À wa egbeju nya ẹla ịla Ẹpwang ọ-Kụ Gbeji nya ẹka ọlẹ rige-rige lẹ? Aalẹ, yẹ kori á ka jụ́ ịtọ ẹla ileji ịlẹ wẹ myị́ wẹẹ:

Ányị ahị tị́ ka bwu yé apyobwuna kori kahị kpa ụka nyahị ya ẹla bala iJihova, ke ụrụ lọọ bala ọ-kụ irya u-uhye nyamwụ?

Ahị ka cheje ịnyịịla-ịnyịịla, ri angị jẹ́ mẹ ang jẹ yẹẹyẹẹ, la ọmyịmyị ọnyọọngịrị gụ ọọwa, bala ọ-nwà ẹ-ẹpwụ nya ọháha nyahị ha iJihova.—w22.01, ẹbẹ 30-31.

Ányị ahị tị́ ka yé ụbwọ ọdada kori kahị dahịhile iJihova bala angị kpẹhị rịrị ịlẹ kọ chụ?

Ọlẹẹlẹẹ à ri ụka ọlẹ kahị ka dahịhile ụgbẹyị ọlẹ ká iJihova kaa bwu họ ang ẹẹ, bwula ọ-la ịwẹ ọdada ọhẹ-lọhe u-uhye nya eje ọchịchị nya angịgbahị nya ọjịra-jịra bala abwọlẹ kị wẹẹ bwu kpahị ụgbẹyị ka. Ọọwa lẹ, ahị ka nwụlanọ nyọka ju ihi nya ẹla ọmẹjẹ ọnyị myị́ ọnyị, tụ́ ịlẹ kị dọmwụ rihi inyeewe lee ịlẹ kahị wo etu nyaa nwà ka ụka ká akama ọtụka okpelego ka dọmwụ lẹlẹ.—w22.02, ẹbẹ 4-6.

Ẹlịyẹ olegu-ẹrụ à tị́ wẹẹ mẹjẹ ụka ko ya ẹla nya “ori ọ-kpa me ube ụ-ụbwọ nya iSerubabẹlụ” ịGọvụnọ je ịSẹkaraya? (Sẹk. 4:8-10)

Ọyị ọyẹyẹ ọwẹ ya ahị ọdahile ha angịnyị nya Ohe nyori ube ịgọgọ o-me labwọ ọlẹ kị wẹẹ nwụ́ nyị ka pwụ ocheju bala ọ-la jaabwọ ká Ohe Oluhye tịtọ.—w22.03, ẹbẹ 16-17.

Ányị ahị tị́ ka bwu ri ọgụ-ẹpẹtẹ ọnyịịla ẹ-ẹpwụ nya ẹla oyaya? (1 Tim. 4:12)

Ahị ya ẹla la ọdụmwọ bala ihi ojuju ẹ-ẹrụ ọnyịịla ọ-kpa pyẹ, mweje bwu ọkịlẹtụ nyahị bala ọ-wẹ ẹla ụka myị́ ụka ọọjịra-jịra. Ahị ka myịmyị-ị̀ ya ẹlịlẹhị bala ẹla ọlẹ kọ ka kpa angịkịla wule bala o-cheji ba hi ẹla onyobyi oyaya.—w22.04, ẹbẹ 6-9.

Ịyẹ tị́ du ká abwụma nya egbiriyo (ịpyị-adịrahụ) ine ịlẹ kị chabwọ ụ-ụpwụ nya ịDanẹlụ egbeju 7 tụ́ chawụlẹ kaka ri ịnya ugbiriyo ookpokpo ụ-ụpwụ nya Ọwụrụụ-wụrụ 13:1, 2?

Ugbiriyo ọla ụpwụ nya Ọwụrụụ-wụrụ egbeju 13 á ku ọmwakpa nya ịpyị-adịrahụ ookpokpo kpangga lala iRom ka. Ọkọkọ nya ọọwa lẹ, o ku ọmwakpa nya igomenti ịlẹ wuu kị kpeji u-uhye nya angịnyị ehe ụka ọhẹ lẹ.—w22.05, ẹbẹ 9.

Ụgbẹyị ọkpọnchị oyina ahị tị́ ka bwu mẹjẹ nyori ahị dahịhile eje ọ-la kpakpa nya Ohe?

Kori ká ọngịnyị-ị́ dohi ido, họ ẹla wụụhị ẹjẹ, lee ọ-họ ọhọbịrị baahị, ahị ka maga nyọka tụụbwọ hi agbama bala ẹla ọ-kpa ẹ-ẹpwụ, kahị pehi ẹla ọọwa ju iJihova ụ-ụbwọ. Ọ ka nwụ ang ịtịpyọ ịlẹ wuu ká ọhọbịrị ju ọmwụ nyaa họ.—w22.06, ẹbẹ 10-11.

Ẹlịyẹ ọọnahị ọlẹng ọlẹ ko juwa kpịlahị nya abwọ ọrịrị ọọjịra-jịra à tị́ ka kpa i-irya?

Áhị ka kpa abwọ ọrịrị mẹ ang jẹ alọjịra-jịra lee ọ-kpa ya ẹla dodehe ka. Abwọ ọrịrị “onyudiyo” à tị́ baba ka ịnyịnyị, ọ gụgụ wuu lụka nya ọmwụ ọdada nya ọjịra-jịra. (Mat. 6:7)—w22.07, ẹbẹ 24-25.

Ụ-ụgbẹyị oyina angịlẹ kị “họ abwẹla onyobyi” à tị́ ka ‘wuleji bwula igu ka ju ka ẹpwụ nya eje owuwu’? (Jọn. 5:29)

Ị́ ka ya eje waa chajị nya abwẹla ịlẹ kị họ kam kẹkpẹ ka. Ị ka wụla abwẹla bala ịhọhọ nyaa yẹ ụka ọlẹ kị wuleji bwula igu kpá.—w22.09, ẹbẹ 18.

Irya ọnyịịla oyina J. F. Rutherford à tị́ ju angịnyị ọọjịra-jịra ọtụka ọlẹ kị họ la Ọya Ohikichu nya 1922?

Ọọjịra-jịra ọtụka ọlẹ kị la ịị Cedar Point, Ohio, U.S.A., ọ yẹkẹẹ: “Adịrahụ wẹẹ kpeji lẹ! À la ụkụrwọ nyọka ya ẹlẹwẹ je ọng myị́ ọng. Chajị nya ọọwa lẹ, anụ ya dodehe, ya dodehe, ya Adịrahụ bala Ịpyị-Adịrahụ nyamwụ dodehe mẹ!”—w22.10, ẹbẹ 3-5.

Agbẹyị ịta iyina ụpwụ nya Ayịsaya egbeju 30 à tị́ chabwọ ká Ohe kaa kpa dahị ụbwọ nyọka bọhụ?

Egbeju nya ụpwụ ọwẹ mẹjẹ nyori ọ kaa (1) ke ụrụ bala ọ-wẹ abwọ ọrịrị nyahị, (2) kpahị ụgbẹyị, bala (3) ọ-wahị kụrụụhị lẹẹlẹẹ bala ọ-ka họ ịnyị ị-ịlahị.—w22.11, ẹbẹ 9.

Ányị ahị tị́ bwu jẹ́ myị̀myị̀ nyori ẹla ọla Eje Ọnyịịla 37:10, 11, 29 họ jịra lụka onyogo bala ọ-ka họ jịra ị-ịlahị?

Omyi ẹla nya iDevidi chabwọ nya iwe-ahụrụ ọnyịịla ọlẹ ko ji ọpyị nya Isirẹlụ lụka nya eji ọkpakpa nya iSolomọn. IJisọsị ya ẹla rụ ịparadayịsị ọlẹ kọ ka wẹ ị-ịlahị bala ọ-da ụbwọ ka ọgba 11. (Mat. 5:5; Luk. 23:43)—w22.12, ẹbẹ 8-10, 14.