ANG ỌJẸ́JẸ 1
Jẹ́ Myị̀myị̀ Nyori Omyi Ẹla nya Ohe Ri Ẹlịlẹhị
EGBEJU ẸLA NYA 2023: “Ẹla ọlọnụ nyang wuu ri nya ịlẹhị.”—EJE. 119:160.
EJE 96 God’s Own Book—A Treasure
ẸHỊ NYA ẸLA a
1. Ịyẹ tị́ du ká iru nya angịnyị á kaa dahịhile ịBayịbụụ ka?
IRU nya angịnyị alẹ á jẹ́ ọngọlẹ kọ ju ọ-dahịhile datị ka. Ị́ jẹ́ myị̀myị̀ kori ká angịnyị lala alupe, angị chị ang ehe, bala alọhị, kị ri angịlẹ kị kaa ju ihi, kaa la irya ọnyịịla ẹ-ẹga nyaa ka. Ọ-da ọọwa u-uhye, alegbeju nya ịgba ọgbagba ịlẹ kị byi ịlaa ịwa nyị ri angịnyị nya Ohe á kaa la ihi ẹ-ẹga nyaa kaka. Lẹ ọ́ la ẹbyẹbyị nyọlẹ kị kaa kpa ẹhị ọtịpyọ yẹ ịBayịbụụ, kọ ri ụpwụ ọlẹ ká angịwẹ kaa kpa ya ẹla ka.
2. Jaabwọ ká Eje Ọnyịịla 119:160 ya, ẹlịyẹ ahị tị́ baba nyọka jẹ́ myị̀myị̀?
2 Ahị anchẹ nya iJihova wuu jẹ́ myị̀myị̀ nyori ọ ri “Ohe Oluhye ọ-họ ẹla ọnụ-ọnụ” bala o-ri ọ kaa tịtọ nya ọháha nyahị ụka wuu. (Eje. 31:5; Ayị. 48:17) Ahị jẹ́ nyori ahị ka jẹ́-ẹ dahịhile ẹla ọlẹ kahị kaa wa bwu ịBayịbụụ chajị “ẹla ọlọnụ [nya Ohe] wuu ri nya ịlẹhị.” (Wa Eje Ọnyịịla 119:160.) Ahị myị ịnyịnyị jaabwọ ká ọlẹng ọhẹ ọlẹ kọ jẹ́ ang u-uhye nya ịBayịbụụ da ụpwụ yẹkẹẹ: “Ẹlẹlẹhẹ-ẹ́ ji ká Ohe-é ya kọ kaa ri ọnọọkịla lee ọ-ka họ jịra ka lẹ ka. Anchẹ nya Ohe kaa dahịhile ẹla ọlẹ kọ ya chajị ị dahịhile Ohe ọlẹ kọ ya ẹla ọọwa.”
3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
3 Ányị ahị tị́ ka bwu da angịkịla ụbwọ kị ka jẹ́-ẹ dahịhile Omyi Ẹla nya Ohe jaabwọ kaahị dahịhilọọ? Ahị kụ irya u-uhye nya ang odudu kahị ka jẹ́-ẹ dahịhile ịBayịbụụ wẹẹ. Ahị ka kụ ẹhị yẹ abwọlẹ ká ẹla ọla ịBayịbụụ la kpẹẹkpẹẹ, ọ-họ jịra nya ọmwụ ọyẹyẹ ọlụwa, bala ọngịrị ọlẹ ká ịBayịbụụ jẹ́-ẹ kpa yẹ ọhịhị nya ọngịnyị da.
ỌNGỌNGỌHẸ Á JẸ́ YA ẸLA ỌLA ỊBAYỊBỤỤ DA MYỊ́ KA
4. Ịyẹ tị́ du ká angịhyẹ kaa kụ irya nyori ẹla ọla ịBayịbụụ nyị yẹda?
4 IJihova Ohe Oluhye à kpa angịnyị lala angị 40 ịlẹ kị la ọmyịmyị da apwụ ịlẹ kị jula awụlẹ ri ịBayịbụụ lẹ. Ma, ọhẹ-lọhẹ nya apwụ ịlẹ kị da ịBayịbụụ ju lụka nya ọgbanyẹ á chịda pwụ ahyẹẹnụ nyahị ọlẹ kaka. Ịlẹ kị ma da ju apwụ ịkịla mwụba-mwụba ahị la lẹẹlẹẹ ẹẹ. Ọọwa dudu ká angịhyẹ kaa kụ irya kori ká ẹla ọlẹ kọ ji ẹpwụ nya ịBayịbụụ lẹẹlẹẹ á la ookpokpo bala ọlẹ kị da juwa ụka nya ọgbanyẹ. À kụ irya ẹnẹnẹhẹ u-uhye nya ang odudu kahị ka jẹ́ myị̀myị̀ nyori ọ la ookpokpo?
Angị jẹ́ ang chajị nya ụpwụ ọ-ma da ịlẹ kị ma ụpa nya ịBayịbụụ ọlẹ kị da la òja nya iHiburu da ju ka apwụ ịkịla maga yẹẹyẹẹ chajị ká Omyi Ẹla nya Ohe ka la kpẹẹkpẹẹ (Yẹ ọgba 5)
5. Ányị ị tị bwu ma ịBayịbụụ ọlẹ kị da la òja nya iHiburu da ju ka apwụ ịkịla? (Yẹ ifoto ọla ẹbẹ nya ọgbanyẹ.)
5 Chajị nyọka chewu ke ẹla ọla ịBayịbụụ, iJihova byi angịnyị nyamwụ nyị mọọ da ju apwụ ịkịla. Ọ byi ịdịrịhụ ịla Isirẹlụ nyori nyị kpa ụbwọ nya ịlaa da ehile nya Ohe ju ang ha ịlaa, ọ tị byi Ala iLivayị nyị mẹ Ehile ọwẹ jẹ angịnyị ịnyịnyị. (Ehile. 17:18; 31:24-26; Neh. 8:7) Ụka ká ala iJuu juwa ọ-ọyẹdada ọla ịBabịlọn, ebwo nya angịhyẹ ịlẹ kị jẹ́ ang chajị nya ụpwụ ọ-ma da dọmwụ nyọka ma ịBayịbụụ ọlẹ kị da la òja nya iHiburu da ju ka apwụ ịkịla lụmẹ-lụmẹ. (Ẹsịr. 7:6) Alẹng ịịwa kaa kpa ẹhị rige-rige. Nyọlẹ kọ nọ chẹẹ, angịwẹ kaa wa omyi ẹla bala alụfabeti ọnyọnyọọnyị nyọka jẹ́ myịmyị̀ nyori ị mọọ da kpẹẹkpẹẹ lẹ. Ọ tị lịnyị kpá odu lẹ, nyọlẹ ká angịịwa ri angịnyị ehe ị-la kpẹẹkpẹẹ ka wẹẹ, akama ichiche-ichiche ịhyẹ kaa juwa ẹ-ẹpwụ nya ịBayịbụụ ịlẹ kị ma da. Ma nyọlẹ kị maa da lụmẹ-lụmẹ wẹẹ, ọ kaa chịkpẹẹ la ọ-ka jẹ́ ẹga ọlẹ ko ri akama. Ányị ọ tịị bwu lịnyị?
6. Ányị ị tị́ bwu jẹ́ ẹga ọlẹ kọ la kpakpa ka ẹ-ẹpwụ nya ịBayịbụụ ịlẹ kị ma da?
6 Angị jẹ́ ang ịlụka nyahị la ụgbẹyị ọnyịịla ọhẹ ọlẹ kị kaa kpa jẹ́ ẹga ká ịBayịbụụ ịlẹ kị ma da la kpakpa ka. Ọ-chụ pwokwita: Ọhẹka ị ya ụkụrwọ ha angịnyị angị 100 nyị ma ẹbẹ nya ụpwụ ọhẹ da la ụbwọ. Ọngọ ookpokpo lẹpwụ nyaa á jẹ́ da ẹga ochiche ọhẹ yẹẹyẹẹ ẹ-ẹpwụ nya ọlẹ kọ ma da ka. Ụgbẹyị ọhẹ ọlẹ kahị ka bwu jẹ́ ẹga ọọwa ọlẹ kọ la kpakpa ka ri ọ-ka chwọọ ka pwoku ịlẹ ká angịkịla da. Ịnyịnyị, bwula ọ-chụ iru nya apwụ ịlẹ kị da ịBayịbụụ ju lụka onyogo kaka pwoku awụlẹ, angị jẹ́ ang ka jẹ́ ẹga ọlẹ ká ọngọ ma da ọhẹ jẹ́ da yẹẹyẹẹ ka myị́.
7. Ányị iru nya angị ma ịBayịbụụ da à tị́ kpahị ju ụkụrwọ ọwẹ kaka ba?
7 Angịlẹ kị ma ịBayịbụụ da ju ka apwụ ịkịla kaa maga nyọka họ ịnyị kpẹẹkpẹẹ. Yẹ ọ-chụ pwokwita ọlẹ kọ mẹjẹ nyori ẹlẹwẹ ri ẹlịlẹhị wẹẹ. Ọlẹpwụ-lẹpwụ nya ịBayịbụụ ọlẹ kị da la òja nya iHiburu ọlẹ kọ hi ri onyogo gụ́ wuu juwa bwu ẹka nya 1008 lee 1009 nyọlẹ kị ma ịKịrayịsị kpá lẹ. Ị kaa wụrọọ nya Leningrad Codex. Ma lụka ọkpanjẹ, angịnyị yé ọlẹpwụ-lẹpwụ lee ene nya apwụ ịlẹ kị da ịBayịbụụ ju lala ẹka 1,000 ene nya ọlẹ kị wụrụ nya Leningrad Codex. Angịhyẹ ka me nyori nyọlẹ kị ma ịBayịbụụ da mwụba-mwụba ẹ-ẹpwụ nya ẹka 1,000 wẹẹ, ẹla ọlẹ kọ juwa ẹ-ẹpwụ nya Leningrad Codex nyị́ ka me ọlẹpwụ nya ịlẹ kị da jene nyamwụ gbuu kaka. Ma ọ́ tị lịnyị ka. Ụka ká angị jẹ́ ang wụla apwụ ịlẹ kị da jene bala ịlẹ kị ku ẹkpẹ yẹ, ị yẹ nyori omyi ẹla ịhyẹ à datị pyịnyẹng-pyịnyẹng lẹ, ma etu nya ẹla ọlụwa á yẹda kpongkpong ka.
8. Ịyẹ à tị́ ri ọdatị nya ọ-ma da nya ụpa nya ịBayịbụụ ọlẹ kị da la òja nya iGiriki bala ọ-ma da nya apwụ ịkịla ịlẹ kị da lụka ọọwa?
8 Angịnyị nya ịKịrayịsị ịla oyi ọhọhẹ ma ịBayịbụụ da ju ka apwụ ịkịla ịnyịnyị. Ụpa nya ịBayịbụụ ọlẹ kị da la òja nya iGiriki ịlẹ kị ma da kpẹẹkpẹẹ la apwụ 27 wuu. Ịwa ị kaa kpa wa ụka nya ọjịra-jịra bala ụka kị ja kpa ẹrụ ọnyịịla pyẹ lẹ. Ọngọ jẹ́ ang ọhẹ ọlẹ kọ chụ ụpa nya ịBayịbụụ ọlẹ kị da la òja nya iGiriki kaka pwoku apwụ ịkịla ịlẹ ká angịnyị da lụka ọwọwa yẹkẹẹ: “Iru nya ụpa nya ịBayịbụụ ọlẹ kị da la oja nya iGiriki ji alẹ gụ́ apwụ ụma ịkịla ịlẹ ká angịnyị da, . . . ị tị kaa chọnụ gụ́ ịnyịnyị.” Ụpwụ ọlẹ ko ri Anatomy of the New Testament yẹkẹẹ: “Ahị ka jẹ́-ẹ jẹ́ myị̀myị̀ nyori ẹla ọlẹ kahị wẹẹ wa alẹ ẹ-ẹpwụ nya ịBayịbụụ ọlẹ kị yẹda kpẹẹkpẹẹ la okpokpo bala ẹla ọlẹ ká angị ịlụka onyogo da.”
9. Ẹlịlẹhị oyina ụpwụ nya Ayịsaya 40:8 à tị́ ya u-uhye nya ẹla ọlẹpwụ nya ịBayịbụụ?
9 Ụkụrwọ ọ-họ kpẹhị rige-rige ọlẹ ká angị ma ịBayịbụụ da ju apwụ ịkịla họ ẹ-ẹpwụ nya ẹka lụmẹ-lụmẹ du ká ẹla ọla ịBayịbụụ ọlẹ kahị wẹẹ wa bala ọ-jẹ́ ang bwu alẹ la kpẹẹkpẹẹ. b Ịwẹẹ ọdada á juwa ka, ahị jẹ́ nyori iJihova à ri ọngọlẹ kọ du ká omyi ẹla nyamwụ ji hahị alẹ bala ọ-la kpẹẹkpẹẹ ịnyịnyị lẹ. (Wa Ayịsaya 40:8.) Angịhyẹ tị ka da ịwẹẹ myị́ nyori ẹla ọlẹpwụ nya ịBayịbụụ ọ-la kpẹẹkpẹẹ kem nyị́ du ká ịBayịbụụ ri omyi ẹla nya Ohe ka. Lẹ ahị kụ ẹhị yẹ ang ẹjẹẹ ịhyẹ ịlẹ kị mẹjẹ nyori ịBayịbụụ ri ụpwụ o-bwu ẹga nya Ohe wẹẹ.
ỌMWỤ ỌYẸYẸ ỊLA ỊBAYỊBỤỤ JU ỌDAHỊHILE
Ụpụpịla: C. Sappa/DeAgostini/Getty Images; ụpwụriri: Image © Homo Cosmicos/Shutterstock
Ọmwụ ọyẹyẹ ịlẹpwụ nya ịBayịbụụ họ jịra lụka onyogo, ị tị wẹẹ họ jịra alẹ ịnyịnyị (Yẹ ọgba 10-11) d
10. Ya ọ-chụ pwokwita nya ọ-họ jịra nya ọmwụ ọyẹyẹ ọhẹ ọlẹ kọ mẹjẹ nyori ẹla ọlụpwụ nya 2 iPita 1:21 ri ẹlịlẹhị wẹẹ. (Yẹ ifoto.)
10 Ọmwụ ọyẹyẹ lụmẹ-lụmẹ ji ẹpwụ nya ịBayịbụụ kị họ jịra. Ịhyẹ nyaa dọmwụ la ẹka ohu ịmanyị tị́ ene kịị họ jịra. Ego tị mẹjẹ nyori ọmwụ ọyẹyẹ ịịwa họ jịra. Ọọwa-á tị lahị ẹbyẹbyị ka chajị ahị jẹ́ nyori ẹga nya iJihova ọmwụ ọyẹyẹ ịịwa à bwu lẹ. (Wa 2 iPita 1:21.) Kụ irya nya ọmwụ ọyẹyẹ u-uhye nya ayịreji ọtata nya epweji nya ịBabịlọn onyogo wẹẹ. La ụka nya ẹka nya 778 bala 732 ene nya ọmama nya ịKịrayịsị, olegu ịgọgọ kpa ọlọmwụ Ayịsaya ya neeji nyori nyị ka kụrụ ịBabịlọn kọ ri epweji ọla ọngịrị yẹẹyẹẹ ụka ọọwa. Ọ dọmwụ gu ẹnyị nya ọngọlẹ kọ ka kụrụ epweji ọwẹ, kọ ri ịSayịrọsị, ene kọ myịmyị-ị̀ ya jaabwọ kọ ka bwu họ ịnyị kpangga. (Ayị. 44:27–45:2) Ayịsaya myị́myị́ ya neeji nyori ịBabịlọn nyị ka ta ayịreji bala angịnyị nyị ka nyẹẹkpẹ dọọ gbang-gbang. (Ayị. 13:19, 20) Ẹlẹwẹ họ jịra ịlẹhị. Ala iMidi bala iPechiya ta ịBabịlọn ayịreji la ẹka nya 539 ene nya ọmama nya ịKịrayịsị, ẹga ọlẹ ká epweji ọtụka ọwẹ ji gbalẹ tị ri egu-awụ ịnyịnyị lẹẹlẹẹ lẹ.—Yẹ ifim ọlẹ kọ ri ỊBayịbụụ Yọmwụ u-Uhye nya Ayịreji nya ỊBabịlọn bwu ang ọjẹ́jẹ 03, ẹhị nya ẹla 5 nya ụpwụ nya Chị Ọkẹkẹnị Gboyi Myị Oyi! ọlẹ kịị kịla ju.
11. Chabwọ nya abwọlẹ ká ịDanẹlụ 2:41-43 wẹẹ họ jịra alẹ wẹẹ.
11 Ọmwụ ọyẹyẹ ịla ịBayịbụụ á họ jịra lụka ọkẹkpẹ kem ka, ahị yẹ ká ịhyẹ wẹẹ họ jịra alẹ ịnyịnyị. Ọ-chụ pwokwita, kụ ẹhị yẹ ọmwụ ọyẹyẹ nya ịDanẹlụ u-uhye nya Anglo-American World Power wẹẹ. (Wa ịDanẹlụ 2:41-43.) Ọmwụ ọyẹyẹ ọwẹ ya neeji nyori ụpa nya Anglo-America ọhẹ nyị ka “la ọngịrị” lala oje, ụpa ọkịla ka “la dẹwụ-dẹwụ” lala ume. Ahị ka yẹ nyori ẹlẹwẹ ri ịnyịlẹhị. Britain bala America mẹjẹ nyori ị la ọngịrị lala oje bwula ọ-la ụpa ọkpọnchị ẹ-ẹpwụ nya ọkụrụ-kụrụ nya Ẹwụ nya Odehe Wuu imimiiye ịlẹ kị da, ị tị kịnyaa la ọ-la ọngịrị nya ẹwụ ọdada ọtụka-ọtụka wẹẹ. Kpọkpọọkpọ, ọngịrị nyaa kaa la dẹwụ-dẹwụ chajị nyọlẹ ká angịnyị nyaa kaa hu ẹwụ u-uhye nya ẹla nya alọhị bala ala igomenti. Ọlẹng ọhẹ kọ jẹ́ ang yẹẹyẹẹ u-uhye nya upe nya odehe ya kpangjẹ yẹkẹẹ: “Ẹpwụma ọhẹ-ẹ́ ji la odehe nya ichene ọlẹ kọ la igomenti nya aluche ma kị tị chebwo ẹ-ẹga nya ẹla nya upe gụ́ United States alẹ ka.” Britain kọ ri ụpa ọkịla nya ọngịrị nya eji ọkpakpa ọwẹ tị chebwo nya ịlẹhị-ịlẹhị la ẹka ịkpangjẹ ịnyịnyị, ọ-ọlajị nyọlẹ ká ala ẹpwụma ọwẹ á kaa myị ju awụlẹ u-uhye nya ẹpwụma ịlẹ kị ka wu igu ẹ-ẹpwụ nya European Union datị ka. Ebwo ọchịchị ọwẹ du kọ kaa lujwo nya ịlẹhị-ịlẹhị ha Anglo-American World Power nyọka cheje nya ẹla kpịrang.
12. Ẹlịyẹ ọmwụ ọyẹyẹ ọla ịBayịbụụ à tị́ họ kahị jẹ́ myị̀myị̀?
12 Iru nya ọmwụ ọyẹyẹ ịlẹpwụ nya ịBayịbụụ ịlẹ kị họ jịra du kahị jẹ́ myị̀myị̀ nyori ang ịlẹ ká Ohe chehe gbe ijuju ka họ jịra ịnyịnyị. Ọ lahị jaabwọ kọ la ọngọ da eje ọnyịila du kọ yẹkẹẹ: “M̀ juwa godayị gbeng ká ka chịm da, m̀ la ahị ọdahile u-uhye nya ẹla nyang.” (Eje. 119:81) Ẹ-ẹpwụ nya ịBayịbụụ, iJihova họ kahị jẹ́ nyori ọ la irya nyọka họ ká ‘ijuju nyahị ka hiigu.’ (Jer. 29:11) Ẹhị ọrịrịị-rịrị ọlẹ kahị la gbe ijuju á kpụnịrọ ọngịrị nya ọngịnyị ehe ka, ma ehe ọchịchị nya iJihova ọ kpụnịrọ lẹ. Ahị kịnyaa la ọ-nwụ ahị ọdahile nyahị u-uhye nya Omyi Ẹla nya Ohe bwula ọ-jẹ́ ang u-uhye nya ọmwụ ọyẹyẹ ịlụwa rige-rige mẹ.
ẸLA ỌMẸJẸ ỌLA ỊBAYỊBỤỤ WẸẸ DA UKU ỊMANYỊ TỊ́ NYA ANGỊNYỊ ỤBWỌ
13. Jaabwọ ká Eje Ọnyịịla 119:66, 138 ya, ẹla ọkịla oyina à tị́ mẹjẹ nyori ịBayịbụụ ju ọdahịhile?
13 Ẹla ọkịla ọlẹ kọ du kahị ka jẹ́-ẹ dahịhile ịBayịbụụ ri ọ kaa da angịnyị ụbwọ ụka kị kpa ẹla ọlụwa họ ụkụrwọ. (Wa Eje Ọnyịịla 119:66, 138.) Ọ-chụ pwokwita, ahụ bala ọrụ ịlẹ ịnọ kị ja ka pwa awụlẹ wuu lẹ jẹ́ chị ọkẹkẹnị ẹ-ẹpwụ nya awụlẹ oyeye nyaa ọ-ọlajị nyọlẹ kị kaa kpa ẹla ọlẹpwụ nya ịBayịbụụ họ ụkụrwọ lẹẹlẹẹ lẹ. Anjwo nyaa tị kaa chị ọkẹkẹnị nyọlẹ kị ji ẹpwụ nya ugbiyegu ọlẹ ká adaa bala ịnaa kaa kpẹhị rịraa bala ọ-la ọháha ẹ-ẹga nyaa.—Efe. 5:22-29.
14. Ya ọ-chụ pwokwita ọlẹ kọ mẹjẹ nyori ẹla ọla ịBayịbụụ ọ-kpa họ ụkụrwọ kaa yẹ ọhịhị nya angịnyị da ka ọnyịịla wẹẹ.
14 Bwula ọ-kpa ẹla ọnyịịla ọlẹ ká ịBayịbụụ kaa mẹjẹ họ ụkụrwọ, angịlẹ kị dọmwụ ri aluguru ẹla ene-ene jẹ́ yẹ ọhịhị nyaa da lẹẹlẹẹ lẹ. Yẹ jaabwọ ká ẹla ọlụwa da ọlagbá ọhẹ ká ẹnyị nyamwụ ri Jack c ụbwọ lẹẹ wẹẹ. Ọ ri olukpulo ọlẹ kị jọ́ọ nya ọngọ la uhi-uhi gụ́ wuu ẹ-ẹpwụ nya angị ju u-ube nya agba ịlẹ kị cheje nyọka nwụ. Ma ẹnẹhẹ, Jack juwa ẹ-ẹga kị wẹẹ jẹ́ ịBayịbụụ. Ọnahị nya aanahị ịlẹ kị wẹẹ mẹ ịBayịbụụ jẹ gwoo ọ-ọkịlẹtụ, ọọwa ọ dọmwụ nya ịBayịbụụ ọjẹ́jẹ ịnyịnyị lẹlẹ. Ụka kọ dọmwụ nyọka kpa ẹlịlẹhị ọla ịBayịbụụ họ ụkụrwọ ọ-ọhịhị, ọ yẹda kpụ abwẹla nyamwụ dọmwụ nyọka há gụ ola ene. Nyọlẹ kọ nọ chẹẹ, Jack nwà ka ri ọngọ kpa ẹrụ ọnyịịla pyẹ bala o-hu enyi Ohe ịnyịnyị. Ọ ya ẹla nya Ịpyị-Adịrahụ nya Ohe la ila ọchịchị je angịkịla ịlẹ kị juwa u-ube nya agba lawụlẹ kpụ ọ da angị ine ụbwọ wẹ ka jẹ́ ẹlịlẹhị. Ọ ka pwụ ahyẹẹnụ ọlẹ kị ka nwọọ wẹẹ, Jack yẹda yẹẹyẹẹ lẹ. Ọngọhẹ nya angịleje nyamwụ yẹkẹẹ: “Jack á la jaabwọ kọ la ẹ-ẹpwụ nya ẹka 20 kẹkpẹ kaka. Ang ọmẹjẹ nya Alibeenu nya iJihova yẹ ọhịhị nyamwụ da lẹ.” Nanana nyori ị nwụ Jack wẹẹ, oja nyamwụ mẹjẹ nyori ahị ka jẹ́-ẹ dahịhile Omyi Ẹla nya Ohe bala o-ri ọ la ọngịrị nyọka yẹ ọhịhị nya angịnyị da ka ọnyịịla.—Ayị. 11:6-9.
Ẹla ọmẹjẹ ọlẹpwụ nya ịBayịbụụ yẹ ọhịhị nya iru nya angịnyị bwu ẹga ịdatị-ịdatị da ka ọnyịịla lẹ (Yẹ ọgba 15) e
15. Ányị ẹlịlẹhị ọla ịBayịbụụ ọ-kpa họ ụkụrwọ à tị́ du ká Alibeenu nya iJihova datị hi angịkịla alẹ? (Yẹ ifoto.)
15 Nyọlẹ ká Alibeenu nya iJihova kaa kpa ẹlịlẹhị ọla ịBayịbụụ họ ụkụrwọ wẹẹ, ị kaa yẹ jula awụlẹ. (Jọn. 13:35; 1 Kọr. 1:10) Okpunyi bala ọ-yẹ jula awụlẹ ọla ẹpwarịrị nyahị kaa chehe gede-gede chajị iru nya angịnyị alẹ kaa chebwo hi awụlẹ ọọlajị nya ẹla nya upe, ẹga ọlẹ kị bwu lee ang ọlala nyaa. Ụka ká okolobya ọhẹ ká ẹnyị nyamwụ ri Jean yẹ jaabwọ ká angịnyị nya iJihova kaa yẹ jula awụlẹ, ọ lọọ ẹbyẹbyị. Ị kpọọ nwà ẹ-ẹpwụma ọhẹ nya Africa. Ọ yẹ jula alisoja ụka ká ẹwụ ọhẹ ji, ma ọ tị rụnyẹ rụ ka ẹpwụma ọhẹ ba ụwa ba ụka ohyẹẹkpẹ. Ọ gbachị Alibeenu nya iJihova ụ-ụwa. Jean yẹkẹẹ: “M̀ yẹ nyori angịlẹ kị ji ẹpwụ nya ịgba ọgbagba nyịlẹhị á kaa ya ụbwọ ju ẹla nya upe ka, ị́ tị kaa chị awụlẹ ebwo ka ịnyịnyị. Ọkọkọ nya ọọwa, ị kaa la ọháha ẹ-ẹga nya awụlẹ.” Ọ myịmyị yẹkẹẹ: “M̀ kpa ọhịhị nyam wuu ma uya ha ẹpwụma. Ma ụka kam jẹ́ ẹlịlẹhị ọlẹpwụ nya ịBayịbụụ, m̀ dọmwụ nyọka kpa ọhịhị nyam wuu gbịgba ha iJihova.” Jean yẹda gbang-gbang. Ọkọkọ nyọka ma uya ta angịlẹ kị datị hyoo, ọ kaa mẹ ẹla ọlẹpwụ nya ịBayịbụụ ọlẹ kọ kaa yẹ angịnyị jula awụlẹ jẹ ọng myị́ ọng̣ ọlẹ kọ tọ. Ọlẹ ká ẹla ọlẹpwụ nya ịBayịbụụ jẹ́-ẹ da angịnyị bwu ẹpwụma ọnyị myị́ ọnyị ụbwọ wẹẹ, ọ mẹjẹ nyori ahị ka jẹ́-ẹ dahịhile Omyi Ẹla nya Ohe.
KỊNYAA LA Ọ-DAHỊHILE OMYI ẸLA NYA OHE KỌ RI ẸLỊLẸHỊ
16. Ịyẹ tị́ du kọ baba kahị ka ju ahị ọ-dahile nyahị ọngịrị u-uhye nya Omyi Ẹla nya Ohe?
16 Jaabwọ ká odehe ọlẹ wẹẹ tịpyọ gụ́ olene, ịnyịnyị ọ ka lujwo hahị nyọka dahịhile Omyi Ẹla nya Ohe lẹ. Angịnyị ka họ kahị ka la ịwẹẹ ọdada kori ká ẹla ọla ịBayịbụụ á ri ẹlịlẹhị lee kori ká iJihova á la ụgbẹyị ọhẹ ọlẹ kọ kaa bwu kpa angịnyị nyamwụ datị alẹ. Ma ó ri kahị jẹ́ myị̀myị̀ nyori Omyi Ẹla nya iJihova kaa ri ẹlịlẹhị ụka wuu, áhị ka ya iwe da ang ịlịnyị ka bịrị ọmyịmyị nyahị ka. Ahị ka ‘chị eje nyọka kpa ehile nya iJihova bala ọ-ka kpaa pwụ ọbaba nya ọhịhị nyahị.’ (Eje. 119:112) Kori kahị tịtọ nyọka ya ẹlịlẹhị ọlẹpwụ nya ịBayịbụụ je angịkịla bala ọ-ka jwaa ọhụ nyọka kpa ẹla ọlụwa họ ụkụrwọ, ‘oyoyi-í ka juhi ka.’ (Eje. 119:46) Ahị tị ka jẹ́-ẹ “kpa ọkẹkẹnị ọchịchị ọtụka la ugbodu ojuju pwụ ọbaba” ẹ-ẹpwụ nya iwe-ahụrụ ịlẹ kị lujwo gụ wuu, tụ́ ọtụpyịpyị.—Kol. 1:11; Eje. 119:143, 157.
17. Egbeju ẹla nyahị tị́ ka kpụhị ịtịya nya ẹlịyẹ?
17 Ahị chị ọkẹkẹnị yẹẹyẹẹ nyọlẹ ká iJihova mẹ ẹlịlẹhị jẹẹhị! Ẹlịlẹhị ọọwa kaa wuhi kpa kpọọ, bala ọ-kaa mẹjẹ́ẹhị jaabwọ kahị ka bwu hịhị ẹ-ẹpwụ nya odehe ojigi-jigi ọlẹ. Ọ ya ẹhị ọrịrịị-rịrị nya ijuju ọnyịịla e-ekpeleji nya eji ọkpakpa nya Ịpyị-Adịrahụ nya Ohe hahị. Egbeju ẹla nya 2023 a dahị ụbwọ nyọka godayị giri-giri la ọ-jẹ́ myị̀myị̀ nyori ẹla ọlọnụ nya Ohe wuu ri nya ịlẹhị mẹ!—Eje. 119:160.
EJE 94 Grateful for God’s Word
a Egbeju ẹla ọlẹ kị chụ nya 2023 ka ju ọmyịmyị nyahị ọngịrị yẹẹyẹẹ. O ri: “Ẹla ọlọnụ nyang wuu ri nya ịlẹhị.” (Eje. 119:160) Ịwẹẹ ọdada á juwa ka, ahụ ịnyịnyị ka myị ju ẹlẹwẹ. Ma iru nya angịnyị á myị ju ẹla ọla ịBayịbụụ lee ọ-myị nyori ịBayịbụụ ka jẹ́-ẹ mẹ ẹla ọnyịịla jẹẹhị ka. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ẹjẹẹ ịta ịlẹ kahị ka jẹ́-ẹ kpa da angị la ọkịlẹtụ ọnyịịla ụbwọ nyọka jẹ́ nyori ị ka jẹ́-ẹ dahịhile ịBayịbụụ bala ẹla ọmẹjẹ ọlụwa.
b Nyọka jẹ́ gụ́ ọowa u-uhye nya abwọlẹ ká ẹla ọla ịBayịbụụ chịda, ka jw.org ká da nya “History and the Bible” ẹ-ẹga ọ-mwahị nya ang.
c Ị yẹ ẹnyị ịhyẹ da.
