ỊPọlụ ya ụ-ụpwụ nya 1 Ala ịKọrịntị 15:8 yẹkẹẹ: “Ohyẹẹkpẹ-ẹkpẹ wuu ri yẹkẹẹ, ịKịrayịsị chị ịlọmwụ ehe mẹjẹm am ayịdang ịnyịnyị! Ịnọ, ọ ri nya ịlẹhị, am lẹ, m ri igbedede ẹ-ẹpwụ nya ẹkọ ọmyịmyị nya Ọngọlahị ọlẹ lala ọnyị ọlẹpwụ nya ọnyang ọlẹ kọ kaa pwụ ọnụ ene kị kaa mọọ kpehe wẹ odehe ọlẹ ka.” Lụka ọkẹkpẹ, ahị kaa da ẹla ọwẹ wụlẹ nyori ịPọlụ wẹẹ ya ẹla rụ́ ang ọlẹ kọ họ tọọ ụka kọ yẹ iJisọsị a-arụrụ ẹ-ẹpwụ nya ogbo ụ-ụwa e-epwoohe ịnyị. Ọ lala o-ri nyị ya iwe da kị ka mọọ, lee o-wulọọ eji bwula igu, kaka ri olegu ene nya ụka, lala ẹka ohu ịmanyị tị́ ene ká ụka nya owuleji bwula igu ụma ọwẹ ka ji. Ma, ang ọjẹ́jẹ gụ́ ọọwa u-uhye nya ọgba ọwẹ mẹjẹ nyori ahị baba nyọka nwụ abwọlẹ kahị kaa wo etu nyamwụ họ.

O ri ịnyịlẹhị nyori ịPọlụ wẹẹ ya ẹla rụ́ ang ọlẹ kọ họ tọọ ụka kọ yẹda ịnyị. Ma ịyẹ à tị́ ri etu nya ẹla ọlẹ ká ịPọlụ ya nyori nyị ma ọwa lala ọnyị ọlẹ kọ ‘pwụ ọnụ ka’? Ang lụmẹ-lụmẹ ka du myị́.

Ọyẹda nyamwụ la kpịraka bala o-ju ọjụjụ ẹ-ẹpwụ. Ọnyị ọchị-ma kaa bwu ọngịnyị agaga. Ụka ká ịSọlụ (kọ wẹ ka ri ịPọlụ ụka ohyẹẹkpẹ) wẹẹ jẹ ka ịDamasịkọsị nyọka tụ́ angịnyị nya ịKịrayịsị ịlụwa pyịpyị, ọ́ ya ahị guru nyori ọ ka yẹ iJisọsị ọlẹ kọ wuleji bwula igu a-arụrụ ka. Ọyẹda nya ịPọlụ lọọ ọwa ayịdang ẹbyẹbyị tụ́ angịlẹ kọ wẹẹ tịtọ nyọka tụ pyịpyị e-epweji ọwẹ. Da ọọwa u-uhye, ẹla ọlẹ kọ họ tọọ ju ọjụjụ ẹ-ẹpwụ gbee ká ọyị ọyẹyẹ nyamwụ gwọọ byi lụka o-kpii.—Ụkụr. 9:1-9, 17-19.

Ọ-yẹda “ụka okpolo.” Etu nya omyi ẹla nya iGiriki ọlẹ kị yẹda kaka ri “ọnyị ọlẹpwụ nya ọnyang ọlẹ kọ kaa pwụ ọnụ ene kị kaa mọọ kpehe wẹ odehe ọlẹ ka,” ka jẹ́-ẹ ri “ọngọlẹ kị ma ụka okpolo” ịnyịnyị myị́. The Jerusalem Bible ya ẹla ọọwa ị-ịlẹ: “Ọ lala o-ri nyị mam lụka ọlẹ ká ọngọngọhẹ á ya ahị me ka.” Lụka ọlẹ ká ịPọlụ yẹda wẹẹ, iJisọsị rụ tịrẹkpẹ ka ẹpwoohe ene lẹ. ỊPọlụ ọwa á yẹ iJisọsị nyọlẹ kọ wuleji bwula igu ene kọọ rụ ka epwoohe, jaabwọ ká angịlẹ kọ ya ẹla rụ́ ọgba ịlẹ kị jene nya ọwẹ yọọ ka. (1 Kọr. 15:4-8) Nyọlẹ ká iJisọsị chị ịlọmwụ ehe lụka ọ-yahị me ka wẹẹ, ọ ya iwe ha ịPọlụ nyọka yọọ nyọlẹ kọ wuleji bwula igu kpá, nanana nyori ọ lala “ụka okpolo” lẹ.

Ọ wẹẹ ya ẹla rụ́ ịlọmwụ ụ-ụgbẹyị omelabwọ ịnyị. Angị jẹ́ ang ịhyẹ ya nyori omyi ẹla ọ-kpa ọngịnyị weji ịPọlụ nya-à kpa ya ẹla ẹgẹwẹ lẹ. Ó ri irya ọlịnyị ká ịPọlụ á la aalẹ, ọ tịng tị wẹẹ mẹjẹ nyori ọ́ chịla nya iwe ọlẹ kị ya họọ wẹ nyọka ri ọlẹrụ ka ịnyị. Ọ dọmwụ kịnyaa la o-yẹkẹẹ: “Am ịPọlụ ọlẹ ayịdang kpangga a ri ọhịnyẹnyẹ kpá wuu ẹ-ẹpwụ nya alẹrụ ọnyịịla ọlẹ lẹlẹ. Ịnọ, ḿ dọmwụ chịla kpikpiri kpụ, ị ka wụrụm ọlẹrụ ọnyịịla ọlẹ kpong-kpong ka. Chajị, m kaa tụ [ọjịra-jịra] nya Ohe Oluhye pyịpyị lụmẹ ene-ene. Ma, bwula ọnahị nya Ohe Oluhye ayịdang, a du kam ri ụma nya ọngọlẹ kam ri lẹẹ ẹ-ẹpwụ nya ẹla nyamwụ alẹ lẹ.”—1 Kọr. 15:9, 10.

Lẹ, ọ lala o-ri ịPọlụ nyị wẹẹ ya ẹla rụ́ abwọlẹ ká iJisọsị chị ịlọmwụ ehe mẹjọọ kpịraka la ọ-ya ahị me ka, ụka ọ-kpahị ju ka ọlẹ kọ yẹda, lee ọlẹ kọ chịla nyọka yẹ ọwụrụu-wụrụ ọnyịịla ọlịịwẹ ka ịnyị. Ọnyị myị́ ọnyị ko ri, ẹlẹwẹ myị ịPọlụ lẹhị yẹẹyẹẹ. Ọ ri ang ẹjẹẹ ọlẹ kọ kpoye nya ịwẹẹ ọdada ọnyị myị́ ọnyị họọ nyori iJisọsị wuleji bwula igu ịlẹhị. Ang odudu lẹ ká ịPọlụ kaa ya ẹla rụ́ ẹla o-ya ahị me ka ọwẹ ụka myị́ ụka kọ já ya ẹla u-uhye nya owuleji bwula igu nya iJisọsị à wẹe lẹlẹ.—Ụkụr. 22:6-11; 26:13-18.