1. Ahị tị́ họ ányị kahị jẹ́ nyori ụkụrwọ nyọka họ ká angịkịla ka ri angịjụgbẹyị ri ụkụrwọ ọ-chị ọhịhị da?

ỤKỤRWỌ nyọka họ ká angịkịla ka ri angịjụgbẹyị ri ụkụrwọ ọ-chị ọhịhị da! Ányị ahị tị́ họ kahị jẹ́? Ụka ọlẹ ká iJisọsị da ehile ọlẹ kọ ju ụ-ụpwụ nya ịMatiyu 28:19, 20, o yẹkẹẹ: ‘Anụ họ kịịwa ayịdang a ri angịjụgbẹyị nyam, kanụ juwa hwaa enyi Ohe.’ Ẹlịyẹ ahị tị́ jẹ́ u-uhye nya abwọlẹ ká enyi Ohe ohuhu baba ka ba? O ri opyii kahị ka hu enyi Ohe ene kahị ka la ọchịda. Ọngọlẹ kọ wẹẹ ka hu enyi Ohe ka la ọmyịmyị nyori iJisọsị gbu chajị nyahị, ọ tị wuleji bwula igu, à du kahị ka la ọchịda myị́ lẹ. Ịnyị à dudu ká ọlẹrụ iPita byi angịnyị nya ịKịrayịsị ịkịla yẹkẹẹ: “Enyi Ohe ohuhu . . . wẹẹ chịnụ da lẹẹlẹẹ ịnyịnyị.” (1 Pit. 3:21, NW ) Lẹ, ụka ká ọngọjụgbẹyị onyeewe á hu enyi Ohe, ọ ka jẹ́-ẹ la ẹhị ọrịrịị-rịrị nyọka hịhị gboyi myị́ oyi.

2. Ụma nya angịmẹjẹ ịlányị 2 iTimoti 4:1, 2 à tị́ ya kahị ka ri?

² Kori kahị ka jẹ́-ẹ họ ká angịkịla ka ri angịjụgbẹyị aalẹ, ahị baba nyọka jẹ́ jaabwọ kahị ka mẹ ang jẹ yẹẹyẹẹ. (Wa 2 iTimoti 4:1, 2.) Ịyẹ tị́ du? Chajị iJisọsị dahị ehile yẹkẹẹ: ‘Anụ họ kịịwa ayịdang a ri angịjụgbẹyị nyam, kanụ juwa mẹ ang jaa.’ Ọlẹrụ ịPọlụ ya nyori ahị nyị “cheri” ẹ-ẹpwụ nya ụkụrwọ ọwẹ, “chaji, o-bwula ụgbẹyị ọlịịwẹ, ahụ ayịdang bala angịlẹ ká juwa mẹ ẹla nya Ohe Oluhye jẹ, à ka bwu wu ọchịda nya Ohe Oluhye ọyị myị́ lẹlẹ.” Ịnyị à tịtị du lẹ ká ịPọlụ ya nyị “juwa kpahị ju ụma nya ang ọlẹ ká juwa mẹjẹ angịnyị” mẹ lẹlẹ. (1 Tim. 4:16) Chajị nyọlẹ ká ang ọmẹjẹ bala angịnyị ọ-ka ri angịjụgbẹyị da ori wu  awụlẹ lẹ, ahị baba nyọka jẹ́-ẹ mẹ ang jẹ yẹẹyẹẹ.

3. Ẹlịyẹ ahị tị́ wẹẹ ka kụ ẹhị yẹ u-uhye nya ịBayịbụụ ọmẹjẹ a-ang ọjẹ́jẹ ọlẹ?

³ Ahị kaa mẹ ịBayịbụụ jẹ uku nya angịnyị chị odehe ọnụ wuu. Ma jaabwọ ká ang ọjẹ́jẹ olene nyọlẹ mẹjẹ, ahị tịtọ kahị ka da angịnyị lụmẹ-lụmẹ gụ ọwẹ ụbwọ nyọka wẹ ka hu enyi Ohe bala ọ-ka ri angịjụgbẹyị nya ịKịrayịsị. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ịrụ ịkịla ịlẹ ká ọngọmẹjẹ ọnyị myị́ ọnyị baba nyọka họ, nyọka jẹ́-ẹ da ọngịnyị ụbwọ nwà ka hu enyi Ohe.

4. Ịyẹ tị́ du ká ọngọ mẹ ang jẹ ka wu ịlọmwụ kpa ụka kọ ja mẹ ịBayịbụụ jẹ ọngịnyị? (Yẹ ẹla ọlekpeleji ịnyịnyị.)

⁴ Ang ịlẹ kahị kaa mẹjẹ bwu ịBayịbụụ háahị. Lẹ ụka ọhẹ, ahị kaa tịtọ nyọka ya ẹla u-uhye nya ang ịịwa. Abwọ myị́ abwọ kọ tị la, kori kahị ja kpịlahị nya Ẹpwang ọ-Kụ gbeji ọjẹ́jẹ, ịBayịbụụ Ọjẹ́jẹ nya Ọjịra-jịra, lee ịBayịbụụ ọmẹjẹ ọngịnyị ẹ-ẹpwa, ọngọlẹ kọ wẹẹ mẹ ang jẹ á baba nyọka ya ẹla gbọng ka. Chajị nyọka jẹ́-ẹ mẹ ang jẹ bwu ẹpwụ nya ịBayịbụụ, ọngọlẹ kọ wẹẹ mẹ ang jẹ ka wu ịlọmwụ kpa, bala ọ-ka wụlẹ ẹla myị́ ẹla ọlẹ kọ jẹ́ wuu u-uhye nya ịBayịbụụ ọlẹ kị wa ka. * (Jọn. 16:12) Chụ ang ọlẹ ka jẹ́ ụka ka hu enyi Ohe bwaa ka pwokwu ọlẹ ka jẹ́ lẹẹlẹẹ wẹẹ. A ka yẹ nyori, ẹla ịkpọnchị ịmanyị-manyị a wo etu nyaa ụka ọọwa lẹ. (Hib. 6:1) Ọ la ẹka ịmanyị-manyị ene kaa jẹ́ ang ịlẹ ka jẹ́ wẹ alẹ, lẹ a maga nyọka mẹ ang myị́ ang wuu jẹ ọngọ onyeewe ụka ookpokpo ka.

5. (a) Jaabwọ ká ụpwụ nya 1 Ala ịTẹsalonika 2:13 ya, ẹlịyẹ ahị tị́ tịtọ ká ọngọlẹ kahị kaa mẹ ịBayịbụụ jẹ ka jẹ́ bwu ang ọjẹ́jẹ nyamwụ? (b) Ányị ahị tị́ ka ju ọngọlẹ kahị wẹẹ mẹ ịBayịbụụ jẹ ọhụ nyọka ya ẹla u-uhye nya ang ịlẹ kọ wẹẹ jẹ́?

⁵ Ahị tịtọ ká ọngọlẹ kahị wẹẹ mẹ ịBayịbụụ jẹ ka jẹ́ nyori ang ọlẹ kahị wẹẹ mẹ jọ́ọ bwu ẹpwụ nya Ụpwụ Ịgọgọ. (Wa 1 Ala ịTẹsalonika 2:13.) Ányị ahị tị́ ka bwu họ ịnyị? Ju ọngọlẹ ka wẹẹ mẹ ịBayịbụụ jẹ ọhụ nyọka ya ẹla u-uhye nya ang ọlẹ kọ wẹẹ jẹ́. Ọkọkọ nyọka da etu nya ẹla ịla ịBayịbụụ wụlẹ ụka myị́ ụka, byoo kọ ya etu nya ịhyẹ jeng. Da ọngọlẹ ka wẹẹ mẹ ịBayịbụụ jẹ ụbwọ kọ yẹ abwọlẹ kọ ka jẹ́-ẹ kpa ẹla ọọwa họ ụkụrwọ. Tọọ ịtọ ẹla ịlẹ kị ka gba irya nyamwụ kpehe u-uhye nya ịBayịbụụ ọlẹ kọ wa. (Luk. 10:25-28) Ọ-chụ pwokwita, too wo: “Ányị ụpwụ ịgọgọ ọwẹ à tị́ dang ụbwọ nyọka yẹ abwụma nya iJihova ọhẹ?” “Ányị ẹla ọlẹ ka jẹ́ bwu ẹpwụ nya ịBayịbụụ ọwẹ à tị́ ka jẹ́-ẹ dang ụbwọ?” “Ányị ẹla ọlẹ ka jẹ́ wẹẹ à tị́ lang?” (Etu 20:5) A-abwọlẹ kọ jẹ́ ang lụmẹ kaka ba, à ri ẹla ka, ma abwọlẹ ká ang ọlẹ kọ jẹ́ wẹ họ́ọ bala ọ-nwụlanọ nyọka kpa họ ụkụrwọ à baba gụ wuu lẹ.

6. Ịyẹ tị́ du kọ ka há myị́ nyọka byi ọngọ jẹ́ mẹ ang jẹ yẹẹyẹẹ nyị kpahị chị kaka mẹ ịBayịbụụ jẹ ọngịnyị?

 ⁶ À kpa angịlẹ kị jẹ́-ẹ mẹ ang jẹ yẹẹyẹẹ bịlọng kaka mẹ ịBayịbụụ jẹ ọngịnyị ẹnẹhẹ lẹ? O ri ịnyị aalẹ, taa wo nya ang ọlẹ kị yẹ u-uhye nya abwọlẹ ka mẹ ịBayịbụụ jẹ bala abwọlẹ ka jẹ́ kpa ịBayịbụụ mẹ ang jẹ kaka ba. Kori kahị tịtọ nyọka jẹ́-ẹ mẹ ang jẹ gụ olene aalẹ, ahị ka kpịlọhị keji pyii. (Kụ ẹhị yẹ Ụkụr. 18:24-26.) Ụka ka họ kpà, tọ ọngọlẹ kọ kpang chị wẹẹ wo kori kọ me irya nyori ọngọlẹ ka wẹẹ mẹ ang jẹ ja wo etu nya ẹlịlẹhị ọlẹ kị wẹẹ mẹjọ́ọ. À dọmwụ ka jẹ́-ẹ byi ọngọọwa nyị mẹ ịBayịbụụ jọ́ọ myị́, kori á ka ji ẹpwa ka lala epwihi okpokpo lee o-kpoye nyọọwa. Ọ lịnyị ka dudu ká ịBayịbụụ ọjẹ́jẹ nyamwụ á ka chị doodoo ka bala ọ-ka mẹjọ́ọ jaabwọ ká ang ọjẹ́jẹ ju apyobwuna kaka ba. A yọọ lala o-ri ọngọlẹ “kam” kaa mẹ ang jẹ a wẹ lẹ, ọngọkịla á ka jẹ́-ẹ mẹ ang jọ́ọ ka lẹ ka. À tịtọ nya ang ọlẹ kọ há gụ wuu ha ọngọlẹ ka wẹẹ mẹ ang jẹ, chajị kọ ka jẹ́-ẹ nwà kịlahị-ịlahị ẹ-ẹpwụ nya ẹlịlẹhị ọjẹ́jẹ.

7. Ịyẹ à tị́ ka da ọngọlẹ ka wẹẹ mẹ ang jẹ ụbwọ ká ang ọlẹ kọ wẹẹ jẹ́ ka kpọọ ịpyọ?

⁷ Ọngọlẹ ka wẹẹ mẹ ịBayịbụụ jẹ baba nyọka yẹ ila ọchịchị nyang, bala ọ-ka wo jaabwọ ká ahụ ayịdang myị ju ẹlịlẹhị ịlẹpwụ nya ịBayịbụụ. (1 Tẹs. 1:5) Ọọwa ka dudu ká ang ọlẹ ka wẹẹ mẹjọ́ọ ka kpọọ ịpyọ gụ olene. Kori ọọwa á pwokwu, ya joo abwọlẹ ká ọ-kpa itiwe nya ehile ịlẹpwụ nya ịBayịbụụ họ ụkụrwọ dang ahụ ụbwọ. Ọọwa lẹ, ọ ka jẹ́ nyori ala i-ju apyobwuna nyị ji ẹpwụ nya ịBayịbụụ ịlẹ kị ka jẹ́-ẹ dọọ ọwa ụbwọ ịnyịnyị lẹlẹ.

8. Ang ọkịla oyina a tị́ ka jẹ́-ẹ họ nyọka da ọngọlẹ ka wẹẹ jẹ́ ịBayịbụụ ta ụbwọ? Ịyẹ tị́ du á ka họ ịnyị?

⁸ Ụka kanụ juwa jẹ́ ịBayịbụụ, gu ẹnyị nya aanahị alẹng bala anyang ịlẹ kị la akama ụma ịlẹ kọ la bala abwọlẹ kị bwu kụrwaa. Ụka kanụ juwa jẹ́ ang, à ka jẹ́-ẹ kpa ọngọhẹ ọlẹ ká ọgụ-ẹpẹtẹ nyamwụ ka dọọ ụbwọ bwu ọjịra-jịra ba ịlọng kaka jẹ́ ang balọọ. Lee, à ka jẹ́-ẹ mwahị nya oja ịlẹ kị ka gwoo ọ-ọkịlẹtụ bwu jw.org ụpa ọlẹ kọ ri, “The Bible Changes Lives.” * Ang ọjẹ́jẹ bala ifim ịlịnyị ka jẹ́-ẹ da ọngọlẹ kaa jẹ́ ịBayịbụụ ta ụbwọ nyọka yẹ jaabwọ kọ há nyọka kpa itiwe nya ehile ịlẹpwụ nya ịBayịbụụ họ ụkụrwọ ẹ-ẹpwụ nya ọhịhị nyamwụ.

9. Ányị a tị́ ka jẹ́-ẹ ju ọngọlẹ ka wẹẹ jẹ́ ịBayịbụụ ta ọhụ nyọka mẹ ang ịlẹ kọ wẹẹ jẹ́ jẹ alugbiyegu bala aligu nyamwụ?

⁹ Kori ká ọngọlẹ kaa jẹ́ ang ta á ye ahụ lee ọ-rwọrụ, ọngọ oheeye nyamwụ kaa jẹ́ ang?  Kori kọ ri ịnyị ka aalẹ, wụrọọ nyọka jẹ́ ang balanụ. Ju ọngọlẹ ka wẹẹ mẹ ang jẹ ọhụ nyọka ya ẹla ọlẹ kọ wẹẹ jẹ́ je alugbiyegu bala aligu nyamwụ. (Jọn. 1:40-45) Ányị a tị́ ka bwu họ ịnyị? A ka too wo myị́, “Ányị a tị́ ka wụlẹ ẹlịlẹhị ọlẹ ka wẹẹ jẹ́ je alugbiyegu nyang?” lee “Ụpwụ ịgọgọ oyina a tị́ ka kpa da ẹla ọlẹ wụlẹ je oligu nyang?” Bwula ụgbẹyị ọlịịwẹ, a wẹẹ mẹjọ́ọ jaabwọ kọ ka bwu ri ọngọmẹjẹ. Ụka kọ chịla, ọ ka dọmwụ nyọka kpa ẹrụ ọnyịịla pyẹ bala alọjịra-jịra. A dọmwụ ka jẹ́-ẹ tọ ọngọlẹ ka wẹẹ mẹ ịBayịbụụ jẹ wo myị́ kori kọ jẹ́ ọngọhẹ ọlẹ kọ ka myị ọnụ nya ịBayịbụụ ọjẹ́jẹ. Kori kọ ya nyị ee, maga ka yẹ ọngọọwa i-ijata ka ya ẹla nyọka jẹ́ ịBayịbụụ tọọ. Mẹ ifim ọlẹ ko ri, Ányị Ahị tị-ị Bwu Jẹ́ ỊBayịbụụ Bala Angịnyị? * jọ́ọ.

10. Jaabwọ ká ụpwụ nya 1 Ala ịTẹsalonika 2:7, 8 ya, ányị ọngọmẹjẹ à tị ka gbịla ọgụ-ẹpẹtẹ nya ịPọlụ?

¹⁰ Angịmẹjẹ ka kpahị ju angịlẹ kị wẹẹ mẹ ang jẹ pyii. Yaa lala angịlẹ kị ka ri aanahị ẹ-ẹpwụ nya ọjịra-jịra myị́ wẹẹ. (Wa 1 Ala ịTẹsalonika 2:7, 8.) Ọ́ chịkpẹẹ nyọka pehi aligu nyaa ịlẹpwụ nya odehe bala ọ-ka yẹda nyọka gbịgba ha iJihova ị-ịwẹ ahyaahị ka. Ahị baba nyọka daa ụbwọ kị ka ye aligu ịlam ọọjịra-jịra. Ri oligu nya ọngọlẹ á kaa mẹ ịBayịbụụ jẹ bwula ọ-bịrị ụka balọọ. Ọọwa-á ka ba ụ-ụka nya ang ọjẹ́jẹ kem ka, a ka họ ịnyị ụka ọkịla myị́ ịnyịnyị. Ọ-wụrọọ lee ọ-da ụpwụ du tọọ bwu ifon bala o-jwoo ụga pyịnyẹng-pyịnyẹng ụka kanụ ja jẹ́ ang ka, mẹjẹ nyori a kpahị jwoo.

11. Ịyẹ ahị tị́ tịtọ ká ọngọlẹ kahị kaa mẹ ịBayịbụụ jẹ ka ye ẹ-ẹpwụ nya ọjịra-jịra? Ányị à tị́ du?

¹¹ Ị kaa ya nyori: “Ehe oliku-liku nya-à kaa nwụ ọjị-ụtụ lẹ.” Ahị ka jẹ́-ẹ ya myị́ nyori: “Ọjịra-jịra lẹpwụ-lẹpwụ à kaa họ ká ọngịnyị ka ri ọngọjụgbẹyị lẹ.” Lẹ, ụka ká ọngọ jẹ́ mẹ ang jẹ á da ọngọlẹ kọ wẹẹ mẹ ịBayịbụụ jẹ ụbwọ nyọka jẹ́ alọjịra-jịra, ịwa ịnyịnyị kaa dọọ ụbwọ nyọka tụ́ ju iJihova chwẹẹ gụ olene. Ọọwa ka dudu ká ọngọlẹ kọ wẹẹ jẹ́ ịBayịbụụ ka ye aligu ịnyịịla ẹ-ẹpwarịrị nya angịnyị nya Ohe Oluhye ịlẹ kị ka jẹ́-ẹ dọọ ụbwọ ri oligu nya iJihova gụ ọọwa bala ọ-jwoo ọhụ ụka kọ la akama. Ahị tịtọ nyọka họ ká ọngọ wẹẹ jẹ́ ịBayịbụụ ka jẹ́ nyori ọwa nyị ri alọjịra-jịra bala o-ri ụpa nya ugbiyegu nya olegu nyahị. Ahị tịtọ ká ọháha nya aanịna ọlẹ kahị la ka gbile ọng myị́ ọng ọlẹ kahị kaa jẹ́ ịBayịbụụ ta wẹ ẹpwarịrị nyahị. Ọọwa ka du kọ ka chọọ kpẹẹ la ọ-ka tụụbwọ hi aligu ịlẹ kị ka dọọ ụbwọ nyọka la ọháha ẹ-ẹga nya iJihova ka. (Etu 13:20) Kori ká aligu nyamwụ inyogo á pwọọ, ọ ka jẹ́ nyori ọwa nyị ka ye aligu ịlam ẹ-ẹpwụ nya ogu nya iJihova.​—Mak. 10:29, 30; 1 Pit. 4:4.

12. Ịyẹ tị́ du kahị ka ya ẹla u-uhye nya ọngịnyị o-hu ịlọmwụ ju iJihova ụ-ụbwọ bala enyi Ohe ohuhu?

¹² Ọ baba á ka ya joo ụka myị́ ụka apyobwuna nya o-hu ịlọmwụ ju iJihova ụ-ụbwọ bala o-hu enyi Ohe. Chajị, ang odudu kahị kaa mẹ ịBayịbụụ jẹ ọngịnyị ri ọ-ka dọọ ụbwọ kọ ka wẹ ka hu enyi Ohe bala o-ri ọngọjụgbẹyị. Ụka ká ịBayịbụụ ọjẹ́jẹ nyanụ á yeji lala ọya ịmanyị-manyi lẹ, ọgụgụụgụ kori kọ ja dọmwụ nya ọ-ka ọjịra-ọjịra lẹ, họ ká ọngọlẹ ka wẹẹ jé ịBayịbụụ ta a jẹ́ nyori ang odudu kọ wẹẹ jẹ́ ịBayịbụụ ri ọ-ka dọọ ụbwọ nyọka dọmwụ nya ọ-gbịgba ha iJihova lala ọngọhẹ nya Alibeenu Nyamwụ.

13. Ẹta ẹdịyẹ iyina ọngọ wẹẹ jẹ́ ịBayịbụụ à tị́ị̀ hu nyọka nwà ka hu enyi Ohe?

¹³ Ang lụmẹ-lụmẹ ji ká ọngọlẹ kọ wẹẹ tịtọ nyọka hu enyi Ohe baba nyọka họ! Ọhọhẹ, ọngọlẹ kọ wẹẹ jẹ́ ịBayịbụụ ka wẹ ka jẹ́ iJihova, la ọháha ẹ-ẹga nyamwụ bala ọ-la ọmyịmyị ẹ-ẹga nyamwụ ịnyịnyị. (Jọn. 3:16; 17:3) Ọọwa lẹ, ọ ka wẹ ri oligu nya iJihova bala aanahị alẹng tụ́ anyang ịlọjịra-jịra lẹlẹ. (Hib. 10:24, 25; Jem. 4:8) Ọ myịmyị nọ chẹẹ lẹ, ọngọlẹ kọ wẹẹ jẹ́ ịBayịbụụ a ka pwa abwẹla ịtịpyọ bala ọ-yẹda bwu ịhọbịrị nyamwụ lẹlẹ. (Ụkụr. 3:19) Ịnyịnyị, ọmyịmyị nyamwụ ka gwoo gbịla nyọka ya ẹlịlẹhị ọlẹ kọ wẹẹ jẹ́ je angịkịla. (2 Kọr. 4:13) Ọọwa lẹ, ọ ka hu ịlọmwụ ju iJihova ụ-ụbwọ bala ọ-mọọ jẹ bwula enyi Ohe ohuhu lẹlẹ. (1 Pit. 3:21; 4:2) Ahyẹẹnụ ọlịnyị kaa ri ọkẹkẹnị ha ọng myị́ ọng nyahị. Jaabwọ ká ọngọlẹ ka wẹẹ jẹ́ ang ta wẹẹ hu ẹta ẹdịyẹ kịnyaa kịlahị, dọọ ọlẹẹkwaa yẹẹyẹẹ ka jwoo ọhụ nyọka jẹdịyẹ kịnyaa ụ-ụgbẹyị ọnyịịla.

14. Ányị ọngọ mẹ ang jẹ à tị́ ka bwu wụla ọnwànwà nya ọngọ wẹẹ jẹ́ ịBayịbụụ yẹ?

¹⁴ Ahị baba nyọka ju ugbodu ụka kahị ja da ọngọlẹ kahị kaa mẹ ang jẹ ụbwọ nyọka hu ịlọmwụ ju iJihova ụ-ụbwọ bala o-hu enyi Ohe. Ma ụka ọhẹ, ahị baba nyọka wụla yẹ kori kọ nwụlanọ nyọka gbịgba ha iJihova. A yẹ ang ẹjẹẹ nyori ọngọlẹ ka wẹẹ mẹ ang jẹ juwa maga nyọka ju ihi nya ehile nya iJisọsị? Lee ịBayịbụụ ọjẹ́jẹ ị-ịwẹ à tịị kpọọ ịpyọ kem?

15. Ang ẹjẹẹ nya ọ-nwà kịlahị iyina ahị tị́ ka yẹhị guru gbe ẹ-ẹga nya ọngọlẹ kahị wẹẹ jẹ́ ịBayịbụụ ta?

¹⁵ Ụka myị́ ụka, juwa wụla yẹ jaabwọ ká ọngọlẹ ka wẹẹ mẹ ang jẹ juwa nwà kịlahị. Ọ-chụ pwokwita, ọ kaa ya ẹla u-uhye nya iJihova? Ọ kaa raabwọ ha iJihova? (Eje. 116:1, 2)  ỊBayịbụụ ọwawa kaa kpọọ ịpyọ? (Eje. 119:97) Ọ kaa ka ọjịra-jịra ụka myị́ ụka? (Eje. 22:22) Ọ dọmwụ nyọka yẹ ọhịhị nyamwụ da ụgbẹyị ọlẹ kọ baba nyọka mẹjẹ nyori ọ ja kpa ang ọlẹ kọ wẹẹ jẹ́ họ ụkụrwọ? (Eje. 119:112) Ọ dọmwụ nyọka mẹ ang ịlẹ kọ wẹẹ jẹ́ jẹ alugbiyegu bala aligu nyamwụ lẹ? (Eje. 9:1) Ọlẹ kọ tị baba gụ wuu ri, ọ tịtọ nyọka ri ọngọhẹ nya Alibeenu nya iJihova? (Eje. 40:8) Kori ká ọngọlẹ ka wẹẹ mẹ ang jẹ á juwa nwà kịlahị ẹ-ẹpwụ nya ẹla ịwẹ wuu ka aalẹ, maga ka jẹ́ ang odudu, kanụ ya ẹla ọọwa lawụlẹ gbagbịla ụ-ụgbẹyị ọdụmwọ. *

16. Ụka oyina ahị tị́ ka hwabwọ la ọ-mẹ ịBayịbụụ jẹ ọngịnyị?

¹⁶ Ụka ọhẹ bala ụka ọkịla, wụla yẹ kori á ka kịnyaa la ọ-jẹ́ ang bala ọngịnyị. Tịlọng wo: ‘Ọ kaa nwụlanọ gbe ang ọjẹ́jẹ? Ọ kaa tịtọ nyọka ka ọjịra-jịra? Ọ kaa kịnyaa la abwẹla ịtịpyọ wẹẹ? O juwa ẹ-ẹpwụ nya ịgba ọgbagba nya ịnịịkịla wẹẹ?’ Kori ká ọwẹwẹ nya ịtọ ẹla ịwẹ á ri ee aalẹ, ọ kịnyaa la ọ-mẹ ang jẹ ọngọ lịnyị lala ọ-mẹ awa ọdada jẹ ọngịnyị ọlẹ kọ tịtọ nyọka ya ịnyịrọ ju enyi ka! Kori ká ang ọlẹ kọ wẹẹ jẹ́ á myọọ lẹhị kpụ ọ ja yẹda ka aalẹ, ọ́ baba nyọka kịnyaa la ọ-jẹ́ ang balọọ ka.

17. Jaabwọ ká ụpwụ nya 1 iTimoti 4:16 ya, ẹlịyẹ angị mẹ ịBayịbụụ jẹ à tị́ baba nyọka họ?

¹⁷ Ahị hu ụkụrwọ nyọka họ ká angịkịla ka ri angịjụgbẹyị nya ẹla ọkpọnchị bala ọ tịtọ ká angịlẹ kahị kaa mẹ ịBayịbụụ jẹ ka nwà ka hu enyi Ohe. Ịnyị a dudu kahị kaa mẹ ang jẹ bwu ịBayịbụụ la ila ọchịchị bala ọ-mẹjẹ nyori ahị myị ju ẹla ọlẹ kahị wẹẹ mẹjẹ lẹ. Ahị ka ju angịlẹ kahị kaa mẹ ịBayịbụụ jẹ ọhụ nyọka ri oligu nya alọjịra-jịra. Ahị ka họ kị ka jẹ́ ọbaba nyọka hu ịlaa ju iJihova ụ-ụbwọ bala o-hu enyi Ohe. Ụka ọhẹ bala ụka ọkịla, wụla abwọlẹ kọ wẹẹ nwà kịlahị yẹ. (Yẹ akpa ọla ẹbẹ 13 ọlẹ ko ri, “ Ang Ọlẹ ká Ọngọmẹjẹ Baba Kọ ka Họ Nyọka Da Ọngọlẹ Kọ Wẹẹ Jẹ́ ịBayịbụụ Ụbwọ Nwà ka Hu Enyi Ohe.”) Ahị chị ọkẹkẹnị nyọka la ụpa ẹ-ẹpwụ nya ụkụrwọ ọ-chị ọhịhị da ọwẹ! Ahị cheje nyọka họ jaabwọ kahị ka jụ́ họ myị́ nyọka mẹ ang jẹ ọngịnyị kọ ka wẹ ka hu enyi Ohe.