1. Ịyẹ tị́ mẹjẹ nyori ọháha nya alugbiyegu lụmẹ-lụmẹ nyiri alẹ?

ỊBAYỊBỤỤ yọmwụ neeji nyori ọháha ọlẹ ká iru nya angịnyị la ẹ-ẹga nya alugbiyegu nyaa nyị ka nyiri lụka nya ahyẹẹnụ ihyẹẹkpẹ. (2 Tim. 3:1, 3) Ahị yẹ jaabwọ ká ọmwụ ọyẹyẹ ọwẹ wẹẹ họ jịra alẹ. Ọ-chụ pwokwita, iru nya ịhụ bala ịrụ wẹẹ pwa awụlẹ bala o-ju agbama ta awụlẹ, dudu kọ kaa la anyị nyaa lala o-ri nyị́ há adaa bala ịnaa ka. Alugbiyegu ịlẹ kị dọmwụ kụ́ ẹpwa okpokpo lawụlẹ, á ka tụ́ ju awụlẹ chwẹẹ yẹẹyẹẹ ka myị́. Ọngọ ju alugbiyegu irya ọhẹ yẹkẹẹ: “Ịnịna, adịda bala anyị nyaa á kaa joja lawụlẹ ka. Ịị bịrị ụka nyaa yẹẹyẹẹ juwa kpa iKomputa, iFon ichiche bala ịtụka họ ang lee o-juwa kpa kọ ayịlọ ịnyịnyị. Nanana nyori alugbiyegu ịwẹ juwa ẹ-ẹpwa okpokpo, ị́ jẹ́ awụlẹ yẹẹyẹẹ nwà ka.”

2-3. (a) Ẹga nya owo ahị tị́ ka la ọháha ọgẹnẹ-gẹnẹ jaabwọ ká ụpwụ nya Ala iRom 12:10 mẹjẹ? (b) Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

² Áhị tịtọ nyọka ba ọhịhị nya alodehe ọlẹ ká ọháha nyaa wẹẹ nyiri dẹyị-dẹyị jẹ ẹnẹnẹhẹ ka. (Rom. 12:2) Ọkọkọ nyọọwa, ahị baba nyọka maga kahị ka la ọháha ọgẹnẹ-gẹnẹ gụ ọwọwa ẹ-ẹga nya alugbiyegu nyahị bala aanahị ịlọjịra-jịra ịnyịnyị. (Wa Ala iRom 12:10.) Ịyẹ à tị́ ri ọháha ọgẹnẹ-gẹnẹ? O ri abwọlẹ ká alugbiyegu kaa họ lawụlẹ ụka kị tụ́ ju awụlẹ chwẹẹ bala ọ-yẹjula awụlẹ yẹẹyẹẹ. Ụma nya ọháha ọlịnyị ahị ka la ẹ-ẹga nya aanahị ịlọjịra-jịra ịnyịnyị lẹ. Ụka kahị mẹ ọháha ọgẹnẹ-gẹnẹ jẹ, ahị kaa da ọng myị́ ọng ụbwọ nyọka yẹjula awụlẹ gbịgba ha iJihova la ọkẹkẹnị.​—May. 2:12.

³ Nyọka dahị ụbwọ la ọháha ọgẹnẹ-gẹnẹ, ahị kụ ẹhị yẹ ẹla ọlẹ kahị ka jẹ́-ẹ jẹ bwu ọgụ-ẹpẹtẹ ịlẹpwụ nya ịBayịbụụ wẹẹ.

4. Ẹlịyẹ ụpwụ nya Ehe Ọkpụkpụ 34:6, à tị́ ya jehi u-uhye nya ọháha nya iJihova?

⁴ ỊBayịbụụ ya abwụma ịnyịịla-ịnyịịla nya iJihova jehi. Ọ-chụ pwokwita, o ya nyori “ọháha . . . Ohe Oluhye a ri lẹ.” (1 Jọn. 4:8) Ahị kaa tịtọ nyọka ri oligu nya iJihova ụka kahị jẹ́ ẹla ọwẹ u-uhye nyamwụ. ỊBayịbụụ tị myịmyị ya nyori iJihova nyị “la ọháha o-gbu enyi-ka.” (Wa Ehe Ọkpụkpụ 34:6.) Ẹla ọnyịịla ọwẹ chabwọ nya abwọlẹ kahị há iJihova kaka ba!

5. Ụgbẹyị oyina iJihova à tịị bwu mẹ ahyẹẹrwẹrwa jẹ? Ányị ahị tị́ ka bwu gbịlọọ?

⁵ Ụpwụ nya Ehe Ọkpụkpụ 34:6 gu ẹnyị nya ọháha nya iJihova bala abwụma nyamwụ ọkịla ịnyịnyị, ọlẹ kọ du kahị kaa tụ́ jwoo chwẹẹ​—ko ri ahyẹẹrwẹrwa. (Jem. 5:11) Ụgbẹyị ọhẹ ọlẹ ká iJihova kaa bwu mẹ ahyẹẹrwẹrwa jẹ ẹ-ẹga nyahị ri ọ-hịnyọhi hahị ụka ká ẹla á gụ́ụhị gụ họ. (Eje. 51:1) Ẹ-ẹpwụ nya ịBayịbụụ, ahyẹẹrwẹrwa ọ-mẹjẹ kpoye nyọka hịnyọhi ha ọngọlẹ kọ họ ang ọtịpyọ. Ọ myịmyị ri abwọlẹ ká ẹla nya ọngọkịla ọlẹ kọ juwa yẹ akama kaa gu ọngịnyị o-olegu, kọ tị kaa maga nyọka da ọngọọwa ụbwọ. IJihova ya nyori, irya ọlẹ kọọwa nyị la nyọka dahị ụbwọ nyị dọmwụ la ọngịrị gụ irya ọlẹ ká ịnịna kaa la ẹ-ẹga nya ọnyị nyamwụ wẹẹ. (Ayị. 49:15) Ụka kahị juwa yẹ akama, ahyẹẹrwẹrwa nya iJihova kaa gwoo gbịla nyọka dahị ụbwọ. (Eje. 37:39; 1 Kọr. 10:13) Ahị ka jẹ́-ẹ mẹ ahyẹẹrwẹrwa jẹ ẹ-ẹga nya aanahị bwula ọ-hịnyọhi haa bala ọ-kpa ẹla ọlẹ kị họ wụ́ụhị ẹjẹ ẹ-ẹpwụ ka. (Efe. 4:32) Ụgbẹyị ọkpọnchị ọkịla ọlẹ kahị ka jẹ́-ẹ bwu mẹ ahyẹẹrwẹrwa jẹ ịnyịnyị ri ọ-ka da aanahị ụbwọ ụka kị la akama. Ahị wẹẹ gbịla iJihova ko ri ọngọ la ọháha ọgẹnẹ-gẹnẹ gụ ọng myị́ ọng wuu, ụka ká ọháha á guhi gbịla nyọka mẹ ahyẹẹrwẹrwa jẹ ẹ-ẹga nya angịkịla.​—Efe. 5:1.

6. Ányị iJonatan bala iDevidi à tị́ mẹ ọháha ọgẹnẹ-gẹnẹ jẹ ẹ-ẹga nya awụlẹ?

⁶ ỊBayịbụụ ya ẹla jehi u-uhye nya angịnyị ehe ịlẹ kị la kpẹẹkpẹẹ ka, kị tị mẹ ọháha ọgẹnẹ-gẹnẹ jẹ ẹ-ẹga nya awụlẹ. Kụ ẹhị yẹ oja  nya iJonatan bala iDevidi wẹẹ. ỊBayịbụụ yẹkẹẹ: “Olegu nya iDevidi [ka ẹga nya] iJonatan. IDevidi họọ ka ọkịlẹtụ jaabwọ kọ há ịlọmwụ.” (1 Sam. 18:1) IJihova chụ iDevidi nyọka ri adịrahụ ku ọmwakpa nya ịSọlụ. Ku ẹkpẹ nyọọwa, ịSọlụ dọmwụ nyọka yẹ ijiiji nya iDevidi kpụ ọ maga nyọka nwọọ. Ma, iJonatan á tị chẹkpẹ ju adamwụ ụka ọlẹ kọ wẹẹ tịtọ nyọka nwụ iDevidi ka. IJonatan bala iDevidi myị ọnụ nyọka kịnyaa la o-ri aligu bala ọ-dawụlẹ ụbwọ ụka wuu.​—1 Sam. 20:42.

7. Ịyẹ à tị́ ka hu iJonatan bala iDevidi abwọ la o-ri aligu tawụlẹ ịnọ myị́?

⁷ Ọ la ẹbyẹbyị nyọlẹ ká iJonatan bala iDevidi ri aligu la apatabwọ kiwa ka ịịwẹ, chajị ang lụmẹ-lụmẹ ji kọ ka jẹ́-ẹ chaa ebwo hi awụlẹ ịnọ. Ọ-chụ pwokwita, iJonatan kpa ẹka lala iwo ịta ri ọgbahị nya iDevidi. Ọọwa ka du ká iJonatan ka kụ irya ịnọ myị́ nyori ọwa nyị́ ka jẹ́-ẹ ri oligu ta ọngọlẹ kọ ri onjwo bala ọ-la ẹla ọjẹ́jẹ u-uhye nya ọhịhị gbuu lala ọwa ka lẹ ka. Ma, iJonatan á kụ irya ịnyị ka. Ọ chị ihi ju iDevidi yẹẹyẹẹ.

8. Ịyẹ tị́ du ka me irya nyori iJonatan ri oligu ọnyịịla ẹ-ẹga nya iDevidi?

⁸ IJonatan ka yẹ ijiiji nya iDevidi ịnọ myị́. Ọ ka yẹ rịrị nyori ọwa nya-à chịla nyọka ri adịrahụ ịnọ lẹ myị́, chajị nyọlẹ kọ ri ọnyị nya Adịrahụ ịSọlụ. (1 Sam. 20:31) Ma, iJonatan kpịlọmwụ keji bala o-godayị giri-giri ha iJihova. Lẹ, ọ myị ọnụ ju ẹla nya iJihova la ọkịlẹtụ nyamwụ wuu nyọlẹ kọ chụ iDevidi nyọka ri adịrahụ ku ọmwakpa nya ịSọlụ. Ọ chẹkpẹ ju iDevidi, nanana nyori ọọwa wụ́ ịSọlụ adamwụ ẹjẹ nyịlẹhị-ịlẹhị.​—1 Sam. 20:32-34.

9. Ahị tị́ họ ányị kahị jẹ́ nyori iJonatan á yẹ ijiiji nya iDevidi ka?

⁹ IJonatan á yẹ ijiiji nya iDevidi ka, chajị ọ họ́ọ yẹẹyẹẹ. IJonatan ri ọngọ ju ugbodu kpụ ọ dẹwụ lụmẹ-lụmẹ. Ọ tị jẹ́-ẹ kpa uda bala ịcha dẹwụ yẹẹyẹẹ ịnyịnyị. Angịnyị ya nyori iJonatan bala ịSọlụ adamwụ nyị “lịmịla gụ ịchịnụ idu,” nyị tị myịmyị “logogo gụ egabẹ.” (2 Sam. 1:22, 23) Lẹ, iJonatan ka jẹ́-ẹ chị ọgọm u-uhye nya ang ịtụka ịlẹ kọ họ ịnọ myị́. Ma, iJonatan á maga nyọka chị iDevidi ọnụ bala ọ-yẹ ijiiji nya ang ịnyịịla ịlẹ kọ họ ka. Ọkọkọ nyọọwa, ugbodu ojuju nya iDevidi bala abwọlẹ kọọ kpụnịrọ iJihova myị iJonatan lẹhị nyịlẹhị-ịlẹhị. Ọ-chụ pwokwita, iJonatan dọmwụ nyọka tụ́ ju iDevidi chwẹẹ yẹẹyẹẹ ụka ọlẹ kọ nwụ iGolayatị kpá. Ányị ahị tị́ ka bwu mẹjẹ nyori ahị la ọháha ọgẹnẹ-gẹnẹ ẹ-ẹga nya aanahị ịnyịnyị jaabwọ ká iJonatan la ẹ-ẹga nya iDevidi?

10. Ịyẹ à tị́ ri etu nyọka “la ọháha ẹ-ẹga nya awụlẹ yẹẹyẹẹ bwu ẹpwụ ọkịlẹtụ”?

¹⁰ ỊBayịbụụ juhi ọhụ nyọka “la ọháha ẹ-ẹga nya awụlẹ yẹẹyẹẹ bwu ẹpwụ ọkịlẹtụ.” (1 Pit. 1:22) IJihova ya ọgụ-ẹpẹtẹ ọọwa deeji hahị. Ọháha ọlẹ kọ la ẹ-ẹga nyahị lọngịrị yẹẹyẹẹ kpụ̀ ịngịngịhyẹ-ẹ́ ji kọ ka jẹ́-ẹ chịhị ebwo hi ọháha nyamwụ myị́ ka, kori kahị godayị giri-giri họọ. (Rom. 8:38, 39) Omyi ẹla ọlẹ ko ri “yẹẹyẹẹ” wẹ, mẹjẹ nyori ọngịnyị ka maga nyịlẹhị-ịlẹhị nyọka mẹ ọháha jẹ. Ụka ọhẹ, ọ́ kaa chịkpẹẹ lụmẹ nyọka mẹ ọháha ọgẹnẹ-gẹnẹ jẹ ẹ-ẹga nya aanahị ka. Ụka ká angịkịla á họ ẹla wụ́ụhị ẹjẹ, ahị kịnyaa ‘juwa kpa ọháha ọlala nyahị la ọhịnyọhi onyudiyo ẹ-ẹga nya awụlẹ. Kahị cheri kahị juwa yụbwọ chị ọtụchawụlẹ nyahị kpa ụ-ụwa gogo bwula ọngịrị nya olegu ịgọgọ ẹ-ẹpwụ nya okpunyi ọlala ọlẹ kọọwa a ri ochiri ọ-chị angịnyị ori bawụlẹ myị́ mẹ.’ (Efe. 4:1-3) Kori kahị juwa cheri nyịlẹhị-ịlẹḥi nyọka hụ la okpunyi bala aanahị aalẹ, áhị ka yẹhị rịrị ọ-jẹ́ họ ka nyaa ka. Ahị ka maga yẹẹyẹẹ nyọka yaa jaabwọ ká iJihova kaa yaa ịnyịnyị.​—1 Sam. 16:7; Eje. 130:3.

11. Ịyẹ tị́ du kọ kaa lujwo ụka ọhẹ nyọka nwụ́ ọháha ọgẹnẹ-gẹnẹ?

 ¹¹ Ọ́ kaa chịkpẹẹ lụmẹ ụka myị́ ụka nyọka mẹ ọháha ọgẹnẹ-gẹnẹ jẹ ẹ-ẹga nya aanahị ka, ọgụgụ wuu ri ụka kahị jẹ́ ọdẹwụ-dẹwụ nyaa. Ọ lala o-ri ẹlẹwẹ ri akama ha angịnyị nya ịKịrayịsị ịhyẹ la oyi ọhọhẹ. Ọ-chụ pwokwita, ọ́ lujwo ha Iyodiya bala iSintike nyọka “rịrị chii, juwa [da ịPọlụ] ụbwọ nya ịlẹhị-ịlẹhị ẹ-ẹpwụ nya ụkụrwọ nya ẹrụ ọnyịịla” ka. Ma, o ri akama haa nyọka yẹjula awụlẹ la okpunyi ọọlajị nya ịngịhyẹ bala ọkịla. Lẹ, ịPọlụ jwaa ọhụ nyọka “myị ju awụlẹ ẹ-ẹpwụ nya Ọngọlahị.”​—Filip. 4:2, 3.

12. Ányị ahị tị́ ka bwu nwụ́ ọháha ọgẹnẹ-gẹnẹ ẹ-ẹga nya aanahị?

¹² Ányị ahị tị́ ka bwu nwụ́ ọháha ọgẹnẹ-gẹnẹ ẹ-ẹga nya aanahị alẹ? Ụka kahị maga nyọka jẹ́ aanahị gụ olene, ọ ka chịkpẹẹ kaahị bala ịwa ka la o-wo lawụlẹ, bala ọ-ka nwụ́ ọháha ọgẹnẹ-gẹnẹ ẹ-ẹga nyaa. Ẹka lee ẹga ká ọngịnyị bwu, á ka wuhi kpa la o-ri aligu nya awụlẹ kpong-kpong ka. Kpịtịya nyori, iJonatan kpa ẹka lala iwo ịta ri ọgbahị nya iDevidi; ị tị ri aligu nya awụlẹ la apatabwọ kiwa ka. Ahụ ka jẹ́-ẹ maga ịnyịnyị nyọka ri oligu bala ọngọlẹ ko ri onjwo lee ọngọgbahị nyang ọọjịra-jịra nyanụ myị́? Bwula ọ-họ ịnyị, à ka mẹjẹ nyori a “la ọháha ọgẹnẹ-gẹnẹ nya [aanịna] ẹ-ẹpwụ nya ịKịrayịsị.”​—1 Pit. 2:17.

13. Ịyẹ tị́ du kahị ka jẹ́-ẹ ri oligu ta ọng myị́ ọng wuu la apatabwọ kiwa ka, ọọjịra-jịra ka?

¹³ Ọ-la ọháha ọgẹnẹ-gẹnẹ ẹ-ẹga nya aanahị mẹjẹ nyori ahị ka ri oligu ta ọng myị́ ọng wuu la apatabwọ kiwa ka ọọjịra-jịra? Ehe, ọ́ ka jẹ́-ẹ chịkpẹẹ ịnyị ka. Ọ́ tịpyọ nyọka tụ́ ju angịhyẹ chwẹẹ gụ angịkịla chajị nyori ahị kaa họ ang ụma okpokpo ka. IJisọsị wụrụ alẹrụ nyamwụ wuu nya “aligu” nyọwa, ma ịJọn tị họ́ọ yẹẹyẹẹ. (Jọn. 13:23; 15:15; 20:2) Tị wẹẹ, iJisọsị á kaa kpa ịJọn ụ-ụgbẹyị ọnyịịla gụ angịkịla ka. Ọ-chụ pwokwita, ụka ọlẹ ká ịJọn bala iJemsi ọọnamwụ bịlẹ iJisọsị kọ ka ya iwe-ahụrụ ọtụka haa ị-Ịpyị-Adịrahụ nya Ohe Oluhye lẹ, o byaa yẹkẹẹ: ‘Ọ-ka ya ẹga da hanụ, kanụ ka hụ tam u-upwuriri lee ụpụpịla nyam, á juwa ẹ-ẹpwụtụbwọ nyam kpong-kpong ka.’ (Mak. 10:35-40) Lala iJisọsị, áhị ka kpa angịlẹ kị ri  aligu ilikẹjẹ nyahị ụ-ụgbẹyị ọnyịịla gụ angịkịla ka. (Jem. 2:3, 4) Kori kahị họ ịnyị aalẹ, ahị ka kpa ebwo ọchịchị wẹ ẹpwụ nya ọjịra-jịra ọkọkọ nya okpunyi.​—Jud. 17-19.

14. Ányị ụpwụ nya Ala iFilipayị 2:3 à tị́ ka dahị ụbwọ cheji ba hi olegu nya awụlẹ ọ-chị ọnụ?

¹⁴ Ụka kahị mẹ ọháha ọgẹnẹ-gẹnẹ jẹ ẹ-ẹga nya awụlẹ, ahị ka chewu ke ọjịra-jịra hi olegu nya awụlẹ ọ-chị ọnụ. Kpịtịya nyori iJonatan á yẹ ijiiji nya iDevidi ka, ọ́ tị maga nyọka ri adịrahụ ọkọkọ nya iDevidi ka ịnyịnyị. Ahị wuu ka jẹ́-ẹ gbịla ọgụ-ẹpẹtẹ nya iJonatan. A yẹ ijiiji nya aanang chajị nya ang ọlẹ kịị jụ́ họ ka, ma kịnyaa “juwa wa angịkịla . . . nya angị họ hiigu gụ.” (Wa Ala iFilipayị 2:3.) Kpịtịya nyori ọng myị́ ọng nyahị wuu ka jẹ́-ẹ họ ịngịhyẹ ọlẹ kọ ka da ọjịra-jịra ụbwọ. Kori kahị kịnyaa la ọ-kpịlọhị keji aalẹ, ahị ka yẹ abwẹla ịnyịịla nya aanahị bala o-ye apyobwuna bwu ọgụ-ẹpẹtẹ ọnyịịla ọlẹ kị ya deeji.​—1 Kọr. 12:21-25.

15. Ẹlịyẹ a tị́ jẹ́ bwu oja nya ọọnahị Tanya bala ugbiyegu nyamwụ?

¹⁵ Ụka ká akama ọhẹ-ẹ́ chịhị ọgụ ẹ-ẹpwụ nya ọhịhị, iJihova kaa kpụ́ụhị ẹjẹ bwula ọháha ọgẹnẹ-gẹnẹ bala ụbwọ ọdada ọlẹ kahị kaa ye bwu ẹga nya aanahị. Kụ ẹhị yẹ ẹla ọlẹ kọ họ ta ugbiyegu ọhẹ ịị United States wẹẹ, nyọlẹ kị wẹẹ nyà bwu ịprogram ọla ẹnụ nya ịSatudee nya Ọjịra-jịra Ọtụka Ọlẹ ká Angịnyị kaa Tụguru Lawụlẹ Bwu Ụpa nya Odehe Wuu nya 2019, ọlẹ ká egbeju nyamwụ ri, ‘Ọháha nya Ịlẹhị Á kaa Gbu Enyi Ka’! Tanya, kọ ma anyị ịta yẹkẹẹ: “Ụka kahị wẹẹ pá iMoto nyahị tịrẹkpẹ ka ẹga kahị ye ẹpwa, ang ọrụnyẹ ọkịla wẹ kaka mịla iMoto nyahị. Ang á họ ọngọngọhẹ nyahị ka, ma ẹla ọọwa họhị ahị bwuu kpụ̀ ahị gba kpehe ka dayị rịrị ụ-ụgbẹyị.  Ọngọhẹ juwa dụbwọ hahị nyọka wẹ ẹga nya iMoto nyamwụ chajị ká ịngịngịhyẹ ka họhị ka. Ọngọọwa ri ọọnahị ọhẹ kọ wẹẹ nyà bwu ọjịra-jịra ọwẹ ịnyịnyị. Ọ-ọwa ụbwọọmwụ à tị dayị ka. Aanahị ịrụ ịkịla kị bwu Sweden chị dayị ịnyịnyị. Aanahị anyang wum bala ọnyị nyam bajẹ dudu ká ọhụ nyahị weji. M̀ byaa nyori ahị kpunyi, ị ka jẹ́-ẹ rụ myị́ lẹ. Ị́ tị myị rụ hiihi ka. Ị juwa balahị gbee da ụka ká angị họ utoji dọmwụ pwụ eji kpá bala ọ-họ ang myị́ ang ọlẹ kahị baba ụka ọwẹ hahị. Ahị yẹ ọháha nya iJihova u-uhye nyahị lụka olujwo ọwẹ. Ẹlẹwẹ ju ọháha nyahị ẹ-ẹga nya aanahị ọngịrị. Ọ myịmyị ju ọháha nyahị ẹ-ẹga nya iJihova ọngịrị bala ẹla nyamwụ ọ-myịhị lẹhị gụ ọwọwa.” À kpịtịya nya ụka ọhẹ ọlẹ ka baba nya ụbwọ ọdada, ká aanahị mẹ ọháha ọgẹnẹ-gẹnẹ jẹ ẹ-ẹga nyang?

16. Ang iyina à tị́ du kahị ka kịnyaa la ọ-mẹ ọháha ọgẹnẹ-gẹnẹ jẹ ẹ-ẹga nya awụlẹ?

¹⁶ Kụ irya nya ang ịnyịịla ịlẹ kị kaa họ ụka kahị mẹ ọháha ọgẹnẹ-gẹnẹ jẹ ẹ-ẹga nya awụlẹ wẹẹ. Ahị kaa kpụ́ aanahị ẹjẹ ụka kị juwa ẹ-ẹpwụ nya akama. Ahị kaa da aanahị ụbwọ nyọka gbịgba ha iJihova lawụlẹ la ọkẹkẹnị. Ahị kaa mẹjẹ nyori ahị ri angịjụgbẹyị nya iJisọsị nyịlẹhị, ọọwa tị kaa du ká angị la ọkịlẹtụ ọnyịịla kaa tịtọ nyọka wẹ ka gbịgba ha iJihova. Ọlẹ kọ tị gụgụ wuu ri, ahị kaa yogbo ha iJihova, ọngọ ri “Adịda nya ahyẹẹrwẹrwa ọlala wuu bala Ohe Oluhye nya ẹjẹ ọkpụ́kpụ wuu.” (2 Kọr. 1:3) Ahị wuu a kịnyaa la ọ-ka mẹ ọháha ọgẹnẹ-gẹnẹ jẹ bala ọ-nwànwà ẹ-ẹpwụ nyamwụ mẹ!