1. Ányị ẹla ọlẹ kị ya ọọjịra-jịra ọtụka ọla 1935, à tị́ gu onjwo okolobya ọhẹ?

UGBIYEGU ọhẹ juwa kị ri angịhyẹ nya Angị Wụlẹ ịBayịbụụ Yẹ, ko ri ẹnyị nya Alibeenu nya iJihova lụka ọkẹkpẹ. Ị ma anyị alẹng ịta bala anyị anyang imiiye, ị tị mẹ ang jáa kpụ ị kaa gbịgba ha iJihova bala ọ-dịrẹ ọgụ-ẹpẹtẹ nya iJisọsị ịKịrayịsị. Ọnyị ọlẹng nyaa ọhẹ hu enyi Ohe ụka kọ gu ẹka iwo kụrụ ineku la 1926. Lala Angị Wụlẹ ịBayịbụụ Yẹ ịkịla ịlụka ọwẹ, ọnyị okolobya ọwẹ kaa ri ịkaa bala ọ-nwa ere ụka nya ọ-Họ Kpa Kpịtịya nya Igu nya ịKịrayịsị ẹka ọnyị myị́ ọnyị. Ma, ẹhị ọrịrịị-rịrị ọlẹ kọ la yẹda nyọlẹ kọ wo ẹla ọkpọnchị ọhẹ kị da wụlẹ, ká egbeju nyamwụ ri, “Iru nya Angịnyị Lụmẹ-lụmẹ.” J. F. Rutherford à ya ẹla ọọwa la 1935 ọọjịra-jịra ọtụka ọhẹ ịị Washington, D.C., U.S.A. lẹ. Ẹlịyẹ Angị Wụlẹ ịBayịbụụ Yẹ à tị́ jẹ́ ọọjịra-jịra ọtụka ọọwa?

2. Ẹlịlẹhị ọ-kpịpyọ oyina Ọọnahị Rutherford à tị́ da wụlẹ ẹ-ẹpwụ nya ẹla oyaya nyamwụ?

² Ẹ-ẹpwụ nya ẹla oyaya ọọwa, Ọọnahị Rutherford ya ẹla u-uhye nya angịlẹ kị ka juwa ẹ-ẹpwụ nya “iru nya angịnyị” ịlẹ kị gu ẹnyị ụ-ụpwụ nya Ọwụrụụ-wụrụ 7:9. Ene nya ụka ọwẹ, Angị Wụlẹ ịBayịbụụ Yẹ me nyori iru nya angịnyị ịwẹ nyị ri ebwo nya angịlẹ kị ka ka epwoohe, ma kị tị la ọmyịmyị lala angịlẹ ká Ohe ya ida wụ́ ka. Ọọnahị Rutherford wụlẹ bwu ịBayịbụụ nyori nyị́ chụ angịlẹ kị ri iru nya angịnyị ịwẹ nyọka hịhị e-epwoohe ka, ma ị ri ịkpịlọ nya ịKịrayịsị ịkịla * ịlẹ kị ka be bwu ẹpwụ nya “akama  ọtụka-ọtụka” bala ọ-ka hịhị gboyi myị́ oyi ám̀ odehe ịnyị. (Ọwụr. 7:14) IJisọsị myị ọnụ yẹkẹẹ: “Ịkpịlọ nyam ịkịla ịhyẹ juwa, ịlẹ kị ri ebwo nya ịkpịlọ ịlẹ ka. M ka kpa ịkpịlọ ịịwa warị kaka jula ịkịla ịlẹ ịnyịnyị. Ịkpịlọ ịịwa tị ka wo omyi nyam ịnyịnyị. Ọọwa lẹ, ebwo nya ịkpịlọ imimiiye ịwẹ a ka yẹjula awụlẹ lẹ, ị ka ji ekpeleji nya ọngọgbikpịlọ ookpokpo ịnyịnyị lẹlẹ.” (Jọn. 10:16) Alibeenu nya iJihova ịlẹ kị la ẹhị ọrịrịị-rịrị nyọka hịhị gboyi myị́ oyi ị-ịParadayịsị ám̀ odehe, ị wẹẹ wụrụ nya ‘ịkpịlọ ịkịla’ lẹ. (Mat. 25:31-33, 46) Ahị yẹ abwọlẹ ká ẹlịlẹhị onyeewe ọlẹ kị jẹ́ bwu ịBayịbụụ wẹ yẹ ọhịhị nya anchẹ nya iJihova lụmẹ-lụmẹ, tụ́ ọọnahị ọlaa ọlẹ kọ gu ẹka iwo kụrụ ineku da wẹẹ.​—Eje. 97:11; Etu 4:18.

3-4. Ẹlịyẹ ụnọ ịmányị tị́ nya angịnyị a tị́ jẹ́ bwu ọjịra-jịra ọtụka ọla 1935 u-uhye nya ẹhị ọrịrịị-rịrị nyaa? Ịyẹ tị́ du?

³ Ọ kpịpyọ yẹẹyẹẹ ọọjịra-jịra ọtụka ọọwa ụka ọlẹ ká ọngọ wẹẹ ya ẹla byi angịlẹ kị juwa yẹkẹẹ: “Angịlẹ kị la ẹhị ọrịrịị-rịrị nyọka hịhị gboyi myị́ oyi ám̀ odehe ka wuleji dayị kọkọ myị?” Ọngọhẹ ọlẹ kọ juwa i-ijata ya nyori, angịlẹ kị wuleji dayị kọkọ kpoye nya ẹhya nya angịnyị ịlẹ kị juwa ọọjịra-jịra ọọwa. Lẹ, Ọọnahị Rutherford a yẹkẹẹ: “Chẹhị ka yẹ iru nya angịnyị lụmẹ-lụmẹ!” Ọọwa lẹ, ọng myị́ ọng a ya ọkọ dawụlẹ la ọkẹkẹnị lẹlẹ. Ọ la angịlẹ kị dayị kọkọ gbagbịla nyori iJihova-á chwaa nyọka hịhị e-epwoohe ka. Ị wẹ ka jẹ́ nyori Ohe-é ya ida wáa ịwa bwula olegu ịgọgọ ka. La ahyẹẹnụ ọkịla nya ọjịra-jịra ọtụka ọọwa, angị inyeewe ịlẹ kị hu enyi Ohe la ohu ineku da iwo ine (840), ụmụmẹ nyaa tị ri angịlẹ kị juwa ẹ-ẹpwụ nya ịkpịlọ ịkịla.

⁴ Nyọlẹ kị da ẹla ọwẹ wụlẹ kpá lẹ, okolobya ọlẹ kahị ya ẹla rụ́ ene lalẹ bala ụnọ ịmányị tị́ nya angịkịla à hwabwọ la ọ-ka ri ịkaa bala ọ-nwa ere ụka nya Ang Oriri nya Obyi nya Ọngọlahị lẹlẹ. Ọ la angịkịla lụmẹ-lụmẹ lala ọọnahị ọlẹng ọhẹ ko yẹkẹẹ: “Ọ-Họ Kpa Kpịtịya nya Igu nya ịKịrayịsị ọla ẹka nya 1935 à ri ụka o-ku ẹkpẹ ọlẹ kam ri ịkaa bala ọ-nwa ere ẹẹ. M̀ jẹ́ nyori olegu ịgọgọ nya iJihova á ya ẹhị ọrịrịị-rịrị nyọka hịhị e-epwoohe ham ka. Ọkọkọ nyọọwa, ahị ọ-dahile nyọka hịhị odehe ọlẹ bala ọ-dụbwọ nyọka yọọ da ka ri ịParadayịsị, m la lẹ.” (Rom. 8:16, 17; 2 Kọr. 1:21, 22) Bwu ụka ọọwa daalẹ, ụmụmẹ nya angịnyị wẹ ka yẹjula iru nya angịnyị ịwẹ bala ọ-kaa họ ụkụrwọ bala angị ihihi nya angịlẹ ká Ohe ya ida wụ́.

5. Ányị iJihova à tị́ yẹ angịlẹ kị hwabwọ la ọ-ka ri ịkaa bala ọ-nwa ere ẹnụ nya ọ-Họ Kpa Kpịtịya nya Igu nya ịKịrayịsị?

⁵ Ányị iJihova à tị́ yẹ angịlẹ kị hwabwọ la o-ri ịkaa bala ọ-nwa ere lụka nya ọ-Họ Kpa Kpịtịya nya Igu nya ịKịrayịsị ku ẹkpẹ nya 1935? Ọ́ tị ri ká ọnchẹ nya iJihova ọlẹ kọ hu enyi Ohe kọ tị me nyori ọwa nyị chịla nyọka ri ịkaa bala ọ-nwa ere lụka nya ọ-Họ Kpa Kpịtịya nya Igu nya ịKịrayịsị, á wẹ ka jẹ́ ụka ohyẹẹkpẹ nyori Ohe nyị́ ya ida wụ́ ọwa ka bẹ? (1 Kọr. 11:28) Angịhyẹ kaa ri ịkaa bala ọ-nwa ere ẹnẹwẹ chajị nyori ị́ jẹ́ ẹhị ọrịrịị-rịrị nyaa kpa-kpa ka. Ma, kori kị myị nyori ájẹ́jẹ-ka à du lẹ, kị hwabwọ la họ ịnyị bala ọ-kịnyaa la ọ-gbịgba ha iJihova la ọmyịmyị aalẹ, ọ ka yaa myị ju ka ẹpwụ nya ịkpịlọ ịkịla. Nanana nyori ị́ kaa ri ịkaa bala ọ-nwa ere kaka, ị kaa ka ọ-Họ Kpa Kpịtịya nya Igu nya ịKịrayịsị chajị nyori ang ọlẹ ká iJihova bala iJisọsị họ myaa lẹhị yẹẹyẹẹ.

6. Ẹlịyẹ iJisọsị à tị́ byi alegu-ẹrụ nyị họ?

⁶ Nyọlẹ ká akama ọtụka okpelego ji ọnaabwọ lẹ wẹẹ, ọ ka ri ọhụ ojuju hahị nyọka wụla ẹla ọlẹ ká ụpwụ nya Ọwụrụụ-wụrụ egbeju 7 ya myị́myị́ u-uhye nya angịnyị nya ịKịrayịsị ịlẹ ká Ohe ya ida wụ́ bala iru nya angịnyị ịlẹ kị  ri ịkpịlọ ịkịla. IJisọsị byi alegu-ẹrụ nyori nyị kịnyaa la o-wu igbachịwụ nya ayịreji kpa kpọọ ịkịka ine nya odehe. Ị́ ka myị igbachịwụ ọwẹ ka da odehe ọlẹ ka gbee kị ka ju angịnyị nya ịKịrayịsị ịlẹ ká Ohe ya ida wụ́ ẹjẹẹ kpá ene, ọọwa ri iJihova ka cheje nyori ị kpa ọmyịmyị nyaa pwụ ocheju lẹ ene. (Ọwụr. 7:1-4) Angịnyị nya ịKịrayịsị ịlẹ ká Ohe ya ida wụ́ kị wẹ ka ri aanịna nya ịKịrayịsị ka ye uri nya ọmyịmyị ọlala nyaa bwula o-ri ịdịrịhụ bala angịkiliya balọọ e-epwoohe. (Ọwụr. 20:6) IJihova, iJisọsị bala alegu-ẹrụ wuu ka chị ọkẹkẹnị yẹẹyẹẹ ụka kị ka yẹ jaabwọ ká angị ụnọ ohu da ụnọ iwo ine kụrụ ine (144,000) ịwẹ ka ye uri nyaa e-epwoohe.

7. Jaabwọ kị da ụ-ụpwụ nya Ọwụrụụ-wụrụ 7:9, 10, owo anyị ịJọn à tị́ yẹ a-arụrụ? Ịyẹ angịịwa à tị́ juwa họ? (Yẹ ifoto ọla ẹbẹ nya ọgbanyẹ.)

⁷ Ụka ká ịJọn ya ẹla u-uhye nya ịdịrịhụ bala angịkiliya 144,000 ịwẹ kpá, ọ yẹ ẹla ọkpịpyọ-kpịpyọ ọhẹ, “iru nya angịnyị” ịlẹ kị be bwu Amagẹdọn. Ebwo nya angịnyị imiiye ịwẹ datị hi awụlẹ, chajị angị 144,000 la pyịnyẹng gụ “iru nya angịnyị” ịlẹ kahị dọmwụ jẹ́ abwọlẹ kị ka lụmẹ kaka ba lẹka. (Wa Ọwụrụụ-wụrụ 7:9, 10.) “Angịịwa kụrụ ịwụrụ inyiiwuru igbileji,” ọlẹ kọ mẹjẹ nyori ị́ la “abyị ọhẹ-lọhẹ” kaka, chajị ị kpịlaa cheri-cheri bwu ẹpwụ nya odehe nya Olegu Onyobyi bala o-godayị giri-giri ha iJihova bala iJisọsị lẹ. (Jem. 1:27) I ya gboo nyori nyị chịwa da lẹ chajị nya ang ọlẹ ká iJihova bala iJisọsị, ko ri Ọnyị Ọkpịlọ nya Ohe Oluhye họ. Ịnyịnyị, ị kpa abajị nya ịrị a-abwọ, mẹjẹ nyori ị ye iJisọsị myị lala ọngọle ká iJihova hu nya Adịrahụ.​—Kụ ẹhị yẹ ịJọn 12:12, 13.

8. Ẹlịyẹ ụpwụ nya Ọwụrụụ-wụrụ 7:11, 12, à tị́ ya jehi u-uhye nya ugbiyegu nya iJihova olepwoohe?

⁸ Wa Ọwụrụụ-wụrụ 7:11, 12. Ịyẹ à tị́ họ nyọlẹ ká angịlẹ kị juwa e-epwoohe yẹ iru nya angịnyị ịwẹ? ỊJọn yẹ nyori ọng myị́ ọng wuu e-epwoohe nyị myị̀ la ọkẹkẹnị bala o-juwa yogbo ha Ohe Oluhye ụka ọlẹ kị yẹ iru nya angịnyị ịwẹ. Ugbiyegu nya iJihova olepwoohe ka chị ọkẹkẹnị nyọka yẹ ọ-họ jịra nya ọyị ọyẹyẹ ọwẹ ụka ká iru nya angịnyị ka be bwu ẹpwụ nya akama ọtụka okpelego lahị-lahị.

9. Jaabwọ ká ụpwụ nya Ọwụrụụ-wụrụ 7:13-15 ya, ịyẹ angịlẹ kị ri ụpa nya iru nya angịnyị à tị́ wẹẹ họ lẹẹlẹẹ?

⁹ Wa Ọwụrụụ-wụrụ 7:13-15. ỊJọn ya nyori iru nya angịnyị ịwẹ nyị “kpa ịwọ nya Ọnyị ọkpịlọ nya Ohe Oluhye hụ́ ịwụrụ igbileji nyaa wuu, du kị pwo owuru wẹ keri-keri.” Etu nyọọwa ri, ị la irya oleje ocheri-cheri bala o-ri ẹla nyaa kpụ iJihova ịpyọ. (Ayị. 1:18) Ị ri angịnyị nya ịKịrayịsị ịlẹ kị hu ịlaa ju iJihova ụ-ụbwọ bala o-hu enyi Ohe, kị tị la ọmyịmyị ọnyọọngịrị u-uhye nya iya ọkịlaakịla nya iJisọsị bala o-ri angịlẹ kị ri igu bala iJihova. (Jọn. 3:36; 1 Pit. 3:21) Ịnyị à du ká Ohe chị ọkẹkẹnị balaa, du kị ka jẹ́-ẹ “myị ẹrụ ha Ohe Oluhye lodu bala alẹnụ” ám̀ odehe ọlẹ lẹ. Dọmwụ lẹẹlẹẹ, ịwa-à wẹẹ họ ụkụrwọ nya ẹrụ ọnyịịla nya Ịpyị-Adịrahụ ọ-kpa pyẹ bala ọ-họ ká angịkịla ka ri angịjụgbẹyị gụgụụgụ la ila ọchịchị lẹ, chajị Ịpyị-Adịrahụ nya Ohe Oluhye à ri ang ọlẹ kọ baba haa gụ wuu lẹ.​—Mat. 6:33; 24:14; 28:19, 20.

10. Ẹlịyẹ angịlẹ kị ri ụpa nya iru nya angịnyị à tị́ jẹ́ myị̀myị̀? Ọ-họ jịra nya ọnụ ọmyịmyị oyina ị tị́ ka yẹ?

¹⁰ Iru nya angịnyị ịlẹ kị be bwu ẹpwụ nya akama ọtụka okpelego jẹ́ myị̀myị̀ nyori Ohe Oluhye ka kịnyaa la ọ-kpẹhị rịraa, chajị “Ọngọlẹ kọ hụhụ u-uhye nya ẹchị adịrahụ nyamwụ a ri Ọngọlẹ ká ijata ojiji nyamwụ ka juwa kpụ ke angịịwa lala ube nyaa” lẹ. Ọnụ ọmyịmyị ọlẹ ká ịkpịlọ ịkịla ịwẹ wẹẹ godayị gbe nyọka yẹ ọ-họ jịra nyamwụ ka họ ịnyịlẹhị: “Ohe Oluhye ka yịlẹ egbejida hi egbahị nya angịnyị nyamwụ ịịwa wuu. Igu ogbugbu ọhẹ-lọhẹ á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ ọ ka ji kaka ịnyịnyị.”​—Ọwụr. 21:3, 4.

11-12. (a) Ahị ọwawa iyina ụpwụ nya Ọwụrụụ-wụrụ 7:16, 17 à tị́ ya ká iru nya angịnyị ka ye ị-ịlahị? (b) Ịyẹ angịlẹ kị ji ebwo nya iru nya angịnyị à tị́ ka jẹ́-ẹ họ ụka nya ọ-Họ Kpa Kpịtịya nya Igu nya ịKịrayịsị? Ịyẹ tị́ du?

 ¹¹ Wa Ọwụrụụ-wụrụ 7:16, 17. Lẹẹlẹẹ, imyi kaa nwụ anchẹ nya iJihova ịhyẹ ọọlajị nyori ị́ la okpoko ọlẹ kị ka ya ra ang oriri ọlẹ kị baba ka lee chajị nya akama ịlẹ ká ẹwụ ọdada kaa kpa warị. Ị wu angịkịla ju agba ọọlajị nya ọmyịmyị nyaa. Ma, angịlẹ kị ri ụpa nya iru nya angịnyị ịwẹ kaa chị ọkẹkẹnị chajị ị jẹ́ nyori ụka kị be bwu ẹpwụ nya ayịreji ọtata nya odehe onyobyi ọlẹ kpá, ị ka la ang oriri yẹẹyẹẹ bala o-ye ang ọmẹjẹ bwu ẹga nya iJihova ụka myị́ ụka. Ụka ká iJihova á ka ta odehe nya Olegu Onyobyi ọlẹ ayịreji, ọ ka chewu ke angịlẹ kị ri ụpa nya iru nya angịnyị bwu ẹpwụ nya agbama nyamwụ ọlẹ kọ lala “ochipwuu” nya ẹnụ pyii lẹ. Ụka ká akama ọtụka ọwẹ á myị́ kpá, iJisọsị ka kpa angịlẹ kị chịda ám̀ odehe ụgbẹyị ka ẹga nya “ẹmwụ nya enyi nya ọhịhị” ogboyi myị́ oyi. Kụ irya wẹẹ: Iru nya angịnyị ịwẹ la ẹhị ọrịrịị-rịrị ọnyịịla. Ẹ-ẹpwụ nya uku-uku nya angịnyị ịlẹ kị hịhị ẹnẹhẹ lẹ, ịwa-á ka yẹ igu ẹhị kaka myị́!​—Jọn. 11:26.

¹² Ịkpịlọ ịkịla la ẹhị ọrịrịị-rịrị ọnyịịla-ọnyịịla ọlẹ kị kaa ji iJihova bala iJisọsị obe chajị nyamwụ! Ịlẹhị lẹ, iJihova á chwaa nyọka ka epwoohe ka, ma ị tị họ́ọ jaabwọ ká angịlẹ kọ ya ida wụ́ họ́ọ kaka ba ịnyịnyị. Angịlẹ kị ji ebwo nya angịnyị imiiye ịwẹ ka jẹ́-ẹ yogbo ha Ohe Oluhye bala ịKịrayịsị myị́. Ụgbẹyị ọhẹ ọlẹ kị ka jẹ́-ẹ bwu họ ịnyị, ri ọ-ka ka ọ-Họ Kpa Kpịtịya nya Igu nya ịKịrayịsị.

13-14. Ịyẹ tị́ du ká angị ji ebwo imiiye ịwẹ wuu ka wẹ ọ-Họ Kpa Kpịtịya nya Igu nya ịKịrayịsị?

¹³ La ẹka ịkpanjẹ ịlẹ kị chịpwụrụ wẹ, ọngọ okpokpo ẹ-ẹpwụ nya angị ụnọ okpokpo ịlẹ kị ka ọ-Họ Kpa Kpịtịya nya Igu nya ịKịrayịsị, à kaa ri ịkaa bala ọ-nwa ere lẹ. Ọngọngọhẹ-ẹ́ kaa ri ịkaa bala ọ-nwa ere ọọjịra-jịra lụmẹ-lụmẹ ka. Lẹ, ụmụmẹ nya angịnyị ịlẹ kị kaa wẹ ọtụguru ọwẹ la ẹhị ọrịrịị-rịrị nyọka hịhị ám̀ odehe ọlẹ. Ịyẹ tị́ du kị tịng tị kaa ka ọtụguru ọwẹ? Ang odudu ọlẹ ká ọngịnyị kaa ka ọhụhụ nya awụlẹ oyeye nya oligu nyamwụ, à du kị kaa kpa ka ịnyịnyị lẹ. Aligu ịwẹ kaa juwa ụka nya awụlẹ oyeye nyọka mẹjẹ nyori ị la ọháha ẹ-ẹga nya angị wẹẹ ka ye awụlẹ bala ọ-ka daa ụbwọ. Ịnyịnyị, angịlẹ kị ri ịkpịlọ ịkịla kaa ka ọ-Họ Kpa Kpịtịya nya Igu nya ịKịrayịsị chajị ị tịtọ  nyọka mẹ ọháha nyaa jẹ ẹ-ẹga nya ịKịrayịsị bala angịlẹ ká Ohe ya ida wụ́ bala ọ-ka daa ụbwọ. Angịlẹ kị ri ịkpịlọ ịkịla kaa ka ịnyịnyị nyọka mẹjẹ nyori iya ọkịlaakịla nya iJisọsị myaa lẹhị, chajị iya ọkịlaakịla ọọwa à du kị ka jẹ́-ẹ hịhị gboyi myị́ oyi lẹ.

¹⁴ Ẹla ọkpọnchị ọkịla ọlẹ kọ dudu ká angịlẹ kị ri ịkpịlọ ịkịla kaa ka ọ-Họ Kpa Kpịtịya nya Igu nya ịKịrayịsị ri ọ-ka ju ihi nya ehile nya iJisọsị. Ụka ọhọhẹ-họhẹ ọlẹ ká iJisọsị ri ang oriri ọwẹ bala alẹrụ nyamwụ, o byaa yẹkẹẹ: ‘Anụ́-ụ ri ang oriri ọlẹ ịnyịnyịịnyị, nya ọ-kpa kpịtịya nyam mẹ.’ (1 Kọr. 11:23-26) Lẹ, angịlẹ kị ri ịkpịlọ ịkịla ka kịnyaa la ọ-ka ọtụguru ọwẹ jaabwọ myị́ abwọ ká angịhyẹ nya angịlẹ ká Ohe ya ida wụ́ jam la ọhịhị odehe kaka ba. Angịlẹ kị ri ịkpịlọ ịkịla dọmwụ kaa wụrụ ọng myị́ ọng nyọka wẹ ọ-Họ Kpa Kpịtịya nya Igu nya ịKịrayịsị balaa.

15. Ịyẹ ahị tị́ ka họ nyọka yogbo ha Ohe Oluhye bala ịKịrayịsị ụka nya ọ-Họ Kpa Kpịtịya?

¹⁵ Ụka nya ọ-Họ Kpa Kpịtịya nya Igu nya ịKịrayịsị, ahị la iwe nyọka yogbo ha Ohe Oluhye bala ịKịrayịsị la eje ọmwụmwụ bala abwọ ọrịrị. Egbeju nya ẹla ọlẹ kị ka ya dodehe la ẹka ọlẹ ri, “Ang Ọlẹ ka Ohe Oluhye Bala iJisọsị Họ A Myịng Lẹhị!” Ọ ka du ká ẹla nya iJihova bala iJisọsị ka myịng lẹhị gụ ọọwa. Lẹ, ụka kị juwa kpa ịkaa bala ere chịpwụrụ, ahị ka jẹ́-ẹ kụ irya u-uhye nya ang ọlẹ kị ku ọmwakpa, ko ri ugbinyịrọ bala ịwọ nya iJisọsị. Ahị ka kụ irya ịnyịnyị u-uhye nya ọháha ọlẹ ká iJihova mẹjẹ ẹ-ẹga nyahị nyọlẹ kọ ya Ọnyị nyamwụ du warị ka gbu chajị kahị ka la ọhịhị. (Mat. 20:28) Ọng myị́ ọng ọlẹ kọ la ọháha ẹ-ẹga nya Ohe Oluhye bala iJisọsị ka tịtọ nyọka ka ọ-Họ Kpa Kpịtịya nya Igu nya ịKịrayịsị.

16. Agbẹyị iyina angịlẹ ká Ohe ya ida wụ́ bala ịkpịlọ ịkịla à tị́ bwu la ookpokpo?

¹⁶ Ọdatị nya angịlẹ ká Ohe ya ida wụ́ bala angịlẹ kị ri ịkpịlọ ịkịla á ji ẹ-ẹga nya Ohe Oluhye ka. Ebwo ọhẹ-ẹ́ há iJihova gụ ọkịla ka. Ịwa wuu họ́ọ memeeme. Ahị jẹ́ ịnyị chajị nyori ịwọ nya Ọnyị nyamwụ ọlẹ kọ kpa ra angịlẹ kọ ya ida wụ́, ọ kpa ra ịkpịlọ ịkịla ịnyịnyị lẹ. Ang ọlẹ ko ri ọdatị nya ebwo nya angịnyị imiiye ịwẹ ri, ị la ẹhị ọrịrịị-rịrị ọdatị-datị. Ịwa wuu tị ka kụ́ giri-giri ha Ohe Oluhye bala ịKịrayịsị. (Eje. 31:23) Kpịtịya nyori olegu nya Ohe Oluhye ka jẹ́-ẹ họ ụkụrwọ u-uhye nyahị wuu memeeme. Ọọwa mẹjẹ nyori iJihova kaa ya olegu ịgọgọ nyamwụ ha ọngịnyị jaabwọ ọlẹ ká ọbaba nyamwụ ji.

17. Ẹlịyẹ angị ihihi nya angịlẹ ká Ohe ya ida wụ́ à tị́ wẹẹ yẹhị rịrị gbe?

¹⁷ Ị́ ma Angịnyị nya ịKịrayịsị ịlẹ ká Ohe ya ida wụ́ la ẹhị ọrịrịị-rịrị nyọka ka epwoohe ka. Ohe Oluhye à ya ẹhị ọrịrịị-rịrị ọwẹ haa lẹ. Ị kaa kụ irya u-uhye nya ẹhị ọrịrịị-rịrị nyaa ọwẹ, ị kaa raabwọ u-uhye nyamwụ bala ọ-charịnya nyọka  ye uri nyaa e-epwohe ịnyịnyị. Ị́ dọmwụ jẹ́ jaabwọ ká ugbinyịrọ nya olegu nyaa ka la lẹka. (Filip. 3:20, 21; 1 Jọn. 3:2) Ma, ị tị wẹẹ yẹhị rịrị gbe ọ-ka tọ iJihova, iJisọsị, alegu-ẹrụ bala angịkịla ịlẹ ká Ohe ya ida wụ́. Ị charịnya nyọka juwa balaa ị-Ịpyị-Adịrahụ olepwoohe.

18. Ịyẹ angịlẹ kị ri ịkpịlọ ịkịla à tị́ ẹẹ yẹhị rịrị gbe?

¹⁸ Angịlẹ kị ri ịkpịlọ ịkịla tị wẹẹ yẹhị rịrị gbe ọ-ka hịhị gboyi myị́ oyi ám̀ odehe. Ọwẹ à ri irya ọlẹ ká angịnyị ehe wuu tọchị kaa la lẹ. (Ọngọ. 3:11) Ị wẹẹ yẹhị rịrị gbe ụka ọlẹ kị ka dụbwọ nyọka yẹ odehe ọlẹ da kaka ri ịParadayịsị. Ị charịnya nya ahyẹẹnụ ọlẹ kị ka nwụ́ ube nyịlaa, wu ẹrụ nyịlaa, bala ọ-ka kpa anyị nyaa nwà ẹ-ẹpwụ nya ịnyịrọ ọ-la gogo. (Ayị. 65:21-23) Ị wẹẹ yẹhị rịrị gbe ọ-ka ka ẹga ịdatị-ịdatị nya odehe ọlẹ kaka yẹ ịgbọdọ, ipinu, ihu bala ọ-ka juwa jẹ́ ang u-uhye nya ang ịlẹ wuu ká iJihova họ. Ma, ọlẹ kọ tị kpaa ịpyọ gụgụ wuu ri ọ-ka jẹ́ nyori igu nyaa bala iJihova ka juwa la ọngịrị gụ́ ọọwa kịlahị-ịlahị.

19. Ọ-Họ Kpa Kpịtịya nya Igu nya ịKịrayịsị tị́ ya iwe hahị nyọka họ ẹlịyẹ? Ẹnịyẹ ọtụguru ọwẹ à tị́ ka ji la ẹka ọlẹ?

¹⁹ IJihova yẹhị ọrịrịị-rịrị nya ijuju ọnyịịla ha ọnchẹ nyamwụ ọnyị myị́ ọnyị ọlẹ kọ hu ịlọmwụ jwoo ụ-ụbwọ. (Jer. 29:11) Ọ-Họ Kpa Kpịtịya nya Igu nya ịKịrayịsị ya iwe ọtụka-ọtụka ha ọng myị́ ọng nyahị wuu nyọka yogbo ha Ohe Oluhye bala ịKịrayịsị nya ang ọlẹ kị họ chajị kahị ka jẹ́-ẹ la ọhịhị ọmyịmyị-ka. Ọ la gbagbịla nyori, ọ-Họ Kpa Kpịtịya nya Igu nya ịKịrayịsị à ri ọjịra-jịra ọlẹ kọ baba gụ wuu ká angịnyị nya ịKịrayịsị kaa la ẹ-ẹpwụ nya ẹka ẹẹ. Ọtụguru ọwẹ ka ji lobyi ẹnụ nya ịSatudee, ụtụrụ 27 nya Ọya Ọhata, 2021. Angịhyẹ kụ́ ẹga ọlẹ kị lịlaa nyọka ka ọtụguru o-ju apyobwuna ọwẹ. Angịkịla tị ka ka nanana nyori ọtụpyịpyị ji. Angịhyẹ dọmwụ ka họọ ẹ-ẹpwụ nya ube nya agba. Jaabwo ká iJihova, iJisọsị, alegu-ẹrụ bala angịlẹ ká Ohe ya wụ́ ịlẹ kị wuleji bwula igu wuu ka juwa yọyị warị, ọjịra-jịra ọnyị myị́ ọnyị, ebwo nya angị kpa ẹrụ ọnyịịla pyẹ, bala ọngọngọọngụ à ye ọkẹkẹnị ụka nya ọ-Họ Kpa Kpịtịya nya Igu nya ịKịrayịsị mẹ!