ọhụ ịnyịnyị bwula ọ-mẹ ang jọ́ọ bala ọ-dọọ ọlẹẹkwaa. Ahị kaa chị ọkẹkẹnị lụmẹ ụka kahị họ ịngịhyẹ nyọka da ọngịnyị ụbwọ wẹ ka la ọháha ha iJihova bala ọ-gbịgba họọ, kori ká ang ọọwa á dọmwụ la pyịnyẹng wẹwẹ.