1. Ányị ọhịhị nyang à tị́ la ene kaa dọmwụ nya ịBayịbụụ ọjẹ́jẹ?

 ÁNYỊ ọhịhị nyang à tị́ la ene kaa dọmwụ nyọka jẹ́ ịBayịbụụ bala Alibeenu nya iJihova? Ọ ka bịrị iru nya angịhyẹ nyahị ọkịlẹtụ nyọka kụ irya u-uhye nya ọọwa. Ọ chịkpẹẹ myị́ ká abwẹla nyahị bala abwọlẹ kahị kaa bwu họ ẹla ka kpụnịrọ ang ọlẹ ká odehe kaa yẹ nya ang ọnyịịla bala ọtịpyọ. Ó ri ịnyị aalẹ, ‘áhị la ẹhi ọrịrịị-rịrị ọnyịịla ẹ-ẹpwụ nya ọhịhị ka. Áhị tị jẹ́ Ohe Oluhye ka ịnyịnyị.’ (Efe. 2:12) Ma ịBayịbụụ ọjẹ́jẹ dudu ká ịịwa wuu yẹda!

2. Ịyẹ à tị́ ri ang ịhyẹ ịlẹ ka jẹ́ nyọlẹ ka dọmwụ nya ịBayịbụụ ọjẹ́jẹ kpá?

² À dọmwụ nya ịBayịbụụ ọjẹ́jẹ kpá ene kaa jẹ́ nyori a la Adịda ọhẹ juwa e-epwoohe kọ la ọháha ẹ-ẹga nyang yẹẹyẹẹ. À wẹ ka yẹ nyori kori á tịtọ nyọka họ ẹla kpụ iJihova ịpyọ bala ọ-ka ri ụpa nya ugbiyegu nya angịlẹ kị kaa gbịgba họọ aalẹ, à ka baba nyọka nwụ ang họ yẹẹyẹẹ ẹ-ẹpwụ nya ọhịhị nyang bala abwọlẹ á kaa kụ irya. À ka baba nyọka họ ang ọlẹ ká iJihova ya nyị há bala ọ-ka yẹ abwọ hi ang ọlẹ kọ ya nyị tịpyọ.​—Efe. 5:3-5.

3. Jaabwọ ká ụpwụ nya Ala iKolosi 3:9, 10 ya, ịyẹ iJihova à tị́ tịtọ kahị ka họ? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Nyọlẹ ká iJihova à ri Ọngọ họhị bala Adahị olepwoohe wẹẹ, ọ la ọngịrị nyọka ya jaabwọ ká alugbiyegu nyamwụ ka bwu họ ẹla. Ọ tị ya nyori ene kahị nyị ka jẹ́-ẹ hu enyi Ohe, ahị nyị ka maga nyọka “pwọ ọngịnyị onyogo nya ọhọbịrị ọhọhọ ọlẹpwụ [nyahị] deeji bala abwẹla inyibyi ịhọhọ.” * (Wa Ala iKolosi 3:9, 10.) Ang ọjẹ́jẹ ọlẹ ka da angịlẹ kị tịtọ nyọka hu enyi Ohe ụbwọ nyọka wẹ ịtọ ẹla ịta ịlẹ: (1) Ịyẹ à tị́ ri etu nya “ọngịnyị onyogo”? (2) Ịyẹ tị́ du ká iJihova byihi nyị pwọọ deeji?  (3) Ányị ahị tị́ ka bwu họ ịnyị? Ahị angịlẹ kahị tị hu enyi Ohe ene lẹ, ang ọjẹ́jẹ ọlẹ ka dahị ụbwọ nyọka ya iwe da ká abwẹla nya ọngịnyị onyogo ka tịrẹkpẹ wẹ ẹpwụ nyahị kaka.

4. Ányị ọngịnyị à tị́ kaa họ ẹla ó ri kọ la abwẹla nya “ọngịnyị onyogo”?

⁴ Ọngọlẹ kọ la abwẹla nya “ọngịnyị onyogo” kaa kụ irya bala ọ-họ ẹla ụ-ụgbẹyị nya ọhọbịrị. Ọ chịkpẹẹ myị́ kọ ka yẹ ịlọmwụ-ịlọmwụ kem, ju agbama nya ẹla hyaa, myị ji obe ọhọhọ ka, bala o-hu ịlọmwụ hwaa. Ifim nya angị ji lọhị-lọhị bala ịnya ụya lee abwẹga ọhọhọ ka kpọọ ịpyọ la ọ-yẹyẹ myị́. Ịwẹẹ ọdada á tị juwa nyori ọ la abwẹla ịnyịịla ịhyẹ ka lẹ, olegu ka ya eje woo u-uhye nya ala ịtịpyọ ịlẹ kọ kaa ya bala ọhọho myị́. Ma irya nya ang ọnyịịla ọ-ka họhọ ọlẹ kọ la á la ọngịrị nwa kpụ ọ ka yẹ irya ọkụkụ bala abwẹla nyamwụ da ka.​—Gal. 5:19-21; 2 Tim. 3:2-5.

5. Ahị ka jẹ́-ẹ pwọ ongịnyị onyogo deeji kpẹng-kpẹng myị́? Ịyẹ tị́ du ká ya ịnyị? (Ụkụrwọ nya Alẹrụ 3:19)

⁵ Ahị wuu á la kpẹẹkpẹẹ ka, lẹ ọngọngọhẹ nyahị á ka jẹ́-ẹ gba irya bala imyi nya ang ịtịpyọ hi ọkịlẹtụ bala olegu nyamwụ kpẹng-kpẹng kaka. Ụka ọhẹ, ahị kaa họ ẹla lee o-ya ẹla ọlẹ kahị kaa chi ijẹma u-uhye nyamwụ. (Jer. 17:9; Jem. 3:2) Ma ụka kahị pwọ ọngịnyị onyogo deeji lẹ, abwẹla bala ang ịlẹ ká ugbinyịrọ kaa kpa ọngịnyị kaka họ á ka yehi la kịlahị kaka. Ahị kaa wẹ ka ri ọngịnyị ụma ọdatị.​—Ayị. 55:7; wa Ụkụrwọ nya Alẹrụ 3:19.

6. Ịyẹ tị́ du ká iJihova byihi nyị tụụbwọ hi irya bala abwẹla ịtịpyọ ịlẹ kị ri ọngịnyị onyogo?

⁶ IJihova byihi nyị tụụbwọ hi irya bala abwẹla ịtịpyọ chajị nyori ahị họ́ọ yẹẹyẹẹ bala o-ri ọ tịtọ ká ọhịhị ka kpụhị ịpyọ ịnyị. (Ayị. 48:17, 18) Ọ jẹ́ nyori angịlẹ kị ma uya tọ ang ọtịpyọ ọhọhọ ka kaa họ ịlaa jụ ịlaa bala angịkịla ịnyịnyị. Ọ kaa tọọ olujwo ụka kahị họ ẹla ọ-jụ ịlọhị bala angịkịla.

7. Jaabwọ ká ụpwụ nya Ala iRom 12:1, 2 ya, eje nya ẹlịyẹ ahị tị́ la ka chị?

⁷ Angịhyẹ bwu ẹpwụ nya aligu bala ugbiyegu nyahị ka kpahị họ ụka nya ọgbanyẹ ọlẹ kahị wẹẹ maga nyọka yẹ abwẹla nyahị da myị́. (1 Pit. 4:3, 4) Ị ka ya myị́ nyori ahị nyị la ọngịrị nyọka họ ang myị́ ang ọlẹ kọ háahị, lẹ ahị nyị ya iwe da ha angịkịla nyọka byihi nyị họ ang ọlẹ kahị ka họ ka. Ma angịlẹ kị kaa nyẹẹkpẹ da  ẹla ọmẹjẹ nya iJihova á tị kaa la ịlaa tu ọọwa ka. Ẹlịlẹhị ri, ị wẹẹ ya iwe da ká odehe nya Olegu Onyobyi ka kpaa họ ụkụrwọ ịnyị. (Wa Ala iRom 12:1, 2.) Ahị wuu la eje nyọka chị: Ahị ka kịnyaa la ọngịnyị onyogo nyahị, ọlẹ ká ọhọbịrị bala odehe nya Olegu Onyobyi a kaa me, lee ahị tị́ ka ya iwe da ká iJihova ka yẹhị da kaka ri ụma nya ọngịnyị ọnyịịla ọlẹ kahị ka jẹ́-ẹ ri myị́ nya ọlẹẹlẹẹ?​—Ayị. 64:8.

8. Ịyẹ à tị́ ka dahị ụbwọ nyọka jẹ́-ẹ tụụbwọ hi irya bala abwẹla ịtịpyọ ịlẹ kị baahị ahị?

⁸ IJihova jẹ́ nyori ọ́ ka ri ẹla ọchịkpẹẹ hahị nyọka tụụbwọ hi irya bala abwẹla ịtịpyọ myị́ i-ijata ka. (Eje. 103:13, 14) Ma, bwula Omyi Ẹla, olegu, bala ogu nyamwụ, iJihova ya ẹla ọjẹ́jẹ, ọngịrị, bala ụbwọ ọdada ọlẹ kahị baba hahị nyọka jẹ́-ẹ yẹ ụma nya ọngịnyị ọlẹ kahị ri da. Ịwẹẹ á ji ka, ọ dang ụbwọ ene-ene lẹ. Lẹ ahị kụ ẹhị yẹ ẹta-ẹdịyẹ ịhyẹ ịlẹ á ka hu nyọka nwà kịnyaa ẹ-ẹpwụ nya ọngịnyị onyogo ọ-pwọ deeji bala ọ-ka nwà ka hu enyi Ohe wẹẹ.

9. Ịyẹ Omyi Ẹla nya Ohe à tị́ ka jẹ́-ẹ dang ụbwọ nyọka họ?

⁹ Kpa ịBayịbụụ wụla ịlọng yẹ rige-rige. Omyi Ẹla nya Ohe lala ịnyọ; ọ ka dang ụbwọ nyọka wụla ụgbẹyị ọlẹ á kaa kụ irya, ya ẹla, bala ọ-họ ẹla yẹ. (Jem. 1:22-25) Ọngọlẹ kọ kaa mẹ ịBayịbụụ jẹ́ng bala angịnyị nya ịKịrayịsị ịkịla ịlẹ kị la ẹla ọjẹ́jẹ ka jẹ́-ẹ jung irya. Ọ-chụ pwokwita, ị ka jẹ́-ẹ kpa Ụpwụ Ịgọgọ dang ụbwọ nyọka jẹ́ ang ịlẹ á kaa jụ họ myị́ bala ịlẹ kị ri ọdẹwụ-dẹwụ nyang. Ị ka jẹ́-ẹ dang ụbwọ nyọka yẹ ẹla ọmẹjẹ o-bwu ẹpwụ nya ịBayịbụụ ọlẹ kọ ka dang ụbwọ u-uhye nya abwọlẹ á ka bwu kụrụ abwẹla ịtịpyọ ịlẹ kị bang ahị. IJihova tị nwụlanọ ụka myị́ ụka nyọka wẹ ka dang ụbwọ. Ọwa à ka jẹ́-ẹ dang ụbwọ gụ wuu ẹẹ; ọ jẹ́ ẹla ọlẹ ko juwa ọ-ọkịlẹtụ nyang. (Etu 14:10; 15:11) Lẹ maga kọ bang ahị nyọka raabwọ họọ bala ọ-ka jẹ́ Omyi Ẹla nyamwụ ahyẹẹnụ ọnyị myị́ ọnyị.

10. Ẹlịyẹ a tị́ jẹ́ bwu oja nya Elie?

¹⁰ Jẹ́ myị̀myị̀ nyori agbẹyị nya iJihova à há gụ wuu lẹ. Ahị kaa yé apyobwuna bwu ẹpwụ nya ang myị́ ang ọlẹ ká iJihova-á ya ahị nyị họ. Angịlẹ kị kaa ba ehile nya iJihova jẹ kaa jẹ́ ihi nya ịlaa, etu nya ọhịhị, bala ọ-chị ọkẹkẹnị ọlam-ọlam. (Eje. 19:7-11) Ma angịlẹ kị tị nyẹẹkpẹ da ehile nya iJihova kaa kpụ ẹpwụ nya akama ịlẹ ká ọngịnyị kaa yẹ bwula ọ-họ ang ọlẹ ká imyi nya ugbinyịrọ kaa kpa ọngịnyị kaka họ. Wo ẹla ọlẹ ká ọlẹng ọhẹ ká ẹnyị nyamwụ ri Elie ya u-uhye nya ọngịnyị o-nyẹẹkpẹ da ehile nya Ohe lẹẹ. IJihova há adamwụ bala ịnamwụ ịlẹ kị kpọọ nwà. Ma ụka ká Elie gu ẹka iwo kụrụ, ọ ji ogu ọtịpyọ. Ọ dọmwụ nyọka mile etiji ịnyịịngịrị, họ ụya, bala o-yoyi. Elie ya ọwa nyị yẹ nyori ọwa nyị kaa ju agbama bala ọ-la ọkwọ gụ olene-ene. O yẹkẹẹ: “Ẹlịlẹhị ri, m̀ họ ang myị́ ang ọlẹ kị mẹjẹ́m nyori ọngịnyị nya ịKịrayịsị nyị́ chịla nyọka họ ka.” Ma, Elie á tị deeri nya ẹla ọlẹ kọ jẹ́ ụka kọ ri onjwo ka. Ọọwa lẹ, ọ dọmwụ nyọka jẹ́ ịBayịbụụ myị́myị́ lẹlẹ. Ọ maga nya ịlẹhị-ịlẹhị kpụ ọ jẹ́ tụụbwọ hi abwẹla ịtịpyọ nyamwụ deeji du kọ jẹ́ hu enyi Ohe la ẹka nya 2000. Ányị ọ-hịhị ba ehile nya iJihova jẹ à tị́ dọọ ụbwọ? Elie yẹkẹẹ: “M̀ la okpunyi nya ọkịlẹtụ bala irya oleje ocheri-cheri ugbẹnyị lẹ.” * Oja nya Elie ọwẹ mẹjẹ́ẹhị nyori angịlẹ kị nyẹẹkpẹ da ehile nya iJihova kaa họ ịlaa jụ ịlaa. Ọ tị lịnyị odu lẹ, iJihova nwụlanọ nyọka daa ụbwọ kị ka yẹda.

11. Ang iyina à tị́ wụ iJihova ẹjẹ?

¹¹ Ang ọ-wụ iJihova ẹjẹ a wụng ẹjẹ. (Eje. 97:10) ỊBayịbụụ họ kahị jẹ́ nyori “ọyị ọ-yẹ ọbọọchẹ-ọbọọchẹ, balọnọọkịla omeme, bala  ọngọ da ẹlẹlẹhẹ-ka ọnwụnwụ” kaa wụ iJihova ẹjẹ. (Etu 6:16, 17) “Angị kaa pịrị angịnyị ju bala angị nwụ angịnyị [wọọ] ẹjẹ lụmẹ” ịnyịnyị. (Eje. 5:6) Abwẹla bala ọhọhọ ịlịịwẹ wụ iJihova ẹjẹ gbee kọọ ta alọkwọ ịla ahyẹẹnụ nya iNuwa ayịreji chajị nyọlẹ kị ya agbụrụ ọhọhọ myị odehe ọlẹ. (Ọmwụ. 6:13) Yẹ ọ-chụ pwokwita ọkịla lẹẹ wẹẹ. Bwula ọlọmwụ ịMalakayị, iJihova ya nyori angịlẹ kị kaa kpa ijẹẹhị mwahị nya ẹla ọlẹ kị ka kpa pwa ahụ lee ọrụ nyaa ọlẹ kọ da ẹlẹlẹhẹ ka nyị wụ ọwa ẹjẹ. Ohe pwa ịgba ọgbagba nyaa, ọ tị ka laa eje u-uhye nya abwẹla nyaa ịnyịnyị.​—Mal. 2:13-16; Hib. 13:4.

12. Ịyẹ à tị́ ri etu nya ang onyobyi ọhọhọ ọ-ka wụ ọngịnyị ẹjẹ?

¹² IJihova tịtọ “ká ang onyobyi ọhọhọ [ka wụụhị] ẹjẹ.” (Rom. 12:9) Etu nya ang ọ-wụ ọngịnyị ẹjẹ ọlẹ ká ẹgẹwẹ ya ri abwọlẹ ká ang kaa la ọngịnyị du kọ kaa tịtọ nyọka yọọ ẹ-ẹhị ka. Kụ irya nya abwọlẹ kọ ka lang kori kị ya ang oriri ọlẹ kọ mama ju ẹja ya ahụ nyị ri mẹ wẹẹ. Irya o-meme kem dọmwụ lala nyị ka jụng ẹdụrụ. Ụ-ụgbẹyị ọlịnyị-ịnyị, irya ọ-kụ u-uhye nyọka họ ang ọlẹ kọ wụ iJihova ẹjẹ kem baba kọ ka gbuuhi ịnyịrọ wọọ.

13. Ịyẹ tị́ du kahị ka chị ewu ke irya nyahị pyii?

¹³ Chị ewu ke irya ọkụkụ nyang. Abwọlẹ ahị kaa kụ irya kaa gu abwọlẹ kahị kaa bwu họ ẹla. Ịnyị à dudu ká iJisọsị mẹjẹ́ẹhị nyọka pwa irya ịlẹ kị ka kpahị kaka họ ọhọbịrị ọtụka lẹ. (Mat. 5:21, 22, 28, 29) Ahị tịtọ nyọka họ ẹla kpụ Adahị olepwoohe ịpyọ, lee ịnyị tị́ ka? Lẹ ọ baba yẹẹyẹẹ nya ahị ọ-ka pwa irya ọtịpyọ ọnyị myị́ ọnyị kọ wẹ ẹpwụ nyahị i-ijata!

14. Ẹla oyaya nyahị tị́ kaa mẹ ẹlịyẹ jẹ u-uhye nyahị? Ịtọ ẹla iyina ahị tị́ ka wẹ ha ịlọhị?

¹⁴ Gbe ẹlẹlẹ nyang. IJisọsị ya nyori ang ọlẹ kọ “bwu ọnụ nya ọngịnyị ehe” nyị kaa “da emyo bwu ẹpwụ ọkịlẹtụ gba kpehe” ịnyị. (Mat. 15:18) Ee, ẹla oyaya nyahị kaa mẹ ụma nya ọngịnyị ọlẹ kahị ri ẹ-ẹpwụ jẹ yẹẹyẹẹ. Lẹ tọ ịlọng ịtọ ẹla ịlẹ wo: ‘M̀ kaa pwa la ọ-ka me ọnọọkịla, ó ri ká ẹlịlẹhị oyaya á dọmwụ ka kpa akama wam? Ó ri kam ye ahụ lee ọ-rwọ ọrụ lẹ, m̀ kaa maga yẹẹyẹẹ nyọka hwabwọ la ọ-chị umwara o-pwoku ka ta anyang lee alẹng ịkịla? M̀ kaa hu abwọ gbang-gbang hi ẹla nya ụya oyaya? M̀ jẹ́-ẹ wẹ ẹla kpẹnẹẹ ụka ká ọngịnyị á họ ẹla wụm ẹjẹ?’ Ọ ka dụbwọ nya ahụ ọ-ka kụ irya u-uhye nya ịtọ ẹla ịwẹ. Ị ka jẹ́-ẹ chụ ẹla oyaya nyang kaka pwoku apata nya awụrụ. Ọ ri ká da apata nya awụrụ, ọ kaa chịkpẹẹ la ọ-ka pwọ awụrụ ọọwa. Ịnyịnyị-ịnyịnyị, o ri ká maga yẹẹyẹẹ nyọka tụụbwọ hi ẹla ọ-ya  lido-lido, ọnọọkịla omeme, bala ẹla nya ụya oyaya, ọ ka chịng kpẹẹ gụ́ la ọ-ka tụụbwọ hi ọngịnyị onyogo deeji.

15. Ịyẹ à tị́ ri etu nyọka gu ọngịnyị onyogo nyahị iloo ba okoji?

¹⁵ Nwụlanọ nyọka họ ẹla ọlẹ kọ baba. Ọlẹrụ ịPọlụ kpa ẹla ọ-chụ pwokwita ọhẹ ya ẹla nyọka mẹ ang jẹ́ẹhị u-uhye nya abwọlẹ kọ baba ka ba nya ahị ọ-ka yẹ ọhịhị nyahị da. Ọ da ụpwụ nyori ahị nyị ka ‘hu ọngịnyị onyogo nyahị kpa kaka gu iloo ba okoji’ pyii. (Rom. 6:6) IJisọsị myị ọnụ kị ka gwoo iloo ba okoji chajị nyọka họ ẹla há iJihova. Ịnyịnyị-ịnyịnyị, chajị nya ahị ọ-ka họ ẹla kpụ iJihova ịpyọ, ahị ka nwụlanọ nyọka tụụbwọ hi abwẹla bala ịhọhọ ịlẹ kị wụ iJihova ẹjẹ. Ụka kahị hu ẹta-ẹdịyẹ ịwẹ, ahị ka jẹ́-ẹ la ọkịlẹtụ ocheri-cheri bala ahị ọdahile nyọka la ọhịhị omyịmyị-ka wẹẹ lẹ. (Jọn. 17:3; 1 Pit. 3:21) Kpịtịya nyori iJihova á ja yẹ ehile nyamwụ da chajị nyọka kpụhị ịpyọ ka. Ọkọkọ nya ọọwa, ahị a baba nyọka yẹ ịlọhị da kaka pwoku ehile nyamwụ lẹ.​—Ayị. 1:16-18; 55:9.

16. Ịyẹ tị́ du ká ka cheje nyọka kịnyaa la ọ-ma uya tọ ọdẹwụ-dẹwụ nya ugbinyịrọ?

¹⁶ Kịnyaa la ọ-ma uya ta ọdẹwụ-dẹwụ nya ugbinyịrọ. Ó ri ká dọmwụ hu enyi Ohe kpá lẹ wẹwẹ, à ka baba nyọka kịnyaa la ọ-ma uya ta ọdẹwụ-dẹwụ nya ugbinyịrọ. Kụ irya nya ẹla ọlẹ kọ họ ẹ-ẹga nya ọlẹng ọlẹ ká ẹnyị nyamwụ ri Maurício lẹẹ wẹẹ. Ụka kọ ri onjwo, ọ dọmwụ nyọka họ ụya tọ alẹng ịkịla. Nyọlẹ kọ tị nọ chẹẹ kọ tọ Alibeenu nya iJihova lẹ, ọ dọmwụ nyọka jẹ́ ịBayịbụụ lẹlẹ. Ọ yẹ ọhịhị nyamwụ da kpụ ọ hu enyi Ohe la 2002. Nanana nyori Maurício kaa gbịgba ha iJihova ẹ-ẹpwụ nya ẹka lụmẹ-lụmẹ lẹẹlẹẹ lẹ, o yẹkẹẹ: “Ẹlịlẹhị ri irya ịtịpyọ kaa ma uya tam ụka ọhẹ wẹẹ.” Ọ́ tị ya iwe da ọọwa kpọọ ọkịlẹtụ enyi ka. Ọkọkọ nya ọọwa, ọ yẹkẹẹ: “M̀ kaa yé ẹjẹ ọkpụ́kpụ chajị m̀ jẹ́ nyori ó ri kam chụ nyọka hu irya ịịwa họ ka aalẹ, ẹla nyam ka kpụ iJihova ịpyọ.” *

17. Ẹlịyẹ à tị́ ya ọhụ ojuju hang u-uhye nya oja nya Nabiha?

¹⁷ Raabwọ bịlẹ ụbwọ ọdada nya iJihova, ká kpụnịrọ olegu nyamwụ ọkọkọ nya ọngịrị nya ịlọng. (Gal. 5:22; Filip. 4:6) Ahị ka ma uya la ọngịrị-ọngịrị ó ri kahị tịtọ nyọka pwọ ọngịnyị onyogo nyahị deeji bala ọ-pẹ hyọọ dụwa e-eji. Kụ irya nya ẹla ọlẹ kọ họ ẹ-ẹga nya ọnyang ọlẹ ká ẹnyị nyamwụ ri Nabiha lẹẹ wẹẹ. Adamwụ nyẹẹkpẹ dọọ ụka kọ gu ẹka ịrwọnyẹ kem. O yẹkẹẹ:  “Ẹlẹwẹ jụm o-olegu kaka kpoye.” Ụka ká Nabiha wẹẹ nwà wẹẹ, ọ kaa wụ ẹjẹ nya ẹla gụ́ ọwọwa bala o-ju agbama hyaa. Ọ dọmwụ nyọka kpa etiji ịnyịịngịrị ra. I woo kpụ ọ họ ẹka ịmanyị-manyị u-ube nya agba. Alibeenu nya iJihova ịlẹ kị kaa ju ube nya agba ọọwa ụga dọmwụ nyọka jẹ́ ịBayịbụụ balọọ. Nabiha dọmwụ nyọka yẹda nya ịlẹhị-ịlẹhị. Ọ yẹkẹẹ: “Ọ chịm kpẹẹ la ọ-ka yẹ abwẹla nyam ịhyẹ da, ma ẹchụ ọnwà-nwà ọ-ka hu abwọ hi tị lujwo ham kaka kpoye.” Nabiha kịnyaa la uya ọ-mama kpoye nya ẹka lẹpwụ-lẹpwụ gbee kọ jẹ́-ẹ ba la ẹchụ ọnwà-nwà. Ányị ọ tị bwu họ ịnyị myị́? Ọ yẹkẹẹ: “Ang ọlẹ kọ baba gụ́ wuu ri abwọ ọrịrị ha iJihova ụka myị́ ụka. Ọọwa à dam ụbwọ nyọka hu abwọ myị́ lẹ.” Ọ kaa byi angịkịla lẹẹlẹẹ yẹkẹẹ: “M̀ jẹ́ myị̀myị̀ nyori ọ kpụ kam jẹ́ yẹda myị́ nyọka họ ẹla kpụ iJihova ịpyọ wẹẹ, ọngọngọhẹ ọkịla ka họọ myị́ lẹ!” *

18. Jaabwọ ká ụpwụ nya 1 Ala ịKọrịntị 6:9-11 ya, ịyẹ iru nya anchẹ nya Ohe à tị́ jẹ́ họ myị́?

¹⁸ Lụka nya oyi ọhọhẹ, angịhyẹ lẹpwụ nya alẹng bala anyang ịlẹ ká iJihova chụ nyọka kpeji ta ịKịrayịsị ri angịlẹ kị kaa họ ang ịtịpyọ ene-ene. Ọ-chụ pwokwita, ị ri angị kaa họ ụya, alẹng-alẹng bala anyang-anyang ịlẹ kị kaa họ ụya tọ awụlẹ, bala aloyi. Ma bwula ụbwọ ọdada nya olegu ịgọgọ nya Ohe, ị jẹ́ yẹ abwẹla nyaa da. (Wa 1 Ala ịKọrịntị 6:9-11.) Ịnyịnyị alẹ, ịBayịbụụ da ụnọ ịmanyị tị́ nya angịnyị ụbwọ kpụ ị jẹ́ yẹ ọhịhị nyaa da lẹ. * Ị jẹ́ nyẹẹkpẹ da abwẹla ịlẹ kị lujwo nyịlẹhị-lehị la ọ-ka tụụbwọ hi. Oja nyaa mẹjẹ nyori ahụ ịnyịnyị ka jẹ́-ẹ yẹ abwẹla nyang da bala ọ-kụrụ ang ịtịpyọ chajị á ka jẹ́-ẹ nwà ka hu enyi Ohe.

19. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁹ Datị hi ọ-ka maga nyọka pwọ abwẹla onyogo deeji, angịlẹ kị tịtọ nyọka hu enyi Ohe ka maga nyọka ya abwẹla onyeewe da kụrụ pyii ịnyịnyị. Ang ọjẹ́jẹ ọkịla ka ya ẹla u-uhye nya abwọlẹ kahị ka bwu họ ịnyị bala abwọlẹ ká angịkịla ka jẹ́-ẹ dahị ụbwọ.