ANG ỌJẸ́JẸ 1
‘Ịngịngịhyẹ Ọnyịịla á ka Ku Angị Dahịhile IJihova Amwụ ka’
EGBEJU ẸLA NYA 2022: ‘Ịngịngịhyẹ ọnyịịla á ka ku angị dahịhile iJihova amwụ ka.’—EJE. 34:10.
EJE 4 “Jehovah Is My Shepherd”
ẸHỊ NYA ẸLA *
IDevidi yẹ nyori ‘ịngịngịhyẹ ọnyịịla nyị kwoo amwụ ka,’ nanana nyori ọ chịpwụrụ bwu ụka olujwo (Yẹ ọgba 1-3) *
1. Iwe-ahụrụ olujwo oyina iDevidi à tị́ yẹ ịlọmwụ ẹ-ẹpwụ nyamwụ?
IDEVIDI wẹẹ rụnyẹ nya ọhịhị nyamwụ. ỊSọlụ, kọ ri adịrahụ ọnyọọngịrị nya ala Isirẹlụ, wẹẹ maga nyọka nwọọ. Ụka ká iDevidi baba nya ang oriri, ọ dayị e-epweji nya ịNọbụ nyọka bịlẹ abẹ nya ịkaa ịrụ kem bwu ẹga nya Ahimẹlẹkị. (1 Sam. 21:1, 3) Ụka ọkịla, ọwa bala angịnyị nyamwụ yé iwe-ịbaa ẹ-ẹpwụ nya ụ́gbụ ọhẹ. (1 Sam. 22:1) Ányị iDevidi à tị́ bwu ju ka ẹpwụ nya iwe-ahụrụ ọwẹ ene?
2. Ányị ịSọlụ à tị́ bwu hu ịlọmwụ ju ka ẹpwụ nya iwe-ahụrụ ọ-la uhi-uhi? (1 ịSamwẹlụ 23:16, 17)
2 ỊSọlụ yẹ ijiiji nya iDevidi kaka kpoye ọọlajị nyọlẹ ká iDevidi há angịnyị bala ọlẹ kọ ru ohi chajị nyọlẹ kọ la ọkụrụ-kụrụ ẹ-ẹpwụ nya ẹwụ lụmẹ-lụmẹ. ỊSọlụ jẹ́ ịnyịnyị nyori egbeju ọnyọọngịrị nyamwụ nyị dudu ká iJihova pwọọ lala adịrahụ nya ala Isirẹlụ bala o-ri iJihova chụ iDevidi nyọka hụhụ ẹ-ẹchị adịrahụ lẹ. (Wa 1 ịSamwẹlụ 23:16, 17.) Ma ịSọlụ tị ri adịrahụ nya ala Isirẹlụ wẹẹ, lẹ ọ la iru nya alẹwụ bala angịlẹ kị kaa chẹkpẹ jwoo, ịnyị à du ká iDevidi wẹẹ rụnyẹ nya ọhịhị nyamwụ lẹ. ỊSọlụ me irya nyori ọ ka jẹ́-ẹ da irya ọlẹ ká Ohe la nyọka hu iDevidi nya adịrahụ yi myị́? (Ayị. 55:11) ỊBayịbụụ á ya kpangga ka, ma ẹla ọhẹ ọlẹ áhị ka jẹ́ myị̀myị̀ ri: ỊSọlụ wẹẹ hu ịlọmwụ ju ka ẹpwụ nya iwe-ahụrụ ọ-la uhi-uhi ịnyị. Ọngọhẹ-ẹ́ ma uya tọ Ohe ọ kụrụ ẹnẹhẹ lẹka!
3. Ányị ọ tị la iDevidi nanana nyori o ji ẹpwụ nya iwe-ahụrụ olujwo?
3 IDevidi á ri ọngọ kaa gba ju ka ẹpwụ nya ẹla ka. Ọ-ọwa à chụ nyọka ri adịrahụ nya ala Isirẹlụ ka. IJihova à chwọọ nyọka ri adịrahụ lẹ. (1 Sam. 16:1, 12, 13) ISọlụ tị yẹ iDevidi lala oluji kaka kpoye. Ma iDevidi á kpụ iJihova abyị chajị nya iwe-ahụrụ ọ-la uhi-uhi ọlẹ kọ ji ẹpwụ nyamwụ ka. Ọ́ tị mwẹla ya chajị nyori ọ́ la ang oriri gbuu ka bala ọlẹ kọ wẹẹ nune ẹ-ẹpwụ nya ụ́gbụ ka ịnyịnyị. Ọkọkọ nya ọọwa, ọ lala o-ri ọlẹ kọ kụ ẹpwụ nya ụ́gbụ ọọwa chẹẹ, ọ da eje nya ogbo ogwogwo ọnyịịla-ọnyịịla ọhe. Omyi ẹla ịhyẹ bwu ẹpwụ nya eje ọọwa à ri egbeju nya ang ọjẹ́jẹ ọlẹ lẹ: ‘Ịngịngịhyẹ ọnyịịla á ka ku angị dahịhile iJihova amwụ ka.’—Eje. 34:10.
4. Ịtọ ẹla iyina ahị tị́ wẹẹ ka kụ ẹhị yẹ? Ịyẹ tị́ du kị baba?
4 Alẹ ang oriri bala ang ịkịla ịlẹ kị baba ẹ-ẹpwụ nya ọhịhị kaa ku iru nya anchẹ nya iJihova amwụ. * Ọ lịnyị gụgụụgụ ẹ-ẹpwụ nya ẹdụrụ ọlẹ ko bene kpanjẹ lẹẹ. Jaabwọ ká “akama ọtụka okpelego” wẹẹ ji ọnaabwọ gụ́ ọwọwa, ahị ka yahị guru nyori ang ka lujwo gụ́ ọlẹ wẹẹ. (Mat. 24:21) La ẹlịlẹhị ọwẹ i-irya, ahị wẹ ịtọ ẹla ine ịlẹ wẹẹ: Ụgbẹyị oyina iDevidi à tị́ ‘ku amwụ nya ang ịnyịịla ka’? Ịyẹ tị́ ká ang ịlẹ kahị la ka nwahị ba ụ-ụwa? Ịyẹ à tị́ du kahị ka jẹ́ myị̀myị̀ nyori iJihova ka kpahị juhị? Ányị ahị tị́ ka bwu nwụlanọ lẹẹlẹẹ gbe ijuju?
“M̀ LA ANG ỊLẸ WUU KAM TỊTỌ”
5-6. Ányị Eje Ọnyịịla 23:1-6 à tị́ dahị ụbwọ nyọka wo etu nya ẹla ọlẹ ká iDevidi ya nyori anchẹ nya iJihova nyị́ ka ‘ku amwụ nya ịngịngịhyẹ ọnyịịla ka’?
5 Ịyẹ à tị́ ri etu nya ẹla ọlẹ ká iDevidi ya nyori anchẹ nya iJihova nyị́ ka ‘ku amwụ nya ịngịngịhyẹ ọnyịịla ka’? Ahị ka jẹ́ bwula ọ-kụ ẹhị yẹ omyi ẹla ụma ọlịịwẹ ọlẹ kị kpa ya ẹla ẹ-ẹpwụ nya Eje Ọnyịịla 23. (Wa Eje Ọnyịịla 23:1-6.) IDevidi dọmwụ nyamwụ la omyi ẹla ịlẹ: “[IJihova] ri ọngọgbem lala ọngọgbikpịlọ. Lẹẹlẹ, m̀ la ang ịlẹ wuu kam tịtọ.” Ẹ-ẹpwụ nya ụpa ohihi nya eje ọnyịịla ọwẹ, iDevidi gu ẹnyị nya ang ị-ju apyobwuna ịlam-ịlam, kị ri ang ịnyịịla ịlẹ ká iJihova ya họọ chajị nyọlẹ kọ ye iJihova myị nya Ọngọ gboo gbe. IJihova kpọọ “bwu ụgbẹyị ọnyịịla,” Ọ tị da iDevidi ụbwọ la ụka ịnyịịla bala ụka ịtịpyọ ịnyịnyị. IDevidi tị jẹ́ nyori ẹga nya “amẹ ilekpo” ọlẹ ká iJihova yọọ kụ ka ju akama ẹ-ẹpwụ myị́. Ụka ọhẹ, ọkịlẹtụ ka kpọọ enyi myị́, du kọ chabwọ nyamwụ lala odehe nyamwụ nyị ‘chowu kpịlẹẹ,’ ọ tị ka la aluji myị́ ịnyịnyị. Ma nyọlẹ ká iJihova ri Ọngọ gboo gbe wẹẹ, iDevidi á “chị uko nya ịngịngịhyẹ ka.”
6 Ahị tọ ịtọ ẹla igbinọ nyori: Ụgbẹyị oyina iDevidi à tị́ ‘ku amwụ nya ang ịnyịịla ka’? Ọwẹwẹ nyamwụ à lẹẹ ugbẹnyị ẹẹ. Ọ la ang myị́ ang ọlẹ kọ baba nyọka jẹ́-ẹ kịnyaa la ọ-tụ ju iJihova chwẹẹ. Ang ịlẹ ká iJihova ya ha iDevidi nwọọ ba ụ-ụwa. Ang ọlẹ kọ ju apyobwuna họọ gụ ri iJihova wahị kụrwọọ bala ọ-chewu koo.
7. Jaabwọ ká ụpwụ nya iLuku 21:20-24 ya, iwe-ahụrụ olujwo oyina Angịnyị nya ịKịrayịsị ịla oyi ọhọhẹ à tị́ chịpwụrụ bwu?
7 Bwu ẹpwụ nya omyi ẹla nya iDevidi ọwẹ, ahị ka yẹ jaabwọ kọ baba ka ba nyahị ọ-ka hu ang ọlala kụ ịlahị ka. Ahị ka yé ịpyọ ọkpụkpụ nya ang ịlẹ kahị la myị́, ma áhị tị ka hwaa kụ ịlahị ẹ-ẹpwụ nya ọhịhị nyahị ka. Ẹlịlẹhị ọkpọnchị ọlẹ ká Angịnyị nya ịKịrayịsị ịlẹ kị kụ iJudiya la oyi ọhọhẹ wẹ ka jẹ́ à wẹ lẹ. (Wa iLuku 21:20-24.) IJisọsị daa ọna nyori ụka nyị ja wẹ ká “alẹwụ nya aluji [nyaa ka] bá urwe dagaga ju epweji nya iJerusalẹm.” Ụka kọ lịnyị ị ka baba nyọka “rụnyẹ rụ kaka kpịbaa ẹ-ẹpwụ nya ịgbọdọ.” Ụnyẹ ọrụrụ nyaa à ka du kị ka chịda myị́ lẹ, ma ị tị ka tụụbwọ hi ang lụmẹ-lụmẹ. Ẹka ịmanyị-ịmanyị kẹkpẹ, Ẹpwang ọ-Kụ Gbeji yẹkẹẹ: “Ị tụụbwọ hi ẹrụ bala ẹpwa nyaa, la ọ-dọmwụ tụ ang-abwọ nyaa bawulẹ bwu ẹpwa nyaa ka. Ị dahịhile iJihova nyori ọ ka chewu kaa bala ọ-daa ụbwọ, ị tị hu ịgba ọgbagba nyamwụ kụ ịlahị nya ịngịngịhyẹ ọkịla ọlẹ kọ ka ju apyobwuna haa ịnyịnyị.”
8. Ẹla ọkpọnchị oyina ahị tị́ jẹ́ bwu ẹpwụ nya ẹla ọlẹ kọ họ ta Angịnyị nya ịKịrayịsị ịla iJudiya la oyi ọhọhẹ?
8 Ẹla ọkpọnchị oyina ahị tị́ ka jẹ́ bwu ẹpwụ nya ẹla ọlẹ kọ họ ta Angịnyị nya ịKịrayịsị ịla iJudiya la oyi ọhọhẹ? Ẹpwang ọ-Kụ Gbeji ọlẹ kahị gu ẹnyị ahyaahị wẹ yẹkẹe: “Ịmayẹ ka wẹ ị-ịlahị u-uhye nya abwọlẹ kahị kaa yẹ ang ọlala nyahị myị́; ịwa à ri ang ịlẹ kị baba hahị gụ́ lẹ lee, ọchịda ọlẹ kọ ka wẹ ẹga nya angịlẹ wuu kị ji ụpa nya Ohe tị? Ee, ụnyẹ ọrụrụ nyahị ka ju akama ẹ-ẹpwụ bala ọ-ka tụụbwọ hi ang nyahị ịhyẹ myị́. Ahị ka nwụlanọ nyọka họ ang myị́ ang ọlẹ kahị baba nyọka họ, jaabwọ kọ la ẹ-ẹga nya Angịnyị nya ịKịrayịsị ịlẹ kị rụnyẹ rụ hi iJudiya.” *
9. Ọhụ ojuju oyina a tị́ yé bwu ẹpwụ nya ẹla ọlẹ ká ọlẹrụ ịPọlụ byi ala iHiburu?
9 Kụ irya jaabwọ kọ ka lujwo ha Angịnyị nya ịKịrayịsị ịwẹ kaka ba nyọka tụụbwọ hi ang myị́ ang ịlẹ kị la wuu kaka dọmwụ nya ọhịhị ẹ-ẹga onyeewe wẹẹ. Ọ baba nya ọmyịmyị nya ịwa ọ-ka dahịhile iJihova nyọka họ ang ịlẹ kị ri ịbaba nyaa haa. Ma ịngịhyẹ juwa ọlẹ kọ ka daa ụbwọ. Ẹka ịrụ ene ká ala iRom lẹẹ dagaga ju iJerusalẹm, ọlẹrụ ịPọlụ ju ala iHiburu irya ọnyịịla ọhẹ yẹkẹẹ: “Anụ cheri kanụ juwa gba ụbwọ nyanụ kpehe hi ẹpwụ nya ẹhị nyanya nya okpoko ọchịchị wuu mẹ. Kanụ myị ká ang myị́ ang ọlẹ kanụ la juwa lẹ, a nwanụ ba ụ-ụwa mẹ. Chajị, Ohe Oluhye ya ẹ-ẹgẹlẹ yẹkẹẹ, ‘Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹhẹ kaka.’ Chajị nya ọọwa lẹ, ahị angịnyị nya Ohe Oluhye ka la ọnụ ọ-ya ẹla ọpwọọ myị́ yẹkẹẹ, ‘[IJihova] a ri Ọngọ da ụbwọ nyam lẹ, ḿ ka juwa juhi kpong-kpong kaka. Ịịyẹ ọngịnyị ehe a tị́ tụtụm ka jụm họ myị́ wẹẹ?’ ” (Hib. 13:5, 6) Ịwẹẹ ọdada á juwa ka, ọ ka chịkpẹẹ gụ́ ha angịlẹ kị kpa ẹla ọmẹjẹ nya ịPọlụ họ ụkụrwọ ene ká ala iRom wẹ ka yaa dada, nyọka jẹ́-ẹ yẹ ba ọhịhị nya ang ọ-la gbuu ka ọla ẹga onyeewe ọwẹ. Ị jẹ́ myị̀myị̀ nyori iJihova ka họ ang ịlẹ kị ri ịbaba nyaa haa. Ẹla ọlẹ ká ịPọlụ ya họ kahị ka jẹ́ myị̀myị̀ ịnyịnyị nyori iJihova ka họ ịbaba nyahị hahị.
“ỊỊWA A NWAHỊ BA Ụ-ỤWA KEM MẸ”
10. Ẹlịyẹ ịPọlụ à tị́ “jẹ́” kọ ya jehi?
10 ỊPọlụ ya ẹla ụma ọlịnyị ta iTimoti, ẹla ọọwa tị guhi ịnyịnyị. Ọ da ụpwụ yẹkẹẹ: “Lẹ, ó ri kahị la ang oriri juwa ri bala ọ-la ọkụrụ kụrụ lẹ aalẹ, ịịwa a nwahị ba ụ-ụwa kem mẹ.” (1 Tim. 6:8) Ọọwa ri áhị ka ri ang oriri ọ-la ịpyọ, kụ ẹpwa ọnyịịla, lee ọ-ra ang ọkụrụ-kụrụ ụka ọhẹ bala ụka ọkịla kaka ịnyị? Ịnyị ịPọlụ à wẹẹ ya ka. ỊPọlụ wẹẹ ya nyori ang myị́ ang ọlẹ kahị la ka nwahị ba ụ-ụwa ịnyị. (Filip. 4:12) Ẹla ọlẹ ká ịPọlụ “jẹ́” à wẹ lẹ. Igu oriri nyahị bala iJihova à ju apyobwuna gụ́ ang-abwọ ịkịla ịlẹ kahị la wuu lẹ.—Hab. 3:17, 18.
Ẹ-ẹpwụ nya ẹka 40 ịlẹ ká ala Isirẹlụ juwa u-ugbileji, “ịngịngịhyẹ ọnyịịla-aa kwaa amwụ ka.” Ang ịlẹ kahị la ka nwahị ba ụ-ụwa myị́? (Yẹ ọgba 11) *
11. Ẹlịyẹ ahị tị́ jẹ́ u-uhye nya ang ọ-nwahị nwà bwu ẹla ọlẹ ká iMosisi byi ala Isirẹlụ?
11 Ang ọlẹ kahị me nyori ọ baba hahị ka datị hi ọlẹ ká iJihova jẹ́ ahị nyị baba myị́. Kụ irya nya ẹla ọlẹ ká iMosisi byi ala Isirẹlụ nyọlẹ kị bịrị ẹka 40 u-ugbileji kpá lẹẹ wẹẹ: “[IJihova] Ohe Oluhye nyanụ wahị kụrụụnụ ẹ-ẹpwụ nya ụkụrwọ ọnyị myị ọnyị ọlẹ kanụ họ. Ọ kpẹhị rịrịịnụ lụka ọlẹ kanụ lẹẹ ga tụ ugbileji ọtụka ọlẹ da. Ọ hụ tanụ ẹ-ẹpwụ nya ẹka iwo ine ịlẹ wuu. Anụ la ang myị ang ịlẹ kị baba hanụ wuu.” (Ehile. 2:7) Ẹ-ẹpwụ nya ẹka 40 ịịwa wuu, iJihova ya ịmana bala iyo ha ala Isirẹlụ ri. Ang ọkụrụ-kụrụ nyaa ịlẹ kpangga kị kụrụ ị-ịnyịrọ ụka kị rụ bwu Ijipiti á bịrị ka. (Ehile. 8:3, 4) Angịhyẹ ka ya nyori ang ịwẹ nyị́ nwà ka myị́, ma iMosisi tị kpụ ala Isirẹlụ ịtịya nyori nyị la ang myị́ ang ịlẹ kị baba haa. IJihova ka chị ọkẹkẹnị balahị ó-ri ká ang ịlẹ kahị la a nwahị ba ụ-ụwa. Ọ tịtọ ká ang ichiche-ichiche ịlẹ kọ ya hahị ka myịhị lẹhị bala ọ-ka jẹ́ nyori āhị ị ri bwu ẹga nyamwụ lẹ.
DAHỊHILE NYORI IJIHOVA KA KPAHỊ JUNG
12. Ịyẹ à tị́ mẹjẹ nyori iDevidi dahịhile iJihova ọkọkọ nya ịlọmwụ?
12 IDevidi jẹ́ nyori iJihova kaa dayị giri-giri bala ọngịnyị, ọ tị kaa kpahị ju angịlẹ kị la ọháha ẹ-ẹga Nyamwụ yẹẹyẹẹ ịnyịnyị. Nanana nyori ọhịhị nya iDevidi juwa ẹ-ẹga ọ-la uhi-uhi ụka ọlẹ kọ da Eje Ọnyịịla 34, bwula ẹhị nya ọmyịmyị ọ jẹ́ yẹ ‘olegu-ẹrụ nya iJihova kọ kụ juwa gboo.’ (Eje. 34:7) Ọhẹka iDevidi wẹẹ chụ olegu-ẹrụ nya iJihova kaka pwoku isoja ọlẹ kọ chịkụ ẹ-ẹpwụmẹ, ja ya ẹhị reeji nya ụka ká aluji ka warị. Ịlẹhị lẹ iDevidi ri ọgẹwụ ọlẹ kọ kaa ju ugbodu bala o-ri iJihova myị ọnụ họọ nyọka ri adịrahụ, ma ọ́ tị kpụnịrọ ọngịrị nya ịlọmwụ ẹ-ẹga nya ọmẹ lee oge ọ-jẹ́ kpa dẹwụ lụmẹ, nyọka kụrụ aluji nyamwụ ka. (1 Sam. 16:13; 24:12) IDevidi kpụnịrọ Ohe, la ahị ọdahile nyori olegu-ẹrụ nya iJihova kaa ‘gbe angịlẹ ki ju ihi Nyamwụ.’ Áhị ya ẹhị nọ nyori Ohe ka chewu keehi la ụkụrwọ ẹbyẹbyị alẹ ka. Ma ahị tị jẹ́ nyori ọng myị́ ọng ọlẹ kọ dahịhile iJihova ka la ọhịhị ọmyịmyị ka, ó-ri ko dọmwụ gbu-gbu lẹẹlẹẹ wẹwẹ.
Ụka nya akama ọtụka okpelego, ịGọọgụ ọla ịMagọọgụ ka maga nyọka hu ang nya ẹwụ jahị dahị wẹ ẹpwa nyahị myị́. Ma, ahị jẹ́ nyori iJisọsị bala alegu-ẹrụ nyamwụ ka jẹ́ ẹla ọlẹ kị wẹẹ họ, ị tị ka warị ka dẹwụ yẹhị dada ịnyịnyị (Yẹ ọgba 13)
13. Ụka ká ịGọọgụ ọla ịMagọọgụ ka gba mịlahị, ịyẹ à tị́ ká du kọ ka lala o-ri ahị nyị ri iyo ọla idu nyaa? Ma ịyẹ à tị́ du kahị ka juhi ka? (Yẹ ifoto ọla ẹbẹ nya ọgbanyẹ.)
13 Ụ-ụwa ị-ịlahị, ahị ka la ọmayẹ ẹ-ẹga nya ahị ọdahile ọlẹ kahị la nyori iJihova la ọngịrị nyọka chewu keehi myị́. Ụka ká ịGọọgụ ọla ịMagọọgụ, kọ ri ọtụchị awụlẹ nya ẹpwụma, ka gba mịla anchẹ nya Ohe, ọ ka lala o-ri áhị nyị́ ka chịda myị kaka. Ahị ka baba nyọka la ọ-jẹ́ myị̀myị̀ nyori iJihova la ọngịrị bala ọ-nwụlanọ nyọka chịhị da myị́. A-ahị nya alẹpwụma lẹ, ahị ka laa lala ịkpịlọ ịlẹ kị la ọngịrị lee ọ-la ọngọngọhẹ ka chịhị da ka. (Isi. 38:10-12) Áhị ka kpa ang-abwọ nya ẹwụ ka, ọngọhẹ-ẹ́ tị dọmwụ mẹjẹ́ẹhị jaabwọ kị ka bwu dẹwụ ka ịnyịnyị. Alẹpwụma ịwẹ ka me nyori ahị nyị ri iyo ọla idu nyaa lẹ. Ị́ jẹ́ nyori alegu-ẹrụ nya iJihova nyị nwụlanọ nyọka chịhị da ka. Ahị tị jẹ́ chajị ahị la ọmyịmyị. Ányị alẹpwụma ịwẹ à tị́ dọmwụ ka bwu jẹ́? Ị́ la ọmyịmyị ẹ-ẹga nya Ohe ka. Ọ ka laa ẹbyẹbyị kaka kpoye ụka ká alẹwụ ịla epwoohe ka wẹ ka dẹwụ yẹẹhị dada!—Ọwụ. 19:11, 14, 15.
NWỤLANỌ LẸẸLẸẸ GBE IJUJU
14. Ẹta ẹdịyẹ iyina ahị tị́ ka hu lẹẹlẹẹ nyọka nwụlanọ gbe ijuju?
14 Ịyẹ ahị tị́ ka họ lẹẹlẹẹ nyọka nwụlanọ gbe ijuju? Ọhọhẹ-họhẹ, ahị baba nyọka la irya ọ-la kpakpa ẹ-ẹga nya ang ịlẹ kahị la, chajị ahyẹẹnụ wẹẹ wẹ kahị ka nyẹẹkpẹ daa wuu wẹẹ. Ang ịlẹ kahị la baba nyọka nwahị ba ụ-ụwa, ahị tị ka chị ọkẹkẹnị yẹẹyẹẹ nyori ahị ri igu bala iJihova ịnyịnyị. Jaabwọ kahị wẹẹ jẹ́ Ohe gụ́ olene, ịnyịnyị ahị kaa jẹ́ myị̀myị̀ nyori ọ la ọngịrị ka chịhị da myị́ ụka ká ịGọọgụ ka gba mịlahị lẹ.
15. Ịyẹ à tị́ họ ụka ká iDevidi ri onjwo du kọ jẹ́ nyori iJihova ka dọọ ụbwọ ụka wuu?
15 Kụ irya nya ẹla ọkịla ọlẹ kọ da iDevidi ụbwọ, kọ tị ka jẹ́-ẹ dahị ụbwọ nyọka nwụlanọ gbe ịmayẹ lẹẹ wẹẹ. IDevidi yẹkẹẹ: “Wụlayẹ lịlọng ká yẹ jaabwọ ká [iJihova] há ka ba. Ịnya ọngọlẹ kọ kele ka kpịbaa ẹ-ẹga nyamwụ há ha ọngọọwa lẹ!” (Eje. 34:8) Omyi ẹla ịwẹ ya ang odudu ká iDevidi jẹ́ nyori ọ ka jẹ́-ẹ kpụnịrọ ụbwọ ọdada nya iJihova. IDevidi kaa dahịhile iJihova ụka myị́ ụka, Ohe nyamwụ á tị dọọ lụgbaa ẹnẹnẹhẹ lẹka. Ụka ká iDevidi ri onjwo, kọ lẹẹ ka ma uya ta iGoloyatị ko ri ọgẹwụ nya ala iFilisitiya, iDevidi byoo yẹkẹẹ: ‘[IJihova] ka yang jum ẹ-ẹpwụtụbwọ alẹ oleeri ọlẹ.’ (1 Sam. 17:46) Ụka ọkịla, iDevidi wẹẹ họ ụkụrwọ ha adịrahụ ịSọlụ, ịSọlụ maga ụka lụmẹ-lụmẹ nyọka nwọọ. Ma iJihova tị “hụ ta iDevidi.” (1 Sam. 18:12) Chajị nyọlẹ ká iDevidi ye ụbwọ ọdada nya iJihova la ụka ọkẹkpẹ, ọ jẹ́ nyori Ohe ka jẹ́-ẹ dọọ ụbwọ ẹ-ẹpwụ nya akama nyamwụ wẹẹ.
16. Ụgbẹyị ọlanyị ahị tị́ ka jẹ́-ẹ ma ọháha nya iJihova yẹ?
16 Jaabwọ kahị wẹẹ kpụnịrọ iJihova nyọka kpahị ụgbẹyị ka ba lẹẹlẹẹ, ịnyịnyị ahị ka la ọhụ ọ-dapịlẹ nyori ọ ka chịhị da myị́ ị-ịlahị lẹ. Ahị baba nya ọmyịmyị ọlala bala ọ-ka nwụlanọ nyọka byi olegbeju nyahị kọ ka ya iwe da hahị bwu ọlụkụrwọ nyọka ka ọjịra-jịra nya isekut bala ọjịra-jịra ọtụka, lee ọ-ka nwụla ụkụrwọ nyahị nọ ụ-ụgbẹyị ọlẹ kahị ka jẹ́-ẹ ka ọjịra-jịra nya epwihi-epwihi bala ọ-ka yé ụka kpa ẹrụ ọnyịịla pyẹ gụ́ ọọwa. Ọngọ yehi nya ụkụrwọ ka pwa la ọ-ya ụka hahị kpụ ọ ka kuhi hi ụkụrwọ myị́. Ahị la ọmyịmyị nyori iJihova á ka tụụbwọ hiihi lee o-nyẹẹkpẹ dahị ka bala o-ri ọ ka họ ang ịlẹ kị ri ịbaba nyahị hahị ụka myị́ ụka? (Hib. 13:5) Iru nya aanahị ịlẹ kị kaa kpa ụka nyaa wuu họ ụkụrwọ nya Ohe ka jẹ́-ẹ ya ụka lụmẹ-lụmẹ ịlẹ ká iJihova kaa daa ụbwọ ụka ọlẹ kị baba nyamwụ gụ́ wuu. IJihova á kaa nyẹẹkpẹ da angịnyị nyamwụ ka.
17. Ịyẹ à tị́ ri egbeju nya ẹla ọla ẹka nya 2022? Ịyẹ à tị́ du kọ pwoku?
17 Nyọlẹ ká iJihova ji oye nyahị wẹẹ, ịngịngịhyẹ á ka du kahị ka juhi nya ahyẹẹnụ ịla ịlahị kaka. Ọ́ kpụ kahị hu Ịpyị-Adịrahụ nya Ohe kụ ịlahị ẹ-ẹpwụ nya ọhịhị nyahị lẹ aalẹ, Ohe nyahị á ka nyẹẹkpẹ dahị ẹnẹnẹhẹ kaka. Nyọka kpụhị ịtịya nya ọbaba nyahị ọ-ka nwụlanọ lẹẹlẹẹ gbe ahyẹẹnụ ilujwo ịla ịlahị bala ọ-ka dahịhile nyori iJihova á ka nyẹẹkpẹ dahị ka, Angị Kpẹhị rịrị Ogu chụ Eje Ọnyịịla 34:10 nya egbeju ẹla nya 2022: ‘Ịngịngịhyẹ Ọnyịịla á ka Ku Angị Dahịhile IJihova Amwụ Ka.’
EJE 38 Ọ Ka Ya Ọngịrị Hang
^ par. 5 Egbeju ẹla nya ẹka nya 2022 bwu ụpwụ nya Eje Ọnyịịla 34:10: ‘Ịngịngịhyẹ ọnyịịla á ka ku angị dahịhile iJihova amwụ ka.’ Iru nya anchẹ nya iJihova-á la ang ụdụ lụmẹ ka. Ụ-ụgbẹyị oyina “ịngịngịhyẹ ọnyịịla” à tí “kwaa amwụ ka”? Ányi etu nya ọgba ọwẹ owowo à tị́ ka dahị ụbwọ nyọka nwụlanọ gbe ụka ilujwo ịlẹ kị wẹẹ warị?
^ par. 4 Yẹ “Ịtọ Ẹla Bwu Ẹga nya Angị Wa Apwụ Nyahị” ọla ẹpwụ nya Ẹpwang ọ-Kụ Gbeji nya Ọya Ohikichu 15, 2014.
