1-2. Ịyẹ tị́ du kahị ka jẹ́ ang u-uhye nya oja nya ịSamsịn?

 ẸLỊYẸ à tị́ kaa wẹ irya nyang ụka ká wo ẹnyị nya ịSamsịn? Ọhẹka à ka kpịtịya nyori ọ la ọngịrị yẹẹyẹẹ. Ọ tị lịnyị ịlẹhị. Ma ịSamsịn cheje ọtịpyọ ọlẹ kọ ju ọmwụ nya akama ọtụka-ọtụka ha ịlọmwụ ịnyịnyị. Ọ tị lịnyị odu lẹ, ang ọnyịịla ọlẹ ká ịSamsịn họ wuu nyọka gbịgba họọ, iJihova à kaa yẹ lẹ. Ohe tị da oja nya ọmyịmyị ọlala nyamwụ ẹ-ẹpwụ nya ịBayịbụụ chajị kahị ka yé apyobwuna bwu ụwa ịnyịnyị.

² IJihova kpa ịSamsịn họ ụkụrwọ lụmẹ-lụmẹ nyọka da ala Isirẹlụ, kị ri angịnyị nya Ohe ụbwọ. Ẹ-ẹpwụ nya ẹka ohu ịmanyị tị́ ị-ịlahị nyọọwa, iJihova ya olegu ịgọgọ ha ọlẹrụ ịPọlụ kpụ ọ da ẹnyị nya ịSamsịn ẹ-ẹpwụ nya angịlẹ kị la ọmyịmyị ọnyọọngịrị. (Hib. 11:32-34) Oja nya ịSamsịn ka jẹ́-ẹ juhi ọhụ. Ọ kpụnịrọ iJihova, tụ́ ụka kọ dọmwụ juwa ẹ-ẹpwụ nya iwe-ahụrụ olujwo. Ahị kụ ẹhị yẹ abwọlẹ kahị ka yé ọhụ ojuju bala ọ-ka jẹ́ ẹla i-ju apyobwuna bwu oja nyamwụ wẹẹ.

3. Ụkụrwọ oyina iJihova à tị́ ya ha ịSamsịn?

³ Ụka ọlẹ kị ma ịSamsịn, ala iFilisitiya à kaa kpeji ẹ-ẹpwụma nya Isirẹlụ bala ọ-kaa yaa ụhị lẹ. (Angị. 13:1) Eji ọkpakpa ọla ụbwọ ọnyọọngịrị nyaa kpa akama ọtụka wẹ uhye nya ala Isirẹlụ. IJihova chụ ịSamsịn nyọka “chị ala Isirẹlụ da bwu ẹpwụ nya ọngịrị nya ala iFilisitiya.” (Angị. 13:5) Ma ụkụrwọ olujwo à wẹ lẹ! Nyọka jẹ́-ẹ họ ụkụrwọ ọnyọọngịrị ọwẹ myị́, ịSamsịn baba nyọka kpụnịrọ iJihova.

4. Ányị iJihova à tị́ da ịSamsịn ụbwọ nyọka lịlọmwụ bwu ụbwọ nya ala iFilisitiya? (Angịleje 15:14-16)

 ⁴ Kụ ẹhị yẹ ọ-chụ pwokwita ọlẹ kọ mẹjẹ nyori ịSamsịn dahịhile iJihova bala o-ri Ohe dọọ ụbwọ wẹẹ. Ụka ọhẹ, alẹwụ nya ala iFilisitiya wẹ nyọka wu ịSamsịn i-iLehi, kọ ka ri epweji ọhẹ i-iJuda myị́. Ala iJuda juhi gbee kịị chụ nyọka wu ịSamsịn ju aluji nyaa ụ-ụbwọ. Angịnyị nya ịSamsịn la ịlaa woo, ya iri inyeewe-inyeewe imiiye chọọ, lẹ ị kpọọ kịla ala iFilisitiya lẹlẹ. (Angị. 15:9-13) Ma, ‘olegu nya iJihova ju ịSamsịn ọngịrị’ du kọ jẹ́ yi iri ịịwa hi ịlọmwụ. Ọọwa “ọ ye ukpunogu ọlụbaa nya obyiyó ọhẹ ọlẹ kọ ri onyeewe chẹẹ wẹẹ,” lẹ ọ hwoo kpa ma uya nwụ ala iFilisitiya angị 1,000 lẹlẹ!—Wa Angịleje 15:14-16.

5. Ányị ịSamsịn à tị́ mẹjẹ nyori ọ dahịhile iJihova?

⁵ Ịyẹ tị́ du ká ịSamsịn hu ukpunogu ọlụbaa nya obyiyó kpa ma uya? A-ang abwọ ọ-kpa dẹwụ à wẹ kpong-kpong ka! Ịwẹẹ ọdada á juwa ka, ịSamsịn jẹ́ nyori ẹga nya iJihova ọkụrụ-kụrụ à kaa bwu lẹ, ẹ-ẹga nya ang-abwọ ọlẹ ká ọngịnyị kpa ka. Ee, ang-abwọ ọlẹ kọ ji ha ọlẹng ọ-la ọmyịmyị ọwẹ à wẹ kọ kpa họ ụkụrwọ nyọka họ irya nya iJihova lẹ. Ọ la gede-gede nyori ịSamsịn jẹ́ kụrụ alẹng ịwẹ wuu myị́ chajị ọ kpụnịrọ iJihova!

6. Ẹlịyẹ ahị tị́ ka jẹ́ bwu ẹga nya ịSamsịn ụka kahị ja họ ụkụrwọ ọlẹ ká Ohe ya hahị?

⁶ IJihova ka jẹ́-ẹ juhi ọngịrị nyọka jụ ụkụrwọ nyahị họ ịnyịnyị, tụ́ ịlẹ kị dọmwụ lujwo wẹwẹ. Ohe ka jẹ́-ẹ họ ịnyị ụ-ụgbẹyị ọlẹ kọ dọmwụ ka lahị ẹbyẹbyị. Dahịhile nyori iJihova ọngọlẹ kọ ju ịSamsịn ọngịrị ka jung ọngịrị nyọka họ irya nyamwụ ịnyịnyị, kori ká kpụnịrọọ.—Etu 16:3.

7. Ọ-chụ pwokwita oyina à tị́ mẹjẹ nyori ahị baba nyọka yẹhị rịrị ka ẹga nya iJihova kọ ka kpahị ụgbẹyị?

⁷ Iru nya aanahị alẹng bala anyang ịlẹ kị kaa nwụ ebe ị-kpa gbịgba nyahị kaa mẹjẹ nyori ị dahịhile iJihova. Lụka ọkẹkpẹ, aanahị à kaa gba arụrụ nya Ebe nya Ịpyị-Adịrahụ inyeewe bala ebe ịkịla la ịlaa bala ọ-ka nwaa ịnyịnyị lẹ. Ma nyọlẹ kọ nọ chẹẹ, ọbaba nya ọ-nwụ họ ji jaabwọ ká ogu nya iJihova wẹẹ nwà gụ́ ọọwa. Aanahị ịlẹ kịị kpịlahị nya ụkụrwọ ọwẹ  mwahị nya ụbwọ ọdada ka ẹga nya iJihova bala ọ-ma agbẹyị inyeewe yẹ, lala ọ-ka ra ebe ene kị ka nwaa họ. Ọọnahị Robert, kọ kaa họ ụkụrwọ ẹ-ẹga kịị nwụ́ ebe ị-kpa gbịgba nyahị ụpa ọhẹ bala ọkịla nya odehe la ẹka ịkpanjẹ yẹkẹẹ: “Lụka nya ọgbanyẹ, ọ́ chịkpẹẹ lụmẹ nyọka ye ụgbẹyị onyeewe ọwẹ myị ka. Ọ datị gbang-gbang hi ẹla ọlẹ kahị kaa họ ẹ-ẹpwụ nya ẹka ịmanyị tị́ lẹ. Ma aanahị nwụlanọ nyọka yẹda, ọ tị la gede-gede ịnyịlẹhị nyori iJihova wẹẹ wahị kụrụ ọnwụhọ ọwẹ.” Ẹlẹwẹ ri ọ-chụ pwokwita ọhẹ ẹ-ẹpwụ nya abwọlẹ ká iJihova wẹẹ kpa angịnyị nyamwụ ụgbẹyị nyọka họ irya nyamwụ jịra. Ụka ọhẹ bala ụka ọkịla, ahị wuu ka jẹ́-ẹ tọ ịlọhị wo myị́ nyori, ‘M̀ kaa ya ẹhị reeji nya ụgbẹyị ọlẹ ká iJihova wẹẹ bwu kpahị bala ọnwụlanọ nyọka nwụhọ chajị kam ka jẹ́-ẹ gbịgba họọ ụ-ụgbẹyị ọlẹ kọ há gụgụ wuu?’

8. Ányị ịSamsịn à tị́ họ ụka ọhẹ ọlẹ ká imyi-enyi nwọọ yẹẹyẹẹ?

⁸ Ọhẹka à ka kpịtịya nya akụrwọ ịtụka ịkịla ịlẹ ká ịSamsịn họ myị́. Ọ kpa ụbwọ-ụbwọ nwụ ugẹbẹ ene kọọ nwụ angị 30 nya ala iFilisitiya e-epweji nya Achịkẹlọn. (Angị. 14:5, 6, 19) ỊSamsịn jẹ́ nyori ọ́ ka jẹ́-ẹ họ ang ịlịịwe myị́ la iJihova ọ-dọọ ụbwọ ka lẹ ka. Ẹlẹwẹ chehe gede-gede ụka ọhẹ ọlẹ ká imyi-enyi nwọọ nyọlẹ kọ nwụ angịnyị angị 1,000 nya ala iFilisitiya kpá. Ịyẹ ọ tị họ? Ọkọkọ nyọka kpụnịrọ ọngịrị nyịlọmwụ ụka ká imyi-enyi nwọọ lẹ, ọ be ẹkọ wụrụ iJihova kọ ka dọọ ụbwọ.—Angị. 15:18.

9. Ányị iJihova à tị́ bwu wẹ abwọ ọrịrị nya ịSamsịn? (Angịleje 15:19)

⁹ IJihova wo omyi nya ida nya ịSamsịn bwula ọ-họ ká enyi kpehe ụ-ụgbẹyị ọla ẹbyẹbyị. Ụka ká ịSamsịn nwa enyi ọọwa, “ịnyịrọ pwọọ kpuru, ọ la gogo” lẹlẹ. (Wa Angịleje 15:19.) Ọ la gede-gede nyori, ụjẹ nya enyi ọọwa juwa pwụ ẹka lụmẹ-lụmẹ kịlahị ụka ọlẹ ká olegu ịgọgọ kpa ọlọmwụ ịSamwẹlụ da ụpwụ nya Angịleje wẹẹ. Ala Isirẹlụ ilẹ kị yẹ enyi ọọwa jaabwọ kọ juwa mwụ ka kpịtịya nyori iJihova ri ọngọlẹ kị ka jẹ́-ẹ kpụnịrọ nyọka da angị gbịgba họọ ẹ-ẹpwụ nya ọmyịmyị ụbwọ lụka nya ọbaba.

10. Ịyẹ ahị tị́ ka họ nyọka yé ụbwọ ọdada nya iJihova? (Yẹ ifoto ịnyịnyị.)

¹⁰ Ahị ịnyịnyị baba nyọka yẹhị rịrị ka ẹga nya iJihova nya ụbwọ ọdada jaabwọ myị́ abwọ kahị la āhị ọhẹ lee ọkịla kaka ba, lee ụkụrwọ ọnyị myị́ ọnyị kahị jụ họ ẹ-ẹpwụ nya ịgba ọgbagba nyamwụ myị́. Ahị ka kpịlọhị keji bala o-myọnụ nyori ahị ka họ ang ọlẹ ká iJihova byihi nyị họ myị́, kori kahị kpụnịrọọ. Jaabwọ ká ịSamsịn yé ọngịrị ụka kọ nwa enyi ọlẹ ká iJihova ya họọ, ahị ịnyịnyị ka jẹ́-ẹ yé ọngịrị kori kahị kaa kpa ang ịlẹ ká iJihova ya hahị họ ụkụrwọ.—Mat. 11:28.

11. Anyị ahị tị́ ka bwu kpụnịrọ iJihova nyọka dahị ụbwọ? Ọ-chụ pwokwita oyina à tị́ ji?

¹¹ Kụ ẹhị yẹ oja nya Aleksey, ọọnahị ọhẹ bwu Russia kọ wẹẹ bọhụ ẹ-ẹpwụ nya ọtụpyịpyị ọnyọọngịrị wẹẹ. Ịyẹ à tị́ dọọ ụbwọ nyọka godayị kpọọ ẹ-ẹpwụ nya iwe-ahụrụ olujwo? Ọwa bala ahụ nyamwụ hu ụka nọ nyọka jẹ́ ịBayịbụụ bala ọ-ka gbịgba ha Ohe la ọ-tụ ẹta kẹkpẹ ka. Ọ yẹkẹẹ: “M̀ kaa maga nyọka jẹ́ ịBayịbụụ ụka myị́ ụka bala ọ-wọọ ẹnụ myị́ ẹnụ. Alụtụrụ ọnyị myị́ ọnyị, am bala ahụ nyam kaa jẹ́ ang nya ụtụrụ bala ọ-raabwọ ha iJihova lawụlẹ.” Ọwẹ tị́ mẹ ẹlịyẹ jẹ́ẹhị? Ọkọkọ nyọka dahịhile ịlọhị, ahị ka kpụnịrọ iJihova. Ányị ahị tị́ ka bwu họ ịnyị? Bwula ọ-họ ang ịlẹ kị ka ju ọmyịmyị nyahị ọngịrị lala ịBayịbụu ọjẹ́jẹ, abwọ ọrịrị, ọjịra-jịra ọ-kaka, bala ẹrụ ọnyịịla ọ-kpa pyẹ. Ọọwa iJihova à ka  dahị ụbwọ nyọka jẹ́-ẹ gbịgba họọ kịnyaa lẹlẹ. Ohe ju ịSamsịn ọngịrị, Ọ ka jẹ́-ẹ juhi ọngịrị ịnyịnyị.

12. Ẹla ọtịpyọ oyina ịSamsịn à tị́ họ? Ányị ọọwa à tị́ datị hi ẹla ọlẹ kọ kaa họ ene nya ụka ọwẹ?

¹² ỊSamsịn ri ọngọ la kpẹẹkpẹẹ ka lala ahị-ahị, lẹ ọ kaa cheje nya ẹla ụ-ụgbẹyị ọtịpyọ ụka ọhẹ. Eje nya ẹlẹhẹ ọlẹ kọ chị kpangga ju ọmwụ nya akama ọtụka-ọtụka. Nyọlẹ ká ịSamsịn ri ọngọleje pwụ ẹgẹhẹ, ọ “la ọháha ẹ-ẹga nya ọnyang ọlẹ ká ẹnyị nyamwụ ri iDilayịla. Ọ kụ ụteeji nya ịSọrẹkị.” (Angị. 16:4) Ene nya ụka ọwẹ, ịSamsịn chị ọnyang nya ala iFilisitiya ọhẹ rịrị nyọka yoo, ma “[iJihova] a wẹẹ kpa ịSamsịn jẹdịyẹ ọwẹ” lẹ, chajị Ọ “tịtọ nya ụgbẹyị ọlẹ kọ ka bwu da ala iFilisitiya uya.” Ụka ọkịla, ịSamsịn kụ ẹpwa nya ọlakpara ọhẹ ị-ịGasa e-epweji nya ala iFilisitiya. Lụka ọọwa, iJihova ya ọngịrị ha ịSamsịn nyọka gba ukpileku nya ogirigba nya epweji ọwẹ du kị la ewu ọ-chị ke kaka. (Angị. 14:1-4; 16:1-3) Ma ẹla nya iDilayịla ọwa ka datị myị́, chajị ọ lala o-ri ọwa nyị ri ala Isirẹlụ.

13. Ẹlịyẹ iDilayịla à tị́ họ ẹ-ẹga nya ịSamsịn?

¹³ IDilayịla ye okpoko ọtụka-ọtụka bwu ụbwọ nya ala iFilisitiya nyọka pyịrị ịSamsịn ha. Ọháha ọlẹ ká ịSamsịn la ẹ-ẹga nya iDilayịla lụmẹ à du kọ jẹ́ ang ọlẹ ká ọnyang ọwẹ kpa i-irya nyọka họ ka lẹ? Jaabwọ myị́ abwọ kọ la, iDilayịla kịnyaa la ọ-ka yẹ rịrị ịSamsịn nyọka ya ẹga ọlẹ ká ọngịrị nyamwụ bwu, ịSamsịn tị ya joo ịlẹhị. O tolujwo nyori ọ-jẹ́ họ ka nya ịSamsịn du ká ọngịrị nyamwụ gwọọ byi, ká iJihova myịmyị ji ẹkpẹ dọọ pwụ ụka ọhẹ.—Angị. 16:16-20.

14. Ẹlịyẹ à tị́ họ ta ịSamsịn nyọlẹ kọ dahịhile iDilayịla?

¹⁴ Ẹla ọjụjụ họ ta ịSamsịn chajị nyọlẹ kọ  dahịhile iDilayịla ọkọkọ nya iJihova. Ala iFilisitiya wu ịSamsịn bala ọ-gbọọ egbahị́. Ị yọọ ju agba ị-ịGasa, kọ ri epweji ọlẹ kọ gba ukpileku nya ogirigba nya ụwa lẹẹ ene. Ọọwa lẹ, ị yọọ ri ọlagba ọlẹ kọ kaa họ ụkụrwọ nya ang ogogo haa lẹlẹ. Ala iFilisitiya chị oyoyi jwoo ụka ọlẹ kị tụ guru nyọka họ ọhụhụ ọhẹ. Ị kiliya ọtụka-ọtụka ha ohe nyaa ọlẹ kọ ri ịDagọn lala o-ri ọwa nya-à ya ịSamsịn jwaa ụ-ụbwọ lẹ. Ị kpa ịSamsịn kpehe bwu ube nya agba wẹ ọhụhụ ọọwa nyọka “yẹ ayịlọ ọkọkọ nyamwụ” chajị nyọka kpọọ họ.—Angị. 16:21-25.

15. Ányị ịSamsịn à tị́ mẹjẹ nyori ọ dahịhile iJihova myị́myị́? (Angịleje 16:28-30) (Yẹ ifoto ọla ẹbẹ nya ọgbanyẹ.)

¹⁵ ỊSamsịn họ abyị ọtụka-ọtụka, ma ọ́ hwabwọ la ọ-gbịgba ha iJihova ka. Ọ ya ẹhị rịrị nyọka la iwe họ ụkụrwọ ọlẹ ká iJihova ya jwoo ụ-ụbwọ jahị da ala iFilisitiya. (Wa Angịleje 16:28-30.) ỊSamsịn bịlẹ iJihova yẹkẹẹ: “Chuchuu ya ọngịrị ham ụka ookpokpo ọlẹ chẹẹ chajị kam họ ala iFilisitiya ịlẹ ang kwiwa nyọlẹ kị gbam egbahị mẹ.” Ohe wo ọbịlẹ-bịlẹ nya ịSamsịn, ọọwa ọ ya ọngịrị họọ tịrẹkpẹ ụ-ụgbẹyị ọ-la ẹbyẹbyị lẹlẹ. Chajị nyọọwa, ịSamsịn jẹ́ nwụ ala iFilisitiya ụka ọwẹ gụ ịlẹ kọ nwụ lụka ọkẹkpẹ.

16. Ẹlịyẹ ahị tị́ ka jẹ́ bwu ọ-jẹ́ họ ka nya ịSamsịn?

¹⁶ Ịlẹhị lẹ, ịSamsịn yẹ akama ọọlajị nya ọ-jẹ́ họ ka nyamwụ, ma ọ́ hwabwọ la ọ-họ irya nya iJihova ka. Kori kahị dọmwụ họ ẹla ọtịpyọ ọlẹ kọ du kị yalibyi lahị lee ọ-ye iwe ọlẹ kahị la hiihi wẹwẹ, ahị hwabwọ la ọ-maga nyọka gbịgba ha iJihova ka. Kpịtịya nyori iJihova nwụlanọ nyọka hịnyọhi hahị. (Eje. 103:8-10) Nanana nyori ahị kaa họ ịhọbịrị, iJihova ka jẹ́-ẹ kpahị họ ụkụrwọ, jaabwọ kọ kpa ịSamsịn họ wẹẹ.

17-18. Ẹlịyẹ à tị́ jung ọhụ bwu oja nya Michael? (Yẹ ifoto ịnyịnyị.)

¹⁷ Kụ ẹhị yẹ oja nya ọọnahị ọhẹ ká ẹnyị nyamwụ ri Michael lẹẹ wẹẹ. Ọ kaa họ ụkụrwo nya iJihova la ila ọchịchị. O ri ọngọ myẹrụ ọọjịra-jịra bala o-ye ịlahị nya ụgbẹyị ọkpụrụrụ. Ma ọ tolujwo nyori ọ họ ẹla ọtịpyọ ọhẹ du kọ hwabwọ la ọ-họ ụkụrwọ ịwẹ ọọjịra-jịra. Ọ yẹkẹẹ: “Gbee da ụka ọwẹ, m̀ jẹ́-ẹ kpa ụka nyam họ ụkụrwo nya iJihova yẹẹyẹẹ. Lụka ọ-kpahị ju kaka lẹ, ang wuu à yẹda lala o-ri am nyị́ ka jẹ́-ẹ la iwe họ ụkụrwọ nya iJihova kaka lẹlẹ. Ḿ kaa kụ irya nyori iJihova ka nyẹẹkpẹ dam ẹnẹnẹhẹ ka, ma m̀ kaa kụ irya kori kam ka jẹ́-ẹ ri igu balọọ lee kori kam ka  jẹ́-ẹ họ ụkụrwọ ọọjịra-jịra jaabwọ kọọ la ene-ene wẹẹ.”

¹⁸ Ọ kpịpyọ nyori abwọ á chị Michael pyẹpyẹ ka. Ọ myịmyị yẹkẹẹ: “M̀ kaa maga nyịlẹhị-ịlẹhị nyọka tụ́ ju iJihova chwẹẹ gụ ọọwa bwula ọ-raabwọ họọ ụka myị́ ụka, jẹ́ ịBayịbụụ, bala ọ-kụ irya ju ang ọlẹ kam wa.” Nyọlẹ kọ nọ chẹẹ, Michael tịrẹkpẹ ka la iwe ịlẹ kọ la ẹ-ẹpwụ nya ọjịra-jịra myịmyị. Ọ ri ọngọgbahị nya ọjịra-jịra bala ọ-kaa ye ịlahị nya ụgbẹyị kpụrụrụ lẹẹlẹẹ lẹ. Ọ yẹkẹẹ: “Ụbwọ ọdada bala ọhụ ojuju ọlẹ kam kaa ye bwu ẹga nya angịgbahị nya ọjịra-jịra gụgụụgụ, dam ụbwọ du kam jẹ́ nyori iJihova la ọháha ẹ-ẹga nyam wẹẹ. M̀ ka jẹ́-ẹ họ ụkụrwọ ẹ-ẹpwụ nya ọjịra-jịra la irya oleje ocheri-cheri myị́myị́ lẹ. Ẹlẹwẹ mẹjẹ nyori iJihova kaa hịnyọhi ha ọng myị́ ọng ọlẹ kọ yẹ irya da ọlam-ọlam.” Kori kahị dọmwụ họ ọhọbịrị wẹwẹ, ahị ka jẹ́ myị̀myị̀ nyori iJihova ka kpahị họ ụkụrwọ bala ọ-wahị kụrụụhị ịnyịnyị, kori kahị nwụ ụgbẹyị nyahị họ bala ọ-kịnyaa la ọ-dahịhilọọ.—Eje. 86:5; Etu 28:13.

19. Ányị oja nya ịSamsịn à tị́ jung ọngịrị?

¹⁹ Ẹ-ẹpwụ nya ang ọjẹ́jẹ ọlẹ, ahị kụ ẹhị yẹ ang ịkpịpyọ-kpịpyọ ịhyẹ ịlẹ kị họ ọ-ọhịhị nya ịSamsịn lẹ. Ọ́ la kpẹẹkpẹẹ ka, ma abwọ á chọọ pyẹpyẹ ẹ-ẹpwụ nya ịgba ọgbagba nya iJihova ka, tụ́ ụka ká ẹla gwọọ gụ họ ẹ-ẹga nya iDilayịla kpá. IJihova kịnyaa la ọ-kpa ịSamsịn họ ụkụrwọ. Ọ ya ọngịrị ha ịSamsịn myị́myị́ kpụ ọ họ ụkụrwọ ọtụka-ọtụka. IJihova yọọ nya ọngịnyị ọlẹ kọ la ọmyịmyị ọnyọọngịrị kpụ ị da ẹnyị nyamwụ ẹ-ẹpwụ nya angị la ọmyịmyị ọtụka ụ-ụpwụ nya Ala iHiburu egbeju 11. O ri ọhụ ojuju nyọka jẹ́ nyori ahị wẹẹ gbịgba ha Adahị olepwoohe ọlẹ kọ nwụlanọ nyọka juhi ọngịrị, ọgụgụ ri ụka kahị la dẹwụ-dẹwụ! Lẹ lala ịSamsịn, ahị bịlẹ iJihova yẹkẹẹ: “Chuchuu kpịtịya nyam . . . Ohe Oluhye ee! Chuchuu ya ọngịrị ham.”—Angị. 16:28.