1. Ene ká ọlẹrụ iPita gbu, ụkụrwọ oyina iJihova à tị́ ya họọ?

 ỌLẸRỤ iPita gbịgba ha iJihova la ọmyịmyị ẹ-ẹpwụ nya ẹka lụmẹ-lụmẹ. Ọ bajẹ bala iJisọsị ẹ-ẹpwụ nya ẹrụ ọnyịịla ọ-kpa pyẹ. Ọ wụrụ ụgbẹyị da nya ẹrụ ọnyịịla ọ-kpa ka ẹga nya angịlẹ kị ri ala iJuu ka. Ọ tị wẹ ka ri ọngọhẹ nya angị kpẹhị rịrị ogu ịnyịnyị. Ụka ọlẹ ká ọhịhị nyamwụ wẹẹ jẹ ka ocheju kọ jẹ́ nyori ọwa nyị ja ka gbu lẹ, iJihova ya ụkụrwọ họọ gụ ọọwa nyọka họ. Lụka nya ẹka 62-64 nyọlẹ kị ma ịKịrayịsị kpá, Ohe ya olegu ịgọgọ họọ kpụ ọ da ileta imiiye, kị ri ụpwụ nya iPita 1 bala 2. Ọ ya jaabwọ kọ ya ẹhị rịrị nyori ileta ịịwa ka da angịnyị nya ịKịrayịsị ụbwọ ụka kọ gbu kpá.—2 Pit. 1:12-15.

2. Ịyẹ tị́ du ká ileta ịlẹ ká iPita da baba lụmẹ?

² IPita da ileta ịwẹ ụka ká angịnyị nya ịKịrayịsị ịkịla la “iru nya ịmayẹ la datị-datị.” (1 Pit. 1:6) Angịnyị inyibyi juwa maga nyọka kpa ẹla ọmẹjẹ nya ọnọọkịla bala abwẹla ọ-chịrị wẹ ẹpwụ nya ọjịra-jịra. (2 Pit. 2:1, 2, 14) Angịnyị nya ịKịrayịsị ịlẹ kị kụ iJerusalẹm ja ka pwụ “ụka nya ọmyịmyị nya odehe,” kọ ri ụka ọlẹ ká ala iRom wẹẹ ka ta iJerusalẹm bala ube ịgọgọ ọlụwa ayịreji. (1 Pit. 4:7) Ịwẹẹ ọdada á juwa ka, ileta nya iPita ka da angịnyị nya ịKịrayịsị ụbwọ nyọka yẹ ang ọlẹ kị ka họ nyọka jẹ́-ẹ bọhụ ẹ-ẹpwụ nya ịmayẹ ịlụka ọwẹ bala ịlẹ kị ka la ị-ịlahị. b

3. Ịyẹ tị́ du kahị ka kụ ẹhị yẹ ileta ịlẹ ká iPita da?

³ Ịlẹhị lẹ, Angịnyị nya ịKịrayịsị ịla oyi ọhọhẹ iPita à da ileta ịwẹ du kịla lẹ, ma iJihova họ ị da ẹla ịịwa ju ẹ-ẹpwụ nya Omyi Ẹla nyamwụ. Lẹ, ahị alẹ ka jẹ́-ẹ yé apyobwuna bwu ẹpwụ nya ileta ịịwa. (Rom. 15:4) Nyọlẹ kahị wẹẹ hịhị odehe ọlẹ kọ kaa hu abwẹla ọtịpyọ kụ ịlahị wẹẹ, ahị ịnyịnyị ka jẹ́-ẹ la ịmayẹ ịlẹ kị ka du kọ ka lujwo hahị nyọka gbịgba ha iJihova myị́. Ọ́ ba ọọwa  ka, ahị ja ka ju ka ẹpwụ nya akama ọtụka ọlẹ kọ gụ́ ọlẹ ká ala iJuu yẹ lụka ká iJerusalẹm bala ube ịgọgọ ta ayịreji. Ahị ka yé ala i-ju apyobwuna bwu ileta imiiye ịlẹ ká iPita da. Ị ka dahị ụbwọ nyọka kịnyaa la ọ-ya ẹhị rịrị gbe ahyẹẹnụ nya iJihova, nyọka kụrụ uhi ojuju nya angịnyị ehe, bala ọ-ka la ọháha okpori-kpori ẹ-ẹga nya awụlẹ. Ẹla ọọwa ịnyịnyị ka da angịgbahị nya ọjịra-jịra ụbwọ nyọka yẹ jaabwọ kị ka bwu kpẹhị rịrị ịkpịlọ nya Ohe yẹẹyẹẹ.

4. Jaabwọ ká ụpwụ nya 2 iPita 3:3, 4 ya, ịyẹ à tị́ ka du ká ọmyịmyị nyahị ka la dẹwụ-dẹwụ myị́?

⁴ Ahị kụ bala angịnyị ịlẹ kị myọnụ ju ẹla ọlẹ ká ịBayịbụụ ya u-uhye nya ijuju ka. Angị tụụhị pyịpyị ka kpahị họ ọọlajị nyọlẹ kahị kaa ya ẹhị rịrị gbe ocheju nya odehe ọlẹ lụka ọtata lẹ myị́. Angịhyẹ ka ya myị́ nyori ocheju nya odehe ọlẹ nyị́ ja wẹ ẹnẹnẹhẹ kaka. (Wa 2 iPita 3:3, 4.) Kori kahị wo ẹla ọlịnyị bwu ọnụ nya ọngọlẹ kahị ja ya ẹla nya Ohe je, ọngọhẹ ọ-ọlụkụrwọ nyahị, lee olugbiyegu nyahị, ọmyịmyị nyahị ka la dẹwụ-dẹwụ myị́. IPita ya ang ọlẹ kọ ka dahị ụbwọ.

5. Ịyẹ à tị́ ka dahị ụbwọ nyọka yẹ ocheju nya odehe ọlẹ ụ-ụgbẹyị ọkpakpa? (2 iPita 3:8, 9)

⁵ Ọ ka la angịhyẹ lala o-ri iJihova nyị ja họ atịmẹ ẹ-ẹga nya odehe ọlẹ ọ-ka tayịreji lẹ myị́. Ma, ẹla ọlẹ ká iPita ya ka dahị ụbwọ myị́ chajị ọ kpụhị ịtịya nyori abwọlẹ ká iJihova kaa yẹ ụka datị gbang-gbang hi ịnya angịnyị ehe. (Wa 2 iPita 3:8, 9.) A-ahị nya iJihova, ẹka ụnọ lẹpwụ-lẹpwụ lala ahyẹẹnụ ookpokpo kem. IJihova kaa ju ugbodu, ọ́ tịtọ ká ọngọngọhẹ ka tayịreji ka. Ma ụka ká ahyẹẹnụ nyamwụ á tị pweeji lẹ aalẹ, odehe ọlẹ ka tayịreji pyii lẹ. O ri iwe ọtụka hahị nyọka kpa ụka ọlẹ kọ hi lẹẹlẹẹ ya ẹla nya Ohe je angịnyị ẹ-ẹpwụma nya odehe wuu.

6. Ányị ahị tị́ ka bwu ‘chị ọwẹwẹ nya ahyẹẹnụ nya iJihova agaga’? (2 iPita 3:11, 12)

⁶ IPita ya ahị nyị ‘chị ọwẹwẹ nya ahyẹẹnụ nya iJihova agaga.’ (Wa 2 iPita 3:11, 12.) Ányị ahị tị́ ka bwu họ ịnyị? Kori kọ chịkpẹẹ myị́, ahị kụ irya ẹnụ myị́ ẹnụ u-uhye nya ahị ọwawa ịlẹ kahị ka yé odehe onyeewe. Yẹ ịlọng ká juwa go ọhụ ọlẹ kọ la cheri-cheri mile, ri ang oriri ọ-da ịnyịrọ ụbwọ, juwa da aanahị ị-háahị há ọwụraba jaabwọ kị wẹẹ wuleji bwula igu, bala o-juwa mẹ ang jẹ angịlẹ kị gbu ẹ-ẹpwụ nya ẹka ịmanyị tị́ kẹkpẹ lẹ, u-uhye nya ọ-họ jịra nya ọmwụ ọyẹyẹ ịla ịBayịbụụ wẹẹ. Kori kahị ja kụ irya u-uhye nya ang ịlịịwẹ, ọ ka dahị ụbwọ nyọka jẹ́-ẹ godayị gbe ahyẹẹnụ nya iJihova bala ọ-ka jẹ́ nyori ahyẹẹnụ ihyẹẹkpẹ à lẹẹ kahị ji lẹẹlẹẹ lẹ. Nyọlẹ kahị “jẹ́ ang ịwẹ jẹ́jẹ́ ene-ene” u-uhye nya ijuju lẹ wẹẹ, ‘ahị myị kahị juwa ba ang onyobyi ọhọhọ’ nya angịmẹjẹ nya ịnịịkịla jẹ kaka.—2 Pit. 3:17.

7. Ẹlịyẹ uhi nya ọngịnyị ehe ojuju à tị́ ka họ u-uhye nyahị myị́?

⁷ Nyọlẹ kahị jẹ́ nyori ahyẹẹnụ nya iJihova ji ọnaabwọ lẹ wẹẹ, ahị kaa maga jaabwọ kahị ka họ ba myị́ nyọka ya ẹrụ ọnyịịla je angịkịla. Kpọkpọọkpọ, iwe-ahụrụ ịhyẹ ji kahị kaa họ atịmẹ la ọ-ka ya ẹla. Ịyẹ à tị́ du? Chajị ahị ka juhi nya ẹla ọlẹ ká angịkịla ka ya lee ọ-họ tahị ụka ọhẹ myị́. Ahị ka ju uhi nya angịnyị ụka ọhẹ myị́. Ọ lịnyị ẹ-ẹga nya iPita. Lodu ọlẹ kị wẹẹ yẹ iJisọsị akama, iPita á myị ya ịlọmwụ dodehe nyori ọ ri ọngọhẹ nya angịjugbẹyị nya iJisọsị ka. Ọ dọmwụ pwa arwarụ nyori ọwa nyị́ jẹ́ iJisọsị ka ugbabwọ ịmányị tị́ ịnyịnyị! (Mat. 26:69-75) Ma iPita kụrụ uhi nyamwụ myị́ kpụ ọ da ụpwụ yẹkẹẹ: “Anụ juwa juhi nya angịnyị ehe kpong-kpong ka lee o-juwa la ugbodu o-gu ene kaka ịnyịnyị.” (1 Pit. 3:14) Ẹla ọlẹ ká iPita ya wẹ họ kahị jẹ́ myị̀myị̀ nyori ahị ka jẹ́-ẹ kụrụ uhi nya ọngịnyị ehe ojuju.

8. Ịyẹ à tị́ ka dahị ụbwọ nyọka kụrụ uhi nya ọngịnyị ehe ojuju? (1 iPita 3:15)

 ⁸ Ịyẹ à tị́ ka dahị ụbwọ kahị ka kụrụ uhi nya ọngịnyị ehe ojuju? IPita byihi yẹkẹẹ: “Anụ́-ụ tụtụ juwa la uhi ojuju ẹ-ẹga nya ịKịrayịsị lala Ọngọlahị la ẹ-ẹpwụ ọkịlẹtụ nyanụ mẹ.” (Wa 1 iPita 3:15.) Ahị ka jẹ́-ẹ họ ịnyị bwula ọ-kụ irya u-uhye nya iwe-ahụrụ bala ọngịrị ọlẹ ká iJisọsị ịKịrayịsị, kọ ri Ayịbaba bala Adịrahụ nyahị la. Kori ká ja chuko lee o-ju uhi ụka ká la iwe nyọka ya ẹrụ ọnyịịla je angịkịla, kpịtịya nya Adịrahụ nyahị. Kpẹhị nya olegu yọọ kọ juwa kpeji e-epwoohe, ká alegu-ẹrụ ịlẹ kahị ka jụ wa myị́ ka dagaga jwoo. Kpịtịya nyori ị ya “ọngịrị myị́ ọngịrị ọlepwoohe bala odehe wuu” jwoo ụ-ụbwọ lẹ bala o-ri ‘ọ ka juwa tahị ẹ-ẹga myị́ ẹga ụka wuu pwụ ọbaba nya odehe ọlẹ.’ (Mat. 28:18-20) IPita byihi ahị nyị “juwa nwụlanọ yẹẹyẹẹ ụka wuu” nyọka dẹwụ ju ọmyịmyị nyahị. Ọ ka háng ká ka ya ẹla nya Ohe ọ-ọlụkụrwọ nyang, uube-ụpwụ lee iiwe-ahụrụ ọkịla? Maga ká kụ irya ene u-uhye nya ụka ọlẹ ká ka jẹ́-ẹ họ ịnyị myị́ ká nwụla ẹla ọlẹ ká ka ya nọ ịnyịnyị. Raabwọ nyọka ju ugbodu, dahịhile nyori iJihova ka dang ụbwọ nyọka kụrụ uhi nya angịnyị ehe myị́.—Ụkụr. 4:29.

9. Ịyẹ iPita à tị́ họ ụka ọhẹ du kọ mẹjẹ nyori ọ́ mẹ ọháha jẹ ka? (Yẹ ifoto ịnyịnyị.)

⁹ IPita jẹ́ jaabwọ kọ ka bwu mẹ ọháha jẹ. O juwa i-ijata ụka ká iJisọsị yẹkẹẹ: “Ehile onyeewe a lẹẹ kam lẹẹ danụ lẹ. Anụ la ọháha ẹ-ẹga  nya awụlẹ nya ịlẹhị-ịlẹhị, jaabwọ kaam ayịdang la ọháha ẹ-ẹga nyanụ wẹ mẹ.” (Jọn. 13:34) Nanana nyọlẹ kọ lịnyị, iPita juhi ụka ọhẹ kpụ o hwabwọ la ọ-ka ri ang ta aanamwụ alẹng bala anyang ịlẹ kị ri ala iJentayịlị. Ọlẹrụ ịPọlụ ya ẹla rụ ọhọhọ nya iPita ọwẹ nyori nyị “la ahị imiiye.” (Gal. 2:11-14) IPita ye alibyi ọwẹ myị bala ọ-jẹ́ ang bwu ẹpwụ nyamwụ. Ẹ-ẹpwụ nya ileta imiiye ịlẹ ká iPita da, ọ ya ẹla yẹẹyẹẹ u-uhye nyori ahị nyị́ ka la ọháha ẹ-ẹga nya aanahị ịịwẹ kem ka, ma ahị nyị ka mọ́ọ jẹ ịnyịnyị.

10. Ịyẹ à tị́ ka dahị ụbwọ nyọka “la ọháha ọgbagbịlagba” ẹ-ẹga nya aanahị? (1 iPita 1:22)

¹⁰ IPita ya nyori ahị nyị ka “la ọháha ọgbagbịlagba” ẹ-ẹga nya aanahị ịlọjịra-jịra. (Wa 1 iPita 1:22.) “Ihi nya ẹla nya ịlẹhị nya Ohe Oluhye ojuju” à du kahị jẹ́-ẹ la ọháha ọlịnyị lẹ. Ọ-jẹ́ nyori “Ohe Oluhye . . . á ri ọngọ kaa ji oye nya ọngọngọhẹ datị kpong-kpong ka,” ri ụpa nya ẹlịlẹhị ọwẹ. (Ụkụr. 10:34, 35) Kori kahị la ọháha ẹ-ẹga nya angịhyẹ ịlọjịra-jịra kahị tị la ẹ-ẹga nya angịkịla ka aalẹ, áhị ju ihi nya ehile nya iJisọsị lẹka. Ịlẹhị lẹ, ahị ka wu angịhyẹ igu gụ́ angịla myị́, jaabwọ kọ la ẹ-ẹga nya iJisọsị. (Jọn. 13:23; 20:2) Ma iPita kpụhị ịtịya nyori ahị nyị ka maga nyọka “la ọháha ọgbagbịlagba,” kọ ri ọháha ụma ọlẹ kọ kaa yẹ alugbiyegu jula awụlẹ, ẹ-ẹga nya aanahị alẹng bala anyang.—1 Pit. 2:17.

11. Ịyẹ à tị́ ri etu nyọka la ọháha “yẹẹyẹẹ bwu ẹpwụ ọkịlẹtụ” nyahị?

¹¹ IPita byihi nyori ahị nyị “la ọháha ẹ-ẹga nya awụlẹ yẹẹyẹẹ bwu ẹpwụ ọkịlẹtụ” nyahị. Etu nya ọ-la ọháha “yẹẹyẹẹ” ọlẹ kị ya ẹ-ẹgẹwẹ ri ọ-ka la ọháha ẹ-ẹga nya ọngịnyị tụ́ ụka kọ dọmwụ lujwo la ọ-ka họ ịnyị. Ọ-chụ pwokwita, kori ká ọọnahị ọhẹ á họ ẹla wụ́ụhị ẹjẹ bẹ? Ang ọlẹ kọ ka wẹ irya nyahị ri ọ-ka họ kwiwa, ọkọkọ nyọka la ọháha ẹ-ẹga nya ọngọọwa. Ma, iPita jẹ́ ang bwu ẹga nya iJisọsị nyori ọ-họ kwiwa á kaa kpụ Ohe ịpyọ ka. (Jọn. 18:10, 11) IPita da ụpwụ ya nyori anụ nyị juwa “kpa ang onyobyi nwụ angị họnụ ang onyobyi uri kpong-kpong ka. Lee o-juwa kpa ido ododo nwụ angịlẹ kị juwa doonu ido uri kwiwa ka ịnyịnyị. Ma, ọkọkọ nya ọọwa lẹ, anụ-ụ juwa ri angị wahị kụrụ angịkịla kem me.” (1 Pit. 3:9) Ya iwe da ká ọháha okpori-kpori a gung gbịla nyọka họ ọnahị bala ọ-ka họ ẹla me irya nya angịkịla tụ́ ẹga nya angịlẹ kị họ ẹla wụng ẹjẹ.

12. (a) Ang ọkịla oyina ọháha okpori-kpori à tị́ ka guhi gbịla nyọka họ? (b) Ịyẹ a tị́ cheje nyọka họ, jaabwọ kị họ mẹjẹ ẹ-ẹpwụ nya ifim ọlẹ kọ ri, Preserve the Precious Gift of Unity?

¹² Ẹ-ẹpwụ nya ileta ọhọhẹ nya iPita, ọ kpa omyi ẹla ọlẹ kọ ri “ọháha ọlala nya ịlẹhị-ịlẹhị” ya ẹla. Ọháha ọlịnyị “jẹ́-ẹ chịpyị ba ọhọbịrị ịhọhọ” lụmẹ-lụmẹ ọkọkọ nya ịmanyị-manyị kem. (1 Pit. 4:8) Ọhẹka iPita kpịtịya nya ẹla ọlẹ ká iJisọsị mẹjọ́ọ u-uhye nya ọhịnyọhi ẹ-ẹpwụ nya ẹka ịmanyị-manyị kẹkpẹ. Ụka ọwẹ, ọ ka la iPita lala o-ri nyị ri ọngịnyị ọnyịịla nyọlẹ kọ nwụlanọ nyọka hịnyọhi “ugbabwọ irwiye chiriri” lẹ myị́. Ma iJisọsị tị mẹ ẹlẹhẹ jọ́ọ ká ahị ịnyịnyị ka jẹ́ ang bwu ụwa. Ẹla ọọwa ri, ahị ka hịnyọhi “ugbabwọ irwiye ụka iwo irwiye gbẹgbịlẹ,” mẹjẹ nyori ọ-hịnyọhi á ka la ọbaba ka. (Mat. 18:21, 22) Kori kọ kaa lang ujwo nyọka kpa ẹlẹwẹ họ ụkụrwọ aalẹ, ọkịlẹtụ a kpụng enyi ka! Anchẹ nya iJihova wuu á la kpẹẹkpẹẹ ka, lẹ ọ kaa lujwo ụka ọhẹ nyọka hịnyọhi. Ang ọlẹ kọ baba ká ka họ lẹelẹẹ ri ọ-ka hu ẹta-ẹdịyẹ ịlẹ kị baba nyọka jẹ́-ẹ hịnyọhi ha ọọnang bala ọ-họ okpunyi balọọ. c

13. Ịyẹ à tị́ ka du kọ ka lujwo ha angịgbahị nya ọjịra-jịra nyọka kpẹhị rịrị alọjịra-jịra myị́?

¹³ Nyọlẹ ká iJisọsị wuleji bwula igu kpá, ọ byi iPita yẹkẹẹ: “Aa tị tị kpa ịkpịlọ nyam la ang  oriri mẹ.” (Jọn. 21:16) Ọ la gede-gede nyori iPita á deeri nya ẹla ọlẹ ká iJisọsị byoo wẹ ka. Kori ká ri ọngọgbahị nya ọjịra-jịra, à ka jẹ́ nyori ẹlẹwẹ gung ịnyịnyị. Ọ tị ka lujwo myị́ nya ọngọgbahị nya ọjịra-jịra ọ-ka yé ụka họ ụkụrwọ ọkpọnchị ọlẹ kọ la wẹ. Angịgbahị nya ọjịra-jịra baba nyọka kpahị ju ugbiyegu nyaa họhẹ-họhẹ ẹ-ẹga nya ang nya ugbinyịrọ bala ịnya olegu. Ị kaa kpịlahị ẹ-ẹpwụ nya ẹrụ ọnyịịla ọ-kpa pyẹ, ọ-nwụlanọ bala ọ-họ ụpa ọọjịra-jịra nya epwihi, ịnya isekut bala ọtụka. Angịhyẹ nyaa myịmyị kaa họ ụkụrwọ bala iKomitii nya Angị Me Obyi bala Angị Họ Utoji lee ọ-kaa la ụkụrwọ bala Local Design/Construction Department. Ụkụrwọ nya angịgbahị nya ọjịra-jịra lụmẹ ịnyịlẹhị!

14. Ịyẹ à tị́ ka gu angịgbahị nya ọjịra-jịra gbịla nyọka kpẹhị rịrị ịkpịlọ nya Ohe? (1 iPita 5:1-4)

¹⁴ IPita byi angịgbikpịlọ nya Ohe ịkịla yẹkẹẹ: “Anụ . . . juwa kpẹhị rịrị angịnyị nyanụ ịlẹ ká Ohe Oluhye ya jụnụ ụ-ubwọ” mẹ. (Wa 1 iPita 5:1-4.) Kori ká ri ọngọgbahị nya ọjịra-jịra, ahị jẹ́ nyori aanang alẹng bala anyang háng, à tị tịtọ nyọka kpẹhị rịraa ịnyịnyị. Ma, ụka ọhẹ ọ ka lang lala o-ri ụkụrwọ nyang nyị lụmẹ lee ịnyịrọ nyị chị́ng pyẹpyẹ kpoye nyọka họ ụkụrwọ ọwẹ myị́. Ịyẹ a tị́ ka jẹ́-ẹ họ? Ya ẹla ọla irya nyang je iJihova. IPita da ụpwụ yẹkẹẹ: “Ọ . . . ri ẹrụ ọmyịmyị ká juwa myị lẹ aalẹ, aa juwa kpa ọngịrị ọlẹ ká Ohe Oluhye hu hang wuu lẹpwụ-lẹpwụ họ ụkụrwọ nyang ọọwa mẹ.” (1 Pit. 4:11) Aanang ịlọjịra-jịra ka juwa ẹ-ẹpwụ nya akama ịlẹ kị ka jẹ́-ẹ myị gbang-gbang ẹ-ẹpwụ nya odehe ọlẹ lẹẹlẹẹ kaka myị́. Ma kpịtịya nyori “olegbeju ọgbahị ọtụka nya angịgbikpịlọ nya Ohe Oluhye” kori ri iJisọsị ịKịrayịsị, ka jẹ́-ẹ daa ụbwọ kpoye nya abwọlẹ ká ka jụ họ. Ọ ka jẹ́-ẹ họ ịnyị lẹẹlẹẹ bala ụ-ụwa odehe onyeewe. Ang ọlẹ ká Ohe tịtọ ká angịgbahị nya ọjịra-jịra ka họ kem ri ọ-ka la ọháha ẹ-ẹga nya aanaa, kpẹhị rịraa, bala ọ-ka ri “ụbajị o-me enyi ẹpwụ” lee ọ-ya ọgụ-ẹpẹtẹ ọnyịịla deeji ha ịkpịlọ nya Ohe.

15. Ányị ọngọgbahị nya ọjịra-jịra ọhẹ à tị́ kaa bwu kpẹhị rịrị ịkpịlọ nya Ohe? (Yẹ ifoto ịnyịnyị.)

¹⁵ William, kọ ri ọngọgbahị nya ọjịra-jịra lụka ọtata lẹ, jẹ́ ọbaba nyọka kpẹhị rịrị aanahị ịlụwa. Nyọlẹ ká ẹdụrụ nya COVID-19 dọmwụ, ọwa bala angịgbahị nya ọjịra-jịra ịkịla kaa hwọọ nya ang ọhọhẹ-họhẹ nyọka wo ẹla bwu ẹga nya ọng myị́ ọng ọlẹ kọ juwa e-ebwo nyaa epwihi ọnyị myị́ ọnyị. O ya ang odudu kị  kaa họ ịnyị yẹkẹẹ: “Iru nya aanahị kaa juwa ẹ-ẹpwa ụbwaa, irya nyaa tị ka ka ẹga nya ang ịtịpyọ ahyaahị myị́.” Ụka ká iwe-ahụrụ á lujwo ha ọngọhẹ ẹ-ẹpwụ nya ọjịra-jịra, William kaa ke ụrụ kpẹnẹẹ bala ọ-maga nyọka jẹ́ ang ịlẹ kị ri ịbaba bala uko ọchịchị nyamwụ. Ọọwa lẹ, ọ kaa mwahị nya apwụ lee ifim ịhyẹ bwu ịwẹbsayịtị nyahị ịlẹ kọ ka kpa da ọngọọwa ụbwọ lẹlẹ. Ọ yẹkẹẹ: “Ẹhị ọ-kpa rịrị aanahị baba lẹẹlẹẹ gụ́ olene. Ahị kaa maga yẹẹyẹẹ nyọka da angịnyị ụbwọ kị ka jẹ́ ang u-uhye nya iJihova, lẹ ahị baba nyọka maga yẹẹyẹẹ kahị ka kpẹhị rịrị ịkpịlọ nya Ohe bwula ọ-daa ụbwọ kị ka kịnyaa ẹ-ẹpwụ nya Ẹlịlẹhi ịnyịnyị.”

16. Agbẹyị iyina ahị tị́ ka jẹ́-ẹ kpa ẹla ịlẹ kahị jẹ́ bwu ileta ịlẹ ká iPita da họ ụkụrwọ?

¹⁶ Ala ịmanyị-ịmanyị ịlẹ kahị jẹ́ bwu apwụ imiiye ịlẹ ká iPita da ahị ya ẹla u-uhye nyaa wẹ lẹ. Ọhẹka à ka yẹ ẹgẹhẹ ọlẹ ká ka tịtọ nyọka nwụ họ myị́. Ọ-chụ pwokwita, ọ ka háng nyọka kụ irya gụ́ ọọwa ju ahị ọwawa ịlẹ kahị ka yé odehe onyeewe? À chị nọ ha ịlọng nyọka ya ẹla nya Ohe ọ-ọlụkụrwọ, ube-ụpwụ, lee iwe-ahụrụ ịkịla lẹ? À yẹ agbẹyị ịhyẹ ịlẹ ká ka jẹ́-ẹ mẹ ọháha okpori-kpori jẹ gụ́ olene ẹ-ẹga nya aanang alẹng bala nyang lẹ? Angịgbahị nya ọjịra-jịra, anụ cheje nyọka kpẹhị rịrị ịkpịlọ nya iJihova bwu ọkịlẹtụ la ila ọchịchị lẹ? Ụka ka kụ ẹhị yẹ ịlọng yẹẹyẹẹ à ka yẹ ẹga ọlẹ ka baba nyọka nwụhọ myị́, ma ọkịlẹtụ a kpụng enyi ka. ‘Ọngọlahị ri ọngọ kaa họ ọnahị,’ ọ ka dang ụbwọ nyọka nwụhọ. (1 Pit. 2:3) IPita họ kahị jẹ́ myị̀myị̀ yẹkẹẹ: “Ohe Oluhye . . . ayịdang ka họ kanụ ka godayị giri-giri la ọngịrị kpọng-kpọng.”—1 Pit. 5:10.

17. Kori kahị maga yẹẹyẹẹ bala ọ-ya iwe da ká iJihova ka mẹ ang jẹ́ẹhị, ịyẹ à tị́ ka ri ocheju nyamwụ?

¹⁷ Ọ la iPita ụka nya ọgbanyẹ lala o-ri ọ́ chịla nyọka juwa ẹ-ẹga nya Ọnyị nya Ohe ka. (Luk. 5:8) Ma bwula ụbwọ ọdada nya iJihova bala iJisọsị, iPita jẹ́ ba iJisọsị jẹ ẹ-ẹpwụ nya ọmyịmyị. Lẹ, iPita jẹ́ “la iwe-ahụrụ ọ-pwọọ ọlẹ kọ ka kpọọ kaka jụ ka ẹpwụ nya ịpyị adịrahụ o-gbe oyi myị́ oyi nya iJisọsị ịKịrayịsị ọlẹ kọ ri Ọngọlahị la bala Ọngọchịda nyahị.” (2 Pit. 1:11) Āhị ọtụka-ọtụka à wẹ lẹ! Kori ká maga yẹẹyẹẹ jaabwọ ká iPita họ bala ọ-ya iwe da ká iJihova ka mẹ ang jẹ́ng, ahụ ịnyịnyị ka ya āhị nya ọhịhị ọmyịmyị-ka. Ọmyịmyị ọlala nyang ka du ká ahụ ịnyịnyị ka “ye ọchịda.”—1 Pit. 1:9.