1. Ọháha nya Ohe Oluhye tị́ du kahị kaa la irya ọlányị?

ỌLẸRỤ ịJọn da ụpwụ nyori ‘Ọháha, Ohe Oluhye à ri lẹ.’ (1 Jọn. 4:8) Ahị jẹ́ nyori Ohe Oluhye à họ ọhịhị lẹ. Ma, omyi ẹla ọ-pyịnyẹng ọwẹ tị dahị ụbwọ nyọka kpịtịya nyori ẹga nyamwụ ọháha à bwu lẹ. Ahị há iJihova! Ọháha nyamwụ du kahị kaa la irya nyori ahị la ewu o-chike, ọkẹkẹnị bala ọhịhị ọlẹ kọ la etu.

2. Jaabwọ ká ụpwụ nya ịMatiyu 22:37-40 ya, ehile imiiye iyina à tị́ gụgụ wuu? Ịyẹ tị́ du kọ ka lujwo hahị ụka ọhẹ nyọka ju ihi nya oheeye?

² O ri opyii ká angịnyị nya ịKịrayịsị ka mẹ ọháha jẹ. Ehile o ri lẹ. (Wa ịMatiyu 22:37-40.) Ụka kahị wẹ ka jẹ́ iJihova yẹẹyẹẹ, ọ kaa chịhị kpẹẹ la ọ-ka ju ihi nya ehile ọlẹ ko ri ọhọhẹ. Ọ lịnyị chajị iJihova la kpẹẹkpẹẹ. Ọ kaa kpahị juhi bala ọ-kaa họhị ọnahị. Ma, ọ tị ka lujwo hahị nyọka ju ihi nya ehile oheeye myị́. Ịyẹ à tị́ du? Chajị aanahị, kị ri angịhyẹ ẹ-ẹpwụ nya angịlẹ ká ịBayịbụụ ya ẹla rụ́ wẹ ẹga ọwẹ, á la kpẹẹkpẹẹ ka. Lẹ ụka ọhẹ, ị ka họ ẹla ụ-ụgbẹyị ọlẹ kọ ka lala o-ri nyị́ la ọháha ẹ-ẹga nyahị ka myị́. IJihova jẹ́ nyori nyị ka lujwo hahị nyọka ju ihi nya ehile ọwẹ, lẹ ọ kpa angịhyẹ ịlẹ kị da ịBayịbụụ mẹ ang odudu ọlẹ kahị ka mẹ ọháha jẹ jẹ́ẹhị bala abwọlẹ kahị ka bwu họ ịnyị. Ọngọhẹ lẹpwụ nyaa ri ịJọn.​—1 Jọn. 3:11, 12.

3. Ẹlịyẹ ịJọn à tị́ ya ma ya?

³ Ẹ-ẹpwụ nya apwụ ịlẹ ká ịJọn da, o ya ẹla ma ya nyori angịnyị nya ịKịrayịsị nyị ka mẹ ọháha jẹ pyii. Ẹ-ẹpwụ nya ụpwụ ọlẹ ká ịJọn da oja nya ọhịhị nya iJisọsị ju, ọ kpa omyi ẹla nya “ọháha” ya ẹla ụka lụmẹ-lụmẹ gụ abwọlẹ kị kpa ya ẹla a-apwụ  ịlẹ ká ịMatiyu, ịMakị bala iLuku da. ỊJọn gu ẹka lala ohu (100) ụka ọlẹ kọ da ụpwụ nya ịJọn bala ileta ịta nyamwụ. Ụpa nya ịBayịbụụ ịịwa mẹjẹ́ẹhị nyori ang myị́ ang ọlẹ kahị ka họ ka kpụnịrọ ọháha. (1 Jọn. 4:10, 11) Ma, ọ tị nọ chẹẹ ene ká ịJọn lẹẹ jẹ́ ẹla ọwẹ.

4. Ụka myị́ ụka wuu ịJọn à mẹ ọháha jẹ ẹ-ẹga nya angịkịla lẹ?

⁴ Ụka ká ịJọn ri okolobya wẹẹ, ụ-ụka myị́ ụka ọ kaa mẹ ọháha jẹ ka. Ọ-chụ pwokwita, ụka ọhẹ, iJisọsị bala angịjụgbẹyị nyamwụ wẹẹ jẹ bwu ịSameriya ka iJerusalẹm. Alepweji ọhẹ ị-ịSameriya pwa la ọ-yaa myị. Ányị ịJọn à tị́ họ? Ọwa bala iJemsi ọọnamwụ byi iJisọsị nyori ịwa nyị họ ká ila nyị warị bwu epwoohe kaka rụ alepweji ọwẹ wuu mẹ! (Luk. 9:52-56) Ụka ọkịla, ịJọn á mẹ ọháha jẹ ẹ-ẹga nya alẹrụ ịkịla ka. Ọ la gbagbịla nyori, ọwa bala iJemsi ọọnamwụ à yẹ rịrị ịnaa nyị bịlẹ iJisọsị kọ ka ya iwe-ahụrụ ọgbẹgbịlẹ haa ị-Ịpyị-Adịrahụ nyamwụ lẹ. Ụka ká alẹrụ ịkịla wo ẹla ọlẹ ká ịJọn bala iJemsi họ wẹẹ, ị ju agbama! (Mat. 20:20, 21, 24) Ma, nanana nyori ịJọn họ ẹla abyị ịwẹ wuu, ọ há iJisọsị.​—Jọn. 21:7.

5. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

⁵ Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ọgụ-ẹpẹtẹ nya ịJọn bala ẹla ịhyẹ ịlẹ kọ da u-uhye nya ọháha. Jaabwọ kahị wẹẹ ka họ ịnyị, ahị ka yẹ abwọlẹ kahị ka bwu mẹ ọháha jẹ ẹ-ẹga nya aanahị alẹng bala anyang. Ahị ka jẹ́ ang ịnyịnyị u-uhye nya ụgbẹyị ọkpọnchị ọhẹ ọlẹ ká olegbeju nya ugbiyegu ka mẹjẹ nyori ugbiyegu nyamwụ họ́ọ.

6. Ịyẹ iJihova à tị́ họ nyọka mẹjẹ nyori ahị họ́ọ?

⁶ Ahị ka me irya myị́ nyori, ọ-ka mẹ ọháha jẹ ri ọ-ka la irya ọnyịịla ẹ-ẹga nya angịnyị bala ọ-ka ya ẹla ọlẹ kọ ka kpaa ịpyọ. Ma, kori ká angịnyị á háahị ịnyịlẹhị aalẹ, ahị baba nyọka mẹ ọháha ọọwa jẹ bwula ọ-họ ang ọnyịịla ẹ-ẹga nyaa. (Kụ ẹhị yẹ iJemsi 2:17, 26.) Ọ-chụ pwokwita, ahị há iJihova. (1 Jọn. 4:19) Ọ tị ya jehi nyori ahị họ́ọ bwula omyi ẹla ịnyịịla-ịnyịịla ịlẹ kị da ju ẹ-ẹpwụ nya ịBayịbụụ. (Eje. 25:10; Rom. 8:38, 39) Ẹ-ẹla ọlẹ ká Ohe ya kem à du kahị jẹ́ nyori ahị họ́ọ ka, ma bwula ẹla ọlẹ kọ họ ịnyị. ỊJọn da ụpwụ yẹkẹẹ: “Ang ọlẹ ká Ohe Oluhye kpa chị ọháha ọlala nyamwụ ehe hahị ri ọlẹ ká Ohe Oluhye hu Ọnyẹwẹ nyamwụ olookpokpo du warị wẹ odehe ọlẹ, chajị kahị ka bwu lọọ, la ọhịhị nya Ohe Oluhye ẹ-ẹpwụ nyahị.” (1 Jọn. 4:9) IJihova ya iwe da kpụ Ọnyị olikẹjẹ nyamwụ yẹ akama gbee kọọ gbu chajị nyahị. (Jọn. 3:16) Ịwẹẹ ọhẹ-lọhẹ ka jẹ́-ẹ ji u-uhye nyori ahị há iJihova yẹẹyẹẹ wẹẹ?

7. Ịyẹ iJisọsị à tị́ họ nyọka mẹ ọháha nyamwụ jẹ ẹ-ẹga nyahị?

 ⁷ IJisọsị byi angịjụgbẹyị nyamwụ nyori ọwa nyị la ọháha ẹ-ẹga nyaa. (Jọn. 13:1; 15:15) Ọ mẹjẹ jaabwọ kọ la ọháha ẹ-ẹga nyaa bala ahị kaka ba bwula ẹla ọlẹ kọ họ, ọ́ ba ẹ-ẹla ọlẹ kọ ya kem ka. IJisọsị yẹkẹẹ: “Ọháha ọlala ọkịla ọhẹ-lọhẹ, á ji kọ ka gụ ụma nya ọháha ọlẹ ká ọngịnyị ehe jẹ́ byẹjẹ hu ọhịhị nyamwụ ga ha igu chajị nya aligu nyamwụ kaka.” (Jọn. 15:13) Ụka kahị kụ irya u-uhye nya ang ọlẹ ká iJihova bala iJisọsị họ hahị, ịyẹ ahị à tị́ ka nwụlanọ nyọka họ?

8. Ẹlịyẹ ụpwụ nya 1 ịJọn 3:18, à tị́ ya ahị nyị họ?

⁸ Ahị ka mẹjẹ nyori iJihova bala iJisọsị háahị bwula o-ju ihi nyaa. (Jọn. 14:15; 1 Jọn. 5:3) IJisọsị ya ehile hahị nyori ahị nyị la ọháha ẹ-ẹga nya awulẹ. (Jọn. 13:34, 35) Áhị ka mẹ ọháha nyahị jẹ ẹ-ẹga nya aanahị bwula ẹla ọlọnụ kem ka, ahị ka mọ́ọ jẹ bwula ẹla ọlẹ kahị kaa họ pyii. (Wa 1 ịJọn 3:18.) Ịyẹ ahị tị́ ka họ kpangga nyọka mẹjẹ nyori ahị la ọháha ẹ-ẹga nyaa?

9. Ịyẹ ọháha à tị́ gu ịJọn gbịla kaka họ?

⁹ Kori kọ há ịJọn ịnọ, ọ ka hụ bala adamwụ nyọka ye okpoko bwula ọ-họ ụkụrwọ nya urwenyi ọlẹ ká ugbiyegu nyaa kaa họ myị́. Ma ọkọkọ nyọọwa, ọ kpa ọhịhị nyamwụ wuu da angịkịla ụbwọ nyọka jẹ́ ẹlịlẹhị u-uhye nya iJihova bala iJisọsị. Ọhịhị ọlẹ ká ịJọn chụ, á ri ọlẹ kọ chịkpẹẹ lụmẹ ka. Ọ yẹ akama ẹ-ẹpwụ nya ọ-tụpyịpyị, ị myịmyị kwoo rụ hi epweji nyamwụ la ọmyịmyị nya oyi ọhọhẹ, ụka ọlẹ ko ri ọngọgbahị lẹ. (Ụkụr. 3:1; 4:1-3; 5:18; Ọwụr. 1:9) Nyọlẹ ká ịJọn dọmwụ juwa u-ube nya agba u-uhye nya ọ-ya ẹla chajị nya iJisọsị, ọ mẹjẹ nyori ọ la ọháha ẹ-ẹga nya angịkịla. Ọ-chụ pwokwita, ụka kọ juwa ọ-ọpyị ọkịlọlọ nya ịPatimosi, ọ da ụpwụ nya Ọwụrụụ-wụrụ ya du kịla ọjịra-jịra ịdatị-datị chajị kị ka jẹ́ ang ịlẹ kị “juwa ka họ jịra lụka o-kpii.” (Ọwụr. 1:1) Ọ tị chịkpẹẹ nyori ụka ọlẹ kị gboo kpehe bwu uwa, ọ da ụpwụ nya Ẹrụ Ọnyịịla nya ịJọn ọlẹ ká oja nya ọhịhị bala ụkụrwọ nya iJisọsị ji lẹ. Ọ myịmyị da ileta ịta ịkịla nyọka ju aanamwụ ọhụ bala o-jwaa ọngịrị. Ányị ahụ à tị́ ka bwu gbịla ọhịhị nya ọngịnyị ọ-chị ịlọmwụ imyi kpẹpwụ ọlẹ ká ịJọn la?

10. Ányị a tị́ ka mẹjẹ nyori à la ọháha ẹ-ẹga nya angịnyị?

¹⁰ À ka mẹjẹ nyori à la ọháha ẹ-ẹga nya angịnyị bwula ang ọlẹ ká chụ nyọka họ la ọhịhị nyang. Odehe nya Olegu Onyobyi ọlẹ tịtọ ká ka kụ irya u-uhye nyịlọng bala ọ-ka maga nyọka dịlọng ụbwọ kem, juwa maga nyọka la okpoko lee ọ-la èhe. Ọkọkọ nyọọwa, angịnyị nya ịKịrayịsị chị odehe ọnụ wuu kaa kpa ụka nyaa ya ẹla nya Ohe jaabwọ kị ka họ ba myị́ nyọka da angịkịla ụbwọ tụ́ ju iJihova chwẹẹ. Angịhyẹ dọmwụ kaa kpa ụka nyaa wuu ya ẹla nya Ohe bala ọ-mẹ ang jẹ.

11. Ányị aanahị ị-la ọmyịmyị à tịị mẹjẹ nyori ị la ọháha ẹ-ẹga nya iJihova bala aanaa ịlọjịra-jịra?

¹¹ Angịnyị nya ịKịrayịsị lụmẹ-lụmẹ juwa kị baba nyọka họ ụkụrwọ la ụka nyaa wuu chajị nyọka jẹ́-ẹ da ịlaa bala alugbiyegu nyaa ụbwọ. Ọ tị lịnyị odu lẹ, aanahị ịla ọmyịmyị ịwẹ kaa da ogu nya Ohe Oluhye ụbwọ ụgbẹyị ọnyị myị́ ọnyị kị ka jẹ́-ẹ họ myị́. Ọ-chụ pwokwita, angịhyẹ jẹ́-ẹ dụbwọ ụka nya ẹla o-bwu agaga, angịkịla jẹ́-ẹ dụbwọ ụka kị juwa nwụ ebe ị-kpa gbịgba, ahị wuu tị la iwe nyọka ya okpoko dụbwọ kị ka kpa họ ụkụrwọ nya Ohe Oluhye odehe wuu. Ị kaa họ ang ịwẹ wuu chajị nyori ị la ọháha ẹ-ẹga nya Ohe Oluhye bala angịkịla. Epwihi ọnyị myị́ ọnyị, ahị ka jẹ́-ẹ mẹjẹ nyori ahị la ọháha ẹ-ẹga nya aanahị bwula ọ-ka ọjịra-jịra bala ọ-wẹ ẹla ụ-ụwa ịnyịnyị. Ọhẹka ịnyịrọ ka dọmwụ chịịhị pyẹpyẹ myị́,  ma ahị tị kaa ka ọjịra-jịra. Ahị ka la uhi ojuju myị́, ahị tị kaa wẹ ẹla. Ịnọ ahị wuu la akama nyịlọhị juwa ịnyịnyị, ahị tị kaa ju angịkịla ọhụ ene ká ọjịra-jịra ka dọmwụ bala ụka kọ tụ́ ku kpá. (Hib. 10:24, 25) Ụkụrwọ ọlẹ ká aanahị ilikẹjẹ nyahị kaa họ myịhị lẹhị yẹẹyẹẹ!

12. Ụgbẹyị ọkịla oyina ịJọn à tị́ mẹ ọháha nyamwụ jẹ ẹ-ẹga nya aanamwụ?

¹² ỊJọn á mẹ ọháha nyamwụ jẹ ẹ-ẹga nya aanamwụ bwula ọ-daa ọlẹẹkwa kem ka, ma ọ jwaa irya ịnyịnyị. Ọ-chụ pwokwita, ẹ-ẹpwụ nya ileta nyamwụ, ịJọn da aanamwụ ọlẹẹkwaa chajị nya ọmyịmyị bala ụkụrwọ ọnyịịla nyaa, ọ tị ya ẹla ọhẹ ọkpọnchị taa u-uhye nya ọhọbịrị ịnyịnyị. (1 Jọn. 1:8–2:1, 13, 14) Ahị baba nyọka da aanahị ọlẹẹkwaa ịnyịnyị chajị nya ang ọnyịịla ọlẹ kị kaa họ. Ma, ọ ti ri ká ọngọhẹ á dọmwụ nya abwẹla ọtịpyọ lee o-juwa họ ang ọlẹ kọ ka bịrị igu nyamwụ bala iJihova, ahị ka mẹ ọháha jẹ bwula ọ-kpa ụgbẹyị ọdụmwọ ya ẹla nyịlẹhị joo. Ọ baba nya ugbodu ojuju nyọka ya ẹla ta oligu nyahị, ma ịBayịbụụ tị ya nyori aligu ịnyịịla nyị kaa ju awụlẹ iri lee ọ-nwụ awụlẹ rịrị.​—Etu 27:17.

13. Ẹlịyẹ ahị tị́ ka họ ka?

¹³ Ụka ọhẹ, ahị kaa mẹ ọháha jẹ ẹ-ẹga nya aanahị bwula ang ọlẹ kahị họ ka. Ọ-chụ pwokwita, áhị kaa wụ́ ẹjẹ ahyaahị u-uhye nya ẹla ọlẹ ká aanahị ya ka. Kụ irya nya ẹla ọlẹ kọ họ ụka ọlẹ ká igu nya iJisọsị wẹẹ ju chweẹ wẹẹ. O byi angịjụgbẹyị nyamwụ nyori nyị ka ri ugbinyịrọ nyọọwa bala ọ-nwa ịwọ nyọọwa ene kị ka la ọhịhị. (Jọn. 6:53-57) Ẹla ọlẹ ká iJiọsị ya á há angịjụgbẹyị nyamwụ ịhyẹ lụmẹ-lụmẹ ka, du kị hwabwọ la ọ-bọọ jẹ. Angịlẹ kị tị ri aligu nyamwụ ịlam, lala ịJọn tị kịnyaa balọọ. Ị́ wo etu nya ẹla ọlẹ ká iJisọsị ya ka, ọ tị ka laa ẹbyẹbyị ịnyịnyị myị́. Ma, angịlẹ kị ri aligu nya iJisọsị i-ju ọdahịhile á hu ẹla ọlẹ kọ ya nya ẹla ọtịpyọ kpụ ị wụ́ ẹjẹ u-uhye nyamwụ ka. Ọkọkọ nyọọwa, ị dahịhilọọ chajị ị jẹ́ nyori ọ kaa ya ẹlịlẹhị. (Jọn. 6:60, 66-69) Ọ baba yẹẹyẹẹ kaahị ịnyịnyị-ị́ ka wụ́ ẹjẹ ahyaahị chajị nya ẹla ọlẹ ká aanahị ya ka! Ọkọkọ nyọọwa, ahị ya iwe haa kị wụlẹ etu nya ẹla ọlẹ kị ya.​—Etu 18:13; Ọngọ. 7:9.

14. Ịyẹ tị́ du ká aanahị ka wụ́ụhị ẹjẹ ẹnẹnẹhẹ ka?

¹⁴ ỊJọn byihi ịnyịnyị nyori aanahị nyị wụ́ụhị ẹjẹ ka. Kori kahị kpa ẹla ọwẹ họ ụkụrwọ ka, Olegu Onyobyi ka ye iwe nyọka kpahị họ ụkụrwọ myị́. (1 Jọn. 2:11; 3:15) Ẹla ọwẹ họ tọ angịhyẹ lụka nya ọmyị́myị́ nya oyi ọhọhẹ. Lụka ọọwa, Olegu Onyobyi maga nyịlẹhị-ịlẹhị nyọka họ ká angịnyị nya Ohe Oluhye  ka wụ́ awụlẹ ẹjẹ bala ọ-chị ebwo hi awụlẹ. Ọ ka pwụ ụka ọlẹ ká ịJọn da ileta nyamwụ wẹẹ, angịhyẹ ịlẹ kị maga nyọka họ ẹla lala Olegu Onyobyi ju wẹpwụ nya ọjịra-jịra lẹ. Ọ-chụ pwokwita, ịDayọtirifisi maga nyọka kpa ebwo ọchịchị ọtụka-ọtụka wẹ ọjịra-jịra ọhẹ. (3 Jọn. 9, 10) Ọ́ myị́ ju ihi nya angịgbahị ịlẹ ká angị kpẹhị rịrị ogu kaa du ẹrụ kaka wụlẹ ọjịra-jịra yẹ ka. Ọ dọmwụ maga nyọka gba angịhyẹ hi ọjịra-jịra ụka ọlẹ kị họ angịlẹ kị họ́ọ ka ụga. Egbeju ọnyọọngịrị ọtụka à wẹ lẹ! Olegu Onyobyi tị wẹẹ maga la ongịrị-ongịrị nyọka chị angịnyị nya Ohe Oluhye ebwo hi awụlẹ alẹ wẹẹ. Ahị ya iwe da ká awụlẹ ọ-wụ ẹjẹ à chịhị ebwo ẹnẹnẹhẹ ka.

15. Ịyẹ olegbeju nya ugbiyegu à tị́ ka kpịtịya pyii?

¹⁵ Ụgbẹyị ọkpọnchị ọhẹ ọlẹ ká olegbeju nya ugbiyegu kaa mẹjẹ nyori ugbiyegu nyamwụ họ́ọ ri ọ-ka ya ang ịlẹ kị baba nyọka hịhị haa. (1 Tim. 5:8) Ma, ọ tị ka kpịtịya pyii nyori ọ dọmwụ baba gụ nyọka da alugbiyegu nyamwụ ụbwọ ri igu bala iJihova wẹẹ. (Mat. 5:3) Kụ irya u-uhye nya ọgụ-ẹpẹtẹ ọnyịịla ọlẹ ká iJisọsị ya deeji ha alegbeju nya ugbiyegu wẹẹ. Ụpwụ nya ịJọn ya jehi nyori ụka ká iJisọsị wẹẹ ka gbu u-uhye nya okoji, o juwa kụ irya u-uhye nya ugbiyegu nyamwụ wẹẹ. ỊJọn godayị rịrị ba iMeri ịnịna nya iJisọsị ba, ẹ-ẹga ọlẹ kị wẹẹ ka nwụ iJisọsị. Nanana nyori iJisọsị ji ẹpwụ nya ọjụjụ ọtụka, o byi ịJọn nyị-ị́ kpẹhị rịrị iMeri. (Jọn. 19:26, 27) IJisọsị la aanịna ịlẹ kị ka kpẹhị rịrị iMeri ịnọ, ma ọ tị lala o-ri ọngọngọhẹ nyaa nyị ri ọngọjụgbẹyị nyamwụ ụka ọwẹ lẹka. Lẹ, iJisọsị tịtọ nyọka jẹ́ myị̀myị̀ nyori ọngọhẹ ka juwa ọlẹ kọ ka kpẹhị rịrị iMeri bala ọ-ka jwoo ọhụ nyọka kịnyaa la ọ-gbịgba ha iJihova ịnyịnyị.

16. Ụkụrwọ oyina ịJọn à tị́ la?

¹⁶ ỊJọn la ụkụrwọ lụmẹ-lụmẹ. O ri ọngọhẹ ẹ-ẹpwụ nya alẹrụ, lẹ ọ baba nyọka họ ụkụrwọ nya ẹla nya Ohe oyaya la ila ọchịchị. Ọhẹka ọ ka ye ahụ myị́, lẹ ọ ka maga nyọka kpẹhị rịrị ugbiyegu nyamwụ bala ọ-daa ụbwọ nyọka ri igu bala iJihova. (1 Kọr. 9:5) Ọwẹ tị́ mẹ ẹlịyẹ jẹ alegbeju nya ugbiyegu alẹ?

17. Ịyẹ tị́ du kọ baba ká olegbeju nya ugbiyegu ka kpẹhị rịrị ugbiyegu nyamwụ ẹ-ega nya ang nya olegu?

¹⁷ Ọọnahị ọhẹ ọlẹ kọ la ugbiyegu lẹ, ka la ụkụrwọ ịkpọnchị ịkịla myị́. Ọ-chụ pwokwita, ọ ka họ ụkụrwọ yẹẹyẹẹ ụka kọ juwa ọ-ọlụkụrwọ nyamwụ nyọka yogbo ha iJihova. (Efe. 6:5, 6; Tay. 2:9, 10) Ọ tị ka la ụkụrwọ  ịhyẹ ọọjịra-jịra ịnyịnyị myị́, lala ọ-ka ju aanahị ọhụ bala ọ-kpẹhị rịraa lee ọ-ka kpịlahị nya ụkụrwọ nya ẹrụ ọnyịịla ọ-kpa pyẹ. Ọ tị baba kọ ka jẹ́ ịBayịbụụ ta ahụ bala anyị nyamwụ ụka myị́ ụka. Ọ ka myị alugbiyegu nyamwụ lẹhị nya ang myị́ ang ọlẹ kọ wẹẹ họ wuu chajị kị ka la ogogo bala ọ-chị ọkẹkẹnị, bala ọ-ka daa ụbwọ kịnyaa la ọ-gbịgba ha iJihova.​—Efe. 5:28, 29; 6:4.

18. Ẹlịyẹ ịJọn à tị́ jẹ́ myị̀myị̀?

¹⁸ ỊJọn ri ehe tata, ang ịnyịịla-ịnyịịla tị họ ẹ-ẹpwụ nya ọhịhị nyamwụ. Ọ chịpwụrụ bwu ẹpwụ nya akama ịdatị-datị ịnyịnyị, ịlẹ kị ka du ká ọmyịmyị nyamwụ ka la dẹwụ-dẹwụ ịnọ. Ma, ọ kaa maga yẹẹyẹẹ ụka myị́ ụka nyọka ju ihi nya ehile nya iJisọsị, lala ọlẹ kọ ya nyị la ọháha ẹ-ẹga nya aanamwụ. Chajị nyọọwa, ịJọn jẹ́ myị̀myị̀ nyori ọwa nyị há iJihova bala iJisọsị bala o-ri nyị ka ya ọngịrị ọlẹ kọ baba họwa nyọka bọhụ ẹ-ẹpwụ nya akama ọhẹ-lọhẹ. (Jọn. 14:15-17; 15:10; 1 Jọn. 4:16) Olegu Onyobyi bala odehe nyamwụ á jẹ́ wu ịJọn kpa la ọ-ka la ọháha ẹ-ẹga nya aanamwụ bala ọ-mọ́ọ jẹ bwula ẹla oyaya bala ọhọhọ ka.

19. Ịyẹ ụpwụ nya 1 ịJọn 4:7 à tị́ juhi ọhụ nyọka họ? Ịyẹ tị́ du?

¹⁹ Lala ịJọn, ahị jam hịhị ẹ-ẹpwụ nya odehe ọlẹ kọ ji ẹpwụtụbwọ nya Olegu Onyobyi, ọngọlẹ kọ la ọháha ẹ-ẹga nya ọngọngọhẹ ka. (1 Jọn. 3:1, 10) Nanana nyori ọ tịtọ kahị ka ba la ọ-ka la ọháha ẹ-ẹga nya aanahị, ọ́ ka jẹ́-ẹ họ ịnyị myị́ ka, ọkẹnẹ-kẹnẹ kori kahị ya iwe da họọ lẹ mẹ ịnyị. Ahị cheje nyọka la ọháha ẹ-ẹga nya aanahị bala ọ-ka mẹjẹ nyori ị háahị bwula ẹla ọlẹ kahị kaa ya bala ẹla ọlẹ kahị kaa họ. Ọọwa lẹ, ahị ka ye ọkẹkẹnị nya o-ri ụpa nya ugbiyegu nya iJihova, bala ọ-ka chị ọkẹkẹnị yẹẹyẹẹ lẹlẹ.​—Wa 1 ịJọn 4:7.