Ọlẹrụ ịPọlụ da ụpwụ kịla iTimoti, kọ ri ọngọgbahị nya ọjịra-jịra lala ọwọwa yẹkẹẹ: “M jam gbileng ụbwọ ụ-ụrụ ị-ịlahị nya Ohe Oluhye bala ịnya Ọngọlahị ịKịrayịsị iJisọsị bala alegu-ẹrụ ịlẹ kị chụchụ ká ka kpa ala ịlẹ kam mẹjẹng wẹ wuu họ ụkụrwọ ẹ-ẹpwụ nya ọ-la ọháha ẹ-ẹga nya ọngọngọhẹ gụ ọngọkịla datị kpong-kpong kaka.”—1 Tim. 5:21.

Nyọka dahị ụbwọ jẹ́ angịlẹ ká alegu-ẹrụ ịwẹ ri, ahị ka jene ya ẹla u-uhye nya angịlẹ kị ka jẹ́-ẹ ji ẹpwụ nya ebwo nya alegu-ẹrụ ịwẹ ka. Ọ la gbagbịla nyori ị́ ka jẹ́-ẹ ri angịhyẹ nya angị 144,000 ka. Ụka ká ịPọlụ da ụpwụ kịla iTimoti lẹ, ọngọngọhẹ nya angịlẹ ká Ohe ya ida wụ́ á wuleji bwula igu ka epwoohe lẹka. Alẹrụ bala angịkịla ịlẹ ká Ohe ya ida wụ́ á tụụbwọ hi ugbinyịrọ nya ọngịnyị ehe yẹ ka ịnya olegu lẹka, lẹ ị́ ka jẹ́-ẹ ri “alegu-ẹrụ ịlẹ kị chụ-chụ” ka.—1 Kọr. 15:50-54; 1 Tẹs. 4:13-17; 1 Jọn. 3:2.

Ịnyịnyị, “alegu-ẹrụ ịlẹ kị chụ-chụ” à ka jẹ́-ẹ ri alẹgu-ẹrụ ịlẹ kị la egbeju ọngịrị lụka nya iNuwa ka. Alegu-ẹrụ ịịwa chẹkpẹ ju Ohe Onyobyi kpụ ị yẹ ka ri alegu-inyibyi, du kị ri aluji nya iJisọsị. (Ọmwụ. 6:2; Luk. 8:30, 31; 2 Pit. 2:4) Ụ-ụwa ị-ịlahị, iJisọsị ka waa ju ka ụjẹ ọ-la ọbaba ka ẹ-ẹpwụ nya ẹka 1,000 ene kọ ka taa ịwa bala Ohe Onyobyi ayịreji.—Jud. 6; Ọwụ. 20:1-3, 10.

“Alegu-ẹrụ ịlẹ kị chụ-chụ” ịlẹ ká ịPọlụ ya ẹla rụ wẹ tịtị ka ri alegu-ẹrụ ịlẹ kị kaa chẹkpẹ ju “Ohe Oluhye bala . . . ịKịrayịsị iJisọsị.”

Alegu-ẹrụ ju iru lala ụnọ ịmanyị tị́ juwa kị kaa họ kpẹẹkpẹẹ. (Hib. 12:22, 23) Ọ lala o-ri ụkụrwọ ụma ookpokpo iJihova à kaa ya ha ịwa wuu họ ụka ookpokpo ka. (Ọwụ. 14:17, 18) Ọ-chụ pwokwita, iJihova ya ụkụrwọ ha olegu-ẹrụ ookpokpo nyọka ta isoja 185,000 nya ala Asiriya ayịreji. (2 Ịdị. 19:35) Ma ọ chịkpẹẹ myị́ ká alegu-ẹrụ lụmẹ-lụmẹ ị ka du ẹrụ nyọka “ku angịlẹ wuu kị kaa họ ang onyobyi bala angịlẹ wuu kị kaa họ ká angịnyị ehe aanaa kaa wu ori nya ọhọbịrị ọhọhọ kpehe hi ịpyị adịrahụ” nya iJisọsị ịnyịnyị. (Mat. 13:39-41) Alegu-ẹrụ ịhyẹ ka la ụkụrwọ nyọka “be ẹkọ wụrụ angịnyị nya Ohe Oluhye ịlam-ịlam ịlẹ wuu ká Ohe Oluhye ayịdang chụchụ ha ịlọmwụ kaka jịra” e-epwoohe myị́. (Mat. 24:31) Alegu-ẹrụ ịkịla tị la ụkụrwọ nyọka ‘kpẹhị rịrịịhị’ ụka myị́ ụka.—Eje. 91:11; Mat. 18:10; kụ ẹhị yẹ ịMatiyu 4:11; iLuku 22:43.

“Alegu-ẹrụ ịlẹ kị chụ-chụ” ịlẹ kị ya ẹla rụ ụ-ụpwụ nya 1 iTimoti 5:21 ka ri alegu-ẹrụ ịlẹ ká Ohe ya ụkụrwọ ọdatị ha nyọka kpẹhị rịrị ọjịra-jịra nya angịnyị nyamwụ myị́. Ịgba ịlẹ kị jene nya ọwẹ mẹjẹ nyori ịPọlụ ya irya ha angịgbahị nya ọjịra-jịra u-uhye nya abwọlẹ kị ka bwu họ ụkụrwọ nyaa, bala o-ri aanahị baba nyọka ya ihi haa ịnyị. Angịgbahị nya ọjịra-jịra baba nyọka họ ụkụrwọ nyaa “ẹ-ẹpwụ nya ọ-la ọháha ẹ-ẹga nya ọngọngọhẹ gụ ọngọkịla datị kpong-kpong” ka, ị́ tị ka cheje nya ẹla la ọ-kụ irya jwoo yẹẹyẹẹ ka lẹ ka. Ẹla ọkpọnchị ọlẹ kọ du kị ka ba ẹla ọlẹ ká olegu ịgọgọ kpa ịPọlụ da jẹ ri, ị wẹẹ họ ụkụrwọ “ị-ịlahị nya Ohe Oluhye bala ịnya Ọngọlahị ịKịrayịsị iJisọsị bala alegu-ẹrụ ịlẹ kị chụ-chụ.” Ọ tị la gede-gede nyori alegu-ẹrụ ịhyẹ la ụkụrwọ u-uhye nya ọjịra-jịra, lala ọ-ka chewu ke anchẹ nya Ohe, ọ-kpẹhị rịrị ụkụrwọ nya ẹrụ ọnyịịla ọ-kpa pyẹ, bala ọ-kpa ẹla ọlẹ kị yẹ ka ya je iJihova.—Mat. 18:10; Ọwụ. 14:6.