1. Ịyẹ tị́ du kọ há kahị ka ka ọ-Họ Kpa Kpịtịya nya igu nya ịKịrayịsị ẹka myị́ ẹka?

 ỊWẸẸ ọdada á ji ka, à ka myị nyori ọ-ra kpehe ri āhị ọtụka-ọtụka bwu ẹga nya Ohe! (2 Kọr. 9:15) Chajị nyọlẹ ká iJisọsị ya ọhịhị nyamwụ kịliya, o du ká ka jẹ́-ẹ ri igu o-chii bala iJihova. À tị ka jẹ́-ẹ ya ẹhị rịrị gbe ọhịhị ọmyịmyị-ka ịnyịnyị. Ọ chịla ịnyịlẹhị kahị ka jẹ́ apyobwuna nya ọ-ra kpehe bala ọ-ka mẹjẹ nyori ẹla nya iJihova myịhị lẹhị, chajị ọháha à gwoo gbịlaa du kọ ya āhị ọwẹ hahị lẹ! (Rom. 5:8) Nyọka dahị ụbwọ ká āhị nya ọ-ra kpehe ka myịhị lẹhị kahị ka ya ẹhị dọọ bwee ka, iJisọsị dahị ehile nyọka họ ọ-Họ Kpa Kpịtịya nya igu nyamwụ ẹka ọnyị myị́ ọnyị.—Luk. 22:19, 20.

2. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² La ẹka ọlẹ, ahị ka họ ọ-Họ Kpa Kpịtịya ẹnụ nya ịSatudee, ahyẹẹnụ 12 nya Ọya Ohene, 2025. Ọ tị la gbagbịla nyori ahị wuu juwa nwụlanọ nyọka ka. Ahị ka yé apyobwuna yẹẹyẹẹ kori kahị kpa ụka nyahị kụ irya kpori-kpori ju ang ọlẹ ká iJihova bala Ọnyị nyamwụ họ hahị lụka nya ọ-Họ Kpa Kpịtịya. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang ọlẹ ká ọ-ra kpehe mẹjẹẹhị u-uhye nya iJihova bala Ọnyị nyamwụ. Ang ọjẹ́jẹ ọ-bọọba ka dahị ụbwọ nyọka jẹ́ jaabwọ kahị ka bwu yé apyobwuna bwu ẹpwụ nya ọ-ra kpehe bala abwọlẹ kahị ka mẹjẹ nyori ọ myịhị lẹhị.

ANG ỌLẸ KÁ Ọ-RA KPEHE MẸJẸ́ẸHỊ U-UHYE NYA IJIHOVA

3. Ányị igu nya ọngọ ookpokpo à tị́ họ kọ chịkpẹẹ ká angịnyị uku ịmanyị tị́ ka yé ọchịda? (Yẹ ifoto ịnyịnyị.)

³ Ọ-ra kpehe mẹjẹẹhị nyori iJihova ri Ohe nya ẹla ọ-họ kpakpa. (Ehile. 32:4) Ányị ọ tị́ bwu lịnyị? Kụ irya wẹẹ: Ahị ri ugu  nya ọhọbịrị bala igu bwu ẹga nya Adam. (Rom. 5:12) Nyọka gbahị kpehe hi ọhọbịrị bala igu, iJihova du iJisọsị ẹrụ warị kaka rahị kpehe. Ma ányị iya ọkịlaakịla nya ọngọ ookpookpo ọlẹ kọ la kpẹẹkpẹẹ à tị́ ka jẹ́-ẹ chị ụnọ ịmanyị tị́ nya angịnyị da? Ọlẹrụ ịPọlụ wụlẹ yẹkẹẹ: “Jaabwọ ká ihi ojuju-ka nya Adam ọlẹng ookpokpo họ, ká iru nya angịnyị ehe wuu ri alọhọbịrị wẹẹ, ịnyịnyị-ịnyịnyị, ihi ojuju nya ịKịrayịsị ọngọ ookpokpo ọọwa, a tịtị ka họ ká Ohe Oluhye ka wa iru nya angịnyị lụmẹ-lụmẹ nya alabwẹla ọnyịịla ị-ịlahị nya ịlọmwụ bwula ịKịrayịsị lẹlẹ.” (Rom. 5:19; 1 Tim. 2:6) Nyọka yoo ụ-ụgbẹyị ọkịla, ihi ojuju ka nya ọngọ ookpokpo ọlẹ kọ la kpẹẹkpẹẹ à yahị juka ẹpwụ nya ọnyọhị nya ọhọbịrị bala igu lẹ. Lẹ, ihi ojuju nya ọngọ ookpokpo ọlẹ kọ la kpẹẹkpẹẹ ka jẹ́-ẹ gbahị kpehe ịnyịnyị.

4. Ịyẹ tị́ du ká iJihova á ba hi anyị ịtụma nya Adam ịlẹ kị la ọmyịmyị ị kịnyaa la ọhịhị gboyi myị́ oyi ịịwẹ kem ka?

⁴ IJisọsị baba nyọka gbu pyii ene kọ ka jẹ́-ẹ chịhị da? IJihova á ka jẹ́-ẹ chụ nyọka ya iwe ha anyị nya Adam ịlẹ kị la ọkịlẹtụ ọnyịịla kị ka hịhị gboyi myị́ oyi ka? Ẹ-ẹhị nya angịnyị ehe ịlẹ kị la kpẹẹkpẹẹ ka, ọ ka lala o-ri ọwẹ nya-à ri ụgbẹyị ọnyịịla ọlẹ kị ka jẹ́-ẹ myị akama ọwẹ lẹ. Ma ọọwa á ka la kpakpa a-ahị nya iJihova ka. Chajị ọ ka lala o-ri Adam nyị́ họ ọhọbịrị ọtụka ọhẹ ka bala o-ri anyị nyamwụ nyị́ ri alịhọbịrị ka ịnyịnyị. Ịnyị ọ tị la ịlẹhị ka.

5. Ịyẹ tị́ du kahị ka jẹ́ myị̀myị̀ nyori iJihova ka họ ẹla ọ-la kpakpa ụka wuu?

⁵ Ma, ọ tị ri ká iJihova á ya Ọnyị nyamwụ du wẹ ka kịliya ka, kọ nyẹẹkpẹ da ẹla ọ-họ kpakpa bwula ọ-ya iwe da ha anyị nya Adam ịlẹ kị la kpẹẹkpẹẹ-ka nyọka hịhị gboyi myị́ oyi ịịwẹ kem bẹ? Angịnyị ka chuko kori ká iJihova á ka nyẹẹkpẹ da ẹla ọ-họ kpakpa ẹ-ẹpwụ nya iwe-ahụrụ ịkịla ịnyịnyị. Lala ọ-chụ pwokwita, angịnyị ka la ịwẹẹ ọdada myị́ kori ká iJihova á ka họ ọnụ ọmyịmyị nyamwụ jịra ịlẹhị. Ma, áhị tị baba nyọka chuko nyori ọ ka lịnyị kaka. Ịyẹ tị́ du? Chajị iJihova họ ẹla ọlẹ kọ la kpakpa nanana nyori ọọwa ri ọ-ka hu Ọnyị ọlịkẹjẹ nyamwụ kiliya. Lẹ, ahị ka jẹ́-ẹ la ọ-jẹ́ myị̀myị̀ nyori ọ ka họ ẹla ọ-la kpakpa ụka wuu ịnyịnyị.

6. Ụgbẹyị oyina ọ-ra kpehe à tị́ chị ọháha nya iJihova ehe? (1 ịJọn 4:9, 10)

⁶ Ịlẹhị lẹ, ọ-ra kpehe dahị ụbwọ nyọka yẹ nyori iJihova kaa họ ẹla ọkpakpa, ma ang ọlẹ kọ dahị ụbwọ nyọka jẹ́ gụgụ ri ọháha nyamwụ. (Jọn. 3:16; wa 1 ịJọn 4:9, 10.) IJihova du Ọnyị nyamwụ ẹrụ wẹ ka gbu wọnụ nyahị ju chajị kahị ka jẹ́-ẹ hịhị gboyi myị́ oyi bala ọ-ka ri alugbiyegu nyamwụ ịnyịnyị. Kụ irya wẹẹ: Ụka ká Adam họ ọhọbịrị, iJihova gbọọ kpehe hi ugbiyegu nya angị kaa gbịgba họọ. Ọọwa du kị ma ọngọngọhẹ nyahị ẹ-ẹpwụ nya ugbiyegu nya Ohe ka. Ma chajị nya ọ-ra kpehe, iJihova kaa hịnyọhi ịhọbịrị nyahị hahị  du kọ ka kpa angịnyị ehe ịlẹ wuu kị la ọmyịmyị bala o-jwoo ihi wẹ ẹpwụ nya ugbiyegu nyamwụ ụka ohyẹẹkpẹ. Dọmwụ lẹẹlẹẹ ahị ka jẹ́-ẹ ri igu o-chii ta iJihova bala aanahị ịla ọjịra-jịra. Ahị há iJihova ịnyịlẹhị!—Rom. 5:10, 11.

7. Ányị akama ọyẹyẹ nya iJisọsị à tị́ dahị ụbwọ nyọka jẹ́ jaabwọ kahị há iJihova kaka ba?

⁷ Ahị ka jẹ́ jaabwọ kahị há iJihova gụ́ ọọwa kori kahị kụ irya nya abwọlẹ kọ jwọọ kaka ba nyọka yẹ Ọnyị nyamwụ kọ ja yẹ akama. Olegu Onyobyi ya nyori ọnchẹ nya Ohe ọhẹ-lọhẹ nyị́ ka myị-ị godayị giri-giri ha Ohe kori kị nyị lujwo nyọka họ ịnyị ka. Nyọka mẹjẹ nyori Olegu Onyobyi me ọnọọkịla, iJihova ya ẹga da ká iJisọsị yẹ akama gbee kọọ gbu. (Job. 2:1-5; 1 Pit. 2:21) IJihova kpa ẹhị yẹ jaabwọ ká ala ịgba ọgbagba ịlẹ kịị tụ iJisọsị pyịpyị juwa kpọọ họ, alisoja nyoo enyiri, ene kịị gwoo ilo ba okoji. IJihova kpa ẹhị yẹ ịnyịnyị jaabwọ ká Ọnyị nyamwụ yẹ akama gbee kọọ gbu igu onyuujujwo. (Mat. 27:28-31, 39) IJihova la ọngịrị nyọka wu ang ịwẹ wuu kpa la ọ-ka họ myị́. Ọ-chụ pwokwita, ụka ká angịnyị wẹẹ ya nyori: “Ohe Oluhye ọọwa a warị kaka chọọ da lẹẹlẹẹ kahị yẹ tịtị mẹ,” iJihova ka họ jaabwọ kị ya wẹ myị́. (Mat. 27:42, 43) Ma, ó-ri ká Ohe á họ ịnyị ụka ọwẹ lẹ, iJisọsị á ka jẹ́-ẹ rahị kpehe kaka, áhị tị ka la ẹhị ọrịrịị-rịrị kaka ịnyịnyị. Lẹ, iJihova ya iwe da ká Ọnyị nyamwụ ka yẹ akama gbee kọọ chị ẹjẹ.

8. Ọ jụ iJihova ụka kọ yẹ Ọnyị nyamwụ kọ ja yẹ akama? Ịyẹ tị́ du kahị ya ịnyị? (Yẹ ifoto ịnyịnyị.)

⁸ Ụka ká iJihova yẹ Ọnyị nyamwụ juwa yẹ akama kọ tị họ abwẹbwẹhẹ ka lẹ, ọ mẹjẹ nyori ẹla á roo ẹla ka ịnyị? Ehe. IJihova họhị la abwụma nyịlọmwụ, lẹ nyọlẹ ká ẹla jẹ́-ẹ guhi ọ-ọkịlẹtụ wẹẹ, ahị ka jẹ́-ẹ ya nyori ẹla kaa gwoo ọ-ọkịlẹtụ ịnyịnyị. ỊBayịbụụ ya nyori angịnyị nyị họ “olujwo tọọ” bala o-ri nyị “du agbama ju” Ohe. (Eje. 78:40, 41) Lẹ, ányị ọ tị jwọọ kaka ba ụka kọ yẹ Ọnyị nyamwụ kọ juwa yẹ akama? Kụ irya nya oja nya Ebiraham bala Ayịsiki wẹẹ. À ka kpịtịya nyori iJihova byi Ebiraham nyị hu ọnyị olookpokpo nyamwụ kịliya. (Ọmwụ. 22:9-12; Hib. 11:17-19) Kụ irya u-uhye nya irya ịdatị-datị ịlẹ kị ka wẹ ẹpwụ nya Ebiraham ụka kọ wẹẹ ka ya ẹma chị ọnyị nyamwụ imyi kireng wẹẹ. Kụ irya nya abwọlẹ kọ tịtị ka jụ iJihova kaka ba nyọka yẹ Ọnyị nyamwụ jaabwọ kọ yẹ akama gbee kọọ gbu ụ-ụbwọ nya angị jẹ́ Ohe ka wẹẹ!—Ka jw.org ká yẹ ifim ọlẹ kọ ri Imitate Their Faith—Abraham, Part 2.

9. Ẹlịyẹ ụpwụ nya Ala iRom 8:32, 38, 39 à tị́ dang ụbwọ nyọka jẹ́ u-uhye nya ọháha nya iJihova?

⁹ Ọ-ra kpehe mẹjẹẹhị nyori ọngọngọhẹ á la ọháha ẹ-ẹga nyahị lala iJihova ka, kori kọ dọmwụ ri olugbiyegu nyahị lee oligu nyahị ọlẹ kọ juhi chwẹẹ gụgụ wuu. (Wa Ala iRom 8:32, 38, 39.) Ahị dọmwụ há iJihova gụ́ abwọlẹ kahị há ịlọhị kaka ba wẹẹ. À tịtọ nyọka hịhị gboyi myị́ oyi? IJihova à tịtọ nya ọọwa hang gụ́ wẹẹ  lẹ. À tịtọ nyọka yé ọhịnyọhi nya ịhọbịrị nyang? IJihova à tịtọ nyọka hịnyọhi hang gụgụ wẹẹ lẹ. Ang ọlẹ kọ tịtọ kahị ka họ wuu ri ọ-ka ye āhị ọnyịịla ọwẹ myị bwula ọmyịmyị ọlala bala ihi ojuju. Ọ-ra kpehe ri āhị ọnyịịla ọlẹ kọ mẹjẹ nyori ahị há iJihova ịnyịlẹhị. Ụ-ụwa odehe onyeewe, ahị tị dọmwụ ka jẹ́ ang u-uhye nya ọháha nya iJihova gụ́ ọwẹ wẹẹ.—Ọngọ. 3:11.

ANG ỌLẸ KÁ Ọ-RA KPEHE MẸJẸ́ẸHỊ U-UHYE NYA IJISỌSỊ

10. (a) Ịyẹ tị́ du ká igu ogbugbu nya iJisọsị tọọ olujwo? (b) Ụgbẹyị oyina iJisọsị à tị́ bwu chị ihi ju ẹnyị nya iJihova? (Yẹ akpa ọlẹ ịnyịnyị, “ Iya Ọkịlaakịla nya IJisọsị Chị Ihi Ju Ẹnyị nya IJihova.”)

¹⁰ Irya ọlẹ ká angịnyị la ẹ-ẹga nya Ohe kaa re ẹla nya iJisọsị. (Jọn. 14:31) Ọ ta iJisọsị olujwo nyori ẹla ịlẹ kị chịbọọ nyị ri oluguru-ẹla bala o-hu ẹpẹpẹ ju Ohe nyị ka du ká angịnyị ka la irya ọtịpyọ ẹ-ẹga nya Adamwụ myị́. Ịnyị à dudu kọ raabwọ yẹkẹẹ: “Ahụ Ohe Oluhye Adam, ó-ri kọ ka chịkpẹẹ aalẹ, A họ ká ukoku nya ang ọjụjụ ọtụka ọlẹ a chịpwụrụ him chẹẹ mẹ!” (Mat. 26:39) Bwula ọlẹ ká iJisọsị tị godayị giri-giri ha iJihova gbee kọọ gbu wẹẹ, ọ chị ihi ju ẹnyị nya Adamwụ ụ-ụgbẹyị ọnyị myị́ ọnyị lẹ.

11. Ányị iJisọsị à tị́ mẹ ọháha okpori-kpori jẹ ẹ-ẹga nya angịnyị? (ỊJọn 13:1)

¹¹ Ọ-ra kpehe mẹjẹẹhị ịnyịnyị nyori iJisọsị kaa kpahị ju angịnyị yẹẹyẹẹ, ọgụgụ ri angịlẹ kị kaa bọọ jẹ. (Etu 8:31; wa ịJọn 13:1.) Ọ-chụ pwokwita, iJisọsị jẹ́ nyori apa ịhyẹ nya ụkụrwọ ọlẹ kọ ka họ odehe ọlẹ ka lujwo, lala igu onyuujujwo ọlẹ kọ ka gbu. Ma, iJisọsị á họ ụkụrwọ ọọwa lala o-ri ọ tị́ ka họ ányị wẹẹ ka, ọ họọ chajị nyori ahị họ́ọ ịnyị. IJisọsị kpa ẹrụ ọnyịịla pyẹ, mẹ ang jẹ angịnyị, bala ọ-myị ẹrụ haa. Lodu ọlẹ kọ chịpwụrụ ene ká iJisọsị dọmwụ wẹẹ ka gbu, ọ kpa ụka nyamwụ hụ angịjụgbẹyị nyamwụ ata bala ọ-daa ọkpahị la omyi ẹla nya ẹjẹ ọkpụ́kpụ bala ang ọmẹjẹ. (Jọn. 13:12-15)  Ụka kị tị gu iJisọsị ilo ba okoji kpá, ọ myịmyị kpa ụka okpii ọwẹ ya ẹhị ọrịrịị-rịrị ha oloyi ọlẹ kọ ji bọọba bala ọ-ya ụkụrwọ nya ẹhị ọ-kpa rịrị ịnamwụ ju ọngịnyị ụ-ụbwọ. (Luk. 23:42, 43; Jọn. 19:26, 27) Lẹ iJisọsị á mẹ ọháha jẹ bwula igu ogbugbu nyamwụ kem ka, ma ọ mọọ jẹ ẹ-ẹpwụ nya ọhịhị nyamwụ wuu ụka kọ jam odehe.

12. Ụgbẹyị oyina iJisọsị à tị́ wẹẹ kịnyaa la ọ-họ ụkụrwọ hahị?

¹² O ri ịnyịlẹhị nyori ịKịrayịsị gbu “lụka ookpokpo ọlẹ kọ nwa ụga pyịyọọ wọnụ nya ọhọbịrị ọhọhọ nya angịnyị ehe wuu ju,” ma ọ tị wẹẹ họ ang hahị wẹẹ. (Rom. 6:10) Ịyẹ ọ tị wẹẹ họ hahị? Ọ wẹẹ kịnyaa la ụkụrwọ ọhọhọ nyọka ya ang ịnyịịla lụmẹ-lụmẹ hahị bwula iya ọkịlaakịla nyamwụ. Kụ ẹhị yẹ ang ịlẹ kọ wẹẹ kpa ụka nyamwụ họ wẹẹ. Ọ ri Adịrahụ, Ọngọkiliya Ọgbẹgbịlẹ, bala olegbeju nya ọjịra-jịra. (1 Kọr. 15:25; Efe. 5:23; Hib. 2:17) Ọwa à wẹẹ kpịlahị nya ụkụrwọ nyọka tụ angịlẹ ká Ohe ya ida wụ guru bala iru nya angịlẹ kị ka hihi odehe lẹ, ụkụrwọ ọọwa tị ka cheju ene nya akama ọtụka okpelego ọ-ka myị́. a (Mat. 25:32; Mak. 13:27) Ọ tị wẹẹ ya ang oriri nya olegu hahị ri wu ẹpwụ la ahyẹẹnụ ihyẹẹkpẹ ịlẹ ịnyịnyị. (Mat. 24:45) Lụka kọ tị wẹẹ ka kpeji ẹ-ẹpwụ nya ẹka ụnọ, ọ ka kịnyaa la ọ-dahị ụbwọ ịnyịnyị. IJihova á du Ọnyị nyamwụ warị nyọka gbu wọnụ nyahị ju kem ka, ma ọchajị nyọka họ iru nya ang ịnyịịla ịkịla hahị gụ ọọwa ịnyị!

A HWABWỌ LA ANG ỌJẸ́JẸ KA

13. Ányị a tị́ ka bwu kịnyaa la ọ-jẹ́ ang u-uhye nya ọháha ọlẹ ká Ohe bala ịKịrayịsị la ẹ-ẹga nyahị?

¹³ À ka jẹ́-ẹ jẹ́ ang kịnyaa u-uhye nya ọháha ọlẹ ká iJihova bala ịKịrayịsị iJisọsị la ẹ-ẹga nyahị kori ká kịnyaa la ọ-kụ irya jwoo kpori-kpori. Ọhẹka lụka nya ọ-Họ Kpa Kpịtịya ọla ẹka ọlẹ, à ka chụ nyọka wa Apwụ nya Oja Ọnyịịla ookpokpo lee ọ-gụ ọọwa rige-rige myị́. A tị maga nyọka wa lụmẹ-lụmẹ ụka ookpokpo ka. Ọkọkọ nyọọwa, wa pyịnyẹng-pyịnyẹng ká mwahị nya ang odudu kahị ka la ọháha ẹ-ẹga nya iJihova bala iJisọsị. Á tịị maga ká ya ẹla ọlẹ ká jẹ́ je angịkịla ịnyịnyị.

14. Ányị ọ-mwahị nya ẹla ka ẹpwụ nya apwụ ị-da ịBayịbụụ wụlẹ nyahị à tị́ ka dahị ụbwọ nyọka kịnyaa la ọ-jẹ́ ang u-uhye nya iya ọkịlaakịla bala ala ịkịla? (Eje Ọnyịịla 119:97) (Yẹ ifoto ịnyịnyị.)

¹⁴ Kori ká ri ọnchẹ nya iJihova ẹ-ẹpwụ nya ẹka lụmẹ-lụmẹ lẹ, ọhẹka ọ ka lang lala o-ri ịngịhyẹ onyeewe nyị ji ká ọwa nyị ka jẹ́ u-uhye nya ang lala ẹla ọ-họ kpakpa nya Ohe, ọháha nyamwụ, bala ọ-ra kpehe kaka. Ẹlịlẹhị tị ri, ang  ọlẹ kahị ka jẹ́ u-uhye nya egbeju nya ẹla ịlịịwẹ bala ịkịla á ka jẹ́-ẹ la ọbaba kaka. Lẹ, ányị a tị́ ka họ? Maga ká wa apwụ ị-da ịBayịbụụ wụlẹ nyahị ịnyịịla-ịnyịịla ịlẹ kahị la wẹ, ká jẹ́ ang bwu ụwa yẹẹyẹẹ. Ụka ká gbachị ẹla ọlẹ ká wo etu nyamwụ nwà ka, mwahị nya ẹla u-uhye nyamwụ. Ẹ-ẹpwụ nya ahyẹẹnụ ọọwa wuu, maga ká kụ irya kpori-kpori ju ẹla ọlẹ ká jẹ́ bala ẹla ọlẹ kọ mẹjẹng u-uhye nya iJihova, Ọnyị nyamwụ, bala ọháha ọlẹ kị la ẹ-ẹga nyang.—Wa Eje Ọnyịịla 119:97.

15. Ịyẹ tị́ du kọ há nyọka kịnyaa la ọ-mwahị nya ang inyeewe bwu ịBayịbụụ?

¹⁵ Kori ká jẹ́ ịngịhyẹ onyeewe lee ang ọkpịpyọ ọhẹ ụka ká wa ịBayịbụụ lee ọ-jẹ́ ang nyịlọng ka wẹwẹ, ọkịlẹtụ a kpụng enyi ka. Ụka ọlịnyị, à ka jẹ́-ẹ yẹ ịlọng lala ọngọlẹ kọ ja mwahị nya okpoko ịgọm myị́. Angịlịnyị kaa bịrị awa lee ahyẹẹnụ ịmanyị tị́ la ugbodu ojuju juwa mwahị ene kị dọmwụ ka yé okpoko ịgọm ochiche-ochiche. Ma, abwọ á tị kaa chaa pyẹpyẹ ka, chajị okpoko ịgọm ju apyobwuna haa jaabwọ myị́ abwọ kọ ri ochiche kaka ba. Ang onyeewe ọnyị kahị jẹ́ bwu ịBayịbụụ tị ju apyobwuna gụ́ wẹẹ! (Eje. 119:127; Etu 8:10) Lẹ, ju ugbodu ká kịnyaa la ịBayịbụụ ọwawa bala ọ-mwahị nya ẹla u-uhye nyamwụ.—Eje. 1:2.

16. Ányị ahị tị́ ka bwu gbịla iJihova bala iJisọsị myị́?

¹⁶ Jaabwọ ká wẹẹ jẹ́ ang, maga ká mwahị nya agbẹyị ịlẹ ká ka kpa ẹla ọọwa họ ụkụrwọ. Ọ-chụ pwokwita, maga ká gbịla ẹla ọ-họ kpakpa nya iJihova bwula ọ-yẹ oye-oye ẹ-ẹga nya angịnyị ka. Gbịla ọháha ọlẹ ká iJisọsị la ẹ-ẹga nya Adamwụ bala angịnyị, bwula ọ-nwụlanọ nyọka yẹ akama chajị nya ẹnyị nya iJihova bala ọ-da aanahị ịla ọjịra-jịra ụbwọ kori kọ dọmwụ lujwo wẹwẹ. Ịnyịnyị, gbịla iJisọsị bwula o-ya ẹla nya Ohe je angịkịla chajị ká ịwa ịnyịnyị ka la iwe nyọka ye āhị nya ọ-ra kpehe ọlẹ ka iJihova ya ha angịnyị ehe myị.

17. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁷ Jaabwọ ká ẹla nya ọ-ra kpehe á lahị gbagbịla gụ́ olene, ịnyịnyị ahị ka la ọháha ẹ-ẹga nya iJihova bala Ọnyị nyamwụ gụ olene lẹ. Ịwa tị ka la ọháha ẹ-ẹga nyahị gụ́ ọwọwa ịnyịnyị. (Jọn. 14:21; Jem. 4:8) Lẹ, ahị kịnyaa la ọ-kpa ịBayịbụụ bala apwụ ịlẹ ká ogu nyahị ya hahị jẹ́ ang u-uhye nya ọ-ra kpehe mẹ. Ang ọjẹ́jẹ ọkịla ka ya ẹla u-uhye nya agbẹyị ịhyẹ ịlẹ kahị ka jẹ́-ẹ yé apyobwuna bwu ọ-ra kpehe bala ọ-ka mẹjẹ nyori ọháha nya iJihova myịhị lẹhị.