1. Ang oyina à tị́ há gụgụ wuu ká ọngịnyị ka chụ nyọka họ?

ỤKA lụmẹ-lụmẹ, ẹla ọlẹ ká adịda bala ịnịna chụ nyọka họ kaa chị wu anyị nyaa lụka ọtata. Kori kị cheje ọtịpyọ, ị ka kpa akama wẹ anyị nyaa myị́. Kori kị tị cheje ọnyịịla, ị ka da anyị nyaa ụbwọ nyọka la ọhịhị ọlẹ kọ ka ya ọkẹkẹnị haa. Anyị tị baba nyọka cheje ọnyịịla ịnyịnyị. Eje ọlẹ kọ há gụgụ wuu ká ọngịnyị ka jẹ́-ẹ chị à ri ọ-ka gbịgba ha iJihova, Adahị olepwoohe ọlẹ kọ la ọháha ẹẹ.​—Eje. 73:28.

2. Eje ịnyịịla iyina iJisọsị bala angịlẹ kị mọọ à tị́ chị?

² IJosẹfụ bala iMeri tịtọ nyọka da anyị nyaa ụbwọ kị ka gbịgba ha iJihova. Eje ọchịchị nyaa tị mẹjẹ nyori ịgba ọgbagba nya iJihova à ri ang ọlẹ kọ baba haa gụgụ wuu ẹ-ẹpwụ nya ọhịhị nyaa lẹ. (Luk. 2:40, 41, 52) IJisọsị ịnyịnyị cheje ịnyịịla ịlẹ kị dọọ ụbwọ nyọka họ ang ọlẹ ká iJihova tịtọ kọ ka họ. (Mat. 4:1-10) Adịda bala ịnịna ịlẹ kị la ọháha ẹ-ẹga nya iJihova, ka chị ọgọm bala ọ-chị ọkẹkẹnị nyọka ma ọnyị ụma ọlịịwẹ.

3. Ịtọ ẹla iyina ahị tị́ ka wẹ a-ang ọjẹ́jẹ ọlẹ?

³ Ẹ-ẹpwụ nya ang ọjẹ́jẹ ọlẹ, ahị ka wẹ ịtọ ẹla ịlẹ: Eje ịnyịịla iyina iJihova à tị chị u-uhye nya iJisọsị? Ẹlịyẹ adịda bala ịnịna ịlẹ kị ri angịnyị nya ịKịrayịsị à tị́ ka jẹ́ bwu eje ọchịchị nya iJosẹfụ bala iMeri? Ẹlịyẹ anjwo ikolobya bala ịyẹẹnọ ịlẹ kị ri angịnyị nya ịKịrayịsị à tị́ ka jẹ́ bwu eje ọchịchị nya iJisọsị ịnyịnyị?

4. Eje o-ju apyobwuna oyina iJihova à tị́ chị u-uhye nya Ọnyị nyamwụ?

⁴ IJihova chụ adịda bala ịnịna ịnyịịla ha iJisọsị. (Mat. 1:18-23; Luk. 1:26-38) Ẹla ịlẹ ká iMeri ya bwu ọkịlẹtụ nyamwụ kị da  juwa ị-ịBayịbụụ mẹ ọháha okpori-kpori ọlẹ kọ la ẹ-ẹga nya iJihova bala Omyi Ẹla nyamwụ jẹ. (Luk. 1:46-55) Jaabwọ ká iJosẹfụ ịnyịnyị ju ihi nya omyi ẹla nya iJihova mẹjẹ nyori ọ la ọháha ẹ-ẹga nya Ohe Oluhye bala ọ-tịtọ nyọka họ ẹla kpọọ ịpyọ.​—Mat. 1:24.

5-6. Ịyẹ iJihova à tị́ ya ẹga da kọ họ ta Ọnyị nyamwụ?

⁵ Ahị yẹ nyori iJihova á chụ angịlẹ kị kpụ ụdụ nyọka ri adịda bala ịnịna nya iJisọsị ka. Ang ọlẹ ká iJosẹfụ bala iMeri kpa ka kiliya nyọlẹ kị ma iJisọsị kpá, mẹjẹ nyori ị́ ri alụdụ ka. (Luk. 2:24) Ọ chịkpẹẹ myị́ nyori iJosẹfụ kaa họ ụkụrwọ nya ekeji ọkọkọ nyamwụ ụ-ụdaa ochiche ọhẹ ba ẹpwa nyamwụ ba ị-ịNasareti. Ị́ tị ri angịnyị ịlẹ kị la okpoko lee ang ụdụ lụmẹ ka, ọgụgụụgụ nyọlẹ kị ma anyị lala irwiye lee ọ-gụ ọọwa myị́.​—Mat. 13:55, 56.

⁶ IJihova chị ewu ke iJisọsị hi akama ịhyẹ, ma ịwa wuu Ọ kaa ye kpa rụ hyoo ka. (Mat. 2:13-15) Ọ-chụ pwopkwita, iJisọsị la aanịna ịlẹ kị myị lọọ ka. Kụ irya jaabwọ ká ọkịlẹtụ ka kpụ iJisọsị enyi kaka ba, nyọlẹ ká alugbiyegu nyamwụ á myị ụka nya ọgbanyẹ nyori ọwa à ri iMesaya lẹ ka wẹẹ. (Mak. 3:21; Jọn. 7:5) Ịnyịnyị, ọlala o-ri iJosẹfụ gbu ụka ọlẹ ká iJisọsị ri onjwo wẹẹ. Igu nya iJosẹfụ ọọwa ka dudu ká iJisọsị, kọ ri ọnyị ọgbahị ka ye ụkụrwọ ọlẹ ká adamwụ kaa họ ẹ-ẹpwụ nya ugbiyegu ju ụbwọ. (Mak. 6:3) Jaabwọ ká iJisọsị wẹẹ nwà ka ri ọngọgbahị, ọ jẹ́ jaabwọ kọ ka kpẹhị rịrị ugbiyegu nyamwụ. Ọ ka họ ụkụrwọ yẹẹyẹẹ nyọka daa ụbwọ. Ọ jẹ́ jaabwọ ká ịnyịrọ kaa chị ọngịnyị pyẹpyẹ ụka kọ họ ụkụrwọ nya ahyẹẹnụ kpà.

7. (a) Ịtọ ẹla iyina à tị́ ka da ịhụ bala ịrụ ụbwọ nyọka kpa anyị nyaa nwà? (b) Ányị ẹla ọlụpwụ nya Etu 2:1-6 à tị́ ka da adịda bala ịnịna ụbwọ nyọka mẹ ang jẹ anyị nyaa?

⁷ Kori kanụ ri ịhụ bala ịrụ ịlẹ kị tịtọ nyọka ma anyị, anụ tịlọnụ wo wẹẹ: ‘Ahị ri angị kpịlọhị keji ịlẹ kị la ọháha ẹ-ẹga nya iJihova bala Omyi Ẹla nyamwụ?’ ‘IJihova ka chụhị nyọka kpẹhị rịrị ọnyị ochiche ọlẹ kọ kpịnya wẹẹ?’ (Eje. 127:3, 4) Kori ka tị ri adịda lee ịnịna lẹ, tịlọng wo wẹẹ: ‘M̀ kaa mẹjẹ anyị nyam nyori ọ há nyọka họ ụkụrwọ yẹẹyẹẹ?’ (Ọngọ. 3:12, 13) ‘M̀ kaa maga nyịlẹhị-lẹhị nyọka chị ewu ke anyị nyam hi ang ịtịpyọ ilodehe nya Olegu Onyobyi ọlẹ?’ (Etu 22:3) Ịlẹhị lẹ, á ka jẹ́-ẹ chị ewu ke anyị nyang hi akama ịlẹ wuu kị ka wẹ chaa ọgụ ka myị́. Ọ́ chịkpẹẹ nyọka họ ịnyị myị́ ka. Ma, à ka jẹ́-ẹ nwụlaa nọ gbe akama ilodehe ọlẹ, bwula ọ-mẹjáa la ọháha jaabwọ kị ka kpụnịrọ  ẹla ọjẹ́jẹ ọlẹpwụ nya ịBayịbụụ. (Wa Etu 2:1-6.) Ọ-chụ pwokwita, kori ká ọngọhẹ bwu ugbiyegu nyang á hwabwọ la ọ-ka gbịgba ha iJihova, kpa Omyi Ẹla nya Ohe da anyị nyang ụbwọ nyọka jẹ́ ang odudu kọ baba lụmẹ nyọka godayị giri-giri ha iJihova. (Eje. 31:23) Lee, kori ká olikẹjẹ nyanụ ọhẹ-ẹ́ gbu, mẹ ẹla ịhyẹ bwu ẹpwụ nya ịBayịbụụ jẹ anyị nyang ịlẹ kị ka daa ụbwọ kụrụ ọkịlẹtụ okpenyi bala o-ye okpunyi.​—2 Kọr. 1:3, 4; 2 Tim. 3:16.

8. Ẹla ọmẹjẹ oyina bwu ụpwụ nya Ehile Ọmada 6:6, 7, iJosẹfụ bala iMeri à tị́ kpa họ ụkụrwọ?

⁸ IJosẹfụ bala iMeri jẹ́ da iJisọsị ụbwọ nwà ka ri ọngịnyị ọlẹ ká ẹla nyamwụ kpụ Ohe Oluhye ịpyọ, chajị ị kpa ẹla ọlẹ ká iJihova mẹjẹ adịda bala ịnịna họ ụkụrwọ. (Wa Ehile Ọmada 6:6, 7.) IJosẹfụ bala iMeri la ọháha okpori-kpori ẹ-ẹga nya iJihova, ị tị maga yẹẹyẹẹ nyọka da anyị nyaa ụbwọ la ọháha ụma ọlịnyị.

9. Eje ịkpọnchị iyina iJosẹfụ bala iMeri à tị́ chị?

⁹ IJosẹfụ bala iMeri chụ nyọka gbịgba ha iJihova ụka myị́ ụka bala anjwo nyaa. Ọ la gbagbịla nyori, ị kaa ka ọjịra-jịra nya epwihi-epwihi ka ube ọ-mẹ ẹla nya Ohe Oluhye jẹ ọla ịNasareti, bala ọjịra-jịra nya Ang Oriri Ọchịpwụrụ ọla ẹka-ẹka ịị iJerusalẹm. (Luk. 2:41; 4:16) Ọ chịkpẹẹ nyori, ị ka kpa ụka nya ẹdịyẹ ọ-jẹ ka iJerusalẹm ọwẹ mẹ ang ọlẹ kọ họ ta angịnyị nya iJihova lụka ọ-kẹkpẹ jẹ iJisọsị bala aanamwụ myị́. Ọhẹka, ị ka dọmwụ pẹ kaka yẹ ẹga ịhyẹ ịlẹ kị gu ẹnyị ụ-Ụpwụ Ịgọgọ ịnyịnyị myị́. Ọ́ ka chịkpẹẹ lụmẹ ha iJosẹfụ bala iMeri nyọka kịnyaa la ọ-gbịgba ha iJihova ụka myị́ ụka nyọlẹ kị wẹẹ ma anyị gụ ọọwa ka. Ma, ị ye apyobwuna nyọlẹ kị họ ịnyị. Ugbiyegu nyaa tụ́ ju iJihova chwẹẹ yẹẹyẹẹ nyọlẹ kị hu ịgba ọgbagba nyamwụ kụ ịlahị.

10. Ẹlịyẹ adịda bala ịnịna ịlẹ kị ri angịnyị nya ịKịrayịsị à tị́ ka jẹ́ bwu ẹga nya iJosẹfụ bala iMeri?

¹⁰ Ẹlịyẹ adịda bala ịnịna ịlẹ kị la uhi ojuju nya Ohe Oluhye à tị́ ka jẹ́ bwu ẹga nya iJosẹfụ bala iMeri? Ang ọlẹ kọ baba gụgụ wuu ri ọ-ka mẹjẹ anyị nyang nyori iJihova háng ka ẹpwụ ọkịlẹtụ, bwula ẹla oyaya bala abwẹla nyang. Kpịtịya nyori āhị ọlẹ kọ gụgụ wuu á ka jẹ́-ẹ ya haa ri ọ-ka daa ụbwọ la ọháha ẹ-ẹga nya iJihova. Ang ọkpọnchị ọlẹ ka tị ka jẹ́-ẹ mẹjáa ri ọ-jẹ́ jaabwọ kị ka bwu jẹ́ ịBayịbụụ, raabwọ, ka ọjịra-jịra bala ọ-kpa ẹrụ ọnyịịla pyẹ. (1 Tim.  6:6) À tị ka ya ang nya ugbinyịrọ ịlẹ ká anyị nyang baba haa pyii ịnyịnyị. (1 Tim. 5:8) Ma, kpịtịya nyori, igu oriri la apatabwọ kiwa ka bala iJihova à ka jẹ́-ẹ da anyị nyang ụbwọ be bwu ẹpwụ nya odehe nya Olegu Onyobyi ọlẹ ju ka ẹpwụ nya odehe onyeewe * nya Ohe Oluhye lẹ, a-ang ụdụ lee okpoko ka.​—Isi. 7:19; 1 Tim. 4:8.

11. (a) Ányị ẹla ọmẹjẹ ọlụpwụ nya 1 iTimoti 6:17-19 à tị́ ka da adịda bala ịnịna ụbwọ nyọka cheje ịnyịịla ụka kị juwa kpa anyị nyaa nwà? (b) Ang iyina ugbiyegu nyang à tị́ ka kụ ẹhị yẹ nyọka wu ọyị myị́? Ahị ọwawa iyina anụ tị́ ka ye bwula ọọwa? (Yẹ akpa ọlẹ ko ri, “ Ang Iyina A Tị́ ka Ku?”)

¹¹ Ọ kpịpyọ lụmẹ nyọka yẹ iru nya adịda bala ịnịna ịlẹ kị ri angịnyị nya ịKịrayịsị jaabwọ kị wẹẹ cheje ọnyịịla nyọka da anyị nyaa ụbwọ tụ́ ju iJihova chwẹẹ! Ị kaa gbịgba lawụlẹ ụka myị́ ụka. Ị kaa ka ọjịra-jịra nya epwihi bala ọjịra-jịra ịtụka. Ị tị kaa kpa ẹrụ ọnyịịla pyẹ ịnyịnyị. Ugbiyegu ịhyẹ dọmwụ kaa kpa ẹrụ ọnyịịla pyẹ ẹ-ẹga ká ọbaba ji. Angịkịla kaa ju egbeju ẹpwa nyahị ụga lee ọ-họ ụkụrwọ nya ẹga ọgbịgba ọnwụ́nwụ́. Ugbiyegu ịlẹ kị chụ akụrwọ ịlịịwẹ kaa bịrị okpoko nyọka họ ang ịwẹ, ọ tịị lujwo haa ịnyịnyị. Ma, iJihova ka pyẹ ụbwọ nyamwụ maa, nwaa uri nya ang ịlẹ kị wẹẹ họ. (Wa 1 iTimoti 6:17-19.) Anjwo ịlẹ kị kpa nwà ugbiyegu ịlịịwẹ kaa kịnyaa la ọ-họ ang ịnyịịla ịwẹ ụka kị nwà ka ri angịgbahị kpá. Ị tịị chị ọkẹkẹnị nyọlẹ ká adaa bala ịnaa kpaa nwà ụ-ụgbẹyị ọlịịwẹ! *​—Etu 10:22.

12. Ẹlịyẹ iJisọsị à tị́ baba nyọka họ jaabwọ kọ wẹẹ nwà?

¹² Adịda nya iJisọsị olepwoohe kaa cheje ịnyịịla ụka wuu, adamwụ bala ịnamwụ ilodehe tị kaa cheje ịnyịịla ịnyịnyị. Ma, ụka ọlẹ ká iJisọsị wẹẹ nwà ka ri ọngọgbahị lẹ, ọ kaa cheje nya ẹla lịlọmwụ. (Gal. 6:5) Ọ la iwe nyọka chụ ang ọlẹ kọ ka họ jaabwọ kaahị wuu la ịnyịnyị. Ọ ka jẹ́-ẹ chụ nyọka yẹ ịlọmwụ-ịlọmwụ kem la ọ-họ irya nya Ohe Oluhye ka myị́. Ọkọko nyọọwa, ọ cheje nyọka ri igu ọlam-ọlam bala iJihova. (Jọn. 8:29) Ányị ọgụ-ẹpẹtẹ nyamwụ à tị́ ka bwu da anjwo ikolobya bala ịyẹẹnọ ụbwọ alẹ?

13. Eje ọkpọnchị oyina iJisọsị à tị́ chị ụka ọlẹ kọ ri onjwo wẹ?

¹³ Ụka ọlẹ ká iJisọsị ri onjwo, ọ chụ nyọka ju adamwụ bala ịnamwụ ihi. Ọ́ kaa la egbeju ọngịrị taa, me irya nyori ọ jẹ́ ang gwaa ka. Ọkọkọ nyọọwa, ọ kaa “jwaa ihi hiigu-hiigu.” (Luk. 2:51) Ọ la gbagbịla nyori, iJisọsị á yẹhị da ọnyị ọgbahị oriri nyamwụ bwee ka. Ọ họ ụkụrwọ nyịlẹhị-ịlẹhị nyọka jẹ́ ang nya ekeji ọkọkọ bwu ẹga nya iJosẹfụ adamwụ chajị kọ ka jẹ́-ẹ da ugbiyegu nyamwụ ụbwọ.

14. Ahị tị́ họ ányị kahị jẹ́ nyori iJisọsị kaa jẹ́ Ụpwụ Ịgọgọ yẹẹyẹẹ?

 ¹⁴ Adịda bala ịnịna nya iJisọsị ka ya ụgbẹyị ọlẹbyẹbyị ọlẹ kị bwu kpa mọọ bala ẹla ọlẹ ká alẹrụ nya Ohe Oluhye ya u-uhye nyamwụ joo myị́. (Luk. 2:8-19, 25-38) IJisọsị á tị kpụnịrọ oja ọọwa kem ka; ọ jẹ́ Ụpwụ Ịgọgọ lịlọmwụ ịnyịnyị. Ahị tị́ họ ányị kahị jẹ́ nyori iJisọsị lịlọmwụ kaa jẹ́ Ụpwụ Ịgọgọ yẹẹyẹẹ? Chajị ụka ọlẹ ko ri onjwo ochiche wẹẹ, ko juwa ẹ-ẹga nya angịmẹjẹ ịla iJerusalẹm lẹ, ‘ẹla ọwẹwẹ bala ọ-jẹ́ myị̀myị̀ ọlẹ kọ la lẹ laa ẹbyẹbyị lụmẹ kaka kpoye.’ (Luk. 2:46, 47) Ụka ọlẹ ká iJisọsị gu ẹka iwo kuru imiiye kẹnẹ-kẹnẹ lẹ, ọ la ọ-jẹ́ myị̀myị̀ bwula Ụpwụ Ịgọgọ ọjẹ́jẹ nyori iJihova à ri adamwụ lẹ.​—Luk. 2:42, 43, 49.

15. Ányị iJisọsị à tị́ mẹjẹ nyori ọ cheje nyọka họ irya nya iJihova?

¹⁵ Ụka ọlẹ ká iJisọsị jẹ́ ang ọlẹ ká iJihova tịtọ kọ ka họ lẹ, ọ cheje nyọka họ irya nya iJihova. (Jọn. 6:38) Ọ jẹ́ nyori ọ ka wụ́ angịnyị lụmẹ-lụmẹ ẹjẹ, ọ-kụ irya u-uhye nyọọwa á tị ka kpọọ ịpyọ ka myị́. Ma, ọ cheje nyọka ju ihi nya iJihova. Ụka ọlẹ ká iJisọsị hu enyi Ohe la ẹka iwo imiiye kụrụ ihikichu nyọlẹ kị ma ịKịrayịsị kpá (29 C.E.) lẹ, ẹla ọlẹ kọ baba họọ gụgụ wuu ri ọ-ka họ ang ọlẹ ká iJihova tịtọ. (Hib. 10:5-7) Ụka ọlẹ ká iJisọsị dọmwụ wẹẹ ka chị ẹjẹ u-uhye nya okoji lẹ, ọ kịnyaa la eje ọchịchị nyamwụ la ọngịrị-ọngịrị nyọka họ irya nya Adamwụ.​—Jọn. 19:30.

16. Ẹla ọkpọnchị oyina anjwo à tị́ ka jẹ́-ẹ jẹ́ bwu ẹga nya iJisọsị?

¹⁶ Ju ihi nya adang bala ịnang. Adang bala ịnang á la kpẹẹkpẹẹ ka, jaabwọ ká iJosẹfụ bala iMeri la ka ịnyịnyị. IJihova tị ya ụkụrwọ jwaa ụ-ụbwọ nyọka kpẹhị rịrịng, mẹ ang jẹ́ng bala ọ-kpang ụgbẹyị. Kori ka ke ụrụ wo ẹla ọmẹjẹ nyaa bala o-jwaa ihi, ọ ka ‘ri ahị ọwawa hang.’​—Efe. 6:1-4.

17. Jaabwọ ká ụpwụ nya iJochuwa 24:15 ya, eje nya ẹlịyẹ anjwo ikolobya bala ịyẹẹnọ à tị́ ka chị hịlaa?

¹⁷ Chụ ọngọlẹ á ka gbịgba ha. A baba nyọka la ọ-jẹ́ myị̀myị̀ ẹ-ẹga nya ọngọlẹ ká iJihova ri, ang ọlẹ ko ri irya nyamwụ, bala abwọlẹ á ka bwu họ irya nyamwụ ẹ-ẹpwụ nya ọhịhị nyang. (Rom. 12:2) Ọọwa, a ka jẹ́-ẹ cheje ọlẹ kọ baba gụgụ wuu ọ-ọhịhị nyang, ko ri ọ-ka gbịgba ha iJihova ẹẹ. (Wa iJochuwa 24:15; Ọngọ. 12:1) Kori ka hu ụka nọ nyọka wa ịBayịbụụ bala ọ-jẹ́ ang ụka myị́ ụka, ọháha bala ọmyịmyị nyang ẹ-ẹga nya iJihova ka la ọngịrị gụ ọwọwa.

18. Eje oyina anjwo ikolobya bala ịyẹẹnọ à tị́ ka chị pyii? Ịyẹ à tị́ ka ri apyobwuna nyamwụ?

 ¹⁸ Cheje nyọka hu irya nya iJihova ọhọhọ kụ ịlahị ọ-ọhịhị nyang. Odehe nya Olegu Onyobyi ọlẹ ka pịrịng ju nyori kori ka kpa ọngịrị nyang họ ụkụrwọ nya apyobwuna nyịlọng kem, à ka chị ọkẹkẹnị. Ẹlịlẹhị tị ri, angịlẹ wuu kị ya irya nọ a-ang ụdụ okuku kaa “gu ịlaa oje ọkpachị nya ang ọjụjụ ẹ-ẹpwụ ọkịlẹtụ nyaa chọọchọọ.” (1 Tim. 6:9, 10) Kori ka tị ke ụrụ wo ẹla nya iJihova bala ọ-cheje nyọka hu irya nyamwụ ọhọhọ kụ ịlahị ọ-ọhịhị nyang, à ka nwà “kịlahị” lee ọ-la ẹla ọjẹ́jẹ bala o-ye ọkẹkẹnị ẹ-ẹpwụ nya ọhịhị nyang.​—Joch. 1:8.

19. Ẹlịyẹ adịda bala ịnịna à tị́ ka kpịtịya pyii?

¹⁹ Adịda bala ịnịna, anụ maga nyịlẹhị-ịlẹhị nyọka da anyị nyanụ ụbwọ gbịgba ha iJihova. Kpụnịrọọ, ọọwa ọ ka dang ụbwọ nyọka cheje ịnyịịla lẹlẹ. (Etu 3:5, 6) Kpịtịya nyori ẹla ọlẹ ka họ à ka gu anyị nyang gụ́ ẹla ọlẹ ka ya lẹ. Lẹ, cheje ịlẹ kị ka da anyị nyang ụbwọ họ ẹla kpụ iJihova ịpyọ.

20. Ahị ọwawa iyina anjwo ikolobya bala ịyẹẹnọ à tị́ ka ye kori kị cheje nyọka gbịgba ha iJihova?

²⁰ Anjwo ikolobya bala ịyẹẹnọ, adanụ bala ịnanụ kà jẹ́-ẹ danụ ụbwọ nyọka cheje ịnyịịla ẹ-ẹpwụ nya ọhịhị myị́. Ohihi tị ji ụbwọ nyanụ nyọka cheje ịnyịịla ịịwa chajị nyọka họ ẹla kpụ Ohe Oluhye ịpyọ. Lẹ, ba ọgụ-ẹpẹtẹ nya iJisọsị jẹ, ka cheje nyọka gbịgba ha Adang olepwoohe ọlẹ kọ la ọháha. Kori ka họ ịnyị, ọhịhị nyang ka myị̀ la ụkụrwọ, ọ ka la etu bala ọ-kpụng ịpyọ lẹẹlẹẹ. (1 Tim. 4:16) À ka myị́myị́-ị̀ la ọhịhị ọlẹ kọ ka kpịpyọ gụgụ wuu ị-ịlahị!