Ehe. Ẹla ọlẹ ká iDevidi da ẹgẹwẹ tị lịnyị ịlẹhị.

Ẹ-ẹpwụ nya ọgba ọwẹ iDevidi yẹkẹẹ: “M̀ ka gwogbo hang gbe oyi myị oyi.” (Eje. 145:2) IDevidi myịmyị ya ẹ-ẹpwụ nya ọgba ọkịla yẹkẹẹ: “Ọngọlahị Ohe Oluhye nyam ee, m ka gwogbo hang lọkịlẹtụ nyam wuu, m ka gwogbo ha ẹnyị nyang gbe oyi myi oyi.”—Eje. 86:12.

IDevidi á kụ irya nyori ọwa nyị́ ka jẹ́-ẹ gbu enenehe kaka ụka kọ da ẹlẹwẹ ka. Ọ jẹ́ ká iJihova ya nyori ọhọbịrị nyị kaa kpa igu wẹ ọngịnyị, ọ tị myị ọnụ ká ọwa ịnyịnyị ri ọlọhọbịrị. (Ọmwụ. 3:3, 17-19; Eje. 51:4, 5) Ọ jẹ́ nyori angịnyị lala Ebiraham, Ayịsiki, bala iJekọbụ kị ri angịlẹ ká ẹla nyaa kpụ Ohe ịpyọ nyị gbu lẹ. IDevidi tị jẹ́ ịnyịnyị nyori ọhịhị nya ọwa nyị ka myị́ ẹnẹhẹ wẹẹ. (Eje. 37:25; 39:4) Ma ẹla ọlẹ kọ ya ụ-ụpwụ nya Eje Ọnyịịla 145:2 nyọka gwogbo ha Ohe gboyi myị́ oyi, mẹjẹ nyori ọ la irya bala ọ-cheje nyọka gwogbo há Ohe jaabwọ myị́ abwọ kọ juwa hịhị.—2 Sam. 7:12.

IDevidi kaa da ụpwụ ụka ọhẹ u-uhye nya ẹla ịlẹ kị họ ọ-ọhịhị nyamwụ. Ọ-chụ pwokwita ri ẹla ịlẹ kọ da ju ụ-ụpwụ nya Eje Ọnyịịla 18, 51, bala 52. Ẹ-ẹpwụ nya Eje Ọnyịịla egbeju 23, iDevidi chabwọ nya iJihova lala ọngọgbikpịlọ ọlẹ kọ kaa kpa ịkpịlọ nyamwụ ụgbẹyị, kpẹhị rịraa, bala ọ-chewu kaa. Ụma nya ọngọgbikpịlọ ọlịnyị iDevidi à ri lẹ. Ọ tị tịtọ kọ ka gbịgba ha iJihova ‘lụka nya ọhịhị nyamwụ wuu.’—Eje Ọnyịịla 23:6.

Kpịtịya ịnyịnyị nyori, iJihova à kpa iDevidi da ẹla ịlẹ wuu kọ da ju ụ-ụpwụ bwula olegu ịgọgọ nyamwụ lẹ. Ẹla ịhyẹ ịlẹ kọ da ya ẹla u-uhye nya ọmwụ ọyẹyẹ ịlẹ kị ka họ jịra ị-ịlahị. Ọ-chụ pwokwita, ẹ-ẹpwụ nya Eje Ọnyịịla 110, iDevidi ya ẹla rụ ụka ọlẹ ká Ayịbaba nyamwụ ka “hụhụ u-upwuriri” nya Ohe e-epwoohe bala ọ-ka ye ọngịrị ọtụka. Ịyẹ ọ tị́ ka họ? Ọ ka kụrụ aluji nya Ohe bala ọ-ka “yẹ ụma ịkịla akama” odehe ọlẹ. IDevidi ri adịda ogogo nya iJisọsị ọlẹ kọ wẹ ka ri iMesaya. IMesaya ọwẹ tị ka kpeji bwu epwoohe bala ọ-ka “ri ọngọkiliya gbe oyi myi oyi.” (Eje. 110:1-6) IJisọsị ya nyori ọmwụ ọyẹyẹ ọla Eje Ọnyịịla 110 nyị ya ẹla rụ ọwa bala o-ri nyị la ọ-họ jịra ị-ịlahị myịmyị.—Mat. 22:41-45.

Ee, iJihova kpa iDevidi da ụpwụ bwula olegu ịgọgọ nyamwụ u-uhye nya ang ịlẹ kị họ lụka nyamwụ bala ang ịlẹ kị ka họ ị-ịlahị, ụka kọ ka wuleji bwula igu kọ ka la iwe nyọka gwogbo ha iJihova gboyi myị́ oyi. Ọwẹ dahị ụbwọ nyọka jẹ́ nyori ẹla ọla Eje Ọnyịịla 37:10, 11, 29 chabwọ nya ẹla ọlẹ kọ họ ụka nya ala Isirẹlụ bala ẹla ọlẹ kọ ka họ odehe wuu ị-ịlahị ụka ká Ohe ka họ ọnụ ọmyịmyị nyamwụ jịra ịnyị.—Yẹ ọgba 8 nya ang ọjẹ́jẹ ọlẹ kọ ri “Am Bala Ahụ ka Bá Hụhụ la Awụlẹ ị-ỊParadayịsị” ẹ-ẹpwụ nya ụpwụ ọlẹ.

Eje Ọnyịịla 145:2 bala ịgba ịkịla mẹjẹ nyori iDevidi tịtọ nyọka gwogbo ha iJihova ụ-ụwa Isirẹlụ gbee kọ ka gbu ịnyị. Ị tị mẹjẹ gede-gede jaabwọ ká iDevidi ka jẹ́-ẹ họ ị-ịlahị ụka ká iJihova ka wulọọ eji bwula igu.