Lụka okpii nyọlẹ ká 1940 chịpwụrụ kpá, adam bala ịnam jẹ́ ịBayịbụụ bala Alibeenu nya iJihova. Ịlẹhị lẹ ị hwabwọ la ịBayịbụụ ọjẹ́jẹ, ma ịnam kịnyaa la o-ye ụpwụ nya Ẹpwang ọ-Kụ Gbeji bala Awake! Ọjịra-jịra ọtụka nya ẹpwụma lụmẹ-lụmẹ ọhẹ ji la 1950 ịị New York City, ugbiyegu nyahị tị ka.

Lụka okpii ị-ịlahị nya ọọwa, Ọọnahị Lawrence Jeffries dọmwụ nyọka juhi ụga. Ọ maga nyọka dam ụbwọ jẹ́ ẹlịlẹhị. Ụka nya ọgbanyẹ, m̀ pwa jwoo nyọlẹ ká Alibeenu nya iJihova á kaa ya ụbwọ ju ẹla nya upe ka bala ọ-kaa ri isoja ka. M̀ byoo nyori kori ká ọng myị́ ọng ám̀ America á pwa la ọ-ka ka ẹwụ wuu, aluji ka wẹ ka ye ẹpwụma nyahị wuu la myị́. Ọọnahị Jeffries dọhụ pịlẹẹ tọm wo yẹkẹẹ: “Ịyẹ a tị́ me irya ká iJihova ka họ kori ká ala America wuu á kaa gbịgba họọ ma ká aluji á wẹ nyọka jahị daa?” Ẹla ọlẹ kọ ya u-uhye nya ẹlẹwẹ bala ẹla ịkịla dam ụbwọ nyọka yẹ nyori m̀ da ịwẹẹ ododu ịnyị. Ọọwa gum gbịla nyọka jẹ́ ẹlịlẹhị ịla ịBayịbụụ gụ́ olene.

M̀ kaa kpa ụka nyam wa apwụ nya Ẹpwang ọ-Kụ Gbeji bala Awake! inyogo ịlẹ ká ịnam la juwa ẹ-ẹpwa. Nyọlẹ kọ nọ chẹẹ, m̀ yẹ nyori ẹlịlẹhị m̀ wẹẹ jẹ́ lẹ, ọọwa lẹ m myọnụ ká Ọọnahị Jeffries ka jẹ́ ịBayịbụụ tam lẹlẹ. M̀ dọmwụ nyọka ka ọjịra-jịra ụka myị́ ụka ịnyịnyị. Ẹlịlẹhị jum ka ọkịlẹtụ, ọọwa lẹ m ri ọngọ kpa ẹrụ ọnyịịla pyẹ lẹlẹ. Ang ọlẹ kam tịtọ nyọka ku yẹda ụka kam jẹ́ nyori “ẹnụtụrụ ọtụka” nya iJihova ju chwẹẹ lẹ. (Sẹf. 1:14) Ọkọkọ nyọka ya ẹhị rịrị ẹ-ẹla nya ube-ụpwụ ọgbẹgbịlẹ lẹ, M̀ tịtọ nyọka da angịkịla ụbwọ wẹ ka jẹ́ ẹlịlẹhị ọla ịBayịbụụ.

M̀ họ kpá bwu ube-ụpwụ la ahyẹẹnụ 13 nya Ọya Ọharwọnyẹ, 1956, ahyẹẹnụ ịta ị-ịlahị nyọọwa lẹ m  hu enyi Ohe ọọjịra-jịra nya isekut lẹlẹ. Ḿ jẹ́ nyori m̀ ka yé ahị ọwawa ọtụka-ọtụka bwu ẹga nya iJihova chajị nyọlẹ kam chụ nyọka jẹ́ ang bala ọ-mẹ ang jẹ u-uhye nyamwụ ka.

Ọya ịrwọnyẹ nyọlẹ kam hu enyi Ohe kpá m ye ịlahị nya ụgbẹyị ọkpụrụ. Kingdom Ministry nya Ọya Ọkụrụ Oheeye nya 1956 la ang ọjẹ́jẹ ọlẹ ká egbeju nyamwụ ri “Can You Serve Where the Need Is Great?” Ẹlẹwẹ gum ịnyịnyị. M̀ tịtọ nyọka dụbwọ ẹ-ẹga ká angị kaa kpa ẹrụ ọnyịịla pyẹ á la gbuu ka.—Mat. 24:14.

M̀ mwụ ka Edgefield, South Carolina. Angị kpa ẹrụ ọnyịịla pyẹ angị ine kem à juwa ọọjịra-jịra ọlụwa lẹ. Am à ju ọngọ ọharụ nyaa ẹẹ. Ahị kaa họ ọjịra-jịra u-ube nya ọọnahị ọhẹ. Ọya ọnyị myị́ ọnyị, m̀ kaa bịrị awa 100 ẹ-ẹpwụ nya ẹrụ ọnyịịla ọ-kpa pyẹ. Ḿ kaa hi ụbwọ ka chajị m̀ kaa kpa ịlahị nya ẹrụ ọnyịịla ọ-kpa pyẹ bala ọ-họ ụpa nya ẹla oyaya ọọjịra-jịra. Ọ tị kpịpyọ nyori, jaabwọ kam wẹẹ họ ụkụrwọ ọọjịra-jịra gụ́ ọọwa, ịnyịnyị m kaa jẹ́ ang u-uhye nya iJihova gụ́ olene lẹ.

Ọnyang ọhẹ kam kaa jẹ́ ịBayịbụụ ta la ẹpwa ọhẹ kị kaa ye kpa họ ida ịị Johnston. Epweji ọọwa á tị lụrụ bwu ẹga nyam ka. Ọ ya ụkụrwọ ọchịchịịchị họ ham ene kọọ ya iwe da hahị nyọka kpa ube nyamwụ ochiche ọhẹ họ ọjịra-jịra ịnyịnyị.

Ọọnahị Jolly Jeffries, kọ ri ọnyị nya ọọnahị ọlẹ kọ jẹ́ ịBayịbụụ balam mwụ́ bwu Brooklyn, New York, lẹ am bala ọwa à kaa ye ịlahị nya ụgbẹyị lawụlẹ lẹlẹ. Ahị kụ ẹpwụ nya omoto ajụnggbọ ọlẹ ká ọọnahị ọlẹng ọhẹ pehi hahị.

Uri ọlẹ kị kaa nwụ ọngịnyị o-oye edii á kaa la gbuu ka. Dollars imiiye lee ịta ahị kaa ye nya ụkụrwọ nya ahyẹẹnụ lẹ. Ụka ọhẹ, m̀ ya okpoko ohihi ọlẹ kam la ra ang oriri wuu lẹ. Ụka kam kpehe bwu ẹga ọ-kpa ang oriri ra ọọwa, ọlẹng ọhẹ wẹ ka tom wo yẹkẹẹ: “À ka họ ụkụrwọ myị́? M̀ ka nwụng ị dollar ookpokpo ẹ-ẹpwụ nya awa.” Ọ ya ụkụrwọ nya ụtụrụ ịta ham ẹ-ẹga ọ-nwụ́ ube nyọka kpa ụwa cheri-cheri. Ọ la gede-gede nyori iJihova à wẹẹ dam ụbwọ nyọka jẹ́-ẹ hụ Egdefield lẹ. Ma, m̀ tị ka ọjịra-jịra ọtụka nya ẹpwụma lụmẹ-lụmẹ ọlẹ kị họ ịị New York City la 1958.

La ahyẹẹnụ oheeye nya ọjịra-jịra ọọwa, ẹla ọkpịpyọ ọhẹ họ. M̀ gbachị Ruby Wadlington, ọọnahị ọnyang ọhẹ kọ kaa ye ịlahị nya ụgbẹyị ọkpụrụrụ ịị Gallatin, Tennessee. Nyọlẹ ká ahị angị imimiiye tịtọ nyọka kpa ẹrụ ọnyịịla pyẹ ẹ-ẹpwụma ọkịla wẹẹ, ahị ka ọjịra-jịra nya angị tịtọ nyọka ka ube-ụpwụ nya Gilead ọla ọjịra-jịra ọọwa. Nyọlẹ kọ nọ chẹẹ, ahị dọmwụ nyọka da ụpwụ du tọ awụlẹ. Ọọwa lẹ ị wụrụm ka Gallatin nyọka họ ụpa nya ẹla o-ya dodehe bwu ịBayịbụụ ha alụma lẹlẹ. M̀ kpa iwe ọọwa ya ẹla nyọka yoo. Ọ nọ pyịnyẹng, m mwụ ka ọjịra-jịra ọlẹ ká Ruby ji lẹ, ahị ye awụlẹ la 1959 lẹlẹ.

Ụka kam gu ẹka 23, m̀ ri ọngọ kpẹhị rịrị ọjịra-jịra (ọlẹ kọ ri ọngọ kpa ịlahị nya angịgbahị nya  ọjịra-jịra lẹẹlẹẹ) ịị Gallatin. Ahị à ri ọjịra-jịra ọhọhẹ ọlẹ ká Charles Thompson ju ụga nyọlẹ kọ ri ọngọ kpẹhị rịrị isekut lẹ. Ọ jẹ́ ang chajị nya ụkụrwọ ọwẹ yẹẹyẹẹ; ma ọ tị kaa towo nyọka wo irya nyam u-uhye nya ang ọlẹ ká aanahị baba bala abwọlẹ ká angị kpẹhị rịrị isekut ịkịla bwu da ụbwọ. M̀ jẹ́ ang bwu ẹga nyamwụ nyori ọ baba ká ọngịnyị ka tọ ịtọ ẹla nyọka jẹ́ ẹla ọọwa yẹẹyẹẹ ene kọ ka jẹ́-ẹ cheje.

La Ọya Ọharụ 1964, ị wụrụm nyọka ka Ubẹ-ụpwụ nya Angịgbahị nya Ọjịra-jịra bala Angịmyẹrụ ọlẹ kị la ịị South Lansing, New York ẹ-ẹpwụ nya ọya ookpokpo. Aanahị ịlẹ kị mẹ ang jẹ uube-ụpwụ ọọwa dudu kam tịtọ nyọka jẹ́ ang u-uhye nya iJihova bala ọ-ka tụ́ jwoo chwẹẹ gụ́ ọọwa.

Ị wụrụm am bala ahụ nyam nyọka họ ụkụrwọ nya isekut ọ-kpẹhị rịrị la Ọya Ọhọhẹ 1965. Isekut ọlẹ kahị họ ụkụrwọ họhẹ-họhẹ ju ẹpwụ yẹẹyẹẹ. O bwu Knoxville, Tennessee, hyi pyịnyẹng kọ ka pwụ Richmond, Virginia. Ọjịra-jịra ịla North Carolina, Kentucky, bala West Virginia ji ẹpwụ nyamwụ. Ọjịra-jịra nya angị inyibiri kem m kaa ju ụga lẹ chajị ehile nya ebwo ọchịchị ọla oye edii nya United States á ya iwe da angị inyibiri ka la ọjịra-jịra bala angị inyiiwuru ka. Aanahị ịwẹ á lang gbuu ka, lẹ ahị kaa ga ang ọlẹ kahị la ha awụlẹ. Ọọnahị ọhẹ kọ ri ọngọ kpẹhị rịrị isekut lụka ọtata lẹ mẹ ẹla ọkpọnchị ọhẹ jẹm: “Ri ọọnịna. À ju ọjịra-jịra ụga lala olegbeju nya ụkụrwọ ka. Kori kị yẹng lala ọnyịnaa kẹnẹ-kẹnẹ a ka jẹ́-ẹ daa ụbwọ lẹ.”

Ụka kahị ju ọjịra-jịra ochiche ọhẹ ụga, ahụ nyam dọmwụ nya ịBayịbụụ ọjẹ́jẹ ta ọnyang ọhẹ kọ kpa ọnyị ọnyang ọ-gu ẹka ookpokpo ụ-ụbwọ. Nyọlẹ ká ọngọngọhẹ ẹ-ẹpwụ nya ọjịra-jịra ọwẹ á juwa nyọka mẹ ang jọọ ka wẹẹ, ahụ nyam kaa họ ịnyị bwula ụpwụ ọdada. Ụka ọkịla kahị ju ụga, ọnyang ọọwa wẹ ọjịra-jịra ịlẹ kahị la wuu. Nyọlẹ kị ya aanahị anyang angị imiiye ịlẹ kị kaa kpa ụka nyaa wuu ya ẹrụ ọnyịịla du ka ọjịra-jịra ọọwa, ị kịnyaa la ang ọjẹ́jẹ ọọwa gbee kọọ hu enyi Ohe lụka okpii. La 1995 ẹka 30 ẹ-ẹkpẹ nya ọọwa, ọyẹẹnọ ọhẹ wẹ ka dọnụ chị ahụ nyam ị-ịBẹtẹlụ ọla Patterson. Ọnyị nya ọnyang ọlẹ ká ahụ nyam mẹ ang jẹ lalẹ à ri ọngọọwa lẹ. Ọnyị ọnyang ọọwa bala ọrụmwụ ji ẹpwụ nya ịkịlasị 100 nya Ube-ụpwụ nya Gilead ụka ọọwa.

Isekut nyahị oheeye juwa a-arịrị nya Florida. Ụka ọwẹ wẹẹ ahị baba nya omoto, lẹ ahị ra ọhẹ kọ pwuru ịnya yẹẹyẹẹ. Ma, epwihi ọ-ba ọọwa ba, ịngịhyẹ ẹ-ẹpwụ nyamwụ bịrị. Áhị tị la okpoko ka nwụlọọ kaka. M̀ wụrụ ọọnahị ọhẹ kam ya ahị me nyori ọ ka nwụlọọ myị́. Ọọnahị ọọwa du ọnchẹ nyamwụ ọhẹ wẹ ka nwụlọọ. Ọọnahị ọwẹ á tị kaa ye okpoko kori kọ nwụla omoto nyahị ka. Ẹla ọlẹ kọ ya kem ri, “Ánụ kpam uri ka.” Ọ dọmwụ ya okpoko gahị myị́myị́! Ọwẹ ri ọ-chụ pwokwita ọnyịịla-ọnyịịla nya abwọlẹ ká iJihova kaa bwu kpahị ju anchẹ nyamwụ. Ọ kpụhị ịtịya nyọka hụ ha angịkịla ịnyịnyị.

Ụka ọnyị myị́ ọnyị kahị ju ọjịra-jịra ụga, ahị kaa hụ ẹpwa nya aanahị. Ọọwa du kahị la aligu ịnyịịla yẹẹyẹẹ. Ẹnẹhẹ, m̀ wuleji hi ụpwụ ọlẹ kam wẹẹ da u-uhye nya ọjịra-jịra ẹ-ẹpwụ nya ang ọ-da ụpwụ ọla akpa. Nyọlẹ kam tịrẹkpẹ lobyi ẹnẹwẹ, m̀ yẹ nyori ọnyị nya ọọnahị o-gu ẹka ịta ọlẹ kahị ji ẹpwa nyamwụ kpa ang ọ-da ụpwụ ọwẹ kọ ayịlọ u-uhye nya ụpwụ ọlẹ kam wẹẹ kpa da kpụ̀ m ma ụpwụ ọọwa da myị́myị́. M̀ kpa ẹla ọọwa họ jwoo ẹ-ẹpwụ nya ẹka ịmanyị-ịmanyị.

La 1971, m̀ ye ileta nyọka ri ọngọ kpẹhị rịrị district ịị New York City. Ọ lahị ẹbyẹbyị nyịlẹhị-ịlehị! Ụka kahị rụ ka ụwa, ẹka 34 m gu wẹẹ lẹ. Am à ri ọngọ onyobiri ọhọhẹ ọlẹ kọ ri ọngọ kpẹhị rịrị district nyaa lẹ, ị tị dam ọwụraba yẹẹyẹẹ.

Lala ọngọ kpẹhị rịrị district, m̀ la iwe nyọka mẹ ang jẹ u-uhye nya iJihova la ọ-myị́myị́ nya epwihi ọnyị myị́ ọnyị ọọjịra-jịra nya isekut. Iru nya angịlẹ kị ri angị kpẹhị rịrị isekut ịwẹ jẹ́ ẹla nya ụkụrwọ ọwẹ gụm. Ọngọhẹ lẹpwụ nyaa à dọmwụ họ ụpa nya ẹla o-ya dodehe nya enyi Ohe ohuhu ụka kam hu enyi Ohe lẹ. Theodore Jaracz, kọ ri ọngọkịla nyaa, wẹ ka ri ọngọhẹ nya Angị Kpẹhị Rịrị Ogu ị-ịlahị. Iru nya aanahị ịlẹ kị kaa họ ụkụrwọ ị-ịBẹtẹlụ ọla Brooklyn kị la ẹla ọjẹ́jẹ yẹẹyẹẹ, juwa ịnyịnyị. Ọ myịm lẹhị yẹẹyẹẹ nyọlẹ ká angị kpẹhị rịrị isekut bala angị bwu ịBẹtẹlụ họ kam la ịlọm. Am la ịlọm yẹ nyori aanahị ịwẹ ri angị gbe ịkpịlọ ịlẹ kị kaa kpụnịrọ Omyi Ẹla nya Ohe bala ọ-kaa chẹkpẹ ju  ogu ọlẹ yẹẹyẹẹ. Ịlaa ọ-kpa keji du kọ chịm kpẹẹ nyọka họ ụkụrwọ nya ọngọ kpẹhị rịrị district.

La 1974 Angị Kpẹhị Rịrị Ogu ya ụkụrwọ nya ọngọ kpẹhị rịrị district ha ebwo ịkịla nya angị kpẹhị rịrị isekut, ọọwa lẹ am à ri ọngọ kpẹhị rịrị isekut myị́myị́ ugbẹnyị ịị South Carolina lẹlẹ. Ọ kpịpyọ nyori lụka ọwẹ wẹẹ, ọjịra-jịra nya angị inyiiwuru bala angị inyibiri jẹ́-ẹ yẹ jula awụlẹ lẹ, ọọwa tị du ká aanahị chị ọkẹkẹnị yẹẹyẹẹ.

La ocheju nya 1976, ị yam du ka isekut ọhẹ ịị Georgia a-arịrị nya Atlanta bala Columbus. M̀ kpịtịya gede-gede nya ẹnẹhẹ ọlẹ kam ya ẹla bwu ịBayịbụụ dodehe lụka kị ju anjwo iru nya ala onyobiri ịlẹ kị gbu eji nyọlẹ ká angịhyẹ jụ́ ẹpwa nyaa ila. Ị wu ịnaa nọ ube-utoji ọọlajị nya ang ọlẹ kọ họọ. Aanahị alẹng bala anyang ịlẹ kị ri ala onyobiri tụ́ ala onyoowuru kaa mwụ-mwụ wẹ ube-utoji nyọka kpọ́ọ ẹjẹ. M̀ yẹ nyori ọháha nya aanahị ịwẹ chehe gede-gede. Ahyẹẹrwẹrwa ọlịịwẹ ka jẹ́-ẹ da anchẹ nya Ohe ụbwọ nyọka bọhụ ẹ-ẹpwụ nya iwe-ahụrụ olujwo.

La 1977 ị wụrụhị ka ịBẹtẹlụ ọla Brooklyn nyọka da ụbwọ nya ụkụrwọ ọhẹ ẹ-ẹpwụ nya ọya ịmanyị-ịmanyị. Nyọlẹ ká ụkụrwọ ọọwa ja ka cheju, angị imiiye nya Angị Kpẹhị Rịrị Ogu wẹ ka tọhị wo kori kam bala Ruby ahụ nyam á ka myị ọnụ nyọka họ ụkụrwọ ị-ịBẹtẹlụ pyịyọọ. Ahị ye myị.

Ẹ-ẹpwụ nya ẹka 24, m̀ kaa họ ụkụrwọ ịị Service Department, ko ri ẹga ọlẹ ká aanahị kaa gbachị ịtọ ẹla ịla nyaa-nyaa. Ẹ-ẹpwụ nya ẹka ịwẹ wuu, Angị Kpẹhị Rịrị Ogu kaa mẹ ụgbẹyị jẹ́ẹhị kpụnịrọ itiwe nya ehile ịlẹpwụ nya ịBayịbụụ. Ọmẹjẹ ọọwa ala Service Department à kaa kpa wẹ ịtọ ẹla, bala ọ-kpa mẹ ang jẹ angị kpẹhị rịrị isekut, angịgbahị nya ọjịra-jịra, bala angị ye ịlahị nya ụgbẹyị lẹ. Ang ọmẹjẹ ọlịnyị da iru nya aanahị ụbwọ wẹ ka la gbẹgbịlẹ ẹ-ẹpwụ nya ọngịnyị nya ịKịrayịsị oriri lẹ. Ọọwa ịnyịnyị tị ju ogu nya iJihova ọngịrị.

Bwu 1995 ka 2018, m̀ ju egbeju ẹpwa lụmẹ-lụmẹ ụga lala ọngọ ku ọmwakpa nya egbeju ẹpwa ọla odehe wuu. M̀ kaa tọ Angị Kpẹhị Rịrị Egbeju Ẹpwa, ala ịBẹtẹlụ, bala angị kpa ẹrụ ọnyịịla pyẹ ẹ-ẹpwụma ọkịla nyọka jwaa ọhụ bala ọ-ka daa ụbwọ ẹ-ẹpwụ nya akama ọnyị kị la. Am bala Ruby ahụ nyam tị kaa yé ọhụ ojuju bwula oja ọlẹ ká aanahị ịwẹ kaa jahị ịnyịnyị. Ọ-chụ pwokwita, ahị ka Rwanda la 2000. O guhị ọ-ọkịlẹtụ nyọlẹ kahị wo jaabwọ ká aanahị ịwẹ bala ala ịBẹtelụ bwu be lụka nya angịnyị ọmamachịng nwụ ọla 1994. Iru nyaa juwa ká angị háa-há gbu hyaa. Nanana nyori aanahị ịwẹ chịpwụrụ bwu ẹpwụ nya ang ịlịịwẹ, ị mẹjẹ nyori ị la ọmyịmyị, ẹhị ọrịrịị-rịrị, bala ọ-kaa chị ọkẹkẹnị.

Ahị gu ẹka kpoye nya 80 lẹẹlẹẹ lẹ. Ẹ-ẹpwụ nya ẹka 20 ịlẹ kị chịpwụrụ wẹ, m̀ ri ọngọhẹ nya Angị Kpẹhị Rịrị Egbeju Ẹpwa ọla United States. Ḿ ka ube-ụpwụ ọgbẹgbịlẹ ẹnẹhẹ lẹka, ma iJihova bala ogu nyamwụ tị mẹ ang ọlẹ kọ há gụ́ wuu jẹ́m. Ọọwa nwụlam nọ nyọka jẹ́-ẹ mẹ ẹlịlẹhị ịla ịBayịbụụ ịlẹ kị kaa ju ọngịnyị apyobwuna gboyi myị́ oyi jẹ angịkịla. (2 Kọr. 3:5; 2 Tim. 2:2) M̀ yẹ jaabwọ ká ẹlịlẹhị ọlẹpwụ nya ịBayịbụụ da angịnyị ụbwọ nyọka la ọhịhị ọnyịịla bala ọ-ka ri igu bala Ọngọ Haa Họ lẹ. (Jem. 4:8) Ụka myị́ ụka kọ chịhị kpẹẹ, am bala Ruby ahụ nyam kaa kịnyaa la o-ju angịkịla ọhụ nyọka jẹ́ apyobwuna nya ang ọjẹ́jẹ u-uhye nya iJihova bala ẹlịlẹhị ịla ịBayịbụụ ọ-mẹjẹ angịkịla, kọ ri iwe ọgụgụ ọlẹ ká ọnchẹ nya iJihova ka jẹ́-ẹ la!