1. Ẹlịyẹ ahị tị́ ka jẹ́-ẹ họ ká iJihova ka chị ọkẹkẹnị?

 KỤ IRYA nyori à ya āhị ọlahịchịng ọhẹ ọlẹ kọ há ụhị yẹẹyẹẹ bala o-ju apyobwuna ha ọngịnyị ọlẹ kọ háng yẹẹyẹẹ wẹẹ. Ọ ka jụng yẹẹyẹẹ kori ká ọngọọwa á kpa ka nọ ang kem la ọ-kpịtịya nyamwụ kpong-kpong ka! Ma ọ́ tị ri ká oligu nyang ọọwa á kpa āhị nyang ọọwa họ ụkụrwọ kọ mẹjẹ nyori ọ myọọ lẹhị, ọ ka kpụng ịpyọ yẹẹyẹẹ. Ẹlịyẹ ahị tị́ wẹẹ ya? IJihova hu Ọnyị nyamwụ ha chajị nyahị. IJihova ka chị ọkẹkẹnị yẹẹyẹẹ kori kahị mẹjẹ nyori āhị ọnyịịla ọwẹ bala ọháha ọlẹ kọ gwoo gbịla nyọka ya Ọnyị nyamwụ hahị nyị myịhị lẹhị!—Jọn. 3:16; Rom. 5:7, 8.

2. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Ma jaabwọ ká ụka wẹẹ chịpwụrụ, ọ chịkpẹẹ myị́ nyori áhị ka yẹ ọ-ra kpehe lala āhị ọnyịịla-ọnyịịla kaka. Ọ ka lala o-ri ahị nyị kpa āhị nya Ohe kaka kpụ ịbaa. Ahị chị ọkẹkẹnị nyọlẹ kọ yah ahị, ma ahị-ị́ ya nọ ẹ-ẹga ọlẹ kahị ka jẹ́-ẹ yọọ kaka. Nyọka họ kọ ka lịnyị ka lẹ, o-ri opyii kahị ka kụ irya ụka myị́ ụka ju ang ọlẹ ká Ohe bala ịKịrayịsị họ hahị. Ang ọjẹ́jẹ ọlẹ ka dahị ụbwọ nyọka họ ịnyị. Ahị ka ya ẹla u-uhye nya abwọlẹ kahị wẹẹ yé apybwuna bwu ọ-ra kpehe lẹẹlẹẹ bala abwọlẹ kahị ka yé apyobwuna bwu ụwa ị-ịlahị. Ahị ka ya ẹla ịnyịnyị u-uhye nya abwọlẹ kahị ka mẹjẹ nyori ọháha nya iJihova myịhị lẹhị, ọgụgụụgụ lụka nya ọ-Họ Kpa Kpịtịya.

ABWỌLẸ KAHỊ KAA YÉ APYOBWUNA LẸẸLẸẸ

3. Ụgbẹyị oyina ahị tị́ kaa yé apyobwuna bwu ọ-ra kpehe lẹẹlẹẹ?

³ Ahị wẹẹ yé apyobwuna lẹẹlẹẹ bwu iya ọkịlaakịla nya ịKịrayịsị. Ọ-chụ pwokwita, ọ-ra kpehe nya iJisọsị du ká iJihova kaa hịnyọhi ịhọbịrị nyahị hahị. Ọ́ ri o-pyii nyori ọ ka hịnyọhi hahị ka. Ma ọ la irya nyọka họ ịnyị à du lẹ. Ọngọ da eje ọnyịịla  ọhẹ mẹjẹ nyori ọhịnyọhi nya iJihova myọọ lẹhị. Ọ mwu eje yẹkẹẹ: “À kaa hịnyọhi bala ọ-họ ang ọnyịịla hahị lụmẹ.”—Eje. 86:5; 103:3, 10-13.

4. Ọọlajị nya angịnyị ịlányị iJihova à tị́ hu Ọnyị nyamwụ ha? (ILuku 5:32; 1 iTimoti 1:15)

⁴ Ọ ka la angịhyẹ nyahị nyori nyị́ há kpụ iJihova nyị ka hịnyọhi haa ka myị́. Ẹlịlẹhị ri, ọngọngọhẹ nyahị á chịla ịnọ ká Ohe ka hịnyọhi ha ka. Ọlẹrụ ịPọlụ ya nyori “ḿ dọmwụ chịla kpikpiri kpụ, ị ka wụrụm ọlẹrụ ọnyịịla ọlẹ kpong-kpong ka. Chajị, m kaa tụ [ọjịra-jịra] nya Ohe Oluhye pyịpyị.” Ma ọ tị yẹkẹẹ: “Bwula ọnahị nya Ohe Oluhye ayịdang, a du kam ri ụma nya ọngọlẹ kam ri lẹẹ ẹ-ẹpwụ nya ẹla nyamwụ alẹ lẹ.” (1 Kọr. 15:9, 10) Ụka kahị yẹ irya da bwu ẹpwụ nya ịhọbịrị nyahị, iJihova kaa hịnyọhi hahị. Ịyẹ tị́ du? O-ri yẹkẹẹ ahị chịla nya ọọwa à du ka, ma chajị nyori ahị họ́ọ ịnyị. Kori ká ja la olo nya ọkịlẹtụ chajị nyori à yẹ ịlọng nya ọngọ chịla ka aalẹ, kpịtịya nyori ọ-ọlajị nya angị la cheri-cheri iJihova à du Ọnyị nyamwụ warị ka gbu ka, ma ajị nya alịhọbịrị ịlẹ kị nwụlanọ nyọka yẹ irya da ịnyị.—Wa iLuku 5:32; 1 iTimoti 1:15.

5. Ọ-họ lụmẹ nyahị à du ká iJihova ka hịnyọhi hahị lẹ? Ịyẹ tị́ du kahị ya ịnyị?

⁵ Ọngọngọhẹ nyahị a yọọ nyori iJihova ka hịnyọhi hahị pyii chajị nyori ahị gbịgba họọ ẹ-ẹpwụ nya ẹka lụmẹ-lụmẹ lẹ ka. Tị wẹẹ, o-godayị giri-giri nyahị kaa myị iJihova lẹhị. (Hib. 6:10) Āhị o ri nya Ọnyị nyamwụ ọlẹ kọ hu ha chajị nyahị lẹ, u-uri ọ nwụhị chajị nya ụkụrwọ ọlẹ kahị họ ka. Kori kahị yọọ lala o-ri ahị họ ụkụrwọ lụmẹ kpụ ká Ohe ka yẹhị ahyẹẹrwẹrwa lee ọ-hịnyọhi hahị aalẹ, ọ ka lala ahị wẹẹ ya nyori iJisọsị nyị́ baba nyọka gbu chajị nyahị ka.—Kụ ẹhị yẹ Ala ịGaletiya 2:21.

6. Ịyẹ tị́ du ká ịPọlụ họ ụkụrwọ nya iJihova la ọngịrị-ọngịrị?

⁶ ỊPọlụ jẹ́ nyori ọwa nyị́ ka họ ang kpụ ọnahị nya Ohe myị́ ka. Ịyẹ tị́ tịtị du kọ họ ụkụrwọ nya iJihova la ọngịrị-ọngịrị ịịwẹ? Ọ́ họ nyọka mẹjẹ nyori ọ ma lụmẹ ka, ma nyọka mẹjẹ nyori ọnahị nya iJihova myọọ lẹhị ịnyị. (Efe. 3:7) Lala ịPọlụ, ahị kaa họ ụkụrwọ nya iJihova la ila ọchịchị chajị nyori ẹla nyamwụ myịhị lẹhị, ma ọọlajị nyọka mẹjẹ nyori ahị họ ụkụrwọ lụmẹ kpụ kọ ka yẹhị ahyẹẹrwẹrwa ka.

7. Ụgbẹyị ọkịla oyina ahị tị́ kaa yé apyobwuna bwu ọ-ra kpehe lẹẹlẹẹ? (Ala iRom 5:1; iJemsi 2:23)

⁷ Ụgbẹyị ọkịla ọlẹ kahị kaa yé apyobwuna bwu iya ọkịlaakịla lẹẹlẹẹ ri ọngọngọọng nyahị jẹ́-ẹ ri igu o-chii bala iJihova. a Jaabwọ kahị ya ẹ-ẹpwụ nya ang ọjẹ́jẹ ọlẹ kọ jene nya ọlẹ, ụka kị mahị lẹ, áhị ri oligu nya Ohe ka. Ma ọ-ra kpehe dudu kahị ka jẹ́-ẹ “la okpunyi ẹ-ẹga nya Ohe Oluhye,” ọọwa tị du kahị jẹ́-ẹ tụ jwoo chwẹẹ ịnyịnyị.—Wa Ala iRom 5:1; iJemsi 2:23.

8. Ịyẹ tị́ du ká ẹla nya iJihova ka myịhị lẹhị nyọlẹ kọ ya iwe nya abwọ ọrịrị da hahị?

⁸ Kụ irya ju iwe nya abwọ ọrịrị, kọ ri ịngịhyẹ ọlẹ kọ chịkpẹẹ chajị nyọlẹ kahị jẹ́ ri igu bala iJihova wẹẹ. IJihova á kaa ke ụrụ wo abwọ ọrịrị nya anchẹ nyamwụ ịlẹ kị kaa rị ụka kị tụguru lawụlẹ kem ka, ma ọ kaa wo abwọ ọrịrị nya ọngọngọọng nyahị. Abwọ ọrịrị kaa kpahị ọkịlẹtụ weji bala ọ-ya okpunyi nya ọkịlẹtụ hahị, ma apyobwuna nyamwụ á ba ọ-ọwẹ kem ka. Ọ kaa du ká igu oriri nyahị bala Ohe kaa la ọngịrị gụ́ olene. (Eje. 65:2; Jem. 4:8; 1 Jọn. 5:14) Ụka ká iJisọsị jam odehe, ọ kaa raabwọ ụka lụmẹ-lụmẹ chajị ọ jẹ́ nyori iJihova nyị kaa ke ụrụ wo lọọ, ọọwa tị ju igu oriri nyamwụ bala Adamwụ ọngịrị. (Luk. 5:16) Ọ myịhị lẹhị nyọlẹ kahị jẹ́ ri oligu nya iJihova bala ọ-ka jẹ́-ẹ ya ẹla tọọ ẹ-ẹpwụ nya abwọ ọrịrị, ọọlajị nya iya ọkịlaakịla nya iJisọsị!

 ABWỌLẸ KAHỊ KA YÉ APYOBWUNA Ị-ỊLAHỊ

9. Ányị angị gbịgba ha Ohe la ọmyịmyị à tị́ ka yé apyobwuna bwu ọ-ra kpehe ị-ịlahị?

⁹ Ányị angịlẹ kị gbịgba ha iJihova la ọmyịmyị à tị́ ka yé apyobwuna bwu ẹpwụ nya ọ-ra kpehe ị-ịlahị? IJihova ka ya ọhịhị ọmyịmyị-ka haa. Iru nya angịnyị kaa me nyori ẹlẹwẹ nyị́ ka chịkpẹẹ myị́ ka ọọlajị nyọlẹ ká angịnyị ehe wẹẹ gbu pyịyọọ daalẹ. Ma irya ọlẹ ká iJihova la bwu ọmwụ ọdada ri angịnyị ehe ka hịhị gboyi myị́ oyi. Kori ká Adam á họ ọhọbịrị ka ịnọ, ọngọngọhẹ á ka kụ irya nyori ọhịhị o-gboyi myị́ oyi nyị́ ka chịkpẹẹ ka lẹ ka. Nanana nyori ọhịhị o-gboyi myị́ oyi ka lahị ujwo nyọka ye myị lẹẹlẹẹ myị́, ma ahị ka jẹ́-ẹ myị lọọ chajị iJihova ya ọhịhị nya Ọnyị ọlịkẹjẹ nyamwụ rahị, kọ ri uri ọtụka gụgụ wuu ọlẹ kọ nwụ̀.—Rom. 8:32.

10. Ịyẹ angịlẹ ká Ohe ya ida wụ́ bala angị ri ịkpịlọ ịkịla à tị́ wẹẹ ya ẹhị rịrị gbe?

¹⁰ Ịlẹhị lẹ, ọhịhị ọmyịmyị-ka ri apyobwuna ọlẹ kahị ka yé ị-ịlahị wẹẹ, ma iJihova tịtọ kahị ka já kụ irya u-uhye nyamwụ lẹẹlẹẹ. Angịlẹ ká Ohe ya ida wụ́ wẹẹ ya ẹhị rịrị gbe ọhịhị ọkpịpyọ ụ-ụwa e-epwoohe ụka kị ka kpeji u-uhye nya odehe ọlẹ ta ịKịrayịsị. (Ọwụ. 20:6) Angịlẹ kị ri ịkpịlọ ịkịla wẹẹ nwụlanọ gbe ọ-ka hịhị ị-ịparadayịsị ọla odehe ọlẹ ká ajụjụ bala akama á ka ji kaka. (Ọwụ. 21:3, 4) À ri ọngọhẹ ẹ-ẹpwụ nya ịkpịlọ ịkịla ịlẹ kị la ẹhị ọrịrịị-rịrị nyọka hịhị pyịyọọ ám̀ odehe? Ahị ọwawa ọwẹ á la pyịnyẹng gụ́ ịnya angị ka ka epwoohe kpong-kpong ka! Ohe họ angịnyị ehe kị ka hịhị odehe bwu ọmwụ odada ene. Lẹ, ọhịhị olodehe ka ya ọkẹkẹnị hahị yẹẹyẹẹ.

11-12. Āhị ọwawa ịla ịParadayịsị iyina ahị tị́ ka jẹ́-ẹ ya ẹhị rịrị gbe? (Yẹ ifoto ịnyịnyị.)

¹¹ Kụ irya nya abwọlẹ ká ọhịhị ka la hang ị-ịParadayịsị ọla odehe wẹẹ. Á ka chuko nya ẹdụrụ lee igu kaka. (Ayị. 25:8; 33:24) IJihova ka ya ang ịnyịịla ịlẹ wuu ká tịtọ hang. Ịyẹ à tị́ ka háng ká ka jẹ́ ang u-uhye nyamwụ ụka ọọwa? Iyo ileji? Ịchịnụ? Eje omwumwu? Arụrụ ọgbagba? Ịwẹẹ ọdada á juwa ka, ọbaba ka ji nya angị gba arụrụ nya ebe, angị me ube, bala angị wu ẹrụ. Ọ tị la gede-gede nyori ọbaba ka ji ịnyịnyị nya angị ka họ ụkụrwọ nya ụbwọ ọdada bala  ọ-kpa ahị ju ang, lala ang oriri ọkpụkpụ, ọ-họ ang abwọ ị-kpa họ ụkụrwọ, bala ọ-họ ká odehe ka hụ́hị-hụ́hị. (Ayị. 35:1; 65:21) Nyọlẹ ká wẹẹ ka hịhị gboyi myị́ oyi wẹẹ, à ka la ụka nyọka họ ang ịwẹ wuu bala ịkịla lụmẹ-lụmẹ.

¹² Ọ ka ri ọkẹkẹnị ọtụka nyọka da angị ka wuleji bwula igu ọwụraba tịrẹkpẹ wẹ ọhịhị! (Ụkụr. 24:15) Kụ irya ịnyịnyị nya abwọlẹ ká ka jẹ́ ang gụ́ ọọwa u-uhye nya iJihova bwula ọ-wụ la iru nya ang ịlẹ kọ họ yẹ wẹẹ. (Eje. 104:24; Ayị. 11:9) Ọlẹ kọ tị há gụ́ wuu ri ọ-ka jẹ́-ẹ gbịgba ha iJihova, la irya ọ-ka ya eje wuhi kpong-kpong kaka! À ka ya iwe da “ọhịhị nya ịpyọ ọkpụkpụ ọlụka o-kpii nya ọhọbịrị ọhọhọ” ka họ ká ahị ọwawa ịlịlahị ịwẹ ka nyịng? (Hib. 11:25) Á ka myị-ị họ ịnyị ẹnẹnẹhẹ ka! Ahị ọwawa ịlẹ kahị ka yé ụka ọọwa ka lụmẹ gụ ịngịngịhyẹ ọlẹ kahị wẹẹ hu kịliya lẹẹlẹẹ. Kpịtịya, odehe ọ-ka yẹ ka ri ịParadayịsị á ka ri ang ọlẹ kahị ka ya ẹhị rịrị gbe pyịyọọ ka. Ọ ka ri ẹga ọlẹ kahị ka hịhị ẹnụ myị́ ẹnụ pyii wẹẹ. Ang ịwẹ wuu tị ka chịkpẹẹ ọọlajị nyọlẹ kahị há iJihova lụmẹ, du kọ ya Ọnyị nyamwụ du wẹ ka gbu chajị nyahị!

MẸJẸ NYORI ỌHÁHA NYA IJIHOVA MYỊNG LẸHỊ

13. Ányị ahị tị́ ka bwu mẹjẹ nyori ọháha nya iJihova myịhị lẹhị? (2 Ala ịKọrịntị 6:1)

¹³ Ányị ahị tị́ ka bwu mẹjẹ nyori ẹla nya iJihova myịhị lẹhị nyọlẹ kọ họ ká ọ-ra kpehe chịkpẹẹ? Bwula o-hu ụkụrwọ nyamwụ kụ ịlahị ẹ-ẹpwụ nya ọhịhị nyahị. (Mat. 6:33) Ahị ka kpịtịya nyori iJisọsị gbu “chajị ká angịlẹ wuu kị juwa la ọhịhị onyeewe nyamwụ lẹ, á tụtụm ka juwa hịhị ha ịlaa kpong-kpong kaka. Ma, kị ka juwa hịhị ha ịKịrayịsị ọọwa ọlẹ kọ gbu wọnụ nyaa ju ene kọọ wuleji bwula igu.” (2 Kọr. 5:15) IJihova kaa mẹ ọnahị jẹ́ yẹẹyẹẹ ẹ-ẹga nyahị bala ọ-hịnyọhi hahị. Ahị ka mẹjẹ nyori ahị jẹ́ apyobwuna nya ang ịlẹ wuu kọ họ hahị bala o-ri ị myịhị lẹhị ịnyịnyị bwula ọ-họ ang myị́ ang ọlẹ kahị ka jụ́ họ nyọka gbịgba họọ.—Wa 2 Ala ịKọrịntị 6:1.

14. Ányị ahị tị́ ka bwu mẹjẹ nyori ahị dahịhile ẹla ọmẹjẹ nya iJihova?

¹⁴ Ahị ka jẹ́-ẹ mẹjẹ nyori ọháha nya iJihova myịhị lẹhị bwula ọ-dahịhilọọ bala ọ-kpa ẹla ọmẹjẹ nyamwụ họ ụkụrwọ. Ányị ahị tị́ ka bwu họ ịnyị? Ụka kahị la eje nya ẹla ka chị, lala abwọlẹ kahị ka ka ube-ụpwụ kaka ba lee ụma nya ụkụrwọ ọlẹ kahị ka ye myị, ahị ka kụ irya ju ẹla ọlẹ ká iJihova tịtọ kahị ka họ pyii. (1 Kọr. 10:31; 2 Kọr. 5:7) Ụka kahị cheje nya ẹla kpụnịrọ ọmyịmyị nyahị ẹ-ẹga nya iJihova, ọmyịmyị nyahị bala igu oriri nyahị balọọ kaa la ọngịrị gụ́ ọọwa. Ahị tị kaa la ọ-jẹ́ myị̀myị̀ gụ olene ẹ-ẹga nya ehị ọrịrịị-rịrị nyọka hịhị gboyi myị́ oyi ịnyịnyị.—Rom. 5:3-5; Jem. 2:21, 22.

15. Ányị ahị tị́ ka mẹjẹ nyori ẹla nya iJihova myịhị lẹhị lụka nya ọ-Họ Kpa Kpịtịya?

¹⁵ Ụgbẹyị ọkịla tị ji kahị ka jẹ́-ẹ bwu mẹjẹ nyori ọháha nya iJihova myịhị lẹhị wẹẹ. Ọọwa ri ọ-ka kpa ụka nya ọ-Họ Kpa Kpịtịya ọlẹ mẹjẹ iJihova jaabwọ ká āhị nya ọ-ra kpehe myịhị lẹhị kaka ba. Datị hi ọ-ka nwụlanọ nyọka juwa  lụka nya ọ-Họ Kpa Kpịtịya, ahị ka jẹ́-ẹ wụrụ angịkịla. (1 Tim. 2:4) Wụlẹ ya je angịlẹ ká wụrụ ang ọlẹ kahị kaa họ lụka nya ọ-Họ Kpa Kpịtịya. À ka yé ụbwọ ọdada bwula ọ-ka jw.org ka mẹ ifim ọlẹ ko ri, Ịyẹ tị́ du ká iJisọsị Gbu? bala Kpịtịya nya Igu nya iJisọsị jáa. Angịgbahị nya ọjịra-jịra ka maga kị ka wụrụ angịlẹ kị chị doo-doo. Kụ irya nya ọkẹkẹnị ọlẹ kọ ka ji epwoohe bala odehe kori ká angịhyẹ lẹpwụ nya ịkpịlọ nya iJihova ịlẹ kị byi á tịrẹkpẹ wẹ ẹpwụ nya ogu nyamwụ wẹẹ! (Luk. 15:4-7) La ahyẹẹnụ nya ọ-Họ Kpa Kpịtịya, ahị maga kahị ka dọnụ chị ọng myị́ ọng wuu, ma ọgụgụ ri angị inyeewe bala angịlẹ kị wẹ kaka lụka ọtata lẹ. Ahị tịtọ kị ka jẹ́ nyori ahị yaa myị!—Rom. 12:13.

16. Ịyẹ tị́ du kahị ka kpa ẹrụ ọnyịịla pyẹ gụ́ ọọwa lụka nya ọ-Họ Kpa Kpịtịya?

¹⁶ À ka ya ụbwọ ju ụkụrwọ nya iJihova ẹ-ẹpwụ gụ́ olene ụka nya ọ-Họ Kpa Kpịtịya myị́? Ọ-họ ịnyị ri ụgbẹyị ọnyịịla ọhẹ ọlẹ ká ka jẹ́-ẹ mẹjẹ nyori ang ịlẹ wuu ká iJihova bala iJisọsị họ hahị myịng lẹhị. Jaabwọ kahị wẹẹ ya ụbwọ ju ụkụrwọ nya iJihova gụ́ ọọwa, ịnyịnyị ahị kaa yẹ ụbwọ ọdada nyamwụ gụ́ olene lẹ, ọọwa tịị du ká ahị ọdahile nyahị ẹ-ẹga nyamwụ kaa nwà gụ́ olene ịnyịnyị. (1 Kọr. 3:9) Myị́myị́, maga ká wa ịBayịbụụ Ọwawa nya ọ-Họ Kpa Kpịtịya ịlẹ kịị gba kpehe ụ-ụpwụ ọlẹ ko ri Kụ Ẹhị Yẹ Ụpwụ Ịgọgọ Ẹnẹnẹẹnụ lee ịlẹpwụ nya ụpwụ ọ-kpa jẹ́ ang nya ọjịra-jịra ọlẹpwụ nya epwihi. À dọmwụ ka chụ nyọka jẹ́ ang gụ́ ọọwa u-uhye nya ụpwụ ịgọgọ ịlẹ kị da kpehe wẹ myị́.

17. Ẹlịyẹ à tị́ kaa kpụ iJihova ịpyọ? (Yẹ akpa ọlẹ ko ri, “ Agbẹyị Ịlẹ Kahị ka Mẹjẹ Nyori Ọháha nya IJihova Myịhị Lẹhị.”)

¹⁷ Ẹlịlẹhị tị ri, iwe-ahụrụ nyang ka du á ka jẹ́-ẹ họ ang ịlẹ wuu kị gba kpehe ẹ-ẹpwụ nya ang ọjẹ́jẹ ọlẹ wẹ ka myị́. Ma kpịtịya nyori, iJihova á kaa chụ ang ọlẹ kahị họ họọ kaka pwoku ịnya angịkịla ka; ọháha ọlẹ kọ ji ọkịlẹtụ nyahị ọ kaa yẹ lẹ. Ọ kaa kpọọ ịpyọ ụka kọ yẹ jaabwọ ká āhị nya ọ-ra kpehe myịng lẹhị kaka ba.—1 Sam. 16:7; Mak. 12:41-44.

18. Ịyẹ tị́ du ká ẹla nya iJihova bala iJisọsị ịKịrayịsị kaa myịhị lẹhị?

¹⁸ Ọ-ra kpehe à du kahị jẹ́-ẹ yé ọ-hịnyọhi nya ịhọbịrị nyahị lẹ, ọwa à du kahị jẹ́-ẹ ri igu bala iJihova lẹ, ọwa à tị du kahị la ahị ọdahile nya ọhịhị ọmyịmyị-ka ịnyịnyị lẹ. Lẹ, ahị kịnyaa la ọ-mẹjẹ nyori ọháha nya iJihova myịhị lẹhị mẹ, chajị ọwa à gwoo gbịla du kọ nwụla ahị ọwawa ịwẹ wuu nọ gbehi lẹ. (1 Jọn. 4:19) Ahị mẹjẹ ịnyịnyị nyori ẹla nya iJisọsị myịhị lẹhị mẹ, chajị ahị họ́ọ yẹẹyẹẹ à du kọ hu ọhịhị nyamwụ kịliya wọnụ nyahị ju lẹ!—Jọn. 15:13.