IJihova byi ala Isirẹlụ nyị ka ri angịnyị ị-la ịgọgọ. Nyọka daa ụbwọ kị ka jẹ́-ẹ la ịgọgọ, ọ byaa yẹkẹẹ: “Ā ga kpa ọnọọkịla pyebile chajị nya ọngịnyị ehe ọọnang ka. Ā họ ibeenu-ọnọọkịla ọlẹ kọ ka ya eje nya igu wu ọngịnyị ehe ọọnang ka. Am à ri [iJihova] lẹ.”​—Liv. 19:2, 16.

Etu nya omyi ẹla nya ala iHibụrụ ọlẹ kị yẹda kaka ri ọngịnyị ọ-ka “họ ibeenu-ọnọọkịla ka” pwokwọọ yẹẹyẹẹ, ma ịyẹ à tị́ ri etu nyamwụ kpangga? Ụpwụ nya ala iJuu ọhẹ kị da u-uhye nya ụpwụ nya Ala iLivayị yẹkẹẹ: “Ụpa nya ọgba ọwẹ . . . lujwo la ọ-ka yẹ kpataa ọọlajị nya akama ịlẹ kị juwa ẹ-ẹpwụ nyọka jẹ́ abwọlẹ kị kpa etu ọdada nya ala iHibụrụ ọla ẹgẹwẹ ya ẹla, chajị ọkwọngọ nyamwụ ri a ‘dayị u-uhye nya ọngịnyị, dayị rịrị, lee ọ-dayị bọọ ba ka.’”

Angị jẹ́ ang ịhyẹ me irya nyori ẹlẹwẹ nyị da ori wu ẹla ọla ọgba 15 ọlẹ kọ yẹkẹẹ: “Aa ya ẹla nya ịlẹhị ụka ká ka chị eje nya ẹla. Ā chị oku oyoye ẹ-ẹga nya ọlẹbyahị lee ọlụdụ ka.” (Liv. 19:15) Ó ri ịnyị aalẹ, etu nya ehile ọla ọgba 16 ọlẹ kọ ya nyị ri ibeenụ-ọnọọkịla ka kà ri, angịnyị nya Ohe á ka họ ọngọkịla ang ọtịpyọ ẹ-ẹga nya eje ọlala, ụkụrwọ ọhọhọ, lee ẹ-ẹpwụ nya ugbiyegu ka, ị́ tị ka pyị ẹla anyoko chajị nya apyobwuna nya ịlaa ka ịnyịnyị. Ẹlịlẹhị ri, áhị kaa họ ang ịwẹ ka, ma ụgbẹyị ọkịla ọhẹ juwa kahị ka jẹ́-ẹ wo etu nya ẹla ọla ọgba 16 gụ́ ọwẹ wẹẹ.

Kụ irya ju ọmwụ ọdada nya ọgba 16 wẹẹ. Ohe da angịnyị nyamwụ ehile nyị ga kpa ọnọọkịla pyebile ka. Kpịtịya nyori ẹla ọ-ya rụ ọngịnyị ị-ịwẹ chwee ka kpa akama weji myị́. Ma ọnọọkịla ọ-kpa pyebile u-uhye nya ọngịnyị tị kaa tịpyọ gụ́ wẹẹ. (Etu 10:19; Ọngọ. 10:12-14; 1 Tim. 5:11-15; Jem. 3:6) Ọngọ kpa ọnọọkịla pyebile kaa tọchị-tọchị me ọnọọkịla nyọka bịrị ẹnyị nya ọngịnyị. Ọngọ kpa ọnọọkịla pyebile ka ri ibeenu-ọnọọkịla ba ọngịnyị myị́, kori ká ọọwa á ka kpa igu nya ọngọọwa wẹwẹ. Kpịtịya nyori angị bịrị ọngịnyị enyị à họ ibeenu-ọnọọkịla ba iNebotu dudu kị da ajwọ nwọọ tụ ọkịrọrọ lẹ. (1 Ịdị. 21:8-13) Ee, jaabwọ ká ụpa oheeye nya Ala iLivayị 19:16 ya, ọngọ bịrị ọngịnyị ẹnyị ka ju ọmwụ igu nya ọngịnyị bwula ọ-họ ibeenu-ọnọọkịla ọlẹ kọ ka ya eje nya igu wu ọngọọwa myị́.

Ịnyịnyị, ọngịnyị ka bịrị ẹnyị nya ọngọkịla chajị nyori ọngọọwa wọọ ẹjẹ myị́. Ụpwụ nya 1 ịJọn 3:15 yẹkẹẹ: “Ọng myị́ ọng ọlẹ ká ọngịnyị ehe ọọnamwụ á kaa wọọ ẹjẹ aalẹ, ọngọ nwụ ọngịnyị, ọngọ ọlịnyị à ri lẹ. Anụ tị́ jẹ́ yẹkẹẹ, ọngọngọhẹ ọlẹ kọ ri ọngọ nwụ ọngịnyị aalẹ, ọhịhị ọmyịmyị-ka nya Ohe Oluhye á juwa ẹ-ẹpwụ nya ọngọ ọlịnyị kpong-kpong kaka.” Ọ baba nyọka jẹ́ ịnyịnyị nyori, nyọlẹ ká Ohe ya nyori nyị “họ ibeenu-ọnọọkịla ọlẹ kọ ka ya eje nya igu wu ọngịnyị ehe ọọnang ka” kpá, ọ myịmyị yẹkẹẹ: “Ā kpa ẹla ẹ-ẹpwụ jahị da ọnyịnang ka.”​—Liv. 19:17.

Lẹ, ehile ọdatị ọlẹ kị da ju ụ-ụpwụ nya Ala iLivayị 19:16 wẹ wẹẹ gbile Angịnyị nya ịKịrayịsị ụbwọ ụ-ụrụ la ọngịrị-ọngịrị ịnyị. Ahị ka pwa irya ọtịpyọ arwarụ bala ọ-hwabwọ la ọngịnyị ọ-kpa bịrị pyii. Ó ri kahị “họ ibeenu-ọnọọkịla” ba ọngịnyị bwula ọ-bịrị ẹnyị nya ọngọọwa ẹ-ẹkpẹ chajị nyori ẹla nyamwụ á háahị ka lee ahị kaa yẹ ijiiji nyamwụ aalẹ, ọ ka ri ang ẹjẹẹ nyori ahị ba ọngọọwa ẹtẹ myị́. Angịnyị nya ịKịrayịsị ka hwabwọ la ọngịnyị ọ-ba ẹtẹ gbang-gbang.​—Mat. 12:36, 37.