ANG ỌJẸ́JẸ 4
IJihova kaa Wahị Kụrụ Aga Ọmama Nyahị Nyọka Họ ọ-Họ Kpa Kpịtịya
“Anụ́-ụ juwa ri ang oriri ọlẹ ịnyịnyịịnyị, nya ọ-kpa kpịtịya nyam mẹ.”—LUK. 22:19.
EJE 19 The Lord’s Evening Meal
ẸHỊ NYA ẸLA a
1-2. Ịyẹ tị́ du kahị kaa kà ọ-Họ Kpa Kpịtịya ẹka ọnyị myị́ ọnyị?
LALA ẹka 2,000 kam kẹkpẹ, iJisọsị ya ọhịhị nyamwụ kiliya chajị nyahị, ọlẹ kọ wụrụ ụgbẹyị da hahị nyọka ye ọhịhị ọmyịmyị-kạ. Lodu ene nya ahyẹẹnụ ọlẹ kọọ gbu, iJisọsị da angị bọọ jẹ ehile nyọka kpịtịya nya ọhịhị nyamwụ ọlẹ kọ ya kiliya bwula ọ-kpa ịkaa bala ere họ ọhọhọ o-pwee ọhẹ.—1 Kọr. 11:23-26.
2 Ahị kaa kpa ehile nya iJisọsị chajị ọ háahị yẹẹyẹẹ. (Jọn. 14:15) Lụka nya ọ-Họ Kpa Kpịtịya ọla ẹka ọnyị myị́ ọnyị, ahị kaa mẹjẹ nyori ang ọlẹ ká iJisọsị họ hahị myịhị lẹhị bwula ọ-kpa ụka nyahị kụ irya bala ọ-raabwọ u-uhye nya ang ọlẹ ká igu ogbugbu nyamwụ ri ha angịnyị ehe. Ịnyịnyị ahị kaa họ gụ ọọwa ẹ-ẹrụ ọnyịịla ọ-kpa pyẹ bwula ọ-wụrụ angịnyị jaabwọ kahị ka jụ họ ba myị́ nyọka yẹjulahị họ ọhọhọ ọwẹ. Ịnyịnyị, áhị ka myị ịngịngịhyẹ ka huhi abwọ la ọ-ka ka ọ-Họ Kpa Kpịtịya ka.
3. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?
3 A-ang ọjẹ́jẹ ọlẹ, ahị ka kụ ẹhị yẹ agbẹyị ịta ịlẹ ká angịnyị nya iJihova kaa maga la ọngịrị nyaa wuu nyọka họ ọ-Họ Kpa Kpịtịya nya igu nya iJisọsị: (1) bwula ọ-ba ọgụ-ẹpẹtẹ ọlẹ ká iJisọsị ya deeji jẹ, (2) bwula ọ-wụrụ angịkịla wẹ ọ-Họ Kpa Kpịtịya, bala (3) o-kaa họ ọ-Họ Kpa Kpịtịya ẹ-ẹpwụ nya iwe-ahụrụ ilujwo.
ỌGỤ-ẸPẸTẸ ỌLẸ KÁ IJISỌSỊ YA DEEJI Ọ-BA JẸ
4. Ịtọ ẹla iyina ị tị́ kaa wẹ ụka nya ọ-Họ Kpa Kpịtịya ẹka ọnyị myị́ ọnyị? Ịyẹ tị́ du kahị ka ya ẹhị da ọwẹwẹ nya ịtọ ẹla ịịwa bwee ka? (ILuku 22:19, 20)
4 Ẹka ọnyị myị́ ọnyị lụka nya ọ-Họ Kpa Kpịtịya, ahị kaa ke ụrụ wo ẹla oyaya bwu ịBayịbụụ ọlẹ kọ kaa wẹ ịtọ ẹla lụmẹ-lụmẹ. Ahị jẹ́ ang u-uhye nya ang odudu ọlẹ ká angịnyị ehe baba nya ọ-ra kpehe bala abwọlẹ ká igu nya ọngọ okpokpo ka jẹ́-ẹ hụ́ ịhọbịrị nya iru nya angịnyị. Ị kaa kpụhị ịtịya nya ang ọlẹ ká ịkaa bala ere ku ọmwakpa bala angịlẹ kị ka ri ịkaa bala ọ-nwa ere ọọwa. (Wa iLuku 22:19, 20.) Ịnyịnyị ahị kaa me irya ju ahị ọwawa ịlẹ kị nụwa gbe angịlẹ kị la ẹhị ọrịrịị-rịrị nyọka hịhị gboyi myị́ oyi odehe ọlẹ. (Ayị. 35:5, 6; 65:17, 21-23) Ahị ya ẹhị da ẹlịlẹhị ịwẹ bwee ka. Uku-ụnọ ịmanyị tị́ nya angịnyị á jẹ́ ẹla ịwẹ ka, ị́ tị jẹ́ apyobwuna nya iya ọkịlaakịla nya iJisọsị ka. Ịnyịnyị ị́ kaa họ ọ-Họ Kpa Kpịtịya nya igu nyamwụ jaabwọ kọ byi angị bọọ jẹ nyị họ ka. Ịyẹ tị́ du kọọ lịnyị?
5. Ányị angịnyị à tị́ dọmwụ nyọka họ ọ-Họ Kpa Kpịtịya nya igu nya iJisọsị nyọlẹ ká iru nya alẹrụ nya ịKịrayịsị gbu kpá?
5 Ahyaahị nyọlẹ ká iru nya alẹrụ nya iJisosi gbu kpá, Angịnyị nya ịKịrayịsị nya ịnịịkịla dọmwụ nyọka jụ wẹ ẹpwụ nya ọjịra-jịra. (Mat. 13:24-27, 37-39) Ị ya “ala ị-pyị anyoko dodehe, chajị kị ka juwa gbile angịhyẹ ba ịlaa rụ hi ẹla nya ịlẹhị.” (Ụkụr. 20:29, 30) Ọhẹ lẹpwụ nya “ala ị-pyị anyoko” ịlẹ ká Angịnyị nya ịKịrayịsị nya ịnịịkịla ịwẹ kaa mẹjẹ ri, iJisọsị nyị́ hu ịnyịrọ nyamwụ ha “lụka ookpokpo wọnụ nya ịhọbịrị nya iru nya angịnyị ehe wuu ju,” jaabwọ ká ịBaybụụ ya ka, ma nyị baba nyọka ma iya ọkịlaakịla nyamwụ họ mwụba-mwụba. (Hib. 9:27, 28) Alẹ, iru nya angịnyị myị ju ọmẹjẹ nya ọnọọkịla ọwẹ. Ị kaa tụguru ị-ịchọọchị epwihi ọnyị myị́ ọnyị, ọ dọmwụ kaa ri ahyẹẹnụ ọnyị myị́ ọnyị ụka ọhẹ, nyọka họ ọ-họ kpa kpịtịya nya iya ọkịlaakịla nya iJisọsị, ọlẹ ká ịchọọchị nya ịfada wụrụ nya “Iya Ọkịlaakịla nya Alụma.” b Ala ịgba ịgbagba ịkịla kaa họ ọ-họ kpa kpịtịya nya igu nya iJisọsị hi iwe da chẹẹ, ma ị́ tị jẹ́ etu nya ang ọlẹ ká iya ọkịlaakịla nya iJisọsị ri kpangga ka. Angịhyẹ ka kụ irya myị́, ‘Igu nya iJisọsị ka jẹ́-ẹ họ m ka ye ọhịnyọhi nya ịhọbịrị nyam ịlẹhị?’ Ịyẹ tị́ du kị kaa tọ ịtọ ẹla ọwẹ? Chajị angịhyẹ pịraa ju nyori igu nya iJisọsị nyị́ ka jẹ́-ẹ họ chịkpẹẹ myị́ ahị nyị ka ye ọhịnyọhi nya ịhọbịrị nyahị ka. Ányị angịlẹ kị kaa ba iJisọsị jẹ nyịlẹhị à tị́ da angịnyị ụbwọ nyọka jẹ́ etu nya iya ọkịlaakịla nya iJisọsị bala abwọlẹ kị ka họ ọ-họ kpa kpịtịya nya igu nyamwụ?
6. La ẹka nya 1872, ẹlịyẹ ebwo nya angị wụla ịBayịbụụ yẹ ịhyẹ à tị́ wẹ ka jẹ́?
6 La ẹka nya 1870, ebwo nya angị wụla ịBayịbụụ yẹ ịlẹ ká Charles Taze Russell ri ọngọ kụ ịlahị nyaa, dọmwụ nyọka jẹ́ ang bwu ịBayịbụụ kpori-kpori. Ị tịtọ nyọka jé ang ọlẹ kọ ri etu nya iya ọkịlaakịla nya iJisọsị bala abwọlẹ kị ka họ ọ-họ kpa kpịtịya nya igu nyamwụ. La ẹka nya 1872, ị wẹ ka jẹ́ bwu ịBayịbụụ nyori iJisọsị nyị gbu igu wọnụ nya angịnyị ehe wuu ju. Ị́ ya ẹla ọlẹ kị jẹ́ tu ịlaa ka. Ọkọkọ nya ọọwa, ị kpa ẹla ọọwa pyẹ ebile bwula apwụ ụma ịdatị-datị. Ịnyịnyị, ị dọmwụ nyọka ta awụlẹ ụka ookpokpo ẹ-ẹpwu nya ẹka nyọka họ ọ-Họ Kpa Kpịtịya lala Angịnyị nya ịKịrayịsị ịla oyi ọhọhẹ.
7. Ányị ahị tị́ wẹẹ ye apyobwuna bwu ẹla ịlẹ ká angị wụla ịBayịbụụ yẹ jẹ́ ang u-uhye nyaa la ẹka lụmẹ-lụmẹ kẹkpẹ?
7 Alẹ, ahị wẹẹ ye apyobwuna bwu ẹla ịlẹ ká Angịnyị nya ịKịrayịsị ịwẹ jẹ́ ang u-uhye nyaa la ẹka lụmẹ-lụmẹ kẹkpẹ. Ụ-ụgbẹyị oyina tị́? IJihova dahị ụbwọ nyọka jẹ́ etu nya iya ọkịlaakịla nya iJisọsị bala ang ọlẹ kọ ka họ hahị bala angịnyị ehe wuu. (1 Jọn. 2:1, 2) Ịnyịnyị, ahị jẹ́ bwu ịBayịbụụ nyori ẹhị ọrịrịị-rịrị imiiye juwa ha angịnyị ehe ịlẹ kị họ ẹla kpụ Ohe ịpyọ. Angịhyẹ ka ye ọhịhị ọmyịmyị-ka e-epwoohe, uku ịmanyị tị́ nya angịnyị ịkịla ka ye ọhịhị ọmyịmyị-ka ám̀ odehe. Ahị kaa tụ ju Ohe Oluhye chwẹẹ jaabwọ kahị wẹẹ kụ ẹhị yẹ ụma nya ọháha ọlẹ kọ la ẹ-ẹga nyahị bala abwọlẹ kaahị lịlọhị bwu yé apyobwuna bwu iya ọkịlaakịla nya iJisọsị. (1 Pit. 3:18; 1 Jọn. 4:9) Lẹ, lala aanahị ị-chịla o-hu ọkịlẹtụ ha ịlụka ọkẹkpẹ, ahị kaa wụrụ angịkịla nyọka yẹjulahị họ ọ-Họ Kpa Kpịtịya la ụgbẹyị ọlẹ ká iJisọsị mẹjẹ angịjụgbẹyị nyamwụ nyọka họ.
ANGỊKỊLA Ọ-WỤRỤ WẸ Ọ-HỌ KPA KPỊTỊYA
Ịyẹ a tị́ ka họ nyọka jẹ́-ẹ ya ụbwọ ju ụkụrwọ nya angịnyị ọ-wụrụ wẹ ọ-Họ Kpa Kpịtịya yẹẹyẹẹ? (Yẹ ọgba 8-10) e
8. Ịyẹ Alibeenu nya iJihova à tị́ họ nyọka wụrụ angịkịla wẹ ọ-Họ Kpa Kpịtịya? (Yẹ ifoto.)
8 Alibeenu nya iJihova kaa wụrụ angịnyị wẹ ọ-Họ Kpa Kpịtịya ẹ-ẹpwụ nya ẹka lụmẹ-lụmẹ lẹ. La ọmwụ ọdada nya 1881, ẹla o-ya dodehe ọhẹ bwu Ẹpwang ọ-Kụ Gbeji wụrụ aanahị alẹng bala anyang nyọka tọ awụlẹ ẹ-ẹpwa nya ọọnahị ọhẹ e-epweji nya Allegheny, Pennsylvania, nyọka la ọhụhụ ọdatị ọwẹ. Ị-ịlahị nya ọọwa, alọjịra-jịra ọnyị myị́ ọnyị kaa họ la ịlaa. La Ọya Ọhata nya 1940, ị byi aanahị nyori nyị ka jẹ́-ẹ wụrụ ọng myị́ ọng ọlẹ kọ myọnụ nyọka wẹ bwu oye nyaa myị́. La 1960 Egbeju Ẹpwa à ha apwụ ị-kpa wụrụ angịnyị wẹ ọ-Họ Kpa Kpịtịya ha alọjịra-jịra họhẹ-họhẹ lẹ. Bwu ụka ọwẹ daalẹ, apwụ ị-kpa wụrụ angịnyị wẹ ọ-Họ Kpa Kpịtịya ịlẹ kahị ya ha angịnyị la uku-ụnọ ịmanyị tị́ lẹ. Ịyẹ tị́ du kahị kaa maga pwụ ọlịịwẹ nyọka wụrụ angịkịla?
9-10. Owo à tị́ kaa yé apyobwuna nyọlẹ kahị kaa maga nyọka wụrụ angịkịla wẹ ọ-Họ Kpa Kpịtịya? (ỊJọn 3:16)
9 Ịngịhyẹ ọlẹ kọ du kahị kaa wụrụ angịkịla wẹ ka julahị ụka nya ọ-Họ Kpa Kpịtịya ri ahị tịtọ ká angị inyeewe ịlẹ kị wẹ, ka jẹ́ ang ọlẹ ká iJihova bala iJisọsị họ hahị. (Wa ịJọn 3:16.) Ahị ọdahile nyahị ri, ẹla ọlẹ kị yẹ bala owowo ụ-ụwa ka gwaa gbịla nyọka wẹ ka ri anchẹ nya iJihova. Ma angịkịla tị kaa yé apyobwuna kpịlọ ịnyịnyị.
10 Ahị kaa wụrụ angịlẹ kị hwabwọ la ọ-gbịgba ha iJihova ịnyịnyị. Ahị kaa họ ịnyị nyọka kpaa ịtịya nyori Ohe la ọháha ẹ-ẹga nyaa wẹẹ. Iru nyaa kaa ye myị, ahị tị kaa chị ọkẹkẹnị yẹẹyẹẹ nyọka yaa. Ụka kị wẹ ọ-Họ Kpa Kpịtịya, ị kaa kpịtịya nya abwọlẹ ká ịgba ọgbagba nya iJihova kaa kpaa ịpyọ kaka ba lụka ọkẹkpẹ. Kụ ẹhị yẹ oja nya Monica lẹẹ wẹẹ. c Ị dọọ ụbwọ wẹ ka ri ọngọ kpa ẹrụ ọnyịịla pyẹ myị́myị́ lụka ká ẹdụrụ nya COVID-19 kpehe ẹ-ẹga wuu. Nyọlẹ kọ wẹ ọ-Họ Kpa Kpịtịya la ẹka nya 2021, ọ yẹkẹẹ: “Ọ-Họ Kpa Kpịtịya ọlẹ datị ẹ-ẹga nyam. Ọlẹ ri ụka ọhọhẹ ẹ-ẹpwụ nya ẹka 20 kam jẹ́ ya ẹla nya Ohe je angịnyị bala ọ-wụraa wẹ ọ-Họ Kpa Kpịtịya. M̀ maga la ọngịrị nyam wuu nyọka wụrụ angịnyị chajị ang ọlẹ ká iJihova bala iJisọsị họ myịm lẹhị yẹẹyẹẹ.” (Eje. 103:1-4) Ó ri ká angịnyị á myị wẹ lee ị́ wẹwẹ ka, ahị kaa maga jaabwọ kahị ka họ ba myị́ nyọka wụraa wẹ ọ-Họ Kpa Kpịtịya, chajị ahị jẹ́ nyori aga ọmama nyahị kaa kpụ iJihova ịpyọ.
11. Ányị iJihova à tị́ bwu wahị kụrụ aga ọmama nyahị nyọka wụrụ angịnyị wẹ ọ-Họ Kpa Kpịtịya? (ỊHagayị 2:7)
11 IJihova wahị kụrụ aga ọmama nyahị nyọka wụrụ angịnyị wẹ ọ-Họ Kpa Kpịtịya. La 2021, nanana nyori ẹdụrụ nya COVID-19 ọlẹ kọ kpehe wu ang lụmẹ-lụmẹ kpa, angịlẹ kị wẹ ọ-Họ Kpa Kpịtịya la angị 21,367,603. Ọwẹ ja ka lala ụmụmẹ nya Alibeenu nya iJihova ụka imiiye bẹhya chị odehe ọnụ lẹ! Ẹlịlẹhị tị ri, i-iru ojuju nya angịnyị iJihova à kaa yẹ kem ka. Ọ kpa ọng myị́ ọng ọlẹ kọ wẹ i-irya ịnyịnyị. (Luk. 15:7; 1 Tim. 2:3, 4) Ahị jẹ́ myị̀myị̀ nyori iJihova kaa dahị ụbwọ nyọka yé angịlẹ kị la ọkịlẹtụ ọnyịịla bwula ụkụrwọ nya angịnyị ọwụrụ-wụrụ.—Wa ịHagayị 2:7.
AHỊ KAA HỌ Ọ-HỌ KPA KPỊTỊYA ỤKA KÁ IWE-AHỤRỤ Á DỌMWỤ LUJWO
IJihova kaa wahị kụrụ aga ọmama nyahị nyọka họ ọ-Họ Kpa Kpịtịya (Yẹ ọgba 12) f
12. Ịyẹ à tị́ ka du kọ ka lujwo hahị nyọka họ ọ-Họ Kpa Kpịtịya myị́? (Yẹ ifoto.)
12 IJisọsị ya neeji nyori la ahyẹẹnụ ihyẹẹkpẹ, ahị nyị ka chịpwụrụ bwu ẹpwụ nya iwe-ahụrụ ilujwo lala alugbiyegu ọ-myị hahị ka, ọtụpyịpyị, ẹwụ ọdada, ẹdụrụ ọjụjụ, bala ang ịkịla lụmẹ-lụmẹ. (Mat. 10:36; Mak. 13:9; Luk. 21:10, 11) Ụka ọhẹ, iwe-ahụrụ ịlịịwẹ du kọ kaa lujwo hahị nyọka họ ọ-Họ Kpa Kpịtịya nya igu nya iJisọsị. Ịyẹ aanahị alẹng bala anyang à tị́ kaa họ nyọka kụrụ akama ịlịnyị? Ányị iJihova à tị́ kaa bwu daa ụbwọ?
13. Ányị iJihova à tị́ wahị kụrụ ugbodu ojuju nya Artem bala eje ọchịchị nyamwụ nyọka họ ọ-Họ Kpa Kpịtịya u-ube nya agba?
13 Ube nya agba. Aanahị ịlẹ kị juwa u-ube nya agba chajị nya ọmyịmyị nyaa kaa maga jaabwọ kị ka họ nyọka họ ọ-Họ Kpa Kpịtịya nya igu nya iJisọsị. Kụ ẹhị yẹ oja nya Artem lẹẹ wẹẹ. Ị woo ju agba ene nya ẹnụ nya ọ-Họ Kpa Kpịtịya nya igu nya iJisọsị ọla ẹka nya 2020. Ube ọọwa byẹhị, angịnyị lala angị ịrụ ị kaa ya juwa ụka ookpokpo lẹ. Nanana nyori ọ juwa u-ube nya agba, ọ jẹ́ maga kpụ o yé ang-abwọ ịlẹ kọ ka kpa họ ịkaa nya ọ-Họ Kpa Kpịtịya, ọ tị nwụlanọ nyọka ya ẹla dodehe bwu ịBayịbụụ ha ịlọmwụ ịnyịnyị. Ma angịkịla ịlẹ kị juwa u-ube nya agba ọlẹ kọ ji kaa nwà ẹchụ bala o-dido kpoye. Ányị ọ tị́ ka họ? O me balaa kori kị ka myị-ị̀ hwabwọ la ẹchụ ọnwànwa bala ido ododo ẹ-ẹpwụ nya awa ookpokpo kem myị́. Ọ la Artem ẹbyẹbyị nyọlẹ kị myị nyori ịwa nyị ka hwabwọ lụka nya ọ-Họ Kpa Kpịtịya. Artem yẹkẹẹ: “M̀ byaa nyori m̀ ka ya ẹla u-uhye nya ọ-Họ Kpa Kpịtịya ọwẹ jaa.” Ịnọ ị ya ịwa nyị́ tịtọ nyọka ke ụrụ wo ẹla nya ọhọhọ ọwẹ ka, ma nyọlẹ kị yẹ jaabwọ ká Artem họ ọ-Họ Kpa Kpịtịya wuu lẹ, ị tọọ ịtọ ẹla u-uhye nyamwụ lẹlẹ.
14. Ányị angịnyị nya iJihova à tị́ bwu họ ọ-Họ Kpa Kpịtịya nya igu nya iJisọsị ụka ká COVID-19 pyẹ ẹ-ẹga wuu?
14 Ẹdụrụ nya COVID-19. Ẹdụrụ ọwẹ du ká anchẹ nya iJihova á jẹ́ tụguru ọlam-ọlam nyọka họ ọ-Họ Kpa Kpịtịya nya igu nya iJisọsị ka. Ma ọọwa á hwaa abwọ hi ọhọhọ ọwẹ gbang-gbang ka. d Alọjịra-jịra ịlẹ ká Intanẹtị ọla oye nyaa la ọngịrị yẹẹyẹẹ tọ awụlẹ ọ-ọhụ lụka nya ọ-Họ Kpa Kpịtịya ọwẹ. Ma uku ịmanyị tị́ nya angịkịla ịlẹ kị tị la iwe nya Intanẹtị ka bẹẹ? Ẹ-ẹpwụma ịhyẹ, egbeju ẹpwa họ ọ chịkpẹẹ ká angịnyị ka jẹ́-ẹ ke ụrụ wo ẹla oyaya ọwẹ bwula ọ-yọọ bwu ifim lee o-wo bwu irediyo. Da ọọwa u-uhye, egbeju ẹpwa maga kpụ ị kịla ẹla oyaya ọwẹ ju la ìja kpoye nya 500 chajị ká angịlẹ kị ji ẹga ọ-lụrụ ka jẹ́-ẹ họ ọ-Họ Kpa Kpịtịya ịnyịnyị. Ọọwa aanahị à kpa ẹla ọ-kịla ju ọọwa kịla aanahị ịlẹ kị baba nyamwụ lẹlẹ.
15. Ẹlịyẹ a tị́ jẹ́ bwu oja nya Sue, kọ ri ọngọ wẹẹ jẹ́ ịBayịbụụ?
15 Ọtụpyịpyị ọla ugbiyegu. Ẹ-ẹga nya angịhyẹ, ọtụpyịpyị ọla ugbiyegu à kaa ri akama nyaa gụgụ wuu ẹ-ẹga nyọka họ ọ-Họ Kpa Kpịtịya lẹ. Kụ ẹhị yẹ oja nya Sue, kọ ri ọngọhẹ ọlẹ kị wẹẹ jẹ́ ịBayịbụụ ta wẹẹ. La ahyẹẹnụ ọlẹ kọ jene nya ọ-Họ Kpa Kpịtịya ọla ẹka nya 2021, Sue byi ọngọ kaa mẹ ịBayịbụụ jọ́ọ nyori ọwa nyị́ ka jẹ́-ẹ họọ myị́ ka ọọlajị nya ọtụpyịpyị ọla ugbiyegu. Ọngọ mẹ ịBayịbụụ jọ́ọ wa iLuku 22:44. Ọọwa ọ da ẹla ọlụwa wụlẹ joo nyori ụka kahị nyị́ la akama, ahị nyị baba nyọka dịrẹ ọgụ-ẹpẹtẹ nya iJisọsị bwula ọ-ya ẹla ọọwa ju iJihova ẹ-ẹpwụ nya abwọ ọrịrị bala ọ-dahịhilọọ. Ahị ọpyẹpyẹ nyamwụ, Sue nwụla ịkaa bala ere nọ bala ọ-ke ụrụ wo la Ang Ọjẹ́jẹ nya Ụtụrụ nya ahyẹẹnụ ọọwa ọlẹ kị nwụlanọ ịị jw.org. Alobyi nyamwụ, ọwa ụbwọọmwụ ke ụrụ wo la ẹla oyaya nya ọ-Họ Kpa Kpịtịya bwu ifon nyamwụ. Ụka ohyẹẹkpẹ, Sue da ụpwụ du kịla ọngọ mẹ ịBayịbụụ jọ́ọ nyori: “À jum ọhụ yẹẹyẹẹ ịnịyẹ. M̀ maga jaabwọ kam ka họ ba myị́ kpụ m jẹ́ họ ọ-Họ Kpa Kpịtịya, iJihova tị dam ụbwọ ịnyịnyị. Ḿ ka jẹ́-ẹ ya jaabwọ kam chị ọkẹkẹnị kaka ba bala abwọlẹ kọ myịm lẹhị kaka ba ka!” À me irya ká iJihova ka dang ụbwọ ịnyịnyị myị́ ụka ká ja chịpwụrụ bwu ẹpwụ nya akama ụma ịlịnyị?
16. Ịyẹ tị́ du kahị jẹ́ myị̀myị̀ nyori iJihova ka wahị kụrụ aga ọmama nyahị nyọka ka ọ-Họ Kpa Kpịtịya? (Ala iRom 8:31, 32)
16 Aga ọmama nyahị nyọka họ ọ-Họ Kpa Kpịtịya nya igu nya iJisọsị kaa myị iJihova lẹhị yẹẹyẹẹ. Ahị jẹ́ myị̀myị̀ nyori ọ ka wahị kụrụụhị kori kahị mẹjẹ nyori ang ọlẹ kọ họ hahị nyị myịhị lẹhị. (Wa Ala iRom 8:31, 32.) Lẹ ahị wuu a cheje nyọka kà ọ-Họ Kpa Kpịtịya la ẹka ọlẹ mẹ. Ahị tị cheje nyọka họ ụkụrwọ ha iJihova gụ́ ọọwa lụka ọwẹ ịnyịnyị mẹ.
EJE 18 Grateful for the Ransom
a Ẹnụ nya iTusdee, ụtụrụ 4 nya Ọya Ohene, 2023, uku ịmanyị tị́ nya angịnyị ịkịka nya odehe wuu ka tụguru nyọka họ ọ-Họ Kpa Kpịtịya nya igu nya ịKịrayịsị. Ẹnụmwụ ọwẹ ka ri ahyẹẹnụ ọhọhẹ nya angịhyẹ. Angịkịla ịlẹ kị hwabwọ la ọ-gbịgba ha iJihova bala ọ-họ ọ-Họ Kpa Kpịtịya kaka ẹ-ẹpwụ nya ẹka lụmẹ-lụmẹ lẹ ka yẹjulahị ẹnụtụrụ ọwẹ ịnyịnyị. Angịhyẹ ka la ọ-nyaanyaa ọhẹ ọlẹ kọ ka du kọ ka lujwo haa nyọka kà, ma ị tị ka họ ịnyị. Jaabwọ myị́ abwọ ká iwe-ahụrụ nyang á la, jẹ́ myị̀myị̀ nyori ọ ka kpụ iJihova ịpyọ kori ká maga nyọka juwa ẹnụmwụ ọwẹ.
b Ala ịgba ọgbagba ọwẹ myị ọnụ nyori lụka nya ọhọhọ ọwẹ, ịkaa bala ere kaa yẹ ka ri ịnyịrọ bala ịwọ nya ịKịrayịsị ọlam-ọlam. Ị kụ irya nyori ụka myị́ ụka ká ọngịnyị nyị́ lụbwọ ẹ-ẹpwụ nya ọhọhọ ọwẹ lẹ aalẹ, nyị lala ịnyịrọ bala ịwọ nya iJisọsị nya-à wẹẹ ya kiliya myịmyị lẹ.
c Ị yẹ ẹnyị ịhyẹ da.
d Yẹ egbeju nya ẹla ọlẹ kọ ri “2021 Memorial Commemoration” ịị jw.org ịnyịnyị.
