Kụ ẹhị yẹ abwọlẹ ká ịBayịbụụ wẹ ịtọ ẹla ịwẹ wẹẹ.

Ụkụrwọ nya Alẹrụ 24:15 ya nyori “owuleji bwula igu [nyị] ka juwa ha angịnyị wuu tụ alabwẹla ọnyịịla bala alabwẹla onyobyi.” Alabwẹla ọnyịịla ri angịlẹ kị kaa ju ihi nya Ohe ene kịị gbu, lẹ ị da ẹnyị nyaa ju ụ-ụpwụ nya ọhịhị. (Mal. 3:16) Alabwẹla onyobyi tị ri angịlẹ kị la iwe gbuu nyọka jẹ́ ang chajị nya iJihova ene kịị gbu ka, lẹ ị́ da ẹnyị nyaa ju ụ-ụpwụ nya ọhịhị ka.

ỊJọn 5:28, 29 ya ẹla ịnyịnyị u-uhye nya ebwo imiiye ịwẹ kị gu ẹnyị ụ-ụpwụ nya Ụkụrwọ nya 24:15. IJisọsị ya nyori “Angịlẹ kị họ abwẹla ọnyịịla” nyị ka “wuleji bwula igu kaka la ọhịhị ọmyịmyị-ka. Angịlẹ kị tị họ abwẹla onyobyi, ka wuleji bwula igu ka ju ka ẹpwụ nya eje [ọlala].” Alabwẹla ọnyịịla họ ang ịnyịịla ene kịị gbu. Ị ka wuleji bwula igu kaka la ọhịhị, chajị ẹnyị nyaa ju ụ-ụpwụ nya ọhịhị. Ma, alabwẹla onyobyi họ ang ịtịpyọ ene kịị gbu. Ị ka wuleji bwula igu wẹ la eje ọlala. Ị́ da ẹnyị nyaa ịwa ju ụ-ụpwu nya ọhịhị lẹ ka; ị ka laa eje lee ọ-wụla ọhịhị nyaa yẹ. Lụka ọọwa, ị ka la iwe nyọka jẹ́ ang chajị nya iJihova bala ọ-ka da ẹnyị nyaa ju ụ-ụpwụ nya ọhịhị.

Ọwụrụụ-wụrụ 20:12, 13 wụlẹ ya nyori angịlẹ wuu kị ka wuleji bwula igu nyị ka baba nyọka ju ihi nya ẹla ịla “ẹpwụ nya apwụ,” ọọwa ri ehile inyeewe ịlẹ ká Ohe Oluhye ka ya hahị. IJihova ka ta angịlẹ wuu kị myị jwoo ihi ka ayịreji.—Ayị. 65:20.

ỊDanẹlụ 12:2 ya neeji nyori angịhyẹ nya angịlẹ kị gbu nyị ka wuleji bwula igu “ka la ọhịhị ọmyịmyị-ka, angịkịla ka ju ka ẹpwụ nya oyoyi o-gbe oyi myị oyi.” Ọgba ọwẹ wẹẹ ya ẹla u-uhye nya eje ohyẹẹkpẹ-ẹkpẹ ọlẹ kọ ka ji ha angịlẹ kị wuleji bwula igu ịnyị—“ọhịhị ọmyịmyị-ka” lee “oyoyi o-gbe oyi myị oyi.” Lẹ, lụka nya ocheju nya eji ọkpakpa ọlẹpwụ nya ẹka ụnọ, angịhyẹ ka la ọhịhị ọmyịmyị-ka, angịkịla tị ka tayịreji gboyi myị́ oyi.—Ọwụ. 20:15; 21:3, 4.

Kụ ẹhị yẹ ọ-chụ pwokwita ọlẹ wẹẹ. Ahị ka jẹ́-ẹ chụ iwe-ahụrụ nya ebwo imiiye nya ụma nya angịnyị ịlẹ kị wẹẹ ka wuleji bwula igu kaka pwoku angga ịlẹ kị tịtọ nyọka rụ ka kụ ẹpwụma ọkịla. Alabwẹla ọnyịịla lala angga ịlẹ kị ya ụpwụ ibeenu ọ-kpa họ ụkụrwọ haa lee ụpwụ ibeenu ọlẹ kọ mẹjẹ nyori ị yaa myị nyọka kụ taa bala ọ-la iwe nyọka họ ang ọhẹ bala ọkịla. Ụgbẹyị ọkịla, alabwẹla onyobyi lala angga ịlẹ kị ya ụpwụ ibeenu haa nyọka kụ ẹpwụma ọkịla lụka o-kpii. Angga ịlịịwẹ ka baba nyọka mẹjẹ bwula ọhịhị nyaa ene kị ka ya iwe da haa nyọka kịnyaa la ọ-ka kụ ẹpwụma onyeewe ọwẹ. Ụ-ụgbẹyị ọlịnyị-ịnyị, alabwẹla onyobyi ịlẹ kị ka wuleji bwula igu ka baba nyọka ju ihi nya ehile nya iJihova bala ọ-ka mẹjẹ nyori ị ri alabwẹla ọnyịịla ene kị ka kịnyaa la ọhịhị ị-ịParadayịsị. Ịnyịnyị, ụpwụ nya ibeenu ụma ọnyị myị́ ọnyị ọlẹ kị ya ha angga ene kịị yaa ka ẹpwụma ọkịla, angịhyẹ nyaa ka juwa ịlẹ kị ka myị́ ọnụ haa nyọka kụ ẹpwụma ọọwa pyịyọọ, ma ọhẹka, ị ka ku angịkịla rụ. Ocheju nya eje ọchịchị u-uhye nyaa ka kpụnịrọ ọhọhọ bala abwẹla nyaa ẹ-ẹpwụma onyeewe ọwẹ. Ịnyịnyị, ocheju nya angịlẹ kị ka wuleji bwula igu ka kpụnịrọ ọmyịmyị ọlala bala abwẹla nyaa ụ-ụwa odehe onyeewe.

IJihova-á ri Ohe nya ọháha kem ka, ma o ri Ohe nya eje ọ-chị kpakpa. (Ehile. 32:4; Eje. 33:5) Ọ ka mẹ ọháha nyamwụ jẹ bwula o-wule alabwẹla ọnyịịla bala alabwẹla onyobyi eji bwula igu. Ma ọ ka tịtọ ká ịwa wuu ka ju ihi nya ehile nyamwụ u-uhye nya ang ọtịpyọ bala ọnyịịla. Angịlẹ kẹnẹ-kẹnẹ kị la ọháha ẹ-ẹga nyamwụ bala ọ-hịhị ba ehile nyamwụ jẹ, i ka ya iwe da ha nyọka kịnyaa la ọhịhị odehe onyeewe lẹ.