À wa egbeju nya ẹla ịla Ẹpwang ọ-Kụ Gbeji nya ẹka ọlẹ rige-rige lẹ? Aalẹ, yẹ kori á ka jụ́ ịtọ ẹla ileji ịlẹ wẹ myị́ wẹẹ:

Ahị ọdahile nya ẹlịyẹ ụpwụ nya iJemsi 5:11 à tị́ ya hahị nyọlẹ kọ ya nyori iJihova nyị “ri Ọlọnahị bala Ọngọ la ahyẹẹrwẹwa lụmẹ”?

Ahị jẹ́ nyori iJihova kaa hịnyọhi ịhọbịrị nyahị ọọlajị nya ahyẹẹrwẹrwa nyamwụ. IJemsi 5:11 mẹjẹ ịnyịnyị nyori ọ kaa nwụlanọ nyọka dahị ụbwọ bwula ahyẹẹrwẹrwa nyamwụ. Ọ ka há kahị ka gbịlọọ.​—w21.01, ẹbẹ 21.

Ịyẹ tị́ du ká iJihova ya olegbeju oriri yeji?

Ọháha à du kọ họ ịnyị lẹ. Obyi omeme ọwẹ ya iwe da ká ugbiyegu nyamwụ ka jẹ́-ẹ họ ang ẹ-ẹpwụ nya okpunyi bala ọkẹm-kẹm. Ọng myị́ ọng ugbiyegu kọ kaa họ ẹla pwoku obyi omeme ọwẹ kaa jẹ́ ọngọlẹ kọ ka cheje nya ẹla bala ọ-ka kụ ịlahị ẹ-ẹpwụ nya ẹla ọọwa o-hu họ.​—w21.02, ẹbẹ 3.

Ịyẹ tị́ du ká Angịnyị nya ịKịrayịsị ka dụmwọ-dụmwọ ẹ-ẹga nya ang-abwọ ịlẹ kịị kpa da ụpwụ du kịla awụlẹ?

Ó ri ká ọngịnyị á chụ nyọka kpa ang-abwọ ịlịịwẹ joja aalẹ, ọ baba kọ ka jẹ́ angịlẹ kọ wẹẹ yẹjula ụ-ụwa. Ọ kaa lujwo gụ́ nyọka ka họ ịnyị ẹ-ẹga ọlẹ ká ogu nya angịnyị lụmẹ-lụmẹ kaa joja bwu. (1 Tim. 5:13) Ẹla ọtịpyọ ọlẹ kọ ka họ ụ-ụwa ịnyịnyị myị́ ri, oja ọlẹ kị jẹ́ ọmwụ nyamwụ ka, kaa pyẹ ụ-ụwa, ẹla nya ọhị ọ-da ta aanahị tị ka ju kele myị́.​—w21.03, ẹbẹ 31.

Ẹlịyẹ à tị́ du ká Ohe ya iwe da ká iJisọsị yẹ akama bala ọ-gbu?

Ang odudu ọhẹ ri, nyọlẹ kị ya iJisọsị pịlẹ o-okoji wẹẹ, ọ du kọ chịkpẹẹ nyọka gba ala iJuu kpehe hi ọlọ ọhẹ ọlẹ kọ ji uhye nyaa. (Gal. 3:10, 13) Ẹla oheeye ri, iJihova wẹẹ nwụla iJisọsị nọ gbe ụkụrwọ nya Ọngọkịla iya Ọgbahị. Ọhata ri, ọlẹ ká iJisọsị godayị giri-giri gbee ka pwụ igu, ọ mẹjẹ nyori angịnyị ehe ka jẹ́-ẹ kpa ọmyịmyị nyaa kpọọ ẹ-ẹpwụ nya ịmayẹ ịnyịịngịrị myị́. (Job. 1:9-11)​—w21.04, ẹbẹ 16-17.

Ịyẹ a tị́ ka jẹ́-ẹ họ kori kọ kaa lujwo nyọka tọ angịnyị ẹ-ẹrụ ọnyịịla ọ-kpa pyẹ?

À ka maga nyọka ka ẹpwa nyaa ụka ọkịla ọlẹ kị kaa ji ẹpwa gụ́ myị́. À ka maga nyọka ya ẹla nya Ohe ẹ-ẹga ọkịla myị́ ịnyịnyị. À tị ka kpa ijẹẹhị ọdatị, lala ụpwụ ọ-da du kịla angịnyị myị́ ịnyịnyị.​—w21.05, ẹbẹ 15-16.

Ịyẹ à tị́ ri etu nya ẹla ọlẹ ká ọlẹrụ ịPọlụ yẹkẹẹ: “Ijata ojiji nya ehile ọọwa kpangga, a họ kam jẹ́ igu ogbugbu nyam ọọwa ẹ-ẹga nya ehile nya iMosisi lẹ”? (Gal. 2:19)

Ehile nya iMosisi ya ọkpẹẹkpẹẹ ọlala ka nya angịnyị kụ ehe bala ọ-kpa ala Isirẹlụ ụgbẹyị ka ẹga nya ịKịrayịsị. (Gal. 3:19, 24) Ọọwa dudu ká ịPọlụ ye ịKịrayịsị myị. Bwula ọ-họ ịnyị, ịPọlụ gbu “ẹ-ẹga nya ehile” lẹ; ó ji ekpeleji nya ehile ọwẹ kaka.​—w21.06, ẹbẹ 31.

Ànyị iJihova à tị́ ya ọgụ-ẹpẹtẹ deeji hahị u-uhye nya ọhụ ọbaba?

IJihova bọhụ ẹ-ẹpwụ nya ido ọlẹ kị ya ba ẹnyị nyamwụ, egbeju ọngịrị ọ-la ta eji ọkpakpa nyawmụ, egbeju ọngịrị ọlala nya anyị nyamwụ ịhyẹ, ịnịịkịla nya Olegu Onyobyi, akama ọyẹyẹ nya anchẹ ịlịkẹjẹ nyamwụ, ebwo ọchịchị hi aligu nyamwụ ịlẹ kị gbu, ẹla ọlẹ ká angịtịpyọ kaa họ angịkịla, bala ọlẹ ká angịnyị wẹẹ bịrị odehe ọlẹ ká Ohe họ.​—w21.07, ẹbẹ 9-12.

Ọgụ-ẹpẹtẹ ọnyịịla oyina iJosẹfụ à tị́ ya da hahị u-uhye nya ọhụ ọ-dapịlẹ?

Ọ bọhụ ẹ-ẹpwụ nya ẹla ọkịrọrọ ọlẹ ká anyịnamwụ họọ. Ẹla ọọwa du kị chị ẹla bọọ ododu bala ọ-yọọ du ka ju agba ụ-ụwa Ijipiti ẹ-ẹpwụ nya ẹka lụmẹ-lụmẹ.​—w21.08, ẹbẹ 12.

Ụma nya ọ-hụ́ jigi-jigi ịyịna ụpwụ nya ịHagayị 2:6-9, 20-22 à tị́ ya neeji?

Ala ẹpwụma á kaa ke ụrụ wo ẹla nya Ịpyị-Adịrahụ ọlẹ kahị kaa ya ka, ma iru nya angịnyị wẹ ẹpwụ nya ẹlịlẹhị lẹ. Lụka okpii ala ẹpwụma wuu ka hụ́ jigi-jigi ohyẹẹkpẹ-ẹkpẹ ụka kị ka tayịreji.​—w21.09, ẹbẹ 15-19.

Ịyẹ tị́ du kahị ka hu abwọ la ọ-họ ụkụrwọ nya ẹrụ ọnyịịla ọ-kpa pyẹ nyahị ka?

IJihova yẹ abwọlẹ kahị wẹẹ maga ka ba, ọ tị kpọọ ịpyọ. Ó ri kahị kpụ ịbwọ lee abwọ ọ-chị́ịhị pyẹpyẹ ka aalẹ, ahị ka yé ọhịhị ọmyịmyị-ka.​—w21.10, ẹbẹ 25-26.

Ànyị Ala iLivayị egbeju 19 à tị́ ka dahị ụbwọ nyọka ju ihi nya ẹla ọlẹ: “Anụ́-ụ . . . juwa la ịgọgọ ẹ-ẹpwụ nya abwẹla ọhọhọ nyanụ wuu”? (1 Pit. 1:15)

Ọ lala o-ri ẹla ọla ọgba ọwẹ nyị kpehe bwu ụpwụ nya Ala iLivayị 19:2 ịnyị. Egbeju 19 ya ọ-chụ pwokwita nya ang lụmẹ-lụmẹ hahị u-uhye nya abwọlẹ kahị ka kpa ẹla ọlụpwụ nya 1 iPita 1:15 họ ụkụrwọ ẹ-ẹpwụ nya ọhịhị nyahị ẹnụ myị́ ẹnụ.​—w21.12, ẹbẹ 3-4.