À wa egbeju nya ẹla ịla Ẹpwang ọ-Kụ Gbeji nya ẹka ọlẹ rige-rige lẹ? Aalẹ, yẹ kori á ka jụ́ ịtọ ẹla ịlẹ wẹ myị́ wẹẹ:

Ọgụ-ẹpẹtẹ oyina iJihova à tị́ ya deeji u-uhye nya abwọlẹ kahị ka kpa anyang?

Ọ́ kaa họ ẹla be anyang deeji ka, alẹng á tị họ́ọ gụ́ anyang ka ịnyịnyị. Ohe kaa ke ụrụ wo la anyang, abwọlẹ ká ẹla laa bala akama ọlẹ kị kaa yẹ kaa gwoo o-olegu. Ọ tị dahịhilaa nyọka jụ ụkụrwọ nyamwụ họ.—w24.01, ẹbẹ 15-16.

Ụpwụ nya Ala Efesọsị 5:7 yẹkẹẹ: “Ánụ myị kaanụ bala angịnyị inyibyi ịlịnyị ọhẹ-lọhẹ a juwa bá ịngịngịhyẹ bá họ lawụlẹ kokoo!” Ányị ahị tị́ ka jẹ́-ẹ kpa ẹlẹwẹ họ ụkụrwọ?

Ọlẹrụ ịPọlụ wẹẹ dahị ọna kahị ka je ogu ta angịlẹ kị ka du kọ ka lujwo hahị nyọka kpa ehile nya Ohe ka. Ogu ọtịpyọ ọlịnyị ri angịlẹ kahị kaa yẹ jula a-ahịchịng tụ́ angịlẹ kahị kaa yẹ jula ẹ-ẹpwụ nya intanẹtị ọ-kpa ja oja ịnyịnyị.—w24.03, ẹbẹ 22-23.

Oja iyina ahị tị́ ka chewu ke ịlọhị hi?

Ahị baba nyọka chewu ke ịlọhị hi oja i-ju ọdahịhile ka ịlẹ kahị wo bwu ẹga nya aanahị, ẹla ọlẹ kahị tọ wo nyamwụ ka, kị tị ya du wahị bwu ẹga nya angịlẹ kahị jẹ́ ka, oja nya angị ji ẹkpẹ da ogu ịlẹ kịị kpa ijẹẹhị họ lala angị tịtọ nyọka jẹ́ ịBayịbụụ.—w24.04, ẹbẹ 12.

Ẹlịyẹ ahị tị́ jẹ́ ka u-uhye nya abwọlẹ ká iJihova ka la Adịrahụ iSolomọn tụ́ angịlẹ kị gbu ị-ịSọdọm bala iGomora bala angịlẹ kị gbu lụka nya ukpenyi eje?

Áhị jẹ́ kpangga kori ká iJihova á ya eje nya ayịreji ọtata gboyi myị́ oyi waa lẹka. Ma ahị tị jẹ́ nyori ọ jẹ́ ẹla oluhye nyaa wuu, ahyẹẹrwẹrwa nyamwụ tị lụmẹ ịnyịnyị.—w24.05, ẹbẹ 3-4.

Nyọlẹ ká Ohe lala “Ẹjwọ” tị́ du kahị jẹ́ ẹlịyẹ myị̀myị̀? (Ehile. 32:4)

Ahị ka jẹ́-ẹ kaka kpịbaa ẹ-ẹga nya iJihova. Ọ ju ọdahịhile, chajị ọ kaa họ ọnụ ọmyịmyị nyamwụ jịra ụka wuu. Ọ́ kaa yẹda ka, abwẹla nyamwụ bala irya ọlẹ kọ la kaa la jaabwọ kọ la ene pyịyọọ.—w24.06, ẹbẹ 26-28.

Ịyẹ à tị́ ka dang ụbwọ ụka ká mwụ ka ọjịra-jịra onyeewe?

Kpụnịrọ iJihova, ọ ka dang ụbwọ jaabwọ kọ da anchẹ nyamwụ ụbwọ lụka ọkẹkpẹ. A chụ ọjịra-jịra ọlẹ ká ji lẹẹlẹẹ kaka pwoku ọlẹ ká ji ene ka. Ya ụbwọ ju ụkụrwọ ọla ọjịra-jịra onyeewe ọọwa, ká maga nyọka la aligu inyeewe ụ-ụwa.—w24.07, ẹbẹ 26-28.

Ẹlịyẹ iJisọsị à tị́ tịtọ kahị ka jẹ́ bwu oja ọ-kpịta ịta ịlụpwụ nya ịMatiyu egbeju 25?

Oja ọ-kpịta nya ịkpịlọ bala embiri ya ẹla u-uhye nya ọbaba nyọka họ kpẹẹkpẹẹ bala o-godayị giri-giri. Oja ọ-kpịta nya ịyẹẹnọ ị-jẹ́ ẹla bala aluchi ya ọbaba nyọka nwụlanọ bala ọ-kụ lahị. Ọọwa oja ọ-kpịta nya ụnọ nya okpoko à ya ẹla u-uhye nya ọbaba nyọka la kpịra-kpịra lẹlẹ.—w24.09, ẹbẹ 20-24.

Ányị ọnụụkpa ọla ube ịgọgọ nya iSolomọn à tị́ la uhye kaka ba?

Ẹ-ẹpwụ nya ụpwụ nya 2 Ego Ogbegbe 3:4, ịBayịbụụ ịhyẹ chabwọ nya ọnụụkpa ọọwa nyị la uhye lala “apatẹ 180.” Ma ịkịla ịlẹ kị ju ọdahịhile ya nyori nyị la “apatẹ 30.” Abwọ ọchịchị oheeye ọwẹ tị ka pwoku ụka ọchịchị nya ugulọ nya ube ịgọgọ ọwẹ gụ́.—w24.10, ẹbẹ 31.

Ịyẹ à tị́ ri etu nya ọngọ myị ẹrụ ọọjịra-jịra ọ-ka ri ‘ọngọ ye ahụ ookpokpo’? (1 Tim. 3:12)

Ọọwa ri ahụ ookpokpo kem ọ ka ye lẹ, ọ́ tị ka họ ụya ta anyang ịkịla ka ịnyịnyị. Da ọọwa u-uhye, ọ́ ka yẹhị rịrị anyang ịkịla ụ-ụgbẹyị ọlẹ kọ pwoku ka lẹ ka.—w24.11, ẹbẹ 19.

Ịyẹ tị́ du kahị ka jẹ́-ẹ ya nyori ẹla ọlụpwụ nya ịJọn 6:53 á ri ang ọ-ka yẹ kpa họ lụka nya Ang Oriri nya Obyi nya Ọngọlahị ka?

ỊJọn 6:53 ya ọbaba nyọka ri ugbinyịrọ nya iJisọsị bala ọ-ka nwa ịwọ nyamwụ. IJisọsị ya ẹlẹwẹ la ẹka nya 32 C.E. ị-ịGalili ta ala iJuu ịlẹ kị baba nyọka la ọmyịmyị ẹ-ẹga nyamwụ. Ma, ọhọhọ nya Ang Oriri nya Obyi nya Ọngọlahị tị wẹ ka yeji i-iJerusalẹm lala ẹka ị-ịlahị nyọọwa. Angịlẹ kị ka kpeji ta iJisọsị e-epwoohe, o ya ẹla ta ụka ọwẹ lẹ.—w24.12, ẹbẹ 10-11.