Ọhẹka, lala iru nyahị, ọ kaa lang ujwo nyọka kpịtịya nya nyang ịlẹ ka jẹ́. Ma, à yẹ nyori à kaa kpịtịya nyang ị-chụ pwokita ịlẹ ká iJisọsị kpa mẹ ang jẹ hyaa? À kaa jẹ́-ẹ yẹ arụrụ nya ang ịlẹ ká iJisọsị ya ẹla rụ i-irya nyang, ọọwa kaa dang ụbwọ nyọka kpịtịya nyaa. Ịnyịnyị-ịnyịnyị, à ka jẹ-ẹ kpịtịya nya ang ịlẹ ká jẹ́ gụ ọwọwa kori ká kụ irya lala o-ri à juwa yẹ arụrụ nyaa i-irya nyang. Ányị a tị́ ka bwu họ ịnyị? Bwula ọ-gba arụrụ nya ang ịlẹ ka wẹẹ jẹ́ ịnyị.

Angịlẹ kị kaa gba arụrụ nya ang inyewe ịlẹ kị jẹ́ kaa kpịtịya nyaa gụ. Ị yẹ nyori arụrụ ọ-gbagba nyị́ kaa daa ụbwọ kpịtịya nya omyi ẹla kem ka, ma ọ kaa daa ụbwọ kpịtịya nya egbeju nya ẹla ọlẹ kị jẹ́. Arụrụ ị-ịwa á kaa ri ang ịtụka-ịtụka abwẹhẹ ka, ma ang ichiche lee ang ihukee ịnyị. Angịgbahị kaa yé apyobwuna bwu arụrụ ịgbagba ịlịịwẹ yẹẹyẹẹ.

Ụka nya ang ọjẹ́jẹ nyang ọkịla, ọhẹka ọ ka háng nyọka gba arụrụ nya ang ọlẹ ká juwa jẹ́. Abwọlẹ ká arụrụ ị-ịwa ka dang ụbwọ nyọka kpịtịya nya ang ịlẹ ká jẹ́ kaka ba, ka lang ẹbyẹbyị myị!