Ịyẹ à tị́ du ká ọngọlẹ kị wụrụ nya ‘Ọlẹng Ọhẹ’ ya nyori ọwa nyị ka “kụ abwabwọ” ẹ-ẹga nya ang-ugu nyamwụ kori kọ ye iRutu? (IRutu 4:1, 6)

Kori ká ọlẹng ọlẹ kọ yẹ ahụ lẹ á gbu la ọ-ma ọnyị ka lụka onyogo, ịyẹ à tị́ kaa kọ họ ta ọpyị nyamwụ? Ẹnyị nya ugbiyegu nyamwụ ka byi pyịyọọ? Ehile nya iMosisi ya ẹla u-uhye nya ịtọ ẹla ịwẹ.

Ịyẹ à tị́ ka họ ta ọpyị nya ọlẹng ọlẹ ko gbu lee kọ hu ọpyị nyamwụ ra chajị nya ang ọlala ka? Ọọnamwụ lee ọngọkịla ọlẹ kọ bwu balọọ chii ka kele kaka nyọ́ọ̄, lee ọ-ra ọpyị ọọwa tịrẹkpẹ. Lẹ ọpyị ọọwa ka ri ịnya ugbiyegu ọọwa wẹẹ.—Liv. 25:23-28; Ọwa. 27:8-11.

Ányị ị tị́ ka họ ká ẹnyị nya ọngọlẹ kọ gbu wẹ ka byi ka? Ọnyịnịna nya ọngọlẹ kọ gbu wẹ ka chị ahụ-ogu ọọwa ida ye, jaabwọ kọ la ẹ-ẹga nya iRutu. Ọnyịnịna ọlẹng nya ọngọlẹ kọ gbu ka ye ahụ-ogu ọọwa chajị nyọka ma ọnyi ọlẹ kọ ka ri ẹnyị nya ogu oleji bala o-ri ang-ugu nyamwụ. Obyi omeme ọnyịịla ọwẹ kaa kpahị ju ahụ-ogu ịnyịnyị.—Ehile. 25:5-7; Mat. 22:23-28.

Kụ ẹhị yẹ oja nya iNawumi wẹẹ. Ọlẹng ọlẹ kị wụrụ nya Elimẹlẹkị à yoo lẹ. Ụka ká Elimẹlẹkị bala anyị nyamwụ imiiye gbu, ọnyị ọlẹng ọhẹ-lọhẹ á ji nyọka kpẹhị rịrọọ kaka. (Rut. 1:1-5) Ụka kị nyà tịrẹkpẹ wẹ iJuda, iNawumi byi iRutu ahụ nya ọnyị nyamwụ nyị ka ka tọ iBowasị kọ ka ra ọpyị nyaa tịrẹkpẹ mẹ. Chajị ọwa bala Elimẹlẹkị ọrụmwụ bwu yẹẹyẹẹ. (Rut. 2:1, 19, 20; 3:1-4) Ma iBowasị jẹ́ nyori alugbiyegu nyaa ọhẹ ká ịBayịbụụ wụrụ nya ‘Ọlẹng Ọhẹ,’ nyị juwa kọ bwu balaa gụ́ ọwa ayịdang. Lẹ ọngọọwa a pwoku họhẹ-họhẹ nyọka rọọ tịrẹkpẹ lẹ.—Rut. 3:9, 12, 13.

Lụka nya ọgbanyẹ, ‘Ọlẹng Ọhẹ’ ọwẹ myị nyọka da ụbwọ. (Rut. 4:1-4) Nanana nyori ọọwa ka bịrọọ okpoko pwụ ẹgẹhẹ, ọ jẹ́ nyori iNawumi nyị́ ka jẹ́-ẹ ma ọnyị ọlẹ kọ ka la ang-ugu nya Elimẹlẹkị kaka. Ọlẹng Ọhẹ ọwẹ à ka la ọpyị ọọwa ẹẹ, ọ tị ka ri ang-ugu nyamwụ ịnyịnyị. Lẹ, ọ lala ọhyị ọnyịịla nya-à wẹ.

Ma Ọlẹng Ọhe ọwẹ yẹ irya nyamwụ da ụka kọ jẹ́ nyori ọ ka ye iRutu ịnyịnyị. Ọ yẹkẹẹ: “Ọ tị tị ri ịịwe aalẹ, ḿ myị ọnụ nyọka rọọ kaka. Chajị ó-ri kam myị ọnụ, m ka kụ abwabwọ ẹ-ẹga nya ang-ugu ọlala nyam ẹnẹhẹ myị wẹẹ.” (Rut. 4:5, 6) Ịyẹ à tị́ dudu kọ yẹ irya nyamwụ da?

Kori ká ọlẹng ọwẹ lee ọngọkịla á ye iRutu kpụ kọ ma ọnyị ọlẹng, ọnyị ọọwa à ka ri ugu nya ọpyị nya Elimẹlẹkị lẹ. Lẹ, ányị ọọwa à tị́ wẹẹ ka du ká Ọlẹng Ọhẹ ọwẹ “ka kụ abwabwọ ẹ-ẹga nya ang-ugu ọlala nyamwu”? ỊBayịbụụ á ya kpangga ka, ma ang ịmanyị-manyị ịlẹ kọ du kọ ka la ịnyị myị́ lẹẹ.

• Ọhọhẹ, okpoko ọlẹ kọ ya ra ọpyi ọọwa ka ri ododu, chajị ọpyị nya Elimẹlẹkị á ka ri nyamwụ kịlahị kaka. Ọpyị ọọwa ka tịrẹkpẹ wẹ ka ri ịnya ọnyị nya iRutu.

• Oheeye, ụkụrwọ nyọka mwahị nya ang oriri bala ọ-ka kpẹhị rịrị iNawumi bala iRutu ri ịnyamwụ lẹ.

• Ọhata, kori ká iRutu á ma anyị ha Ọlẹng Ọhẹ ọwẹ, ị ka ga ang-ugu ọọwa bala anyị ịkịla nya ọlẹng ọwẹ ịnyịnyị.

• Ohene, kori ká ọlẹng ọwẹ á ma ọnyị ọkịla ọhẹ ka aalẹ, ọnyị ọlẹng ọlẹ ká iRutu ma à ka ri ugu nya ọpyị nya Elimẹlẹkị bala ịnya ọlẹng ọwẹ lẹ. Ụka ká ọlẹng ọwẹ a gbu kpá, ọpyị nyamwụ ka ri ịnya ọnyị ọlẹ kọ myị ẹnyi nya Elimẹlẹkị, ọkọkọ nya ẹnyị nya ọlẹng ọwẹ. Ang-ugu nya ọlẹng ọwẹ baba họọ kpoye nyọka da iNawumi ụbwọ. Lẹ ọ họ́ọ gụ́ nyọka tụụbwọ hi iwe ọwẹ ha iBowasị kọ ri ọngọ bọọba nyọka jẹ́-ẹ rọọ tịrẹkpẹ. IBowasi họ ịnyị “chajị ká ẹnyị nya ogu oleji á ka byi hi ugbiyegu nyamwụ” ka.—Rut. 4:10.

Ang-ugu nya Ọlẹng Ọhẹ ọwẹ bala ẹnyị nyamwụ baba họọ gụ́. Irya nya ịlọmwụ kem a ji ọkịlẹtụ nyamwụ ụka wuu lẹ. Ma uya ọlẹ kọ wẹẹ ma chajị ká ẹnyị nyamwụ ka byi ka ri ododu, chajị áhị jẹ́ ẹnyị nya ọlẹng ọọwa alẹ ka. Iwe nya ang ọnyịịla ọhẹ ọlẹ ká ịBowasị la myị́myị́ nyọọ, kọ ri o-ka ri ọngọhẹ ẹ-ẹpwụ nya adịda orogo-orogo nya iJisọsị ịKịrayịsị. Ocheju ọtịpyọ à wẹ ha ọngọlẹ kị wụrụ nya Ọlẹng Ọhẹ lẹ, chajị nyọlẹ kọ pwa la ọ-da ọngịnyị ọlẹ kọ la ọbaba ụbwọ!—Mat. 1:5; Luk. 3:23, 32.