ANG ỌJẸ́JẸ 39
Apyobwuna nya Ọdụmwọ Ọlala
“Ọ́ chịla ká ọnchẹ nya Ọngọlahị ka ri ọngọ rwarụ ta angịnyị ka. Ma, ọ chịla kọ ka ri ọngọ ya ẹla gẹnẹ-gẹnẹ ta ọng myị́ ọng.”—2 TIM. 2:24.
EJE 120 Imitate Christ’s Mildness
ẸHỊ NYA ẸLA a
1. Ẹlịyẹ ị tị́ ka tọhị wo ọ-ọlụkụrwọ lee ube-ụpwụ myị́?
ÁNYỊ ọ tị́ kaa lang kori ká ọngọhẹ ọ-ọlụkụrwọ lee ube-ụpwụ nyang á tọng ịtọ ẹla u-uhye na ọmyịmyị nyang? À kaa chuko? Ọ kaa la iru nyahị ịnyị. Ma ịtọ ẹla ọlịnyị ka wụrụ ụgbẹyị da hang nyọka jẹ́ ọmyịmyị nya ọngọọwa du ká ka la iwe nyọka ya ẹrụ ọnyịịla joo myị́. Ma ụka ọhẹ, ọngịnyị ka tọhị ịtọ ẹla ụ-ụgbẹyị ọlẹ kọ ka lala ịwẹẹ ọdada myị́. Ọọwa á ka lahị ẹbyẹbyị ka. Chajị ị kaa me ọnọọkịla ju angịhyẹ u-uhye nya ọmyịmyị nyahị. (Ụkụr. 28:22) Da ọọwa u-uhye, ahị jam hịhị “lụka ohyẹẹkpẹ nya odehe,” kọ ri ụka ọlẹ ká angịnyị á ka “la olegu nya ahyẹẹrwẹrwa ẹ-ẹga nya awụlẹ kpong-kpong ka” bala ọ-dọmwụ kaa “họ angịnyị ang ọnyọọngịrị.”—2 Tim. 3:1, 3.
2. Ịyẹ tị́ du ká ọdụmwọ ọlala baba lụmẹ?
2 Ọhẹka à ka tọ ịlọng wo myị́ nyori, ‘Ányị m tị́ ka bwu la wụlẹlẹ bala o-ya ẹla la ọnụ ọgẹnẹ-gẹnẹ ụka ká ọngịnyị á dam ịwẹẹ nya ẹla ọlẹ kam myị bwu ịBayịbụụ?’ Ịyẹ à tị́ ka dang ụbwọ? Ọdụmwọ ọlala ịnyị. Ọngịnyị ọlẹ kọ la dụmwọ á kaa ju agbama nya ẹla hyaa ka. Ọ jẹ́-ẹ wu ịlọmwụ kpa ẹ-ẹpwụ nya iwe-ahụrụ ọlẹ kọ ka du agbama jwoo lee ụka kọ jẹ́ ẹla ọlẹ kọ ka wẹ kpangga ka. (Etu 16:32) Ọhẹka, ọ ka lang lala o-ri nyị chịkpẹẹ ọ-ọnụ. Ányị a tị́ ka bwu la abwẹla nya ọdụmwọ ọlala? Ányị a tị́ ka bwu wẹ ẹla la ọdụmwọ ụka ká ọngịnyị á ja dang ịwẹẹ u-uhye nya ọmyịmyị nyang? Ọ́ tị ri ká ri adịda lee ịnịna, ányị a tị́ ka bwu da anjwọ nyang ụbwọ kị ka jẹ́-ẹ chẹkpẹ ju ọmyịmyị nyaa la ọdụmwọ? Ahị yẹ wẹẹ.
ABWỌLẸ Á KA BWU LA DỤMWỌ
3. Ịyẹ tị́ du kahị ka jẹ́-ẹ ya nyori ọdụmwọ ọlala ri ọngịrị ọkọkọ nya ọdẹwụ-dẹwụ? (2 iTimoti 2:24, 25)
3 Angị la dụmwọ la ọngịrị, ị́ la dẹwụ-dẹwụ ka. Ọngịnyị baba nya ọngịrị nyọka jẹ́-ẹ wu ịlọmwụ kpa kpọọ ẹ-ẹpwụ nya iwe-ahụrụ olujwo. Ọdụmwọ ọlala ri ụpa nya ‘ugbe nya olegu ịgọgọ.’ (Gal. 5:22, 23) Ụka ọhẹ, ị kaa kpa omyi ẹla nya iGiriki ọlẹ kị yẹda wẹ ka ri “ọdụmwọ ọlala,” chabwọ nya ụnyịrẹ ọla ẹpwamẹ ọlẹ kị mwụ kpa ka ẹpwa. Kụ irya nya abwọlẹ ká ụnyịrẹ ọọwa ka la dụmwọ ugbẹnyị wẹẹ. Ịlẹhị lẹ, ụnyịrẹ ọọwa la dụmwọ lẹẹlẹẹ lẹ, ma ọ la ọngịrị ịnyịnyị wẹẹ. Ahị angịnyị ehe ka jẹ́-ẹ la dụmwọ, ahị ka myị́myị́ jẹ́-ẹ la ọngịrị ịnyịnyị? Áhị ka jẹ́-ẹ họ ịnyị myị́ la ọngịrị nyịlọhị ka. Ang ọlẹ kọ ka dahị ụbwọ ri ọ-ka raabwọ bịlẹ olegu nya Ohe Oluhye nyọka dahị ụbwọ nwụ abwẹla ọnyịịla ọwẹ. Angịnyị lụmẹ-lụmẹ tị họ ịnyị myị́ lẹ. Iru nya Alibeenu nya iJihova kaa wẹ ẹla la ọdụmwọ ụka ká angị táa pyịpyi á juwa du agbama jwaa. Ọ tị kaa kpụ angịlẹ kị ja yaa ịpyọ. (Wa 2 iTimoti 2:24, 25.) Ányị a tị́ ka họ ká ọdụmwọ ọlala ka ri ang ọhẹ bwu ẹpwụ nya ang ịlẹ kị ri ọngịrị nyang?
4. Ẹlịyẹ ahị tị́ ka jẹ́ u-uhye nya ọdụmwọ ọlala bwu ẹga nya Ayịsiki?
4 Oja lụmẹ-lụmẹ ji ẹpwụ nya ịBayịbụụ kị mẹjẹ nyori ọdụmwọ ọlala ju apyobwuna. Ọ-chụ pwokwita ri Ayịsiki. Ụka kọ kụ ịGẹra e-epweji nya ala iFilisitiya, aloyi-ẹpwa nyamwụ ịlẹ kịị yẹ ijiiji nyamwụ chụ ịpyị mịla ịwẹlụ ọlẹ ká anchẹ nya adamwụ wu. Ọkọkọ ká Ayịsiki ka ma uya chajị nya ẹla ọọwa, ọ mwụ ugbiyegu nyamwụ lụrụ hi ẹga ọọwa bala o-wu ịwẹlụ ịkịla. (Ọmwụ. 26:12-18) Ma ala iFilisitiya tị myị́myị́ ya nyori enyi ịla ẹga ọọwa nyị ri ịnyaa ịnyịnyị. Nanana nyọlẹ kọ lịnyị, Ayịsiki họ ká okpunyi ka ji. (Ọmwụ. 26:19-25) Ịyẹ à tị́ dọọ ụbwọ nyọka họ ẹla la ọdụmwọ nanana nyori angịkịla tịtọ nyọka du agbama jwoo? Ọ la gede-gede nyori ọ yẹ ọgụ-ẹpẹte nya adamwụ bala ịnamwụ. Ọ jẹ́ ang bwu ụgbẹyị ọlẹ ká Ebiraham kaa bwu họ okpunyi bala “olegu ọdụmwọ ọlala bala ọwụlẹlẹ ọlala” nya iSera ịnyịnyị.—1 Pit. 3:4-6; Ọmwụ. 21:22-34.
5. Ọ-chụ pwokwita oyina à tị́ mẹjẹ nyori adịda bala ịnịna ka jẹ́-ẹ mẹ apyobwuna nya ọdụmwọ ọlala jẹ anyị nyaa?
5 Anụ adịda bala ịnịna ịlẹ kanụ ri angịnyị nya ịKịrayịsị, jẹ́ myị̀myị̀ nyori anụ ịnyịnyị ka jẹ́-ẹ da anyị nyanụ ụbwọ nyọka jẹ́ apyobwuna nya ọdụmwọ ọlala. Kụ ẹhị yẹ ọ-chụ pwokwita nya Maxence, kọ gu ẹka 17 wẹẹ. Ọ kaa gbachị angịnyị ịlẹ kị kaa ju agbama ọ-ọlụkụrwọ bala ụka nya ẹrụ ọnyịịla ọ-kpa pyẹ. Adamwụ bala ịnamwụ kpa ugbodu ojuju dọọ ụbwọ nyọka la dụmwọ. Ị yẹkẹẹ: “Maxence wẹ ka jẹ́ nyori ụka ká ọngịnyị á du agbama jwoo, ọ baba nya ọngịrị nyọka wu ịlọmwụ kpa gụ́ ọ-ka wẹ ẹla la agbama tịrẹkpẹ.” Ọ tị kpịpyọ nyori Maxence jẹ́ jaabwọ kọ ka bwu ri ọngọ la dụmwọ lẹ.
6. Ányị abwọ ọrịrị à tị́ ka jẹ́-ẹ dahị ụbwọ nyọka la dụmwọ?
6 Ányị ahị tị́ ka họ kori ká angịnyị á ja du agbama juhi, lala ụka kị ja ya ẹla ọtịpyọ rụ ẹnyị nya Ohe lee ẹla ọla ịBayịbụụ? Ahị ka bịlẹ iJihova kọ ka ya olegu bala ẹla ọjẹ́jẹ nyamwụ hahị chajị kahị ka wẹ ẹla ụ-ụgbẹyị ọkpẹnẹẹ. Ma, ọ́ tị ri kahị wẹ ka jẹ́ nyori ụgbẹyị ọlẹ kahị wẹ ẹla ọọwa á pwoku ka bẹ? Ahị ka jẹ́-ẹ raabwọ myị́myị́ u-uhye nya ẹla ọọwa bala ọ-kụ irya u-uhye nya abwọlẹ kahị ka bwu wẹ ụ-ụgbẹyị ọnyịịla ụka ọkịla. IJihova ịnyịnyị tị ka ya olegu nyamwụ hahị chajị kahị ka jẹ́-ẹ wu ịlọhị kpa ẹ-ẹpwụ nya agbama bala ọ-ka họ ẹla la ọdụmwọ.
7. Ányị ọ-kpa ẹla ịhyẹ bwu ịBayịbụụ e-egbeju à tị́ ká jẹ́-ẹ dahị ụbwọ ẹ-ẹpwụ nya iwe-ahụrụ olujwo? (Etu 15:1, 18)
7 Ịgba nya ịBayịbụụ ji lụmẹ-lụmẹ kị ka jẹ́-ẹ dahị ụbwọ ụka kọ lujwo hahị nyọka ya ẹla la ọdụmwọ. Olegu ịgọgọ nya Ohe ka jẹ́-ẹ kpụhị ịtịya nya ịgba ịịwa. (Jọn. 14:26) Ọ-chụ pwokwita, itiwe nya ehile ịlẹ kị juwa ụ-ụpwụ nya Etu ka jẹ́-ẹ dahị ụbwọ nyọka la dụmwọ. (Wa Etu 15:1, 18.) Ụpwụ nya Etu ọwẹ myị́myị́ ya apyobwuna ịlẹ kahị ka yé kori kahị wu ịlọhị kpa ẹ-ẹpwụ nya iwe-ahụrụ olujwo.—Etu 10:19; 17:27; 21:23; 25:15.
ABWỌLẸ KÁ ẸLA ỌJẸ́JẸ KAA DAHỊ ỤBWỌ NYỌKA LA DỤMWỌ
8. Ịyẹ tị́ du kahị ka kụ irya ju ang odudu ká ọngịnyị ka tọhị ịtọ ẹla u-uhye nya ọmyịmyị nyahị myị́?
8 Ẹla ọjẹ́jẹ ka jẹ́-ẹ dahị ụbwọ ịnyịnyị. (Etu 19:11) Ọngịnyị ọlẹ kọ jẹ́ ẹla jẹ́-ẹ wu ịlọmwụ kpa ụka ká ọngọkịla á ja dọọ ịwẹẹ nya ẹla ọlẹ kọ myị́ la. Ịtọ ẹla lee ịwẹ ọdada ịhyẹ lala ẹjwọ ọlẹ kọ kpa ẹhị kaka kụ ehe, ma ká ụpa ọtụka nyamwụ tị hi juwa ẹ-ẹpwụ nya ịpyị wẹ. Ọ-chụ pwokwita, ọngịnyị ka ya ẹla ọlẹ kọ la i-irya kpịbaa ụka kọ tọhị ịtọ ẹla myị́. Lẹ ene kahị ka wẹ ẹla, ọ ka há nyọka jẹ́ ang ọlẹ kọ gu ọngọọwa gbịla nyọka tọ ịtọ ẹla ọọwa.—Etu 16:23.
9. Ányị iGidiyọn à tị́ kpa ẹla ọjẹ́jẹ bala ọdụmwọ ọlala họ ẹla ẹ-ẹga nya alẹng nya ala Ifurem?
9 Kụ irya nya abwọlẹ ká iGidiyọn wẹ alẹng nya ala Ifurem ẹla lẹẹ wẹẹ. Ị wẹ la agbama kaka tọọ ịtọ ẹla u-uhye nya ang odudu kọ wụraa ụka nya ọgbanyẹ kị ka yẹ julọọ dẹwụ ta aluji nya ala Isirẹlụ ka. Ma ẹlịyẹ kpangga à tị́ du kị wẹẹ ju agbama ịịwẹ? Ọ laa lala o-ri nyị haa ẹla ọtịpyọ ịnyị? Jaabwọ myị́ abwọ kọ la, iGidiyọn kpa ẹla ọjẹ́jẹ chị ihi jwaa bala ọ-waa ẹla la ọdụmwọ. Ịyẹ à tị́ ri ocheju nyamwụ? “Agbama nyaa a kpụba” lẹlẹ.—Angị. 8:1-3.
10. Ịyẹ à tị́ ka dahị ụbwọ nyọka jẹ́ jaabwọ kahị ka wẹ ẹla ụka ká ọngịnyị á tọhị ịtọ ẹla u-uhye nya ọmyịmyị nyahị? (1 iPita 3:15)
10 Ọhẹka ọngọhẹ ọ-ọlụkụrwọ lee ube-ụpwụ ka tọhị wo nya ang odudu kahị kaa ju ihi nya ẹla ọla ịBayịbụụ myị́. Ahị ka maga kahị ka wụlẹ ang odudu kahị myị nyori ẹla ọlẹ ká ịBayịbụụ ya à há gụ́ lẹ ya joo. (Wa 1 iPita 3:15.) Lẹ, ọkọkọ nyọka kụ irya nyori ịtọ ẹla nyamwụ ri abyị kọ wẹẹ kpụhị, maga ká kụ irya u-uhye nya abwọlẹ ká ịtọ nyamwụ ka dang ụbwọ jẹ́ ẹla ọlẹ kọ baba họọ. Ang myị́ ang kọ du ká ọngịnyị á tọhị ịtọ ẹla, ọ ka há kahị ka wẹ ụ-ụgbẹyị ọkpẹnẹẹ bala ọdụmwọ. Ọwẹwẹ nyahị ka gu ọngọọwa gbịla nyọka kụ irya ju ẹla ọlẹ kahị ya myị́. Ọ́ dọmwụ ri ká ẹla oyaya nya ọngọọwa á la ọngịrị-ọngịrị lee ọ-lala o-ri ọ ja kpahị họ wẹwẹ, ang ọlẹ kahị ka tịtọ ri ọ-ka wẹ ẹla ụ-ụgbẹyị ọkpẹnẹẹ.—Rom. 12:17.
Kori kahị jene kụ irya u-uhye nya ang odudu ká ọngịnyị wụrụụhị ka ọ-họ kpa kpịtịya nya ọmama, ahị ka jẹ́-ẹ wẹ ẹla pwoku (Yẹ ọgba 11-12)
11-12. (a) Ẹlịyẹ ahị tị́ ka kụ irya ju myị́ ene kahị ka wẹ ịtọ ẹla olujwo? (Yẹ ifoto ịnyịnyị.) (b) Ya ọ-chụ pwokwita nya abwọlẹ ká ịtọ ẹla ka jẹ́-ẹ wụrụ ụgbẹyị da hahị nyọka ya ẹla bala ọngịnyị wẹẹ.
11 Ọ-chụ pwokwita, ó ri ká ọngọhẹ ọ-ọlụkụrwọ nyahị á tọhị wo kori kahị kaa họ ọ-họ kpa kpịtịya nya ahyẹẹnụ nya ọmama, ẹga ọlẹ kahị ka kpa irya ka ri, ọ ja kụ irya kori kahị kaa la iwe nya ụya ọyaya ịnyị? Lee ọ tị́ ja kụ irya nyori nyọlẹ kahị kaa họ ọ-họ kpa kpịtịya nya ọmama ka wẹẹ, ọ ka du ká ala ụkụrwọ á ka jẹ́-ẹ yẹ jula awụlẹ gbuu ka ịnyị? Ahị ka jẹ́-ẹ ji ọlụkụrwọ nyahị ọọwa obe ọhọhọ nyọlẹ kọ kpa angịkịla i-irya bala ọ-họ kọ ka jẹ́ nyori ọ kaa háahị ká alụkụrwọ ka yẹjula awụlẹ ịnyịnyị. Ọọwa ka wụrụ iwe da hahị myị́ nyọka jẹ́-ẹ ya ẹla joo kpẹnẹẹ u-uhye nya ẹla ọlẹ ká ịBayịbụụ mẹjẹ ẹ-ẹga nya ọ-họ kpa kpịtịya nya ọmama.
12 Ụka ká angịnyị á tọhị ịtọ ẹla ọlẹ kọ lujwo, ahị ka jẹ́-ẹ ba ụgbẹyị ọlịịwẹ jẹ myị́. Ọngọhẹ uube-ụpwụ nyahị ka ya myị́ nyori Alibeenu nya iJihova nyị baba nyọka yẹ irya nyaa da u-uhye nya alẹng-alẹng bala anyang-anyang ọ-ka ẹga nya awụlẹ. Ọ́ jẹ́ ẹla ọlẹ ká Alibeenu nya iJihova myị la u-uhye nya ang ịlịnyị ka à du kọ tọ ịtọ ẹla ọwẹ lẹ? Lee ọ tị́ chịkpẹẹ myị́ ká oligu lee olugbiyegu nyamwụ ọhẹ ri ọngịnyị ọlịnyị? Ọ me nyori angị la ọhịhị ụma ọlịnyị wụ́ụhị ẹjẹ ịnyị? Ahị ka baba nyọka họ kọ ka jẹ́ myị̀myị̀ nyori ahị kaa kpahị ju ọng myị́ ọng bala ọ-jẹ́ nyori ọng myị́ ọng la iwe nyọka chụ ang ọlẹ kọ họ́ọ nyọka họ. b (1 Pit. 2:17) Ụka ọlịnyị ahị ka jẹ́-ẹ ya ẹla u-uhye nya ẹla ọlẹ ká ịBayịbụụ ya ẹ-ẹga nya ọhịhị ocheri-cheri myị́.
13. Kori ká ọngịnyị á ja kpahị họ chajị nyọlẹ kahị myị la Ohe, ányị ahị tị́ ka bwu dọọ ụbwọ?
13 Ụka ká ọngịnyị á pwa ẹla nyahị la ọngịrị-ọngịrị, áhị ka chị agaga hwoo nyori ahị jẹ́ ẹla ọlẹ kọ myị la lẹ ka. (Tay. 3:2) Ọ-chụ pwokwita, kori ká ọngọhẹ uube-ụpwụ nyahị á ya nyori nyị kpụ ẹlẹhụ nyọka myị la Ohe bẹ? Ahị ka yọọ nyori ọ myị ká ang wuu hu kpuu kaka ji bala o-ri ọ jẹ́ ang yẹẹyẹẹ u-uhye nyọọwa lẹ? Ọ chịkpẹẹ myị́ kọ ka kụ irya ju ẹlẹwẹ nwà lẹka. Ọkọkọ nyọka dọmwụ nya ịwẹẹ ọdada u-uhye nya ẹla ọlẹ ká angị chị ang ehe ya, à ka jẹ́-ẹ mwahị nya ụgbẹyị ọlẹ ká ka ya ẹlẹhẹ ọlẹ kọ ka kpa kụ irya ju myị́. Ọhẹka à ka jẹ́-ẹ dọọ ụbwọ ka ẹlẹhẹ ọlẹ kị gba kpehe ịị jw.org u-uhye nyori Ohe à họ ang wuu lẹ myị́. Ọ chịkpẹẹ myị́ kọ ka myọnụ nyọka ya ẹla u-uhye nya ẹla ọọwa lee ifim ọlẹ kọ yẹ ụ-ụwa ụka ọkịla. Ee, ẹla o-ya la ihi ka gu ọngịnyị gbịla nyọka kụ ẹhị yẹ ẹla ọlẹ kahị ya joo myị́.
14. Ányị Niall à tị́ kpa ịwẹbsayịtị nyahị họ ụkụrwọ nyọka da ọnyị ọla ịkịlasị nyamwụ ụbwọ ẹ-ẹga nya ẹla ịlẹ ká angịnyị kaa ya ba Alibeenu nya iJihova?
14 Ọọnahị o-gu ẹka iwo kụrụ ọhẹ ká ẹnyị nyamwụ ri Niall kpa ịwẹbsayịtị nyahị da angịnyị ụbwọ nyọka jẹ́ nyori ẹla ọlẹ ká angịnyị kaa ya u-uhye nya Alibeenu nya iJihova á ri ẹlịlẹhị ka. Ọ yẹkẹẹ: “Ọngọhẹ ị-ịkịlasị nyam kaa byim nyori am nyị wẹẹ dahịhile ụpwụ ọlẹ ká angịnyị nyị kpa irya nyịlaa da ọkọkọ nya ẹla ọlam-ọlam, ịnyị nya-à du kam nyị́ kaa myị ju ẹla nya angị chị ang ehe ka lẹ.” Nyọlẹ ká ọnyị ọọwa á ya iwe da ha Niall kọ ka wụlẹ ọmyịmyị nyamwụ dodehe ka lẹ, Niall dọọ ụbwọ ka ụpa nya jw.org ọlẹ kọ ri “Science and the Bible.” Ụka ohyẹẹkpẹ, Niall yẹ nyori ọnyị ọla ịkịlasị nyamwụ ọọwa nyị ka jw.org ka wa ụpwụ ọọwa lẹ, chajị ọ myọnụ nyọka ya ẹla u-uhye nya abwọlẹ ká ọhịhị bwu dọmwụ. Ọhẹka ịnyang ka cheju ụ-ụgbẹyị ọlịnyị-ịnyị myị́.
NWỤLANỌ LAWỤLẸ UGBIYEGU
15. Ányị adịda bala ịnịna à tị́ ka jẹ́-ẹ da anyị nyaa ụbwọ nyọka wẹ ẹla la ọdụmwọ ụka ká ala ube-ụpwụ nyaa á ja daa ịwẹẹ u-uhye nya ọmyịmyị nyaa?
15 Adịda bala ịnịna ịhyẹ kaa mẹ ang jẹ anyị nyaa yẹẹyẹẹ u-uhye nya abwọlẹ kị ka bwu wẹ ẹla la ọdụmwọ ụka ká angịnyị á já daa ịwẹẹ u-uhye nya ọmyịmyị nyaa. (Jem. 3:13) Adịda bala ịnịna ịhyẹ kaa họ ká anyị nyaa ka ma họ lụka nya ang ọjẹ́jẹ nya ugbiyegu nyaa. Ị kaa kụ ẹhị yẹ egbeju nya ẹla ịlẹ ká angịnyị ka kpa wẹ ẹga nyaa uube-ụpwụ myị́. Ị kaa ya ẹla u-uhye nyaa bala ọ-ma họ jaabwọ kị ka bwu wẹ ẹla, bala ọ-mẹjẹ anyị nyaa jaabwọ kị ka ya ẹla ụ-ụgbẹyị ọkpẹnẹẹ kọ ka kpụ angịkịla ịpyọ ịnyịnyị.—Yẹ akpa ọlẹ kọ ri, “ Ọ-ma Họ ka Da Ugbiyegu Nyang Ụbwọ.”
16-17. Ányị ọ-ma họ à tị́ ka jẹ́-ẹ da anjwo ụbwọ?
16 Ụka nya ọ-ma họ kaa da anjwo ụbwọ nyọka jẹ́ ẹla ọlẹ kị ka ya, bala ịwa la ịlaa ọ-ka jẹ́ myị̀myị̀ nyori ẹla ọlẹ kị myị la ri ẹlịlẹhị. Ụpa ọlẹ kọ ri, “Anjwo Kaa To Wo” ịị jw.org la ẹga ọhẹ ọlẹ ká anjwo i-gu ẹka iwo kụrụ ka jẹ́-ẹ kpa da ụpwụ. Ị họọ nyọka da anjwo ụbwọ kị ka jẹ́ myị̀myị̀ nyori ang ọlẹ kị myị la ri ẹlịlẹhị bala ọ-ka nwụla ẹla ọlẹ kị ka wẹ lịlaa nọ. Bwula ọ-jẹ́ ang ịịwa lawụlẹ ugbiyegu, ahị wuu ka jẹ́ jaabwọ kahị ka chẹkpẹ ju ọmyịmyị nyahị ụ-ụgbẹyị ọdụmwọ ọlẹ kọ ka kpụ angịnyị ịpyọ.
17 Okolobya ọhẹ ká ẹnyị nyamwụ ri Matthew wụlẹ jaabwọ ká ụka nya ọ-ma họ dọọ ụbwọ yẹẹyẹẹ. Ụka nya ang ọjẹ́jẹ nya ugbiyegu, Matthew bala adamwụ anyị kaa jẹ́ ang u-uhye nya egbeju nya ẹla ọlẹ kị ka gba kpehe ị-ịkịlasị myị́. Ọ yẹkẹẹ: “Ahị kaa kụ irya u-uhye nya ịtọ ẹla ịlẹ kị ka tọ myị́, ọọwa lẹ ahị kaa ma họ jaabwọ kahị ka ya ẹla u-uhye nyamwụ pwoku ẹla ọlẹ kahị jẹ́ lẹlẹ. Ụka kam jẹ́ ẹla ọlẹ kam myị la yẹẹyẹẹ i-irya, m̀ jẹ́-ẹ dọhụ pịlẹẹ, ọ tị kaa chịmkpẹẹ gụ́ la ọ-ka wẹ angịkịla ẹla la ọdụmwọ.”
18. Ẹlịyẹ Ala iKolosi 4:6 à tị́ ya kọ ju apyobwuna?
18 Ẹlịlẹhị ri, kori kahị dọmwụ wụlẹ ẹla gede-gede ụ-ụgbẹyị ọlẹ kọ ka la gbagbịla wẹwẹ, ọ-ọng myị́ ọng à kaa tịtọ nyọka myọnụ ju ẹla ọọwa ka. Ma ẹla ọ-ya kpẹnẹẹ bala ụgbẹyị ọdụmwọ ka dụbwọ myị́. (Wa Ala iKolosi 4:6.) Ahị ka jẹ́-ẹ chụ ẹla ọlẹ kahị myị la o-ya je angịnyị kaka pwoku olo ọ-da ta awụlẹ. Ahị ka dọọ ta ọngịnyị dụmwọ lee ọ-dọọ ka mịla ọngịnyị la ọngịrị-ọngịrị myị́. Kori kahị dọọ dụmwọ, ọngọkịla ọọwa ka jẹ́-ẹ woo bala ọ-myọnụ nyọka da kịnyaa. Ịnyịnyị-ịnyịnyị, kori kahị ya ọmyịmyị nyahị je angịkịla kpẹnẹẹ ụ-ụgbẹyị ọdụmwọ, angịnyị ka myọnụ nyọka ke ụrụ wo lahị bala ọ-kịnyaa la ang ọjẹ́jẹ myị́. Ma ọ́ tị ri ká ọngịnyị á tịtọ nyọka kụrụ ịwẹe ọdada lee ọ-kpahị họ kem, ó-ri opyii nyori ahị ka kịnyaa la ọ-wẹ ọngọọwa ẹla ka. (Etu 26:4) Ọ-ọng myị́ ọng wuu à tị kaa lịnyị ka, iru nya angịhyẹ kaa ke ụrụ.
19. Ịyẹ à tị́ ka guhi gbịla nyọka la dụmwọ ụka kahị ja chẹkpẹ ju ọmyịmyị nyahị?
19 Ọ la gede-gede nyori ahị kaa yé apyobwuna yẹẹyẹẹ kori kahị maga nyọka la dụmwọ. Raabwọ ha iJihova nyọka ya ọngịrị hang ká ka jẹ́-ẹ wẹ ẹla dụmwọ ụka kị ja tọng ịtọ ẹla olujwo lee ọ-kpụng abyị o-pwoku ka. Kpịtịya, abwẹla ọdụmwọ nyang ka du ká ẹla ọ-yẹ ụ-ụgbẹyị ọdatị-datị ka yẹ la arụ ka. Ẹla ọ-wẹ dụmwọ bala ihi ojuju ka gu angịlẹ kị wẹẹ ke ụrụ wo lang gbịla nyọka yẹ irya nyaa da u-uhye nyahị bala ẹlịlẹhị ịla ịBayịbụụ ịnyịnyị myị́. Ahị “juwa nwụlanọ yẹẹyẹẹ ụka wuu” nyọka “jẹ́-ẹ kpa olegu ọdụmwọ . . . dẹwụ ju ẹhị ọrịrịị-rịrị” nyahị mẹ. (1 Pit. 3:15) Ee, myị ká ọdụmwọ ọlala a ri ọngịrị nyang mẹ!
EJE 88 Make Me Know Your Ways
a Ang ọjẹ́jẹ ọlẹ ka ya irya hahị u-uhye nya abwọlẹ kahị ka bwu chẹkpẹ ju ọmyịmyị nyahị la ọdụmwọ ụka ká angịnyị á du agbama juhi lee ọ-dahị ịwẹẹ.
b Nyọka yẹ irya ọ-gba kpehe ịlẹ kị ka dụbwọ, yẹ egbeju nya ẹla ọlẹ kọ ri, “What Does the Bible Say About Homosexuality?” ẹ-ẹpwụ nya 2016 Awake! No. 4.
c À ka yé irya ọ-gba kpehe ịlẹ kị ka dang ụbwọ bwu jw.org ẹ-ẹpwụ nya ụpa ọlẹ kọ ri, “Anjwo Kaa To Wo” bala “Ịtọ Ịlẹ ká Angịnyị Kaa Tọ Hyaahyaa u-Uhye nya Alibeenu nya IJihova.”
