1-2. Ụgbẹyị oyina à tị́ há gụ́ wuu kahị ka bwu jẹ́ ịBayịbụụ? Ọ-chụ pwokwita oyina à tị́ ji?

 KỤ IRYA nyori à wẹẹ tịtọ nyọka ra ẹpwa ọhẹ. Ịyẹ a tị́ ka háng nyọka yẹ ụ-ụwa ene ká ka myị-ị̀ rọọ? Ifoto nyamwụ kem ka nwang? Ịwẹẹ ọdada á juwa ka, ọ ka háng ká ka yẹ ẹpwa ọọwa la ịlọng chajị ká ka wụla ahị bala ẹkpẹ nyamwụ yẹ, juka ẹpwụ ọnyọnyọọnyị nyọka jẹ́ jaabwọ kị ju ẹpwụ kaka ba bala ang abwọ ịlụwa. Ọ dọmwụ ka há yẹẹyẹẹ kori ká jẹ́ ya ẹla bala ọngọhẹ ọlẹ kọ jẹ́ jaabwọ kị bwu nwụ ẹpwa ọọwa. Ọ la gede-gede nyori ọ ka háng ká ka jẹ́ ẹla myị́ ẹla oluhye nya ẹpwa ọlẹ ká wẹẹ tịtọ nyọka ra.

² Ahị ka jẹ́-ẹ họ ẹla ụma ọlịnyị ụka kahị ja wa ịBayịbụụ bala ọ-jẹ́ ang bwu ụwa. Ọngọhẹ ọlẹ kọ jẹ́ ang u-uhye nya ịBayịbụụ chụ ẹla ọla ịBayịbụu kaka pwoku “ube oluhye ọlẹ kọ ju ẹpwụ gbam-gbam, ká itiwe nyamwụ dọmwụ bwu eji kpori-kpori.” Lẹ, ányị ahị tị́ ka họ kahị ka jẹ́ ẹla ịlẹpwụ nya ịBayịbụu wuu? Kori ká wọọ la agaga, ang ịmanyị-ịmanyị ịlẹ kị ri “ẹla ịdọmwụ nya ọgbanyẹ-ọgbanyẹ ẹ-ẹpwụ nya ẹla nya Ohe Oluhye,” a ka jẹ́ kem lẹ. (Hib. 5:12) Ma jaabwọ ká ka ju ka ẹpwụ nya ube nyọka wụlọọ yẹ yẹẹyẹẹ, à baba nyọka wụla ịBayịbụụ yẹ rige-rige ịnyịnyị. Ụgbẹyị ọnyịịla ọhẹ ọlẹ ká ka jẹ́-ẹ jẹ́ ịBayịbụụ ri ọ-ka yẹ abwọlẹ ká apa ịdatị-datị nya ẹla ọlụwa da ori wu awụlẹ. Maga ká jẹ́ etu nya ẹlịlẹhị ịlẹ ká myị la yẹẹyẹẹ bala ọ-ka jẹ́ ang odudu ká myị laa ịnyịnyị.

3. Ịyẹ ọlẹrụ ịPọlụ à tị́ byi angịnyị nya ịKịrayịsị ịkịla nyị họ? Ịyẹ à tị́ du? (Ala Efesọsị 3:14-19)

³ Kori kahị ka jẹ́ ẹla ọla Ụpwụ Ịgọgọ jaabwọ kọ lụmẹ kaka ba aalẹ, o ri o-pyii kahị ka jẹ́ ẹlịlẹhị ikpori-kpori ịlụwa. Ọlẹrụ ịPọlụ ju Angịnyị nya ịKịrayịsị ịkịla ọhụ nyị jẹ́ Omyi Ẹla nya Ohe yẹẹyẹẹ  nyọka “jẹ́ jaabwọ ká ẹpwụ ojuju bala udiyo ọlala bala uhye ọlala bala okpori-kpori ọlala” nya ẹlịlẹhị ọlụwa la ka ba. Ọọwa ị ka jẹ́-ẹ da “itiwe bala ụtẹ” yeji ẹ-ẹpwụ nya ọmyịmyị nyaa ka ịlahị-ịlahị lẹ. (Wa Ala Efesọsị 3:14-19.) Ahị baba nyọka họ ịnyị ịnyịnyị. Ahị yẹ jaabwọ kahị ka bwu kụ ẹhị yẹ ịBayịbụụ rige-rige nyọka jẹ́ etu nya ẹla ọlụwa gụ́ olene wẹẹ.

4. Ịyẹ ahị tị́ ka họ nyọka tụ́ ju iJihova chwẹẹ gụ́ ọọwa? Ya ọ-chụ pwokwita ọhẹ wẹẹ.

⁴ Lala angịnyị nya ịKịrayịsị, ẹlịlẹhị ichiche-ichiche ịla ịBayịbụụ ọjẹ́jẹ kem á kaa nwahị ka. Bwula ụbwọ ọdada nya olegu ịgọgọ, ahị kaa nwụlanọ nyọka dọmwụ jẹ́ “ang ikpori-kpori nya Ohe Oluhye.” (1 Kọr. 2:9, 10) À ka dọmwụ nya ịBayịbụụ ọjẹ́jẹ nya ịlọng ọlẹ kọ ka tụng ju iJihova chwẹẹ gụ́ ọọwa myị́? Ọ-chụ pwokwita, à ka jẹ́ ang u-uhye nya abwọlẹ kọ mẹ ọháha jẹ ẹ-ẹga nya anchẹ nyamwụ ịlụka onyogo bala abwọlẹ ká ọọwa mẹjẹ nyori ọ la ọháha ẹ-ẹga nyang ịnyịnyị myị́. À ka jẹ́ ang u-uhye nya ịgba ọgbagba ọlẹ ká iJihova ya yeji ha ala Isirẹlụ bala ọ-chwọọ kaka pwoku ọlẹ kọ ya yeji hahị alẹ myị́. Lee ọhẹka à ka jẹ́ ang kpori-kpori u-uhye nya ọmwụ ọyẹyẹ ịlẹ ká iJisọsị họ jịra ụka kọ jam odehe kaa kpa ẹrụ ọnyịịla pyẹ myị́.

5. Egbeju nya ẹlẹhẹ ji ọlẹ ká tịtọ nyọka jẹ́ ang u-uhye nyamwụ gụ́ ọọwa?

⁵ Ị tọ aanahị ịhyẹ ịlẹ kị kaa jẹ́ ịBayịbụụ yẹẹyẹẹ wo nya ang ịlẹ kọ ka háa nyọka jẹ́ la ịlaa gụ́ ọọwa bwu ịBayịbụụ. Ọwẹwẹ nyaa ịhyẹ juwa ẹ-ẹpwụ nya akpa ọlẹ kọ ri “ Egbeju nya Ẹla Ịlẹ Ká ka Jẹ́ Lịlọng Myị́.” À ka yé ọkẹkẹnị yẹẹyẹẹ kori ká jẹ́ ang u-uhye nya egbeju nya ẹla ịlịịwẹ bwula ụbwọ ọdada nya Watch Tower Publications Index lee Research Guide for Jehovah’s Witnesses. ỊBayịbụụ ọ-jẹ́ kpori-kpori ka ju ọmyịmyị nyang ọngịrị bala ọ-dang ụbwọ nyọka “jẹ́ ẹla o-bwu ẹga nya Ohe Oluhye.” (Etu 2:4, 5) Ahị kụ ẹhị yẹ ẹla ikpori-kpori ịlẹpwụ nya ịBayịbụụ ịhyẹ ịlẹ kahị ka jẹ́-ẹ wụla yẹ myị́ ugbẹnyị wẹẹ.

6. (a) Ịyẹ à tị́ ri ọdatị nya ụgbẹyị bala irya? (b) Ịyẹ tị́ du kahị ka jẹ́-ẹ ya nyori obyi omeme nya iJihova ẹ-ẹga nya angịnyị ehe bala odehe ka juwa gboyi myị́ oyi? (Ala Efesọsị 3:11)

⁶ Kụ ẹhị yẹ ẹla ọlẹ ká ịBayịbụụ ya u-uhye nya irya ọlẹ ká Ohe la wẹẹ. Ọdatị ji ẹ-ẹga nya  ụgbẹyị bala irya. Ahị ka jẹ́-ẹ chụ Ụgbẹyị ka pwoku ẹgẹlẹ ká ọngịnyị chụ nyọka bwu kọ ka pwụ ẹga kọ wẹẹ jẹ ka myị́. Ma, kori kị ya ang tụ ụgbẹyị ọọwa ku, ọngọọwa á ka jẹ́-ẹ pwụ ẹga kọ wẹẹ jẹ ka ka. Ụ-ụgbẹyị ọkịla, ahị ka jẹ́-ẹ chụ irya ka pwoku ẹga ọlẹ kahị wẹẹ ka kpangga. Ahị jẹ́ ẹga ọlẹ kahị wẹẹ ka, ahị tị ka jẹ́-ẹ bwu agbẹyị ịdatị-datị pwụ ụwa myị́. Kori ká ọhẹ-ẹ́ tụ ku, ahị ka jẹ́-ẹ bwu ọkịla. Ahị ji iJihova obe nyọlẹ kọ wẹẹ wụla “obyi omeme nyamwụ ọlẹ kọ me bwu ọmwụ ọdada” dodehe gụ́ ọọwa ẹ-ẹpwụ nya ịBayịbụụ. (Yẹ ang ọjẹ́jẹ u-uhye nya Ala Efesọsị 3:11.) IJihova jẹ́-ẹ chụ agbẹyị ịdatị-datị nyọka họ irya nyamwụ jịra, ọ tị kaa chịkpẹẹ họọ myị́ chajị ọ kaa “la ang odudu kọ kpa họ ang myị́ ang.” (Etu 16:4) Apyobwuna nya ang ọlẹ ká iJihova á họ tị kaa juwa gboyi myị́ oyi. Ịyẹ à tị́ ri irya nya iJihova? Ịyẹ ọ tị́ nwụhọ nyọka jẹ́-ẹ họọ jịra?

7. Nyọlẹ ká angịnyị nya ọgbanyẹ la egbeju ọngịrị kpá, ịyẹ iJihova à tị́ nwụhọ chajị ká irya nyamwụ ka họ jịra? (ỊMatiyu 25:34)

⁷ Ohe ya irya ọlẹ kọ la ẹ-ẹga nya angịnyị nya ọgbanyẹ-ọgbanyẹ jaa. Ọ byaa yẹkẹẹ: “Anụ ma anyị kanụ pyẹ myị ẹga myị́ ẹga nya odehe ọlẹ wuu mẹ. Kanụ kụrụ odehe ọlẹ wuu bala . . . ang myị́ ang ịkịla ịlẹ wuu kị juwa hịhị odehe wuu mẹ.” (Ọmwụ. 1:28) Ụka ká Adam bala Iivu la egbeju ọngịrị, du ká ọhọbịrị ju wẹ ugbiyegu nya angịnyị ehe wẹwẹ, ọọwa á da irya nya iJihova yi ka. Ọ yẹ ụgbẹyị ọlẹ kọ ka bwu họọ jịra da. Ahyaahị, ọ cheje nyọka ya Ịpyị-Adịrahụ ọhẹ yeji e-epwoohe kọ ka họ irya ọlẹ kọ la ene-ene u-uhye nya angịnyị bala odehe ọlẹ jịra. (Wa ịMatiyu 25:34.) Nyọlẹ ká ụka nya iJihova họ, ọ du ọnyị nya ọgbanyẹ nyamwụ wẹ odehe nyọka mẹ ang jẹ angịnyị u-uhye nya Ịpyị-Adịrahụ ọọwa bala ọ-ka hu ọhịhị nyamwụ ha nyọka gbahị kpehe bwu ẹpwụ nya ọhọbịrị bala igu. Ọọwa iJihova à wule iJisọsị eji bwula igu tịrẹkpẹ ka epwoohe nyọka kpeji lala Adịrahụ nya Ịpyị-Adịrahụ nya Ohe lẹlẹ. Ma ẹla ịkịla juwa kahị ka jẹ́-ẹ kụ irya ju u-uhye nya irya nya Ohe wẹẹ.

8. (a) Ịyẹ à tị́ ri egbeju nya ẹla ọkpọnchị ọla ịBayịbụụ? (b) Jaabwọ ká ụpwụ nya Ala Efesọsị 1:8-11 ya, ịyẹ à tị́ ri irya ọkpọnchị ọlẹ ká iJihova la? (Yẹ ifoto ọla ẹbẹ nya ọgbanyẹ.)

⁸ Egbeju nya ẹla ọkpọnchị ọla ịBayịbụụ wuu ri ẹnyị nya iJihova ọ-ka la ihi jaabwọ kọ wẹẹ ka họ irya ọlẹ kọ la jahị da odehe jịra bwula Ịpyị-Adịrahụ ọlẹ kọ ya ju ịKịrayịsị ụ-ụbwọ. Irya ọlẹ ká iJihova la á ka jẹ́-ẹ yẹda kaka. Ọ chehe nyori ang myị́ ang ịlẹ kọ myọnụ wuu ka họ jịra jaabwọ kọ ya. (Ayị. 46:10, 11; Hib. 6:17, 18) Lụka o-kpii, odehe ọlẹ ka yẹda kaka ri ịparadayịsị ẹga ọlẹ ká anyị nya Adam bala Iivu ịlẹ kị ka la kpẹẹkpẹẹ bala ọ-la abwẹla ọnyịịla ka “kịlahị gbe oyi myị oyi.” (Eje. 22:26) Da ọọwa u-uhye, iJihova myịmyị la ẹla ọkịla ọ-gụ ọwẹ gụ i-irya wẹẹ. Ọ ka yẹ anchẹ nyamwụ ịla odehe bala epwoohe wuu jula awụlẹ. Ọọwa lẹ, ọng myị́ ọng wuu à ka ju ihi nya iJihova lala ọngọ kpeji u-uhye nyaa lẹlẹ. (Wa Ala Efesọsị 1:8-11.) Ụgbẹyị ọnyịịla ọlẹ ká iJihova wẹẹ bwu họ irya nyamwụ jịra á lang ẹbyẹbyị ka?

9. Ányị ahị tị́ ka jẹ́-ẹ yọyị ka ijuju nyahị kaka ba myị́ bwula ọ-wa ịBayịbụụ?

⁹ Kụ irya nya ọmwụ ọyẹyẹ ọlẹ ká iJihova ya neeji i-iku nya Idẹn, kị da ju ụpwụ nya Ọmwụ Ọdada 3:15 wẹẹ. b Ọ ya ẹla rụ ang ịlẹ kị ka họ ká irya nya Ohe ka họ jịra, ma ẹka ụnọ ịmanyị tị́ ka chịpwụrụ ene ká ẹla ịịwa ka họ. Ọ-chụ pwokwita, Ohe byi Ebiraham nyori ụka ká oyi lụmẹ-lụmẹ nyị́ chịpwụrụ kpá, ọnyị ọtụma nyamwụ ọhẹ nyị ka wẹ ka ri ịKịrayịsị. (Ọmwụ. 22:15-18) Ọọwa la ẹka nya 33 C.E. lẹ,  ị họ iJisọsị ang i-ichete jaabwọ ká ọmwụ ọyẹyẹ ya neeji lẹlẹ. (Ụkụr. 3:13-15) Ọ ka kpoye nya ẹka 1,000 ene ká ụpa ohyẹẹkpẹ nya ọmwụ ọyẹyẹ ọwẹ, kọ ri ọ-ka be Olegu Onyobyi egbeju ene, ka họ jịra wẹẹ. (Ọwụ. 20:7-10) ỊBayịbụụ tị ya ẹla lụmẹ-lụmẹ u-uhye nya ang ịlẹ kị ka họ jaabwọ ká uji ọla arịrị nya odehe nya Olegu Onyobyi bala ogu nya iJihova wẹẹ jẹ ka ocheju.

10. (a) Ịyẹ à tị́ ja ka họ ị-ịlahị lụka o-kpii? (b) Ányị ahị tị́ ka bwu nwụla irya bala ọkịlẹtụ nyahị nọ? (Yẹ ọdawụlẹ ọla ekpeleji.)

¹⁰ Kụ irya u-uhye nya ẹla ịkpọnchị ịlẹ ká ịBayịbụụ ya neeji nyị ka họ lẹẹ. Ọhọhẹ, ala ẹpwụma nya odehe ka ya dodehe nyori “okpunyi ji lẹ, ahị ka hụhụ la o-kem le”! (1 Tẹs. 5:2, 3) Akama ọtụka okpelego ka dọmwụ “lụka ọ-mwaa” ụka ká alẹpwụma wuu ka gba mịla ịgba ọgbagba nya ịnịịkịla wuu. (Ọwụ. 17:16) Ụka kọ lịnyị kpá, ọhẹka ang ẹjẹẹ ọhẹ ka ji ọlẹ kọ ka mẹ “Ọnyị nya ọngịnyị ehe” jẹ “lụka ọlẹ kọ ka hi ehe u-uhye nya egbamwụ la ọngịrị bala ẹbyẹbyị ọtụka-ọtụka nyamwụ.” (Mat. 24:30) IJisọsị ka la angịnyị ehe eje, ọọwa ọ ka chị ịkpịlọ ebwo hi embiri lẹlẹ. (Mat. 25:31-33, 46) Ma, Olegu Onyobyi á ka go abwọ ju ẹjẹ lụka ọwẹ ka. Nyọlẹ ká anchẹ nya Ohe wọọ ẹjẹ kaka kpoye wẹẹ, ọ ka tụ alẹpwụma wuu chawụlẹ, ká ịBayịbụụ wụrụ nya ịGọọgụ ọla ọpyị nya ịMagọọgụ, nyọka gba mịla angị kaa gbịgba ocheri-cheri ha iJihova. (Isi. 38:2, 10, 11) Ụka kọ pwụ ụbẹẹtụ ọhẹ, angị ihihi nya angịlẹ ká Ohe ya ida wụ ka rụ ka tọ ịKịrayịsị bala alẹwụ nyamwụ ịlẹ kị juwa e-epwoohe nyọka da ẹwụ nya Amagẹdọn, ọlẹ kọ ka ri ocheju nya akama ọtụka okpelego. c (Mat. 24:31; Ọwụ. 16:14, 16) Ọọwa Eji Ọkpakpa nya ịKịrayịsị Ọla Ẹka Ụnọ à ka dọmwụ lẹlẹ.—Ọwụ. 20:6.

11. Apyobwuna iyina a tị́ ka yé ụka ká ka hịhị gboyi myị́ oyi? (Yẹ ifoto ịnyịnyị.)

¹¹ Ahị yọyị kpoye nya ẹka 1,000 ka ịlahị tị wẹẹ. ỊBayịbụụ ya nyori Ohe nyị “họ ká ẹla nya ọhịhị olijuju ọjẹ́jẹ maahị ma,” lee ọ họhị kahị ka hịhị gboyi myị́ oyi. (Ọngọ. 3:11) Kụ irya nya abwọlẹ ká ọhịhị bala igu oriri nyang bala iJihova ka la ụka ọọwa wẹẹ. Ụpwụ nyahị ọlẹ kọ ri Draw Close to Jehovah, ẹbẹ 319, ya  ẹla ọkpịpyọ-kpịpyọ ọlẹ yẹkẹẹ: “Ụka kahị hịhị ẹ-ẹpwụ nya ẹka ohu, ụnọ, uku, lee uku-ụnọ ịmanyị tị́ kpá, ahị ka jẹ́ ang yẹẹyẹẹ u-uhye nya iJihova kpoye nya abwọlẹ kahị jẹ́ ba lẹẹlẹẹ. Ma ang ịkpịpyọ-kpịpyọ ịkịla tị ka juwa kahị ka jẹ́ myị́myị́ wẹẹ. . . . Áhị dọmwụ ka jẹ́-ẹ ya lẹẹlẹẹ jaabwọ ká ọhịhị ọla ịparadayịsị ka kpịpyọ kaka ba lẹka. Ang lụmẹ-lụmẹ ka juwa ịlẹ kị ka tụụhị ju iJihova chwẹẹ ka ịlahị-ịlahị.” Ma jaabwọ kahị wẹẹ jẹ́ ịBayịbụụ lẹẹlẹẹ, ang ọkịla oyina ahị tị́ ka jẹ́-ẹ wụla yẹ?

12. Ányị ahị tị́ ka bwu yọyị ka epwoohe? Ọ-chụ pwokwita oyina à tị́ ji?

¹² Omyi Ẹla nya Ohe họ kahị ka jẹ-ẹ yọyị ka ẹga ọlẹ ká iJihova ‘kụ ẹpwa ụ-ụwa epwoohe.’ (Ayị. 33:5) ỊBayịbụụ chị ang ịnyịịla-ịnyịịla ehe mẹjẹ́ẹhị u-uhye nya iJihova bala ụpa nya ogu nyamwụ ọla epwoohe. (Ayị. 6:1-4; Dan. 7:9, 10; Ọwụ. 4:1-6) Ọ-chụ pwokwita, ahị ka jẹ́-ẹ wa oja nya ang ịla ẹbyẹbyị ịlẹ ká Isikẹlụ yẹ ụka ká “uhye-ọgba wụrụ gbodoo, [kọ] yẹ ang ịlẹ bwu ẹga nya Ohe Oluhye.”—Isi. 1:1.

13. Jaabwọ ká Ala iHiburu 4:14-16 ya, ányị ụkụrwọ ọlẹ ká iJisọsị wẹẹ họ bwu epwoohe à tị́ lang?

¹³ Kụ irya ịnyịnyị u-uhye nya ang ịlẹ ká iJisọsị wẹẹ họ hahị bwu epwoohe lala Adịrahụ bala Ọngọkiliya ọ-la ahyẹẹrwẹrwa wẹẹ. Bwulọọ, ahị ka jẹ́-ẹ tụ ba “ẹchị Adịrahụ nya ọnahị nya Ohe Oluhye” ẹ-ẹpwụ nya abwọ ọrịrị bala ọ-ka bịlẹ kọ ka yẹhị ahyẹẹrwerwa bala ọ-dahị ụbwọ “lụka ọbaba.” (Wa Ala iHiburu 4:14-16.) Ahị myị ká ahyẹẹnụ ọhẹ-lọhẹ a chịpwụrụ la ọ-ka kụ irya u-uhye nya ang ịlẹ ká iJihova bala iJisọsị họ bala ịlẹ kị wẹẹ họ hahị bwu epwoohe ka lẹ ka. Ọháha ọlẹ kị la ẹ-ẹga nyahị a guhi gbịla nyọka la ila ọchịchị ẹ-ẹpwụ nya ịgba ọgbagba nyahị mẹ.—2 Kọr. 5:14, 15.

14. Ịyẹ à tị́ ri ang ọlẹ kọ há gụ́ wuu kahị ka họ nyọka mẹjẹ nyori ẹla nya iJihova bala iJisọsị myịhị lẹhị? (Yẹ ifoto ịnyịnyị.)

¹⁴ Ụgbẹyị ọhẹ ọlẹ kọ há gụ́ wuu nyọka mẹjẹ nyori ẹla nya Ohe bala Ọnyị nyamwụ myịhị  lẹhị ri ọ-ka da angịkịla ụbwọ kị ka wẹ ka ri Alibeenu nya iJihova bala angịjụgbẹyị nya iJisọsị. (Mat. 28:19, 20) Ịnyị ọlẹrụ ịPọlụ à họ nyọlẹ ká ẹla nya Ohe bala ịKịrayịsị myọọ lẹhị lẹ. Ọ jẹ́ nyori o ri irya nya iJihova “ká angịnyị ehe wuu ka chịda bala ọ-ka ri angị jẹ́ ẹla nya ịlẹhị nya Ohe Oluhye yẹẹyẹẹ ịnyịnyị.” (1 Tim. 2:3, 4) Ọ họ ụkụrwọ la ọngịrị-ọngịrị ẹ-ẹpwụ nya ẹrụ ọnyịịla ọ-kpa pyẹ nyọka da ụmụmẹ nya angịnyị ụbwọ, chajị kọ ka jẹ́-ẹ “bwula ọọwa họ ká angịhyẹ lẹpwụ nyaa ka chịda.”—1 Kọr. 9:22, 23.

15. Jaabwọ ká Eje Ọnyịịla 1:2 ya, ịyẹ à tị́ ka du kahị ka chị ọkẹkẹnị?

¹⁵ Ọngọ da eje ọnyịịla chabwọ nya ọngọlẹ kọ kaa chị ọkẹkẹnị bala ọ-kaa ka ịlahị, lala ọngọlẹ kọ kaa ‘ba ehile ọlẹ ká iJihova da jẹ, juwa kpụ ịlọmwụ ịtịya nyamwụ ụka wuu.’ (Eje. 1:1-3) Joseph Rotherham, kọ ri ọngọ kaa yẹ ịBayịbụụ da ka òja ọkịla, ya ẹla rụ ọgba ọwẹ ụ-ụpwụ nyamwụ ọlẹ kọ ri Studies in the Psalms, nyori ọngịnyị nyị ka “jẹ́ ịpyọ ọkpụkpụ nya ang ọmẹjẹ o-bwu ẹga nya Ohe du kọ ka mwahị nyamwụ, jọ́ọ, bala ọ-bịrị ụka jwoo.” Ọ myị́myị́ ya nyori “kori ká ahyẹẹnụ á chịpwụrụ ká ọngịnyị á wẹ ịBayịbụụ ka aalẹ, ahyẹẹnụ ọwẹ bịrị hụrụ lẹ.” À ka jẹ́-ẹ jẹ́ ịpyọ ọkpụkpụ nya ịBayịbụụ ọjẹ́jẹ bwula o-yé apyobwuna jaabwọ ká ka jẹ́-ẹ ye myị́ bwu ẹpwụ nya ẹla ịlụwa bala ọ-yẹ jaabwọ kị da ori wu awụlẹ. O ri ọkẹkẹnị ọtụka nyọka wụla Omyi Ẹla nya Ohe yẹ jaabwọ kọ la kaka ba ịlẹhị!

16. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁶ Ẹlịlẹhị ịnyịịla-ịnyịịla ịlẹ ká iJihova mẹjẹ́ẹhị ẹ-ẹpwụ nya ịBayịbụụ á lujwo kịlaahị kịla la ọ-ka wo etu nyaa ka. Ẹ-ẹpwụ nya ang ọjẹ́jẹ ọkịla, ahị ka kụ ẹhị yẹ ẹlịlẹhị okpori-kpori ọhẹ, kọ ri ube ịgọgọ nya olegu ọlẹ ká ọlẹrụ ịPọlụ chabwọ ẹ-ẹpwụ nya ileta ọlẹ kọ da kịla ala iHiburu ịlẹ kị ri Angịnyị nya ịKịrayịsị. Ang ọjẹ́jẹ u-uhye nya egbeju nya ẹla ọọwa a ya ọkẹkẹnị ọtụka hang mẹ.