Ị mam la 1983. Ụka kam ri onjwo ochiche wẹẹ, m̀ la ogogo yẹẹyẹẹ, ma ụka kam gu ẹka iwo, ịnyịrọ wuu dọmwụ nyọka jụm. Lala ẹka imiiye ku ẹkpẹ nyọọwa, m̀ chahị lụtụrụ ẹnẹhẹ lẹ m jẹ́ gu bịlẹ kaka lẹlẹ. Jaabwọ myị́ abwọ kam maga nyọka hu ẹta nyam, ḿ jẹ́ họ ịnyị myị́ ka. Bwu ẹnụmwụ ọwẹ daalẹ, ḿ jẹ́ jẹdịyẹ kaka. Ẹdụrụ ọwẹ dudu kam nwà gụ ọọwa kaka ịnyịnyị. Daalẹ, m̀ ri ochiche lala onjwo.

Ẹ-ẹpwụ nya ọya ịmanyị-manyị ku ẹkpẹ nyọlẹ ká ẹdụrụ ọwẹ jụm kam jẹ́-ẹ kpehe hi ẹpwa kaka, Alibeenu nya iJihova imiiye ịhyẹ juhi ụga. Ụka ká angga á warị, m̀ kaa maga nyọka ya ịlọm kpịbaa ene-ene, ma la ahyẹẹnụ ọwẹ m̀ ya iwe da ká anyang ịịwa ka ya ẹla balam. Jaabwọ kị wẹẹ ya ẹla u-uhye nya ịparadayịsị, m̀ kpịtịya nya ẹla ọlẹ kam wo ụka kam lala ẹka ịrụ. Ụka ọọwa ọngọhẹ ọlẹ kọ kaa kpa ẹrụ ọnyịịla pyẹ ẹ-ẹpwụma ọkịla ká ẹnyị nyamwụ ri Jethro, kọ kụ Suriname, kaa wẹ epweji nyahị ụka okpokpo ẹ-ẹpwụ nya ọya. Ọ kaa jẹ́ ịBayịbụụ ta adam. Jethro jẹ́-ẹ kpam kẹmbẹẹ. Ọ hám yẹẹyẹẹ. Ịnyịnyị, adam bala ịnam ọgbahị anyị kaa kpam bịlaa ka ọjịra-jịra nya Alibeenu nya iJihova, ọlẹ kị kaa la e-epweji nyahị. Lẹ, ụka ká Florence, ọngọhẹ lẹpwụ nya anyang ịlẹ kị jum ụga ẹnẹwẹ tọm wo kori kọ hám nyọka jẹ́ ịBayịbụụ gụ olene, m̀ myị.

Florence tịrẹkpẹ bala Justus ọrụmwụ, ọọwa lẹ ị dọmwụ nyọka jẹ́ ịBayịbụụ balam lẹlẹ. Ụka kị yẹ jẹ́ nyori ḿ jẹ́ wa ụpwụ ka, ị dam ụbwọ nyọka jẹ́-ẹ wa ụpwụ. Nyọlẹ kọ nọ chẹẹ, m̀ jẹ́-ẹ wa ụpwụ lịlọm. Ẹnẹhẹ lẹ, ahụ bala ọrụ ịwẹ à byim nyori nyị ya ịwa nyị ka họ ụkụrwọ ịị Suriname lẹ. O tolujwo nyori, ọngọhẹ á ji o-Orealla kọ ka kịnyaa la ọ-mẹ ịBayịbụụ jẹ́m kaka. Ma, m̀ tị chị ọkẹkẹnị nyori iJihova á deeri him ka.

Lụka o-kpii ku ẹkpẹ nyọọwa, ọngọ ye ịlahị nya ụgbẹyị ọhẹ ọlẹ ká ẹnyị nyamwụ ri Floyd pwụ eji o-Orealla. Ọ tọm ụka kọ wẹẹ kpa ẹrụ ọnyịịla pyẹ bwu ẹpwa ka ẹpwa. Ụka kọ ya ẹla nya ịBayịbụụ ọjẹ́jẹ tam, m̀ chị ụmwẹhụ. Ọ tọm wo yẹkẹẹ: “Ịyẹ tị́ du ká wẹẹ chị ụmwẹhụ?” M̀ byoo nyori m̀ jẹ́ ụpwụ ọlẹ kọ ri, What Does God Require of Us? bala ọ-dọmwụ nyọka jẹ́ ụpwụ ọlẹ kọ ri, Knowledge That Leads to Everlasting Life * lẹ. M̀ wụlẹ ya joo ang odudu ká ang ọjẹ́jẹ ọọwa mwụ ba. Floyd jẹ́ ụpa ohihi nya Knowledge book tam, ma ị kpọọ ọọwa ịnyịnyị rụ kaka họ ụkụrwọ ẹ-ẹga ọkịla. Lẹ, m ye ọngọ ka mẹ ịBayịbụụ jẹ́m kaka myị́myị́ lẹlẹ.

Ma la 2004, ị ya Granville bala Joshua, angị imiiye ịlẹ kị kaa kpa ụka nyaa wuu ya ẹrụ ọnyịịla  du warị wẹ Orealla. Ị kaa ya ẹla nya Ohe bwu ẹpwa ka ẹpwa, lẹ ị tọm lẹlẹ. Ụka kị tọm wo kori kam tịtọ nyọka jẹ́ ịBayịbụụ, m̀ chị ụmwẹhụ. M̀ byaa nyị mẹ Knowledge book jẹm bwu ọmwụ ọdada mẹ. M̀ tịtọ kam ka yẹ kori ká ang ọmẹjẹ nyaa á ka la okpokpo bala ịnya angịlẹ kị mẹ ịBayịbụụ jem ene-ene. Granville byim nyori ịwa nyị kaa họ ọjịra-jịra ám̀ e-epweji nyahị. Ịnọ ḿ kpehe hi ẹpwa nyam kaka lala ẹka iwo myị́ lẹ, m̀ tị tịtọ nyọka ka. Ọọwa lẹ Granville à wẹ ẹpwa nyam kaka hum hụ oje nya alokuku, lẹ ọ gum ka Ube nya Ịpyị-Adịrahụ lẹlẹ.

Ụka ọlẹ kọ nọ chẹẹ, Granville jum ọhụ nyọka juwa ẹ-ẹpwụ nya angị kaa la ụpa ịị Theocratic ministry School. O yekeẹ: “À ju ẹjẹ́ẹ odu ịnyị, à jẹ́-ẹ ya ẹla. À ka la ụpa nya ẹla o-ya dodehe ha alụma kpá ẹnẹhẹ wẹẹ. À ja họ ịnyị pyii.” Ọmyi ẹla nya ọhụ ojuju ọwẹ du kam la ahị ọdahile.

M̀ dọmwụ nyọka kpa ẹrụ ọnyịịla pyẹ bala Granville. Ma, agbẹyị lụmẹ-lụmẹ la kụcha-kụcha kpoye nyọka kụ oje nya okuku. Lẹ, m̀ byi Granville nyị hum hụ wheelbarrow kọ kpam jẹ mẹ. Ọọwa tị dụbwọ yẹẹyẹẹ. M̀ hu enyi Ohe la Ọya Ohene nya 2005. Lụka o-kpii ku ẹkpẹ nyọọwa, aanahị ịwẹ mẹjẹ́m jaabwọ kam ka kpẹhị rịrị apwụ ọọjịra-jịra bala ọ-ka kpẹhị rịrị ang ị-kpa du ang ịla Ube nya Ịpyị-Adịrahụ.

La 2007, ọ tolujwo lụmẹ nyọlẹ ká adam chabwọ bwu ụmwụ, ká ang nya engine nyamwụ họọ ang kpụ̀ ọ gbu. Ẹla ọọwa jụ ugbiyegu nyahị yẹẹyẹẹ. Granville raabwọ balahị ene kọọ mẹ ụpwụ ịgọgọ ịlẹ kị ka kpụụhị ẹjẹ jẹ́ẹhị. Ẹka imiiye ku ẹkpẹ nyọọwa, ejiri wuhi nyọlẹ ká ẹla onyobyi ọkịla họ​—Granville gbu ịnyịnyị nyọlẹ ká ụmwụ byi enyi lọọ.

Chajị nyọọwa, ọjịra-jịra nyahị ọ-pyịnyẹng ọlẹ kọ wẹẹ ga ẹrwa wẹẹ á la ọngọgbahị nya ọjịra-jịra ọhẹ-lọhẹ dala ọngọ myẹrụ ookpokpo kaka. Igu nya Granville jụm yẹẹyẹẹ chajị o ri oligu nyam ọlam-ọlam. Ọ kaa dam ụbwọ ụka myị́ ụka nyọka tụ ju iJihova chwẹẹ bala o-ka ye ang ịlẹ kị bam ba. M̀ la ụkụrwọ nyọka wa Ẹpwang ọ-Kụ Gbeji ọọjịra-jịra nyọlẹ kọ gbu kpá bwaa. M̀ wa pwụ ọgba oheeye lẹ m dọmwụ nyọka jida la egbejida juwa nyà bwu ahị nyam lẹlẹ. Ọ la kpụ̀ m hireji bwu ẹga ọ-kụ ya ẹla.

M̀ dọmwụ nyọka chị ọkẹkẹnị gụ olene ụka ọlẹ ká aanahị ịhyẹ bwu ọjịra-jịra ọkịla wẹ ka dahị ụbwọ o-Orealla. Ịnyịnyị, egbeju ẹpwa ya Kojo, kọ kaa kpa ụka nyamwụ wuu ya ẹrụ ọnyịịla du wahị. M̀ chị ọkẹkẹnị yẹẹyẹẹ nyori ịnam bala ọọnam ọlẹng ochiche dọmwụ nyọka jẹ́ ịBayịbụụ gbee kịị hu enyi Ohe. La Ọya Ọhata nya 2015 lẹ, ị chụm nya ọngọ myẹrụ ọọjịra-jịra lẹlẹ. Nyọlẹ kọ nọ chẹẹ, m̀ họ ụpa nya ẹla ọ-ya dodehe nya ọgbanyẹ-ọgbạnyẹ nyam. La ahyẹẹnụ ọọwa, m̀ chị ụmwẹhụ, m̀ myịmyị nyị egbejida ụka kam kpịtịya nya ẹla ọlẹ ká Granville byim la ẹka ịmanyị-manyị kẹkpẹ nyori: “À ka họ ụpa nya ẹla o-ya dodehe ha alụma kpá ẹnẹhẹ wẹẹ. À ja họ ịnyị pyii.”

Bwula program ịla JW Broadcasting^®, m̀ wẹ ka jẹ́ ang u-uhye nya aanahị ịkịla ịlẹ kị juwa iwe-ahụrụ ị-lala ịnyam. Ma, nanana nyori i ju ẹjẹẹ, ị kaa kpa ọhịhị nyaa họ ang lụmẹ-lụmẹ bala ọ-chị ọkẹkẹnị. Am ịnyịnyị la ang ịlẹ kam ka jẹ́-ẹ họ. M̀ tịtọ kam ka họ ụkụrwọ ha iJihova jaabwọ kam ka họ ba myị́, ọọwa à dudu kam dọmwụ nyọka ye ịlahị nya ụgbẹyị lẹ. M̀ wo oja ọkpịpyọ-kpịpyọ ọhẹ ọlẹ kam yahị guru ka la Ọya Ohikichu nya 2019! La ọya ọọwa m̀ wẹ ka jẹ́ nyori ị chụm nyọka ri ọngọgbahị nya ọjịra-jịra ọlẹ ká aanahị ịlụwa la angị iwo ine.

Ọ myịm lẹhị yẹẹyẹẹ nya aanahị alẹng bala anyang ịlẹ kị jẹ́ ang balam, dam ụbwọ nyọka gbịgba ha iJihova. Ọlẹ kọ gụgụ wuu, ọ myịm lẹhị nyọlẹ ká iJihova á deeri him ka.