ANG ỌJẸ́JẸ 49
EJE 147 Life Everlasting Is Promised
Ányị A tị́ ka Bwu Hịhị Gboyi Myị́ Oyi?
“Ọng myị́ ọng ọlẹ kọ yẹ Ọnyẹwẹ nya Ohe Oluhye ọọwa kọ myị kpa ọkịlẹtụ ookpokpo myị la Ọnyẹwẹ ọọwa, ka la ọhịhị ọmyịmyị-ka.”—JỌN. 6:40.
ẸHỊ NYA ẸLA
Abwọlẹ ká angịlẹ ká Ohe ya ida wụ bala ebwo nya ịkpịlọ ịkịla yé apyobwuna bwu iya ọkịlaakịla nya iJisọsị ịKịrayịsị.
1. Ịyẹ tị́ du kọ ka la angịhyẹ nyori ọngịnyị nyị́ ka jẹ́-ẹ hịhị gboyi myị́ oyi ka?
ANGỊNYỊ lụmẹ-lụmẹ kaa ri ang oriri ọnyịịla bala ọ-kpa ịnyịrọ kọ ayịlọ nyọka la ogogo chajị kị ka ri ehe tata pwụ ẹgẹhẹ. Ma, ị jẹ́ nyori ọọwa á ka du kị ka hịhị gboyi myị́ oyi ka. Ị me irya nyori nyị́ ka chịkpẹẹ nya ọngịnyị ọ-ka hịhị gboyi myị́ oyi ka, chajị nya ọjụjụ ọlẹ kọ kaa ba okwirichi ọchịchị ẹ-ẹgọ. Ma, iJisọsị ya nyori nyị chịkpẹẹ nya ọngịnyị ọ-ka “la ọhịhị ọmyịmyị-ka,” jaabwọ ká ụpwụ nya ịJọn 3:16 bala 5:24 mẹjẹ.
2. Ẹlịyẹ ịJọn egbeju 6 à tị́ ya u-uhye nya ọhịhị ọmyịmyị-ka? (ỊJọn 6:39, 40)
2 Jaabwọ kahị yẹ bwu ang ọjẹ́jẹ ọlẹ kọ jene nyọlẹ, iJisọsị họ ụkụrwọ ẹbyẹbyị ya ịkaa bala iyenyi ha angịnyị ụnọ ịmanyị tị́ ri. a Ọọwa la ẹbyẹbyị, ma ẹla ọlẹ kọ byi angịlẹ kị bọọ ka ịKapẹnayọm ị-ịGalili ahyẹẹnụ ọ-ba ọọwa ba à tị dọmwụ la ẹbyẹbyị gụ́ wẹẹ lẹ. O byaa nyori ọwa nyị ka wule angịlẹ kị gbu eji bala o-ri nyị ka hịhị gboyi myị́ oyi. (Wa ịJọn 6:39, 40.) Lẹ kụ irya nya abwọlẹ ká ọọwa ka ri ha aligu bala alugbiyegu nyang ịlẹ kị gbu lẹ wẹẹ. Ẹla ọlẹ ká iJisọsị ya mẹjẹ nyori iru nya angịnyị ịlẹ kị gbu lẹ ka wuleji bwula igu, ahụ bala angị háng-há tị ka jẹ́-ẹ hịhị gboyi myị́ oyi ịnyịnyị! Ma, etu nya ẹla ọlẹ ká iJisọsị tị ya ka ịlahị ụ-ụpwụ nya ịJọn egbeju 6 kaa la angịhyẹ ujwo la owowo. Ahị kụ ẹhị yẹ ẹla ọlẹ ká iJisọsị ya wẹẹ.
3. Ẹlịyẹ iJisọsị à tị́ ya ụ-ụpwụ nya ịJọn 6:51?
3 Iru nya angịnyị ịlẹ kị juwa ị-ịKapẹnịwọm yẹ nyori ịkaa ọlẹ ká iJisọsị ya haa ri wẹ kpanjẹ da ori wu ịmána ọlẹ ká iJihova ya ha adaa igogo anyị. Ụpwụ Ịgọgọ dọmwụ wụrụ ịmána ọọwa nya ‘ịkaa o-bwu epwoohe.’ (Eje. 105:40; Jọn. 6:31) IJisọsị kpa ẹla ọlẹ ká angịwẹ jẹ́ u-uhye nya ịmána ene lẹ mẹ ẹla ọkpọnchị ọhẹ jáa. Ịlẹhị lẹ ịmána ọlẹ kị yé ri, ri ụkụrwọ ẹbyẹbyị bwu ẹga nya Ohe, angịlẹ kị roo tị gbu ụka ohyẹẹkpẹ. (Jọn. 6:49) Ọdatị tị ri, iJisọsị wụrụ ịlọmwụ nya “ịkaa o-bwu epwoohe hireji,” bala “ịkaa nya ọhịhị.” (Jọn. 6:32, 33, 35) IJisọsị ya ẹla ọkpọnchị ọlẹ kọ ri ọdatị nya ịmána ọlụka onyogo bala ọwa la ịlọmwụ. Ọ yẹkẹẹ: “Am kpakpakpa a ri ịkaa nya ọhịhị ọọwa ọlẹ ko bwu epwoohe hireji lẹlẹ. Ọng myị́ ọng ọlẹ kọ ye ịkaa ọọwa ri lẹ aalẹ, ọngọọwa ka la ọhịhị ogboyi myị́ oyi lẹ.” (Wa ịJọn 6:51.) Ẹlẹwẹ wa ala iJuu ahị́ wu. Ányị iJisọsị à tị́ ka ya nyori ọwa nyị hireji bwu epwoohe lala “ịkaa” ọlẹ kọ gụ́ ịmána ọlẹ ká Ohe ya ha adaa igogo anyị bwula ụkụrwọ ẹbyẹbyị? Ọọwa iJisọsị à tị byaa yẹkẹẹ: ‘Ugbinyịrọ nyam ọlẹ kam wẹẹ ka hu [ha] a ri ịkaa ọọwa lẹ.’ Ịyẹ à tị́ ka ri etu nya ẹla ọlẹ kọ ya wẹ myị́? Ọ baba kahị ka wo etu nya ẹla ọlẹ kọ ya chajị ọwẹwẹ nyamwụ mẹjẹ jaabwọ ká ọhịhị ọmyịmyị-ka bwu chịkpẹẹ hahị bala alịkẹjẹ nyahị. Ahị kụ ẹhị yẹ etu nya ẹla ọlẹ ká iJisọsị ya wẹẹ.
ỊKAA ỌHỊHỊ BALA UGBINYỊRỌ NYAMWỤ
4. Ịyẹ tị́ du ká ẹla ọlẹ ká iJisọsị ya wu angịhyẹ ejiri?
4 Ejiri wu angịhyẹ ẹ-ẹpwụ nya angịlẹ kị wẹẹ ke ụrụ wo ẹla nya iJisọsị ụka kọ ya nyori ọwa nyị wẹẹ ka hu ugbinyịrọ nya ọwa “kịla iya wọnụ nya alodehe ọlẹ wuu ju.” Ọhẹka, ị me kọ ja ka bwu ugbinyịrọ nyamwụ ọlam-ọlam haa ri. (Jọn. 6:52) Ma iJisọsị tị myị́myị́ ya ẹla ọkịla ọlẹ kọ ka gbaa ịnyịrọ wọọ gụ́ ọwẹ wẹẹ. Ọ yẹkẹẹ: “Ó ri kanụ myị ye ugbinyịrọ nya Ọnyị nya ọngịnyị ehe ọlẹ ayịdang ri bala ọ-myị ye ịwọ nyamwụ nwa ịnyịnyị ka aalẹ, ánụ ka jẹ́-ẹ la ọhịhị ọmyịmyị-ka nya Ohe Oluhye kaka.”—Jọn. 6:53.
5. Ịyẹ tị́ du kahị ka jẹ́ myị̀myị̀ nyori ẹla ọlẹ ká iJisọsị ya á mẹjẹ nyori angịnyị ka nwà ịwọ nyamwụ ọlam ka?
5 Kẹkpẹ lụka nya iNuwa, Ohe pwa nyori angịnyị nyị ri ịwọ ka. (Ọmwụ. 9:3, 4) Wẹ ịlahị nya ọọwa, iJihova da ala Isirẹlụ ehile nyị ri ịwọ ka ịnyịnyị. Ọngọngọhẹ ọlẹ kọ ri ịwọ lẹ aalẹ, ị ka “be ọngọọwa deeji” lee ọ-nwụ ọngọọwa. (Liv. 7:27) IJisọsị mẹjẹ ala iJuu nyori ị baba nyọka kpa ehile ịlẹ ká Ohe ya haa. (Mat. 5:17-19) Lẹ, ọ́ ka jẹ́-ẹ byaa nyị ri ugbinyịrọ nyamwụ bala ọ-nwà ịwọ nyamwụ ọlam-ọlam ẹnẹnẹhẹ ka. Ma nyọlẹ ká iJisọsị ya ẹla ụma ọdatị ọwẹ, ọ tịtọ kọ ka mẹjaa jaabwọ kị ka bwu yé ọhịhị ọlẹ kọ ri “ọhịhị ọmyịmyị-ka.”—Jọn. 6:54.
6. Ụgbẹyị oyina ahị tị́ ka wo etu nya ẹla ọlẹ ká iJisọsị ya nyọka ri ugbinyịrọ nyamwụ bala ọ-nwa ịwọ nyamwụ?
6 Ẹlịyẹ iJisọsị à tị́ wẹẹ ya? Ọ la gbagbịla nyori iJisọsị wẹẹ ya ẹla letu-letu ịnyị. IJisọsị ya ẹla letu ịwịịwẹ bala ọnyang ọla ịSameriya yẹkẹẹ: “Ọng myị́ ọng ọlẹ kọ tị ye enyi nya ọhịhị ọọwa nwa . . . lẹ aalẹ, enyi ọọwa ka ka ẹpwụ nyamwụ kaka yẹ la ẹmwụ-enyi ọtụka nya ọhịhị ayịdang ọlẹ kọ ka juwa jugu jugu pyịyọọ pwụ ọhịhị ọmyịmyị-ka lẹ.” (Jọn. 4:7, 14) b Ẹla ọlẹ ká iJisọsị ya wẹ á mẹjẹ nyori ọnyang ọla ịSameriya ọwẹ ka nwà enyi ọla ịwẹlụ ọhẹ lẹ, ọ ka la ọhịhị ọmyịmyị-ka ịịwẹ ka. Ịnyịnyị-ịnyịnyị, o-ri yẹkẹẹ angịlẹ ká iJisọsị ya ẹla ta ị-ịKapẹnayọm ka yé ọhịhị ọmyị́myị́-ka kori kị ri ugbinyịrọ nya iJisọsị bala ọ-nwà ịwọ nyamwụ ọlam-ọlam ka.
ỌDATỊ NYA IWE-AHỤRỤ IMIIYE
7. Ẹlịyẹ angịhyẹ à tị́ kaa ya u-uhye nya ẹla ọlẹ ká iJisọsị ya ụ-ụpwụ nya ịJọn 6:53?
7 Angịhyẹ ya nyori ẹla ọlẹ ká iJisọsị ya ụ-ụpwụ nya ịJọn 6:53 u-uhye nyọka ri ugbinyịrọ bala ọ-nwà ịwọ nyamwụ nyị ri ang ọ-ka yẹ kpa họ lụka nya Ang Oriri nya Obyi nya Ọngọlahị, chajị nyori ọ kpa omyi ẹla ịlẹ kị me awụlẹ ya ẹla ụka ọwẹ ịnyịnyị. (Mat. 26:26-28) Ị ya nyori ọng myị́ ọng ọlẹ kị nyị juwa lụka nya Ang Oriri nya Obyi nya Ọngọlahị nyị ka ri ịkaa bala ọ-nwa ere ọlẹ kị kaa kpa chịpwụrụ bwu ẹga nya awụlẹ ụ-ụwa. Ọọwa la kpakpa? Ọ baba kahị ka jẹ́ ọwẹwẹ nya ịtọ ẹla ọwẹ chajị uku ịmanyị tị́ nya angịnyị chị odehe ọnụ kaa tụguru balahị chajị nya ọhọhọ ọwẹ. Ahị kụ ẹhị yẹ ọdatị nya ẹla ọlẹ ká iJisọsị ya ụ-ụpwụ nya ịJọn 6:53 bala ẹla ọlẹ kọ ya lụka nya Ang Oriri nya Obyi nya Ọngọlahị wẹẹ.
8. Ẹlịyẹ à tị́ ri ọdatị nya iwe-ahụrụ imiiye ịwẹ? (Yẹ ifoto ịnyịnyị.)
8 Ahị kụ ẹhị yẹ ang imiiye ịlẹ kị ri ọdatị nya iwe-ahụrụ ịwẹ wẹẹ. Ọhọhẹ, ale bala ụka oyina iJisọsị à tị́ ya ẹla ọlẹ kị da ụ-ụpwụ nya ịJọn 6:53-56? O ya ẹlẹwẹ ụ-ụwa ị-ịGalili la ẹka nya 32 C.E. Ọọwa ka lala ẹka myị́ ene kọ lẹẹ ya ọhọhọ nya Ang Oriri nya Obyi nya Ọngọlahị yeji i-iJerusalẹm. Oheeye, owo anyị ọ tị́ ya ẹla ta? Ụmụmẹ nya angịlẹ kọ ya ẹla ta ị-ịGalili la irya nyọka yé ang oriri ọlam bwu ẹga nya iJisọsị ọkọkọ nyọka jẹ́ ẹla u-uhye nya iJihova lee Ịpyị-Adịrahụ nya Ohe. (Jọn. 6:26) Ẹlịlẹhị ri, ụka ká iJisọsị ya ẹla ọlẹ kị wo etu nyamwụ nwà ka, ị hwabwọ la ọ-myị lọọ ahyaahị. Angịhyẹ ịlẹ kị ri angịjụgbẹyị nyamwụ dọmwụ hwabwọ la ọ-bọọ jẹ. (Jọn. 6:14, 36, 42, 60, 64, 66) Angịwẹ datị hi alẹrụ iwo kụrụ ookpokpo nya iJisọsị ịlẹ kị juwa i-ijata ụka ká iJisọsị ya Ang Oriri nya Obyi nya Ọngọlahị yeji lala ẹka ị-ịlahị nyọọwa la 33 C.E. Lụka ọwẹ, alẹrụ nyamwụ angị 11 ịlẹ kị godayị giri-giri á nyẹẹkpẹ dọọ ka, nanana nyori ị́ wo etu nya ẹla ọlẹ kọ wẹẹ mẹjẹ wuu ka. Kpọkpọọkpọ, alẹrụ ịwẹ datị hi angị la ịGalili chajị ịwa jẹ́ myị̀myị̀ nyori iJisọsị nyị ri Ọnyị nya Ohe ọlẹ kọ bwu epwoohe warị. (Mat. 16:16) Ọ daa ọlẹẹkwaa yẹkẹẹ: “Anụ ayịdang a ri angịlẹ kanụ myị hụ tam lẹẹ ẹ-ẹpwụ nya ọ-tụ pyịpyị bala ọmayẹ nyam wuu pyịyọọ daalẹ lẹ.” (Luk. 22:28) Ọdatị imiiye ịwẹ kem nwà nyọka jẹ́ nyori iJisọsị á ya ẹla ọlụpwụ nya ịJọn 6:53 nyọka mẹjẹ jaabwọ kị ka họ lụka nya Ang Oriri nya Obyi nya Ọngọlahị ka. Ang ẹjẹẹ ịkịla tị dọmwụ ji ịnyịnyị wẹẹ.
ỊJọn egbeju 6 ya ẹla u-uhye nya ẹla ọlẹ ká iJisọsị ya ta iru nya ala iJuu ịlẹ kị tụguru ị-ịGalili (ụpụpịla). Lala ẹka ị-ịlahị nyọọwa, o ya ẹla ta alẹrụ nyamwụ ị-pyịnyẹng ị-ịJerusalẹm (ụpwụriri) (Yẹ ọgba 8)
ẸLẸWẸ GUNG
9. Ebwo nya angịnyị iyina ẹla ọlẹ ká iJisọsị ya lụka nya Ang Oriri nya Obyi nya Ọngọlahị à tị́ gu?
9 Lụka nya Ang Oriri nya Obyi nya Ọngọlahị, iJisọsị ya ịkaa ọmyịrịị-mịrị ka ha alẹrụ nyamwụ lẹ, o byaa nyori nyị ku ọmwakpa nya ugbinyịrọ nya ọwa lẹlẹ. Ọ tị ya nyori ere ọlẹ kọ ya haa nyọka nwà nyị ku ọmwakpa nya “ịwọ . . . nya iro ọnwanwa onyeewe.” (Mak. 14:22-25; Luk. 22:20; 1 Kọr. 11:24) Ẹlẹwẹ la kpọnchị juwa. “Ala Isirẹlụ” nya olegu, ịlẹ kị ka juwa “ị-ịpyị Adịrahụ nya Ohe Oluhye,” Ohe à nwà iro ọọwa ta lẹ, ma a-angịnyị ehe wuu ka. (Hib. 8:6, 10; 9:15) Alẹrụ nya iJisọsị á wo etu nya ẹlẹwẹ yẹẹyẹẹ ụka ọwẹ ka, ma Ohe tị ja ka ya ida waa bwula olegu ịgọgọ kị ka ri ụpa nya iro ọnwanwa onyeewe chajị kị ka juwa bala iJisọsị e-epwoohe.—Jọn. 14:2, 3.
10. Ang ọkịla oyina à tị́ ri ọdatị nya ẹla ọlẹ ká iJisọsị ya ị-ịGalili bala ẹla ọlẹ kọ ya lụka nya Ang Oriri nya Obyi nya Ọngọlahị? (Yẹ ifoto ịnyịnyị.)
10 Jẹ́ nyori “ịkpịlọ ichiche” iJisọsị à ya ẹla ta lụka nya Ang Oriri nya Obyi nya Ọngọlahị lẹ. Alẹrụ nyamwụ ịlẹ kị họ kpẹẹkpẹẹ, kị juwa i-ijata ụka kọ ya ẹlẹwẹ à ri angị họhẹ ẹ-ẹpwụ nya ebwo ochiche ọwẹ lẹ. (Luk. 12:32) Ịwa bala angịkịla ịlẹ kị ka ri ụpa nya ebwo ọwẹ à ka ri ịkaa bala ọ-nwa ere la obyi nya ẹnẹwẹ lẹ. Ịwa à ri angịlẹ kị ka juwa bala iJisọsị e-epwoohe lẹ. Ẹla ọlẹ kọ ya ta alẹrụ nyamwụ ụka ọwẹ datị hi ẹla ọlẹ kọ ya ta iru nya angịlẹ kị tụguru ị-ịGalili, chajị ẹla ọlẹ kọ ya ụ-ụwa la etu a-agbẹyị ịdatị. Ẹla ọọwa tị gu iru nya angịnyị ịlẹ kahị ka jẹ́-ẹ wa kpá myị́ ka.
Angịlẹ kịị ri ịkaa bala ọ-nwa ere la angị ịmanyị-manyị, ma iru nya angịnyị lụmẹ-lụmẹ tị ka jẹ́-ẹ la ọmyịmyị ẹ-ẹga nya iJisọsị kpụ ị ka la ọhịhị ọmyịmyị-ka (Yẹ ọgba 10)
11. Ẹlịyẹ iJisọsị à tị́ ya ị-ịGalili kọ mẹjẹ nyori e-ebwo nya angịhyẹ kem ọ ya ẹla rụ ka?
11 Ụka ká iJisọsị juwa ị-ịGalili la ẹka nya 32 C.E., angịlẹ kị tịtọ nya ang oriri ọlam-ọlam kem bwu ẹga nyamwụ o ya ẹla ta lẹ. Ma, ọ kpaa irya ka ẹga nya ang ọlẹ kọ baba gụ́ ang oriri ọlam-ọlam. Ọọwa ri ang ọlẹ kọ ka jẹ́-ẹ ya ọhịhị ọmyịmyị-ka haa. IJisọsị tị ya ịnyịnyị nyori angịlẹ kị gbu nyị ka jẹ́-ẹ wuleji bwula igu la ahyẹẹnụ ohyẹẹkpẹ kị ka hịhị gboyi myị́ oyi. A-angị ịmanyị-ịmanyị ịlẹ kị chụ-chụ ọ wẹẹ ya ẹla rụ, jaabwọ kọ ya ụka ọkịla lụka nya Ang Oriri nya Obyi nya Ọngọlahị ka. Ọkọkọ nya ọọwa, o ya ẹla ị-ịGalili rụ ahị ọwawa ịlẹ ká angịnyị wuu ka jẹ́-ẹ yé ịnyị. Ọ dọmwụ yẹkẹẹ: “Ọng myị́ ọng ọlẹ kọ ye ịkaa ọọwa ri lẹ aalẹ, ọngọọwa ka la ọhịhị o-gbe oyi myị́ oyi lẹ. Ugbinyịrọ nyam ọlẹ kam wẹẹ ka hu kpa kaka kịla iya wọnụ nya alodehe ọlẹ wuu ju chajị nya ọhọbịrị nyaa, a ri ịkaa ọọwa ọlẹ kam hu ha lẹ.”—Jọn. 6:51. c
12. Ịyẹ ọngịnyị à tị́ baba nyọka họ kọ ka yé ọhịhị ọmyịmyị-ka?
12 IJisọsị á tị byi ala iJuu ịla ịGalili nyori ahị ọwawa ọwẹ nyị ka ri ịnya ọng myị́ ọng ọlẹ kọ jẹ́ hịhị ẹnẹhẹ lẹ lee kị jẹ́ ma lẹ ka. Angịlẹ kem kị ‘ye ịkaa ọwẹ ri,’ kị ri angị la ọmyịmyị ẹ-ẹga nya iJisọsị, à ka yé ahị ọwawa ọwẹ lẹ. Ụmụmẹ nya angịlẹ kị wa ịlaa nya Angịnyị nya ịKịrayịsị alẹ kaa ya nyori ọngịnyị nyị́ “myị la Ọnyẹwẹ nya Ohe Oluhye” bala o-yoo myị nya ọngọ chịda nyamwụ lẹ aalẹ, ọngọọwa nyị ka la ọchịda myị lẹ. (Jọn. 6:29) Ma, angịhyẹ ẹ-ẹpwụ nya iru nya angịnyị ịlẹ kị myị la iJisọsị ene tị nyẹẹkpẹ dọọ. Ịyẹ tị́ du?
13. Ịyẹ ọngịnyị à tị́ baba nyọka họ ene kọ ka ri ọngọjụgbẹyị nya iJisọsị nyịlẹhị?
13 Ụmụmẹ nya angịnyị ba iJisọsị jẹ chajị nyori ọ ya ang ọlẹ kị baba haa ịnyị. Ang ọlẹ kọ kpaa ịpyọ ri uda ọhọhọ bwula ụkụrwọ ẹbyẹbyị, ang o-yé ri la orwu-ahị́, bala ang ọmẹjẹ ọlẹ kọ pwoku irya nyaa. Ma, iJisọsị tị mẹjẹ nyori ụkụrwọ nya angịjụgbẹyị nyamwụ nyịlẹhị nyị kpoye nya ọwẹ wẹẹ. Ọọlajị nyọka họ ịbaba nya ugbinyịrọ nyaa à du kọ wẹ odehe ka. Jaabwọ kọ byaa nyị “warị wẹ ẹga nyam” wẹẹ, ị baba kị ka ye ọwụrụ-wụrụ ọwẹ myị bala o-ju ihi nya ẹla myị́ ẹla ọlẹ kọ mẹjẹ.—Jọn. 5:40; 6:44.
14. Ịyẹ ahị tị́ ka họ pyii nyọka yé apyobwuna bwu ugbinyịrọ bala ịwọ nya iJisọsị?
14 IJisọsị họ ká iru nya angịnyị ịịwa ka jẹ́ nyori ị baba nyọka la ọmyịmyị. Ọmyịmyị u-uhye nya ịyẹ tị́? Ọmyịmyị u-uhye nya ọngịrị nya ugbinyịrọ bala ịwọ nyamwụ ọlẹ kọ ja ka ya kịliya. Ọmyịmyị ọlịnyị baba ha ala iJuu, ọ tị baba hahị ịnyịnyị alẹ. (Jọn. 6:40) Lẹ, etu nya ẹla ọlẹ ká iJisọsị ya ụ-ụpwụ nya ịJọn 6:53 ri, ahị baba nyọka la ọmyịmyị u-uhye nya iya ọkịlaa-kila nyamwụ nyọka yé ọhịhị ọmyịmyị-ka. Ahị ọwawa ọwẹ tị wụrụ da ha iru nya angịnyị ịlẹ kahị ka jẹ́-ẹ wa kpá myị́ ka.—Efe. 1:7.
15-16. Ẹla ịkpọnchị iyina ahị tị́ jẹ́ bwu ụpwụ nya ịJọn egbeju 6?
15 Ahị jẹ́ ang lụmẹ-lụmẹ ịlẹ kị ju apyobwuna hahị wuu bwu ụpwụ nya ịJọn egbeju 6. Ahị yẹ nyori iJisọsị kaa kpahị ju angịnyị yẹẹyẹẹ. Ụka kọ ju ị-ịGalili, ọ họ alẹdụrụ uda, mẹ ang jẹ u-uhye nya Ịpyị-Adịrahụ nya Ohe, bala ọ-ya ang oriri ha angịnyị ụka kị baba nyamwụ. (Luk. 9:11; Jọn. 6:2, 11, 12) Ọlẹ kọ tị baba gụ́ ri, ọ mẹjẹ nyori ọwa à ri “ịkaa nya ọhịhị” lẹ.—Jọn. 6:35, 48.
16 Angịlẹ kọ wụrụ ‘ịkpịlọ ịkịla’ á ri ịkaa bala ọ-nwa ere lụka nya Ang Oriri nya Obyi nya Ọngọlahị lụka ọkẹkpẹ ka, ị́ tị kaa ri ka daalẹ wẹẹ. (Jọn. 10:16) Ọ tị lịnyị lẹ, ị kaa yé apyobwuna bwu ugbinyịrọ bala ịwọ nya iJisọsị ịKịrayịsị. Ị kaa yé apyobwuna ọọwa bwula ọmyịmyị ọlala u-uhye nya iya ọkịlaa-kịla nya iJisọsị bala ang ịlẹ kọ họ chịkpẹẹ. (Jọn. 6:53) Ọdatị tị ri, angịlẹ kị kaa ri ịkaa bala ọ-nwa ere ọwẹ mẹjẹ nyori ị ri ụpa nya iro ọnwanwa onyeewe bala ọ-la ẹhị ọrịrịị-rịrị nyọka kpeji ị-Ịpyị Adịrahụ. Lẹ, kori kahị ri angịlẹ ká Ohe ya ida wụ lee ịkpịlọ ịkịla, ẹla ọla ụpwụ nya ịJọn egbeju 6 ju apyobwuna hahị nyọka jẹ́ ang u-uhye nyamwụ. O ya ẹla u-uhye nya ọbaba nyọka la ọmyịmyị chajị kahị ka la ọhịhị ọmyịmyị-ka.
EJE 150 Ji Ẹga ny’Ohe Nyọka Chịda
a Ang ọjẹ́jẹ ọlẹ kọ jene nya ọlẹ ya ẹla u-uhye nya ịJọn 6:5-35.
b Enyi ọlẹ ká iJisọsị ya ẹla rụ ku ọmwakpa nya ang ịlẹ ká iJihova họ chajị ká angịnyị ehe ka jẹ́-ẹ hịhị gboyi myị́ oyi.
c ỊJọn egbeju 6 kpa omyi ẹla ọlẹ kị ka jẹ́-ẹ yẹda kaka ri “ọng myị́ ọng” ya ẹla rụ angịlẹ kị ka jẹ́-ẹ yé ọhịhị ogboyi myị́ oyi.—Jọn. 6:35, 40, 47, 54, 56-58.
