À wa egbeju nya ẹla ịla Ẹpwang ọ-Kụ Gbeji nya ẹka ọlẹ rige-rige lẹ? Aalẹ, yẹ kori á ka jụ́ ịtọ ẹla ileji ịlẹ wẹ myị́ wẹẹ:

Ányị ahị tị́ ka yẹ angịnyị nya ịKịrayịsị ịlẹ ká Ohe ya ida wụ́?

Ọmyịmyị nyaa myịhị lẹhị; ma, áhị tị kaa ya ihi haa kpoye-kpoye ka. Ahị ka yẹ angịkịla meme labwọ. (Jud. 16) Áhị ka taa ịtọ ẹla u-uhye nya ẹhị ọrịrịị-rịrị nyaa ka.​—w20.01, ẹbẹ 29.

Ịyẹ tị́ du á ka jẹ́ myị̀myị̀ nyori iJihova kpang i-irya?

ỊBayịbụụ mẹjẹ nyori Ohe jẹ́ng ene kị dọmwụ mang. Ọ tị kaa wo abwọ ọrịrị nyang. Ọ jẹ́ irya nyang bala ẹla ọlọkịlẹtụ nyang, abwẹla nyang tị kaa gwoo ọ-ọkịlẹtụ ịnyịnyị. (1 Ego. 28:9; Etu 27:11) Ọ gbileng ba ịlọmwụ.​—w20.02, ẹbẹ 12.

Ọ-chụ pwokwita iyina à tị́ ji u-uhye nya ụka ọlẹ kahị ka ya ẹla bala ụka ọlẹ kahị ka hu ujiji?

Ahị kaa ya ẹla u-uhye nya iJihova la ọkẹkẹnị. Ahị kaa ya ẹla kori kahị yẹ ká ọngọhẹ-ẹ́ juwa dịrẹ ụgbẹyị ọtịpyọ. Angịgbahị nya ọjịra-jịra kaa ya ẹla nyọka nwụ ọngịnyị rịrị ụka kọọwa á baba. Áhị kaa ya ẹla chajị nyọka jẹ́ ẹla (lee o-ya ẹla dodehe) u-uhye nya abwọlẹ kị kaa bwu họ ụkụrwọ nyahị ẹ-ẹpwụma ịlẹ kị ya iwe da hahị ka lẹ ka. Áhị ka ya ẹla ịbaa dodehe ka.​—w20.03, ẹbẹ 20-21.

Ányị ịyịrị ịlụpwụ nya iJuwẹlụ egbeju 2 à tị́ datị hi ịlụpwụ nya Ọwụrụụ-wụrụ egbeju 9?

IJuwẹlụ 2:20-29 ya nyori Ohe nyị ku ịyịrị ịịwa rụ bala ọ-myị ọnụ nyọka nwụ uri kwiwa nya ang ịlẹ kị bịrị. Nyọlẹ kọọwa họ kpá, Ohe ya olegu nyamwụ chị kụrụ angịnyị. Apa ịwẹ họ jịra ụka ọlẹ ká ala ịBabịlọn hu ẹwụ jahị da ala Isirẹlụ bala ụka ọkịla. Ọwụrụụ-wụrụ 9:1-11 chabwọ nya angịnyị nya ịKịrayịsị ịlẹ ká Ohe ya ida wụ́ lụka nyahị lala ịyịrị jaabwọ kị wẹẹ ya ẹla nya eje ọlala nya Ohe Oluhye u-uhye nya odehe onyobyi ọlẹ, dudu ká angị chẹkpẹ ju odehe á kaa la ịlaa ka.​—w20.04, ẹbẹ 3-6.

Owo à tị́ ri adịrahụ nya oye ẹtẹ alẹ?

Russia bala ẹpwụma ịlẹ kị chẹkpẹ jwoo ịnyị. Ị la ẹla bala angịnyị nya Ohe Oluhye kpangga, bwula o-hile ụkụrwọ nya ẹrụ ọnyịịla ọ-kpa pyẹ bala ọmẹjẹ nyori Alibeenu nya iJihova wáa ẹjẹ. Adịrahụ nya oye ẹtẹ kaa chị adịrahụ nya oye edii ọnụ.​—w20.05, ẹbẹ 13.

Abwụma ihikichu ịlẹ kị gu ẹnyị ụ-ụpwụ nya Ala ịGaletiya 5:22, 23 kem, à ri ‘ugbe nya olegu ịgọgọ’ lẹ?

Ehe. Olegu ịgọgọ kaa dahị ụbwọ nyọka nwụ́ abwụma ịkịla, lala abwẹla ọnyịịla. (Efe. 5:8, 9)​—w20.06, ẹbẹ 17.

Ang ookpokpo oyina à tị́ du kọ tịpyọ nyọka ya ifoto lee ang ịkịla u-uhye nyịlọng ju intanẹtị?

Ang ịlẹ ka ya juwa ka mẹjẹ myị́ nyori à ja kpịlọng chogu, ọkọkọ nyọka mẹjẹ nyori à kpịlọng keji.​—w20.07, ẹbẹ 6-7.

Ẹlịyẹ angị kpa ẹla nya Ohe Oluhye pyẹ à tị́ ka jẹ́ bwu ẹga nya angị jẹ́-ẹ durwe-enyi yẹẹyẹẹ?

Ị kaa họ ụkụrwọ lụka bala ẹga ọlẹ kị ka ye iyenyi. Ị mẹjáa nyọka kpa ang-abwọ ịlẹ kị chịla họ ụkụrwọ. Ị tị kaa họ ụkụrwọ la ugbodu ojuju ụka ká iwe-ahụrụ á yẹda. Ahị ka jẹ́-ẹ họ ịịwẹ ịnyịnyị ẹ-ẹpwụ nya ẹrụ ọnyịịla ọ-kpa pyẹ nyahị.​—w20.09, ẹbẹ 5.

Agbẹyị iyina ahị tị́ ka jẹ́-ẹ da angịlẹ kahị kaa jẹ́ ịBayịbụụ ta ụbwọ nyọka la ọháha ẹ-ẹga nya iJihova gụ olene?

Ahị ka jẹ́-ẹ jwaa ọhụ nyọka wa ịBayịbụụ ẹnụ myị́ ẹnụ bala ọ-ka kụ irya ju ẹla ọlẹ kị wa. Ahị ka jẹ́-ẹ mẹjáa nyọka raabwọ ịnyịnyị.​—w20.11, ẹbẹ 4.

Owo anyị à tị́ ji ẹpwụ nya angịlẹ kị ya ẹla rụ́ nyori: ‘Angịnyị ehe wuu ka wuleji bwula igu, juwa hịhị pyịyọọ bwula ịKịrayịsị’?​—1 Kọr. 15:22.

Ọlẹrụ ịPọlụ á wẹẹ ya nyori angịnyị ehe wuu nyị ka wuleji bwula igu ka. Ọ wẹẹ ya ẹla rụ́ angịnyị nya ịKịrayịsị ịlẹ ká Ohe ya ida wụ́, kị ri angịlẹ ká Ohe Oluhye “rụ́ cheri-cheri bwula ịKịrayịsị iJisọsị.” (1 Kọr. 1:2; 15:18)​—w20.12, ẹbẹ 5-6.

Ịyẹ angịlẹ ká Ohe ya ida wụ́ à tị́ ka họ ụka kị ‘nyẹ ugbinyịrọ nyaa la ẹhị ọ-mwụ biri, lụka nya opyike ohyẹẹkpẹ’?​—1 Kọr. 15:51-53.

Ị ka da ịKịrayịsị ụbwọ kpẹhị rịrị angịnyị la ọgọdọ nya oje-oje. (Ọwụr. 2:26, 27)​—w20.12, ẹbẹ 12-13.