1-2. (a) Ụka oyina gụgụụgụ ahị tị́ kaa kpịtịya nya ọngọ háahị há ọlẹ kọ gbu lẹ? (b) Ọhọhọ oyina iJisọsị à tị́ ya yeji lodu ene nya ahyẹẹnụ ọlẹ kọọ?

 JAABWỌ myị́ abwọ ọlẹ kọ lụrụ tata ka ba nyọlẹ ká angị háahị há gbu lẹ, ahị kaa kpịtịya nyaa wẹẹ. Ahyẹẹnụ nya ịtịya ọkpụkpụ nya igu ogbugbu nyaa gụgụụgụ kaa kpụhị ịtịya nya ang myị́ ang wuu chajị nyaa.

² Ẹka ọnyị myị́ ọnyị, ahị ji ẹpwụ nya uku-ụnọ nya angịnyị ịla ịkịka nya odehe wuu ịlẹ kị kaa tụguru ẹnu nya ọ-họ kpa kpịtịya nya igu ogbugbu nya ọngọ háahị há, iJisọsị ịKịrayịsị. (1 Pit. 1:8) Ahị tụguru nyọka kpịtịya nya ọngọlẹ kọ hu ọhịhị nyamwụ ha nyọka chịhị da bwu ẹpwụ nya ọhọbịrị bala igu. (Mat. 20:28) IJisọsị dọmwụ tịtọ ká angị bọọ jẹ ka kpịtịya nya igu ogbugbu nyamwụ. Lodu ene nya ahyẹẹnụ ọlẹ kọọ gbu, ọ ya ọhọhọ nya ang oriri nya obyi ọdatị yeji bala ọ-da ehile yẹkẹẹ: “Anụ́-ụ juwa ri ang oriri ọlẹ ịnyịnyịịnyị, nya ọ-kpa kpịtịya nyam mẹ.”​—Luk. 22:19.

3. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

³ Angịnyị pyịnyẹng lẹpwụ nya angịlẹ kị kaa tụguru ha ọ-Họ Kpa Kpịtịya nya Igu Ogbugbu nya ỊKịrayịsị la ẹhị ọrịrịị-rịrị nya epwoohe. Ma, uku-ụnọ nya angịnyị ịlẹ kị la ẹhị ọrịrị nyọka hịhị ám̀ odehe kaa juwa i-ijata ịnyịnyị. A-ang ọjẹ́jẹ ọlẹ, ahị ka kụ ẹhị yẹ ang odudu ọlẹ ká ebwo imiiye ịwẹ kaa charịnya nyọka kà ọ-Họ Kpa Kpịtịya ọwẹ ẹka myị́ ẹka. Ịnyịnyị, ahị ka yẹ apyobwuna ịlẹ áhị kaa ye bwula ọ-họ ịnyị. Ahị dọmwu bwula ọ-kụ ẹhị yẹ ang odu ọlẹ ká angịlẹ kị ya ida wụ́ kaa kà wẹẹ.

4. Ịyẹ tị́ du ká angịlẹ kị ya ida wụ́ à kaa ri ịkaa bala ọ-nwa ere ụ-ụwa ọ-Họ Kpa Kpịtịya?

⁴ Ẹka ọnyị myị́ ọnyị, angịlẹ kị ya ida wụ́ kaa ya ẹhị rịrị nyọka ká ọ-Họ Kpa Kpịtịya nya Igu Ogbugbu nya ịKịrayịsị nya angị ka ri ịkaa bala ọ-nwa ere. Ịyẹ tị́ du ká ịwa à chịla nyọka ri ịkaa bala ọ-nwu ere ọlụwa? Nyọka wẹ ịto ẹla ọwẹ, kụ ẹhị yẹ ẹla ọlẹ kọ họ lodu ohyẹẹkpẹ nya ọhịhị nya iJisọsị olodehe ọlẹ. Nyọlẹ kị ri Ang Oriri Ọchịpwụrụ kpá, iJisọsị ya ọhọhọ ọhẹ yeji ọlẹ kị jọ́ọ nya Ang Oriri nya Obyi nya Ọngọlahị. Ọ hu ịkaa bala ere ha angịjụgbẹyị nyamwụ angị iwo kụrụ ookpokpo nyọka ri bala ọ-nwà. IJisọsị ya ẹla u-uhye nya iro ọnwanwa lee ọnụ ọmyịmyị imiiye jaa​—iro ọnwanwa onyeewe bala iro ọnwanwa nya Ịpyị-Adịrahụ. * (Luk. 22:19, 20, 28-30) Iro ọnwanwa ịwẹ wụrụ ụgbẹyị da ha angịmyẹrụ ịwẹ bala ịnọmba nya angịnyị pyịnyẹng ịkịla nyọka ri ịdịrịhụ bala angịkiliya e-epwoohe. (Ọwụ. 5:10; 14:1) Angị hihi nya angịlẹ kị ya ida wụ́ à ka ri ịkaa bala ọ-nwa ere ụ-ụwa ọ-Họ Kpa Kpịtịya nya Igu Ogbugbu nya ịKịrayịsị myị́ lẹ.

5. Ịyẹ angịlẹ kị ya ida wụ́ à tị́ jẹ́ u-uhye nya ẹhị ọrịrịị-rịrị ọlẹ kị la?

⁵ Ang ọkịla ọlẹ kọ du ká angịlẹ kị ya ida wụ́ kaa charịnya nyọka kà ọ-Họ Kpa Kpịtịya nya Igu Ogbugbu nya ịKịrayịsị ri: Ọhọhọ ọwẹ kaa ya iwe haa nyọka me irya ju ẹhị ọrịrịị-rịrị nyaa. IJihova ya ẹhị ọrịrịị-rịrị ọnyịịla-ọnyịịla haa​—ọ-ka la ugbinyịrọ ogbugbu-ka bala ọmama-ka e-epwoohe, ọ-ka họ ụkụrwọ bala iJisọsị, ọngọlẹ kọ lihi yẹẹyẹẹ bala angị hihi nya angị 144,000, ọlẹ kọ tị gụgụ wuu, ọ-ka juwa i-ijata nya iJihova Ohe Oluhye! (1 Kọr. 15:51-53; 1 Jọn. 3:2) Angịlẹ kị ya ida wụ́ jẹ́ nyori ị wụraa wụrụ nyọka ye ahị ọwawa ịwẹ e-epwoohe ịnyị. Ma nyọka yaa kele ka epwoohe, ị baba nyọka godayị kpẹẹkpẹẹ gbee pwụ ocheju nya ọhịhị nyaa. (2 Tim. 4:7, 8) Ọ kaa ya ọkẹkẹnị ha angịlẹ kị ya ida wụ́ ụka kị me irya ju ẹhị ọrịrịị-rịrị nyaa olepwoohe ọwẹ. (Tay. 2:13) Ogu “ịkpịlọ . . . ịkịla” tị bẹẹ? (Jọn. 10:16) Ịyẹ à tị́ ri ang odu ọlẹ kị kaa kà ọ-Họ Kpa Kpịtịya nya Igu Ogbugbu nya ịKịrayịsị?

6. Ịyẹ tị́ du ká angịlẹ kị ri ogu ịkpịlọ ịkịla kaa kà ọ-Họ Kpa Kpịtịya ẹka myị́ ẹka?

⁶ Ogu ịkpịlọ ịkịla kaa kà ọ-Họ Kpa Kpịtịya nya Igu Ogbugbu nya ịKịrayịsị nya angị ka hụhụ yẹ ang ọlẹ kị juwa họ, ọọ-ka ri ịkaa bala ọ-nwa ere ka. Ị wụrụ angịlẹ kị la ẹhị ọrịrịị-rịrị nyọka hịhị ám̀ odehe wẹ ọ-Họ Kpa Kpịtịya nya Igu Ogbugbu nya ịKịrayịsị họhẹ-họhẹ la ẹka nya 1938. Ẹpwang ọ-Kụ Gbeji nya ahyẹẹnụ 1 nya Ọya Ọhata, 1938 yẹkẹẹ: “Ọ há bala ọ-chịla ká ogu ịkpịlọ ịkịla ka juwa ọọjịra-jịra ọwẹ bala ọ-ka yẹ ang ọlẹ kị ka họ ụ-ụwa. . . . Ọ chịla kọ ka ri ụka nya ọkẹkẹnị ọchịchị haa, ịnyị ọ tị kaa la ịlẹhị lẹ.” Jaabwọ kọ kaa kpụ angịlẹ kị diro wẹ ọhụhụ nya awụlẹ oyeye ịpyọ nyọka juwa i-ijata ja yẹ ang ọlẹ kị juwa họ, ịnyịnyị ọ kaa kpụ angịlẹ kị ri ogu ịkpịlọ ịkịla ịpyọ nyọka juwa ọ-ọtụguru nya ọ-Họ Kpa Kpịtịya nya Igu Ogbugbu nya ịKịrayịsị ja yẹ ang ọlẹ kị juwa họ ụ-ụwa lẹ.

7. Ịyẹ tị́ du ká angịlẹ kị ri ogu ịkpịlọ ịkịla kaa ya ẹhị rịrị gbe ẹla oyaya ọla ẹnụ nya ọ-Họ Kpa Kpịtịya?

⁷ Ogu ịkpịlọ ịkịla kaa me irya ju ẹhị ọrịrịị-rịrị nyaa ịnyịnyị. Ị kaa ya ẹhị rịrị gbe ẹla oyaya ọla ẹnụ nya ọ-Họ Kpa Kpịtịya nya Igu Ogbugbu nya ịKịrayịsị, chajị o-ya ẹla gụgụụgụ u-uhye nya ang ọlẹ ká ịKịrayịsị bala angịnyị ụnọ ohu da ụnọ iwo ine kụrụ ine (144,000) ịlẹ kị ka kpeji balọọ ka họ ha angịnyị ehe ịlẹ kị godayị  kpẹẹkpẹẹ, lụka nya Eji Ọkpakpa Ọlẹpwụ nya Ẹka Ụnọ. E-ekpeleji nya ịlahị ọkpakpa nya Adịrahụ nyaa iJisọsị ịKịrayịsị, angịkpeji ilepwoohe ịwẹ ka dụbwọ ya odehe ọlẹ kpátá ka ri ịParadayịsị bala ọ-ka họ ká angịnyị ehe wuu ka la kpẹẹkpẹẹ. Ọ ka kpịpyọ lụmẹ nya uku-ụnọ nya angịnyị ịlẹ kị juwa lụka nya ọ-Họ Kpa Kpịtịya ọwẹ nyọka juwa me irya ju ọmwụ ọyẹyẹ ịla ịBayịbụụ, lala ịlẹpwụ nya ụpwụ nya Ayịsaya 35:5, 6; 65:21-23; bala Ọwụrụụ-wụrụ 21:3, 4. Bwula ọ-kụ irya juwa ya ịlaa bala angị háaha ụ-ụwa odehe onyeewe, ị wẹẹ ju ẹhị ọrịrịị-rịrị nyaa chajị nya ijuju bala eje ọchịchị nyaa nyọka hwabwọ la ọ-gbịgba ha iJihova ẹnẹnẹhẹ ka ọngịrị.​—Mat. 24:13; Gal. 6:9.

8. Ịyẹ à tị́ ri ang ọkịla ọlẹ kọ du ká ogu ịkpịlọ ịkịla kaa kà ọ-Họ Kpa Kpịtịya?

⁸ Kụ ẹhị yẹ ang odudu ọkịla ọlẹ ká ogu ịkpịlọ ịkịla kaa kà ọ-Họ Kpa Kpịtịya nya Igu Ogbugbu nya ịKịrayịsị wẹẹ. Ị tịtọ nyọka mẹ ọháha nyaa jẹ ẹ-ẹga nya angịlẹ kị ya ida wụ́ bala ọ-mẹjẹ nyori ị tuubwu jwaa. ỊBayịbụụ ya neeji nyori angịlẹ kị ya ida wụ́ bala angịlẹ kị la ẹhị ọrịrịị-rịrị nyọka hịhị ám̀ odehe nyị ka wẹ ka yẹjula awụlẹ. Ányị ọ tị́ ka bwu lịnyị? Ahị kụ ẹhị yẹ ọ-chụ pwokwita ịmanyị-ịmanyị wẹẹ.

9. Ẹlịyẹ ọmwụ ọyẹyẹ ọlụpwụ nya ịSẹkaraya 8:23 à tị́ mẹjẹ u-uhye nya abwọlẹ ká ẹla nya angịlẹ kị ya ida wụ́ la ogu ịkpịlọ ịkịla?

⁹ Wa ịSẹkaraya 8:23. Ọmwụ ọyẹyẹ ọwẹ ya ẹla u-uhye nya abwọlẹ ká ẹla nya aanahị alẹng bala anyang ịlẹ kị ya ida wụ́ la ogu ịkpịlọ ịkịla. Omyi ẹla ọlẹ kọ ri, “ọla iJuu” bala “juwa tanụ” wẹẹ ya ẹla rụ́ ebwo nya angịnyị ookpokpo ịnyị​—angịlẹ kị ya ida wụ́. (Rom. 2:28, 29) “Angịnyị angị iwo ịlẹ kị bwu ẹpwụma bala epwoja ịkịla” ku ọmwakpa nya ogu ịkpịlọ ịkịla. Ị “yụbwọ chị”​—ya ịla chị ori ba angịlẹ kị ya ida wụ́, yẹjulaa ẹ-ẹpwụ nya ịgba ọgbagba ocheri-cheri. Lẹ, lodu nya ẹnụ ọ-Họ Kpa Kpịtịya nya Igu Ogbugbu nya ỊKịrayịsị, angịlẹ kị ri ogu ịkpịlọ ịkịla mẹjẹ nyori ị ya ịlaa chị ori ba angịlẹ kị ya ida wụ́ bwula o-juwa balaa.

10. Ẹlịyẹ iJihova à tị́ họ nyọka ha ọmwu ọyẹyẹ ọlụpwụ nya Isikẹlụ 37:15-19, 24, 25 jịra?

¹⁰ Wa Isikẹlụ 37:15-19, 24, 25. Nyọka ha ọmwụ ọyẹyẹ ọwẹ jịra, iJihova kpa angịlẹ kị ya ida wụ́ bala ogu ịkpịlọ ịkịla kaka yẹjula awụlẹ ụ-ụgbẹyị ọlẹ kị ka jẹ́-ẹ chị ebwo ẹnẹnẹhẹ ka. Ọmwụ ọyẹyẹ ọọwa ya ẹla u-uhye nya ekeji imiiye. Angịlẹ kị la ẹhị ọrịrịị-rịrị nyọka hịhị e-epwoohe lala “okoji nya iJuda” (imwawụ ọlẹ kị kaa chụ ọngọlẹ kọ ka ri adịrahụ nya ala Isirẹlụ bwu). Angịlẹ kị tị la ẹhị ọrịrịị-rịrị nyọka hịhị ám̀ odehe lala “okoji nya iFurem.” * IJihova ka ya ebwo nya angịnyị imiiye ịwẹ jula awụlẹ chajị kị ka wẹ ka ri “okoji ookpokpo.” Ọọwa ri, ị ka gbịgba lawụlẹ e-ekpeleji nya Adịrahụ ookpokpo, ịKịrayịsị iJisọsị. Ẹka ọnyị myị́ ọnyị, angịlẹ kị ya ida wụ́ bala ogu ịkpịlọ ịkịla á kaa kà ọ-Họ Kpa Kpịtịya nya Igu Ogbugbu nya ỊKịrayịsị lala ebwo nya angịnyị imiiye ka, ma ị kaa “yẹjula awụlẹ” e-ekpeleji nya “ọngọgbikpịlọ ookpokpo.”​—Jọn. 10:16.

11. Ányị “ịkpịlọ” ịlẹ kị gu ẹnyị ụ-ụpwụ nya ịMatiyu 25:31-36, 40 à tị́ mẹjẹ nyori ị tuubwu yi anyadịda nya ịKịrayịsị?

¹¹ Wa ịMatiyu 25:31-36, 40. “Ịkpịlọ” ịla oja ọ-chụ pwokwita ọwẹ ku ọmwakpa nya angịlẹ kị la ẹhị ọrịrịị-rịrị nyọka hịhị ám̀ odehe kọ ri, ogu ịkpịlọ ịkịla. Ị kaa tuubwu yi angị ihihi nya angịlẹ kị ya ida wụ́ bwula ọ-daa ụbwọ họ ụkụrwọ ọtụka ọlẹ kọ baba yẹẹyẹẹ kọ ri, ẹru ọnyịịla ọ-kpa pyẹ chị odehe ọnụ wuu bala ọ-họ ká angịkịla ka ri angịjụgbẹyị.​—Mat. 24:14; 28:19, 20.

12-13. Agbẹyị ịkịla iyina angịlẹ kị ri ogu ịkpịlọ ịkịla à tị́ mẹjẹ nyori ị tuubwu yi anyadịda nya ịKịrayịsị?

¹² Ẹka ọnyị myị́ ọnyị, epwihi ịmanyị-ịmanyị ene nya ahyẹẹnụ nya ọ-Họ Kpa Kpịtịya nya  Igu Ogbugbu nya ỊKịrayịsị, angịlẹ kị ri ogu ịkpịlọ ịkịla kaa mẹjẹ nyori ị tuubwu yi anyadịda nya ịKịrayịsị bwula ọ-la ọgaga ẹ-ẹpwụ nya ẹrụ ọnyịịla ọ-kpa pyẹ ọdatị nyọka wụrụ angịnyị wẹ ọ-Họ Kpa Kpịtịya ọwẹ. (Yẹ akpa ọlẹ, “ À Juwa Nwụlanọ Gbe Ụka nya ọ-Họ Kpa Kpịtịya?”) Ịnyịnyị, ị kaa nwụla ang myị́ ang ọlẹ kọ baba nọ, chajị kị ka jẹ́-ẹ họ ọ-Họ Kpa Kpịtịya nya Igu Ogbugbu nya ỊKịrayịsị ọọjịra-jịra ọnyị myị́ ọnyị odehe wuu, nanana nyori ọjịra-jịra lụmẹ-lụmẹ á kaa la ọngọngọhẹ ọlẹ kọ kaa ri ịkaa bala ọ-nwa ere ka. Ọ kaa kpụ angịlẹ kị ri ogu ịkpịlọ ịkịla ịpyọ nyọka tuubwu yi anyadịda nya ịKịrayịsị a-agbẹyị ịwẹ. Ịkpịlọ ịwẹ jẹ́ nyori iJisọsị kaa yẹ ang myị́ ang ọlẹ kị họ ha anyadamwụ ịlẹ kị ya ida wụ́ lala o-ri ọwa ayịdang ị wẹẹ họ ang ọọwa ha lẹ.​—Mat. 25:37-40.

¹³ Ịyẹ à tị́ ri ang ịkịla ịlẹ kị du kahị kaa kà ọ-Họ Kpa Kpịtịya nya Igu Ogbugbu nya ỊKịrayịsị, jaabwọ myị́ abwọ ká ẹhị ọrịrịị-rịrị nyahị la?

14. Ányị iJihova bala iJisọsị à tị́ me ọháha ọtụka jẹ ẹ-ẹga nyahị?

¹⁴ Ọháha ọlẹ ká iJihova bala iJisọsị mẹjẹ ẹ-ẹga nyahị myịhị lẹhị. IJihova mẹ ọháha nyamwụ jẹ ẹ-ẹga nyahị a-agbẹyị lụmẹ-lụmẹ, ma ọhẹ lẹpwụ nyaa gụ ịkịla wuu. Ohe Oluhye nyahị mẹ ọháha ọtụka jẹ bwula ọ-ya ọnyị ọlịkẹjẹ nyamwụ du ẹrụ warị ka gbu chajị nyahị. (Jọn. 3:16) IJisọsị ịnyịnyị mẹ ọháha ọtụka jẹ bwula ọ-myị ọnụ nya o-hu ọhịhị nyamwụ ha chajị nyahị. (Jọn. 15:13) Áhị ka jẹ́-ẹ nwụ iJihova bala iJisọsị uri nya ọháha ọlẹ kị mẹjẹ ẹ-ẹga nyahị ẹnẹnẹhẹ ka. Ma, ahị ka jẹ́-ẹ mẹjẹ nyori ẹla nyaa myịhị lẹhị bwula abwọlẹ áhị kaa hị ẹnụ myị́ ẹnụ. (Kol. 3:15) Ịnyịnyị, ahị kaa kà ọ-Họ Kpa Kpịtịya nya Igu Ogbugbu nya ịKịrayịsị chajị kahị ka kpịtịya nya ọháha nyaa ẹ-ẹga nyahị bala ọ-ka mẹ ọháha ọlẹ kahị la haa jẹ.

15. Ịyẹ tị́ du ká āhị nya ọ-ra kpehe ju angịlẹ kị ya ida wụ́ bala ogu ịkpịlọ ịkịla apyobwuna yẹẹyẹẹ?

¹⁵ Āhị nya ọ-ra kpehe juhi apyobwuna yẹẹyẹẹ. (Mat. 20:28) Āhị nya ọ-ra kpehe ju angịlẹ kị ya ida wụ́ apyobwuna yẹẹyẹẹ, chajị ọ họ ká ẹhị ọrịrịị-rịrị nyaa chịkpẹẹ. IJihova waa nya alabwẹla ọnyịịla bala ọ-yaa myị nya anyị nyamwụ chajị nya ọmyịmyị ọlala nyaa ẹ-ẹga nya iya ọkịlaakịla nya ịKịrayịsị. (Rom. 5:1; 8:15-17, 23) Āhị nya ọ-ra kpehe myị angịlẹ kị ri ogu ịkpịlọ ịkịla lẹhị ịnyịnyị. Bwula ọmyịmyị ọlala nyaa ẹ-ẹga nya iya ọkịlaakịla nya ịKịrayịsị, ị la cheri-cheri ị-ịlahị nya Ohe Oluhye, ka jẹ́-ẹ myị ẹrụ họọ, bala ọ-la ẹhị ọrịrịị-rịrị nyọka be bwu ‘akama ọtụka okpelego.’ (Ọwụ. 7:13-15) Ụgbẹyị ọhẹ ọlẹ ká angịlẹ kị ya ida wụ́ bala ogu ịkpịlọ ịkịla ka mẹjẹ nyori āhị nya ọ-ra kpehe myaa lẹhị ri ọ-ka juwa lụka nya ọ-Họ Kpa Kpịtịya nya Igu Ogbugbu nya ịKịrayịsị ẹka myị́ ẹka.

16. Ịyẹ à tị́ ri ang ọkịla ọlẹ kọ du kahị kaa kà ọ-Họ Kpa Kpịtịya?

¹⁶ Ang odudu ọkịla ọlẹ kahị kaa kà ọ-Họ Kpa Kpịtịya nya Igu Ogbugbu nya ịKịrayịsị ri, ahị tịtọ nyọka ju ihi nya iJisọsị. Kori ká ẹhị ọrịrịị-rịrị nyahị á ri ọ-ka hịhị e-epwoohe lee ám̀ odehe wẹwẹ, ọng myị́ ọng nyahị baba nyọka ju ihi nya ehile nya iJisọsị ọlẹ kọ da lodu nya ẹnụmwụ ọlẹ kọ ya ọhọhọ nya ọ-Họ Kpa Kpịtịya nya Igu Ogbugbu Nyamwụ yeji. Ọ yẹkẹẹ: “Anụ́-ụ juwa ri ang oriri . . . ọlẹ ịnyịnyịịnyị, nya o-juwa kpa kpịtịya nyam mẹ.”​—1 Kọr. 11:23, 24.

17. Ányị ọ-Họ Kpa Kpịtịya nya Igu Ogbugbu nya ỊKịrayịsị à tị́ kaa tụ́ụhị ju iJihova chwẹẹ?

¹⁷ Ahị kaa tụ́ ju iJihova chwẹẹ. (Jem. 4:8) Jaabwọ ọlẹ kahị jẹ́, ọ-Họ Kpa Kpịtịya nya Igu Ogbugbu nya ỊKịrayịsị kaa ya iwe hahị nyọka  me irya ju ẹhị ọrịrịị-rịrị ọlẹ ká iJihova ya hahị bala ọháha ọtụka ọlẹ kọ mẹjẹ ẹ-ẹga nyahị. (Jer. 29:11; 1 Jọn. 4:8-10) Ụka kahị juwa kụ irya ju ẹhị ọrịrịị-rịrị ọlẹ kahị la chajị nya ijuju bala ọháha o-gbu enyi-ka nya Ohe Oluhye ẹ-ẹga nyahị, ọháha nyahị ẹ-ẹga nya iJihova kaa la kpori-kpori gụ ọwọwa. Ịnyịnyị, ọ kaa ju igu oriri nyahị balọọ ọngịrị.​—Rom. 8:38, 39.

18. Ányị ọ-me irya ju ọgụ-ẹpẹte nya iJisọsị à tị́ ka guhi gbịla nyọka họ?

¹⁸ Ọ kaa guhi gbịla nyọka ba ọgụ-ẹpẹtẹ nya iJisọsị jẹ. (1 Pit. 2:21) Ahyẹẹnụ ịmanyị-ịmanyị ene nya ọ-Họ Kpa Kpịtịya nya Igu Ogbugbu nya ịKịrayịsị, ahị kaa wa ịBayịbụụ ịlẹ kị ya ẹla u-uhye nya epwihi ohyẹẹkpẹ nya ọhịhị nya iJisọsị olodehe, igu ogbugbu nyamwụ, bala o-wuleji bwula igu nyamwụ. Ịnyịnyị, lobyi nya ahyẹẹnụ nya ọ-Họ Kpa Kpịtịya nya Igu Ogbugbu nya ịKịrayịsị, ahị kaa wo ẹla oyaya ọlẹ kọ kaa kpụhị ịtịya nya ọháha nya iJisọsị. (Efe. 5:2; 1 Jọn. 3:16) Jaabwọ ọlẹ kahị juwa wa oja nya ọháha ọlẹ ká iJisọsị mẹjẹ bala ọ-me irya jwoo, ọọwa ka guhi gbịla nyọka “họ jaabwọ ká ọwa ayịdang họ ịnyịnyị.”​—1 Jọn. 2:6.

19. Ányị ahị tị́ ka godayị ẹ-ẹpwụ nya ọháha nya Ohe Oluhye?

¹⁹ Eje ọchịchị nyahị nyọka godayị ẹ-ẹpwụ nya ọháha nya Ohe Oluhye kaa la ọngịrị gụ ọọwa. (Jud. 20, 21) Ahị mẹjẹ nyori ahị godayị ẹ-ẹpwụ nya ọháha nya Ohe Oluhye bwula o-ju ihi nyamwụ, chị ịgọgọ ju ẹnyị nyamwụ, bala ọ-họ kọ ka chị ọkẹkẹnị. (Etu 27:11; Mat. 6:9; 1 Jọn. 5:3) Ọ-họ Kpa Kpịtịya nya Igu Ogbugbu nya ịKịrayịsị kaa ju eje ọchịchị nyahị ọngịrị nyọka hịhị ẹnụ myị́ ẹnụ ụ-ụgbẹyị ọlẹ kọ ka mẹjẹ iJihova nyori, ‘M̀ tịtọ nyọka godayị ẹ-ẹpwụ nya ọháha nyang pyịyọọ!’

20. Ịyẹ à tị́ ri ang odudu ịlẹ kahị kaa kà ọ-Họ Kpa Kpịtịya nya Igu Ogbugbu nya ịKịrayịsị?

²⁰ Kori ká ẹhị ọrịrịị-rịrị nyahị-ị́ ri ọ-ka hịhị e-epwoohe lee ám̀ odehe, ahị la ang odudu ọlẹ kahị kaa kà ọ-Họ Kpa Kpịtịya nya Igu Ogbugbu nya ịKịrayịsị. Ụka kahị tụguru ẹka ọnyị myị́ ọnyị la ahyẹẹnụ ọwẹ, ahị wẹẹ kpịtịya nya igu ogbugbu nya ọngọ háahị há, iJisọsị ịKịrayịsị. Ọlẹ kọ tị gụgụ wuu, ahị wẹẹ kpịtịya nya ọháha ọtụka ọlẹ ká iJihova mẹjẹ ẹ-ẹga nyahị bwula o-hu Ọnyị nyamwụ ha nyọka rahị gba kpehe. La ẹka ọlẹ, ọ-Họ Kpa Kpịtịya nya Igu Ogbugbu nya ịKịrayịsị ka ri ẹnụ nya ịFụrayịdee, Ahyẹẹnụ 15 nya Ọya Ohene, 2022. IJihova bala iJisọsị háahị yẹẹyẹẹ, lẹ la ahyẹẹnụ nya ọ-họ kpa kpịtịya nya igu ogbugbu nya iJisọsị, ịngịngịhyẹ-ẹ́ ka báahị ba gụ ọ-ka juwa ọ-ọtụguru ọwẹ ka.