Ọgba nya ịBayịbụụ ọkpịpyọ-kpịpyọ ọwẹ yẹkẹẹ: “A ka yẹ ẹ-ẹgẹhẹ jaabwọ kị juwa yẹ ọlẹbyahị ụhị juwa họọ ri kịrọrọ myị. Ọọwa a lang ahịbwuu koo. Olegbeju ọnyị myị ọnyị ji ekpeleji nya ọngịrị nya olegbeju ọlịlahị nyamwụ. Ịwa angị imimiiye tị myịmyị ji ekpeleji nya ọngịrị nya olegbeju ọlịlahị ọlẹ kọ gwaa wẹẹ.”​—Ọngọ. 5:8.

Ẹ-ẹhị nya ọngịnyị ehe, ẹla ọwẹ chabwọ nya angịnyị ehe ịlẹ kị la ọngịrị nya eji ọkpakpa. Kori ká tị kụ irya jwoo kpori-kpori, ẹlẹwẹ mẹ ẹlịlẹhị ọhẹ jẹ́ẹhị u-uhye nya iJihova ọlẹ kọ ka ya ẹjẹ ọkpụ́kpụ bala ahị ọdahile hahị.

Ọngọlirya 5:8 ya ẹla u-uhye nya ọngọkpeji ọlẹ kọ kaa kpa ikpehika ẹkpa ri eji bala ọ-haa ẹla ọkịrọrọ. Ọngọkpeji ọọwa baba nyọka kpịtịya nyori, ọngọhẹ ọlẹ kọ hụhụ o-okoji awụrụ ọ-gụ ịnyamwụ juwa kọ wẹẹ yẹ ang ịlẹ kọ wẹẹ họ. Angịkịla tị ka juwa ịlẹ kị hụhụ o-okoji awụrụ ọ-gụ ịnya ọngọọwa myịmyị wẹẹ. Ọ tị tolujwo lụmẹ nyori, ẹ-ẹpwụ nya eji ọkpakpa nya angịnyị ehe, alegbeju ịwẹ wuu ka ri angị họ ẹla ọkịrọrọ, dudu ká angịnyị ịlekpeleji nyaa kaa yẹ akama ọọlajị nya ẹla ịkịrọrọ ịwẹ myị́.

Ma, kori kọ dọmwụ lala o-ri ahị ọdahile nyị́ ji ẹgẹgẹhẹ kaka, ahị ka ye ẹjẹ ọkpụ́kpụ nyọka jẹ́ nyori iJihova kaa yẹ ang ịlẹ ká angịkpeji wẹẹ họ. Ahị ka jẹ́-ẹ bịlẹ ụbwọ ọdada bwu ẹga nya Ohe Oluhye bala ọ-pẹhi akama nyahị jwoo ụ-ụbwọ. (Eje. 55:22; Filip. 4:​6, 7) Ahị jẹ́ nyori iJihova kaa “kpa ẹhị nyamwụ yọyị tụ odehe ọlẹ da wuu, kọ ka ya ọngịrị ha ọng myị ọng ọlẹ kọ kpa ọkịlẹtụ nyamwụ myị lọọ kpẹẹkpẹẹ.”​—2 Ego. 16:9.

Lẹ, Ọngọlirya 5:8 kpụhị ịtịya nya iwe-ahụrụ nya odehe ọlẹ kahị ji bala o-ri angịkpeji wuu la ọngọhẹ ọlẹ kọ hụhụ o-okoji awụrụ ọ-gụ ịnyaa. Ọlẹ kọ tị gụgụ wuu ri, ọgba ọwẹ kpụhị ịtịya nyori iJihova à ri Ọngọkpeji ọlẹ kọ gụgụ wuu lẹ. Ọ wẹẹ kpeji lẹẹlẹẹ bwula Ọnyị nyamwụ iJisọsị, kọ ri Adịrahụ nya Ịpyị-Adịrahụ nya Ohe. Ohe Agụgụ, kọ wẹẹ yẹ ọng myị́ ọng bala ang myị́ ang wuu, kaa họ ẹla kpẹẹkpẹẹ. Ịnyị iJisọsị Ọnyị nyamwụ à tị la ịnyịnyị lẹ.