ANG ỌJẸ́JẸ 3
EJE 35 “Chụ Ang Ọlẹ kọ́ Chịla-chịla Gụgụ Wuu”
Cheje nya Ẹla Ịlẹ kị ka Kpụ IJihova Ịpyọ
“Ihi o-ju [iJihova] ju à ri ọmwụ ọdada nya ẹla ọjẹjẹ lẹ. Ọ-ka jẹ Ọngọ Ọlịgọgọ à ri ẹla ọjẹjẹ nya ịlẹhị lẹ.”—ETU 9:10.
ẸHỊ NYA ẸLA
Abwọlẹ kahị ka kpa ẹla ọjẹ́jẹ, ẹla ọ-jẹ́ myị̀myị̀, bala ẹla ọ-kụ ẹhị yẹ pyịị cheje nya ẹla ụ-ụgbẹyị ọkpakpa.
1. Ẹla olujwo oyina ahị tị́ ka họ pyii?
AHYẸẸNỤ ọnyị myị́ ọnyị ahị kaa baba nyọka cheje nya ẹla. Ịhyẹ kaa chịkpẹẹ pwụ ẹgẹhẹ, lala ang ọlẹ kahị ka ri lụtụrụ lee ụka ọlẹ kahị ka rụ ka ube ka nune. Ala ịkịla tị kaa lujwo la ọ-ka cheje u-uhye nyaa. Ị ka gu ịnyịrọ ogogo nyahị, ọkẹkẹnị nyahị, angị háahị-há, lee ịgba ọgbagba nyahị myị́. Ahị tịtọ ká eje ọchịchị nyahị ka dahị ahị bala alugbiyegu nyahị ụbwọ. Ọlẹ kọ tị gụ́ wuu ri, ahị kaa tịtọ ká eje ọchịchị nyahị ka kpụ iJihova ịpyọ.—Rom. 12:1, 2.
2. Ang iyina à tị́ ka dang ụbwọ nyọka cheje ọnyịịla?
2 Ọ ka chịkpẹẹ a ka jẹ́-ẹ cheje ọnyịịla gụ́ kori ká (1) jẹ́ ẹlịlẹhị ọla uhye nya ẹla, (2) kụ irya nya abwọlẹ ká iJihova yẹ ẹla ọọwa, bala (3) wụla ẹla ọọwa yẹ ẹkpẹ imiiye. Ang ọjẹ́jẹ ọlẹ ka ya ẹla u-uhye nya ang ịta ịwẹ, ọ tị ka dahị ụbwọ nyọka yẹ abwọlẹ kahị ka mẹ ang jẹ ịlọhị nyọka jẹ́-ẹ gu ang ọnyịịla bala ọtịpyọ ene hi awụlẹ.—Etu 2:11.
JẸ́ ẸLỊLẸHỊ OLUHYE NYA ẸLA
3. Ya ọ-chụ pwokwita ọlẹ kọ mẹjẹ nyori à baba nyọka jẹ́ ẹlịlẹhị oluhye nya ẹla ene ká ka cheje wẹẹ.
3 Ang ọhọhẹ ọlẹ ká ọngịnyị ka họ nyọka jẹ́-ẹ cheje ọnyịịla ri ọ-ka jẹ́ ẹlịlẹhị oluhye nya ẹla. Ịyẹ tị́ du kọ baba? Kụ irya nyori ọngịnyị ka ẹga nya ọngọ họ utoji chajị nya ẹdụrụ ọhẹ ọlẹ kọ kpọọ la ọngịrị-ọngịrị wẹẹ. Ọngọ họ utoji ọọwa ka cheje nyọka họọ utoji ọlẹ kọ họ́ọ la ọ-wụlọọ yẹ lee ọ-tọọ ịtọ ẹla wo ene ka? Ọ́ ka jẹ́-ẹ lịnyị ka. Ahụ ịnyịnyị ka jẹ́-ẹ cheje nya ẹla gụ́ kori ká jene kụ irya u-uhye nya ẹlịlẹhị ịlẹ kị gu iwe-ahụrụ ọọwa. Ányị a tị́ ka bwu họ ịnyị?
4. Jaabwọ ká ụpwụ nya Etu 18:13 ya, ányị a tị́ ka bwu jẹ́ ẹlịlẹhị oluhye nya ẹla? (Yẹ ifoto ịnyịnyị.)
4 À ka jẹ́-ẹ jẹ́ ẹlịlẹhị kori ká tọ ịtọ ẹla wo. Ọ-chụ pwokwita, ọhẹka ị wụrụng ka ọhụhụ ọhẹ. À ka ka? Kori ká jẹ́ ọngọ wẹẹ họ ọhụhụ ọọwa lee abwọlẹ kị bwu me obyi nya ọhụhụ ọọwa ka, à ka baba nyọka tọọ ịtọ ẹla lala: “Ale bala ụka oyina ị tị́ ka họ ọhụhụ ọọwa? Angị ịmanyị à tị́ ka juwa? Owo à tị́ ka kpẹhị rịrị ọhụhụ ọọwa? Owo anyị à tị́ ka juwa? Ịyẹ angịnyị à tị́ ka họ ụ-ụwa? Ị ka kpa ere ọnyọọngịrị họ ụga?” Ọwẹwẹ nya ịtọ ẹla ịwẹ ka dang ụbwọ nyọka jẹ́-ẹ cheje ọnyịịla.—Wa Etu 18:13.
Tọ ịtọ ẹla wo nyọka jẹ́ ẹlịlẹhị oluhye nya ẹla (Yẹ ọgba 4) a
5. Ẹlịyẹ a tị́ ka họ ụka ká jẹ́ ẹlịlẹhị oluhye nya ẹla kpá?
5 Kori ka jẹ́ ẹlịlẹhị u-uhye nyamwụ kpá lẹ, ẹla ọ-bọọba ri, maga ká kụ irya nya abwọlẹ ká ọhụhụ ọọwa wuu ka la. Ọ-chụ pwokwita, kori ká wẹ ka jẹ́ nyori angịlẹ kị kaa ju ihi nya ehile ịla ịBayịbụụ ka ka wẹ ọhụhụ ọọwa lee ere ọnyọọngịrị ka juwa, la ọngọngọhẹ ọ-ka kpẹhị rịrị ọhụhụ ọọwa ka bẹ? À me irya nyori ọ chịkpẹẹ myị́ ká ọhụhụ ọlịnyị ka yẹ ka ri ọjịra-jịra nya ụya ọyaya onyobyi? (1 Pit. 4:3) Ụ-ụgbẹyị ọkịla, ọ tị ri ká ụka nya ọhụhụ ọọwa á pwoku ụka nya ọjịra-jịra lee ẹrụ ọnyịịla ọ-kpa pyẹ bẹ? Ụka ká kụ irya ju ẹla ị-ịwẹ wuu, ọ ka chịkpẹẹ hang la ọ-ka cheje ọnyịịla. Ẹla ọkịla tị juwa ká ka họ pyii wẹẹ. À jẹ́ jaabwọ ká ahụ yẹ iwe-ahụrụ ọwẹ lẹ; ma ányị iJihova à tị́ yọọ?—Etu 2:6.
KỤ IRYA JU ABWỌLẸ KÁ IJIHOVA YẸ ẸLA ỌỌWA
6. Jaabwọ ká iJemsi 1:5 ya, ịyẹ tị́ du kahị ka raabwọ ká iJihova ka dahị ụbwọ?
6 Bịlẹ iJihova kọ ka dang ụbwọ nyọka jẹ́ irya nyamwụ u-uhye nya ẹla. IJihova myọnụ nyọka ya ẹla ọjẹ́jẹ hahị nyọka jẹ́ kori ká ụgbẹyị ọlẹ kahị wẹẹ ka chụ á ka kpọọ ịpyọ. Ọ kaa ya ẹla ọjẹ́jẹ ọlịnyị ha angịnyị yẹẹyẹẹ “la alibyi oyaya taa-ka.”—Wa iJemsi 1:5.
7. Ányị a tị́ ka bwu jẹ́ irya nya iJihova u-uhye nya ẹla? Ọ-chụ pwokwita oyina à tị́ ji?
7 Kori ká raabwọ ká iJihova ka kpang ụgbẹyị lẹ aalẹ, ya ẹhị reeji nya ọwẹwẹ nyamwụ mẹ. Nyọka chụ pwokwita: Kori ká hwahị ụgbẹyị ụka ká ja ka ẹga, à ka tọ ọngịnyị ọlẹ kọ kụ oye nya ụwa wo kọ ka dang ụbwọ myị́. Ma à ka yegiri ahyaahị ene ká ọngọọwa ka wẹng ẹla? Ịnyị ọ kaa la ka. À ka ke ụrụ kpẹnẹẹ jaabwọ ká ọngọọwa wẹẹ dang ụbwọ nya ụgbẹyị. Ụ-ụgbẹyị ọlịnyịnyị, kori ká bịlẹ iJihova nyọka ya ẹla ọjẹ́jẹ hang, maga ká yẹ ọwẹwẹ nyamwụ bwula ọ-kụ ẹhị yẹ ehile ịla ịBayịbụụ bala itiwe nyaa ịlẹ kị pwoku iwe-ahụrụ nyang. Ọ-chụ pwokwita, ụka ká ja ka cheje kori á ka ka ọhụhụ ọlẹ kahị ya ẹla rụ lalẹ ene, à ka kụ irya ju ẹla ọlẹ ká ịBayịbụụ ya u-uhye nya ụya ọyaya onyobyi, ogu ọtịpyọ, bala ọbaba nyọka hu Ịpyị-Adịrahụ kụ ịlahị nya ang ọlẹ kọ ri irya nya ịlọhị myị́.—Mat. 6:33; Rom. 13:13; 1 Kọr. 15:33.
8. Ịyẹ a tị́ ka họ kori ká baba nya ụbwọ ọdada u-uhye nya ẹla ọlẹ ka já mwahị? (Yẹ ifoto ịnyịnyị.)
8 Kpọkpọọkpọ, à tị ka baba nya ụbwọ ọdada ụka ọhẹ nyọka jẹ́-ẹ yẹ ẹla ọlẹ ká wẹẹ mwahị myị́. Aanahị ịlẹ kị la ẹla ọjẹ́jẹ yẹẹyẹẹ ka jẹ́-ẹ ya irya hang. Ma, à tị ka yé apyobwuna bwula ọ-mwahị nya ẹla la ịlọng. Ẹla lụmẹ-lụmẹ ịlẹ kị ka jẹ́-ẹ dang ụbwọ ji ẹpwụ nya ang abwọ ị-kpa jẹ́ ang nyahị, lala Research Guide for Jehovah’s Witnesses bala Scriptures for Christian Living. Kpịtịya nyori ang ọlẹ ká wẹẹ tịtọ ri ọ-ka cheje ọlẹ kọ ka kpụ iJihova ịpyọ.
Kụ irya ju abwọlẹ ká iJihova yẹ ẹla ọọwa (Yẹ ọgba 8) b
9. Ányị ahị tị́ ka bwu jẹ́ myị̀myị̀ nyori eje ọchịchị nyahị ka kpụ iJihova ịpyọ? (Ala Efesọsị 5:17)
9 Ányị ahị tị́ ka họ ká eje ọchịchị nyahị ka kpụ iJihova ịpyọ? Ang ọhọhẹ ri, ahị baba nyọka jọ́ọ yẹẹyẹẹ. ỊBayịbụụ ya nyori “ọ-ka jẹ Ọngọ Ọlịgọgọ à ri ẹla ọjẹjẹ nya ịlẹhị lẹ.” (Etu 9:10) Ee, ọngịnyị kaa la ẹla ọjẹ́jẹ ọlam-ọlam ụka kọ jẹ́ abwẹla nya iJihova, irya nyamwụ, ang ịlẹ kị họ́ọ bala ịlẹ kị wọọ ẹjẹ. Tọ ịlọng wo yeẹkẹẹ: ‘Nyọlẹ kam jẹ́ ẹlẹhẹ bala ọkịla u-uhye nya iJihova wẹẹ, ányị m tị́ ka cheje nya ẹla kọ ka kpọọ ịpyọ?’—Wa Ala Efesọsị 5:17.
10. Ịyẹ tị́ du ká itiwe nya ehile ịla ịBayịbụụ baba gụ́ ịhọhọ nya ugbiyegu lee epweji nyahị?
10 Nyọka jẹ́-ẹ họ ẹla kpụ iJihova ịpyọ, ahị ka họ ẹlẹhẹ ọlẹ kọ ka wụ angịlẹ kị baahị iyo chii ẹjẹ ụka ọhẹ pyii lẹ. Ọ-chụ pwokwita, ọhẹka adịda bala ịnịna ịhyẹ ịlẹ kị la irya ọnyịịla ka ya ẹla rịrị ọnyị nyaa nyọka rụrwọ ọlẹng ọlẹ kọ la okpoko, lee ọngọ ka go ang nya ahụ haa kpuu myị́, nanana nyori ọngọọwa á ka la ila ọchịchị ẹ-ẹga nya ang nya olegu ka. Ịlẹhị lẹ, ị́ ka tịtọ ká ọnyị nyaa ka yẹ akama ẹ-ẹpwa nya ọrụmwụ ka, ma owo à tị́ ka dọọ ụbwọ nyọka nwà ka ịlahị ẹ-ẹpwụ nya ang nya olegu? Ányị iJihova à tị́ yẹ ẹlẹwẹ? Ahị ka yẹ ọwẹwẹ ụ-ụpwụ nya ịMatiyu 6:33. Ụ-ụwa, iJisọsị byi Angịnyị nya ịKịrayịsị nyị ‘jene tịtọ nya nya ịpyị-adịrahụ nya Ohe Oluhye mẹ.’ Ịlẹhị lẹ ahị kaa ju ihi nya adahị bala ịnahị bala angịnyị ịla epweji nyahị, ma ẹla ọlẹ kọ tị baba hahị gụ́ ri ọ-ka họ ká iJihova ka chị ọkẹkẹnị.
WỤLA ẸLA ỌỌWA YẸ ẸKPẸ IMIIYE
11. Abwẹla oyina ụpwụ nya Ala iFilipayị 1:9, 10 à tị́ ya ẹla rụ kọ ka dang ụbwọ nyọka wụla ang ịlẹ ká wẹẹ chụ bwu yẹ?
11 Kori ká jẹ́ itiwe nya ehile ịlẹ kị pwoku eje ọlẹ ká wẹẹ ka chị lẹ, à baba nyọka wụla ẹla ịlẹ ká wẹẹ ka chụ bwu yẹ rige-rige. (Wa Ala iFilipayị 1:9, 10) Ẹhị ọ-kụ yẹ ẹla pyịị ka dang ụbwọ nyọka jẹ́ ang ọlẹ kọ ka ri ocheju nya ọnyọọnyị nya ẹla ịịwa. Ụka ọhẹ eje ọọwa ka chịkpẹẹ la ọ-chịchị myị́. Ma e-eje ọchịchị ọnyị myị́ ọnyị à kaa la kpụrụrụ lụmẹ ka. Ẹhị ọ-kụ yẹ ẹla pyịị ka dang ụbwọ nyọka jẹ́-ẹ cheje nya ẹla kpakpa ụka ká ẹla ọọwa á dọmwụ lujwo wẹwẹ.
12-13. Ányị ẹla ọ-kụ ẹhị yẹ pyịị à tị́ ka dang ụbwọ nyọka cheje ọnyịịla u-uhye nya ụkụrwọ ọlẹ ká ka ye myị?
12 Kụ irya nya iwe-ahụrụ ọlẹ wẹẹ. À wẹẹ mwahị nya ụkụrwọ ọlẹ ká ka jẹ́-ẹ kpa kpahị ju ugbiyegu nyang. Akụrwọ imiiye à ji lẹ. À wụla ẹla oluhye nyaa yẹ wuu lala ụma nya ụkụrwọ ọọwa, ụka ọlẹ kị ya nọ, abwọlẹ kọ lụrụ hi ẹpwa nyang kaka ba, bala ẹla ịkịla. Akụrwọ imimiiye ịịwa ri ịlẹ ká Ọngịnyị nya ịKịrayịsị ka họ myị́. Ọhẹka, ọhẹ lẹpwụ nyaa háng gụ́ chajị nya ụma nya ụkụrwọ ọọwa lee chajị nyori uri nyamwụ lụmẹ gụ́. Ma ẹla ịkịla tị juwa kị ju ọ-kụ irya ju ene ká ka cheje wẹẹ.
13 Ọ-chụ pwokwita, ọhẹ lẹpwụ nya akụrwọ ịwẹ ka du á ka chị ọjịra-jịra lụmẹ-lụmẹ da? Ọhẹ nyaa ka nung ụka ọlẹ ká baba nyọka kpa da ugbiyegu nyang ụbwọ ẹ-ẹpwụ nya ang nya olegu bala ọ-họ kị ka chị ọkẹkẹnị? Ịtọ ịlịịwẹ ọ-tọtọ ka dang ụbwọ nyọka jẹ́-ẹ “chụ ang ọlẹ kọ chịla-chịla gụgụ wuu,” kọ ri ịgba ọgbagba nya iJihova bala ịbaba nya ugbiyegu nyang, jene nya ang ụdụ ọlala. Ọọwa lẹ, à ka jẹ́-ẹ cheje ọlẹ kọ ka kpụ iJihova ịpyọ lẹlẹ.
14. Ányị ẹla ọ-kụ ẹhị yẹ pyịị bala ọháha ọlala à tị́ ka dahị ụbwọ nyọka chị angịkịla mileji ka?
14 Ẹla ọ-kụ ẹhị yẹ pyịị ka dahị ụbwọ nyọka kụ irya u-uhye nya abwọlẹ ká eje ọchịchị nyahị ka gu angịkịla ịnyịnyị, chajị kahị ka ri “ang ọkịlata ha angịkịla” kaka mẹ. (1 Kọr. 10:32) Ẹlẹwẹ baba ụka kahị ja cheje u-uhye nya ẹla ịlẹ kị ri ịnyịlọhị lala ang ọkụrụ-kụrụ. Ọ-chụ pwokwita, ụma nya ang ọkụrụ-kụrụ lee agidi ojuju ọhẹ ka háahị myị́. Ma kori kọ la aanahị ịla ọjịra-jịra lee alodehe abwọhẹ bẹ? Ẹla ọ-kụ ẹhị yẹ pyịị ka dahị ụbwọ nyọka chị ihi ju irya nyaa. Ọháha ka guhi gbịla nyọka tịtọ nya ịlahị ọkaka nya “angịnyị angịkịla” bala ọ-họ ang meme labwọ. (1 Kọr. 10:23, 24; 1 Tim. 2:9, 10) Ọọwa ahị ka jẹ́-ẹ cheje ọlẹ kọ ka mẹjẹ nyori ahị la ọháha ẹ-ẹga nya angịkịla bala ọ-chị ihi jwaa lẹlẹ.
15. Ẹlịyẹ a tị́ ka kụ irya ju ene nyọka họ ụkụrwọ jahị da eje ọchịchị ọlẹ kọ la kpọnchị?
15 Kori ká ja ka cheje nya ẹla ọlẹ kọ la kpọnchị, maga ká kụ irya u-uhye nya ụkụrwọ ọlẹ kọ ji ẹpwụ nyọka hu ẹla ọọwa họ. IJisọsị mẹjẹẹhị nyị ‘kụ okpoko achụ.’ (Luk. 14:28) Lẹ kụ irya u-uhye nya ụka, okpoko, bala ọngịrị ọlẹ ká ka bịrị nyọka hu eje ọchịchị ọọwa họ ụkụrwọ. Ẹ-ẹpwụ nya iwe-ahụrụ ịhyẹ, à ka baba nyọka me bala ugbiyegu nyang chajị ká ọngọngọọng ka jẹ́ ụkụrwọ ọlẹ kọ baba nyọka họ ká ẹla ọọwa ka chịkpẹẹ myị́. Ịyẹ tị́ du ká obyi omeme ọlịịwẹ baba? Ọ ka dang ụbwọ nyọka jẹ́ nyori eje ọchịchị ọwẹ baba nya ọ-nwụhọ lee ọ-ka cheje ọkịla ka há gụ́ myị́. Ụka ká tị họ ká ugbiyegu nyang á jẹ́, ká tị ke ụrụ wo la irya nyaa ịnyịnyị, ọ ka chaa kpẹẹ la ọ-ka họ ụkụrwọ balang ká eje ọchịchị ọwẹ ka la ocheju ọnyịịla.—Etu 15:22.
CHEJE NYA ẸLA ỌLẸ KỌ KA LA OCHEJU ỌNYỊỊLA
16. Ang iyina à tị́ ka dang ụbwọ nyọka cheje ọlẹ kọ ka cheju ụ-ụgbẹyị ọnyịịla? (Yẹ akpa ọlẹ ịnyịnyị, “ Abwọlẹ Á ka Bwu Cheje Ọnyịịla.”)
16 Kori ká họ ẹla ịlẹ kahị gu ẹnyị wẹ wuu lẹ aalẹ, à nwụlanọ nyọka cheje ọnyịịla lẹ. À kụ ẹhị yẹ ẹlịlẹhị oluhye nya ẹla ọọwa wuu bala ọ-wụla itiwe nya ehile ịlẹ kị ka dang ụbwọ cheje ọlẹ kọ ka kpụ iJihova ịpyọ yẹ lẹ. À ka jẹ́-ẹ bịlẹ iJihova ugbẹnyị nyọka dang ụbwọ ká ka cheje ọlẹ kọ ka cheju ụ-ụgbẹyị ọnyịịla.
17. Ang ọkpọnchị oyina à tị́ kaa da ọngịnyị ụbwọ cheje ọnyịịla?
17 Kori ká dọmwụ cheje nya ẹla ịlẹ kị cheju ụ-ụgbẹyị ọnyịịla lụka ọkẹkpẹ wẹwẹ, kpịtịya nyori ang ọkpọnchị ọlẹ kọ ka dang ụbwọ cheje ọnyịịla ri ọ-ka kpụnịrọ ẹla ọjẹ́jẹ nya iJihova, ọkọkọ nyọka dahịhile ịnya ịlọng. Ọwa ụbwọọmwụ à ka jẹ́-ẹ ya ẹla ọjẹ́jẹ, ẹla ọ-jẹ́ myị̀myị̀, bala ẹla ọ-kụ ẹhị yẹ pyịị, kị ri apa ịkpọnchị nya ẹla ọ-jẹ́ kpori-kpori ha ọngịnyị lẹ. (Etu 2:1-5) Kori kahị ba ẹla ọmẹjẹ nya iJihova jẹ, ahị ka cheje ịnyịịla ịlẹ kị ka kpọọ ịpyọ bala ọ-ya ọkẹkẹnị ọlam-ọlam hahị.—Eje. 23:2, 3.
EJE 28 Igu Oriri Bala iJihova
