1. Akama ụma ịlányị angịnyị nya iJihova à tị́ ka la myị́?

À JUWA ẹ-ẹpwụ nya akama ọnyaa-nyaa ọhẹ lẹẹlẹẹ? Ọhẹka, ọngọhẹ ẹ-ẹpwụ nya ọjịra-jịra họ ẹla wụng ẹjẹ. (Jem. 3:2) Lee ọhẹka ala ọlụkụrwọ lee alube-ụpwụ nyang kaa kpang họ nyọlẹ ká wẹẹ gbịgba ha iJihova. (1 Pit. 4:3, 4) Lee ọ ka chịkpẹẹ myị́ nyori alugbiyegu nyang juwa maga nyọka hung abwọ là ọ-ka ọjịra-jịra lee ọ-ka ya ẹla je angịkịla u-uhye nya ọmyịmyị nyang. (Mat. 10:35, 36) Kori ká ọmayẹ á la ọngịrị lụmẹ, ọ ka lang lala o-ri nyị ka há gụ́ nyọka hwabwọ là ọ-gbịgba ha iJihova. Ma, jẹ́ myị̀myị̀ nyori abwọ myị́ abwọ ká ọmayẹ nyang á la ọngịrị kaka ba, iJihova kà ya ẹla ọjẹ́jẹ ọlẹ ká kà kpa cheje ọnyịịla bala ọngịrị ọlẹ ká kà kpa bọhụ ẹ-ẹpwụ nyamwụ hang.

2. Jaabwọ ká ụpwụ nya Ala iRom 15:4 ya, ányị Ụpwụ Ịgọgọ ọwawa à tị́ kaa dahị ụbwọ?

² IJihova ya oja lụmẹ-lụmẹ juwa ẹ-ẹpwụ nya ịBayịbụụ, ịlẹ kị mẹjẹ nya abwọlẹ ká angịnyị ehe ịlẹ kị la kpẹẹkpẹẹ ka jẹ́ bọhụ ẹ-ẹpwụ nya akama. Ịyẹ à tị́ du? Chajị kahị kà jẹ́ ang bwu ẹga nyaa. Ẹla ọlẹ ká iJihova gu ọlẹrụ ịPọlụ gbịla kọ da à wẹ lẹ. (Wa Ala iRom 15:4.) Ụka kahị wa oja ịlịịwẹ, ahị kaa ye ọhụ ojuju bala ahị ọdahile. Ma nyọka ye apyobwuna, ọ́ ka ba ị-ịBayịbụụ ọwawa ịịwẹ kem ka. O ri o-pyii kahị ka ya iwe da ká ẹla ọlẹpwụ nya ịBayịbụụ ka guhi ọ-ọkịlẹtụ bala abwọlẹ kahị kaa kụ́ irya. Ọ-chụ pwokwita, ịyẹ ahị tị́ ka họ kori kahị baba nya ẹla ọmẹjẹ u-uhye nya akama ọlẹ kahị la? Ahị kà jẹ́-ẹ ba ọgụ-ẹpẹtẹ ine ịlẹ jẹ: (1) Raabwọ, (2) Kpa ẹhị nya olegu yọyị, (3) Kụ́ irya ju ẹla, bala (4) Kpa họ ụkụrwọ. Ahị ya ẹla u-uhye nya ang ọlẹ kahị kà họ ẹ-ẹpwụ nya ọgụ-ẹpẹtẹ ọnyị myị́ ọnyị lẹpwụ nyaa wẹẹ. * Ọọwa  lẹ, ahị ka kpa ụgbẹyị nya ang ọjẹ́jẹ ịwẹ jẹ́ ang bwu ẹpwụ nya ang ịlẹ kị họ ọ-ọhịhị nya Adịrahụ iDevidi bala ọlẹrụ ịPọlụ lẹlẹ.

3. Ene á ka dọmwụ nya ịBayịbụụ ọwawa, ịyẹ a tị́ ka họ? Ịyẹ à tị́ du?

³ (1) Raabwọ. Ene á ka dọmwụ nyọka wa ịBayịbụụ, bịlẹ iJihova kọ dang ụbwọ nyọka yẹ abwọlẹ á ka bwu ye apyobwuna bwu ẹpwụ nya ẹla ọlẹ ká wẹẹ ka wa. Ọ-chụ pwokwita, kori ká ja mwahị nya ẹla ọjẹ́jẹ u-uhye nya abwọlẹ á ka bwu họ ẹ-ẹpwụ nya akama ọhẹ, bịlẹ iJihova kọ dang ụbwọ nyọka ye itiwe nya ehile bwu ẹpwụ nya Omyi Ẹla nyamwụ ịlẹ kị ka kpang ụgbẹyị.​—Filip. 4:6, 7; Jem. 1:5.

4. Ịyẹ à tị́ ka dang ụbwọ ká ẹla ọla ịBayịbụụ ka lang gede-gede gụ́ olene?

⁴ (2) Kpa ẹhị nya olegu yọyị. IJihova ya āhị nyọka jẹ́-ẹ kpa ẹhị nya olegu yọyị hahị. Nyọka jẹ́ ang bwu ẹpwụ nya oja ịla ịBayịbụụ yẹẹyẹẹ, maga ká kpa ẹhị nya olegu yẹ ang ọlẹ kọ wẹẹ họ ká yẹ ịlọng lala o-ri ahụ à ri ọngọlẹ ká wẹẹ wa oja nyamwụ lẹ. Maga ká yẹ ang ịlẹ ká ọngọọwa yẹ bala o-me irya jaabwọ ọlẹ kọ lang ká ọngọọwa ka me.

5. Ịyẹ à tị́ ri etu nyọka kụ́ iryu ju ẹla? Ányị a tị́ ka bwu kụ́ irya ju ẹla ọlẹ ká wa?

⁵ (3) Kụ́ irya ju ẹla. Ọ-ka kụ́ irya ju ẹla ri ọ-ka me irya rige-rige u-uhye nya ẹla ọlẹ ká wa bala abwọlẹ ká ẹla ọọwa gung. Ọ kaa dang ụbwọ nyọka ya ẹhị nya ẹla ọhẹ bala ọkịla da ori wu awụlẹ bala ọ-ka wo etu nya egbeju nya ẹla ọọwa kpori-kpori. Kori ká wa ịBayịbụụ ká tị kụ́ irya jwoo kpori-kpori ka aalẹ, a ka lala ọngịnyị ọlẹ kọ la ang nya ịnẹpwa ịlẹ wuu kọ ka kpa kpụ́ ang, kọ tị ya ang ịịwa ju ang oriri chọnụ ka. Ang oriri ọọwa-á ka lịpyọ jaabwọ kọ chịla ka. Ụ-ụgbẹyị ọlịnyị-ịnyị, ụka kahị kụ́ irya kpori-kpori ju ẹla ọlẹ kahị wẹẹ wa bwu ịBayịbụụ ka, áhị ka jẹ́ jaaabwọ ká ẹla ịlụwa dori wu awụlẹ ka. Nyọka dang ụbwọ kụ́ irya ju ẹla, a ka tọ ịlọng ịtọ ẹla ịlẹ bala ọ-maga nyọka ye ọwẹwẹ nyaa myị́: ‘Ịyẹ ọngọlẹ kam wẹẹ wa oja nyamwụ à tị́ họ nyọka da ịlọmwụ ụbwọ? Ányị iJihova à tị́ dọọ ụbwọ? Ányị m tị́ ka kpa ẹla ọlẹ kam jẹ́ wẹ da ịlọm ụbwọ nyọka bọhụ ẹ-ẹpwụ nya akama?’

6. Ịyẹ tị́ du kahị kà kpa ẹla ọlẹ kahị jẹ́ bwu ịBayịbụụ họ ụkụrwọ pyii?

⁶ (4) Kpa họ ụkụrwọ. IJisọsị ya nyori kaahị nyị́ kpa ẹla ọlẹ kahị jẹ́ họ ụkụrwọ ka aalẹ, ahị nyị lala ọlẹng ọlẹ kọ nwụ́ ube nyamwụ u-ugburuja. Ọ họ ụkụrwọ yẹẹyẹẹ ịnọ, ma ọ tị kpa abwọ nwụ́ ododu. Ịyẹ à tị́ du? Chajị ụka ká igbachịwụ ọnyọọngịrị bala enyi á wẹ ka mịla ẹpwa ọọwa nmoo, ọ ka tụrụ ju eji bwuje-bwuje. (Mat. 7:24-27) Ụ-ụgbẹyị ọlịnyị-ịnyị, kori kahị raabwọ, kpa ẹhị nya olegu yọyị, bala ọ-kụ́ irya ju ẹla ọlẹ kahị wa, kahị tị kpa ẹla ọlẹ kahị jẹ́ họ ụkụrwọ ka aalẹ, ahị kpa abwọ nwụ́ ododu tịtị wẹẹ. Ụka kahị ju ka ẹpwụ nya akama lee kori kị tụụhị pyịpyị, ọmyịmyị nyahị á ka la ọngịrị nwà ka. Ma, ụka kahị wa ịBayịbụụ kahị kpa ẹla ọlẹ kahị jẹ́ bwuwa họ ụkụrwọ, ahị jẹ́-ẹ cheje ịnyịịla, ahị kaa la okpunyi gụ́ olene, ahị tị kaa la ọmyịmyị ọnyọọngịrị gụ́ ọọwa ịnyịnyị. (Ayị. 48:17, 18) Ahị kpa ọgụ-ẹpẹtẹ ine ịlẹ kahị ya ẹla u-uhye nyaa wẹ kụ́ ẹhị yẹ ang ọlẹ kahị kà jẹ́ bwu ẹla ọlẹ kọ họ ọ-ọhịhị nya Adịrahụ iDevidi wẹẹ.

7. Oja nya owo ahị tị́ wẹẹ ka kụ́ ẹhị yẹ bwu ịBayịbụụ ugbẹnyị?

⁷ Oligu lee olugbiyegu nyang ọhẹ họ ẹla wụng ẹjẹ? Ó ri ịnyị aalẹ, ịngịhyẹ ọlẹ kọ kà dang ụbwọ ri ọ-kụ ẹhị yẹ ang ọlẹ ká Adịrahụ iDevidi họ ụka ọlẹ ká Abụsalọm ọnyị nyamwụ họ ẹla wọọ ẹjẹ bala ọ-maga nyọka ri adịrahụ.​—2 Sam. 15:5-14, 31; 18:6-14.

8. Ẹlịyẹ a tị́ ka họ nyọka ye ụbwọ ọdada nya iJihova?

⁸ (1) Raabwọ. La oja ọwẹ i-irya, ya je iJihova jaabwọ ká ẹla ọtịpyọ ọlẹ kị họ ẹ-ẹga nyang wẹ lang. (Eje. 6:6-9) Ya je iJihova jaabwọ ká ẹla  ọọwa lang kpangga. Ọọwa lẹ, a bịlẹ iJihova kọ ka dang ụbwọ nyọka yẹ itiwe nya ehile ịlẹ kị kà kpang ụgbẹyị nyọka jẹ́ ang ọlẹ ká kà họ lẹlẹ.

9. Ịyẹ à tị́ họ ẹ-ẹpwarịrị nya iDevidi bala Abụsalọm?

⁹ (2) Kpa ẹhị nya olegu yọyị. Kụ́ irya u-uhye nya abwọlẹ ká oja ọọwa la wuu, ká kụ́ irya u-uhye nya ang ọlẹ ká ẹla ọọwa họ ẹ-ẹga nya Adịrahụ iDevidi ịnyịnyị. Abụsalọm ọnyị nya iDevidi maga ẹ-ẹpwụ nya ẹka lụmẹ-lụmẹ nyọka họ ká ẹla nyamwụ ka há angịnyị. (2 Sam. 15:7) Ụka ká Abụsalọm yẹ nyori ụka nyị pwoku lẹ, ọ du iru nya angịnyị ẹrụ ịbaa-ịbaa tụ́ epweji nya Isirelụ da wuu chajị kị ka họ ká angịnyị ka yoo myị nya adịrahụ nyaa lẹlẹ. Ọ pịrị Ahitofẹlụ oligu nya iDevidi o-chii ọlẹ kọ kaa jwoo irya, nyọka yẹjulọọ ẹ-ẹpwụ nya egbeju ọngịrị nyamwụ. Abụsalọm ya ịlọmwụ dodehe nya adịrahụ, bala ọ-maga nyọka wu iDevidi kọ ka nwọọ ụka ọlẹ kọ lala o-ri nyị jụ́ ẹdụrụ nyịlẹhị-lẹhị. (Eje. 41:1-9) Nyọlẹ ká iDevidi wẹ ka jẹ́ ẹla ọlẹ ká Abụsalọm wẹẹ họ, ọ kpa ịlọmwụ be rụ hi iJerusalẹm. Ọọwa lẹ, alẹwụ nya Abụsalọm à ma uya tọ alẹwụ nya iDevidi lẹlẹ. Ị nwụ Abụsalọm ọnyị nya iDevidi, alẹwụ nyamwụ tị mịleji ịnyịnyị.

10. Ẹlịyẹ Adịrahụ iDevidi à tị́ ka họ ịnọ myị́?

¹⁰ Ọ-ba ọọwa ba, kụ́ irya jaabwọ kọ ka la iDevidi nyọlẹ ká ẹla ịwẹ wuu wẹẹ họ tọọ wẹẹ. Abụsalọm họ́ọ, ọ tị dahịhile Ahitofẹlụ ịnyịnyị. Ma, ịwa angị imimiiye tị pịrọọ ha. Ị họ ẹla wụ iDevidi ẹjẹ yẹẹyẹẹ bala ọ-dọmwụ maga nyọka nwọọ. Ahị ọdahile ka gụ iDevidi myị́ bwu ẹga nya aligu nyamwụ ịkịla, la irya nyori ịwa ịnyịnyị ka yẹjula Abụsalọm lẹ ịnọ myị́. Ọ ka kụ irya nya ịlọmwụ-ịlọmwụ kem kpụ ọ ka maga nyọka rụnyẹ rụ bwu ẹpwụma ọwẹ ụbwọọmwụ myị́. Lee ọkịlẹtụ ka kpọọ enyi kpụ abwọ ka pwọ́ọ pwọọọ ịnọ myị́. Ma, iDevidi á họ ọlọlọhẹ lẹpwụ nya ịwẹ ka. Ọkọkọ nyọọwa, ọ jẹ́ be ọmayẹ olujwo ọwẹ myị́. Ịyẹ tị́ du kọ jẹ́ họ ịnyị myị́?

11. Ányị iDevidi à tị́ họ ẹ-ẹpwụ nya akama olujwo ọwẹ?

¹¹ (3) Kụ́ irya ju ẹla. Itiwe nya ehile iyina a tị́ ka jẹ́-ẹ jẹ́ bwu oja ọwẹ? Wẹ ịtọ ẹla ọlẹ, “Ịyẹ iDevidi à tị́ họ nyọka da ịlọmwụ ụbwọ?” IDevidi á juhi bala ọ-chị agaga kaka họ ẹla okpolo ka. Ọ́ tị juhi kpoye kpụ ọ jẹ́ cheje nya ẹla ọlẹ kọ ka họ ka lẹ ka. Ọkọkọ nyọọwa, ọ raabwọ ha iJihova kọ ka dọọ ụbwọ. Ọ byi aligu nyamwụ nyị dọwa ụbwọ ịnyịnyị. Ọ tị họ ẹla ọlẹ kọ cheje nyọka họ i-ijata ịnyịnyị. Ịlẹhị lẹ, ẹla ọwẹ jụ́ iDevidi yẹẹyẹẹ, ma ọ́ hwabwọ la ọ-ka dahịhile angịkịla ka, ọ tị dọmwụ nyọka baa ẹtẹ ka. Ọ kịnyaa la ọ-ka dahịhile iJihova bala ọ-dahịhile aligu nyamwụ.

12. Ịyẹ iJihova à tị́ họ nyọka da iDevidi ụbwọ?

¹² Ányị iJihova à tị́ da iDevidi ụbwọ? Bwula ọ-mwahị nya ẹla u-uhye nya oja ọwẹ, à ka yẹ nyori iJihova ya ọngịrị ọlẹ ká iDevidi baba nyọka bọhụ ẹ-ẹpwụ nya akama ọwẹ họọ. (Eje. 3:1-8; ẹla oluhye-ọgba) IJihova wahị kụrụ eje ọchịchị nya iDevidi. Ọ tị da aligu nya iDevidi ụbwọ ụka ọlẹ kị wẹẹ ma uya nyọka chị ewu ke adịrahụ nyaa ịnyịnyị.

13. Ányị à tị́ ka gbịla iDevidi kori ká ọngịnyị á họ ẹla ọhẹ wụng ẹjẹ nyịlẹhị-ịlẹhị? (ỊMatiyu 18:15-17)

¹³ (4) Kpa họ ụkụrwọ. Tọ ịlọng wo, ‘Ányị m tị́ ka jẹ́-ẹ gbịla iDevidi?’ Họ ẹla i-ijata nyọka myị́ akama ọọwa. Bwula abwọlẹ ká iwe-ahụrụ ọọwa la, à ka jẹ́-ẹ ba ẹla ọlẹ ká iJisọsị ya ụ-ụpwụ nya ịMatiyu egbeju 18 jẹ kpụrụrụ lee ọ-ba itiwe nya ehile ọlụwa jẹ myị́. (Wa ịMatiyu 18:15-17.) Ma, a tị cheje nya ẹla la agaga ụka ká juwa ju agbama ka. Raabwọ ha iJihova kọ dang ụbwọ nyọka tọ́ọtụ pịlẹẹ bala ọ-ka jẹ́ ẹla ọlẹ á ka họ. A hwabwọ là ọ-ka dahịhile aligu nyang ka. Ọkọkọ nyọọwa, nwụlano nyọka ye ụbwọ ọdada nyaa myị. (Etu 17:17) Ọlẹ kọ tị baba gụ wuu, ba ẹla ọlẹ ká iJihova wẹẹ mẹjẹ́ng bwu ẹpwụ nya Omyi Ẹla nyamwụ jẹ.​—Etu 3:5, 6.

14. Ụka ọlányị ẹla ọlụpwụ nya 2 iTimoti 1:12-16; 4:6-11, 17-22 à tị́ ka jung ọhụ myị́?

¹⁴ Alugbiyegu nyang juwa tụng pyịpyị chajị nyori a wẹẹ gbịgba ha iJihova? Lee à tị́ juwa ẹ-ẹpwụma ọlẹ kị hu ụkụrwọ nyahị ịhyẹ abwọ lee ọ-dọmwụ taa ịwa wuu ku? Ó ri ịnyị aalẹ, à ka ye ọhụ ojuju myị́ bwula ọ-wa 2 iTimoti 1:12-16 bala 4:6-11, 17-22. * ỊPọlụ da ẹla ịla ọgba ịwẹ ụka ọlẹ ko juwa u-ube nya agba.

15. Ịyẹ a tị́ ka bịlẹ bwu ẹga nya iJihova myị́?

¹⁵ (1) Raabwọ. Ene ká ka wa oja ọwẹ, ya ẹla ọlẹ kọ ri akama nyang bala abwọlẹ kọ lang je iJihova. Ya ẹla ọọwa kpangga joo. Ọọwa lẹ, a bịlẹ iJihova kọ ka dang ụbwọ nyọka yẹ itiwe nya ehile ịhyẹ bwu oja nya ịmayẹ nya ịPọlụ ịlẹ kị ka dang ụbwọ nyọka jẹ́ ẹla ọlẹ á ka họ ẹ-ẹpwụ nya iwe-ahụrụ nyang ẹẹ.

16. Ẹlịyẹ à tị́ họ ta ịPọlụ?

¹⁶ (2) Kpa ẹhị nya olegu yọyị. Kụ irya nyori ahụ à ri ịPọlụ lẹ. Ọ juwa u-ube nya agba i-iRom. Ị kpọọ ka agba ẹnẹhẹ lẹ, ma ugbẹnyị lẹ ọ jẹ́ myị̀myị̀ nyori nyị ka nwọwa. Aligu nyamwụ ịhyẹ nyẹẹkpẹ dọọ, ịnyịrọ tị chọọ pyẹpyẹ ịnyịnyị.​—2 Tim. 1:15.

17. Ẹlịyẹ ịPọlụ à tị́ ka họ ịnọ myị́?

¹⁷ ỊPọlụ kà ya ẹhị rịrị kẹkpẹ, juwa me irya nyori ọwa nyị́ họ ụkụrwọ nya Ohe Oluhye la ila ọchịchị ka ịnọ lẹẹ, nyị́ ka wu ọwa ju agba ka myị́. Ọ ka ju agbama tọ aanamwụ ilepweji nya Echiya ịlẹ kị nyẹẹkpẹ dọọ, bala ọ-ka hwabwọ là ọ-dahịhile aligu nyamwụ ịkịla myị́. Ma, ịPọlụ á tị họ ọlọlọhẹ lẹpwụ nya ịwẹ ka. Ịyẹ à tị́ du kọ jẹ́ myị̀myị̀ nyori aligu nyamwụ ịwẹ ka godayị giri-giri balọọ wẹẹ bala o-ri iJihova ka nwọọ uri?

18. Ẹlịyẹ ịPọlụ à tị́ họ ẹ-ẹpwụ nya ọmayẹ ọlẹ kọ chịpwụrụ bwu?

¹⁸ (3) Kụ́ irya ju ẹla. Wẹ ịtọ ẹla ọlẹ, “Ányị ịPọlụ à tị́ da ịlọmwụ ụbwọ?” Nanana nyori uhi ji ẹpwụ nya ịPọlụ u-uhye nya igu ọlẹ kọ wẹẹ ka gbu, ọ́ deeri nyori ọ baba nyịlẹhị-ịlẹhị nyọka kpa ogbo wẹ iJihova ka. Ọ tị kịnyaa là ọ-ka kụ́ irya u-uhye nya abwọlẹ kọ ka ju angịkịla ọhụ ịnyịnyị. Ọ kpụnịrọ iJihova bwula abwọ ọrịrị ụka myị́ ụka. (2 Tim. 1:3) ỊPọlụ á kịnyaa là ọ-ka ya irya nọ u-uhye nya aanamwụ ịlẹ kị nyẹẹkpẹ dọọ ka. Ọkọkọ nyọọwa, ọ ya nyori ụgbẹyị ọlẹ ká aligu nyọwa nyị dọwa ụbwọ la ọháha nyị myị̀ ọwa lẹhị. Ọ-da ọọwa u-uhye, ịPọlụ kịnyaa là ọ-ka jẹ́ Ụpwụ Ịgọgọ. (2 Tim. 3:16, 17; 4:13) Ọlẹ kọ tị baba gụ wuu, ọ la ahị ọdahile yẹẹyẹẹ nyori ọwa nyị há iJihova bala iJisọsị. Ị́ nyẹẹkpẹ dọọ ka, ọ tị jẹ́ nyori nyị ka nwọwa uri nya ụkụrwọ ọnyịịla ọlẹ kọ họ.

19. Ányị iJihova à tị́ da ịPọlụ ụbwọ?

¹⁹ IJihova da ịPọlụ ọna ene nyori nyị ka la ọtụpyịpyị chajị nyọlẹ kọ wẹ ka ri ọngịnyị nya ịKịrayịsị. (Ụkụr. 21:11-13) Ányị iJihova à tị́ da ịPọlụ ụbwọ? Ọ wẹ abwọ ọrịrị nya ịPọlụ bala ọ-ya ọngịrị họọ jaabwọ ká ụka wẹẹ chịpwụrụ. (2 Tim. 4:17) Ọ ya ọ-jẹ́ myị̀myị̀ ha ịPọlụ nyori nyị ka ye uri ọlẹ kọ wẹẹ họ ụkụrwọ la ọngịrị-ọngịrị chajị nyamwụ. IJihova ịnyịnyị kpa aligu nya ịPọlụ ịlẹ kị dayị giri-giri ẹ-ẹga nyamwụ dọọ ụbwọ.

20. Ányị ahị tị́ kà jẹ́-ẹ gbịla ọmyịmyị ọlẹ ká ịPọlụ mẹjẹ ụ-ụpwụ nya Ala iRom 8:38, 39?

²⁰ (4) Kpa họ ụkụrwọ. Tọ ịlọng wo, ‘Ányị m tị́ ka jẹ́-ẹ gbịla ịPọlụ?’ Lala ịPọlụ, ahị ka ya ahị guru nyori ị ka tụụhị pyịpyị chajị nyọlẹ kahị wẹẹ gbịgba ha iJihova. (Mak. 10:29, 30) Nyọka jẹ́-ẹ kịnyaa la ọ-dayị giri-giri ụka kahị la ọmayẹ, ahị baba nyọka kịnyaa la abwọ ọrịrị bala ọ-ka jẹ́ ịBayịbụụ ụka myị́ ụka. Ahị tị ka kpịtịya pyii ụka myị́ ụka nyori ang ọlẹ kọ baba gụ́ wuu kahị ka họ à ri ọ-ka kpa ogbo wẹ iJihova lẹlẹ. Ahị ka jẹ́ myị̀myị̀ nyori iJihova á  ka nyẹẹkpẹ dahị ka, ịngịngịhyẹ-ẹ́ tị ji ọlẹ kọ ka chịhị ebwo hi ọháha ọlẹ kọ la ẹ-ẹga nyahị kaka.​—Wa Ala iRom 8:38, 39; Hib. 13:5, 6. 

21. Ịyẹ à tị́ da Aya bala Hector ụbwọ nyọka kụrụ ang ọlẹ ko ri akama nyaa?

²¹ Abwọ myị́ abwọ ká iwe-ahụrụ nyahị-ị́ la, ọgụ-ẹpẹtẹ nya angị ịlẹpwụ nya ịBayịbụụ ka jẹ́-ẹ dahị ụbwọ nyọka ye ọngịrị ọlẹ kahị baba nyọka kpa bọhụ ẹ-ẹpwụ nyamwụ. Ọ-chụ pwokwita, Aya, kọ ri ọngọ ye ịlahị nya ụgbẹyị ịị Japan, ya nyori oja nya iJona nyị dọwa ụbwọ nyọka kụrụ uhi ojuju nyọka kpa ẹrụ ọnyịịla pyẹ ẹ-ẹga nya alụma. Hector ri ọọnahị okolobya ọhẹ ụ-ụwa Indonesia ká adamwụ bala ịnamwụ á kaa gbịgba ha iJihova ka. O ya nyori ọgụ-ẹpẹtẹ nya iRutu nyị gwọwa gbịla nyọka jẹ́ ang chajị nya iJihova bala ọ-ka gbịgba họọ.

22. Ịyẹ à tị́ ka dang ụbwọ nyọka ye apyobwuna yẹẹyẹẹ bwu ịdịrama u-uhye nya ịBayịbụụ lee ụpwụ ọlẹ kọ ri “Imitate Their Faith”?

²² Ale a tị́ ka ye ọgụ-ẹpẹtẹ nya angị ịlẹpwụ nya ịBayịbụụ ịlẹ kị ka jẹ́-ẹ jung ọngịrị? Ifim bala ịdịrama u-uhye nya ẹla ọla ịBayịbụụ ịlẹ kị kịla ju bala ụpwụ ọlẹ ko ri “Imitate Their Faith” ka dang ụbwọ nyọka jẹ́ ẹla ọla ịBayịbụụ. * Ene ká ka yẹ, ke ụrụ wo la, lee ọ-wa oja ịlẹ kị kụ ẹhị yẹ rige-rige ene kị wẹẹ gbaa kpehe, bịlẹ iJihova kọ dang ụbwọ nyọka ye ẹla i-ju apyobwuna ịlẹ ka ka jẹ́-ẹ kpa họ ụkụrwọ. Yẹ ịlọng iiwe-ahụrụ nya ọngọlẹ ká wẹẹ wa oja nyamwụ. Kụ́ irya u-uhye nya ang ọlẹ ká anchẹ ilikẹjẹ nya iJihova ịwẹ họ bala abwọlẹ kọ daa ụbwọ nyọka kụrụ akama nyaa. Ọọwa lẹ, a kpa ẹla ọlẹ ká jẹ́ bwuwa họ ụkụrwọ ẹ-ẹpwụ nya iwe-ahụrụ nyịlọng lẹlẹ. Ji iJihova obe ọhọhọ nya ụbwọ ọlẹ kọ dang ene-ene lẹ. Mẹjẹ nyori ụbwọ ọdada ọọwa myịng lẹhị bwula ọ-mwahị nya agbẹyị ịlẹ ká ka kpa ju angịkịla ọhụ bala ọ-daa ụbwọ.

23. Ịyẹ iJihova à tị́ myị ọnụ nyọka họ hahị ụ-ụpwụ nya Ayịsaya 41:10, 13?

²³ Ọhịhị olodehe nya Olegu Onyobyi ọlẹ kaa lujwo, ụka ọhẹ áhị dọmwụ kaa jẹ́ abwọlẹ kahị ka họ ka. (2 Tim. 3:1) Ma, áhị baba nyọka chuko kpoye lee ọ-ka juhi ka. IJihova jẹ́ akama ịlẹ kahị wẹẹ chịpwụrụ bwu. Ụka kahị baba nya ụbwọ ọdada, ọ myị ọnụ nyọka ya ụbwọ ọngịrị nyamwụ chịhị. (Wa Ayịsaya 41:10, 13.) Ahị jẹ́ myị̀myị̀ nyori iJihova ka dahị ụbwọ, ịBayịbụụ tị ka ya ọngịrị ọlẹ kahị baba hahị nyọka bọhụ ẹ-ẹpwụ nya akama ọhẹ-lọhẹ.