1-2. Ányị ẹla ọlụpwụ nya Ọngọlirya 11:6 bala ẹrụ ọnyịịla ọ-kpa pyẹ à tị́ gu awụlẹ?

Ẹ-ẸPWỤMA ịhyẹ, angịnyị kaa ye ẹrụ ọnyịịla myị la ọkẹkẹnị. O ri ang ọlẹ kị dayị gbe lụka ọtata lẹ. Ẹ-ẹpwụma ịkịla, ẹla nya Ohe Oluhye lee ịBayịbụụ-ụ́ kaa háa nwà ka. Ányị iru nya angịnyị lụmẹ-lụmẹ à tị́ kaa họ u-uhye nya ẹrụ ọnyịịla o-oye nyang ahụ? Jaabwọ myị́ abwọ kị kaa họ, iJihova tịtọ kahị ka kịnyaa la o-ya ẹrụ ọnyịịla gbee kọ ka ya nyị nwà lẹ.

² Ụka ọlẹ ká iJihova hu nọ nya ẹrụ ọnyịịla ọ-kpa pyẹ á cheju lẹ, “ọmyịmyị nya odehe” à ka pweeji ẹẹ. (Mat. 24:14, 36) Ányị ahị tị́ ka họ chajị kahị ka jẹ́-ẹ kpa ẹrụ ọnyịịla pyẹ gbee ká iJihova ka ya nyị nwà lẹ?​—Wa Ọngọlirya 11:6.

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ẹ-ẹpwụ nya ang ọjẹ́jẹ ojene nya ọlẹ, ahị kụ ẹhị yẹ ang ine ịlẹ kahị baba nyọka họ chajị kahị ka jẹ́-ẹ “durwe nya angịnyị” yẹẹyẹẹ. (Mat. 4:19) Ang ọjẹ́jẹ ọlẹ ka ya ẹla u-uhye nya agbẹyị ịta ịlẹ kahị ka bwu ju eje ọchịchị nyahị ọngịrị u-uhye nya ọ-kpa ẹrụ ọnyịịla pyẹ ẹ-ẹpwu nya iwe-ahụrụ ọnyị myị́ ọnyị kahị ji. Ahị ka jẹ́ ang u-uhye nya ang odudu kahị baba kahị ka (1) yẹhị ju ẹrụ ọnyịịla ọ-kpa pyẹ, (2) ju ugbodu, bala (3) kpa ọmyịmyị ọnyọọngịrị kịnyaa.

4. Ịyẹ tị́ du kahị ka yẹhị ju ụkụrwọ ọlẹ ká iJihova ya hahị nyị họ?

⁴ IJisọsị ya neeji, iwe-ahụrụ bala ang ịlẹ kị ka ri ang ẹjẹẹ nya ahyẹẹnụ ihyẹẹkpẹ. Ọ jẹ́ nyori ang ịwẹ ka du ká angịjụgbẹyị nyamwụ ka yẹhị ju ụkụrwọ ka myị́. O byi angịjụgbẹyị nyamwụ ya nyị, “gbeji giri-giri.” (Mat. 24:42) Ụka nya iNuwa, ang lụmẹ-lụmẹ chị angịnyị ochuchuu dudu kị ke ụrụ wo ọna ọdada nyamwụ  ka, ang ịlịnyịịnyị tị jam alẹ. (Mat. 24:37-39; 2 Pit. 2:5) Chajị nyọọwa lẹ, ahị tịtọ kahị ka yẹhị ju ụkụrwọ ọlẹ ká iJihova ya hahị nyọka họ.

5. Ányị ụpwụ nya Ụkụrwọ nya Alẹrụ 1:6-8 à tị́ chabwọ jaabwọ kị ka kpa ẹrụ ọnyịịla pyẹ kaka ba?

⁵ Ahị baba nyọka yẹhị ju ụkụrwọ nya ẹla nya Ịpyị-Adịrahụ alẹ. IJisọsị ya nyori angịjụgbẹyị nyọwa nyị ka kịnyaa la ẹrụ ọnyịịla ọ-kpa pyẹ ụka kọọwa nyị́ gbu kpá, ụkụrwọ ọọwa tị ka pyẹ pwụ ẹga ọlẹ kọọwa lịlọmwụ-ụ́ jẹ pwụ ka. (Jọn. 14:12) Nyọlẹ ká iJisọsị gbu kpá, angịjụgbẹyị nyamwụ ịhyẹ tịrẹkpẹ ka olurwe enyi. Ụka ọlẹ kọ tị wuleji bwula igu kpá, ọ họ ụkụrwọ ẹbyẹbyị kpụ angịjụgbẹyị nyamwụ ịhyẹ wu iyenyi lụmẹ-lụmẹ. IJisọsị kpa ụka ọwẹ ya jaa chajị kị ka jẹ́ yẹẹyẹẹ nyori ụkụrwọ nyọka durwe nya angịnyị ehe nyị baba gụ ụkụrwọ ọkịla ọhẹ-lọhẹ. (Jọn. 21:15-17) Ene ká iJisọsị wẹẹ ka rụ ka epwoohe, o byi angịjụgbẹyị nyamwụ nyori ụkụrwọ nya ẹrụ ọnyịịla ọ-kpa pyẹ ọlẹ kọ dọmwụ nyị ka pyẹ kpoye nya epweji nya ala Isirẹlụ. (Wa Ụkụrwọ nya Alẹrụ 1:6-8.) Ẹka lụmẹ-lụmẹ ku ẹkpẹ nyọọwa, iJisọsị mẹ ang ịlẹ kị ka họ la “ẹnụtụrụ nya Ọngọlahị” * jẹ ịJọn a-arụrụ. Ọhẹ nya ang ịlẹbyẹbyị ịlẹ ká ịJọn yẹ ri olegu-ẹrụ ọlẹ kọ kpa “ẹrụ ọnyịịla o-gbe oyi myị́ oyi” kaka ya pyẹ ju ‘alepwoja myị́ epwoja, bala alụpwọma myị́ ụpwọma, bala aloja myị́ oja, bala angịnyị myị́ angịnyị wuu.’ (Ọwụ. 1:10; 14:6) Ọ la gbagbịla nyori, o ri irya nya iJihova hahị alẹ ịnyịnyị kahị ka kpa ẹrụ ọnyịịla ọwẹ pyẹ gbee pwụ ocheju.

6. Ányị ahị tị́ ka bwu yẹhị ju ụkụrwọ nya ẹrụ ọnyịịla ọ-kpa pyẹ?

⁶ Ahị ka jẹ́-ẹ yẹhị ju ụkụrwọ nya ẹrụ ọnyịịla ọ-kpa pyẹ kori kahị kụ irya u-uhye nya ang ịlẹ wuu ká iJihova wẹẹ họ nyọka dahị ụbwọ. Ọ-chụ pwokwita, ọ wẹẹ ya ang oriri nya olegu hahị yẹẹyẹẹ, la abwụma nya apwụ ị-da kpehe, apwụ ịla ịwẹbsayịtị, omyi ẹla bala  ifim ịkịla-ju, bala ịla intanẹtị ịnyịnyị. Kụ irya wẹẹ: Ẹla ịla ịwẹbsayịtị nyahị juwa o-òja lụmẹ-lụmẹ gụ ụnọ ookpokpo! (Mat. 24:45-47) Ẹ-ẹpwụ nya odehe ọlẹ ká angịnyị chị ebwo hi awụlẹ ọọlajị nya upe, ịgba ọgbagba, bala o-ri angịhyẹ la ang, angịkịla á tị la ka, anchẹ nya iJihova gụ uku ineku yẹjula awụlẹ lala aanịna chị odehe ọlẹ ọnụ wuu. Ọ-chụ pwokwita, ẹnụ nya ịFụrayịdee, ẹnụtụrụ iwo kụrụ ihikichu nya Ọya Ohene 2019, Alibeenu nya iJihova chị odehe ọnụ wuu yẹjula awụlẹ jẹ́ ang ọjẹ́jẹ nya ụtụrụ. Lobyi nya ẹnụmwụ ọọwa, iru nya angịnyị angị uku iwo imiiye, da ụnọ ohu ihikichu da ụnọ iwo kụrụ ihikichu, da iwo ine kụrụ ookpokpo (20,919,041), tụguru nyọka họ ọ-Họ Kpa Kpịtịya nya Igu nya iJisọsị. Kori kahị kụ irya u-uhye nya ihi ọlẹ kahị la nyọka yẹ ang ịkpịpyọ-kpịpyọ ịlẹ kị wẹẹ họ lẹẹlẹẹ bala ọ-ka lụbwọ ẹ-ẹpwụ nyaa, ọ kaa guhi gbịla nyọka yẹhị ju ụkurwọ nya ẹla nya Ịpyị-Adịrahụ.

7. Ányị ọgụ-ẹpẹtẹ nya iJisọsị à tị́ dahị ụbwọ nyọka yẹhị ju ụkụrwọ?

⁷ Ụgbẹyị ọkịla ọhẹ ọlẹ kahị ka jẹ́-ẹ bwu yẹhị ju ẹrụ ọnyịịla ọ-kpa pyẹ ri ọ-ka gbịla ọgụ-ẹpẹtẹ nya iJisọsị. Ó ya iwe da ịngịngịhyẹ chọọ ochuchuu la ọ-ka kpa ẹrụ ọnyịịla pyẹ ka. (Jọn. 18:37) IJisọsị á mileji ụka ọlẹ ká Olegu Onyobyi mọọ yẹ la “ịpyị-adịrahụ nya odehe ọlẹ wuu, bala ụdụ ọkpụkpụ ịtụka ịlẹpwụ nyaa, bala ihi ọlala ịlẹpwụ nyaa wuu” ka, lee ọ-mileji ụka ká angịnyị tịtọ nyọka hwoo nya adịrahụ la agbụrụ ka. (Mat. 4:8, 9; Jọn. 6:15) Ụmaa nya ang ụdụ ọlala á wẹ irya nyamwụ ka, ọtụpyịpyị nya angịkịla á tị chị uhi jwoo ka ịnyịnyị. (Luk. 9:58; Jọn. 8:59) Ụka kahị gbachị iwe-ahụrụ ịlẹ kị ka ma ọmyịmyị nyahị yẹ, ahị ka jẹ́-ẹ yẹhị ju ụkụrwọ kori kahị kpịtịya nya ẹla ọlẹ ká ọlẹrụ ịPọlụ ya. O ju Angịnyị nya ịKịrayịsị ọhụ chajị kị ka dịrẹ ọgụ-ẹpẹtẹ nya iJisọsị chajị ká ‘abwọ á ka chaa pyẹpyẹ, lee ọ-ka kpụ ịbwọ ẹ-ẹpwụ nya ọkịlẹtụ ka’!​—Hib. 12:3.

8. Ịyẹ à tị́ ri ugbodu ojuju? Ányị à tị́ du kọ baba yẹẹyẹẹ lẹẹlẹẹ?

⁸ Ugbodu ojuju ri ọ-ka jẹ́-ẹ dahị kpẹnẹẹ gbe ụka ká iwe-ahụrụ ka yẹda. Ugbodu ojuju baba ẹ-ẹpwụ nya iwe-ahụrụ ịdatị-datị. Ahị ka tịtọ ká iwe-ahụrụ ọtịpyọ ọhẹ ka cheju hiihi myị́ lee ahị juwa dayị gbe ang ọnyịịla ọhẹ lụka ọtata lẹ. Ọlọmwụ ịHabakuku mama nya ụka ọlẹ ká ọkwọ ogugu ọla iJuda ka cheju. (Hab. 1:2) Angịjụgbẹyị nya iJisọsị yẹhị rịrị nyori Ịpyị-Adịrahụ nya Ohe Oluhye ka ‘hyehe ahyaahị,’ kọ ka gbaa kpehe bwu eji ọkpakpa nya ala iRom. (Luk. 19:11) Ahị tịtọ ká Ịpyị-Adịrahụ nya Ohe Oluhye ka yeji, kọ ka tụ ọkwọ ogugu kịnyaa bala ọ-ka ya odehe onyeewe yeji, ẹgẹlẹ ká angị ju ihi nya Ohe kem à ka ji. (2 Pit. 3:13) Ma, ahị baba nyọka ju ugbodu bala ọ-dayị gbe ụka ọlẹ ká iJihova hu nọ. Kụ ẹhị yẹ agbẹyị ịhyẹ ịlẹ ká iJihova kaa mẹjẹ́ẹhị nyọka ju ugbodu wẹẹ.

9. Ọ-chụ pwoku iyina à tị́ mẹjẹ nyori iJihova kaa ju ugbodu?

⁹ IJihova ya ọgụ-ẹpẹtẹ ọkpẹẹkpẹẹ nya ugbodu ojuju deeji. Ọ ya ụka ọlẹ kọ ka nwà ha iNuwa nyọka kọ ụmwụ bala ọ-ka ‘ya ẹla dodehe rụ abwẹla ọnyịịla nya Ohe.’ (2 Pit. 2:5; 1 Pit. 3:20) IJihova ke ụrụ ụka ọlẹ ká Ebiraham wẹẹ tọ ịtọ ẹla mwụba-mwụba u-uhye nya eje ọchịchị nyamwụ nyọka ta alepweji nya ịSọdọm bala iGomora ayịreji. (Ọmwụ. 18:20-33) Ẹ-ẹpwụ nya ẹka lụmẹ-lụmẹ, iJihova ju ugbodu nyịlẹhị-ịlẹhị bala ẹpwụma nya ala Isirẹlụ ịlẹ kị la ọmyịmyị ka. (Neh. 9:30, 31) Ahị yẹ ang ẹjẹẹ nya ugbodu ojuju nya iJihova alẹ jaabwọ kọ wẹẹ ya ụka da ha ọng myị́ ọng wuu ịlẹ kọ tịtọ kị ka ri aligu nyamwụ kị ka jẹ́-ẹ “yẹ irya da.” (2 Pit. 3:9; Jọn. 6:44; 1 Tim. 2:3, 4) Ọgụ-ẹpẹtẹ nya iJihova du kahị ka ju ugbodu jaabwọ kahị wẹẹ kịnyaa la ẹrụ ọnyịịla ọ-kpa pyẹ bala ọ-mẹ ang jẹ. Ọ myịmyị mẹ ang jẹ́ẹhị  u-uhye nya ugbodu ojuju bwula ẹla ọ-chụ pwokwita ọhẹ ọlẹ kọ juwa o-omyi ẹla nyamwụ.

10. Ẹlịyẹ ọ-chụ pwokwita nya ọlẹrụ ọlụpwụ nya iJemsi 5:7, 8 à tị́ mẹjẹ́ẹhị?

¹⁰ Wa iJemsi 5:7, 8. Ọ-chụ pwoku nya ọngọ wu ẹrụ mẹ abwọlẹ kahị ka bwu ju ugbodu jẹ́ẹhị. Ịnyịlẹhị lẹ, ang ẹrụ ịhyẹ kaa nwà la agaga. Ma, ang ẹrụ ịkịla kaa tata ene kị ka há, ọgụgụụgụ ri ịlẹ kị kaa nwụ́ egbe. Ụka nya ẹrụ owuwu ọlọpyị nya Isirẹlụ kaa la ọya ịrwọnyẹ. Ọlẹrụ kaa ya ajẹ nya ang tọ ụka nya Ohe ọ-chị enyi chị eji nya ọgbanyẹ, ọ tị kaa waa ụka ká enyi ohyẹẹkpẹ á do kpá. (Mak. 4:28) Ọ ka ri ẹla ọjẹ́jẹ kori kahị gbịla ugbodu ojuju nya ọlẹrụ. Ma, ọ tị ka ri ang olujwo myị́.

11. Ányị ugbodu ojuju à tị́ kaa dahị ụbwọ ẹ-ẹpwụ nya ẹrụ ọnyịịla ọ-kpa pyẹ?

¹¹ Angịnyị ehe ịlẹ kị la kpẹẹkpẹẹ ka kaa tịtọ ká ịngịngịhyẹ ọlẹ kị họ ka rwẹjẹ haa i-ijata. Ma, kori ka tịtọ ká ang ẹrụ nyang ka há yẹẹyẹẹ, à ka kpẹhị jwoo ụka myị́ ụka​—à ka wu ẹrụ, ya ang tọ, họ ụkọ jwoo lee ọ-kpa enyi jwoo. Kori kahị tịtọ ká angịkịla ka ri angịjụgbẹyị aalẹ, ahị ka kịnyaa la ọ-họ ụkụrwọ nyịlẹhị-ịlẹhị ịnyịnyị. Ọ kaa chịkpẹẹ ha angịlẹ kahị-ị̀ mẹ ang jẹ nyọka kpahị ju angịnyị bala ọ-hwabwọ la ọ-yẹ oye-oye i-ijata ka. Ugbodu ojuju nyahị ka dahị ụbwọ kahị ka la ọkịlẹtụ okpenyi ụka kahị gbachị iwe-ahụrụ ịjụjụ ka. Ụka ká angịhyẹ á nwụlanọ nyọka ke ụrụ bala ọ-jẹ́ ang wẹwẹ, ahị ka ju ugbodu. Áhị ka jẹ́-ẹ byi ọngọlẹ kahị kaa mẹ ịBayịbụụ jẹ nyị la ọmyịmyị la agbụrụ ka. Ụka ọhẹ, angịjụgbẹyị nya iJisọsị á dọmwụ kaa wo etu nya ang ọlẹ kọ mẹjẹ ahyaahị ka. (Jọn. 14:9) Ahị kpịtịya nyori, ahị ka ya ẹjẹ nya ang tọ bala ọ-kpa enyi jwoo myị́, ma Ohe à kaa họ kọ kaa nwà lẹ.​—1 Kọr. 3:6.

12. Ányị ahị tị́ ka mẹ ugbodu ojuju jẹ ụka kahị juwa ya ẹla nya Ohe ju alugbiyegu nyahị ịlẹ kị ri Alibeenu nya iJihova ka?

¹² Ọ ka lahị ujwo nyọka la ugbodu ojuju myị́ ụka kahị juwa ya ẹla nya Ohe ju alugbiyegu nyahị ịlẹ kị ri Alibeenu nya iJihova ka. Ẹla ọlụpwụ nya Ọngọlirya 3:7 ka jẹ́-ẹ dahị ụbwọ.  O yẹkẹẹ: “Ụka nya ujiji ohuhu ji, ụka nya ẹla oyaya ji ịnyịnyị.” Abwẹla ọnyịịla nyahị ka jẹ́-ẹ da alugbiyegu nyahị ụbwọ nyọka ke ụrụ myị́, ma ahị tị ka nwụlanọ ụka myị́ ụka nyọka ya ẹla nya iJihova jaa. (1 Pit. 3:1, 2) Ahị kaa ju ugbodu bala ọng myị́ ọng wuu, tụ́ alugbiyegu nyahị, jaabwọ kahị wẹẹ ya ẹla nya Ohe bala ọ-mẹ ang jẹ la ila ọchịchị.

13-14. Ọgụ-ẹpẹtẹ nya ugbodu ojuju iyina ahị tị́ ka jẹ́-ẹ gbịla?

¹³ Ahị ka jẹ́ ang u-uhye nya ugbodu ojuju bwu ọgụ-ẹpẹtẹ nya angị la ọmyịmyị ịlẹpwụ nya ịBayịbụụ bala ịlụka nyahị. ỊHabakuku charịnya nya ụka ọlẹ ká ang onyobyi ka myị́, ma ọ mẹ ugbodu ojuju nyamwụ jẹ bwula o-yẹkẹẹ: “M̀ ka . . . hụ gbe ọ-ka wo ẹla ọlẹ ká [iJihova] ka ya.” (Hab. 2:1) Ọlẹrụ ịPọlụ ya nyori ọwa nyị tịtọ nyọka họ ụkụrwọ nyọwa “cheju” myị́. Ma, ọ kịnyaa la ọ-ka “kpa ibeenu oriri nya ẹrụ ọnyịịla . . . nya Ohe Oluhye ya pyẹ je angịnyị” la ọngịrị-ọngịrị ẹ-ẹpwụ nya ugbodu ojuju.​—Ụkụr. 20:24.

¹⁴ Kụ irya nya ọ-chụ pwokwita nya ahụ bala ọrụ ịhyẹ ịlẹ kị kpehe bwu ube-ụpwụ nya Gilead, kị yaa du ka ẹpwụma ọlẹ ká angị ịmanyị-ịmanyị à ri Alibeenu nya iJihova ụ-ụwa, bala o-ri ịgba ọgbagba ọlẹ kọ juwa á ri ịnya angịnyị nya ịKịrayịsị ka wẹẹ. Angị ịmanyị-ịmanyị à kaa tịtọ nyọka jẹ́ ịBayịbụụ lẹ. Ma, angịkịla ịlẹ kị kpehe bwu ube-ụpwụ nya Gilead lawụlẹ, kịị họ ụkụrwọ ẹ-ẹpwụma ịkịla kaa jaa oja nya angịlẹ kịị jẹ́ ịBayịbụụ ta bala ọ-dụbwọ wẹ ka ri Alibeenu nya iJihova. Ma, ahụ bala ọrụ ọwẹ kịnyaa la o-ya ẹla nya Ohe, nanana nyori iru nya angịnyị-ị́ kaa myị ke ụrụ ka. Nyọlẹ kị ya ẹla nya Ohe lala ẹka ineku kpá ẹ-ẹga ọlẹ kọ lala o-ri ọngọngọhẹ nyị́ ka myị ke ụrụ kaka, ị chị ọkẹkẹnị nyọlẹ ká ọngọ ookpokpo bwu ẹpwụ nya angịlẹ kị kaa jẹ́ ang ta hu enyi Ohe. Ẹlịyẹ ahị tị́ jẹ́ u-uhye nya ọ-chụ pwokwita ọlụka onyogo bala ọlụka nyahị ịwẹ? Anchẹ ịla ọmyịmyị ịwẹ á pwuru amwụ ka, ị kịnyaa la ọ-kpa ẹrụ ọnyịịla pyẹ, iJihova tị wahị kụrwaa chajị nya ugbodu ojuju nyaa. Lẹ, ahị juwa “ba ọgụ-ẹpẹtẹ ọnyịịla nya angịlẹ kị juwa kpa ọmyịmyị ọlala bala ugbodu ojuju ye ugu nya ọ-họ jịra nya ọnụ ọmyịmyị ịlẹ wuu ká Ohe Oluhye myị” mẹ.​—Hib. 6:10-12.

15. Ụgbẹyị oyina ọmyịmyị à tị́-ị̀ ju eje ọchịchị nyahị ọngịrị nyọka ya ẹla Ohe?

¹⁵ Ahị myị ju ẹla ọlẹ kahị wẹẹ kpa ka ya, lẹ ahị tịtọ kahị ka ya ju angịnyị jaabwọ myị́ abwọ kahị ka ya ba myị́. Ahị dahịhile ọnụ ọmyịmyị ịlẹ kị juwa ẹ-ẹpwụ nya Ụpwụ Ịgọgọ. (Eje. 119:42; Ayị. 40:8) Ahị yẹ jaabwọ ká ọmwụ ọyẹyẹ ịla ịBayịbụụ wẹẹ họ jịra lụka nyahị. Ahị yẹ jaabwọ ká angịnyị kaa yẹ ọhịhị nyaa da ka ọ-hágu ụka kị dọmwụ nya ọ-kpa ẹla ọlẹpwụ nya ịBayịbụụ họ ụkụrwọ. Ọọwa dudu kahị jẹ́ myịmyị gụ olene nyori ẹrụ ọnyịịla nya Ịpyị-Adịrahụ ọlẹ ri ẹla ọlẹ ká ọng myị́ ọng baba nyọka wo.

16. Jaabwọ ká Eje Ọnyịịla 46:1-3 ya, ányị ọmyịmyị ọlala ẹ-ẹga nya iJihova bala iJisọsị à tị́ ka ju eje ọchịchị nyahị ọngịrị nyọka ya ẹla Ohe?

¹⁶ Ahị myị́myị́ la ọmyịmyị ẹ-ẹga nya iJihova, ọngọlẹ kọ la ẹrụ ọnyịịla ọlẹ kahị wẹẹ kpa ka ya pyẹ, bala ẹga nya iJisọsị ọngọlẹ kọ hu nya Adịrahụ nya Ịpyị-Adịrahụ nyamwụ. (Jọn. 14:1) Iwe-ahụrụ ọnyị myị́ ọnyị kahị ji, iJihova ka ri ẹga ọkpịbaa bala ọngịrị nyahị ụka myị́ ụka wuu. (Wa Eje Ọnyịịla 46:1-3.) Ọ-da ọọwa u-uhye, ahị jẹ́ nyori iJisọsị wẹẹ kpa ụkụrwọ nya ẹrụ ọnyịịla ọ-kpa pyẹ ọlẹ ụgbẹyị bwu epwoohe bwula ọngịrị ọlẹ ká iJihova ya jwoo ụ-ụbwọ.​—Mat. 28:18-20.

17. Joja ọhẹ ọlẹ kọ mẹjẹ ang odudu kahị baba nyọka kịnyaa la ọ-kpa ẹrụ ọnyịịla pyẹ wẹẹ.

¹⁷ Ọmyịmyị ọlala du kahị-ị̀ jẹ́ myị̀myị̀ gụ olene nyori iJihova ka wahị kụrụ aga ọmama nyahị a-agbẹyị ịlẹ kahị dọmwụ me irya ka. (Ọngọ. 11:6) Ọ-chụ pwokwita, ụnọ ịmanyị tị́  nya angịnyị kaa yẹ jaabwọ kahị kaa ya apwụ guru ị-ịtẹbwụrụ lee ịcart. Ụgbẹyị ọ-kpa ẹrụ ọnyịịla pyẹ ọwẹ há-à wẹẹ? Ee, ọ há. Kingdom Ministry nya Ọya Ọkụrụ Ọhọhẹ nya 2014 ya ẹla u-uhye nya ọnyị olube-ụpwụ ọchụma ọhẹ ọlẹ kọ tịtọ nyọka da ụpwụ u-uhye nya Alibeenu nya iJihova. Ọ́ jẹ́ ẹga ká Ube nya Ịpyị-Adịrahụ ji ka, ma ọ yẹ ẹga ọlẹ kị kaa ya apwụ nyahị guru ị-ịtẹbwụrụ u-ube-ụpwụ. Ụ-ụwa, ọ ye ẹla ọlẹ kọ ka kpa da ụpwụ ọọwa. Ọ nọ chẹẹ lẹ, ọ wẹ ka ri Olibeenu nya iJihova, hu enyi Ohe, kpụ o ye ịlahị nya ụgbẹyị ẹẹ. Oja ịlịịwẹ kaa guhi gbịla nyọka kịnyaa la ọ-kpa ẹrụ ọnyịịla pyẹ, chajị ị mẹjẹ nyori angịhyẹ juwa ịlẹ kị baba nyọka wo ẹrụ ọnyịịla wẹẹ.

18. Ịyẹ tị́ du kahị jẹ́ nyori ụkụrwọ nya ẹrụ ọnyịịla ọ-kpa pyẹ ka cheju jaabwọ ká iJihova tịtọ?

¹⁸ Ahị jẹ́ nyori ụkụrwọ nya ẹrụ ọnyịịla nya Ịpyị-Adịrahụ ọ-kpa pyẹ ka cheju ụka ọlẹ kọ pwoku. Kụ irya nya ẹla ọlẹ kọ họ lụka nya iNuwa wẹẹ. IJihova mẹjẹ nyori o ri ọngọ ba ụka jẹ kpẹẹkpẹẹ. Lala ẹka ohu da iwo imiiye (120) ene nya Ukpenyi, iJihova ya neeji ụka ọlẹ ká Ukpenyi ọwẹ ka dọmwụ kpangga. Ẹka lụmẹ-lụmẹ ẹ-ẹkpẹ nyọọwa, iJihova byi iNuwa nyị kọ ụmwụ nya enyi. Lala ẹka iwo ine lee iwo ịrụ ene nya Ukpenyi ọtụka ọwẹ, iNuwa kịnyaa la ọ-họ ụkụrwọ la ọngịrị nyamwụ wuu. Nanana nyori angịnyị á ke ụrụ wo ẹla nyamwụ ka, o ya ọna ọdada nya iJihova dodehe gbee ká iJihova byoo nyị kpa iyo ka ẹpwụ nya ụmwụ mẹ. Ọọwa, ụka ọlẹ kọ pwoku lẹ, iJihova à “tụ ụgbẹyị nya ụgbọ ọọwa ku la ịlọmwụ lẹlẹ.”​—Ọmwụ. 6:3; 7:1, 2, 16.

19. Ịyẹ ahị tị́ ka jẹ́-ẹ yẹhị rịrị gbe kori kahị yụbwọ mwịịnyọ ka?

¹⁹ Lụka o-kpii, iJihova ka chị ẹrụ ọnyịịla nya Ịpyị-Adịrahụ ọ-kpa pyẹ eju, ọ ka ta odehe nya Olegu Onyobyi ayịreji, ọọwa lẹ ọ ka kpa odehe onyeewe ọlẹ ká angịlẹ kị kaa ju ihi nyamwụ kem ka ji warị lẹlẹ. Gbee ka pwụ ụka ọọwa, ahị ba ọgụ-ẹpẹtẹ nya iNuwa, ịHabakuku, bala angịkịla ịlẹ kị yụbwọ mwịịnyọ ka jẹ. Ahị yẹhị ju ẹrụ ọnyịịla ọ-kpa pyẹ, ju ugbodu, bala ọ-la ọmyịmyị ọnyọọngịrị ẹ-ẹga nya iJihova bala ehe ọchịchị nyamwụ.