ANG ỌJẸ́JẸ 1
EJE 2 IJihova À Ri Ẹnyị Nyang Lẹ
Gwogbo Ha IJihova
EGBEJU ẸLA NYA 2025: ‘Anụ gwogbo ha iJihova jaabwọ kọ pwoku ẹnyị nyamwụ.’—EJE. 96:8.
ẸHỊ NYA ẸLA
Jẹ́ jaabwọ á ka ya ogbo ọlẹ kọ pwoku iJihova họọ.
1. Ịyẹ iru nya angịnyị à tị́ kaa ya irya nyaa nọ alẹ?
À YẸ nyori iru nya angịnyị alẹ kaa yẹ ịlaa-ịlaa kem? Ọ-chụ pwokwita, iru nya angịnyị kaa kpa ịlaa bala ang ọlẹ kị la chogu ẹ-ẹpwụ nya intanẹtị ọ-kpa ja oja. Ma, angịhyẹ pyịnyẹng alẹ kaa ya ogbo ha iJihova Ohe Oluhye. Ẹ-ẹpwụ nya ang ọjẹ́jẹ ọlẹ, ahị ka ya ẹla rụ́ etu nyọka ya ogbo ha iJihova bala ang ọlẹ kọ ka guhi gbịla nyọka họ ịnyị. Ahị ka myịmyị-ị̀ jẹ́ jaabwọ kahị ka ya ogbo ọlẹ kọ pwoku iJihova họọ bala abwọlẹ ká iJihova la ịlọmwụ ka ya ogbo ha ẹnyị nyamwụ ị-ịlahị.
ỊYẸ TỊ́ RI ETU NYỌKA YA OGBO HA IJIHOVA?
2. Ányị iJihova à tị́ mẹ ogbo nyamwụ jẹ ọ-Ọgbọdọ nya ịSayịnayị? (Yẹ ifoto ọla ẹbẹ nya ọgbanyẹ ịnyịnyị.)
2 Ịyẹ à tị́ ri ogbo? Ẹ-ẹpwụ nya ịBayịbụụ, omyi ẹla ọlẹ kị yẹda ka ri “ogbo” ka jẹ́-ẹ ri ang myị́ ang ọlẹ kọ du ká ọngịnyị kaa kpẹ̀hị ị-ịlahị nya angịkịla. Ahyẹẹnụ ịmanyị-ịmanyị nyọlẹ ká iJihova gba ala Isirẹlụ kpehe bwu ọnyọhị oriri ọ-ọpyị nya Ijipiti kpá, ọ mẹ ogbo nyamwụ jáa ụ-ụgbẹyị ọlẹbyẹbyị. Kụ irya jaabwọ ká iwe-ahụrụ ọọwa la wẹẹ: Uku ịmanyị tị́ nya ala Isirẹlụ tụguru e-ekpeleji nya Ọgbọdọ nya ịSayịnayị nyọka wo ẹla ọlẹ ká Ohe Oluhye ka ya taa. Egbamwụ o-chowu kpịlẹẹ kpụ kụrụ ogbọdọ ọwẹ. Lụka ọmwaa lẹ, ịmwụ à yịrị ẹga yịrị lẹlẹ. Ọpyị juwa hụ jigi-jigi, apya ja chị, ịkpala ja kpụ bala anụ nya ẹkụrẹ o-gboo ọhẹ ịnyịnyị. (Ehe. 19:16-18; 24:17; Eje. 68:8) Kụ irya nya abwọlẹ kọ ka la ala Isirẹlụ ẹbyẹbyị kaka ba nyọlẹ ká iJihova chị ọngịrị bala ogbo nyamwụ ehe mẹjẹ ụ-ụgbẹyị ọlịịwẹ wẹẹ.
Ụ-ụwa ọ-Ọgbọdọ nya ịSayịnayị, iJihova mẹ ogbo nyamwụ jẹ ala Isirẹlụ ụ-ụgbẹyị ọla ẹbyẹbyị (Yẹ ọgba 2)
3. Ányị ahị tị́ ka bwu ya ogbo ha iJihova?
3 Ma angịnyị ehe tị bẹ? Ahị ka jẹ́-ẹ ya ogbo ha iJihova ịnyịlẹhị myị́? Ee, ahị ka jẹ́-ẹ họ ịnyị. Ụgbẹyị ọhẹ ọlẹ kahị ka jẹ́-ẹ bwu ya ogbo ha iJihova ri ọ-ka ya ọngịrị bala abwụma ịnyịịla nyamwụ je angịkịla. Ahị ka jẹ́-ẹ ya ogbo họọ ịnyịnyị bwula ọ-ya ihi họọ u-uhye nya ang myị́ ang ọlẹ kọ ya ọngịrị hahị nyọka jụ họ. (Ayị. 26:12) Adịrahụ iDevidi ri ọ-chụ pwokwita nya ọngịnyị ọlẹ kọ ya ogbo ha iJihova. Ẹ-ẹpwụ nya abwọ ọrịrị ọhẹ ká iDevidi rị ị-ịlahị nya aluche nya ala Isirẹlụ, o byi Ohe Oluhye yẹkẹẹ: “À la ụmụmẹ bala ọngịrị bala ogbo, à la ọkụrụ-kụrụ, à kpẹ̀hi. Ahụ à la ang myị ang iluhye-ọgba bala ilodehe wuu lẹ.” Ụka ká iDevidi ya abwọ ọrịrị nyamwụ cheju, ‘alụma wuu gwogbo ha iJihova.’—1 Ego. 29:11, 20.
4. Ányị iJisọsị à tị́ ya ogbo ha iJihova?
4 Ụka ká iJisọsị jam odehe, ọ ya ogbo ha iJihova bwula ọ-họ ká angịnyị jẹ́ nyori ẹga nya Adamwụ ọngịrị ọlẹ kọ kpa họ ụkụrwọ ẹbyẹbyị à bwu lẹ. (Mak. 5:18-20) IJisọsị ya ogbo ha iJihova ịnyịnyị bwula ụgbẹyị ọlẹ kọ kaa ya ẹla rụ Adamwụ bala ụgbẹyị ọlẹ kọ kaa kpa angịkịla. Ụka ọhẹ ji ká iJisọsị wẹẹ mẹ ang jẹ u-ube ịgọgọ. Ọnyang ọhẹ juwa ẹ-ẹpwụ nya angịlẹ ká iJisọsị wẹẹ mẹ ang jẹ ká alegu inyibyi kpa yẹ akama ẹ-ẹpwụ nya ẹka 18 lẹ. Alegu inyibyi họ la ịnyịrọ nya ọnyang ọọwa ke kụrẹchẹ du kọ jẹ́-ẹ godayị kọkọ kpakpaakpa myị́ ka. A-akama ochiche à wẹ ka! Ọnyang ọwẹ la iJisọsị ahyẹẹrwẹrwa du kọ jẹ jwoo chwẹẹ dọmwụ nya o-ya ẹla tọọ la ọkọ ọdụmwọ yẹkẹẹ: “Ẹnwa ọnyang, a gbocho hi ẹdụrụ nyang ọwẹ alẹ lẹ!” Ọọwa iJisọsị à ya ụbwọ nyamwụ nịra ọnyang ọwẹ lẹ, ọ wuleji ahyaahị godayị kpakpaakpa “juwa gwogbo ha Ohe Oluhye ụ-ụwa lẹlẹ.” Ọ chị ọkẹkẹnị yẹẹyẹẹ nyọlẹ ká iJihova họ kọ la ogogo myị́myị́! (Luk. 13:10-13) Ọnyang ọwẹ la ang odudu kọ ka ya ogbo ha iJihova, ịnyịnyị ọ tị la ẹ-ẹga nyahị lẹ.
ỊYẸ À TỊ́ KAA GUHI GBỊLA NYỌKA YA OGBO HA IJIHOVA?
5. Ịyẹ à tị́ du kahị ka ya ihi ha iJihova?
5 Ahị kaa gwogbo ha iJihova chajị ahị jwoo ihi kpori-kpori. Ang lụmẹ-lụmẹ ji kị du kahị kaa ju ihi nyamwụ. IJihova à ri agụgụ lẹ; ọngịrị nyamwụ á tị ka myị ẹnẹnẹhẹ ka. (Eje. 96:4-7) Ẹla ọjẹ́jẹ okpori-kpori nyamwụ chehe gede-gede ẹ-ẹpwụ nya ang ịlẹ kọ họ. Ọwa a ya ọhịhị hahị bala ang ịlẹ kahị baba nyọka hịhị kịnyaa lẹ. (Ọwụ. 4:11) Ọ́ kaa nyẹẹkpẹ dahị ka. (2 Sam. 22:26) Ang myị́ ang ọlẹ kọ họ kaa cheju ụ-ụgbẹyị ọnyịịla, ọ tị kaa họ ehe ọchịchị nyamwụ jịra ịnyịnyị. (Joch. 23:14) Ọọwa du ká ọlọmwụ iJeremaya ya ẹla rụ iJihova yẹkẹẹ: “Ẹ-ẹpwụ nya angị jẹ́ ẹla nya ẹpwụma ọnyị myị́ ọnyị, tụ ịdịrịhụ nyaa wuu ọngọ lala ahụ-ụ́ ji ka”! (Jer. 10:6, 7) Ahị la ang lụmẹ-lụmẹ ịlẹ kị du kahị ka ju ihi nya Adahị ọla epwoohe ịnyịlẹhị. Ma áhị kaa ju ihi nya iJihova kem ka, ọ háahị ịnyịnyị.
6. Ịyẹ tị́ du ká iJihova háahị?
6 Ahị kaa ya ogbo ha iJihova chajị nyori ọ háahị yẹẹyẹẹ. Kụ ẹhị yẹ abwẹla ịnyịịla nya iJihova ịlẹ kọ dudu kọ háahị lẹẹ wẹẹ. Ọ ri Ohe nya ahyẹẹrwẹrwa. (Eje. 103:13; Ayị. 49:15) Ụka ká ẹla ọjụjụ á họ tahị, ọ kaa jwọọ ịnyịnyị. (Sẹk. 2:8) Ọ họ ọ chịkpẹẹ ahị ka jẹ́-ẹ tụ jwoo chwẹẹ lala aligu. (Eje. 25:14; Ụkụr. 17:27) Ọ kaa kpịlọmwụ keji; “ọ tịị hiri ẹhị kpẹẹ kaka yẹ uhye-ọgba bala odehe. Ọọ wule okpehika eji hi ịpyị.” (Eje. 113:6, 7) Ịyẹ à tị́ ka du ká ọngịnyị ka tịtọ nyọka ya ogbo ha Ohe ọtụka nyahị ka?—Eje. 86:12.
7. Iwe ọlahịchịng oyina ahị tị́ la?
7 Ahị kaa ya ogbo ha iJihova chajị ahị tịtọ ká angịkịla ka jọ́ọ. Iru nya angịnyị á jẹ́ ẹlịlẹhị u-uhye nya iJihova ka. Ịyẹ tị́ du? Chajị Olegu Onyobyi kpaa idu ẹ-ẹpwụ nya ọkịlẹtụ bwula ịnịịkịla ịlẹ kọ kaa me ba Ohe, ká angịnyị tị kaa myị jwoo. (2 Kọr. 4:4) Olegu Onyobyi họ ká angịnyị myị nyori iJihova nyị ri Ohe o-ju agbama, nyị́ kpahị ju angịnyị ka, bala o-ri ọwa nya-à ju ọmwụ nya iru nya akama ilodehe ọlẹ lẹ. Ma ahị tị jẹ́ ẹlịlẹhị u-uhye nya Ohe nyahị! Ahị la iwe nyọka jẹ́-ẹ ya je angịkịla ụma nya Ohe ọlẹ kọ ri, chajị kị ka ya ogbo họọ ịnyịnyị. (Ayị. 43:10) Eje Ọnyịịla 96 ya ẹla gụgụụgụ u-uhye nya ogbo ọ-ka ya ha iJihova. Jaabwọ kahị wẹẹ ka ya ẹla u-uhye nya eje ọnyịịla ọwẹ, maga ká kụ irya u-uhye nya abwọlẹ ká ka jẹ́-ẹ ya ogbo ọlẹ kọ chịla ha iJihova.
ÁNYỊ AHỊ TỊ́ KA BWU YA OGBO ỌLẸ KỌ CHỊLA HA IJIHOVA?
8. Ụgbẹyị oyina ahị tị́ ka jẹ́-ẹ ya ogbo ha iJihova? (Eje Ọnyịịla 96:1-3)
8 Wa Eje Ọnyịịla 96:1-3. Ahị ka jẹ́-ẹ ya ogbo ha iJihova bwula ẹla ọlẹ kahị kaa ya rwọọ. Ịgba nya ịBayịbụụ ịwẹ juhi ọhụ nyọka “mwu eje ha” iJihova, “gwogbo họọ,” “ya pyẹ ẹnụ myị ẹnụ nyọlẹ kọ chịhị da,” bala ọ-ka “ya ụmụmẹ nyamwụ dodehe tụ ẹpwụma-ẹpwụma da.” Ịwẹ wuu ri agbẹyị ịlẹ kahị ka jẹ́-ẹ ya ogbo ha Adahị olepwoohe bwula ẹla oyaya nyahị. Anchẹ nya iJihova ịlụka onyogo kaa ya abwẹla ịnyịịla nya iJihova bala ang ịlẹ kọ họ je angịkịla. (Dan. 3:16-18; Ụkụr. 4:29) Ányị ahị tị́ ka bwu họ lala ịwịwa ịnyịnyị?
9-10. Ẹlịyẹ a tị́ jẹ́ bwu oja nya Angelena? (Yẹ ifoto ịnyịnyị.)
9 Kụ ẹhị yẹ oja nya ọọnahị Angelena, a kọ kụ United States wẹẹ. Ọ kaa ya ẹla chẹkpẹ ju ẹnyị nya iJihova la ugbodu ojuju ẹ-ẹga ọlẹ kọ kaa họ ụkụrwọ. Nyọlẹ ká Angelena dọmwụ nya ụkụrwọ ụ-ụwa onyeewe wẹẹ, ị wụrọọ ka ọtụguru ọlẹ ká angị inyeewe ịlẹ kị ye ka ụwa kaa la iwe nyọka ya ịlaa je angịkịla. Angelena nwụla arụrụ ịhyẹ nọ nyọka mẹjẹ jaabwọ kọ kaa yé ọkẹkẹnị nyọlẹ kọ ri ọngọhẹ nya Alibeenu nya iJihova. Ma, ene ká iwe ka hi pwọọ kọ ka ya ẹla, ọngọhẹ nya ala ọlụkụrwọ nyamwụ ya ịlọmwụ dodehe nyori adamwụ bala ịnamwụ nyị kpọọ nwà lala Olibeenu nya iJihova. Ọ dọmwụ nyọka ya ẹla ọtịpyọ u-uhye nya ang ịlẹ kahị myị la. Angelena yẹkẹẹ: “Ugbodu juwa gum ene. Ma m̀ kụ irya nyori: ‘M̀ ka ya iwe da ká ọngịnyị ka me ọnọọkịla ba iJihova ị-ịwẹ? Lee m̀ tị́ ka godayị giri-giri họọ?’”
10 Ụka ká ọngọọwa ya ẹla nyamwụ cheju kpá, Angelena raabwọ kpii ẹ-ẹpwụ ẹpwụ. Ọọwa ọ ya ẹla kpẹnẹẹ tọọ yẹkẹẹ: “Iwe-ahụrụ nyam me ịnyang. Ị kpam nwà lala ọngọhẹ nya Alibeenu nya iJihova ịnyịnyị, am tị ri ọngọhẹ nyaa daalẹ wẹẹ.” Ịlẹhị lẹ Angelena juhi yẹẹyẹẹ ụka ọwẹ, ma ọ wu ịlọmwụ kpa kpụ ọ jẹ́ mẹ ifoto ịnyịịla-ịnyịịla ịlẹ kọ hwo bwu ọjịra-jịra nyahị jáa bala o-ya ẹla chẹkpẹ ju ọmyịmyị nyamwụ la ọdụmwọọ. (1 Pit. 3:15) Ịyẹ à tị́ ri ocheju nya ọọwa mẹ? Ụka ká Angelena ka ya ẹla kpá, ọlẹng ọọwa tụ ọkịlẹtụ nyamwụ weji lẹ. Ọ dọmwụ myị nyori ọwa nyị kaa kpịtịya nya ang ịnyịịla ịhyẹ ịlẹ kị họ lụka nya onjwo nyamwụ ọlẹ kọ kaa yẹ jula Alibeenu nya iJihova. Angelena yẹkẹẹ: “Ọ chịla kahị ka chẹkpẹ ju iJihova ịnyịlẹhị. Ihi o ri nyọka ya ẹla chẹkpẹ ju ẹnyị nya iJihova lẹ.” Ahị ịnyịnyị la iwe ọnyịịla nyọka ya ogbo ha iJihova ụka ká angịkịla á dọmwụ ja ya ẹla o-hu ẹpẹpẹ jwoo.
Ahị ka jẹ́-ẹ ya ogbo ha iJihova bwula ẹla oyaya nyahị (Yẹ ọgba 9-10) b
11. Ányị angị gbịgba nya ịlẹhị à tị́ kaa kpa ẹla ọla Eje Ọnyịịla 96:8 họ ụkụrwọ bwu ụka-ụka onyogo?
11 Wa Eje Ọnyịịla 96:8. Ahị ka jẹ́-ẹ ya ogbo ha iJihova la ang ịlala nyahị. Angị gbịgba ha Ohe ụ-ụgbẹyị nya ịlẹhị kaa ya ihi ha iJihova ụ-ụgbẹyị ọwẹ. (Etu 3:9) Ọ-chụ pwokwita, ala Isirẹlụ hu okpoko bala ang i-ju apyobwuna ịkịla ha nyọka nwụ ube ịgọgọ bala ọ-ka kpa kpahị jwoo. (2 Ịdị. 12:4, 5; 1 Ego. 29:3-9) Angịhyẹ nya angịjụgbẹyị nya ịkịrayịsị kaa hu “ang nya ụbwọ nya ịlaa” kpa da iJisọsị bala alẹrụ nyamwụ ụbwọ. (Luk. 8:1-3) Angịnyị nya ịKịrayịsị ịla oyi ọhọhẹ ịnyịnyị kaa da ang du kịla aanaa ịkịla ụka kị ji ẹpwụ nya uhi ọtụka-ọtụka. (Ụkụr. 11:27-29) Alẹ, ahị ịnyịnyị ka jẹ́-ẹ ya ogbo ha iJihova bwula o-hu ha bwu ọkịlẹtụ.
12. Ányị o-hu ha nyahị à tị́ kaa ya ogbo ha iJihova? (Yẹ ifoto ịnyịnyị.)
12 Kụ ẹhị yẹ oja ọhẹ ọlẹ kọ mẹjẹ jaabwọ ká o-hu ha nyahị kaa ya ogbo ha iJihova wẹẹ. La ẹka nya 2020, ẹpwụma nya Zimbabwe la akama nya enyi ododo ka lụka ọtata. Uku ịmanyị tị́ nya angịnyị tụbwọọ ka gbu igu nya imyi, tụ ọọnahị ọhẹ ká ẹnyị nyamwụ ri Prisca. Nanana nyori iwe-ahụrụ ọwẹ tịpyọ kaka kpoye, ọọnahị Prisca kịnyaa la ẹrụ ọnyịịla ọ-kpa pyẹ ẹnụ nya ịWẹnẹsdee bala ịFụrayịdee jaabwọ kọ ri ọhọhọ nyamwụ, tụ ụka nya ẹrụ owuwu. Aloye-ẹpwa nyamwụ kaa kpọọ họ nyọlẹ kọ kaa kpehe nya ẹla Ohe ọkọkọ nyọka ka ẹrụ kaka họ ụkụrwọ. Ị kaa byoo yẹkẹẹ: “Á ka dayi la o-gbu igu nya imyi kaka.” Prisca kaa waa la ahị ọdahile yẹkẹẹ: “IJihova á nyẹẹkpẹ da anchẹ nyamwụ ẹnẹnẹhẹ lẹka.” Nyọlẹ kọ nọ pyịnyẹng, ogu nyahị ya ang oriri bala ang ịkịla du kịla Prisca. O-hu ha nya ọngọngọọng nyahị à du ká ang ịịwa jẹ́ wu ọọnahị ọwẹ ọyị lẹ. Ẹla ọọwa myị aloye-ẹpwa nya Prisca lẹhị du kị byoo yẹkẹẹ: “Ohe á nyẹẹkpẹ dang ẹnẹnẹhẹ lẹka ịlẹhị, lẹ ahị tịtọ nyọka jẹ́ ang u-uhye nyamwụ gụ́ ọọwa.” Angị irwiye lẹpwụ nyaa dọmwụ nyọka wẹ ọjịra-jịra nyahị lẹ.
Ahị ka jẹ́-ẹ ya ogbo ha iJihova la ang ịlala nyahị (Yẹ ọgba 12) c
13. Ányị abwẹla nyahị à tị́ ka jẹ́-ẹ kpa ogbo kịla iJihova myị́? (Eje Ọnyịịla 96:9)
13 Wa Eje Ọnyịịla 96:9. Ahị ka jẹ́-ẹ ya ogbo ha iJihova kori ká abwẹla nyahị-ị́ la cheri-cheri. Ọngọkịliya ọlẹ kọ kaa họ ụkụrwọ u-ube ịgọgọ nya iJihova baba nyọka la cheri-cheri yẹẹyẹẹ. (Ehe. 40:30-32) Ma, ocheri-cheri nya abwẹla à tị dọmwụ baba gụ́ ịnya ugbinyịrọ wẹẹ lẹ. (Eje. 24:3, 4; 1 Pit. 1:15, 16) ỊBayịbụụ ya ahị nyị “pwọ ọngịnyị onyogo” deeji kahị nyị “hu ọngịnyị onyeewe” dakụrụ. Ọọwa ri ahị ka maga kahị ka tụụbwọ hi irya bala abwẹla ịtịpyọ ịlẹ kị wụ iJihova ẹjẹ. Ahị ka maga nyọka kụ irya bala ọ-họ ẹla ụ-ụgbẹyị ọlẹ kọ ka mẹjẹ nyori ahị wẹẹ gbịla abwẹla ịnyịịla nya iJihova. (Kol. 3:9, 10) Bwula ụbwọ ọdada nya iJihova, angịlẹ kị dọmwụ kaa họ ụya lee ọ-họ abwẹga ka jẹ́-ẹ yẹda kpụ ị ka hu abwẹla onyeewe da kụrụ.
14. Ẹlịyẹ a tị́ jẹ́ bwu oja nya Jack? (Yẹ ifoto ịnyịnyị.)
14 Ọ-chụ pwokwita, Jack ri olukpulo ọhẹ ọlẹ kọ kaa họ ẹla abwẹga gbee kịị jwoo ẹnyị nya Olegu Onyobyi. Ang ịtịpyọ ịlẹ ká Jack họ du kị ya eje nya igu woo. Ma, lụka ọlẹ kọ wẹẹ godayị gbe ahyẹẹnụ ọlẹ kị ka nwọọ, Jack myọnụ nyọka jẹ́ ịBayịbụụ bala ọọnahị ọhẹ ọlẹ kọ kaa ka ube nya agba ọlẹ kọ ji kaka mẹ ịBayịbụụ jẹ alụwa. Nanana nyori Jack tịpyọ pwụ ọlịịwẹ, ọ jẹ́ pwọ abwẹla nyamwụ onyogo deeji kpụ ọ hu enyi Ohe. Jack yẹda nyịlẹhị-ịlẹhị kpụ angịhyẹ nya angịlẹ kị kaa gbe alagba dọmwụ nyọka nyà egbejida ụka kị wẹẹ dọọ ọkpahị ahyẹẹnụ ọlẹ kị wẹẹ kpọọ kaka nwụ. Isoja ọhẹ kọ kaa họ ụkụrwọ u-ube nya agba ọọwa yẹkẹẹ: “Jack à ri ọlagba ọlẹ kọ tịpyọ gụ́ wuu kahị la ẹgẹlẹ lẹ. Ọ tị ri ọngọhẹ ẹ-ẹpwụ nya angịlẹ kị há gụ́ wuu lẹẹlẹẹ lẹ.” La epwihi ọ-ba ọlẹ kị nwụ Jack ba, aanahị ịlẹ kị tịrẹkpẹ ka ube nya agba ọọwa kaka họ ọjịra-jịra yẹ ọlagba ọhẹ kọ wẹ ọjịra-jịra ụka ọhọhẹ. Ẹlịyẹ à tị́ gwoo gbịla du kọ wẹ? Abwẹla ọ-yẹda nya Jack myọọ lẹhị à du kọ tịtọ nyọka jẹ́ ang ọlẹ kọ ka họ nyọka jẹ́-ẹ gbịgba ha iJihova lẹ. Ọ la gede-gede nyori abwẹla nyahị kaa ya ogbo ha Adahị ọla epwoohe ịnyịlẹhị!—1 Pit. 2:12.
Ahị ka jẹ́-ẹ ya ogbo ha iJihova bwula abwẹla nyahị (Yẹ ọgba 14) d
ÀNYỊ IJIHOVA À TỊ́ KA BWU YA OGBO HA ẸNYỊ NYAMWỤ LỤKA OKPII?
15. Ányị iJihova à tị́ ka bwu ya ogbo ha ẹnyị nyamwụ ụ-ụgbẹyị ọnyị myị́ ọnyị lụka okpii? (Eje Ọnyịịla 96:10-13)
15 Wa Eje Ọnyịịla 96:10-13. Ịgba ihyẹẹkpẹ nya Eje Ọnyịịla ọwẹ chabwọ nya iJihova lala Ọngọleje bala Adịrahụ ọ-họ ẹla kpakpa. Ányị iJihova à tị́ ka bwu ya ogbo ha ẹnyị nyamwụ lụka okpii? Bwula eje ọlala nyamwụ ịnyị. Lụka okpii, ọ ka ta ịBabịlọn Ọtụka ayịreji, chajị ịgba ọgbagba nya ịnịịkịla họ ang ịtịpyọ yẹẹyẹẹ bala o-me ịnịịkịla ba ẹnyị nyamwụ lụka ọtata lẹ. (Ọwụ. 17:5, 16; 19:1, 2) Angịhyẹ ịlẹ kị kpa ẹhị nya ịlaa yẹ ayịreji ọtata nya ịBabịlọn Ọtụka ka yẹ julahị ẹ-ẹpwụ nya ịgba ọgbagba nya ịlẹhị myị́. Ohyẹẹkpẹ-ẹkpẹ, lụka nya Amagẹdọn, iJihova ka ta odehe nya Olegu Onyobyi lẹpwụ-lẹpwụ ayịreji, du ká aluji nya Ohe ịlẹ kị kaa chị ẹnyị nyamwụ ịrị wuu á ka ji kaka. Ma ọ tị ka kpa ọchịda wẹ angịlẹ wuu kị la ọháha ẹ-ẹga nya ẹnyị nyamwụ bala ọ-kaa jwoo ihi, kị tị nwụlanọ nyọka ya ogbo họọ ịnyịnyị. (Mak. 8:38; 2 Tẹs. 1:6-10) Ụka ká ọmayẹ ohyẹẹkpẹ-ẹkpẹ ọlẹ kọ ka ji la ocheju nya Eji Ọkpakpa nya ịKịrayịsị ọla Ẹka Ụnọ á ka myị́ kpá, iJihova ka chị ịgọgọ ju ẹnyị nyamwụ ụ-ụgbẹyị ọnyị myị́ ọnyị wuu lẹ. (Ọwụ. 20:7-10) Lụka ọwẹ, ẹla ọjẹ́jẹ nya iJihova ka myị odehe “pwẹẹpwẹẹ jaabwọ ká enyi kaa myị ihu ịtụka.”—Hab. 2:14.
16. Ẹlịyẹ a tị́ cheje nyọka họ? (Yẹ ifoto ịnyịnyị.)
16 Ọ ka kpịpyọ yẹẹyẹẹ ụka ká ọng myị́ ọng ọlẹ kọ jam la ọhịhị ka ri angị kaa ya ogbo ọlẹ kọ pwoku ẹnyị nya iJihova họọ! Ma gbee ká ahyẹẹnụ ọwẹ ka pwụ eji, ahị ka jẹ́-ẹ ma da ịlọhị nyọka ya ogbo ha ẹnyị nya Ohe la iwe ọnyị myị́ ọnyị ọlẹ kahị la. Nyọka dahị ụbwọ ya irya nọ u-uhye nya ụkụrwọ ọkpọnchị ọwẹ, Angị Kpẹhị Rịrị Ogu chụ Eje Ọnyịịla 96:8 nyọka ri egbeju ẹla nya ẹka nyahị la 2025. Ọ yẹkẹẹ: ‘Anụ gwogbo ha iJihova jaabwọ kọ pwoku ẹnyị nyamwụ.’
Lụka okpii, ọng myị́ ọng ọlẹ kọ ka jam la ọhịhị ka ya ogbo ọlẹ kọ pwoku ẹnyị nya iJihova họọ! (Yẹ ọgba 16)
EJE 12 Great God, Jehovah
a Ị yẹ ẹnyị ịhyẹ da.
