EJE omwumwu ri ụpa ọkpọnchị nya ọhọhọ nya ala Isirẹlụ. ỊBayịbụụ kaa ya ẹla rụ eje ịlẹ kịị kpa du bala ịlẹ kị kaa mwu la ọnụ. Apa nya ịBayịbụụ ịhyẹ dọmwụ ri eje omwumwu. Ọ-chụ pwokwita, ị da Eje Ọnyịịla, Eje ọ-Gụ Eje, bala Ida Ọbaba nyọka kpa mwu. Chajị nyọọwa, ụpwụ ọlẹ kọ ri Music in Biblical Life ya nyori ịBayịbụụ nyị “mẹjẹ gede-gede nyori ala Isirẹlụ kaa mwu eje ụka kị ja họ akụrwọ ịdatị-datị ẹ-ẹpwụ nya ọhịhị nyaa.”

Eje ịla ahyẹẹnụ ọnyị myị́ ọnyị. Ala Isirẹlụ kaa mwu eje la ang odudu nyọka mẹjẹ kori kị ja chị ọkẹkẹnị lee kori kị ja gá ẹrwa. (Ayị. 30:29) Anyang kaa du ịchẹchẹ, juwa mwu eje la ọkẹkẹnị bala ewo ọchịchị ụka kị ya okpo kụrụ adịrahụ onyeewe, ụka kị la ọkụrụ-kụrụ bwu ẹwụ, bala ụka nya ọhụhụ ịkịla nya ịgba ọgbagba. (Ang. 11:34; 1 Sam. 18:6, 7; 1 Ịdị. 1:39, 40) Ala Isirẹlụ kaa mwu eje nya ida ọbaba yẹẹyẹẹ ụka kị ja gá ẹrwa ịnyịnyị. (2 Ego. 35:25) Lẹ, ọ la gede-gede nyori eje há ala Isirẹlụ yẹẹyẹẹ.

Eje ịla ẹpwa nya adịrahụ. Eje kaa kpụ ịdịrịhụ ịla Isirẹlụ ịpyọ yẹẹyẹẹ. Adịrahụ ịSọlụ wụrụ iDevidi wẹ ẹpwa nyamwụ nyọka du ang họọ. (1 Sam. 16:18, 23) Ụka ọkịla ká iDevidi la ịlọmwụ ri adịrahụ, ọ họ ang ị-kpa du eje, ọ da eje ịnyịịla-ịnyịịla bala ọ-la ebwo nya angịlẹ kị ka mwu eje u-ube ịgọgọ nya iJihova. (2 Ego. 7:6; Emọ. 6:5) Adịrahụ iSolomọn la alẹng bala anyang ịlẹ kị kaa mwu eje ẹ-ẹpwa nyamwụ.—Ọngọ. 2:8.

Eje ị-kpa gbịgba. Ọlẹ kọ baba gụ́ wuu ri, ala Isirẹlụ kaa kpa eje gbịgba ha iJihova. Ẹlịlẹhị ri, angịnyị angị 4,000 kaa du ang u-ube ịgọgọ ọla iJerusalẹm. (1 Ego. 23:5) Ị kaa du ịchẹchẹ, ogum̀, ẹnwụ, bala opyike. (2 Ego. 5:12) Ma a-angịlẹ kị jẹ́ ang chajị nya eje wẹ à kaa gbịgba ha iJihova la eje kem ka. Ụmụmẹ nya ala Isirẹlụ kaa mwu eje ụka kị ja ka iJerusalẹm nyọka họ ọhụhụ ụ-ụwa. Ị kaa wụrụ eje ị-ịwa nya Eje ị-La Ọgbọdọ. (Eje. 120-134) Jaabwọ ká apwụ ịhyẹ ịlẹ ká ala iJuu da ya, ala Isirẹlụ kaa mwu Eje Ọnyịịla a ịhyẹ lụka nya ọhọhọ nya Ang Oriri Ọchịpwụrụ.

Eje omwumwu baba ha anchẹ nya Ohe alẹ wẹẹ. (Jem. 5:13) Ahị kaa mwu eje gwogbo ha iJihova. (Efe. 5:19) Ụka kahị mwu eje ha iJihova lawụlẹ, ahị kaa yẹ jula awụlẹ gụ́ olene. (Kol. 3:16) Eje tị kaa juhi ọngịrị ụka kahị juwa ẹ-ẹpwụ nya akama ịnyịnyị. (Ụkụr. 16:25) Eje omwumwu ri ụgbẹyị ọnyịịla ọhẹ ọlẹ kahị kaa mẹjẹ nyori ahị la ọmyịmyị bala ọháha ẹ-ẹga nya iJihova.