Ọ lujwo hang nyọka kpịtịya nya ang ọlẹ ká jẹ́ kpá ẹnẹhẹ lẹ? Ọ kaa họ tahị ahị wuu bwu ụka ka ụka. Ịyẹ à tị́ ka jẹ́-ẹ da ụbwọ? Kụ irya myị́myị́ ju ẹhị nya ẹla ịkpọnchị.

Ụka ká ja jẹ́ ang, chị dayị bwu ụka ka ụka ká kụ irya ju ẹhị nya ẹla ịkpọnchị ịlẹ ká gbachị. Ịnyị ọlẹrụ ịPọlụ à ju aanahị ịlẹ kọ da ileta du kịla ọhụ nyọka họ lẹ. Ọ yẹkẹẹ: “Egbeju nya ẹla ọlẹ kahị lẹẹ kpa ya jenu ri yẹkẹẹ.” (Hib. 8:1) Bwula omyi ẹla ịwẹ, ọ da angịlẹ kị wẹẹ ke ụrụ lọọ ụbwọ nyọka wo ẹla ọlẹ kọ wẹẹ ya bala ọ-ka yẹ jaabwọ ká ẹhị nya ẹla ọnyị myị́ ọnyị da ori wu egbeju nya ẹla nyamwụ.

À ka chị ụka nọ ha ịlọng la ocheju nya ang ọjẹ́jẹ nyang, ọhẹka lala iminiti iwo, nyọka kụ irya ju ẹhị nya ẹla ịlẹ ká jẹ́ myị́. Kori ká jẹ́ kpịtịya yẹẹyẹẹ ka aalẹ, kụ ẹhị yẹ egbeju nya ẹla ichiche ịlụwa myị́myị́ lee ọ-ma ẹla ọhọhẹ ọla ọgba ọnyị myị́ ọnyị wa nyọka kpụ ịlọng ịtịya nyaa. Kori ká jẹ́ ẹlẹhẹ onyeewe, maga ká da ẹla ọọwa wụlẹ la omyi ẹla nya ịlọng. Jaabwọ ká wẹẹ kụ irya ju ẹhị nya ẹla ịkpọnchị myị́myị́, à ka da ịlọng ụbwọ nyọka kpịtịya nyaa gụ́ olene, ọ́ tị ba ọọwa kem ka, à ka yẹ jaabwọ ká ka jẹ́-ẹ kpa ẹla ọọwa họ ụkụrwọ ọ-ọhịhị nyang ịnyịnyị.