1. Ịyẹ à tị́ kaa gu abwẹla nyahị gụgụụgụ?

 Ó RI kahị hu enyi Ohe la ahyẹẹnụ ịmanyị-manyị kem wẹẹ lee ó ri kọ la ẹka ịmanyị tị́ lẹ wẹwẹ, ahị wuu tịtọ nyọka la ụma nya abwẹla ọlẹ kọ kaa há iJihova. Nyọka jẹ́-ẹ ri ụma nya ọngịnyị ọlịnyị, ahị baba nyọka kụ irya ụ-ụgbẹyị o-pwoku. Ịyẹ à tị́ du? Chajị abwọlẹ kahị kaa kụ irya à kaa ya jaabwọ ká abwẹla nyahị ka la gụgụụgụ lẹ. Ó ri kahị kaa kụ irya ụka wuu u-uhye nya ang ịlẹ kị kaa ma ịnyịrọ ma aalẹ, ahị ka ya ẹla ohideeji bala ọ-họ ang ọtịpyọ. (Efe. 4:17-19) Ma ọ́ tị ri kahị kaa kụ irya u-uhye nya ang ịnyịịla, ọ ka chịhị kpẹẹ la ọ-ka ya ẹla bala ọ-họ ẹla ụ-ụgbẹyị ọlẹ kọ ka kpụ Adahị iJihova ịpyọ.​—Gal. 5:16.

2. Ịtọ ẹla iyina ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Jaabwọ ká ang ọjẹ́jẹ ọlẹ kọ jene nya ọlẹ ya, áhị ka jẹ́-ẹ wu irya ịtịpyọ wuu kpa la ọ-ka ju wẹ ọkịlẹtụ nyahị kpá myị́ ka. Ma ahị ka jẹ́-ẹ chụ nyọka hu irya ịtịpyọ ịịwa họ ụkụrwọ ka. Ene kahị ka hu enyi Ohe, ahị baba nyọka hu abwọ la ọ-ka ya ẹla bala ọ-họ ẹla ụ-ụgbẹyị ọlẹ kọ kaa wụ iJihova ẹjẹ. Ọwa-à ri ẹta-ẹdịyẹ ọhọhẹ, kọ tị baba gụ́ wuu ịnyịnyị, ẹ-ẹpwụ nya ọngịnyị onyogo ọ-pwọ deeji ẹẹ. Ma, nyọka jẹ́-ẹ họ ẹla kpụ iJihova ịpyọ yẹẹyẹẹ, o ri opyii kahị ka ju ihi nya ehile ọlẹ: “Hu ọngịnyị onyeewe ọlẹpwụ nya ịKịrayịsị dakụrụ.” (Kol. 3:10) Ẹ-ẹpwụ nya ang ọjẹ́jẹ ọlẹ, ahị ka wẹ ịtọ ẹla ịlẹ: Ịyẹ à tị́ ri etu nya “ọngịnyị onyeewe”? Ányị ahị tị́ ka bwu hu ọngịnyị onyeewe dakụrụ bala ọ-ka kpọọ ụ-ụwa?

3. Jaabwọ ká ụpwụ nya Ala ịGaletiya 5:22, 23 ya, ịyẹ à tị́ ri abwẹla nya “ọngịnyị onyeewe”? Ányị ọngịnyị à tị́ kaa ya dakụrụ ịlọmwụ?

³ Etu nya “ọngịnyị onyeewe” ri ọ-ka kụ irya bala ọ-họ ẹla ụ-ụgbẹyị ọlẹ kọ pwoku abwẹla nya iJihova. Ọngịnyị kaa ya  abwẹla onyeewe ọwẹ dakụrụ ịlọmwụ bwula ọ-mẹjẹ nyori ọ la ugbe nya olegu nya Ohe, bala ọ-ya iwe da ha olegu ịgọgọ nyọka kpọọ ụgbẹyị ẹ-ẹpwụ nya irya, ọkịlẹtụ, bala abwẹla. (Wa Ala ịGaletiya 5:22, 23.) Ọ-chụ pwokwita ri, iJihova bala angịnyị nyamwụ kaa há ọngọọwa. (Mat. 22:36-39) Ọngịnyị ọlịnyị kaa chị ọkẹkẹnị tụ ụka kọ juwa ẹ-ẹpwụ nya akama. (Jem. 1:2-4) O ri ọngọ kaa họ okpunyi. (Mat. 5:9) Ọ kaa dọhụ pịlẹẹ bala ọ-họ ọnahị ẹ-ẹga nya angịkịla. (Kol. 3:13) Ang ọnyịịla kaa họ́ọ, ọ tị kaa họọ ịnyịnyị. (Luk. 6:35) Ọ kaa mẹjẹ bwula abwẹla nyamwụ nyori ọ la ọmyịmyị ọnyọọngịrị ẹ-ẹga nya Adamwụ olepwoohe. (Jem. 2:18) Ọ kaa la dụmwọ ụka kị du agbama jwoo bala ọ-wu ịlọmwụ kpa ẹ-ẹpwụ nya ọmayẹ.​—1 Kọr. 9:25, 27; Tay. 3:2.

4. Nyọka jẹ́-ẹ ri ọngịnyị onyeewe, ịyẹ tị́ du kahị baba nyọka la abwẹla ịlẹ wuu kị gu ẹnyị ụ-ụpwụ nya Ala ịGaletiya 5:22, 23 bala ụpa ịkịla nya ịBayịbụụ?

⁴ Nyọka jẹ́-ẹ hu ọngịnyị onyeewe dakụrụ, ahị baba nyọka nwụ́ abwẹla ịlẹ wuu kị gu ẹnyị ụ-ụpwụ nya Ala ịGaletiya 5:22, 23 bala ụpa ịkịla nya ịBayịbụụ. * Abwẹla ịwẹ á lala ang ọkụrụ-kụrụ ịdatị-datị ịlẹ kahị kaa hu ọnyọnyọọnyị kụrụ ụka ọdatị-datị ka. Iru nya abwẹla ịwẹ ịhyẹ dọmwụ kaa ji ẹpwụ nya ịkịla. Ọ-chụ pwokwita, ó ri ká ọngịnyị ọọnang á háng nya ịlẹhị-ịlẹhị, à ka dọhụ pịlẹẹ bala ọ-họ ọnahị ẹ-ẹga nyamwụ. Ọ-tị ka ri ọngọ ọnyịịla ọlam-ọlam, à ka la dụmwọ bala o-wu ịlọng kpa.

5. Ịyẹ à tị́ ri etu nyọka “la irya ọlẹpwụ nya ịKịrayịsị”? Ịyẹ tị́ du kahị ka jẹ́ ang u-uhye nya ọhịhị nya iJisọsị? (1 Ala ịKọrịntị 2:16)

⁵ Wa 1 Ala ịKọrịntị 2:16. Nyọka jẹ́-ẹ hu ọngịnyị onyeewe dakụrụ, ahị baba nyọka “la irya ọlẹpwụ nya ịKịrayịsị.” Etu nyọọwa ri, ahị ka jẹ́ ang u-uhye nya abwọlẹ ká iJisọsị kaa kụ irya nya ẹla bala ọ-ka gbịlọọ. Ugbe nya olegu nya Ohe chehe a-abwẹla nya iJisọsị kpẹẹkpẹẹ. Jaabwọ ká ụrụrụ nya ọngịnyị jẹ́-ẹ hu gede-gede ẹ-ẹpwụ nya ịnyọ ọlẹ kọ rụ chịra-chịra, ịnyịnyị abwẹla nya iJihova à chehe gede-gede u-uhye nya iJisọsị lẹ. (Hib. 1:3) Jaabwọ kahị wẹẹ kụ irya nya ẹla lala iJisọsị gụ́ olene, ịnyịnyị ahị kaa họ ẹla lala ọwa lẹ, ọọwa tị ka du kahị ka jẹ́-ẹ la abwẹla nyamwụ gụ́ ọwọwa.​—Filip. 2:5.

6. Ẹlịyẹ ahị tị́ ka kpịtịya jaabwọ kahị wẹẹ maga nyọka hu ọngịnyị onyeewe dakụrụ?

⁶ Ọ chịkpẹẹ nyahị ọ-ka dịrẹ ọgụ-ẹpẹtẹ nya  iJisọsị myị́? Ahị ka kụ irya myị́ nyori: ‘IJisọsị la kpẹẹkpẹẹ. Ḿ ka jẹ́-ẹ lala ọwa myị́ ẹnẹnẹhẹ ka!’ Ó ri kọ lang ịnyị aalẹ, kpịtịya nya ẹla ịlẹ. Ọhọhẹ, Ohe họng nyọka lala iJihova bala iJisọsị. Lẹ à ka jẹ́-ẹ chụ nyọka gbịlaa, à tị ka jwọọ họ myị́, pwụ ụbẹẹtụ ọhẹ. (Ọmwụ. 1:26) Oheeye, olegu ịgọgọ nya Ohe à ri ọngịrị ọlẹ kọ gụ́ odehe wuu ẹẹ. Bwula ụbwọ ọdada nyamwụ, à ka họ ang ịlẹ ká ọngịrị nya ịlọng á ka jụ họ ka myị́. Ọhata, iJihova á yẹ ahị guru nyori à ka nwụ ugbe nya olegu ịgọgọ kpẹẹkpẹẹ lẹẹlẹẹ ka. Adahị ọ-la ọháha dọmwụ ya ẹka ụnọ lẹpwụ-lẹpwụ nọ ha angịlẹ kị ka ri ugu nya odehe nyọka wẹ ka la kpẹẹkpẹẹ. (Ọwụ. 20:1-3) Ang ọlẹ ká iJihova tịtọ bwu ẹga nyahị lẹẹlẹẹ ri ọ-ka  họ jaabwọ kahị ka họ ba myị́ bala ọ-ka kpụnịrọọ nyọka dahị ụbwọ.

7. Ẹlịyẹ ahị tị́ wẹẹ ka kụ ẹhị yẹ ugbẹnyị?

⁷ Ányị ahị tị́ ka bwu gbịla iJisọsị kpangga? Ahị ka ya ẹla pyịnyẹng u-uhye nya abwẹla ine ịlẹ ká olegu ịgọgọ nya Ohe kaa ya ha ọngịnyị. Ẹ-ẹpwụ nya ọnyọnyọọnyị, ahị ka yẹ ẹla ọlẹ kahị ka jẹ́ bwu ụgbẹyị ọlẹ ká iJisọsị mẹ abweḷa ọọwa jẹ. Jaabwọ kahị wẹẹ họ ịnyị, ahị ka kụ ẹhị yẹ ịtọ ẹla ịhyẹ ịlẹ kị ka dahị ụbwọ nyọka yẹ abwọlẹ kahị jẹ́ hu ọngịnyị onyeewe dakụrụ kaka ba lẹ.

8. Ányị iJisọsị à tị́ mẹ ọháha jẹ?

⁸ Ọháha okpori-kpori ọlẹ ká iJisọsị la ẹ-ẹga nya iJihova dudu kọ kaa ya ịlọmwụ chị myi kpẹpwụ ha Adamwụ bala ọ-ya ịlọmwụ kiliya hahị. (Jọn. 14:31; 15:13) IJisọsị mẹjẹ jaabwọ kọ la ọháha ẹ-ẹga nya angịnyị kaka ba bwula abwọlẹ kọ kpa ọhịhị nyamwụ odehe ọlẹ. Ahyẹẹnụ ọnyị myị́ ọnyị, ọ kaa mẹ ọháha bala ahyẹẹrwẹrwa jẹ, tụ́ ụka ká angịhyẹ á dọmwụ tọọ pyịpyị. Ụgbẹyị ọkpọnchị ọhẹ ọlẹ kọ bwu mẹ ọháha jẹ ẹ-ẹga nya angịnyị ri ọ-mẹ ẹla nya Ịpyị-Adịrahụ nya Ohe jáa. (Luk. 4:43, 44) IJisọsị mẹ ọháha o-gbu enyi-ka ọlẹ kọ la ẹ-ẹga nya Ohe bala angịnyị jẹ bwula ọ-myị ọnụ nyọka yẹ akama ụ-ụbwọ nya alịhọbịrị gbee kịị nwọọ. Ọọwa lẹ ọ wụrụ ụgbẹyị da hahị wuu nyọka yé ọhịhị ọmyịmyị-ka lẹlẹ.

9. Ányị ahị tị́ ka gbịla iJisọsị ẹ-ẹpwụ nya ọháha ọmẹjẹ?

⁹ Ahị hu ịlọhị ju iJihova ụ-ụbwọ bala o-hu enyi Ohe chajị nyori Adahị olepwoohe háahị ịnyị. Lẹ, lala iJisọsị, ahị ka mẹ ọháha ọlẹ kahị la ẹ-ẹga nya iJihova jẹ bwula abwọlẹ kahị kaa kpa angịnyị. Ọlẹrụ ịJọn da ụpwụ yẹkẹẹ: “Ó ri ká ọngịnyị á la ọháha ẹ-ẹga nya ọngịnyị ehe ọọnamwụ ọlẹ kọ wẹẹ yẹ ẹ-ẹhị ka aalẹ, ọngọọwa á tịtị ka jẹ́-ẹ la ọháha ẹ-ẹga nya Ohe Oluhye Ọngọlẹ kọ jẹ́ juwa yẹ ẹ-ẹhị kpong-kpong ka lẹ ka.” (1 Jọn. 4:20) Ahị ka jẹ́-ẹ tọ ịlọhị ịtọ ẹla ịlẹ: ‘M̀ la ọháha okpori-kporị ẹ-ẹga nya angịnyị? M̀ kaa yẹ ahyẹẹrwẹrwa nya angịnyị, ó ri kị dọmwụ họ ẹla me ahị ka ẹ-ẹga nyam? Ọháha kaa gum gbịla nyọka kpa ụka bala ang ọlẹ kam la da angịkịla ụbwọ nyọka jẹ́ iJihova? M̀ nwụlanọ nyọka họ ịnyị ó ri ká iru nya angịnyị á dọmwụ jẹ́ apyobwuna nya ụkụrwọ ọlẹ kam wẹẹ họ ka lee ó ri kị dọmwụ tụm pyịpyị? M̀ ka jẹ́-ẹ mwahị nya agbẹyị ịlẹ kam ka ya ụka nyam ju ka ẹpwụ nya ụkụrwọ nya ọ-họ ká angịnyị ka ri angịjụgbẹyị gụ́ ọọwa?’​—Efe. 5:15, 16.

10. Ányị iJisọsị à tị́ bwu ri ọngọ họ okpunyi?

¹⁰ IJisọsị ri ọngịnyị nya okpunyi. Ụka ká angịnyị họọ ẹla ọtịpyọ, ọ́ ya ang ọtịpyọ nwaa uri nya ang ọtịpyọ ka. Ma ọ dọmwụ họ kpoye nya ọọwa. Ọ hu ẹta-ẹdịyẹ nyọka họ okpunyi bala ọ-ka ju angịkila ọhụ nyọka myị́ o-wo lawulẹ ka nyaa. Ọ-chụ pwokwita, ọ mẹjáa nyori ị ka họ okpunyi bala aanaa pyii ó ri kị tịtọ ká iJihova ka ye ịgba ọgbagba nyaa myị. (Mat. 5:9, 23, 24) Ọ tị mẹjẹ alẹrụ nyamwụ nyọka hu abwọ la ọ-da awụlẹ ịwẹẹ u-uhye nya ọngọlẹ kọ ri ọngọtụka gụ́ lẹpwụ nyaa.​—Luk. 9:46-48; 22:24-27.

11. Ányị ahị tị́ ka bwu ri ọngọ họ okpunyi?

 ¹¹ Nyọka ri ọngọ họ okpunyi, áhị ka hu abwọ la o-gu ẹla reeji kem ka. Ahị ka jene maga nyọka họ okpunyi bala angịkịla bala ọ-ka ju aanahị ọhụ nyọka myị́ o-wo lawụlẹ ka nyaa. (Filip. 4:2, 3; Jem. 3:17, 18) Ahị ka tọ ịlọhị ịtọ ẹla ịlẹ myị́: ‘Ịyẹ m tị́ nwụlanọ nyọka pehi chajị nyọka họ okpunyi bala angịkịla? Ó ri ká ọọnam ọlẹng lee ọnyang ọhẹ á họ ẹla wụm ẹjẹ, m̀ kaa kpa ẹla nyamwụ ẹ-ẹpwụ? M̀ kaa dayị ká ọngọkịla ọọwa à ka wẹ ka họ okpunyi lee m̀ tị́ kaa jene hu ẹta-ẹdịyẹ nyọka họ okpunyi, ó ri kọ dọmwụ lala o-ri ọngọọwa nyaa ju ọmwụ nya ẹla ọọwa lẹ? Ụka kọ pwoku, m̀ kaa ju angịlẹ kị la o-wo lawụlẹ ka ọhụ nyọka họ okpunyi ẹ-ẹga nya awụlẹ?’

12. Ányị iJisọsị à tị́ mẹ ọnahị jẹ́?

¹² IJisọsị kaa họ ọnahị. (Mat. 11:28-30) Ọ kaa họ ọnahị bwula ọ-la dụmwọ bala ọ-kaa yọyị nya ẹla ẹkpẹ imiiye, tụ́ ụka kọ dọmwụ juwa ẹ-ẹpwụ nya iwe-ahụrụ olujwo. Ọ-chụ pwokwita, ụka ká ọnyang ọla iKenan bịlọọ nyọka họ ọnyị nyamwụ uda, ọ hu ujiji lụka nya ọgbanyẹ ịnọ, ma nyọlẹ kọ yẹ nyori ọ la ọmyịmyị ọtụka lẹ, ọ họ ọnyị nyamwụ uda la ọdụmwọ lẹlẹ. (Mat. 15:22-28) Ịlẹhị lẹ iJisọsị kaa họ ọnahị, ọọwa tị du kọ kaa ya alibyi ka lẹ ka. Ụka ọhẹ ọ kaa mẹ ọnahị jẹ bwula o-ya ẹla chẹẹ je angịlẹ kị họ́ọ. Ọ-chụ pwokwita, ụka ká iPita maga nyọka hu iJisọsị abwọ la ọ-họ ẹla ọlẹ ko ri irya nya iJihova, iJisọsị nwọọ rịrị a-ahị nya angịjụgbẹyị ịkịla. (Mak. 8:32, 33) Ọ́ họ ịnyị nyọka chị oyoyi ju iPita ka, ma nyọka mẹ ẹla jọ́ọ bala ọ-ka da angịjụgbẹyị ịkịla ọna nyọka ri angị gba ju ka ẹpwụ nya ẹla ka ịnyị. Ịlẹhị lẹ iPita ka la ịlọmwụ oyoyi myị́, ma ọ tị yé apyobwuna bwu ẹpwụ nya alibyi ọwẹ.

13. Ányị ahị tị́ ka bwu họ ọnahị ọlam-ọlam?

¹³ Nyọka họ ọnahị ọlam-ọlam ẹ-ẹga nya angịlẹ kị háahị, ụka ọhẹ ahị ka baba nyọka ya ẹlịlẹhị jaa. Ụka ká ja họ ịnyị, gbịla iJisọsị bwụla ọ-ya alibyi nyang kpụnịrọ itiwe nya ehile ịlẹpwụ nya Omyi Ẹla nya Ohe. La dụmwọ. Myị nyori ị la irya nyọka họ ang ọnyịịla. Dahịhile nyori angịlẹ ká iJihova há, ká tị háa ịnyịnyị, ka kpa alibyi ọlẹ ká ya laa ẹ-ẹpwụ nya ọháha họ ụkụrwọ. Tọ ịlọng ịtọ ẹla ịlẹ wo: ‘M̀ la ugbodu ojuju nyọka ya ẹla myị́ ó ri kam yẹ ọngịnyị ọlẹ kọ hám kọ ja họ ang ọtịpyọ? Ó ri kam baba nyọka yalibyi la ọngịnyị, m̀ kaa ya ẹla kpẹnẹẹ, lee m̀ tịị ya ẹla pwaa-pwaa? Ịyẹ à tị́ ri irya nyam du kam wẹẹ yalibyi ọwẹ? M̀ wẹẹ yalibyi ọwẹ chajị nyori ẹla nya ọngọọwa chịm aga ịnyị, lee nyori m̀ tịtọ nyọka dọọ ụbwọ tị́?’

14. Ányị iJisọsị à tị́ mẹ abwẹla ọnyịịla jẹ?

¹⁴ IJisọsị á jẹ́ ang ọnyịịla kem ka, ọ kaa họ ang ọnyịịla ịnyịnyị. IJisọsị la ọháha ẹ-ẹga nya Adamwụ, lẹ ọ kaa họ ang ọnyịịla la irya ọnyịịla ịnyịnyị. Abwẹla ọnyịịla kaa mẹjẹ bwụla abwọlẹ ká apyobwuna nyamwụ kaa chị wu angịkịla. O ri abwẹla ọlẹ kahị kaa mẹjẹ bwula ọ-họ ang ọnyịịla ọlẹ kọ ka da angịkịla ụbwọ. Ọ́ nwa nyọka jẹ́ ang ọnyịịla ọlẹ kahị ka họ kem ka; ahị ka họ ang ọnyịịla ọọwa la irya ọlam-ọlam pyii. Ọngọhẹ tị ka towo myị́: ‘Ọngịnyị ka jẹ́-ẹ họ ang ọnyịịla la irya ọtịpyọ?’ Ee, ọ chịkpẹẹ ịnyị. Ọ-chụ pwokwita, iJisọsị ya ẹla rụ́ angịlẹ kị kaa da ikpehika ụbwọ, ma kị kaa họ ká angịkịla ka jẹ́ ang ọlẹ kị hu ha. Nanana nyori ang ọnyịịla ị họ wẹ lẹ, iJihova á chị ọkẹkẹnị balaa ka.​—Mat. 6:1-4.

15. Ányị ahị tị́ ka bwu ri ọngịnyị ọnyịịla ọlam-ọlam?

¹⁵ Ụka kahị họ ang ọnyịịla la irya ọlam-ọlam kem, ahị ka jẹ́-ẹ ri ọngịnyị ọnyịịla ịnyịlẹhị wẹẹ lẹ. À ka tịlọng wo myị́ nyori: ‘M̀ ri ọngọlẹ kọ jẹ́ ang ọnyịịla kem ka, kọ kaa hu ang ọọwa họ kpịlọ? Irya ọlanyị à tị́ du kam kaa họ ang ọnyịịla?’

16. Ẹlịyẹ ahị tị́ ka họ ẹnụ myị́ ẹnụ? Ịyẹ à tị́ du?

¹⁶ Ahị kụ irya ẹnẹnẹhẹ nyori ụka kahị hu enyi Ohe lẹ aalẹ, ụkụrwọ nyọka la abwẹla onyeewe cheju lẹ ka. Ahị baba nyọka kpahị ju “awụrụ onyeewe” nyahị ọwẹ. Ụgbẹyị ọhẹ ọlẹ ahị ka jẹ́-ẹ họ ịnyị ri ọ-ka mwahị nya iwe ịlẹ kahị ka ya ugbe nya olegu ịgọgọ chehe ẹnụ myị́ ẹnụ. Ịyẹ à tị́ du? Chajị iJihova ri Ohe ọ-la kpịra-kpịra, olegu nyamwụ ri ọngịrị ọlẹ kọ la kpịra-kpịra ịnyịnyị. (Ọmwụ. 1:2) Lẹ ụpa ọnyị myị́ ọnyị nya ugbe nya olegu ịgọgọ ka jẹ́-ẹ guhi gbịla nyọka họ ụkụrwọ. Ọ-chụ pwokwita, ọngọjụgbẹyị iJemsi da ụpwụ yẹkẹẹ: ‘Ọmyịmyị ọlala ọlẹ kọ kaa kpa ụkụrwọ ọnyịịla ọhọhọ chị ịlọmwụ ehe ka ri ogu.’ (Jem. 2:26) Ịnyịnyị ọ la ẹ-ẹga nya apa ịkịla nya ugbe nya olegu nya Ohe lẹ. Ụka myị́ ụka kahị yaa chehe ọ-ọhịhị nyahị, ahị wẹẹ mẹjẹ nyori olegu nya Ohe à wẹẹ kpahị họ ụkụrwọ lẹ.

17. Ányị ahị tị́ ka họ ó ri kahị jẹ́ ya ugbe nya olegu chehe ka ụka ọhẹ?

¹⁷ Ọ kaa la angịnyị nya ịKịrayịsị ịlẹ kị dọmwụ hu enyi Ohe la ẹka ịmanyị tị́ lẹ ujwo ụka ọhẹ nyọka ya ugbe nya olegu ịgọgọ chehe. Ma ang ọlẹ kahị baba nyọka họ ri, abwọ á ka chịịhị pyẹpyẹ ka. Kụ irya nya ọ-chụ pwokwita ọlẹ wẹẹ. Ó ri ká awụrụ nyang ọlẹ kọ háng gụ́ wụụ á gu ene, à ka ya daarụ i-ijata? Ehe. À ka maga nyọka gọọ tịrẹkpẹ ó ri ká ọọwa á chịkpẹẹ. À tị ka dụmwọ-dụmwọ lọọ ụka ká gọọ kpá. Ịnyịnyị-ịnyịnyị, ó ri ká mịleji ụka ọhẹ ẹ-ẹpwụ nya ọ-họ ẹla la ọnahị, ọhụ ọ-da pịlẹẹ, lee ọháha ẹ-ẹga nya ọngọhẹ aalẹ, ọkịlẹtụ a kpụng enyi ka. Ụbwọ ọ-ya beji bwu ọkịlẹtụ ka dụbwọ nyọka nwụla igu oriri nyang bala ọngọọwa. Nwụlanọ nyọka jẹ́-ẹ họ hiigu gụ́ ọọwa ụka ọkịla.

18. Ẹlịyẹ ahị tị́ ka jẹ́ myị̀myị̀?

¹⁸ Ahị chị ọkẹkẹnị yẹẹyẹẹ nyọlẹ ká iJisọsị ya ọgụ-ẹpẹtẹ da hahị! Jaabwọ kahị wẹẹ gbịla abwọlẹ ká iJisọsị kaa kụ irya nya ẹla gụ́ olene, ịnyịnyị ọ kaa chịhị kpẹẹ la ọ-ka họ ẹla lala ọwọwa lẹ. Jaabwọ kahị tị wẹẹ họ ẹla lala iJisọsị gụ́ olene, ịnyịnyị ahị jẹ́-ẹ ya awụrụ nya abwẹla onyeewe kụrụ ịlọhị gụ́ ọwọwa lẹ. Ẹ-ẹpwụ nya ang ọjẹ́jẹ ọlẹ, apa ine nya ugbe nya olegu nya Ohe ahị kụ ẹhị yẹ kem lẹ. À ka hu ụka nyang nọ myị́ nyọka kụ ẹhị yẹ apa ihihi nya ugbe nya olegu bala ọ-ka kụ irya u-uhye nya abwọlẹ á ka bwu kpa abwẹla ịịwa họ ụkụrwọ myị́? À ka yẹ ang ọjẹ́jẹ ịmanyị-manyị u-uhye nya egbeju nya ẹla ọwẹ ụ-ụpwụ ọlẹ ko ri Research Guide for Jehovah’s Witnesses e-ekpeleji nya ẹla ọlẹ ko ri “Christian Life,” ká ka ẹga nya “Fruitage of the Spirit.” Jẹ́ myị̀myị̀ nyori ó ri ká maga yẹẹyẹẹ bwu ụpa nyang, iJihova ka dang ụbwọ nyọka jẹ́-ẹ hu ọngịnyị onyeewe dakụrụ bala ọ-ka kpọọ ụ-ụwa.