1-2. Ịyẹ à tị́ kaa họ ụka ká angịnyị-ị́ ja hu enyi Ohe? Ẹlịyẹ a tị́ ka kụ irya ju?

 À JUWA i-ijata ụka ká angịnyị ja hu enyi Ohe ẹnẹhẹ lẹ? À wo jaabwọ kị nwụlanọ kaka ba ụka kị ja wẹ ịtọ ẹla imiiye ene nyọka hu enyi Ohe? À yẹ nyori alugbiyegu bala aligu nyaa chị ọkẹkẹnị. Ụka kị gba angị wẹẹ hu enyi Ohe kpehe bwu ẹpwụ nya enyi, à wo la abwọ odudu bala ọ-yẹ jaabwọ kị chị ọkẹkẹnị kaka ba. Chị odehe ọnụ wuu, angịnyị lala ụnọ ịmanyị tị́ kaa hu enyi Ohe wẹ ka ri Alibeenu nya iJihova epwihi ọnyị myị́ ọnyị.

² Ahụ tị bẹ? Kori ká ja kụ irya nyọka hu enyi Ohe aalẹ, à ri ọngịnyị ọlẹ kọ datị ẹ-ẹpwụ nya odehe onyobyi ọlẹ, chajị à wẹẹ tịtọ nyọka ‘gbịgba ha iJihova.’ (Eje. 14:1, 2) Ị tị da egbeju nya ẹla ọlẹ chajị nyang, kori ká ri onjwo lee ọngọgbahị wẹwẹ. Ma ahị angịlẹ kahị dọmwụ hu enyi Ohe ene lẹ kaa tịtọ nyọka ju eje ọchịchị nyahị ọngịrị nyọka gbịgba ha iJihova gboyi myị́ oyi. Lẹ ahị kụ ẹhị yẹ ang ịta lẹpwụ nya ang odudu ịlẹ kahị kaa gbịgba ha iJihova mẹ.

3. Ịyẹ tị́ du ká ẹlịlẹhị bala abwẹla ọnyịịla kaa há anchẹ nya iJihova? (Eje Ọnyịịla 119:128, 163)

³ IJihova da angịnyị nyamwụ ehile yẹkẹẹ: “Ẹla nya ịlẹhị ọyaya . . . ā haanụ.” (Sẹk. 8:19) IJisọsị byi angị kaa bọọ jẹ nyori nyị ku abwẹla ọnyịịla. (Mat. 5:6) Etu nya ọọwa ri ọngịnyị ka baba nya o-cheje la ọngịrị-ọngịrị nyọka họ ang ọlẹ kọ la kpakpa, ri ọnyịịla, bala ọ-la cheri-cheri a-ahị nya Ohe Oluhye. Abwẹla ọnyịịla bala ẹla nya ịlẹhị háng ahụ? Ahị jẹ́ myị̀myị̀ nyori ọ háng. Ọnọọkịla bala ang ịtịpyọ ịkịla wuu wụng ẹjẹ. (Wa Eje Ọnyịịla 119:128, 163.) Kori ká ọngịnyị á kaa me ọnọọkịla aalẹ, Ohe Onyobyi, kọ ri ọngọ kpa odehe ọlẹ ụ-ụbwọ ọ wẹẹ gbịla lẹ. (Jọn. 8:44; 12:31) Ịngịhyẹ ọlẹ ká Olegu Onyobyi tịtọ  ri ọ-ka bịrị ẹnyị ọlịgọgọ nya iJihova Ohe Oluhye. Ọ kaa kpa ịnịịkịla pyẹ ebile ba Ohe nyahị bwu ụka ọlẹ kọ la egbeju ọngịrị i-iku nya iden gbee daalẹ wẹẹ. Ọ kaa tịtọ ká angịnyị ka yẹ iJihova lala Ọngọ kpeji ọtịpyọ ọlẹ kọ kaa yẹ ịlọmwụ-ịlọmwụ kem bala ọ-kaa wu ang ọnyịịla kpa hi angịnyị ehe. (Ọmwụ. 3:1, 4, 5) Ịnịịkịla nya Ohe Onyobyi du ká angịnyị kaa kpa ẹhị ọtịpyọ yẹ iJihova. Kori ká ọngịnyị á myị la ọháha ẹ-ẹga nya “ẹla nya ịlẹhị” ka, Olegu Onyobyi ka kpọọ họ abwẹla ịtịpyọ ụma ịnyị myị́ ịnyị myị́.—Rom. 1:25-31.

4. Ányị iJihova à tị́ mẹjẹ nyori ọ “ri Ohe Oluhye ọ-họ ẹla ọnụ-ọnụ”? (Yẹ ifoto ịnyịnyị.)

⁴ IJihova ri “Ohe Oluhye ọ-họ ẹla ọnụ-ọnụ,” ọ tị kaa mẹ ẹlịlẹhị jẹ angịlẹ kị la ọháha ẹ-ẹga nyamwụ ịnyịnyị. (Eje. 31:5) Bwula ọ-họ ịnyị, ọ daa ụbwọ du ká Olegu Onyobyi á jẹ́-ẹ kpa ịnịịkịla pyịraa ju ka. IJihova kaa mẹjẹ anchẹ nyamwụ kị ka họ ẹla ọnụ-ọnụ bala abwẹla ọnyịịla ịnyịnyị. Ọọwa du kị kaa la ihi bala ọ-la okpunyi nya ọkịlẹtụ. (Etu 13:5, 6) Ọ họ ịnyị hang nyọlẹ ká jẹ́ ẹla ọla ịBayịbụụ lẹ? À wẹ ka yẹ nyori agbẹyị nya iJihova há ha angịnyị ehe wuu, tụ́ng ahụ la ịlọng. (Eje. 77:13) Lẹ ọ kaa háng nyọka họ ang ọlẹ ká Ohe yẹ nya abwẹla ọnyịịla. (Mat. 6:33) À tịtọ nyọka mẹ ẹlịlẹhị jẹ angịkịla bala ọ-daa ụbwọ kị ka jẹ́ nyori ẹla ọlẹ ká Olegu Onyobyi ya ba iJihova Ohe nyahị ri ọnọọkịla. Ányị ahị tị́ ka bwu họ ịnyị?

5. Ányị a tị́ ka bwu chẹkpẹ ju ẹlịlẹhị bala abwẹla ọnyịịla?

⁵ À ká jẹ́-ẹ hịhị ụ-ụgbẹyị ọlẹ ká ọng myị́ ọng ka yẹ gede-gede nyori à pwa ịnịịkịla nya Ohe Onyobyi bala o-ri à ya ụbwọ chị ẹlịlẹhị giri-giri. À ye iJihova myị lala Ọngọlẹ kọ chịla nyọka kpeji, bala o-ri à tịtọ nyọka họ ang ọlẹ kọ ya nyị la kpakpa. Ányị a tị́ ka bwu họ ịnyị? Ya je iJihova ẹ-ẹpwụ nya abwọ ọrịrị nyori à hu ịlọng jwoo ụ-ụbwọ lẹ, ọọwa a hu enyi Ohe lẹlẹ. Ọháha ọlala ẹ-ẹga nya ẹlịlẹhị bala abwẹla ọnyịịla à kaa gu ọngịnyị gbịla nyọka hu enyi Ohe lẹ.

6. Ẹlịyẹ Eje Ọnyịịla 45:4 à tị́ ya du ká iJisọsị ịKịrayịsị ka háng?

⁶ Ịyẹ tị́ du ká iJisọsị ịKịrayịsị háng? Yẹ ang odudu ịhyẹ lẹẹ ụ-ụpwụ nya Eje Ọnyịịla 45:4. (Wọọ.) Ẹlịlẹhị bala ẹla ọ-họ kpakpa há Jisọsị, ọ tị kaa kpịlọmwụ keji ịnyịnyị. Kori ká ẹlịlẹhị bala abwẹla ọnyịịla á háng aalẹ, ang odudu ká iJisọsị ịKịrayịsị háng tịtị la gbagbịla ịnyịnyị. Kụ irya u-uhye nya abwọlẹ ká iJisọsị chị ẹkpẹ  ju ẹlịlẹhị bala abwẹla ọnyịịla la ugbodu ojuju wẹẹ. (Jọn. 18:37) Ma, ányị iJisọsị à tị́ bwu mẹjẹ nyori ịlọhị ọ-kpa keji baba?

7. Ịyẹ à tị́ kpụng ịpyọ gụ́ wuu ẹ-ẹga nya iJisọsị ọ-kpịlọmwụ keji?

⁷ Abwẹla nya iJisọsị mẹjẹ nyori ọ kpa ịlọmwụ keji. Ọ-chụ pwokwita, ọ kaa ya ogbo nya ẹla ọnyị myị́ ọnyị ha Adamwụ ụka wuu, ọkọkọ nya ịlọmwụ. (Mak. 10:17, 18; Jọn. 5:19) Ányị ọ tị́ lang nyọlẹ ká iJisọsị kaa kpa ịlọmwụ keji ịịwẹ? Ọọwa-á gung gbịla nyọka la ọháha ẹ-ẹga nya Ọnyị nya Ohe bala ọ-ka bọọ jẹ ka? Aadụ. Ịyẹ tị́ du ká iJisọsị kpa ịlọmwụ keji? Chajị ọ la ọháha ẹ-ẹga nya Adamwụ kọ ri ọngọ kaa kpa ịlọmwụ keji, ọ tị kaa họ ẹla gbịlọọ ịnyịnyị. (Eje. 18:35; Hib. 1:3) Ẹla nya iJisọsị á kpụng ịpyọ jaabwọ kọ kaa gbịla abwẹla nya Adamwụ kpẹẹkpẹẹ wẹ ka?

8. Ịyẹ tị́ du kọ háahị nyọlẹ ká iJisọsị à ri Adịrahụ nyahị?

⁸ Ọ háahị nyọlẹ ká iJisọsị ri Adịrahụ nyahị chajị ọwa à ri Ọngọ kpeji ọlẹ kọ há gụ́ wuu ẹẹ. IJihova lịlọmwụ à mẹ ang jẹ Ọnyị nyamwụ ene kọọ chwọọ nyọka kpeji lẹ. (Ayị. 50:4, 5) Kụ irya ịnyịnyị u-uhye nya ọháha ọlẹ ká iJisọsị la du kọ kaa chị ịlọmwụ imyi kpẹpwụ wẹẹ. (Jọn. 13:1) Nyọlẹ ká iJisọsị à ri Adịrahụ nyahị wẹẹ, ọ chịla kọ ka háahị yẹẹyẹẹ. Ọ ya nyori ọwa nyị kaa wụrụ angịlẹ kị la ọháha ẹ-ẹga nyamwụ nyị aligu nya ọwa, angịịwa nyị tị kaa mẹ ọháha nyaa jẹ bwula ọ-ju ihi nya ehile nyamwụ. (Jọn. 14:15; 15:14, 15) O ri ihi ọtụka-ọtụka nyọka ri oligu nya Ọnyị nya iJihova!

9. Ányị enyi Ohe ohuhu nyahị à tị́ me ịnya ịKịrayịsị?

⁹ IJisọsị ya ehile ọhẹ ha angị bọọ jẹ nyori nyị ka hu enyi Ohe. (Mat. 28:19, 20) Ọ tị ya ọgụ-ẹpẹtẹ ọọwa deeji ịnyịnyị. Enyi Ohe ohuhu nyamwụ datị hi ịnya angị kaa bọọ jẹ a-agbẹyị ịhyẹ. (Yẹ akpa ọlẹ kọ ri “ Ọdatị nya Enyi Ohe Ohuhu nya IJisọsị Bala Ịnya Angị kaa Bọọ Jẹ.” Ma ị tị me awụlẹ a-agbẹyị ịkịla. Ụka ká iJisọsị hu enyi Ohe, ọ mẹ ịlọmwụ jẹ nyọka họ irya nya Adamwụ. (Hib. 10:7) Ụka ká angịjụgbẹyị nya ịKịrayịsị á hu enyi Ohe alẹ, ị mẹjẹ a-ahị nya alụma nyori ị hu ịlaa ju iJihova Ohe Oluhye ụ-ụbwọ lẹ. Irya nya Ohe ị ka hu kụ ịlahị ẹ-ẹpwụ nya ọhịhị ọkọkọ nya ịnya ịlaa lẹlẹ. Lẹ ọgụ-ẹpẹtẹ nya Ayịbaba nyaa ị wẹẹ dịrẹ lẹ.

10. Ịyẹ tị́ du ká ọháha ọlẹ ká la ẹ-ẹga nya iJisọsị ka gung gbịla nyọka hu enyi Ohe?

¹⁰ À myị́ nyori iJisọsị à ri Ọnyẹwẹ nya iJihova lẹ, à tị́ chị ọkẹkẹnị nyọlẹ ká ọwa à ri Adịrahụ ọlẹ ká Ohe chụ nyọka kpẹhị rịrịịhị. À yẹ nyori iJisọsị kaa kpịlọmwụ keji, ọ tị kaa gbịla Adamwụ kpẹẹkpẹẹ ịnyịnyị. À jẹ́ nyori ọ ya ang oriri ha angịlẹ ká imyi nwụ, ọ ya ẹjẹ ọkpụ́kpụ ha angịlẹ ká ọkịlẹtu kpaa enyi, bala ọ-dọmwụ họ alẹdụrụ uda. (Mat. 14:14-21) À yẹ jaabwọ kọ wẹẹ kpa ọjịra-jịra nya angịnyị nyamwụ ụgbẹyị alẹ. (Mat. 23:10) À tị jẹ́ nyori lala Adịrahụ, ọ ka dọmwụ họ gụ́ ọwẹ ị-Ịpyị-Adịrahụ nya Ohe wẹẹ. Ányị a tị́ ka mẹjẹ nyori ọ háng? Bwula ọ-dịrẹ ọgụ-ẹpẹtẹ nyamwụ. (Jọn. 14:21) À ka jẹ́-ẹ dọmwụ nyọka họ ịnyị bwula o-hu ịlọng ju iJihova ụ-ụbwọ bala o-hu enyi Ohe.

11. Ẹlịyẹ a tị́ ka ya kọ ri ẹla ọkpọnchị gụ́ wuu du ká ọngịnyị ka hu enyi Ohe? Ịyẹ tị́ du kọ lịnyị?

¹¹ Ẹlịyẹ à tị́ ri ẹla ọkpọnchị gụ́ wuu ọlẹ kọ du ká ọngịnyị ka hu enyi Ohe? IJisọsị ya ehile nya Ohe ọlẹ kọ gụ́ wuu nyọlẹ kọ yẹkẹẹ: “Ọngọlahị Ohe Oluhye nyang ka háng nya ịlẹhị-ịlẹhị bwu ẹpwụ nya ọkịlẹtụ nyang wuu, bwu ẹpwụ nya ugbodu okpukpuru nyang wuu, bwu ẹpwụ nya irya omeme nyang wuu, bwu ẹpwụ nya ọngịrị nyang wuu ịnyịnyị.” (Mak. 12:30) Ị-ịwẹ ọháha ọlẹ ka la ẹ-ẹga nya Ohe à la lẹ?

12. Ịyẹ tị́ du ká iJihova háng? (Yẹ ifoto ịnyịnyị.)

¹² Ang lụmẹ-lụmẹ ji ịlẹ kị du ká iJihova ka háahị. Ọ-chụ pwokwita, à wẹ ka yẹ nyori ọwa a “ri ẹmwụ-enyi nya ọhịhị lẹ” bala o-ri ẹga nyamwụ “ang o-hu ha ọnyịịla ọnyị myị ọnyị wuu bala ang ọgahị ọkpẹẹkpẹẹ” à kaa bwu lẹ.” (Eje. 36:9; Jem. 1:17) Ang ọnyịịla ọnyị myị́ ọnyị ọlẹ ká la bwu ẹga nya Ohe nya ọháha, ọngọlẹ kọ kaa hu ha pyẹ ụbwọ maa.

13. Ịyẹ tị́ du ká iya ọkịlaakịla ri āhị ọnyịịla-ọnyịịla?

¹³ Iya ọkịlaakịla ri āhị ọnyịịla-ọnyịịla ọlẹ ká iJihova ya hahị. Ịyẹ tị́ du kahị ka jẹ́-ẹ ya ịnyị? Kụ irya nya igu ọlẹ ká iJihova bala Ọnyị nyamwụ ri la apatabwọ kiwa ka wẹẹ. IJisọsị ya nyori ọwa nyị “há Ohe Oluhye Adịda lụmẹ” bala ‘Ohe Oluhye Adịda há ọwa nya ịlẹhị-ịlẹhị.’ (Jọn. 10:17; 14:31) Igu oriri nyaa la ọngịrị gụ́ ọwọwa ẹ-ẹpwụ nya ẹka uku-ụnọ ịmanyị tị́ ọlẹ kị hụ lawụlẹ. (Etu 8:22, 23, 30) Kụ irya nya abwọlẹ kọ ka jụ́ Ohe kaka ba nyọlẹ kọ ya iwe da ká Ọnyị nyamwụ yẹ akama gbee kọọ gbu wẹẹ. Angịnyị ehe wuu tụ́ng ahụ ayịdang, há iJihova yẹẹyẹẹ du kọ myọnụ nyọka ya Ọnyị ọlịkẹjẹ nyamwụ kiliya chajị ká ahụ bala angịkịla ka jẹ́-ẹ hịhị gboyi myị́ oyi. (Jọn. 3:16; Gal. 2:20) Ang ọkpọnchị ọlẹ kọ ka du ká Ohe ka háahị à wẹ lẹ.

14. Ịyẹ à tị́ ri ang ọlẹ kọ há gụ́ wuu nyọka chụ ẹ-ẹpwụ nya ọhịhị?

¹⁴ Ọháha ọlẹ ká la ẹ-ẹga nya iJihova nwà  kịlahị nyọlẹ ká jẹ́ ang gụ́ ọọwa u-uhye nyamwụ lẹ. Ọ tị la gede-gede nyori à tịtọ nyọka tụ jwoo chwẹẹ lẹẹlẹẹ gbee da ọhịhị ọmyịmyị-ka. À tị ka jẹ́-ẹ họ ịnyị myị́. Ọ wẹẹ jung ọhụ nyọka họ ẹla ọlẹ kọ ka kpa ọkẹkẹnị wọọ. (Etu 23:15, 16) À ka jẹ́-ẹ họ ịnyị bwula abwẹla nyang, ọ́ ka ba ẹ-ẹla ọla ọnụ kem ka. Ụgbẹyị ọlẹ ká kaa bwu kpa ọhịhị nyang ka mẹjẹ nyori iJihova háng ịlẹhị. (1 Jọn. 5:3) Ang ọlẹ kọ há gụ́ wuu ẹ-ẹpwụ nya ọhịhị ká ka chụ à wẹ ẹẹ.

15. Ányị a tị́ ka bwu mẹ ọháha ọlẹ ká la ẹ-ẹga nya iJihova jẹ́?

¹⁵ Ányị a tị́ ka bwu mẹ ọháha ọlẹ ká la ẹ-ẹga nya iJihova jẹ́? Họhẹ-họhẹ, à raabwọ ọdatị ọhẹ kpụ a hu ịlọng ju Ohe nya ịlẹhị ụ-ụbwọ. (Eje. 40:8) Ọọwa lẹ, a mẹ ịlọng o-hu ju Ohe ụ-ụbwọ ịbaa-ịbaa ọọwa jẹ alụma bwula enyi Ohe ohuhu lẹlẹ. Jaabwọ kahị ya ẹ-ẹpwụ nya ang ọjẹ́jẹ ọlẹ ụka ọhẹ lẹ, enyi Ohe ohuhu nyang ri ụka nya ọkẹkẹnị bala ẹla ọkpọnchị ẹ-ẹpwụ nya ọhịhị nyang. À dọmwụ nyọka la ọhịhị onyeewe, kọ ri ọ-ka hịhị ha iJihova ọkọkọ nya ịlọng. (Rom. 14:8; 1 Pit. 4:1, 2) Ẹlẹwẹ me eje ọchịchị ọlẹ kọ la kpọnchị, ọ tị lịnyị ịlẹhị. Ma ọ tị wụrụ ụgbẹyị da nya ọhịhị ọlam-ọlam. Ányị ọ tị bwu lịnyị?

16. Ịyẹ Eje Ọnyịịla 41:12 à tị́ ya ká iJihova ka họ ha angịlẹ kị kaa kpa ọhịhị nyaa wuu gbịgba họọ?

¹⁶ IJihova à ri Ọngọlẹ kọ kaa hu ha pyẹ ụbwọ maa gụ́ wuu ẹẹ. Jaabwọ myị́ abwọ ká hu họọ kaka ba, ọ ka jẹ́-ẹ hu hang kpoye nya ọọwa pyii lẹ. (Mak. 10:29, 30) Ọ ka họ a ka la ọhịhị ọkpịpyọ, bala ọ-wahị kụrụng yẹẹyẹẹ ẹ-ẹpwụ nya odehe ọlẹ kọ dọmwụ tịpyọ lẹẹ. Ọwẹ tị ri ọmwụ ọdada wẹẹ. Ẹdịyẹ ọlẹ ká dọmwụ bwula enyi Ohe ohuhu wẹ á chịla kọ ka la ocheju ka. À ka jẹ́-ẹ kịnyaa la ọ-gbịgba ha Adang ọ-la ọháha gboyi myị́ oyi. Ọháha ọla ẹpwarịrị nyang bala Adang ka nwà ka ịlahị-ịlahị, à tị ka hịhị gboyi myị́ oyi jaabwọ ká ọwa wẹẹ hịhị ịnyịnyị.—Wa Eje Ọnyịịla 41:12.

17. Ịyẹ a tị́ ka jẹ́-ẹ ya ha iJihova kọ la ang ọọwa ene lẹka?

¹⁷ Ụka ká hu ẹta-ẹdịyẹ nyọka hu ịlọng ju Ohe ụ-ụbwọ bala o-hu enyi Ohe, à ka la iwe nyọka jẹ́-ẹ hu ịngịhyẹ ọnyịịla-ọnyịịla ha Adang. Ọwa à ya ang ịnyịịla-ịnyịịla bala ang ịlẹ wuu kị du kahị kaa chị ọkẹkẹnị hahị lẹ. Ahụ  ịnyịnyị ka jẹ́-ẹ ya ịngịhyẹ ọlẹ ká Ọngọ họ epwoohe bala odehe wuu la lẹka họọ. Ang ọọwa ri ọ-ka godayị giri-giri bala ọ-gbịgba họọ bwu okiletu. (Job. 1:8; 41:11; Etu 27:11) Ịngịhyẹ ji kọ há gụ́ ọwẹ la ọ-ka kpa ọhịhị nyang họ wẹẹ? Ịwẹẹ ọdada á juwa ka, ọháha ọlẹ ká la ẹ-ẹga nya iJihova à ri ang odudu ọlẹ ká ka hu enyi Ohe lẹ.

18. Ịtọ ẹla iyina a tị́ ka tọ myị́?

¹⁸ Lẹ, à ka hu enyi Ohe lẹ? Ahụ la ịlọng à ka jẹ́-ẹ wẹ ịtọ ọwẹ lẹ. Ma ọ ka dụbwọ kori ká tọ ịlọng wo nyori, ‘Ịyẹ m tị́ wẹẹ godayị gbe ene kam ka hu enyi Ohe?’ (Ụkụr. 8:36) Kpịtịya nya ẹla ịta ịlẹ kahị kụ ẹhị yẹ wẹ. Ọhọhẹ, ẹlịlẹhị bala abwẹla ọnyịịla háng. Tọ ịlọng wo, ‘Ọ ka hám nyọka yẹ ahyẹẹnụ ọlẹ ká ọng myị́ ọng wuu ka ya ẹlịlẹhị bala ọ-họ ang ọnyịịla?’ Oheeye, iJisọsị ịKịrayịsị háng. Tọ ịlọng wo, ‘M̀ tịtọ ká Ọnyị nya Ohe ka ri Adịrahụ nyam bala ọ-tịtọ nyọka dịrẹ ọgụ-ẹpẹtẹ nyamwụ?’ Ọhata, kọ tị baba gụ́ wuu ri, iJihova háng. Tọ ịlọng wo, ‘M̀ tịtọ ká iJihova ka chị ọkẹkẹnị tam bwula ọ-gbịgba họọ lala Ohe nyam?’ Kori ká wẹ ịtọ ẹla ịwẹ nyị ee aalẹ, ịyẹ à tịị wung kpa la ọ-hu enyi Ohe? Ịyẹ a tịị godayị gbe?—Ụkụr. 16:33.

19. Ịyẹ tị́ du á ka họ atịmẹ ẹ-ẹga nya enyi Ohe ohuhu ka? Ọ-chụ pwokwita oyina à tị́ ji? (ỊJọn 4:34)

¹⁹ Kori ká ja họ atịmẹ la ọ-ka hu enyi Ohe aalẹ, kụ irya ju oja ọ-chụ kpịta nya iJisọsị ọhẹ lẹẹ. (Wa ịJọn 4:34.) Jẹ́ nyori iJisọsị chụ irya nya Adamwụ ọhọhọ kaka pwoku ang oriri. Ịyẹ tị́ du? Ang oriri há hahị. IJisọsị jẹ́ nyori ang myị́ ang ọlẹ ká iJihova byihi nyị họ há hahị. IJihova á tịtọ kahị ka họ ịngịngịhyẹ ọlẹ kọ ka kpa akama wahị ka. IJihova tịtọ ká ka hu enyi Ohe? Ee. (Ụkụr. 2:38) Lẹ, jẹ́ myị̀myị̀ nyori à ka yé apyobwuna bwula o-ju ihi nya ehile ọlẹ kọ da nyori ahị nyị hu enyi Ohe. Kori á kaa họ atịmẹ la o-ri ang oriri ọlẹ kọ kaa háng yẹẹyẹẹ ka, ịyẹ tị́ du ká ka họ atịmẹ ẹ-ẹga nya enyi Ohe ohuhu?

20. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

²⁰ Ịyẹ a tị́ wẹẹ godayị gbe? Angịhyẹ ka wẹ myị yẹkẹẹ: “Ḿ nwụlanọ lẹka.” Ẹlịlẹhị tị ri eje ọchịchị nyọka hu ịlọng ju iJihova ụ-ụbwọ bala ọ-ka hu enyi Ohe à ri eje ọchịchị ọlẹ kọ baba gụ́ wuu ká ka jẹ́-ẹ chị ẹẹ. Lẹ à baba nyọka kụ irya yẹẹyẹẹ ju eje ọchịchị ọwẹ, ọ tịị ye ụka bala o-ju ụkụrwọ ẹ-ẹpwụ nyọka nwụlanọ. Ma kori kọ ri irya nyang ịlẹhị nyọka hu hu enyi Ohe, ịyẹ a tị́ ka họ lẹẹlẹẹ nyọka nwụlanọ? Ahị ka kụ ẹhị yẹ ọwẹwẹ nya ịtọ ọwẹ ẹ-ẹpwụ nya ang ọjẹ́jẹ ọkịla.