1. Ịyẹ à tị ka họ tahị myị́ kori ká olegu-ú chị́ịhị pyẹpyẹ?

AHYẸẸNỤ ọnyị myị́ ọnyi, ahị kaa chịpwụrụ bwu ẹpwụ nya akama. Ahị tị kaa họ jaabwọ kahị ka jụ́ họ myị́ nyọka bọhụ ẹ-ẹpwụ nyaa. Ma, ọ kaa jụjụ nyọka bọhụ ẹ-ẹpwụ nya akama nyahị kori ká olegu á chị́ịhị pyẹpyẹ. Lẹ, ahị yẹ olegu ọ-chị pyẹpyẹ lala ọngga ọlẹ kahị wụrụ-ẹpwa ka, kọ tị ka ye ahị ọdahile, ugbodu ojuju, bala ọkẹkẹnị nyahị kpa rụ myị́. Etu 24:10 yẹkẹẹ: “Á kpụ ịbwọ ẹnụ nya akama aalẹ, ọngịrị nyang [ka] la pyịnyẹng.” Olegu ọ-chị pyẹpyẹ ka nuhi ọngịrị ọlẹ kahị baba nyọka kpa bọhụ ẹ-ẹpwụ nya akama ịlẹpwụ nya ọhịhị ịnyịlẹhị.

2. Ịyẹ à tị́ ka du ká olegu ka chị́ịhị pyẹpyẹ myị́? Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

² Ang lụmẹ-lụmẹ ka dudu ká olegu ka chị́ịhị pyẹpyẹ myị́. Ịhyẹ ka ri olo ọlẹpwụ, ịkịla ka ri ẹla olodehe myị́. Ọ-la kpẹẹkpẹẹ-ka, ọdẹwụ-dẹwụ bala ẹdụrụ ka ju ọmwụ nyamwụ ịnyịnyị myị́. Lee olegu ka chị́ịhị pyẹpyẹ ọọlajị nyọlẹ kị ya iwe ọhẹ ọlẹ kahị tịtọ ẹ-ẹpwụ nya ịgba ọgbagba nya iJihova hahị ka lee o-ri ahị kaa ya ẹla nya Ohe ẹ-ẹga ọlẹ ká angịnyị lụmẹ-lụmẹ á kaa ke ụrụ lahị ka myị́. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang ịhyẹ ịlẹ kahị ka jẹ́-ẹ họ nyọka bọhụ ẹ-ẹpwụ nya olegu ọ-chị pyẹpyẹ.

3. Ịyẹ tị́ ka dahị ụbwọ ụka kahị la irya ọtịpyọ u-uhye nya ịlọhị bala ọ-jẹ́ họ ka nyahị?

³ Ọ kaa chịkpẹẹ kahị ka la irya ọtịpyọ u-uhye ịlọhị bala ọ-jẹ́ họ ka nyahị. Lẹ, ahị ka me irya myị́ nyori chajị nya ọ-jẹ́ họ ka nyahị, iJihova á ka ya iwe da hahị ị-ịParadayịsị ka. Ọ tị tịpyọ lụmẹ nyọka kụ irya ụ-ụgbẹyị ọlịịwẹ. Ányị ahị tị́ ka yẹ ọ-la kpẹẹkpẹẹ-ka nyahị? ỊBayịbụụ ya nyori, angịnyị ehe wuu nyi “họ  ang onyobyi” kẹnẹ-kẹnẹ ka hi iJisọsị. (Rom. 3:23) Ma, iJihova á kaa yẹhị rịrị ọ-jẹ́ họ ka nyahị lee ọ-yẹhị guru nyori ahị ka la kpẹẹkpẹẹ ka. Ọkọkọ nyọọwa, o ri Adịda ọ-la ọháha ọlẹ kọ tịtọ nyọka dahị ụbwọ. Ọ kaa ju ugbodu. Ọ jẹ́ jaabwọ kahị wẹẹ maga nyọka ma ta ọdẹwụ-dẹwụ nyahị bala ọ-ka kụrụ irya ọtịpyọ u-uhye nyịlọhị. Ọ tị nwụlanọ nyọka dahị ụbwọ.​—Rom. 7:18, 19.

4-5. Ẹlịyẹ ụpwụ nya 1 ịJọn 3:19, 20 à tị́ ya, kọ tị da aanahị anyang imiiye ụbwọ nyọka ma uya ta olegu ọ-chị pyẹpyẹ?

⁴ Kụ irya u-uhye nya ọ-chụ pwokwita nya Deborah bala Maria * wẹẹ. Ụka ká Deborah ri onjwo, ị kpọọ ụ-ụgbẹyị ọlẹ kọ kaa lịlọmwụ oyoyi. Ị́ kaa dọọ ọlẹẹkwaa nwà ka. Lẹ, ụka ko ri ọngọgbahị, ọ la irya ọtịpyọ u-uhye nyịlọmwụ. Kori ká ang ọlẹ kọ jẹ́ họ ka á la pyịnyẹng wẹwẹ, ọ kaa lịlọmwụ lala ọngọlẹ kọ ka jẹ́-ẹ họ ịngịngịhyẹ kaka. Maria la akama ụma ọlịnyị. Alugbiyegu nyamwụ kpọọ ụ-ụgbẹyị ọlẹ kọ kaa lịlọmwụ oyoyi. Chajị nyọọwa, ọ la akama u-uhye nya ọ-kaa kụ irya nyori ọ́ kpụ ịngịngịhyẹ kaka. Nyọlẹ kọ dọmwụ hu enyi Ohe kpá, ọ kaa me irya nyori ọwa nyị́ há kpụ ọ-ka ri ọngọhẹ nya Alibeenu nya iJihova ka!

⁵ Kpọkpọọkpọ, aanahị imiiye ịwẹ á hwabwọ la ọ-gbịgba ha iJihova ka. Ịyẹ tị́ du? Ang okpokpo ọọwa ri yẹkẹẹ, ị raabwọ ha iJihova bala o-ya abwọlẹ ká ẹla ọwẹ laa ọ-ọkịlẹtụ joo. (Eje. 55:22) Ị wẹ ka jẹ́ nyori adahị ọ-la ọháha olepwoohe nyị jẹ́ jaabwọ ká ang ịtịpyọ ịlẹ kị họ tahị kaa du kahị kaa la irya ọtịpyọ u-uhye nyịlọhị. Ma, ọ kaa yẹ abwẹla ịnyịịla ịlẹ kahị la, kori kahị me nyori ahị-ị́ la abwẹla ịnyịịla ka wẹwẹ.​—Wa 1 ịJọn 3:19, 20.

6. Irya ọlányị ọngọle kọ ma ẹla ọlẹ kọ gwọọ gụ họ ene-ene họ myịmyị, à tịị la?

⁶ Ọngọhẹ ka ja maga nyịlẹhị-lẹhị nyọka hwabwọ la ọ-họ ang ọtịpyọ myị́, ma ẹla ọọwa tị ka gwọọ họ myịmyị du ká olegu ka chọọ pyẹpyẹ. Ịnyịlẹhị lẹ, ahị kaa kpụ ịlọhị abyị kori kahị họ ọhọbịrị. (2 Kọr. 7:10) Ma, áhị ka yẹ ịlọhị nya ọngịnyị ọtịpyọ kpoye-kpoye ọọlajị nya ọ-jẹ́ họ ka nyahị, ahị ka juwa kụ irya nyori ‘Ḿ kpụ ịngịhyẹ kaka, iJihova-á ka jẹ́-ẹ hịnyọhi ham ẹnẹnẹhẹ kaka’ lẹ ka. Ẹla ọwẹ-ẹ́ ri ịnyịlẹhị ka, ọ tị ka huhi abwọ la ọ-ka gbịgba ha iJihova myị́. Kpịtịya nya ẹla ọlẹ kahị wa ụ-ụpwụ nya Etu 24:10 nyori, ọngịrị nyahị ka la pyịnyẹng kori ká olegu-ú chị́ịhị pyẹpyẹ. Ọkọkọ nyọọwa, bịlẹ iJihova ẹ-ẹpwụ nya abwọ ọrịrị kọ ka yẹ ahyẹẹrwẹrwa nyang. (Ayị. 1:18) Ụka ká iJihova á yẹ nyori ẹla ọlẹ ka họ tọng olujwo, à tị wẹẹ maga nyọka yẹda, ọ ka hịnyọhi hang. Ọ-da ọọwa u-uhye, ka ẹga nya angịgbahị nya ọjịra-jịra. Ị ka dang ụbwọ la ugbodu ojuju nyọka la gogo ẹ-ẹpwụ nya olegu myịmyị.​—Jem. 5:14, 15.

7. Ịyẹ tị́ du ká olegu ka chị́ịhị pyẹpyẹ ka, kori kọ lahị ujwo nyọka họ ang ọnyịịla?

 ⁷ Jean-Luc, ko ri ọngọgbahị nya ọjịra-jịra ịị France byi angịlẹ kị wẹẹ ma uya ta ọdẹwụ-dẹwụ yẹkẹẹ: “Ọngọlẹ kọ họ ọhọbịrị ẹnẹnẹhẹ lẹka, à ri ọlabwẹla ọnyịịla a-ahị nya iJihova ka. Ma, ọngịnyị ọlẹ ká ẹla kaa tọọ olujwo kọ tị kaa yẹda ụka myị́ ụka ịnyị.” (Rom. 7:21-25) Lẹ, a me irya nyori ọwa nyị́ kpụ ịngịngịhyẹ kaka, kori ka juwa ma uya ta ọdẹwụ-dẹwụ nyang ka. Kpịtịya, ọngọngọhẹ nyahị á ka jẹ́-ẹ la kpeng-kpeng a-ahị nya Ohe Oluhye ka. Ahị wuu baba nya ọnahị ọgahị nya Ohe Oluhye bwula iya ọkịlaakịla nya ịKịrayịsị.​—Efe. 1:7; 1 Jọn. 4:10.

8. Ụka ká olegu á juwa chị́ịhị pyẹpyẹ, ẹga nya owo ahị tị́ ka tịtọ nya ụbwọ ọdada bwu?

⁸ Aanahị ịlọjịra-jịra ka juhi ọhụ! Ị ka ke ụrụ wo lahị ụka kahị baba nyọka ya ẹla, bala ọ-juhi ọhụ myị́. (Etu 12:25; 1 Tẹs. 5:14) Joy, ọọnahị ọnyang ọhẹ ịị Nigeria, kọ ma uya ta olegu ọ-chị pyẹpyẹ yẹkẹẹ: “Ale m tị́ ka ji ịnọ, kori ko ri aanahị ka? Aanam alẹng bala anyang ri ang ẹjẹẹ nyori iJihova wẹ abwọ ọrịrị nyam. M̀ dọmwụ jẹ́ ang bwu ẹga nyaa u-uhye nya abwọlẹ kam ka ju angịkịla ịlẹ kị la olegu ọ-chị pyẹpyẹ ọhụ.” Ahị tị baba nyọka kpịtịya nyori aanahị á ka jẹ́ ụka ọlẹ kahị baba nya ọhụ ojuju ụka myị́ ụka ka myị́. Lẹ, ahị ka baba nyọka ka ẹga nya ọọnahị ọhẹ ọlẹ kọ la ẹla ọjẹ́jẹ gụ́ụhị nyọka ya joo nyori ahị baba nya ụbwọ ọdada.

9. Ányị ụpwụ nya Eje Ọnyịịla 41:3 bala 94:19 à tị́ juhi ọhụ?

⁹ Ka ẹga nya iJihova nyọka dang ụbwọ. Ụka kahị la ogogo ka, ọgụgụụgụ wuu kori ká ẹdụrụ á jụ́ụhị lụka ọtata, ọ kaa lahị ujwo nyọka kụ irya ọnyịịla. Ịlẹhị lẹ, iJihova á ka họhị uda bwula ụkụrwọ ẹbyẹbyị ka myị́, ma ọ kaa kpúụhị ẹjẹ bala ọ-ya ọngịrị ọlẹ kahị baba nyọka bọhụ hahị. (Wa Eje Ọnyịịla 41:3; 94:19.) Ọ-chụ pwokwita, ọ ka gu ọọnahị ẹ-ẹpwụ nya ọjịra-jịra gbịla wẹ ka dahị ụbwọ ụka kahị baba nyọka họ ụkụrwọ ọhẹ ẹ-ẹpwa lee ọ-dahị ụbwọ ra ang myị́. Ọ ka gu ọọnahị ọhẹ gbịla nyọka raabwọ balahị myị́. Lee, ọ ka dahị ụbwọ kpịtịya nya ẹla ị-kpụ ọngịnyị ẹjẹ ịlẹpwụ nya Omyi Ẹla nyamwụ, lala ẹhị ọrịrịị-rịrị ọnyịịla nya ọhịhị ọkpẹẹkpẹẹ ọlẹ ká ẹdụrụ bala ajụjụ-ụ́ ka ji kaka, odehe onyeewe ọlẹ kọ wẹẹ warị.​—Rom. 15:4.

10. Ịyẹ tị́ du ká ọkịlẹtụ kpụ Isang enyi pyịyọọ nyọlẹ kọ keji kpá ka?

¹⁰ Isang, kọ kụ Nigeria keji kpụ̀ ọ ju ẹjẹẹ. Ọngọlẹ kọ họọ utoji ya nyori nyị́ ka jẹ́-ẹ jẹdịyẹ kaka. Isang yẹkẹẹ: “Ọkịlẹtụ kpụm enyi, ahị ọdahile gụm myị́.” Ma, ọkịlẹtụ kpọọ enyi pyịyọọ? Ehe! Ịyẹ à tị́ dọọ ụbwọ? Isang da ẹla ọọwa wụlẹ yẹkẹẹ: “Am bala ahụ nyam á hwabwọ la ọ-raabwọ ha iJihova bala ọ-jẹ́ ang bwu Omyi Ẹla nyamwụ ka. Ahị tị cheje ịnyịnyị nyori ang ịnyịịla ịlẹ kahị la ka myịhị lẹhị, tụ́ ẹhị ọrịrịị-rịrị nya ọhịhị olodehe onyeewe ọlẹ kahị la.”

11. Ányị Cindy à tị́ bwu ye ọkẹkẹnị ụka ọlẹ ká ẹdụrụ jwọọ nyịlẹhị-ịlẹhị?

¹¹ Ọngọ họ utoji byi Cindy kọ kụ Mexico nyori, nyị la ẹdụrụ ọhẹ ọlẹ kọ ka nwọọ myị́. Ányị ọ tị́ bwu bọhụ? Ụka ọlẹ kị wẹẹ họọ utoji, ọ cheje nyọka ya ẹla nya Ohe ahyẹẹnụ ọnyị myị́ ọnyị. Ọ da ụpwụ yẹkeẹ: “Bwula ọ-họ ịnyị, m̀ jẹ́ ya irya nyam nọ ẹ-ẹga nya angịkịla ọkọkọ nyọka ya nịrọ utoji ọlẹ kị wẹẹ ka họm, ọjụjụ nyamwụ bala abwọlẹ ká ẹdụrụ nyam la ọngịrị kaka ba. Ang ọlẹ kam kaa họ à lẹẹ lẹ: Ụka kam ja ya ẹla bala angị họ utoji lee angị kpẹhị rịrị alẹdụrụ, m̀ kaa taa wo nya ugbiyegu nyaa. Lẹ, m kaa ta wo nya ang odudu kị chụ nyọka họ ụkụrwọ olujwo ọlịịwẹ ẹẹ. Ụka ḿ họ ịnyị, ọ kaa chịkpẹẹ nyọka yẹ egbeju nya ẹla ọlẹ kọ ka gwaa ọ-ọkịlẹtụ myị́. Angịhyẹ nyaa kaa ya nyori nyị lujwo nya ọlẹdụrụ ọ-ka taa wo nyori, ‘Ọ tị́ lányị?’ Iru nyaa tị kaa jim obe ọhọhọ nyori m̀  kpaa i-irya. Ị dọmwụ kaa ya ịnọmba nya ifon bala ẹpwa nyaa ham. M̀ jẹ́ nyori iJihova ka dam ụbwọ bọhụ ẹ-ẹpwụ nya ụka olujwo ọwẹ. Ma, ọ lam ẹbyẹbyị nya abwọlẹ kọ ya ọkẹkẹnị ham kaka ba!”​—Etu 15:15.

12-13. Ányị angịhyẹ ịlẹ kị jụ́ ẹdụrụ lee ọ-la ogogo nwà ka, à tị́ jẹ́-ẹ bwu ya ẹla nya Ohe? Ịyẹ à tịị ri ocheju nyamwụ?

¹² Angịlẹ ká ẹdụrụ jụ́ lee ọ-la ogogo nwà ka, ka la olegu ọ-chị pyẹpyẹ chajị nyọlẹ kị jẹ́-ẹ ya ẹla nya Ohe jaabwọ kị tịtọ nyọka họ ka myị́. Ma, iru nyaa kaa ye agbẹyị ịnyịịla nyọka ya ẹla nya Ohe. Ụ-ụwa ịị United States, ị ya ọọnahị ọnyang ọhẹ ká ẹnyị nyamwụ ri Laurel nọnọ ẹ-ẹpwụ nya ang ọlẹ kọ kaa dọọ ụbwọ nyọka da ịhụ ẹ-ẹpwụ nya ẹka iwo ịta kụrụ irwiye myị́ lẹ! Ọ la ẹbẹ ọgọja, ị tị gwoo ịnyịrọ ene ụka ịmanyị-manyị lẹ. Ọ myịmyị la ẹdụrụ nya ugbinyịrọ ịkịla. Ma, akama ịtụka ịwẹ á hwoo abwọ la ọ-ya ẹla nya Ohe ka. Ọ kaa ya ẹla nya Ohe je angị họ utoji bala angịkịla ịlẹ kịị wẹ ẹga nyamwụ. Ịyẹ à tị́ ri ocheju nyamwụ? Ọ da angịnyị lala iwo kụrụ irwiye ụbwọ wẹ ka jẹ́ ẹlịlẹhị ọlẹpwụ nya ịBayịbụụ! *

¹³ Richard, kọ ri ọngọgbahị nya ọjịra-jịra ịị France gba irya ọnyịịla ọhẹ kpehe ha angịlẹ kị jẹ́-ẹ kpehe hi ẹpwa nyaa kaka lee ọ-kụ ẹga ọlẹ kị kaa haa utoji. “M̀ ka jwaa ọhụ nyori, ị ya apwụ nyahị guru ẹ-ẹga ọlẹ ká angịnyị ka jẹ́-ẹ yẹ. Ụka ká angịnyị-ị́ chịpwụrụ, ị ka yaa bala ọ-tịtọ ẹla u-uhye nyaa. Ọọwa ka ju aanahị ilikẹjẹ nyahị ịwẹ ọhụ nyọlẹ kị jẹ́-ẹ ya ẹla nya Ohe bwu ẹpwa ka ẹpwa kaka.” Angịlẹ kị jẹ́-ẹ kpehe hi ẹpwa nyaa kaka ka jẹ́-ẹ kpa ẹrụ ọnyịịla pyẹ bwula ọ-da ileta bala ọ-ya ẹla nya Ohe bwu ifon ịnyịnyị.

14. Ọgụ-ẹpẹtẹ ọnyịịla oyina Adịrahụ iDevidi à tị́ ya deeji?

¹⁴ Ang lụmẹ-lụmẹ ka du ká iwe ọhẹ ọlẹ kahị tịtọ ẹ-ẹpwụ nya ịgba ọgbagba nya iJihova ka wuhi ọyị ka myị́. Ọ-chụ pwokwita, ẹka nyahị, ịnyịrọ ọ-la gogo nwà ka lee ẹla ịkịla ka du myị́. Kori kahị ji ẹpwụ nya iwe-ahụrụ ọlịịwẹ, ahị ka jẹ́ ang bwu ọgụ-ẹpẹtẹ nya Adịrahụ iDevidi. Ọ nwụlanọ yẹẹyẹẹ nyọka nwụ ube ịgọgọ nya Ohe Oluhye, ma iJihova tị chụ ọngọkịla nyọka họ ụkụrwọ ọwẹ. IDevidi da ọngọlẹ ká Ohe chụ nyọka họ ụkụrwọ ọọwa ụbwọ nyịlẹhị-lẹhị bwula ọ-gba okpoko onyoowuru bala okpoko ịgọm kpehe chajị nya ụkụrwọ ọọwa. IDevidi ri ọgụ-ẹpẹtẹ ọnyịịla-ọnyịịla hahị!​—2 Sam. 7:12, 13; 1 Ego. 29:1, 3-5.

15. Ányị Hugues à tị́ bwu kụrụ olegu ọ-chị pyẹpyẹ?

¹⁵ Chajị nya ịnyịrọ ọ-la gogo ka, ọọnahị ọlẹng ọhẹ ịị France ká ẹnyị nyamwụ ri Hugues, hwabwọ la ọ-ka ri ọngọgbahị nya ọjịra-jịra, ọ́ dọmwụ jẹ́-ẹ họ akụrwọ ichiche ịla ẹpwa-ẹpwa ka ịnyịnyị. Ọ da ụpwụ yẹkẹẹ: “Ụka nya  ọgbanyẹ, ọ lam lala o-ri am nyị́ kpụ ịngịngịhyẹ kaka, olegu chịm pyẹpyẹ nyịlẹhị-lẹhị. Ma nyọlẹ kọ nọ pyịnyẹng, m̀ yẹ jaabwọ kọ baba nyọka ye iwe-ahụrụ nyam myị. M̀ chị ọkẹkẹnị nyọka gbịgba ha iJihova la ọngịrị ọlẹ kam la wuu. M̀ cheje nyọka hwabwọ kpong-kpong ka. Lala iGidiyọn bala angịnyị ohu ịta nyamwụ ịlẹ ká ịnyịrọ chaa pyẹpyẹ, m̀ ka kịnyaa la ọ-ma uya.”​—Angị. 8:4.

16. Ẹlịyẹ ahị tị́ ka jẹ́ bwu ọgụ-ẹpẹtẹ nya alegu-ẹrụ?

¹⁶ Alegu-ẹrụ ịlẹ kị godayị giri-giri ri ọgụ-ẹpẹtẹ ịnyịịla. Ụka ọlẹ ká Adịrahụ Ehabụ wẹẹ kpeji, iJihova wụrụ alegu-ẹrụ wuu nyọka gba irya kpehe u-uhye nya ụgbẹyị ọlẹ kị ka bwu hu adịrahụ ọla ọkwọ ọwẹ ẹmwa. Alegu-ẹrụ lụmẹ-lụmẹ gba irya nyaa kpehe. Ma, Ohe chụ ịnya ọngọ okpokpo bala o-byoo nyori irya nyamwụ ọwẹ nyị ka họ ụkụrwọ. (1 Ịdị. 22:19-22) Olegu chị alegu-ẹrụ ịkịla ịlanyị pyẹpyẹ kpụ̀ ị juwa kụ irya nyori, ‘Ịyẹ tị́ du kam dọmwụ bịrị ụka nyam ya ọnụ ju ẹla ọwẹ ene-è?’ Ọ́ lịnyị kpong-kpong ka. Alegu-ẹrụ ịwẹ kpịlaa keji yẹẹyẹẹ bala ọ-tịtọ nyọka ju iJihova ihi.​—Angị. 13:16-18; Ọwụr. 19:10.

17. Ányị ahị tị́ ka họ kori ká ọkịlẹtụ-ụ́ kpụhị enyi chajị nyori áhị la iwe ọlẹ kahị tịtọ ka?

¹⁷ Kpịtịya nyori ihi ọgụgụ ọlẹ kahị ka jẹ́-ẹ la ri ọ-ka ri ọngọhẹ nya Alibeenu nya iJihova bala ọ-ya ẹla u-uhye nya Ịpyị-Adịrahụ nyamwụ. Ụkụrwọ ka wẹ, ị tị ka cheju myị́. Ma, ọọwa à kaa du kahị kaa ri ọngịnyị ọnyịịla a-ahị nya Ohe Oluhye ka. Kori kahị kpịlọhị keji, ahị ka kpịnya a-ahị nya iJihova bala aanahị wuu. Lẹ, bịlẹ iJihova kọ ka dang ụbwọ kịnyaa la ọ-kpịlọng keji. Kụ irya u-uhye nya ọgụ-ẹpẹtẹ ịnyịịla nya anchẹ nya iJihova ịlẹpwụ nya ịBayịbụụ ịlẹ kị kpịlaa keji. Nwụlanọ nyọka họ ụkụrwọ ha aanang ụ-ụgbẹyị ọnyị myị́ ọnyị ọlẹ á ka jẹ́-ẹ họ myị́.​—Eje. 138:6; 1 Pit. 5:5.

18-19. Ányị a tị́ ka bwu ye ọkẹkẹnị ẹ-ẹrụ ọnyịịla ọ-kpa pyẹ kori ká angịnyị ịla oye nyang á kaa myị-ị̀ ke ụrụ gbuu ka?

¹⁸ Olegu chịng pyẹpyẹ ụka ọhẹ chajị nyori angịnyị ịla oye nyang á myị ke ụrụ wo ẹrụ ọnyịịla gbuu ka lee angị ịmanyị-manyị a kaa tọ ẹ-ẹpwa lẹ? Ịyẹ ahị tị́ ka jẹ́-ẹ họ ẹ-ẹpwụ nya iwe-ahụrụ ọlịịwẹ nyọka chị ọkẹkẹnị gụ́ olene? Ị gba ahị́ nya ẹla ịhyẹ ịlẹ kị ka jẹ́-ẹ dahị ụbwọ kpehe ẹ-ẹpwụ nya akpa ọlẹ ko ri, “ Jaabwọ Kahị ka Bwu Ye Ọkẹkẹnị Gụ Ọọwa ẹ-Ẹrụ Ọnyịịla ọ-Kpa Pyẹ.” Ọ tị baba ịnyịnyị kahị ka la irya ọ-la  kpakpa ẹ-ẹga nya ẹrụ ọnyịịla ọ-kpa pyẹ. Etu nyọọwa tị́ ri ányị?

¹⁹ Ya irya nyang nịrọ ọ-ka ya ẹnyị nya Ohe bala Ịpyị-Adịrahụ nyamwụ dodehe. IJisọsị ya gbagbịla nyori angị ịmanyị-manyị nya-à ka bọwa jẹ lẹ. (Mat. 7:13, 14) Ụka kahị juwa ẹ-ẹrụ ọnyịịla ọ-kpa pyẹ, ahị la ihi nyọka họ ụkụrwọ bala iJihova, iJisọsị bala alegu-ẹrụ. (Mat. 28:19, 20; 1 Kọr. 3:9; Ọwụr. 14:6, 7) IJihova wẹẹ mwahị nya angịnyị ịlẹ kị tịtọ nyọka gbịgba họọ. (Jọn. 6:44) Lẹ, kori ká ọngịnyị á ke ụrụ wo ẹla ọlẹ kahị wẹẹ ya joo lẹẹlẹẹ ka, ọ ka ke ụrụ ụka ọkịla kahị jwoo ụga myị́.

20. Ẹlịyẹ ụpwụ nya iJeremaya 20:8, 9, à tị́ mẹjẹ́ẹhị u-uhye nya uya ọ-ma ta olegu ọ-chị pyẹpyẹ?

²⁰ Ahị ka jẹ́ ang lụmẹ-lụmẹ bwu ẹga nya ọlọmwụ iJeremaya. Angịnyị ilepweji ọlẹ kọ ya ẹla nya Ohe á ke ụrụ ka. Angịịwa dọmwụ kaa doo bala ọ-kpọọ họ “ụka wuu.” (Wa iJeremaya 20:8, 9.) Ụka ọhẹ, olegu chọọ pyẹpyẹ gbee kọ dọmwụ tịtọ nyọka hwabwọ la o-ya ẹla nya Ohe. Ma, ọ́ tị hwabwọ ka. Ịyẹ à tị́ du? ‘Ẹla nya iJihova’ lala ila ẹ-ẹpwụ ọkịlẹtụ nya iJeremaya, lẹ ọ́ jẹ́ tụ́ ang kụrwọọ myị́ ka! Ịnyịnyị ọ kaa lahị ụka ká irya bala ọkịlẹtụ nyahị á myị̀ la Omyi Ẹla nya Ohe lẹ. Ọwẹ ri ang odudu ọkịla hahị nyọka jẹ́ ịBayịbụụ ẹnụ myị́ ẹnụ bala ọ-kụ irya jwoo. Ọọwa ka dahị ụbwọ nyọka ye ọkẹkẹnị gụ́ ọọwa ẹ-ẹrụ ọnyịịla ọ-kpa pyẹ, angịnyị tị ka ke ụrụ wo lahị gụ́ ene ịnyịnyị.​—Jer. 15:16.

21. Ányị ahị tị́ ka bwu kụrụ uya ọlẹ kahị wẹẹ ma ta olegu ọ-chị pyẹpyẹ myị́?

²¹ Deborah ọlẹ kahị gu ẹnyị lalẹ ene yẹkẹẹ: “Olegu ọ-chị pyẹpyẹ ri ang-abwọ nya ẹwụ ọtụka-ọtụka ọlẹ ká Olegu Onyobyi kaa kpa jahị dahị.” Ma, iJihova Ohe Oluhye tị la ọngịrị yẹẹyẹẹ gụ́ Olegu Onyobyi bala ang-abwọ nya ẹwụ nyamwụ wuu. Lẹ, ụka ká olegu-ú chịng pyẹpyẹ chajị nya ang ọhẹ lee ọkịla, bịlẹ iJihova kọ ka dang ụbwọ. Ọ ka dang ụbwọ nyọka bọhụ ẹ-ẹpwụ nya ọ-la kpẹẹkpẹẹ-ka bala ọdẹwụ-dẹwụ nyang. Ọ ka dang ụbwọ ụka ká ẹdụrụ-ụ́ jụ́ng. Ọ ka dang ụbwọ nyọka la irya ọ-la kpakpa u-uhye nya iwe ịlẹpwụ nya ịgba ọgbagba nya iJihova. Ọ tị ka dang ụbwọ la irya ọnyịịla u-uhye nya ẹla nya Ohe ọ-kpa pyẹ ịnyịnyị. Raabwọ ha Adang ọlẹ kọ la ọháha, ka ya abwọlẹ ká ẹla lang ọ-ọkịlẹtụ kpangga joo. Bwula ụbwọ ọdada nyamwụ, a ka kụrụ uya ọlẹ ka wẹẹ ma ta olegu ọ-chị pyẹpyẹ myị́.